IKELAKELE

1 Kẹsena Jihova ọ tẹ ta ẹme kẹ Mosis evaọ udhude Saena,+ evaọ uwou-udhu omakugbe na,+ evaọ ẹdẹ ọsosuọ amara avọ ivẹ, evaọ ukpe avọ ivẹ nọ a no ẹkwotọ Ijipti no.+ Ọ ta nọ: 2 “Kele unu+ ogbotu ahwo Izrẹl* na soso omomọvo* lele iviuwou rai, lele inuwou abọ ọsẹ rai, who re kele unu edẹ ezae na kpobi. 3 Whẹ avọ Erọn wha re kere edẹ ahwo kpobi nọ a rrọ umuo ikpe udhe kpohọ ehru+ fihotọ lele ọvuọ itu rai,* enọ e rẹ sae jọ usu egbaẹmo Izrẹl.

4 “Rehọ ọzae ọvo no orua kpobi ze kugbe oma; omomọvo ọ rẹ jọ ọnọ o wuzou unuwou abọ ọsẹ riẹ.+ 5 Enana họ edẹ ezae nọ i ti dikihẹ gba owhẹ: ọrọ orua Rubẹn, Elaezọ+ ọmọzae Shẹdiọ; 6 ọrọ orua Simiọn, Shilumiẹl+ ọmọzae Zurishadae; 7 ọrọ orua Juda, Nashọn+ ọmọzae Aminadab; 8 ọrọ orua Isaka, Nẹtanẹl+ ọmọzae Zua; 9 ọrọ orua Zẹbulọn, Ẹlayab+ ọmọzae Hilọn; 10 erọ emezae Josẹf: ọnọ a rẹ rehọ no orua Ifremu+ ze họ Ẹlishama ọmọzae Amaehọd; ọnọ a rẹ rehọ no orua Manasẹ ze họ Gamaliẹl ọmọzae Pẹdazọ; 11 ọrọ orua Bẹnjamin, Abidan+ ọmọzae Gidionai; 12 ọrọ orua Dan, Ahayiza+ ọmọzae Amishadae; 13 ọrọ orua Asha, Pegiẹl+ ọmọzae Ọkran; 14 ọrọ orua Gad, Elayasaf+ ọmọzae Duẹl; 15 ọrọ orua Naftalae, Ahaera+ ọmọzae Inan. 16 Enana họ enọ a se no ogbotu na ze. Ae họ enọ i wuzou erua+ abọ ọsẹ rai, enọ i wuzou idu ahwo Izrẹl.”+

17 Fikiere Mosis avọ Erọn a tẹ rehọ ezae nana nọ a salọ edẹ rai na. 18 A koko ogbotu na kpobi họ evaọ ẹdẹ ọsosuọ amara avọ ivẹ na, re a ruẹsi kere edẹ rai fihotọ omomọvo, lele ọvuọ uviuwou rai, gbe unuwou abọ ọsẹ rai, no umuo ikpe udhe kpohọ ehru,+ 19 nwane wọhọ epanọ Jihova ọ ta kẹ Mosis. Fikiere o te kere edẹ rai fihotọ evaọ udhude Saena.+

20 A kere edẹ emezae Rubẹn fihotọ, uyẹ ọmọ ọsosuọ Izrẹl,+ lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na, a kele i rai omomọvo, 21 yọ unu ahwo nọ a kere edẹ rai fihotọ evaọ orua Rubẹn e jọ idu udhuvẹ-gbezeza gbe egba isoi (46,500).

22 A kere edẹ ahwo uyẹ Simiọn+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai omomọvo, 23 yọ unu ahwo nọ a kere edẹ rai fihotọ evaọ orua Simiọn e jọ idu udhuvẹ gbe ikpegbizii gbe egba esa (59,300).

24 A kere edẹ ahwo uyẹ Gad+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 25 yọ unu ahwo nọ a kere edẹ rai fihotọ evaọ orua Gad e jọ idu udhuvẹ-gbisoi gbe egba ezeza gbe udhuvẹ-gbikpe (45,650).

26 A kere edẹ ahwo uyẹ Juda+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 27 yọ unu ahwo nọ a kere edẹ rai fihotọ evaọ orua Juda e jọ idu udhosa gbe ikpegbene gbe egba ezeza (74,600).

28 A kere edẹ ahwo uyẹ Isaka+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 29 yọ unu ahwo nọ a kere edẹ rai fihotọ evaọ orua Isaka e jọ idu udhuvẹ gbe ikpegbene gbe egba ene (54,400).

30 A kere edẹ ahwo uyẹ Zẹbulọn+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 31 yọ unu ahwo nọ a kere edẹ rai fihotọ evaọ orua Zẹbulọn e jọ idu udhuvẹ gbe ikpegbihrẹ gbe egba ene (57,400).

32 A kere edẹ ahwo uyẹ Josẹf nọ i no oma Ifremu+ ze fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 33 yọ unu ahwo nọ a kere edẹ rai fihotọ evaọ orua Ifremu e jọ idu udhuvẹ gbe egba isoi (40,500).

34 A kere edẹ ahwo uyẹ Manasẹ+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 35 yọ unu ahwo nọ a kere edẹ rai fihotọ evaọ orua Manasẹ e jọ idu ọgbagbivẹ gbe egba ivẹ (32,200).

36 A kere edẹ ahwo uyẹ Bẹnjamin+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 37 yọ unu ahwo nọ a kere edẹ rai fihotọ evaọ orua Bẹnjamin e jọ idu ọgbagbisoi gbe egba ene (35,400).

38 A kere edẹ ahwo uyẹ Dan+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 39 yọ unu ahwo nọ a kere edẹ rai fihotọ evaọ orua Dan e jọ idu udhosa-gbivẹ gbe egba ihrẹ (62,700).

40 A kere edẹ ahwo uyẹ Asha+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 41 yọ unu ahwo nọ a kere edẹ rai fihotọ evaọ orua Asha e jọ idu udhuvẹ-gbọvo gbe egba isoi (41,500).

42 A kere edẹ ahwo uyẹ Naftalae+ fihotọ, lele ọvuọ uviuwou rai, gbe unuwou abọ ọsẹ rai. Ezae kpobi no umuo ikpe udhe kpohọ ehru nọ e rẹ sae jọ usu egbaẹmo na a kele i rai, 43 yọ unu ahwo nọ a kere edẹ rai fihotọ evaọ orua Naftalae e jọ idu udhuvẹ gbe ikpegbesa gbe egba ene (53,400).

44 Enana họ enọ Mosis o kere edẹ rai fihotọ avọ Erọn gbe ahwo ikpegbivẹ nọ i wuzou evaọ Izrẹl, omomọvo rai o dikihẹ kẹ ọvuọ unuwou abọ ọsẹ riẹ. 45 Ahwo Izrẹl kpobi nọ a rrọ umuo ikpe udhe kpohọ ehru nọ e rẹ sae jọ usu egbaẹmo Izrẹl a kere edẹ rai fihotọ lele ọvuọ unuwou abọ ọsẹ riẹ, 46 yọ unu ahwo kpobi nọ a kere edẹ rai fihotọ e jọ idu egba ezeza gbe esa gbe egba isoi gbe udhuvẹ-gbikpe (603,550).+

47 Rekọ a kere edẹ ahwo Livae+ kugbe ai fihọ orua esẹ rai hi.+ 48 Kẹsena Jihova ọ tẹ ta kẹ Mosis nọ: 49 “Ahwo orua Livae ọvo who re kere edẹ rai fihotọ họ, yọ who re kele unu rai kugbe ahwo Izrẹl edekọ họ.+ 50 Whọ rẹ rọ ahwo Livae na mu rọkẹ iruẹru uwou-udhu Isẹri na+ re a jẹ rẹrote ekwakwa riẹ kpobi gbe oware kpobi nọ o rrọ rọkẹ ẹe.+ Ae a rẹ wọ uwou-udhu na gbe ekwakwa riẹ kpobi,+ yọ a rẹ jọ etẹe gbodibo,+ a vẹ jẹ fa evuẹ rai wariẹ uwou-udhu na họ.+ 51 Oke kpobi nọ o gwọlọ nọ a rẹ wọ uwou-udhu na, ahwo Livae họ enọ e rẹ rae fihọ otọ;+ yọ okenọ a tẹ gwọlọ whẹ uwou-udhu na họ, ahwo Livae họ enọ e rẹ whẹe họ; yọ ohwo kpobi nọ a kẹ udu hu* nọ ọ nya kẹle iẹe a re kpei no.+

52 “Ohwo Izrẹl kpobi ọ rẹ rọ uwou-udhu riẹ vi oria nọ a kẹ riẹ inọ ọ fa evuẹ riẹ họ, evaọ ẹko erua esa ọvuọvo+ nọ a ghale ohwo kpobi fihọ* lele ọvuọ itu rai.* 53 Yọ ahwo Livae a rẹ fa evuẹ rai wariẹ uwou-udhu Isẹri na họ, re mẹ siọ eva ba ẹdha kẹ ogbotu ahwo Izrẹl;+ yọ ahwo Livae họ enọ e rẹ rẹrote* uwou-udhu Isẹri na.”+

54 Ahwo Izrẹl a ru eware kpobi nọ Jihova ọ ta kẹ Mosis nọ o ru. Nwanọ ere a ru.

2 Jihova ọ tẹ ta kẹ Mosis avọ Erọn nọ: 2 “Ahwo Izrẹl a rẹ fa evuẹ rai fihọ oria nọ a kẹ ẹko erua esa+ nọ a ghale rai fihọ, ohwo kpobi ọ rẹ fa kẹle ebana* unuwou abọ ọsẹ riẹ. A rẹ fa evuẹ rai rẹriẹ ovao ku uwou-udhu omakugbe na wariẹe họ.

3 “Enọ e rẹ fa evuẹ fihọ abọ ovatha-ọre, ofẹ nọ ọre ọ rẹ va no ze họ ẹko erua esa orọ evuẹ Juda lele ọvuọ itu rai;* ọnọ o wuzou emezae Juda họ Nashọn+ ọmọzae Aminadab. 4 Enọ a kere edẹ rai fihotọ evaọ ogbaẹmo riẹ e jọ idu udhosa gbe ikpegbene gbe egba ezeza (74,600).+ 5 Enọ e rẹ fa evuẹ fihọ abotọ riẹ họ orua Isaka; ọnọ o wuzou emezae Isaka họ Nẹtanẹl+ ọmọzae Zua. 6 Enọ a kere edẹ rai fihotọ evaọ ogbaẹmo riẹ e jọ idu udhuvẹ gbe ikpegbene gbe egba ene (54,400).+ 7 Ọnọ ọ rẹ kẹle iẹe* evaọ abọdekọ họ orua Zẹbulọn; ọnọ o wuzou emezae Zẹbulọn họ Ẹlayab+ ọmọzae Hilọn. 8 Enọ a kere edẹ rai fihotọ evaọ ogbaẹmo riẹ e jọ idu udhuvẹ gbe ikpegbihrẹ gbe egba ene (57,400).+

9 “Enọ a kere edẹ rai fihotọ kpobi evaọ egbaẹmo erọ evuẹ Juda e jọ idu udhuzii-gbezeza gbe egba ene (186,400). Ae họ enọ e rẹ kake wọ ruọ edhere.+

10 “Ẹko erua esa orọ evuẹ Rubẹn+ lele ọvuọ itu rai* a re wohọ ofẹ obọze ovatha-ọre; ọnọ o wuzou emezae Rubẹn họ Elaezọ+ ọmọzae Shẹdiọ. 11 Enọ a kere edẹ rai fihotọ evaọ ogbaẹmo riẹ e jọ idu udhuvẹ-gbezeza gbe egba isoi (46,500).+ 12 Enọ e rẹ fa evuẹ fihọ abotọ riẹ họ orua Simiọn; ọnọ o wuzou emezae Simiọn họ Shilumiẹl+ ọmọzae Zurishadae. 13 Enọ a kere edẹ rai fihotọ evaọ ogbaẹmo riẹ e jọ idu udhuvẹ gbe ikpegbizii gbe egba esa (59,300).+ 14 Ọnọ ọ rẹ kẹle iẹe* evaọ abọdekọ họ orua Gad; ọnọ o wuzou emezae Gad họ Elayasaf+ ọmọzae Ruẹl. 15 Enọ a kere edẹ rai fihotọ evaọ ogbaẹmo riẹ e jọ idu udhuvẹ-gbisoi gbe egba ezeza gbe udhuvẹ-gbikpe (45,650).+

16 “Enọ a kere edẹ rai fihotọ kpobi evaọ egbaẹmo erọ evuẹ Rubẹn e jọ idu udhuhrẹ gbe ikpegbọvo gbe egba ene gbe udhuvẹ-gbikpe (151,450), yọ ae a rẹ jọ erọ avọ ivẹ nọ e rẹ wọ ruọ edhere.+

17 “Nọ a tẹ wọ uwou-udhu omakugbe na kpohọ oria ofa,+ evuẹ ahwo Livae o rẹ jọ udevie, a vẹ fa ivuẹ nọ i kiọkọ wariẹe họ.

“A rẹ wọ ruọ edhere unọjọ utọjọ lele epanọ a ro wohọ na,+ aikpobi ọvuọ oria riẹ, lele ọvuọ ẹko erua esa rai.

18 “Ẹko erua esa orọ evuẹ Ifremu lele ọvuọ itu rai* a re wohọ ofẹ ukiediwo-ọre; ọnọ o wuzou emezae Ifremu họ Ẹlishama+ ọmọzae Amaehọd. 19 Enọ a kere edẹ rai fihotọ evaọ ogbaẹmo riẹ e jọ idu udhuvẹ gbe egba isoi (40,500).+ 20 Onọ o rẹ kẹle iẹe họ orua Manasẹ;+ ọnọ o wuzou emezae Manasẹ họ Gamaliẹl+ ọmọzae Pẹdazọ. 21 Enọ a kere edẹ rai fihotọ evaọ ogbaẹmo riẹ e jọ idu ọgbagbivẹ gbe egba ivẹ (32,200).+ 22 Ọnọ ọ rẹ kẹle iẹe* evaọ abọdekọ họ orua Bẹnjamin; ọnọ o wuzou emezae Bẹnjamin họ Abidan+ ọmọzae Gidionai. 23 Enọ a kere edẹ rai fihotọ evaọ ogbaẹmo riẹ e jọ idu ọgbagbisoi gbe egba ene (35,400).+

24 “Enọ a kere edẹ rai fihotọ kpobi evaọ egbaẹmo erọ evuẹ Ifremu e jọ idu udhusoi-gberee gbe ẹgba ọvo (108,100), yọ ae a rẹ jọ erọ avọ esa nọ e rẹ wọ ruọ edhere.+

25 “Ẹko erua esa orọ evuẹ Dan lele ọvuọ itu* rai a re wohọ ofẹ ẹkpẹlobọ ovatha-ọre; ọnọ o wuzou emezae Dan họ Ahayiza+ ọmọzae Amishadae. 26 Enọ a kere edẹ rai fihotọ evaọ ogbaẹmo riẹ e jọ idu udhosa-gbivẹ gbe egba ihrẹ (62,700).+ 27 Enọ e rẹ fa evuẹ fihọ abotọ riẹ họ orua Asha; ọnọ o wuzou emezae Asha họ Pegiẹl+ ọmọzae Ọkran. 28 Enọ a kere edẹ rai fihotọ evaọ ogbaẹmo riẹ e jọ idu udhuvẹ-gbọvo gbe egba isoi (41,500).+ 29 Ọnọ ọ rẹ kẹle iẹe* evaọ abọdekọ họ orua Naftalae; ọnọ o wuzou emezae Naftalae họ Ahaera+ ọmọzae Inan. 30 Enọ a kere edẹ rai fihotọ evaọ ogbaẹmo riẹ e jọ idu udhuvẹ gbe ikpegbesa gbe egba ene (53,400).+

31 “Enọ a kere edẹ rai fihotọ kpobi evaọ egbaẹmo erọ evuẹ Dan e jọ idu udhuhrẹ gbe ikpegbihrẹ gbe egba ezeza (157,600). Ae a rẹ jọ erọ urere nọ e rẹ wọ ruọ edhere,+ lele ẹko erua esa rai.”

32 Enana họ ahwo Izrẹl nọ a kere edẹ rai fihotọ lele ọvuọ unuwou abọ ọsẹ rai; unu ahwo kpobi nọ a jọ ivuẹ na nọ a kere edẹ rai fihọ ogbaẹmo na e jọ idu egba ezeza gbe esa gbe egba isoi gbe udhuvẹ-gbikpe (603,550).+ 33 Rekọ a kere edẹ+ ahwo Livae kugbe ahwo Izrẹl edekọ họ,+ nwane wọhọ epanọ Jihova ọ ta kẹ Mosis. 34 Ahwo Izrẹl a ru eware kpobi nọ Jihova ọ ta kẹ Mosis nọ o ru. Enẹ a jẹ hae fa evuẹ rai fihọ lele ọvuọ ẹko erua esa rai,+ yọ ere a jẹ hae rọ wọ ruọ edhere,+ omomọvo lele uviuwou riẹ je lele ọvuọ unuwou abọ ọsẹ riẹ.

3 Whaọ enana họ inuwou* Erọn avọ Mosis evaọ ẹdẹ nọ Jihova ọ rọ ta ẹme kẹ Mosis evaọ Ugbehru Saena.+ 2 Enana họ edẹ emezae Erọn: ọmọ ọsosuọ họ Nedab, gbe Abaihu,+ Ẹlieza,+ gbe Itama.+ 3 Eye họ edẹ emezae Erọn, izerẹ nọ a wholo nọ a ro mu* re a jọ izerẹ.+ 4 Rekọ Nedab avọ Abaihu a whu evaọ aro Jihova okenọ a dhe idhe* nọ e rọwokugbe uzi hi evaọ aro Jihova+ evaọ udhude Saena, yọ a yẹ ọmọzae ọvuọvo ho. Rekọ Ẹlieza+ avọ Itama+ a ruabọhọ iruo ozerẹ nọ a je ru na kugbe Erọn ọsẹ rai.

5 Jihova ọ tẹ ta kẹ Mosis nọ: 6 “Rehọ orua Livae+ lahwe, re whọ rehọ ae dikihẹ aro Erọn ozerẹ na, a vẹ te gbodibo+ kẹe. 7 A re ru iruo rai nọ u fo nọ a re ru kẹe je ru kẹ ogbotu na soso evaọ aro uwou-udhu omakugbe na, ẹkwoma iruo rai nọ i wobọ kugbe uwou-udhu na nọ a re ru. 8 A rẹ rẹrote ekwakwa uwou-udhu omakugbe na kpobi+ je ru iruo rai nọ u fo nọ a re ru kẹ ahwo Izrẹl ẹkwoma iruo nọ i wobọ kugbe uwou-udhu na nọ a re ru.+ 9 Whọ rẹ rọ ahwo Livae kẹ Erọn gbe emezae riẹ. Enana yọ enọ a rọ kẹ no, enọ a rọ kẹe rono udevie ahwo Izrẹl ze.+ 10 Whọ rẹ rọ Erọn avọ emezae riẹ mu, yọ a re ru iruo ozerẹ rai,+ ohwo kpobi nọ a kẹ udu hu* nọ ọ nya kẹle iẹe a re kpei no.”+

11 Jihova ọ tẹ gbẹ jẹ ta kẹ Mosis nọ: 12 “Rri! Rọkẹ omẹ, mẹ salọ ahwo Livae na rono udevie ahwo Izrẹl ze re mẹ rehọ ae nwene ẹta ọmọ ọsosuọ kpobi* ọrọ ahwo Izrẹl,+ yọ ahwo Livae na a rẹ jọ emẹ. 13 Keme ọmọ ọsosuọ kpobi yọ ọmẹ.+ Evaọ ẹdẹ nọ me ro kpe ọmọ ọsosuọ kpobi evaọ ẹkwotọ Ijipti,+ mẹ rehọ ọmọ ọsosuọ kpobi te ọrọ ohwo te ọrọ arao evaọ Izrẹl kẹ omamẹ wọhọ enọ e rrọ ọrẹri.+ A rẹ jọ emẹ. Mẹ họ Jihova.”

14 Jihova ọ tẹ gbẹ ta kẹ Mosis evaọ udhude Saena+ nọ: 15 “Kere edẹ emezae Livae fihotọ lele ọvuọ unuwou abọ ọsẹ riẹ gbe ọvuọ uviuwou riẹ. Who re kere odẹ ọzae kpobi fihotọ ọnọ ọ rrọ umuo amara ọvo kpehru.”+ 16 Fikiere Mosis o te kere edẹ rai fihotọ wọhọ epanọ Jihova o jie uzi, nwane wọhọ epanọ ọ ta kẹe nọ o ru. 17 Enana họ edẹ emezae Livae: Gẹshọn, Kohat, gbe Mẹrarae.+

18 Whaọ enana họ edẹ emọ Gẹshọn lele ọvuọ uviuwou riẹ: Libnae avọ Shimia.+

19 Emọ Kohat lele ọvuọ uviuwou riẹ họ Amram, Izha, Hebrọn, gbe Uziẹl.+

20 Emọ Mẹrarae lele ọvuọ uviuwou riẹ họ Mahlae+ avọ Mushae.+

Enana họ iviuwou ahwo Livae lele ọvuọ unuwou abọ ọsẹ riẹ.

21 Uviuwou Libnae avọ uviuwou Shimia a no unuwou Gẹshọn ze.+ Enana họ iviuwou Gẹshọn. 22 Unu ezae kpobi nọ a kere edẹ rai fihotọ nọ e rrọ umuo amara ọvo kpehru e jọ idu ihrẹ gbe egba isoi (7,500).+ 23 Iviuwou Gẹshọn a fa evuẹ rai fihọ emu uwou-udhu na+ rri ofẹ ukiediwo-ọre. 24 Ọnọ o wuzou unuwou abọ ọsẹ ọrọ iviuwou Gẹshọn họ Elayasaf ọmọzae Laẹl. 25 Iruo emezae Gẹshọn+ evaọ uwou-udhu omakugbe na họ re a rẹrote uwou-udhu na gbe ohọ uwou-udhu na,+ ehọ efa nọ a re ro ruru iei,+ ekọtini* nọ a re ro gbere+ unuẹthẹ uwou-udhu omakugbe na, 26 ehọ ighẹ na nọ a rẹ jẹhọ ohwohwo,+ ekọtini* nọ a re ro gbere+ unu ighẹ na nọ o wariẹ uwou-udhu na avọ agbada-idhe na họ, ifi uwou-udhu na, gbe iruẹru kpobi nọ i wobọ kugbe eware nana.

27 Uviuwou Amram, uviuwou Izha, uviuwou Hebrọn, gbe uviuwou Uziẹl a no unuwou Kohat ze. Enana họ iviuwou Kohat.+ 28 Unu ezae na kpobi nọ e rrọ umuo amara ọvo kpehru e jọ idu eree gbe egba ezeza (8,600); iruo rai họ re a rẹrote oria ọrẹri na.+ 29 Iviuwou emezae Kohat a fa evuẹ rai fihọ abọ obọze ovatha-ọre ọrọ uwou-udhu na.+ 30 Ọnọ o wuzou unuwou abọ ọsẹ ọrọ iviuwou Kohat họ Ẹlizefan ọmọzae Uziẹl.+ 31 Iruo rai họ re a rẹrote Etehe na,+ emẹjẹ na,+ ọkpọ-edada ukpẹ na,+ egbada-idhe na,+ ekwakwa+ nọ a rẹ rọ gbodibo evaọ oria ọrẹri na, ekọtini* nọ a re ro gbere na,+ gbe iruẹru kpobi nọ i wobọ kugbe eware nana.+

32 Ọnọ o wuzou enọ i wuzou ahwo Livae họ Ẹlieza+ ọmọzae Erọn ozerẹ na, ọye họ ọnọ o wuzou enọ i wo iruo ẹruorote oria ọrẹri na.

33 Uviuwou Mahlae avọ uviuwou Mushae a no unuwou Mẹrarae ze. Enana họ iviuwou Mẹrarae.+ 34 Unu ezae na kpobi nọ e rrọ umuo amara ọvo kpehru nọ a kere edẹ rai fihotọ, e jọ idu ezeza gbe egba ivẹ (6,200).+ 35 Ọnọ o wuzou unuwou abọ ọsẹ ọrọ iviuwou Mẹrarae họ Zuriẹl ọmọzae Abẹhel. A fa evuẹ rai fihọ abọ ẹkpẹlobọ ovatha-ọre ọrọ uwou-udhu na.+ 36 Emezae Mẹrarae họ enọ i wo iruo ẹruorote ifremu+ uwou-udhu na, ire riẹ nọ a ro where,+ ipila riẹ,+ awọ riẹ, ekwakwa riẹ kpobi,+ gbe iruẹru kpobi nọ i wobọ kugbe eware nana,+ 37 jegbe ipila kpobi nọ e wariẹ ighẹ na họ gbe awọ rai,+ ighele ehọ uwou-udhu na, gbe ifi ehọ uwou-udhu na.

38 Enọ e fa evuẹ rai fihọ aro uwou-udhu na evaọ ofẹ ovatha-ọre, aro uwou-udhu omakugbe na nọ u rri ofẹ nọ ọre ọ rẹ va no ze họ Mosis avọ Erọn gbe emezae riẹ. Ae họ enọ i wo iruo ẹruorote oria aruẹri na wọhọ iruo rai nọ a re ru kẹ ahwo Izrẹl. Ohwo kpobi nọ a kẹ udu hu* nọ ọ nya kẹle iẹe a re kpei no.+

39 Emezae ahwo Livae kpobi nọ e rrọ umuo amara ọvo kpehru nọ Mosis avọ Erọn a kere edẹ rai fihotọ lele ọvuọ uviuwou rai wọhọ epanọ Jihova o jie uzi, e jọ idu udhegbivẹ (22,000).

40 Kẹsena Jihova ọ tẹ ta kẹ Mosis nọ: “Kere odẹ ọmọzae ọsosuọ kpobi ọrọ ahwo Izrẹl fihotọ nọ ọ rrọ umuo amara ọvo kpehru,+ kele ai, re who kere edẹ rai fihotọ. 41 Whọ rẹ rehọ ahwo Livae na kẹ omẹ hrọ, mẹ họ Jihova, re a nwene ẹta ọmọ ọsosuọ kpobi ọrọ ahwo Izrẹl,+ yọ whọ rẹ rehọ erao ẹwho erọ ahwo Livae ro nwene ẹta ọmọ ọsosuọ kpobi ọrọ erao ahwo Izrẹl.”+ 42 Kẹsena Mosis o te kere odẹ ọmọ ọsosuọ kpobi evaọ udevie ahwo Izrẹl fihotọ wọhọ epanọ Jihova ọ ta kẹe nọ o ru. 43 Unu emezae ọsosuọ kpobi erọ ahwo Izrẹl nọ a kere edẹ rai fihotọ nọ e rrọ umuo amara ọvo kpehru e jọ idu udhegbivẹ gbe egba ivẹ gbe udhosa gbe ikpegbesa (22,273).

44 Jihova ọ tẹ gbẹ jẹ ta kẹ Mosis nọ: 45 “Rehọ ahwo Livae na ro nwene ẹta ọmọ ọsosuọ kpobi ọrọ ahwo Izrẹl, jẹ rehọ erao ẹwho ahwo Livae na ro nwene ẹta erao ẹwho rai, yọ ahwo Livae na a rẹ jọ emẹ hrọ. Mẹ họ Jihova. 46 Kpahe osa ẹtanigbo+ nọ a rẹ hwa fihọ emezae ọsosuọ erọ ahwo Izrẹl nọ e rehọ egba ivẹ gbe udhosa gbe ikpegbesa (273) bu vi ahwo Livae,+ 47 who re mi shẹkẹl* isoi fihọ uzou omomọvo,+ lele epaọ shẹkẹl oria ọrẹri na.* Shẹkẹl ọvo yọ gira* udhe.+ 48 Whọ rẹ rehọ ugho na kẹ Erọn avọ emezae riẹ re o jọ osa ẹtanigbo orọ unu ahwo nọ a bu vi ai na.” 49 Fikiere Mosis o te mi ugho ẹtanigbo na re a rọ ta ahwo nọ a bu vi ahwo Livae na. 50 Ọ rehọ ugho na mi emọ ọsosuọ erọ ahwo Izrẹl, shẹkẹl odu ọvo gbe egba esa gbe udhosa-gbisoi (1,365), lele epaọ shẹkẹl oria ọrẹri na. 51 Mosis ọ tẹ rehọ ugho osa ẹtanigbo na kẹ Erọn avọ emezae riẹ nwane wọhọ epaọ ẹme* Jihova, nwane wọhọ epanọ Jihova ọ ta kẹ Mosis nọ o ru.

4 Jihova ọ tẹ ta kẹ Mosis avọ Erọn nọ: 2 “Jọ a kele unu emezae Kohat,+ ọnọ ọ rrọ usu emezae Livae, lele iviuwou rai gbe ọvuọ inuwou abọ ọsẹ rai, 3 enọ e kpako te ikpe ọgba+ rite ikpe udhuvẹ-gbikpe+ kpobi nọ e rrọ utu nọ a kẹ iruo evaọ uwou-udhu omakugbe na.+

4 “Onana họ iruo emezae Kohat evaọ uwou-udhu omakugbe na.+ Onana yọ oware nọ o mae rrọ ọrẹri: 5 Erọn avọ emezae riẹ a rẹ nyaze okenọ ahwo evuẹ na a tẹ be gwọlọ wọ ruọ edhere a ve si ekọtini nọ a ro gbere na no+ jẹ rehọ iẹe ruru etehe+ Isẹri na. 6 A rẹ rọ ohọ oviẹ isili* ruru iei jẹ rehọ ohọ nọ omariẹ kpobi o rrọ iburu ruru iei a ve je dhe ekpọ nọ a rẹ rọ wọe+ fihọ iẹe.

7 “A rẹ jẹ rriẹ ohọ iburu ruru emẹjẹ ebrẹdi udhesẹ na,+ a ve fi imidhe na fihọ iẹe, igho na, imidhe ikokodo na, gbe ikoko-ame idhe udi na;+ yọ a rẹ nyasiọ ebrẹdi idhe nọ a re fihọ iẹe kẹse kẹse+ na ba ehru riẹ. 8 A rẹ rriẹ ohọ owawae ogbagba họ ehru rai a vẹ rọ ohọ oviẹ isili ruru iei je dhe ekpọ nọ a rẹ rọ wọe+ fihọ iẹe. 9 Kẹsena a vẹ rehọ ohọ iburu ruru ọkpọ-edada ukpẹ+ nọ o rrọ kẹ elo na, kugbe ikpẹ riẹ,+ eware nọ a re ro kru iwhiki* riẹ, imidhe erae riẹ,+ gbe ikoko-ewhri riẹ kpobi nọ a re fi ewhri nọ a re ro tu ei họ. 10 A rẹ rehọ ohọ oviẹ isili variẹ iẹe avọ ekwakwa riẹ kpobi, a ve fi ei họ ehru ekpọ nọ a rẹ rọ wọe. 11 A vẹ rriẹ ohọ iburu ruru agbada-idhe igoru na,+ rọ ohọ oviẹ isili ruru iei, je dhe ekpọ nọ a rẹ rọ wọe+ fihọ iẹe. 12 Kẹsena a vẹ rehọ ekwakwa odibọgba na kpobi,+ enọ a rẹ rọ gbodibo kẹse kẹse evaọ oria ọrẹri na a ve fi ai họ ohọ iburu jẹ rọ ohọ oviẹ isili ruru ai a vẹ wọ ae họ ehru ekpọ nọ a rẹ rọ wọ ae.

13 “A re si enwo* na no agbada-idhe na+ a vẹ rriẹ ohọ iwhulu ogorurẹ ruru iei. 14 A re fi ekwakwa riẹ kpobi nọ a rẹ rọ gbodibo evaọ agbada-idhe na họ iẹe: imidhe erae na, efọko na, eshọvẹle na, gbe imidhe ikokodo na, te ekwakwa agbada-idhe na kpobi;+ yọ a rẹ rriẹ ohọ oviẹ isili ruru iei je dhe ekpọ nọ a rẹ rọ wọe+ fihọ iẹe.

15 “Erọn avọ emezae riẹ a re ruru oria ọrẹri na+ avọ ekwakwa oria ọrẹri na kpobi no hrọ taure ahwo evuẹ na a tẹ te wọ ruọ edhere. Kẹsena emezae Kohat a vẹ nyaze te wọ ae,+ rekọ a rẹ rọ obọ te oria ọrẹri na vievie he o gbẹ rrọ ere he a re whu.+ Enana họ iruo* emezae Kohat evaọ uwou-udhu omakugbe na.

16 “Ẹlieza+ ọmọzae Erọn ozerẹ na họ ọnọ o wuzou ẹruorote ewhri ikpẹ na,+ insẹnse nọ i re gbo ore awere na,+ idhe ibi ekakọ ikẹse kẹse na, gbe ewhri eromuo na.+ Ọye o wuzou ẹruorote uwou-udhu na soso gbe eware kpobi nọ e rrọ eva riẹ, te oria ọrẹri na gbe ekwakwa riẹ.”

17 Jihova ọ tẹ jẹ ta kẹ Mosis avọ Erọn nọ: 18 “Wha kuvẹ re iviuwou orua Kohat+ a whu no udevie ahwo Livae he. 19 Rekọ wha ru onana kẹ ae re a sae gbẹ jọ uzuazọ re a seba ewhu fiki eware nọ e mae rrọ ọrẹri na nọ a go kẹle.+ Erọn avọ emezae riẹ a rẹ ruọ eva re a kẹ omomọvo iruo nọ o re ru gbe eware nọ ọ rẹ wọ. 20 A rẹ nyaze te ruẹ eware ọrẹri na vievie he makọ evaọ omoke kakao dede, o gbẹ rrọ ere he a re whu.”+

21 Jihova ọ tẹ ta ẹme kẹ Mosis, inọ: 22 “Wha kele unu emezae Gẹshọn+ lele inuwou abọ ọsẹ rai gbe iviuwou rai. 23 Who re kere edẹ enọ e kpako te ikpe ọgba rite ikpe udhuvẹ-gbikpe kpobi nọ e rrọ utu nọ a kẹ iruo evaọ uwou-udhu omakugbe na. 24 Enana họ eware nọ a rẹ kẹ iviuwou Gẹshọn nọ a rẹ rẹrote jẹ wọ:+ 25 A rẹ wọ ehọ uwou-udhu na,+ uwou-udhu omakugbe na, ehọ efa nọ a ro ruru iei avọ ohọ oviẹ isili nọ o rrọ ehru riẹ nọ u ruru i rie na,+ ekọtini* nọ a re ro gbere unuẹthẹ uwou-udhu omakugbe na,+ 26 ehọ ighẹ na nọ a rẹ jẹhọ ohwohwo,+ ekọtini* nọ a re ro gbere unu ighẹ+ nọ o wariẹ uwou-udhu na avọ agbada-idhe na họ, ifi uwou-udhu na, avọ ekwakwa rai kpobi gbe eware kpobi nọ a re ro ru iruo riẹ. Onana họ iruo rai. 27 Erọn avọ emezae riẹ họ enọ i wuzou* iruo gbe ewha nọ emezae Gẹshọn a rẹ wọ kpobi;+ whọ rẹ rehọ ewha nana kpobi kẹ ae re e jọ iruo rai. 28 Onana họ iruo nọ iviuwou Gẹshọn a re ru evaọ uwou-udhu omakugbe na,+ yọ a re ru iruo rai evaọ otọ ẹruọsa Itama+ ọmọzae Erọn ozerẹ na.

29 “Yọ kpahe emezae Mẹrarae,+ who re kere edẹ rai lele ọvuọ uviuwou riẹ gbe ọvuọ unuwou abọ ọsẹ riẹ. 30 Who re kere edẹ enọ e kpako te ikpe ọgba rite ikpe udhuvẹ-gbikpe, ohwo kpobi nọ ọ rrọ utu nọ a kẹ iruo evaọ uwou-udhu omakugbe na. 31 Enana họ eware nọ a rọ kẹ ae nọ a rẹ wọ+ nọ o rrọ iruo rai evaọ uwou-udhu omakugbe na: ifremu+ uwou-udhu na, ire riẹ nọ a ro where,+ ipila riẹ,+ awọ riẹ;+ 32 ipila+ nọ e wariẹ ighẹ na họ, awọ rai,+ ighele rai,+ gbe ifi rai kugbe ekwakwa rai kpobi avọ iruo kpobi nọ i wobọ kugbe eware enana. Wha rẹ rehọ oware nọ omomọvo ọ rẹ wọ kẹe. 33 Enẹ iviuwou emezae Mẹrarae+ a re ro ru iruo rai evaọ uwou-udhu omakugbe na, evaọ otọ ẹruọsa Itama ọmọzae Erọn ozerẹ na.”+

34 Mosis avọ Erọn gbe enọ i wuzou+ ogbotu na a te kere edẹ emezae Kohat+ fihotọ lele iviuwou rai gbe ọvuọ unuwou abọ ọsẹ riẹ, 35 enọ e kpako te ikpe ọgba rite ikpe udhuvẹ-gbikpe kpobi nọ e jọ utu nọ a kẹ iruo uwou-udhu omakugbe na.+ 36 Unu ahwo kpobi nọ a kere edẹ rai fihotọ lele iviuwou rai e jọ idu ivẹ gbe egba ihrẹ gbe udhuvẹ-gbikpe (2,750).+ 37 A kere edẹ ahwo nana no iviuwou Kohat ze, enọ e jẹ gbodibo kpobi evaọ obọ uwou-udhu omakugbe na. Mosis avọ Erọn a kere edẹ rai fihotọ wọhọ epaọ uzi Jihova nọ ọ kẹ ẹkwoma Mosis.+

38 A kere edẹ emezae Gẹshọn+ fihotọ lele iviuwou rai gbe ọvuọ unuwou abọ ọsẹ riẹ, 39 enọ e kpako te ikpe ọgba rite ikpe udhuvẹ-gbikpe kpobi nọ e jọ utu nọ a kẹ iruo evaọ obọ uwou-udhu omakugbe na. 40 Unu ahwo kpobi nọ a kere edẹ rai fihotọ lele iviuwou rai gbe ọvuọ unuwou abọ ọsẹ riẹ e jọ idu ivẹ gbe egba ezeza gbe ọgba (2,630).+ 41 Enana họ unu ahwo nọ a kere edẹ rai fihotọ evaọ iviuwou emezae Gẹshọn, enọ e jẹ gbodibo kpobi evaọ obọ uwou-udhu omakugbe na. Mosis avọ Erọn a kere edẹ rai fihotọ wọhọ epaọ uzi Jihova.+

42 A kere edẹ emezae Mẹrarae fihotọ lele iviuwou rai gbe ọvuọ unuwou abọ ọsẹ riẹ, 43 enọ e kpako te ikpe ọgba rite ikpe udhuvẹ-gbikpe kpobi nọ e jọ utu nọ a kẹ iruo evaọ obọ uwou-udhu omakugbe na.+ 44 Unu ahwo kpobi nọ a kere edẹ rai fihotọ lele iviuwou rai e jọ idu esa gbe egba ivẹ (3,200).+ 45 Enana họ unu ahwo nọ a kere edẹ rai fihotọ evaọ iviuwou emezae Mẹrarae, enọ Mosis avọ Erọn a kere edẹ rai fihotọ wọhọ epaọ uzi Jihova nọ ọ kẹ ẹkwoma Mosis.+

46 Mosis avọ Erọn gbe enọ i wuzou ahwo Izrẹl a te kere edẹ ahwo Livae nana kpobi fihotọ lele iviuwou rai gbe inuwou abọ ọsẹ rai; 47 enọ e jọ umuo ikpe ọgba rite ikpe udhuvẹ-gbikpe, yọ a kẹ rai kpobi iruo nọ a re ru gbe eware nọ a rẹ wọ nọ i wobọ kugbe uwou-udhu omakugbe na.+ 48 Unu ahwo kpobi nọ a kere edẹ rai fihotọ e jọ idu eree gbe egba isoi gbe udhone (8,580).+ 49 A kere edẹ rai fihotọ wọhọ epaọ uzi Jihova nọ ọ kẹ ẹkwoma Mosis, ohwo kpobi avọ iruo nọ a kẹ riẹ gbe owha riẹ; a kere edẹ rai fihotọ nwane wọhọ epanọ Jihova o jie uzi riẹ kẹ Mosis.

5 Jihova ọ tẹ jẹ ta kẹ Mosis nọ: 2 “Ta kẹ ahwo Izrẹl nọ a si ohwo kpobi nọ o wo oti no evuẹ na no+ gbe ohwo kpobi nọ o bi hwẹ+ gbe ohwo kpobi nọ ọ fo ho fikinọ ọ rọ obọ te ohwo nọ o whu no.*+ 3 Te ọ rrọ ọzae hayo aye, wha re si ai no evuẹ na. Wha re si ai no evuẹ na fihọ obọ otafe evuẹ na, re a gbe zue+ ivuẹ ahwo nọ mẹ be rria* udevie rai hi.+ 4 Fikiere ahwo Izrẹl a te ru ere a te si ahwo na no evuẹ na fihọ obọ otafe evuẹ na. Nwanọ epanọ Jihova ọ ta kẹ Mosis, ere ahwo Izrẹl a ru.

5 Jihova ọ tẹ gbẹ jẹ ta kẹ Mosis nọ: 6 “Ta kẹ ahwo Izrẹl nọ, ‘Otẹrọnọ ọzae jọ hayo aye jọ ọ raha uzi jọ nọ ahwo a rẹ raha nọ o je ru oware nọ u fo ho kpahe Jihova, ohwo* yena ọ reabe.+ 7 Ọ* rẹ feva+ uzioraha nọ ọ* raha na hrọ, yọ o re zihe unu oware na gbagba re o jọ osa abe-ọriọ riẹ na, o ve je fi abọvo abasoi unu oware na bae;+ ọ rẹ rehọ iẹe kẹ ohwo nọ o ru thọ na. 8 Rekọ otẹrọnọ ohwo nọ a ru thọ na o wo omoni ọkpekpe nọ o re mi osohwa na ha, a re zihe iei kẹ Jihova u ve zihe ruọ orọ ozerẹ na, kugbe egbo omavoro nọ a ti ro ru omavoro kẹe na.+

9 “‘Okẹ ọrẹri kpobi+ nọ u no obọ ahwo Izrẹl ze nọ a rọ kẹ ozerẹ na u re zihe ruọ orọ ozerẹ na.+ 10 Eware ọrẹri omomọvo e rẹ gbẹ jọ eriẹ. Oware kpobi nọ omomọvo ọ rọ kẹ ozerẹ na, oye o rẹ jọ orọ ozerẹ na.’”

11 Jihova ọ tẹ gbẹ jẹ ta kẹ Mosis nọ: 12 “Ta kẹ ahwo Izrẹl nọ, ‘Onana họ oware nọ a re ru nọ aye ohwo ọ tẹ nyathọ o je gbe-ọfariẹ 13 nọ ọzae ọfa o te lele aye na wezẹ,+ rekọ ọzae riẹ ọ riẹ kpahe iẹe he yọ oware na o bẹre via ha, ọ tẹ rọ ere zue oma riẹ rekọ ohwo ọvo ọ riẹ nọ o se isẹri mu aye na ha yọ a ri mu ei hi: 14 Te ọzae aye na ọ be re ihri je bi viẹro ku aye riẹ inọ aye na o bi gbe-ọfariẹ yọ aye na o gine zue oma riẹ, hayo ọ be re ihri je bi viẹro ku aye riẹ inọ o bi gbe-ọfariẹ kpakiyọ aye na o zue oma riẹ hẹ, 15 ọzae na ọ rẹ rehọ aye riẹ na se ozerẹ na hrọ, kugbe oware nọ a ti ro dhe idhe rọkẹ aye na nọ ọ rẹ wha lele iei, abọvo abakpe ifa* ọrọ eflawa ebali. O re ku ewhri fihọ iẹe vievie he yọ o re fi frankinsẹns họ iẹe he, keme onana yọ idhe ibi ekakọ ihri-eriọ, idhe ibi ekakọ orọ ekareghẹhọ abe-ọriọ.

16 “‘Ozerẹ na ọ rẹ rehọ aye na ze ọ vẹ rehọ iẹe dikihẹ aro Jihova.+ 17 Ozerẹ na o re ku ame ọrẹri fihọ othẹ ẹkpẹ, ozerẹ na ọ vẹ rehọ ẹkpẹ* jọ no otọ uwou-udhu na ze o ve fi ei họ ame na. 18 Ozerẹ na ọ vẹ rehọ aye na dikihẹ aro Jihova o ve kpe eto aye na fihọ je fi idhe ibi ekakọ na họ evabọ aye na rọkẹ ekareghẹhọ, koyehọ idhe ibi ekakọ ihri-eriọ na,+ yọ ame ọyayare nọ ọ rẹ wha ekela ze na ọ rẹ jọ obọ ozerẹ na.+

19 “‘Kẹsena ozerẹ na o ve ru aye na duwu iyei, ọ rẹ ta kẹ aye na nọ: “Otẹrọnọ ọzae ọfa o lele owhẹ wezẹ hẹ nọ whọ rrọ otọ ọzae ra na,+ yọ whọ nyathọ je gbe oma ra ku hu, jọ ame ọyayare nana nọ ọ rẹ wha ekela ze na o ru owhẹ oware ovo ho. 20 Rekọ otẹrọnọ whọ nyathọ nọ whọ rrọ otọ ọzae ra na, nọ who je zue oma ra, yọ who lele ọzae ọfa wezẹ,+ u te no ọzae ra no—” 21 Ozerẹ na o ve ru aye na duwu iyei,* ozerẹ na ọ vẹ ta kẹ aye na nọ: “Jọ Jihova o ru owhẹ fihọ ọnọ a rẹ rọ la eka* gbe ọnọ a re ro duwu iyei evaọ udevie ahwo ra, re Jihova o ru owhẹ fihọ ọnọ ọ rẹ sai yẹ ọmọ họ* je ru eva ra fu. 22 Ame nana nọ ọ rẹ wha ekela ze na ọ rẹ ruọ ivu ra re u ru eva ra fu je ru ekpokpowọ ra kie.”* Aye na ọ vẹ ta nọ: “Ami! Ami!”*

23 “‘Kẹsena ozerẹ na o ve kere ekela nana fihọ obe na jẹ wozẹ ae fihọ ame ọyayare na. 24 O ve ru aye na da ame ọyayare nọ ọ rẹ wha ekela ze na, ame nọ ọ rẹ wha ekela ze na ọ vẹ ruọ eva riẹ je ru ei yare. 25 Ozerẹ na ọ rẹ rehọ idhe ibi ekakọ ihri-eriọ na+ no obọ aye na o ve veghe idhe ibi ekakọ na kpemu kparo evaọ aro Jihova, ọ vẹ rehọ idhe na ze kẹle agbada-idhe na. 26 Ozerẹ na ọ vẹ whẹ ẹkuobọ vọ no idhe ibi ekakọ na ze wọhọ amabọ jọ idhe* na, o ve ru ei kuye iwiri evaọ ehru agbada-idhe na,+ kẹsena ọ vẹ kẹ aye na ame na da. 27 Nọ ọ tẹ kẹ aye na ame na da no, otẹrọnọ aye na o ru oware nọ u fo ho kpahe ọzae riẹ nọ o ro zue oma riẹ, ame nọ ọ rẹ wha ekela ze na ọ vẹ te ruọ oma riẹ je zihe ruọ oware oyayare, eva riẹ i ve ti fu, ekpokpowọ* riẹ o ve ti kie no,* aye na o ve ti zihe ruọ ọnọ a rẹ rọ la eka evaọ udevie ahwo riẹ. 28 Rekọ otẹrọnọ aye na o zue oma riẹ hẹ yọ ọ fo, uye yena u re tei hi, ọ rẹ sai dihọ o ve yẹ ọmọ.

29 “‘Onana họ uzi kpahe ihri-eriọ+ okenọ aye ọ tẹ nyathọ nọ o je gbe oma riẹ ku yọ ọ rrọ otọ ọzae riẹ, 30 hayo nọ ọzae ọ tẹ be re ihri je viẹro ku aye riẹ inọ o gbe-ọfariẹ; ọzae na ọ rẹ rehọ aye riẹ dikihẹ aro Jihova, yọ ozerẹ na o re ru eware kpobi nọ uzi nana o ta na kẹe hrọ. 31 Ọzae na ọ rẹ gbẹ reabe he, rekọ aye na ọ rẹ ruẹ uye abe-ọriọ riẹ.’”

6 Jihova ọ tẹ gbẹ ta kẹ Mosis nọ: 2 “Ta kẹ ahwo Izrẹl nọ, ‘Otẹrọnọ ọzae hayo aye jọ ọ ya eyaa obọdẹ jọ inọ ọ rẹ jọ Nazaraet*+ kẹ Jihova, 3 ọ rẹ kẹnoma kẹ enwaene gbe idi egaga efa. Ọ rẹ da iviniga* enwaene he hayo iviniga udi ogaga ovuovo ho.+ Ọ rẹ da oware ovuovo nọ a rọ ibi-ire evaene ru hu, yọ ọ rẹ re ibi-ire evaene he te ekpokpọ hayo eyaya. 4 Evaọ edẹ kpobi nọ ọ rọ rrọ Nazaraet na ọ rẹ re uvumọ oware nọ a rehọ evaene ru hu, no ubi-ure riẹ nọ o re ware he rite ohọrọ riẹ.

5 “‘Evaọ edẹ kpobi nọ ọ ya eyaa inọ ọ rẹ jọ Nazaraet na, erezọbledi i re te uzou riẹ hẹ.+ Ọ rẹ jọ ọrẹri ẹkwoma eto uzou riẹ nọ ọ rẹ kuvẹ re i di bẹsenọ edẹ nọ ọ rọ hẹriẹ oma riẹ no rọkẹ Jihova na e rẹ gba no. 6 Ọ rẹ nya kẹle* ohwo owhuowhu hu* evaọ edẹ kpobi nọ ọ rọ hẹriẹ oma riẹ no rọkẹ Jihova na. 7 O tẹ make rọnọ ọsẹ riẹ hayo oni riẹ hayo oniọvo-ọmọzae riẹ hayo oniọvo-ọmọtẹ riẹ o whu, o re zue oma riẹ hẹ+ keme oka nọ ọ rọ rrọ Nazaraet kẹ Ọghẹnẹ riẹ o rrọ uzou riẹ.

8 “‘Ọ rrọ ọrẹri kẹ Jihova evaọ edẹ kpobi nọ ọ rọ rrọ Nazaraet na. 9 Rekọ otẹrọnọ ohwo jọ o whu idudhe evaọ akotọ riẹ+ nọ o je zue eto riẹ nọ e rrọ oka nọ ọ rọ hẹriẹ oma riẹ no rọkẹ Ọghẹnẹ na,* ọ rẹ nware uzou riẹ hrọ+ evaọ ẹdẹ nọ a bi ro ru ei fo na. Ọ rẹ nware iẹe evaọ ẹdẹ avọ ihrẹ. 10 Evaọ ẹdẹ avọ eree ọ rẹ rehọ irueruẹ ivẹ hayo emọ ilekuku ivẹ se ozerẹ na evaọ aro unuẹthẹ uwou-udhu omakugbe na. 11 Ozerẹ na ọ rẹ ruẹrẹ ọvo jọ họ kẹ idhe uzioraha jẹ ruẹrẹ ọdekọ họ kẹ idhe emahọ, o ve ru omavoro kẹe fiki uzioraha riẹ+ kpahe ohwo owhuowhu* na. Yọ evaọ ẹdẹ yena o re ru uzou riẹ fo* hrọ. 12 Ọ rẹ wariẹ hẹriẹ oma riẹ no rọkẹ Jihova re ọ jọ Nazaraet, yọ ọ rẹ rehọ egbo nọ ọ rrọ ukpe ọsosuọ riẹ ze rọkẹ idhe abe-ọriọ. Rekọ a re kele edẹ Nazaraet riẹ nọ e vrẹ no ho keme o zue Nazaraet riẹ.

13 “‘Whaọ onana họ uzi kpahe ohwo nọ ọ rrọ Nazaraet: Nọ edẹ Nazaraet riẹ e tẹ gba no,+ a rẹ rehọ iẹe ziọ aro unuẹthẹ uwou-udhu omakugbe na. 14 Ọ rẹ jọ etẹe kẹ Jihova ekẹ riẹ hrọ: egbo ọvo nọ ọ rrọ omakọkọ nọ ọ rrọ ukpe ọsosuọ riẹ nọ a re ro dhe idhe emahọ,+ omogodẹ ọvo nọ ọ rrọ omakọkọ nọ ọ rrọ ukpe ọsosuọ riẹ nọ a re ro dhe idhe uzioraha,+ egbo ọvo nọ ọ rrọ omakọkọ nọ a re ro dhe idhe ọriẹyeri,+ 15 ekete ikulu ebrẹdi nọ ọ kare ẹvi nọ a rọ emamọ eflawa iwuwuru ru wọhọ ẹmẹro, ebrẹdi ekpakpala nọ e kare ẹvi nọ a gbe ewhri họ, gbe idhe ibi ekakọ rai+ avọ idhe udi rai.+ 16 Ozerẹ na ọ rẹ rehọ ae ziọ aro Jihova o ve dhe idhe uzioraha riẹ avọ idhe emahọ riẹ. 17 Ọ rẹ rehọ egbo na dhe idhe ọriẹyeri kẹ Jihova kugbe ekete ikulu ebrẹdi nọ ọ kare ẹvi na, yọ ozerẹ na o re dhe idhe ibi ekakọ riẹ+ avọ idhe udi riẹ.

18 “‘Ohwo nọ ọ rrọ Nazaraet na ọ vẹ nware eto uzou* riẹ nọ ọ re nware he na+ evaọ aro unuẹthẹ uwou-udhu omakugbe na, kẹsena ọ vẹ rehọ eto uzou riẹ nọ i di ze evaọ etoke nọ ọ rọ jọ Nazaraet na o ve fi ai họ erae nọ e rrọ otọ idhe ọriẹyeri na. 19 Ozerẹ na ọ rẹ jọ egbo na rehọ akpalobọ jọ nọ a there,+ yọ ọ rẹ rehọ ukulu ebrẹdi nọ ọ kare ẹvi ọvo nọ a ru wọhọ ẹmẹro no ekete na ze, gbe ebrẹdi ọkpakpala nọ ọ kare ẹvi ọvo, o ve fi ai họ evabọ ohwo nọ ọ rrọ Nazaraet na nọ a tẹ nware oka Nazaraet riẹ no. 20 Yọ ozerẹ na o re veghe ai kpemu kparo wọhọ idhe iveghe evaọ aro Jihova.+ Onana yọ oware ọrẹri nọ o rẹ jọ orọ ozerẹ na te ẹkpudu idhe iveghe na avọ owọ nọ a zọhọ ze na.+ Kẹsena ohwo nọ ọ rrọ Nazaraet na ọ vẹ sai mu enwaene họ ẹda.

21 “‘Onana họ uzi kpahe ohwo nọ ọ rrọ Nazaraet+ nọ ọ ya eyaa: Otẹrọnọ ọ ya eyaa yọ ọ rẹ sae kẹ Jihova okẹ nọ u bu vi onọ o gwọlọ nọ ọyomariẹ nọ ọ rrọ Nazaraet na ọ rẹ rọ ze, o re ru eyaa riẹ na gba hrọ fiki uzi Nazaraet riẹ na.’”

22 Jihova ọ tẹ ta kẹ Mosis nọ: 23 “Ta kẹ Erọn avọ emezae riẹ nọ, ‘Enẹ wha rẹ rọ lẹ ẹro eghale+ kẹ ahwo Izrẹl. Ta kẹ ae nọ:

24 “Jọ Jihova ọ ghale owhai+ jẹ sẹro rai.

25 Jọ Jihova o ru ovao riẹ ghariẹ kẹ owhai,+ jọ o rri owhai aro.

26 Jọ Jihova ọ kpare ovao riẹ rri owhai jẹ kẹ owhai udhedhẹ.”’+

27 Yọ a re se odẹ mẹ fihọ ahwo Izrẹl uzou hrọ,+ re mẹ ruẹse ghale ae.”+

7 Evaọ ẹdẹ nọ Mosis ọ rọ whẹ uwou-udhu na kpobi họ re no,+ o te wholo iei+ je ru ei fo,* te eware riẹ kpobi, agbada-idhe na, gbe ekwakwa riẹ kpobi.+ Nọ o wholo eware nana je ru ai fo no,+ 2 enọ i wuzou evaọ Izrẹl,+ nọ i wuzou inuwou abọ ọsẹ rai, a tẹ kẹ ekẹ. Ahwo nana nọ i wuzou erua na nọ e jẹ rẹrote iruẹru edẹ nọ a je kere fihotọ na 3 a rehọ ekẹ rai ziọ aro Jihova, ekẹkẹ ezeza nọ i wo uwou gbe iruẹ ezae ikpegbivẹ, imimava enọ i wuzou na a rehọ akẹkẹ ọvo ze, yọ omomọvo rai ọ rehọ eruẹ ọzae ọvo ze; a tẹ rehọ ae ziọ aro uwou-udhu na. 4 Jihova ọ tẹ ta kẹ Mosis nọ: 5 “Rehọ eware nana mi ai, keme a te rehọ ai ru iruo uwou-udhu omakugbe na, yọ whọ rẹ rehọ ae kẹ ahwo Livae, whọ rẹ kẹ ae omomọvo wọhọ epanọ iruo riẹ e gwọlọ.”

6 Fikiere Mosis o te mi ai ekẹkẹ na gbe iruẹ na ọ tẹ rehọ ae kẹ ahwo Livae na. 7 Ọ rehọ ekẹkẹ ivẹ gbe iruẹ ezae ene kẹ emezae Gẹshọn, wọhọ epanọ iruo rai e gwọlọ;+ 8 ọ tẹ jẹ rehọ ekẹkẹ ene gbe iruẹ ezae eree kẹ emezae Mẹrarae wọhọ epanọ iruo rai e gwọlọ, evaọ otọ ẹruọsa Itama ọmọzae Erọn ozerẹ na.+ 9 Rekọ ọ rehọ ọvuọvo kẹ emezae Kohat he keme iruo rai i wobọ kugbe odibọgba evaọ oria ọrẹri na,+ yọ ikoko a rẹ rọ wọ eware ọrẹri na.+

10 Whaọ enọ i wuzou na a kẹ ekẹ rai evaọ oke eromudhe*+ agbada-idhe na evaọ okenọ a ro wholo iei na. Okenọ enọ i wuzou na a kẹ ekẹ rai evaọ aro agbada-idhe na, 11 Jihova ọ ta kẹ Mosis nọ: “Kẹdẹ kẹdẹ, omọvo evaọ usu enọ i wuzou na ọ rẹ rọ okẹ riẹ ze, unọjọ utọjọ, rọkẹ eromudhe agbada-idhe na.”

12 Ọnọ ọ rọ okẹ riẹ ze evaọ ẹdẹ ọsosuọ họ Nashọn+ ọmọzae Aminadab ọrọ orua Juda. 13 Eware nọ ọ rọ kẹ okẹ họ omodhe isiliva ọvo nọ ọ gbẹdẹ te shẹkẹl* udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,*+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 14 egho* igoru ọvo nọ ọ gbẹdẹ te shẹkẹl ikpe, nọ insẹnse e vọ; 15 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 16 ọmọ ẹwe ọvo rọkẹ idhe uzioraha;+ 17 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Nashọn ọmọzae Aminadab.+

18 Evaọ ẹdẹ avọ ivẹ, Nẹtanẹl+ ọmọzae Zua, ọnọ o wuzou orua Isaka, ọ rehọ okẹ ze. 19 Eware nọ ọ rọ kẹ okẹ riẹ họ omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 20 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 21 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 22 ọmọ ẹwe ọvo rọkẹ idhe uzioraha;+ 23 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Nẹtanẹl ọmọzae Zua.

24 Evaọ ẹdẹ avọ esa, ọnọ o wuzou emezae Zẹbulọn, Ẹlayab+ ọmọzae Hilọn, 25 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 26 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 27 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 28 ọmọ ẹwe ọvo rọkẹ idhe uzioraha;+ 29 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Ẹlayab+ ọmọzae Hilọn.

30 Evaọ ẹdẹ avọ ene, ọnọ o wuzou emezae Rubẹn, Elaezọ+ ọmọzae Shẹdiọ, 31 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 32 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 33 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 34 ọmọ ẹwe ọvo rọkẹ idhe uzioraha;+ 35 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Elaezọ+ ọmọzae Shẹdiọ.

36 Evaọ ẹdẹ avọ isoi, ọnọ o wuzou emezae Simiọn, Shilumiẹl+ ọmọzae Zurishadae, 37 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 38 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 39 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 40 ọmọ ẹwe ọvo rọkẹ idhe uzioraha;+ 41 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Shilumiẹl+ ọmọzae Zurishadae.

42 Evaọ ẹdẹ avọ ezeza, ọnọ o wuzou emezae Gad, Elayasaf+ ọmọzae Duẹl, 43 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 44 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 45 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 46 ọmọ ẹwe ọvo rọkẹ idhe uzioraha;+ 47 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Elayasaf+ ọmọzae Duẹl.

48 Evaọ ẹdẹ avọ ihrẹ, ọnọ o wuzou emezae Ifremu, Ẹlishama+ ọmọzae Amaehọd, 49 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 50 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 51 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 52 ọmọ ẹwe ọvo rọkẹ idhe uzioraha;+ 53 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Ẹlishama+ ọmọzae Amaehọd.

54 Evaọ ẹdẹ avọ eree, ọnọ o wuzou emezae Manasẹ, Gamaliẹl+ ọmọzae Pẹdazọ, 55 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 56 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 57 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 58 ọmọ ẹwe ọvo rọkẹ idhe uzioraha;+ 59 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Gamaliẹl+ ọmọzae Pẹdazọ.

60 Evaọ ẹdẹ avọ izii, ọnọ o wuzou+ emezae Bẹnjamin, Abidan+ ọmọzae Gidionai, 61 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 62 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 63 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 64 ọmọ ẹwe ọvo rọkẹ idhe uzioraha;+ 65 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Abidan+ ọmọzae Gidionai.

66 Evaọ ẹdẹ avọ ikpe, ọnọ o wuzou emezae Dan, Ahayiza+ ọmọzae Amishadae, 67 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 68 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 69 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 70 ọmọ ẹwe ọvo rọkẹ idhe uzioraha;+ 71 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Ahayiza+ ọmọzae Amishadae.

72 Evaọ ẹdẹ avọ ikpegbọvo, ọnọ o wuzou emezae Asha, Pegiẹl+ ọmọzae Ọkran, 73 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 74 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 75 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 76 ọmọ ẹwe ọvo rọkẹ idhe uzioraha;+ 77 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Pegiẹl+ ọmọzae Ọkran.

78 Evaọ ẹdẹ avọ ikpegbivẹ, ọnọ o wuzou emezae Naftalae, Ahaera+ ọmọzae Inan, 79 ọ rehọ eware nana kẹ okẹ riẹ: omodhe isiliva ọvo nọ ọ gbẹdẹ te shẹkẹl udhozeza-gbikpe (130) gbe omodhe isiliva ọvo nọ ọ gbẹdẹ te shẹkẹl udhosa-gbikpe lele epaọ shẹkẹl oria ọrẹri na,+ yọ emamọ eflawa iwuwuru nọ a rọ ewhri gua e vọ imidhe ivẹ na rọkẹ idhe ibi ekakọ;+ 80 egho igoru ọvo nọ ọ gbẹdẹ te shẹkẹl ikpe, nọ insẹnse e vọ; 81 eruẹ ọzae ọsese ọvo, egbo ọvo, gbe omogodẹ ọzae ọvo nọ ọ rrọ ukpe ọsosuọ riẹ rọkẹ idhe emahọ;+ 82 ọmọ ẹwe ọvo rọkẹ idhe uzioraha;+ 83 yọ erọ idhe ọriẹyeri+ họ iruẹ ivẹ, igbo isoi, ikri isoi, gbe imigodẹ ezae isoi nọ ọvuọvo rai ọ rrọ ukpe ovo. Enana họ okẹ Ahaera+ ọmọzae Inan.

84 Enana họ ekẹ eromudhe+ agbada-idhe na, nọ enọ i wuzou ahwo Izrẹl a rọ ze okenọ a wholo iei: imidhe ekpakpala isiliva ikpegbivẹ, imidhe ikokodo isiliva ikpegbivẹ, igho igoru ikpegbivẹ;+ 85 omodhe isiliva ọvuọvo ọ gbẹdẹ te shẹkẹl udhozeza-gbikpe (130), yọ omodhe ọvuọvo ọ gbẹdẹ te shẹkẹl udhosa-gbikpe, isiliva erọ ekwakwa na kpobi e gbẹdẹ te shẹkẹl idu ivẹ gbe egba ene (2,400) lele epaọ shẹkẹl oria ọrẹri na;+ 86 igho igoru ikpegbivẹ nọ insẹnse e vọ na, ọvuọvo rai ọ gbẹdẹ te shẹkẹl ikpe lele epaọ shẹkẹl oria ọrẹri na, igoru erọ igho na kpobi e gbẹdẹ te shẹkẹl udhozeza (120). 87 Iruẹ idhe emahọ na kpobi e jọ iruẹ ezae ikpegbivẹ, gbe igbo ikpegbivẹ, imigodẹ ezae ikpegbivẹ nọ ọvuọvo rai ọ rrọ ukpe ovo, gbe idhe ibi ekakọ rai, avọ emọ ewe ikpegbivẹ rọkẹ idhe uzioraha; 88 yọ iruẹ idhe ọriẹyeri na kpobi i bu te iruẹ ezae udhegbene, gbe igbo udhosa, ikri udhosa, gbe imigodẹ ezae udhosa nọ ọvuọvo rai ọ rrọ ukpe ovo. Enana họ ekẹ eromudhe+ agbada-idhe na nọ a wholo iei no.+

89 Oke kpobi nọ Mosis ọ tẹ ruọ eva uwou-udhu omakugbe na re o lele Ọghẹnẹ* ta ẹme,+ ọ jẹ hai yo urru na nọ u bi lele iei ta ẹme no ehru ururu+ etehe Isẹri na ze, evaọ udevie chẹrub ivẹ na;+ ere Ọghẹnẹ ọ jẹ hae rọ ta ẹme kẹe.

8 Jihova ọ tẹ ta kẹ Mosis nọ: 2 “Ta kẹ Erọn nọ, ‘Nọ whọ te rọ ikpẹ na tu, who re ru re ikpẹ ihrẹ na i lo fihọ aro oria nọ ọkpọ-edada ukpẹ na ọ rrọ na.’”+ 3 Fikiere enẹ Erọn o ru: Ọ rọ ikpẹ na tu re i lo fihọ aro oria nọ ọkpọ-edada ukpẹ na ọ rrọ na,+ nwane wọhọ epanọ Jihova o jie uzi kẹ Mosis na. 4 Enẹ a ro ru ọkpọ-edada ukpẹ na: Ehama a rọ tehe igoru ro ru ọkpọ-edada ukpẹ na lahwe; no ugbe riẹ rite idodo riẹ, ehama a rọ tehe iẹe lahwe.+ A ru ọkpọ-edada ukpẹ na lele epanọ Jihova ọ jọ eruẹaruẹ+ dhesẹ iẹe kẹ Mosis.

5 Jihova ọ tẹ wariẹ ta ẹme kẹ Mosis, inọ: 6 “Rehọ ahwo Livae no udevie ahwo Izrẹl ze re who ru ai fo.+ 7 Enẹ who re ro ru ai fo: Whọ rẹ frẹ ame nọ a re ro ru ohwo fo no uzioraha ku ai, yọ a rẹ rọ erezọbledi nware eto oma rai kpobi no hrọ, a vẹ fọrọ iwu rai, je ru oma rai fo.+ 8 Kẹsena a vẹ rehọ eruẹ ọzae ọsese ze+ avọ idhe ibi ekakọ riẹ+ erọ emamọ eflawa iwuwuru nọ a rọ ewhri gua, whọ vẹ rehọ eruẹ ọzae ọsese ọfa ze rọkẹ idhe uzioraha.+ 9 Whọ rẹ rehọ ahwo Livae na ziọ aro uwou-udhu omakugbe na, who ve koko ogbotu ahwo Izrẹl soso họ.+ 10 Nọ whọ tẹ rọ ahwo Livae na ziọ aro Jihova, ahwo Izrẹl a rẹ rọ abọ rai kpahe uzou ahwo Livae na.+ 11 Yọ Erọn ọ rẹ rehọ ahwo Livae na kẹ okẹ* evaọ aro Jihova hrọ wọhọ idhe iveghe+ nọ ahwo Izrẹl a rọ ze, a ve ru iruo Jihova.+

12 “Kẹsena ahwo Livae na a vẹ rọ abọ rai kpahe uzou iruẹ ezae na.+ Nọ a te ru oyena no, whọ vẹ rehọ ọjọ dhe idhe uzioraha jẹ rọ ọdekọ dhe idhe emahọ kẹ Jihova ro ru omavoro+ kẹ ahwo Livae. 13 Whọ vẹ rọ ahwo Livae na dikihẹ aro Erọn avọ emezae riẹ jẹ rehọ ae kẹ* Jihova wọhọ idhe iveghe. 14 Whọ rẹ hẹriẹ ahwo Livae na no udevie ahwo Izrẹl hrọ, ahwo Livae na a ve zihe ruọ emẹ.+ 15 Kẹsena ahwo Livae na a vẹ nyaziọ uwou-udhu omakugbe na re a ru iruo. Enẹ who re ro ru ai fo jẹ rehọ ae kẹ* wọhọ idhe iveghe. 16 Keme enana yọ enọ a rọ kẹ no, enọ a rọ kẹ omẹ no udevie ahwo Izrẹl ze. Mẹ be rehọ ae kẹ omamẹ re a nwene ẹta ọmọ ọsosuọ kpobi* ọrọ ahwo Izrẹl.+ 17 Keme ọmọ ọsosuọ kpobi evaọ Izrẹl yọ ọmẹ, te ọrọ ohwo avọ arao.+ Mẹ rehọ e rai kẹ omamẹ wọhọ enọ e rrọ ọrẹri evaọ ẹdẹ nọ me ro kpe ọmọ ọsosuọ kpobi evaọ ẹkwotọ Ijipti.+ 18 Mẹ te rehọ ahwo Livae na ro nwene ẹta ọmọ ọsosuọ kpobi ọrọ ahwo Izrẹl. 19 Mẹ te rehọ ahwo Livae kẹ Erọn avọ emezae riẹ wọhọ enọ a rọ kẹ no evaọ udevie ahwo Izrẹl, re a ru iruo kẹ ahwo Izrẹl evaọ uwou-udhu omakugbe na+ re a je ru omavoro kẹ ahwo Izrẹl, re uye ovo u gbe te ahwo Izrẹl he+ fikinọ ahwo Izrẹl a go kẹle oria ọrẹri na.”

20 Enẹ Mosis avọ Erọn gbe ogbotu ahwo Izrẹl soso a ru kpahe ahwo Livae na. Oware kpobi nọ Jihova o jie uzi riẹ kẹ Mosis kpahe ahwo Livae na, oye ahwo Izrẹl a ru kẹ ae. 21 Fikiere ahwo Livae na a te ru oma rai fo jẹ fọrọ iwu rai,+ kẹsena Erọn ọ tẹ rehọ ae kẹ* evaọ aro Jihova wọhọ idhe iveghe.+ Erọn o te ru omavoro kẹ ae ro ru ai fo.+ 22 Kẹsena ahwo Livae na a tẹ ruọ eva uwou-udhu omakugbe na re a ru iruo rai evaọ otọ Erọn avọ emezae riẹ. Nwanọ epanọ Jihova o jie uzi riẹ kẹ Mosis kpahe ahwo Livae na, ere a ru kẹ ae.

23 Jihova ọ tẹ ta kẹ Mosis nọ: 24 “Onana u kiekpahe ahwo Livae: No umuo ikpe udhegbisoi kpehru ọzae o re ro kuomagbe utu enọ i bi ru iruo evaọ uwou-udhu omakugbe na. 25 Rekọ nọ ọ tẹ vrẹ ikpe udhuvẹ-gbikpe no, o ve no utu enọ i bi ru iruo na, o gbe ru hu. 26 Ọ rẹ sai fiobọhọ kẹ inievo riẹ nọ e be rẹrote iruo uwou-udhu omakugbe na, rekọ o re gbe ru iruo evaọ etẹe vievie he. Enẹ who re ru kpahe ahwo Livae na gbe iruo rai.”+

9 Jihova ọ tẹ ta ẹme kẹ Mosis evaọ udhude Saena evaọ amara ọsosuọ+ ọrọ ukpe avọ ivẹ nọ a no ẹkwotọ Ijipti no, ọ ta nọ: 2 “Ahwo Izrẹl a re ru Ọnyavrẹ na*+ evaọ oke nọ a fihọ kẹe na.+ 3 Evaọ ẹdẹ avọ ikpegbene amara nana nọ ọre o te kiediwi no,* wha re ru ei* evaọ oke nọ a fihọ kẹe na. Wha re ru ei* lele izi riẹ kpobi gbe oghẹrẹ nọ a ta nọ a re ro ru ei kpobi.”+

4 Fikiere Mosis ọ tẹ ta kẹ ahwo Izrẹl nọ a ru Ọnyavrẹ na.* 5 Kẹsena a te ru Ọnyavrẹ na* evaọ amara ọsosuọ na, evaọ ẹdẹ avọ ikpegbene amara na nọ ọre o kiediwi no,* evaọ udhude Saena. Eware kpobi nọ Jihova ọ ta kẹ Mosis, ere ahwo Izrẹl a ru.

6 Whaọ u wo ezae jọ nọ e fo ho fikinọ a rọ obọ te ohwo nọ o whu no,*+ nọ o soriẹ ze nọ a gbẹ sai ro ru Ọnyavrẹ na ha* evaọ ẹdẹ yena. Fikiere ezae nana a tẹ nyabru Mosis avọ Erọn ze evaọ ẹdẹ yena+ 7 a tẹ ta kẹe nọ: “Ma fo ho keme ma rọ obọ te ohwo nọ o whu no.* Kọ fikieme a jẹ whaha omai nọ ma ruẹrẹ idhe Ọnyavrẹ họ kẹ Jihova ha evaọ oke nọ a fihọ kẹe na evaọ udevie ahwo Izrẹl?”+ 8 Mosis ọ tẹ ta kẹ ae nọ: “Wha jọ etenẹ hẹrẹ, re mẹ nyai yo oware nọ Jihova ọ te ta kpahe owhai.”+

9 Jihova ọ tẹ ta kẹ Mosis nọ: 10 “Ta kẹ ahwo Izrẹl nọ, ‘O tẹ make rọnọ ohwo jọ evaọ udevie rai hayo evaọ ige rai nọ e be tha ọ fo ho fikinọ ọ rọ obọ te ohwo nọ o whu no*+ hayo o kpohọ erẹ ugbothabọ jọ, o re ru Ọnyavrẹ na* kẹ Jihova ghele. 11 A re ru ei* evaọ amara avọ ivẹ na,+ evaọ ẹdẹ avọ ikpegbene nọ ọre o te kiediwi no.* Yọ a rẹ rọ ebrẹdi nọ ọ kare ẹvi avọ ẹbe ọyayare rọ re iẹe.+ 12 A rẹ nyasiọ abọ riẹ ọvuọvo ba te ohiohiẹ vievie he,+ yọ a re wiri ugbonwa riẹ ovuọvo vievie he.+ A re ru ei* lele uzi kpobi nọ a jie kpahe Ọnyavrẹ na. 13 Rekọ otẹrọnọ ohwo ọ fo yọ o kpohọ erẹ ugbothabọ ọvuọvo ho, ọ gbẹ daezọ ru Ọnyavrẹ na ha,* a re kpe ohwo* yena no udevie ahwo riẹ hrọ,+ keme ọ rehọ idhe Jihova kẹe he evaọ oke nọ a fihọ na. Ohwo yena ọ rẹ ruẹ uye uzioraha riẹ.

14 “‘Yọ otẹrọnọ ọrara jọ ọ be rria udevie rai, o re ru Ọnyavrẹ na* kẹ Jihova re.+ O re ru ei lele uzi Ọnyavrẹ na gbe oghẹrẹ nọ a ta nọ a re ro ru ei.+ Uzi ovona o rẹ jọ kẹ owhai, te ọrara nọ ọ be rria udevie rai te ọmotọ ẹwho na.’”+

15 Whaọ evaọ ẹdẹ nọ a rọ whẹ uwou-udhu na họ,+ ẹgho na o ruru uwou-udhu na, uwou-udhu Isẹri na, rekọ evaọ owọwọ oware nọ o wọhọ erae o rẹ jọ ehru uwou-udhu na rite ohiohiẹ.+ 16 Ere o jẹ hae jọ: Ẹgho na o re ruru iei evaọ oke uvo, yọ oware nọ o wọhọ erae o rẹ jariẹ evaọ aso.+ 17 Oke kpobi nọ ẹgho na ọ tẹ wọ kpehru no uwou-udhu na, ahwo Izrẹl a vẹ nwane wọ ruọ edhere,+ yọ oria nọ ẹgho na ọ jọ daji, etẹe ahwo Izrẹl a re wohọ.+ 18 Nọ Jihova ọ tẹ ta nọ ahwo Izrẹl a wọ, a vẹ wọ ruọ edhere, yọ nọ Jihova ọ tẹ ta nọ a wohọ oria a ve wohọ etẹe.+ Yọ epanọ ẹgho na ọ daji ehru uwou-udhu na kri te ere a rẹ rria oria nọ a wohọ na kri te. 19 Nọ ẹgho na ọ tẹ daji ehru uwou-udhu na edẹ buobu, ahwo Izrẹl a re yoẹme kẹ Jihova, a rẹ wọ ruọ edhere he.+ 20 Ẹsejọ ẹgho na ọ rẹ daji ehru uwou-udhu na emedẹ jọ ọvo. Nọ Jihova ọ tẹ ta nọ a gbẹ jọ oria nọ a wohọ na, a vẹ gbẹ jọ etẹe, yọ nọ Jihova ọ tẹ ta nọ a wọ ruọ edhere, a vẹ wọ. 21 Ẹsejọ ẹgho na ọ rẹ sae daji oria ovo no owọwọ rite ohiohiẹ ọvo, rekọ nọ ẹgho na ọ tẹ wọ kpehru evaọ ohiohiẹ, a vẹ wọ ruọ edhere. Te o rrọ oke uvo hayo aso ẹgho na ọ rọ wọ kpehru, a rẹ wọ ruọ edhere.+ 22 O tẹ make rrọ edẹ ivẹ, amara ọvo, hayo kri viere, epanọ ẹgho na ọ rria ehru uwou-udhu na kri te kpobi ere ahwo Izrẹl a re wohọ oria na kri te, a rẹ wọ ruọ edhere he. Rekọ nọ ọ tẹ wọ kpehru no, a vẹ wọ ruọ edhere. 23 Nọ Jihova ọ tẹ ta nọ a wohọ oria, a ve wohọ etẹe, yọ Jihova ọ tẹ ta nọ a wọ, a vẹ wọ ruọ edhere. A je ru oware nọ Jihova ọ gwọlọ mi ai wọhọ epanọ Jihova ọ jẹ rọ ẹkwoma Mosis ta kẹ ae.

10 Jihova ọ tẹ ta kẹ Mosis nọ: 2 “Ru egba ivẹ kẹ omara;+ isiliva whọ rẹ tehe ro ru ai, kọ eye who re ro se ogbotu na kokohọ jẹ rọ vuẹ ae nọ a wọ ruọ edhere. 3 Nọ a te kporo ivẹ na, ogbotu na soso a re kokohọ bru owhẹ ziọ aro unuẹthẹ uwou-udhu omakugbe na.+ 4 Nọ a te kporo ọvo, enọ i wuzou na ọvo, nọ i wuzou idu ahwo evaọ Izrẹl a re kokohọ bru owhẹ ze.+

5 “Nọ wha te kporo ọgba bi do kpotọ kpehru, ahwo nọ a fa ivuẹ rai fihọ abọ ovatha-ọre+ a rẹ wọ ruọ edhere. 6 Nọ wha te kporo ọgba bi do kpotọ kpehru orọ avọ isiava, ahwo nọ a fa ivuẹ rai fihọ abọ obọze ovatha-ọre+ a rẹ wọ ruọ edhere. Enẹ a re kporo egba na kẹse kẹse rọkẹ ẹko ọvuọvo nọ a tẹ be te wọ ruọ edhere.

7 “Nọ who te bi se ogbotu na soso kokohọ, who re kporo egba na,+ rekọ who re kporo ai do kpotọ kpehru hu. 8 Emezae Erọn izerẹ na a re kporo egba na,+ yọ ekporo rai o rẹ jọ uzi nọ o rẹ jọ ribri kẹ owhai evaọ ige rai kpobi.

9 “Nọ wha tẹ be te jọ ẹwho rai wọ ẹmo bru enọ i bi kienyẹ owhai, enọ i bi kpokpo owhai, wha re kporo egba na ro se use ẹmo,+ Jihova Ọghẹnẹ rai ọ vẹ te kareghẹhọ owhai je siwi owhai no obọ ewegrẹ rai.

10 “U te no ere no, evaọ etoke oghọghọ rai,+ evaọ ehaa rai+ gbe emuhọ emerae rai, wha re kporo egba na evaọ oke idhe emahọ rai+ gbe idhe ọriẹyeri rai;+ o vẹ jọ oware ekareghẹhọ kẹ Ọghẹnẹ rai. Mẹ họ Jihova Ọghẹnẹ rai.”+

11 Whaọ evaọ ukpe avọ ivẹ, evaọ amara avọ ivẹ, evaọ edẹ udhe amara na,+ ẹgho na ọ tẹ wọ kpehru no ehru uwou-udhu+ Isẹri na. 12 Fikiere ahwo Izrẹl a te muhọ ẹwọ re a no udhude Saena lele oghẹrẹ nọ a dhesẹ nọ a rẹ rọ wọ ruọ edhere,+ ẹgho na ọ tẹ daji udhude Peran.+ 13 Onana họ orọ ọsosuọ nọ a rọ wọ ruọ edhere lele oghẹrẹ nọ Jihova ọ ta ẹkwoma Mosis.+

14 Fikiere ẹko erua esa orọ evuẹ emezae Juda a tẹ kake wọ ruọ edhere lele ọvuọ itu rai,* yọ Nashọn+ ọmọzae Aminadab họ ọnọ o wuzou utu riẹ. 15 Ọnọ o wuzou utu orua emezae Isaka họ Nẹtanẹl+ ọmọzae Zua. 16 Ọnọ o wuzou utu orua emezae Zẹbulọn họ Ẹlayab+ ọmọzae Hilọn.

17 Nọ a rra uwou-udhu na fihọ otọ no,+ emezae Gẹshọn+ gbe emezae Mẹrarae+ nọ e wọ uwou-udhu na a tẹ wọ ruọ edhere.

18 Kẹsena ẹko erua esa orọ evuẹ Rubẹn a tẹ wọ ruọ edhere lele ọvuọ itu rai,* yọ Elaezọ+ ọmọzae Shẹdiọ họ ọnọ o wuzou utu riẹ. 19 Ọnọ o wuzou utu orua emezae Simiọn họ Shilumiẹl+ ọmọzae Zurishadae. 20 Ọnọ o wuzou utu orua emezae Gad họ Elayasaf+ ọmọzae Duẹl.

21 Kẹsena ahwo orua Kohat nọ e wọ eware oria aruẹri na+ a tẹ wọ ruọ edhere. A te whẹ uwou-udhu na họ no taure ahwo orua Kohat na a te te oria nọ a ti wohọ.

22 Kẹsena ẹko erua esa orọ evuẹ emezae Ifremu a tẹ wọ ruọ edhere lele ọvuọ itu rai,* yọ Ẹlishama+ ọmọzae Amaehọd họ ọnọ o wuzou utu riẹ. 23 Ọnọ o wuzou utu orua emezae Manasẹ họ Gamaliẹl+ ọmọzae Pẹdazọ. 24 Ọnọ o wuzou utu orua emezae Bẹnjamin họ Abidan+ ọmọzae Gidionai.

25 Kẹsena ẹko erua esa orọ evuẹ emezae Dan a tẹ wọ ruọ edhere lele ọvuọ itu rai,* ae a jọ obemu eko ahwo na kpobi, yọ Ahayiza+ ọmọzae Amishadae họ ọnọ o wuzou utu riẹ. 26 Ọnọ o wuzou utu orua emezae Asha họ Pegiẹl+ ọmọzae Ọkran. 27 Ọnọ o wuzou utu orua emezae Naftalae họ Ahaera+ ọmọzae Inan. 28 Oghẹrẹ utiona ahwo Izrẹl a jẹ hae rọ wọ ruọ edhere lele ọvuọ itu rai* nọ a tẹ be wọ no oria.+

29 Mosis ọ tẹ ta kẹ Hobab ọmọzae Ruẹl*+ ohwo Midian nọ ọ rrọ ọgọ Mosis inọ: “Ma be wọ kpohọ oria nọ Jihova ọ ta kpahe inọ, ‘Mẹ te rehọ iẹe kẹ owhai.’+ Lele omai,+ ma te riẹ owhẹ ru, keme Jihova ọ ya eyaa emamọ eware kẹ Izrẹl.”+ 30 Rekọ ọ tẹ ta kẹe nọ: “Mẹ be nya ha. Me bi zihe kpobọ orẹwho mẹ bru imoni mẹ.” 31 Mosis ọ tẹ ta kẹe nọ: “Ivie, whọ nyasiọ omai ba ha, keme whẹ họ ọnọ ọ riẹ eria nọ u fo nọ ma re wohọ evaọ udhude na, jọ ọnọ o re su omai.* 32 Yọ who te lele omai,+ ewoma kpobi nọ Jihova o ru kẹ omai, ma te ruẹ nọ u te owhẹ re.”

33 Fikiere a te muhọ ẹnya no ugbehru Jihova,+ erẹ edẹ esa, yọ etehe ọvọ+ Jihova ọ karo kẹ ae evaọ erẹ edẹ esa na re o gwọlọ oria eriosehọ kẹ ae.+ 34 Ẹgho Jihova+ ọ jọ ehru rai evaọ uvo nọ a wọ ruọ edhere no oria nọ a fa evuẹ fihọ.

35 Oke kpobi nọ a tẹ wọ Etehe na re a nya, Mosis ọ vẹ ta nọ: “Kparoma, O Jihova,+ jọ ewegrẹ ra a vahabọ, re enọ i mukpahe owhẹ a ruẹ owhẹ dhẹ.” 36 Nọ a jẹ wọe fihọ otọ, ọ vẹ ta nọ: “Zihe ze, O Jihova, bru ahwo Izrẹl nọ a bu te idu nọ a rẹ sai kele mu hu* na.”+

11 Ahwo na a te muhọ ẹgo bi bruenu evaọ aro Jihova. Nọ Jihova o yo, eva e tẹ dhae gaga, erae nọ i no obọ Jihova ze i te vo mu ai jẹ mahe ejọ kpe evaọ ughe evuẹ na. 2 Nọ ahwo na a mu Mosis họ ebo se, ọ tẹ lẹ olẹ ayare-ọgaga se Jihova,+ erae na i te fu. 3 Fikiere a te se odẹ oria na Tabera,* keme erae nọ i no obọ Jihova ze i vo mu ai.+

4 Ogbotu ahwo sa-sa*+ nọ a jọ udevie rai a te bi dhesẹ urusio oriobọ,+ ahwo Izrẹl omarai a tẹ wariẹ muhọ ẹviẹ be ta nọ: “Ono ọ te kẹ omai arao nọ ma rẹ re?+ 5 Ma kareghẹhọ epanọ ma jẹ rọ re iyei nyafu nyafu ọvọvẹ evaọ obọ Ijipti, te ikukumba, ewhọtamẹlọn, irubasa igrini, irubasa, gbe egaliki!+ 6 Rekọ obọnana ma* ya fia no. Ma be ruẹ oware ovo ho ajokpaọ emana nana.”+

7 Whaọ emana na+ ọ jọ wọhọ ubi korianda,+ yọ o wọhọ egọmu dẹliọm. 8 Ahwo na a jẹ hae vaha ruọ ọvuọ oboriẹ nyae kwa ae, a vẹ rọ utho nọ a re ro wuhu eware wuhu ai hayo a vẹ jọ udo duwu ai. Kẹsena a ve there ai evaọ uwho hayo ru ai fihọ ikulu ebrẹdi igheghelie,+ yọ awere riẹ o wọhọ ikeki ọwewere nọ a rọ ewhri ru. 9 Nọ igrigri i te kie fihọ otọ evuẹ na evaọ aso, emana na i re kie fihọ otọ re.+

10 Mosis o yo edo ahwo na nọ a be viẹ, kuviuwou kuviuwou, ohwo kpobi evaọ unuwou uwou-udhu riẹ. Eva e tẹ dha Jihova gaga,+ yọ o kẹ Mosis uye gaga re. 11 Mosis ọ tẹ ta kẹ Jihova nọ: “Fikieme whọ rọ lẹliẹ odibo ra be reoja? Fikieme who gbe ro rri omẹ aro ho, nọ whọ rọ wọ owha ahwo nana kpobi fihọ omẹ uzou?+ 12 Kọ mẹ me di eva ahwo nana kpobi họ? Kọ mẹ me yẹ rai, nọ whọ be rọ ta kẹ omẹ nọ, ‘Wọ ae họ igbama ra, nwane wọhọ epanọ ọyọrọ-ọmọ* ọ rẹ wọ ọmọ unuevie,’ re mẹ rehọ ae kpohọ otọ nọ who duwu iyei nọ whọ te rọ kẹ esẹ-esẹ rai?+ 13 Diẹse mẹ te jọ ruẹ erao nọ mẹ te kẹ ahwo nana kpobi? Keme a be viẹ kẹ omẹ ẹsikpobi nọ, ‘Kẹ omai arao nọ ma rẹ re!’ 14 Mẹ ọvo mẹ sae wọ owha ahwo nana kpobi hi; owha na o rro vi omẹ oma.+ 15 Otẹrọnọ enẹ who bi ti ru omẹ, ivie kpe omẹ no obọnana.+ Otẹrọnọ me wo aruoriwo ra, whọ gbẹ jọ omẹ ruẹ uye he.”

16 Jihova ọ tẹ kpahe kẹ Mosis nọ: “Jọ udevie ekpako Izrẹl salọ ezae udhosa-gbikpe kẹ omẹ, ezae nọ who vuhumu* nọ a rrọ ekpako gbe iletu ahwo na,+ re whọ rehọ ae kpobọ uwou-udhu omakugbe na, re a dikihẹ etẹe kugbe owhẹ. 17 Me ti nwrotọ ze+ re me lele owhẹ ta ẹme evaọ etẹe,+ mẹ vẹ te rehọ abọjọ ẹzi+ nọ ọ rrọ owhẹ oma na fihọ ae oma, a ve ti fiobọhọ kẹ owhẹ wọ owha ahwo na, re whẹ ọvo whọ gbẹ wọ owha na ha.+ 18 Whọ rẹ ta kẹ ahwo na nọ, ‘Wha ru omarai fo* rọkẹ odẹnotha,+ wha te ginẹ re erao, keme Jihova o yo oviẹ rai+ nọ wha ta nọ: “Ono ọ te kẹ omai arao nọ ma rẹ re? Obọ Ijipti eware e mae jọ woma kẹ omai.”+ Jihova ọ te ginẹ kẹ owhai erao, wha vẹ te re.+ 19 Wha te re, orọnikọ ẹdẹ ọvo ho, hayo edẹ ivẹ hẹ, hayo edẹ isoi hi, hayo edẹ ikpe he, hayo edẹ udhe he, 20 rekọ amara soso, bẹsenọ i re no ighogho-inwe rai ze, e vẹ te vẹso owhai,+ keme wha siọ Jihova, ọnọ ọ rrọ udevie rai, wha tẹ jẹ viẹ evaọ aro riẹ, inọ: “Fikieme ma ro no Ijipti ze?”’”+

21 Kẹsena Mosis ọ tẹ ta nọ: “Ahwo nọ mẹ rrọ udevie rai na a bu te ezae idu egba ezeza (600,000)+ nọ e be nya owotọ, ghele na whọ ta nọ, ‘Mẹ te kẹ ae erao, yọ a te re bẹ evaọ amara soso’! 22 A te kpe ithuru erao gbe ewa erao soso, kọ i re te ae re? Hayo kọ a te kpe iyei abade na kpobi ze, kọ i re te ae re?”

23 Jihova ọ tẹ ta kẹ Mosis nọ: “Kọ obọ Jihova o kpẹre hrọ?+ Obọnana whọ te ruẹ sọ oware nọ mẹ ta na o te via rọkẹ owhẹ hayo o te via ha.”

24 Fikiere Mosis ọ tẹ nyavrẹ ọ tẹ vuẹ ahwo na ẹme nọ Jihova ọ ta. Ọ tẹ jọ usu ekpako ahwo na koko ezae udhosa-gbikpe họ jẹ rehọ ae kpobọ uwou-udhu na nyai dikihẹ.+ 25 Kẹsena Jihova o te nwrotọ ze evaọ ẹgho,+ ọ tẹ ta ẹme kẹe+ jẹ rehọ abọjọ ẹzi+ nọ ọ riẹe oma fihọ omomọvo ekpako udhosa-gbikpe na. Nọ ẹzi na ọ nwane ruọ ae oma no, a te muhọ eru wọhọ eruẹaro,*+ rekọ a gbe ru ere ofa ha.

26 U wo ezae ivẹ jọ evaọ usu rai nọ e gbẹ jọ obọ evuẹ na. Edẹ rai họ Ẹldad gbe Midad. Ẹzi na o te mu ai oma họ ẹruọ, keme a rrọ usu ahwo nọ a kere edẹ rai fihotọ, rekọ a re nya kpobọ uwou-udhu na ha. Fikiere a te muhọ eru wọhọ eruẹaro evaọ evuẹ na. 27 Ọmoha jọ ọ tẹ dhẹ nyae ta kẹ Mosis nọ: “Ẹldad avọ Midad a bi ru wọhọ eruẹaro evaọ evuẹ na!” 28 Kẹsena Joshua+ ọmọzae Nọn nọ ọ rrọ ọgbodibo Mosis no oke uzoge riẹ ze, ọ tẹ ta nọ: “Mosis olori mẹ, whaha ae!”+ 29 Rekọ Mosis ọ tẹ ta kẹe nọ: “Whọ be re ihri fiki mẹ? Ijo, dodokọ ahwo Jihova kpobi a rrọ eruẹaro, gbe nọ Jihova o re fi ẹzi riẹ họ ae oma!” 30 Uwhremu na Mosis avọ ekpako Izrẹl a te zihe kpobọ evuẹ na.

31 Kẹsena Jihova o te vi ofou ze nọ o je fou ikueli* no obọ abade ze, je bi ru ai kie fihọ evuẹ na wariẹ họ,+ evaọ oria nọ a rẹ sae nya okpẹdoke evaọ abọ nana, gbe oria nọ a rẹ sae nya okpẹdoke evaọ abọdekọ wariẹ evuẹ na kpobi họ, yọ i no otọ kpehru te ikiubiti* ivẹ. 32 Fikiere evaọ ẹdẹ yena soso gbe aso yena soso gbe ẹdẹ nọ o lele i rie soso, ahwo na a tẹ ruabọhọ be kwa ikueli na kokohọ ọvo. Ohwo ọvo ọ kwa kawo vi homa* ikpe he, a tẹ jẹ vravra ae fihọ evuẹ na wariẹ họ kẹ omarai. 33 Rekọ nọ erao na e gbẹ jọ akọ rai, re a tẹ te re ae, ofu o te mu Jihova kẹ ahwo na gaga, Jihova o te kpe ahwo na buobu gaga.+

34 Fikiere a te se odẹ oria na Kibrọt-hateava,*+ keme etẹe a ki ahwo nọ a dhesẹ urusio oriobọ na fihọ.+ 35 Ahwo na a tẹ wọ no Kibrọt-hateava kpohọ Hazirọt, a te wohọ Hazirọt.+

12 Miriam avọ Erọn a tẹ jẹ ta ẹme wọso Mosis fiki aye Kush nọ ọ rehọ, keme aye nọ ọ rehọ na ohwo Kush.+ 2 A jẹ ta nọ: “Kọ ẹkwoma Mosis ọvo Jihova ọ rọ ta ẹme no? Kọ ọ gbẹ rọ ẹkwoma mai ta ẹme no re?”+ Yọ Jihova ọ jẹ gaviezọ.+ 3 Whaọ Mosis họ ọzae nọ ọ mai wolẹ kpaobọ evaọ usu ahwo kpobi*+ nọ a jọ otọakpọ na.

4 Ẹsiẹvo na Jihova ọ tẹ ta kẹ Mosis avọ Erọn gbe Miriam nọ: “Whai imasa na wha nya kpobọ uwou-udhu omakugbe na.” Fikiere aimasa na a tẹ nya. 5 Jihova o te nwrotọ ze evaọ ukulu ẹgho*+ na o te dikihẹ unuẹthẹ uwou-udhu na o te se Erọn avọ Miriam. Aimava a tẹ nya lahwe. 6 Ọ tẹ ta nọ: “Ivie, wha gaviezọ kẹ omẹ. Otẹrọnọ ọruẹaro Jihova jọ ọ rrọ udevie rai, evaọ eruẹaruẹ me re jo dhesẹ oma kẹe,+ yọ evaọ ewezẹ mẹ rẹ jọ ta ẹme kẹe.+ 7 Rekọ ere o rrọ kẹ Mosis odibo mẹ hẹ! Me mu uwou mẹ soso họ iẹe obọ.*+ 8 Me re lele iei ta ẹme ovao dhe ovao,*+ vevẹ, orọnikọ ẹkwoma ehare* he; yọ ọ be ruẹ oghẹrẹ nọ Jihova ọ rrọ. Kọ fikieme ozọ u gbe mu owhai hi re wha ta ẹme wọso odibo mẹ, wọso Mosis?”

9 Fikiere eva e tẹ dha Jihova kẹ ae gaga, ọ tẹ nyase ae ba. 10 Ẹgho na o te no ehru uwou-udhu na, whaọ rri! oti ọ ruọ Miriam oma no nọ o be fo wọhọ ekpalekpa-ame.+ Erọn o te rri Miriam, ọ tẹ ruẹ nọ a rọ oti tehe iẹe no.+ 11 Ababọ oke oraha, Erọn ọ tẹ ta kẹ Mosis nọ: “Mẹ lẹ owhẹ, olori mẹ! Ivie, who kele uzioraha nana kẹ omai hi! Oware ugheghẹ ma ru na. 12 Ivie, whọ kuvẹ re ọ jọ enẹ ọvo wọhọ ohwo owhuowhu hu, ọnọ abọjọ uwo-oma riẹ u gbo no evaọ okenọ a ro yẹi!” 13 Mosis o te mu Jihova họ ebo se nọ: “O Ọghẹnẹ, ivie siwi ei! Ivie!”+

14 Jihova ọ tẹ kpahe kẹ Mosis nọ: “Otẹrọnọ ọsẹ riẹ o nwo eya ku ei ovao, kọ onana u gbe ti kpomovuọ họ iẹe oma edẹ ihrẹ? Jọ a fi ei họ oria riẹ sa edẹ ihrẹ evaọ obọ otafe evuẹ na,+ uwhremu na a vẹ rehọ iẹe zihe ze.” 15 Fikiere a te fi Miriam họ oria riẹ sa evaọ obọ otafe evuẹ na edẹ ihrẹ,+ yọ ahwo na a wọ no etẹe ruọ edhere he bẹsenọ a rọ rehọ Miriam zihe ze. 16 Uwhremu na ahwo na a tẹ wọ no Hazirọt+ a te mu udhude Peran họ ewohọ.+

13 Jihova ọ tẹ ta kẹ Mosis nọ: 2 “Vi ezae jọ vrẹ re a nyae kiẹ otọ Kenan nọ mẹ be te rọ kẹ ahwo Izrẹl na. Wha rẹ jọ orua kpobi vi omọvo nya, ae omomọvo ọ rẹ jọ ọnọ o wuzou+ evaọ udevie rai.”+

3 Fikiere Mosis o te vi ai vrẹ no udhude Peran+ wọhọ epanọ Jihova ọ ta. Ezae na kpobi yọ enọ i wuzou ahwo Izrẹl. 4 Edẹ rai ena: evaọ orua Rubẹn, Shamua ọmọzae Zakọ; 5 evaọ orua Simiọn, Shefat ọmọzae Horae; 6 evaọ orua Juda, Kelẹb+ ọmọzae Jefunẹ; 7 evaọ orua Isaka, Aigal ọmọzae Josẹf; 8 evaọ orua Ifremu, Hoshia+ ọmọzae Nọn; 9 evaọ orua Bẹnjamin, Pọltae ọmọzae Refu; 10 evaọ orua Zẹbulọn, Gadiẹl ọmọzae Sodae; 11 evaọ orua Josẹf,+ ọrọ orua Manasẹ họ+ Gadae ọmọzae Susae; 12 evaọ orua Dan, Amiẹl ọmọzae Gemalae; 13 evaọ orua Asha, Sitọ ọmọzae Maekẹl; 14 evaọ orua Naftalae, Nabae ọmọzae Vọfsae; 15 evaọ orua Gad, Giuẹl ọmọzae Mekae; 16 Enana họ edẹ ezae nọ Mosis o vi nyae kiẹ otọ na. Mosis o te mu Joshua*+ kẹ Hoshia ọmọzae Nọn.

17 Okenọ Mosis o je vi ai nyae kiẹ otọ Kenan, ọ ta kẹ ae nọ: “Wha kpobọ Negẹb,* kẹsena wha ve kpohọ ubrotọ igbehru na.+ 18 Wha re rri oghẹrẹ nọ ẹkwotọ na ọ rrọ+ sọ ahwo nọ a be rria ẹkwotọ na a rrọ gaga hayo eyẹlẹ, sọ a rrọ kakao hayo buobu, 19 sọ ẹkwotọ na o woma hayo o yoma, sọ ikpewho nọ a be rria na i kpefihọ hayo a di ogba wariẹ ae họ.* 20 Wha ve je rri otọ na sọ u re wou eware* hayo u re wou eware he,*+ sọ ire e riẹ hayo e riẹ hẹ. Wha wo udu+ re wha kọrọ ibi-ire ẹkwotọ na jọ ze.” Whaọ oke onana o jọ ezi ibi evaene ọsosuọ nọ e ware.+

21 Fikiere a tẹ nya a tẹ kiẹ otọ na no udhude Zin+ rite Rihọb,+ je te Libo-hemat.*+ 22 Nọ a gadiẹ kpohọ Negẹb,* a tẹ ziọ Hebrọn,+ oria nọ Ahaeman, Shishae, gbe Talmae+ ahwo Anak+ a jẹ rria. Whaọ a bọ* Hebrọn ikpe ihrẹ no taure a tẹ te bọ* ẹwho Ijipti nọ a re se Zoan. 23 Nọ a te Ukiekpotọ* Ẹshkọl,+ a tẹ jọ etẹe nawo ogha owhala ibi-ire evaene, onọ ezae ivẹ a thọrọ ure fihọ wọ, jegbe pọmegranet avọ ifigi jọ.+ 24 A te se oria yena Ukiekpotọ* Ẹshkọl*+ fiki owhala ibi-ire evaene nọ ahwo Izrẹl a jọ etẹe nawo na.

25 Nọ u te edẹ udhuvẹ no,+ a te zihe no otọ-okiẹ na ze. 26 A te zihe bru Mosis avọ Erọn gbe ogbotu ahwo Izrẹl kpobi evaọ udhude Peran, evaọ Kedẹsh.+ A tẹ niyẹrẹ epanọ a nyate kẹ ogbotu na soso je dhesẹ ibi-ire ẹkwotọ na kẹ ae. 27 Enẹ a ta kẹ Mosis: “Ma ruọ eva ẹkwotọ nọ who vi omai nya na, yọ ame-ivie gbe ọnyọ e be ginẹ jariẹ su,+ ibi-ire riẹ ena.+ 28 Rekọ ahwo nọ a be rria ẹkwotọ na a rrọ gaga, yọ ikpewho nọ a di ogba wariẹ họ* na e rrọ ruaro gaga. Ma tẹ jẹ ruẹ ahwo Anak na evaọ obei.+ 29 Ahwo Amalẹk+ a be rria ẹkwotọ Negẹb,*+ yọ ahwo Hit, ahwo Jebus,+ gbe ahwo Amọ+ a be rria ubrotọ igbehru na, ahwo Kenan+ a tẹ be rria kẹle abade na+ gbe akotọ Jọdan.”

30 Kẹsena Kelẹb ọ tẹ jẹ daoma tuduhọ ahwo na awọ epanọ a ro dikihẹ aro Mosis na, be ta kẹ ae nọ: “Wha joma nya ababọ oke oraha, ma te siọ ẹkwotọ na ba ẹrehọ họ, keme ma sai gine fi ei kparobọ.”+ 31 Rekọ ezae nọ a gbẹ nya na a tẹ ta nọ: “Ma sae wọ ohọre bru ahwo na ha, keme a ga vi omai.”+ 32 A tẹ ruabọhọ be nẹ ekpehre iyẹrẹ kẹ ahwo Izrẹl+ kpahe ẹkwotọ nọ a nyae kiẹ riwi na, inọ: “Ẹkwotọ nọ ma nyae kiẹ na yọ ẹkwotọ nọ ọ rẹ re ahwo nọ a be rria eva riẹ, yọ ahwo kpobi nọ ma jariẹ ruẹ a jọ ahwo nọ a rro* thesiwa.+ 33 Ma tẹ jẹ ruẹ ahwo Nẹfilim, emezae Anak,+ enọ i no ahwo* Nẹfilim ze, yọ a tẹ rọ omai wawo ae, ma wọhọ ebaka, ere ma rri omamai evaọ abotọ rai, yọ ere a rri omai re.”

14 Kẹsena ogbotu na soso a tẹ kpare oviẹ, ahwo na a tẹ ruabọhọ oviẹ bi bo evaọ aso yena soso.+ 2 Ahwo Izrẹl kpobi a te muọ Mosis avọ Erọn+ họ ẹgo kpahe, ogbotu ahwo na kpobi a tẹ be ta ẹme wọso ae inọ: “Dodokọ ma whu evaọ obọ otọ Ijipti, hayo ma whu no evaọ udhude nana! 3 Fikieme Jihova ọ be rọ rehọ omai ziọ ẹkwotọ nana re ma whu uwhu ọgbọdọ?+ Amọfa a vẹ te rehọ eyae mai gbe emọ mai no.+ Kọ o gbẹ te mai woma re ma tube zihe kpobọ Ijipti?”+ 4 A jẹ tubẹ ta kẹ ohwohwo nọ: “Wha joma rehọ osu jọ mu re ma zihe kpobọ Ijipti!”+

5 Mosis avọ Erọn a te kie vovao tuotọ fihọ aro ogbotu ahwo Izrẹl soso nọ i kokohọ na. 6 Joshua+ ọmọzae Nọn gbe Kelẹb+ ọmọzae Jefunẹ nọ a rrọ usu enọ e nyae kiẹ otọ na riwi na, a tẹ bẹre iwu rai, 7 a tẹ ta ẹme nana kẹ ogbotu ahwo Izrẹl soso nọ: “Ẹkwotọ nọ ma nyae kiẹ riwi na yọ emamọ ẹkwotọ gaga.+ 8 Otẹrọnọ Jihova ọ jẹ omai rehọ, ọ te rehọ omai ziọ ẹkwotọ nana jẹ rehọ iẹe kẹ omai hrọ, ẹkwotọ nọ ame-ivie avọ ọnyọ e be jọ su.+ 9 Rekọ wha wọso Jihova vievie he, yọ wha dhozọ ahwo ẹkwotọ na vievie he,+ keme ma ti kpe ai no.* Oware ovo o gbẹ riẹ nọ o be thọ ae he,* Jihova ọ rrọ kugbe omai.+ Wha dhozọ rai hi.”

10 Ghele na, ogbotu na soso a tẹ be ta kpahe epanọ a rẹ rọ rehọ itho fi ai.+ Rekọ oruaro Jihova o tẹ romavia kẹ ahwo Izrẹl kpobi evaọ ehru uwou-udhu omakugbe na.+

11 Jihova ọ tẹ ta kẹ Mosis nọ: “Ẹvẹ ahwo nana a re dhesẹ nọ a wo adhẹẹ kẹ omẹ hẹ kri te,+ kọ ẹvẹ a rẹ siọ ẹrọwọ ba efihọ omẹ kri te ghelọ edele eware eka nọ me ru no evaọ udevie rai na?+ 12 Jomẹ rọ okpẹyao nọ o re vo tehe ae re me kpe ai no, re me ru owhẹ fihọ orẹwho nọ o rro vi ai jẹ ga vi ai.”+

13 Rekọ Mosis ọ tẹ ta kẹ Jihova nọ: “Ahwo Ijipti nọ whọ rọ ẹkwoma ogaga ra rehọ ahwo nana no udevie rai ze na, a ti yo,+ 14 a ve ti gbiku riẹ kẹ ahwo nọ a be rria ẹkwotọ nana. Yọ enana a yo no re inọ whẹ Jihova whọ rrọ kugbe ahwo nana+ gbe nọ whọ romavia kẹ ae ovao dhe ovao.+ Whẹ họ Jihova yọ ẹgho ra o dikihẹ ehru rai, whọ tẹ jẹ be karo kẹ ae ẹkwoma ukulu ẹgho* evaọ uvo gbe ukulu erae* evaọ aso.+ 15 Who te kpe ahwo nana kpobi no ẹsiẹvo,* erẹwho nọ i yo kpahe oruaro ra no na a vẹ te ta nọ: 16 ‘Jihova ọ sae rehọ ahwo nana kpohọ ẹkwotọ nọ o duwu iyei nọ ọ te kẹ ae na ha, fikiere o te kpe ai no evaọ obọ udhude na.’+ 17 Whaọ enẹna, ivie, Jihova, jọ ogaga ra u dhesẹ oma via, wọhọ epanọ whọ ya eyaa okenọ whọ ta nọ: 18 ‘Jihova ọ rẹ kaki mu ofu hu yọ ọ vọ avọ uyoyou nọ o rẹ hiẹ hẹ,*+ ọ rẹ rehọ oruthọ gbe uzioraha rọvrẹ, rekọ ọ rẹ siọ enọ e reabe uye ba ẹkẹ hẹ, ọ rẹ rehọ uye oruthọ esẹ te emọ, rọkẹ oge avọ esa gbe oge avọ ene.’+ 19 Ivie, rọ uzioraha ahwo nana vrẹ rai fiki uyoyou ulogbo ra nọ o rẹ hiẹ hẹ, nwane wọhọ epanọ whọ rọvrẹ rai no obọ Ijipti ze rite enẹna.”+

20 Kẹsena Jihova ọ tẹ ta nọ: “Mẹ rọvrẹ rai wọhọ epanọ whọ ta na.+ 21 Ghele na, nọ mẹ rrọ uzuazọ na, oruaro Jihova o te vọ otọakpọ na soso.+ 22 Rekọ ezae nana nọ a ruẹ oruaro mẹ gbe eware eka+ nọ me ru evaọ Ijipti gbe evaọ udhude na, ghele na a dawo omẹ+ isia ikpe nana, yọ a gaviezọ kẹ urru mẹ hẹ na, ọvuọvo rai+ 23 ọ te ruẹ ẹkwotọ nọ me duwu iyei nọ mẹ te kẹ esẹ rai na vievie he. Ijo, ọvuọvo evaọ usu enọ i bi dhesẹ nọ a wo adhẹẹ kẹ omẹ hẹ na a te ruẹ e riẹ hẹ.+ 24 Rekọ fikinọ odibo mẹ Kelẹb+ o wo ohẹriẹ,* yọ ọ ruabọhọ be rọ udu riẹ kpobi lele omẹ, mẹ te rehọ iẹe ziọ ẹkwotọ nọ o kpohọ na hrọ, yọ u ti zihe ruọ orọ emọ riẹ.+ 25 Nọ orọnọ ahwo Amalẹk gbe ahwo Kenan+ a be rria ukiekpotọ* na, wha re kuomarẹriẹ odẹnotha re wha nya kpobọ udhude na evaọ edhere Abade Ọwawae na.”+

26 Kẹsena Jihova ọ tẹ ta kẹ Mosis avọ Erọn nọ: 27 “Ẹvẹ ogbotu omuomu nana a te gbẹ go kpahe omẹ kri te?+ Me yo eware nọ ahwo Izrẹl a be go kpahe omẹ no.+ 28 Ta kẹ ae nọ, ‘Enẹ Jihova ọ ta, “Nọ mẹ rrọ uzuazọ na, nwanọ oware nọ wha ta, nọ me yo na me ti ru owhai!+ 29 Udhude nana wha ti whu fihọ,*+ ẹhẹ, whai kpobi no umuo ikpe udhe kpohọ ehru nọ a kere edẹ rai fihotọ na, whai enọ e go kpahe omẹ na kpobi.+ 30 Ọvuọvo rai ọ te ruọ ẹkwotọ nọ me duwu iyei* nọ mẹ te rọ kẹ owhai rria na ha+ ajokpaọ Kelẹb ọmọzae Jefunẹ gbe Joshua ọmọzae Nọn.+

31 “‘“Mẹ te rehọ emọ rai kpohọ iẹe, enọ wha ta nọ amọfa a te rehọ no na,+ yọ a te riẹ ẹkwotọ nọ wha se na.+ 32 Rekọ udhude nana wha ti whu fihọ.* 33 Obọnana emezae rai i ti zihe ruọ ithuru-igodẹ evaọ udhude na ikpe udhuvẹ,+ yọ a te ruẹ uye fikinọ wha kiukeku omẹ,* bẹsenọ ọrọ urere rai o re whu no evaọ udhude na.+ 34 Wọhọ epaọ unu edẹ nọ wha kiẹ otọ na, edẹ udhuvẹ na,+ ẹdẹ ọvo rọkẹ ẹgbukpe, ẹdẹ ọvo rọkẹ ẹgbukpe, ere wha te ruẹ uye iruthọ rai ikpe udhuvẹ,+ wha vẹ te ruẹ oware nọ u re noi ze nọ a tẹ wọso omẹ.*

35 “‘“Mẹ Jihova mẹ ta riẹ no. Enẹ me ti ru ogbotu omuomu nana kpobi, enọ i kokohọ wọso omẹ na: Udhude nana u ti jo re kẹ ae, yọ etenẹ a ti whu fihọ.+ 36 Ezae nọ Mosis o vi nyae kiẹ otọ na nọ i ru nọ ogbotu na a jẹ rọ go kpahe iẹe okenọ a wha ekpehre iyẹrẹ kpahe ẹkwotọ na kpozi,+ 37 ẹhẹ, ezae nọ e wha ekpehre iyẹrẹ kpahe ẹkwotọ na ze na, a ti kpe ai no a ve ti whu evaọ aro Jihova.+ 38 Rekọ Joshua ọmọzae Nọn gbe Kelẹb ọmọzae Jefunẹ nọ a jọ usu ahwo nọ a nyae kiẹ otọ na a te gbẹ jọ uzuazọ.”’”+

39 Nọ Mosis ọ ta eme nana kẹ ahwo Izrẹl na kpobi, ahwo na a te muhọ eweri gaga. 40 Rekọ, a tẹ kpama evaọ irioke frifri a te je kpobọ ehru ugbehru na, be ta nọ: “Obọnana ma ruẹrẹ oma kpahe no re ma kpohọ oria nọ Jihova ọ ta kpahe na, keme ma raha uzi no.”+ 41 Rekọ Mosis ọ tẹ ta nọ: “Fikieme wha jẹ be la ẹme Jihova vrẹ? Wha te kparobọ họ. 42 Wha nya ha, keme Jihova ọ rrọ kugbe owhai hi; ewegrẹ rai i ti fi owhai kparobọ.+ 43 Ahwo Amalẹk gbe ahwo Kenan nọ a rrọ obei na a te họre owhai,+ yọ a te rọ ọgbọdọ kpe owhai. Fikinọ wha siọ Jihova ba elele, Jihova ọ te jọ kugbe owhai hi.”+

44 Ghele na, a tẹ gbaudu bi kpohọ ehru ugbehru na,+ rekọ etehe ọvọ Jihova avọ Mosis a no udevie evuẹ na ha.+ 45 Kẹsena ahwo Amalẹk gbe ahwo Kenan nọ a jẹ rria ugbehru yena a te nwrotọ ze a te kpe ai, je le ae te ugbo obọ Họma.+

15 Jihova ọ tẹ gbẹ ta kẹ Mosis nọ: 2 “Ta kẹ ahwo Izrẹl nọ, ‘Okenọ wha tẹ ziọ ẹkwotọ nọ mẹ be rọ kẹ owhai re wha rria na no,+ 3 nọ wha tẹ be rehọ okẹ nọ a rẹ rọ erae mahe kẹ Jihova no owa erao hayo uthuru erao ze, te orọ idhe emahọ+ hayo idhe nọ a rẹ rọ hwa eyaa obọdẹ jọ hayo okẹ unevaze+ hayo okẹ nọ a rẹ kẹ evaọ etoke ehaa ezi-ezi rai+ re u gbo ore awere* se Jihova,+ 4 ọnọ ọ be rehọ okẹ riẹ ze na ọ rẹ jẹ kẹ Jihova okẹ idhe ibi ekakọ orọ emamọ eflawa iwuwuru+ nọ o rẹ jọ abọvo abakpe ifa* nọ a rehọ abọvo abane ihini* orọ ewhri gua. 5 Wha rẹ jẹ rehọ abọvo abane ihini orọ enwaene kẹ okẹ idhe udi nọ a re kugbe idhe emahọ na,+ hayo kugbe idhe omogodẹ ọzae kpobi. 6 Otẹrọnọ egbo, wha rẹ rehọ abava abakpe owawọ ifa orọ emamọ eflawa iwuwuru nọ a rehọ abọvo abasa ihini orọ ewhri gua ro dhe idhe ibi ekakọ. 7 Yọ wha rẹ rehọ abọvo abasa ihini orọ enwaene kẹ okẹ idhe udi nọ u re gbo ore awere* se Jihova.

8 “‘Rekọ otẹrọnọ eruẹ ọzae wha rehọ no owa erao na ze bi ro dhe idhe emahọ+ hayo idhe nọ a rẹ rọ hwa eyaa obọdẹ+ jọ hayo idhe ọriẹyeri kẹ Jihova,+ 9 wha re je ku eware nana kugbe eruẹ ọzae nọ a rehọ no owa erao ze na ro dhe idhe ibi ekakọ,+ abasa abakpe owawọ ifa orọ emamọ eflawa iwuwuru nọ a rọ abọvo ihini orọ ewhri gua. 10 Yọ wha rẹ jẹ rehọ abọvo ihini enwaene ze nọ a re ro dhe idhe udi+ nọ a rẹ rọ erae mahe nọ i re gbo ore awere* se Jihova. 11 Ere wha re ru fihọ eruẹ ọzae kpobi hayo egbo kpobi hayo omogodẹ ọzae kpobi hayo ẹwe kpobi. 12 Unu kpobi nọ wha bi ro dhe idhe, ere wha re ru fihọ ae ọvuọvo, lele epanọ unu rai o rrọ. 13 Enẹ ọmotọ Izrẹl kpobi ọ rẹ rọ kẹ okẹ nọ a re ro dhe idhe nọ a rẹ rọ erae mahe, onọ u re gbo ore awere* se Jihova.

14 “‘Otẹrọnọ ohwo orẹwho ọfa nọ ọ be rria kugbe owhai hayo ohwo jọ nọ ọ rrọ udevie rai ikpe* buobu no o bi dhe idhe nọ a rẹ rọ erae mahe nọ i re gbo ore awere* se Jihova, o re ru epanọ wha re ru na ẹrẹrẹe.+ 15 Whai nọ wha rrọ ahwo Izrẹl* gbe ahwo orẹwho ọfa nọ e be rria kugbe owhai, uzi ovona wha wo. Onana yọ uzi nọ o rẹ jọ ribri kẹ ige rai kpobi. Te ọrara nọ ọ be rria udevie rai te owhai a re ru epọvo na evaọ aro Jihova.+ 16 Uzi ovona gbe uzi oziẹobro ovona o rẹ jọ kẹ owhai gbe ọrara nọ ọ be rria kugbe owhai.’”

17 Jihova ọ tẹ gbẹ ta kẹ Mosis nọ: 18 “Ta kẹ ahwo Izrẹl nọ, ‘Okenọ wha tẹ ziọ ẹkwotọ nọ mẹ be rehọ owhai ze na no 19 nọ wha jẹ re ebrẹdi* ẹkwotọ na no,+ wha rẹ kẹ Jihova okẹ. 20 Wha rẹ rehọ ibi ọsosuọ+ rai nọ a wuhu yẹ tere he ro ru ikulu ebrẹdi nọ a ru wọhọ ẹmẹro, wha vẹ rehọ ae kẹ okẹ. Wha rẹ kẹ okẹ na wọhọ epanọ a rẹ kẹ okẹ nọ u no oria nọ a rẹ jọ si ibi no igbe ekakọ ze. 21 Wha rẹ rehọ ibi ọsosuọ rai jọ nọ a wuhu yẹ tere he kẹ Jihova okẹ evaọ ige rai kpobi.

22 “‘Whaọ otẹrọnọ oware jọ o thọ owhai obọ, nọ wha gbe koko izi nana kpobi nọ Jihova ọ vuẹ Mosis na ha, 23 eware kpobi nọ Jihova o jie uzi rai ẹkwoma Mosis no ẹdẹ nọ Jihova o ro jie uzi na vrẹ je rite ige rai kpobi, 24 yọ otẹrọnọ ethobọ a ro ru onana, yọ ogbotu na a riẹ kpahe iẹe he, ogbotu na soso a rẹ rehọ eruẹ ọzae ọsese ze nọ a re ro dhe idhe emahọ nọ i re gbo ore awere* se Jihova, kugbe idhe ibi ekakọ riẹ gbe idhe udi riẹ lele oghẹrẹ nọ a dhesẹ nọ a rẹ hai ro ru ei na,+ gbe ọmọ ẹwe ọvo nọ a re ro dhe idhe uzioraha.+ 25 Ozerẹ na o re ru omavoro kẹ ogbotu ahwo Izrẹl soso, a vẹ rọvrẹ rai,+ keme o thọ ae obọ yọ a rehọ eware idhe ze nọ a re ro dhe idhe nọ a rẹ rọ erae mahe kẹ Jihova avọ idhe uzioraha rai ziọ aro Jihova rọkẹ ethobọ rai. 26 A te rehọ iẹe vrẹ ogbotu ahwo Izrẹl soso gbe ọrara nọ ọ be rria udevie rai, keme o thọ ahwo na kpobi obọ.

27 “‘Otẹrọnọ ohwo* jọ ọ rọ ethobọ raha uzi, ọ rẹ rehọ ẹwe aye nọ ọ rrọ ukpe ọsosuọ riẹ ze kẹ idhe uzioraha hrọ.+ 28 Ozerẹ na o ve ru omavoro kẹ ohwo* nọ oware o thọ obọ nọ ọ rọ ogbori raha uzi evaọ aro Jihova na, re a ruẹsi ru omavoro kẹe fiki uzioraha na, a vẹ rọvrẹ riẹ.+ 29 Uzi ovona o rẹ jọ kẹ ọmotọ Izrẹl gbe ọrara nọ ọ be rria udevie rai evaọ ẹme ohwo nọ ọ rọ ogbori ru oware jọ.+

30 “‘Rekọ ohwo* nọ o keke aro fihọ ru oware jọ,+ te ọ rrọ ọmotọ hayo ọrara nọ ọ be rria udevie rai, ohwo yena ọ be la Jihova eka,* yọ a re kpei no udevie ahwo riẹ hrọ. 31 Fikinọ ọ jẹ ẹme Jihova fiẹ ọ jẹ raha uzi riẹ, a re kpe ohwo* yena no hrọ.+ Uzioraha riẹ o rrọ uzou obọriẹ.’”+

32 Okenọ ahwo Izrẹl a jọ udhude na, a tẹ ruẹ ọzae jọ nọ o bi hwe ire evaọ ẹdẹ Ẹdijala.+ 33 Enọ e ruẹ e riẹ nọ o je hwe ire na a te kru rie se Mosis avọ Erọn gbe ogbotu na soso. 34 A te kru rie fihọ obei+ keme a re ta oware nọ a re ru ei hi.

35 Kẹsena Jihova ọ tẹ ta kẹ Mosis nọ: “A re kpe ohwo na no hrọ,+ ogbotu na soso ọ rẹ rọ itho fi ei evaọ obọ otafe evuẹ na.”+ 36 Fikiere ogbotu na soso a tẹ rehọ iẹe ziọ otafe evuẹ na, a tẹ rọ itho fi ei kpe nwane wọhọ epanọ Jihova ọ ta kẹ Mosis na.

37 Jihova ọ tẹ gbẹ ta kẹ Mosis nọ: 38 “Ta kẹ ahwo Izrẹl nọ a re ru efọlefọ fihọ akọ iwu rai hrọ evaọ ige rai kpobi, yọ a re fi ufi iburu họ ehru efọlefọ ewu na.+ 39 ‘Akọ iwu rai i re wo efọlefọ nana hrọ re wha hae ruẹ e rai wha vẹ kareghẹhọ izi Jihova kpobi je koko ai.+ Wha re ru lele orọ udu obọrai hayo ibiaro rai vievie he enọ i bi su owhai nyai lele eghẹnẹ efa bru igberẹ.*+ 40 Onana u ti fiobọhọ kẹ owhai kareghẹhọ, wha ve ti koko izi mẹ kpobi jẹ jọ ọrẹri kẹ Ọghẹnẹ rai.+ 41 Mẹ họ Jihova Ọghẹnẹ rai, ọnọ ọ rehọ owhai no ẹkwotọ Ijipti ze re me dhesẹ kẹ owhai nọ mẹ họ Ọghẹnẹ rai.+ Mẹ họ Jihova Ọghẹnẹ rai.+

16 Kẹsena Kora+ ọmọzae Izha,+ ọmọzae Kohat,+ ọmọzae Livae,+ ọ tẹ kpama tei te Detan gbe Abaeram emezae Ẹlayab+ gbe Ọn ọmọzae Pilẹt, ahwo orua* Rubẹn.+ 2 A tẹ kpareso Mosis, te ai te ezae egba ivẹ gbe udhuvẹ-gbikpe (250) erọ ahwo Izrẹl, ahwo nọ a wuzou ogbotu na, enọ a salọ evaọ ogbotu* na, ezae nọ a riẹ odẹ. 3 A te kokohọ kugbe wọ bru+ Mosis avọ Erọn, a tẹ ta kẹ ae nọ: “Onọ ma thihakọ kẹ owhai u te no! Ogbotu na soso ọrẹri,+ aikpobi, yọ Jihova ọ rrọ udevie rai.+ Fikieme wha rẹ rọ wọ omarai kpehru vi ukoko Jihova?”

4 Nọ Mosis o yo ẹme nana ọ tẹ nwani kie vovao tuotọ. 5 Ọ tẹ ta kẹ Kora avọ enọ e rrọ abọ riẹ kpobi nọ: “Evaọ ohiohiẹ Jihova o ti dhesẹ ohwo nọ ọ rrọ ohwo riẹ+ gbe ọnọ ọ rrọ ọrẹri gbe ọnọ o re bi kẹle iẹe,+ yọ ohwo kpobi nọ ọ te salọ+ ọye o re bi kẹle iẹe. 6 Ru onana: Rehọ imidhe erae,+ whẹ Kora gbe enọ e rrọ abọ ra kpobi,+ 7 re wha wọ erae fihọ ae je fi insẹnse họ ae evaọ aro Jihova odẹnotha, ohwo nọ Jihova ọ te salọ+ ọye họ ọnọ ọ rrọ ọrẹri. Whai emezae Livae+ wha nya thabọ ga hrọ no!”

8 Kẹsena Mosis ọ tẹ ta kẹ Kora nọ: “Ivie wha gaviezọ, whai emezae Livae. 9 Kọ omoware osese o rrọ evaọ aro rai inọ Ọghẹnẹ Izrẹl ọ hẹriẹ owhai no udevie ogbotu Izrẹl,+ jẹ kẹ owhai uvẹ re wha hai bi kẹle iẹe re wha ruẹsi ru iruo uwou-udhu Jihova je dikihẹ kẹ ogbotu na re wha gbodibo kẹ ae,+ 10 gbe nọ ọ rehọ owhai ze kẹle oma riẹ, te inievo rai kpobi nọ e rrọ emezae Livae? Kọ wha be jẹ gwọlọ rehọ ọkwa-ozerẹ na re?+ 11 Fiki onana, te owhẹ te enọ e rrọ abọ ra kpobi nọ a kokohọ na wha be wọso Jihova. Kọ Erọn yọ ono nọ wha rẹ rọ go kpahe iẹe?”+

12 Uwhremu na Mosis o te vi ohwo nyai se Detan avọ Abaeram+ emezae Ẹlayab, rekọ a tẹ ta nọ: “Ma be nyaze he! 13 Kọ omoware osese o rrọ nọ whọ rọ rehọ omai no ẹkwotọ nọ ame-ivie gbe ọnyọ i bi jo su ze ti kpe kufiẹ evaọ udhude na?+ Kọ whọ gwọlọ je ru omara fihọ osu nọ ọ rẹ ta oware kpobi nọ ma re ru kẹ omai?* 14 Rite enẹna whọ re rehọ omai ziọ uvumọ ẹkwotọ nọ ame-ivie gbe ọnyọ i bi jo su hu+ hayo kẹ omai otọ gbe ọgbọ evaene re ma rọ reuku hu. Kọ whọ gwọlọ vre ibiaro ahwo na no? Ma be nyaze he!”

15 Fikiere eva e tẹ dha Mosis gaga, ọ tẹ ta kẹ Jihova nọ: “Who kuomarẹriẹ rri idhe ibi ekakọ rai hi. Me mi rai eketekete ọvo ho, yọ mẹ nwa ọvuọvo rai oma ha.”+

16 Kẹsena Mosis ọ tẹ ta kẹ Kora nọ: “Whẹ avọ ahwo nọ a rrọ abọ ra kpobi wha nyaziọ aro Jihova odẹnotha, te owhẹ te ai gbe Erọn. 17 Jọ ohwo kpobi ọ rehọ omodhe erae riẹ re o fi insẹnse họ iẹe, yọ omomọvo ọ te wọ omodhe erae riẹ ziọ aro Jihova, imidhe erae egba ivẹ gbe udhuvẹ-gbikpe (250), te owhẹ avọ Erọn, duọ ohwo duọ ọvuọ omodhe erae riẹ.” 18 Fikiere omomọvo ọ tẹ rehọ omodhe erae riẹ, a te fi erae avọ insẹnse họ ae a te dikihẹ aro unuẹthẹ uwou-udhu omakugbe na kugbe Mosis avọ Erọn. 19 Nọ Kora o koko ahwo nọ a rrọ abọ riẹ họ+ bru rai no evaọ aro unuẹthẹ uwou-udhu omakugbe na, oruaro Jihova o tẹ romavia kẹ ogbotu na kpobi.+

20 Jihova ọ tẹ ta kẹ Mosis avọ Erọn nọ: 21 “Wha hẹriẹ omarai no utu nana no, re me kpe ai kpobi no obọnana.”*+ 22 Fikiere a te kie vovao tuotọ a tẹ ta nọ: “O Ọghẹnẹ, Ọghẹnẹ nọ o wo ẹzi ahwo kpobi,*+ kọ uzioraha omọvo o rẹ lẹliẹ owhẹ mu ofu kẹ ogbotu na kpobi?”+

23 Kẹsena Jihova ọ tẹ ta kẹ Mosis nọ: 24 “Ta kẹ ogbotu na nọ, ‘Wha kẹnoma no akotọ iwou-udhu Kora, Detan, gbe Abaeram!’”+

25 Mosis ọ tẹ kpama ọ tẹ nyabru Detan avọ Abaeram, ekpako+ ahwo Izrẹl a te lele iei. 26 Ọ tẹ ta kẹ ogbotu na nọ: “Ivie, wha kẹnoma no akotọ iwou-udhu ezae imuomu nana, wha rọ obọ te oware rai ovuọvo ho re a gbe kpe owhai kugbe ai hi fiki uzioraha rai.” 27 A tẹ nwane kẹnoma no iwou-udhu Kora, Detan, gbe Abaeram, a kẹnoma no abọ kpobi, Detan avọ Abaeram a te no uwou ze, a te dikihẹ aro unuẹthẹ iwou-udhu rai, te eyae rai, emezae rai, gbe emọ esese rai.

28 Kẹsena Mosis ọ tẹ ta nọ: “Onana wha te rọ riẹ nọ Jihova họ ọnọ o vi omẹ re me ru eware nana kpobi, orọnikọ udu obọmẹ hẹ:* 29 Otẹrọnọ ahwo nana a whu uwhu obọrai wọhọ epanọ ahwo-akpọ kpobi a be hai whu, hayo otẹrọnọ uye nọ u ti te ai yọ utiọ uye nọ u bi te ahwo-akpọ kpobi, kiyọ Jihova o vi omẹ hẹ.+ 30 Rekọ Jihova o te ru ai oware aghẹruẹ jọ, nọ otọ na u je rovie* jẹ lọ ae avọ eware rai kpobi, a jẹ rọ epanọ a rọ rrọ ọkpokpọ na ruọ eva Uki,* wha vẹ te ginẹ riẹ nọ ezae nana a rri Jihova vo.”

31 Nọ ọ nwane ta eme nana kpobi no, otọ nọ a dikihẹ na o tẹ bẹre.+ 32 Otọ na u te rovie,* o tẹ lọ ai no, te ahwo uwou rai gbe ohwo kpobi nọ ọ rrọ ohwo Kora+ te eware rai kpobi. 33 Kọ ere te ai te ahwo rai kpobi a rọ ruọ otọ ọkpokpọ kpobọ Uki,* otọ na u te ruru ai, a te whu no udevie ogbotu* na.+ 34 Ahwo Izrẹl kpobi nọ a jọ etẹe kugbe ai a tẹ dhẹ fikinọ a je bo, a ta nọ: “Ozọ u bi mu omai nọ otọ na o sae lọ omai no!” 35 Kẹsena Jihova o te vi erae ze,+ e tẹ mahe ezae egba ivẹ gbe udhuvẹ-gbikpe (250) nọ e jẹ mahe insẹnse na kpe.+

36 Jihova ọ tẹ ta kẹ Mosis nọ: 37 “Ta kẹ Ẹlieza ọmọzae Erọn ozerẹ na nọ o si imidhe erae na+ no erae na ze, keme e rrọ ọrẹri. Whọ vẹ jẹ ta kẹe nọ ọ vaha erae na thabọ no etẹe omojọ. 38 Imidhe erae ezae nọ e raha uzi nọ o wha uwhu se ai na, a rẹ tehe ae zihe ruọ ewẹ-idhe ekpakpala, a vẹ tehe ae tamu agbada-idhe na,+ keme a rehọ e rai ziọ aro Jihova, i te zihe ruọ eware nọ e rrọ ọrẹri. E rẹ jọ oware oka kẹ ahwo Izrẹl.”+ 39 Fikiere Ẹlieza ozerẹ na ọ tẹ rehọ imidhe erae ekọpa nọ ahwo nọ erae e mahe kpe na a wọ ze na, ọ tẹ tehe ae rọ tamu agbada-idhe na, 40 nwane wọhọ epanọ Jihova ọ rehọ ẹkwoma Mosis ta kẹe. O jọ oware nọ ahwo Izrẹl a rẹ rọ kareghẹhọ inọ ohwo nọ a kẹ udu hu,* nọ ọ rrọ usu emọ Erọn ho ọ rẹ nyaze te mahe insẹnse evaọ aro Jihova ha,+ yọ ohwo ọvo ọ rẹ jọ wọhọ Kora avọ enọ e jọ abọ riẹ hẹ.+

41 Evaọ ẹdẹ nọ ọ nwani lele iei, ogbotu ahwo Izrẹl soso a te muhọ ẹgo kpahe Mosis avọ Erọn+ inọ: “Whai imava na wha kpe ahwo Jihova kufiẹ.” 42 Nọ ogbotu na soso a kokohọ kugbe wọ bru Mosis avọ Erọn no, a te rri obọ uwou-udhu omakugbe na, whaọ rri! ẹgho na o ruru i rie, oruaro Jihova o tẹ be romavia.+

43 Mosis avọ Erọn a te kpobọ aro uwou-udhu omakugbe na,+ 44 Jihova ọ tẹ ta kẹ Mosis nọ: 45 “Ezae na, wha kẹnoma no udevie ogbotu nana, re me kpe ai kpobi no obọnana.”*+ A te kie vovao tuotọ.+ 46 Mosis ọ tẹ ta kẹ Erọn nọ: “Rehọ omodhe erae na re whọ jọ agbada-idhe+ na wọ erae fihọ iẹe je fi insẹnse họ iẹe re whọ nya ovovẹrẹ bru ogbotu na re who ru omavoro kẹ ae,+ keme eva e dha Jihova no. Uye na u muhọ no!” 47 Erọn ọ tẹ nwane tọlọ iẹe wọhọ epanọ Mosis ọ ta na, ọ tẹ dhẹ ruọ udevie ogbotu na, whaọ rri! uye na u mu ahwo na họ ete no. Fikiere o te fi insẹnse họ omodhe erae na o te mu omavoro họ eru kẹ ahwo na. 48 O te gbe dikihẹ udevie enọ i whu no gbe enọ e rrọ uzuazọ, uwhremu na uye na u te kuhọ. 49 Ahwo nọ uye na u kpe a bu te idu ikpegbene gbe egba ihrẹ (14,700), u te no ahwo nọ a whu fiki Kora no. 50 Nọ Erọn o zihe bru Mosis uwhremu na kpobọ unuẹthẹ uwou-udhu omakugbe na, yọ uye na u kuhọ no.

17 Jihova ọ tẹ ta kẹ Mosis nọ: 2 “Ta kẹ ahwo Izrẹl nọ unuwou abọ ọsẹ* ọvuọvo ọ rehọ ọkpọ ọvo kẹ owhẹ, whọ rẹ rehọ ọkpọ mi ọnọ o wuzou unuwou abọ ọsẹ kpobi,+ ekpọ na kpobi ikpegbivẹ. Kere odẹ omomọvo fihọ ọkpọ riẹ. 3 Who re kere odẹ Erọn fihọ ọkpọ Livae, keme ọkpọ ọvo rọkẹ ọnọ o wuzou unuwou abọ ọsẹ ọvuọvo. 4 Fi ekpọ na họ uwou-udhu omakugbe na evaọ aro Isẹri na,*+ oria nọ mẹ rẹ jọ romavia kẹ owhẹ ẹsikpobi na.+ 5 Ọkpọ ọzae nọ mẹ salọ+ ọ te ta ebe ze, me ve ti ru re eguago ahwo Izrẹl nọ a be go kpahe omẹ na i serihọ,+ enọ a be go kpahe owhẹ re na.”+

6 Fikiere Mosis ọ tẹ ta ẹme na kẹ ahwo Izrẹl, enọ i wuzou rai kpobi a tẹ kẹe ekpọ, ọkpọ ọvo rọkẹ omomọvo enọ i wuzou unuwou abọ ọsẹ, ekpọ ikpegbivẹ, yọ ọkpọ Erọn ọ jọ usu rai. 7 Kẹsena Mosis o te fi ekpọ na họ aro Jihova evaọ uwou-udhu Isẹri na.

8 Evaọ ẹdẹ nọ o lele i rie, nọ Mosis ọ ruọ eva uwou-udhu Isẹri na, rri! ọkpọ Erọn nọ ọ rrọ rọkẹ unuwou Livae ọ ta ebe ze no yọ ọ whẹ ivo họ jẹ whẹ idodo họ jẹ mọ ibi almọnd nọ e ware no. 9 Mosis ọ tẹ kwa ekpọ na kpobi lahwe no aro Jihova ze bru ahwo Izrẹl kpobi. A te rri rai, ọzae ọvuọvo ọ tẹ rehọ ọkpọ riẹ.

10 Kẹsena Jihova ọ tẹ ta kẹ Mosis nọ: “Zihe ọkpọ Erọn+ fihọ aro Isẹri na* re o jọ oware nọ a rẹ sẹro riẹ, oware oka+ rọkẹ emọ ọwọsuọ na,+ re eguago rai nọ a be go kpahe omẹ i serihọ, re a seba ewhu.” 11 Mosis ọ tẹ nwani ru epanọ Jihova ọ ta kẹe na ababọ oke oraha. Nwanọ ere o ru.

12 Kẹsena ahwo Izrẹl a tẹ ta kẹ Mosis nọ: “Whaọ ewhu ma bi ti whu na, ma te seba ewhu hu, mai kpobi ma ti whu no! 13 Ohwo kpobi nọ ọ tubẹ nya kẹle uwou-udhu Jihova dede o ti whu!+ Kọ enẹ mai kpobi ma ti ro whu?”+

18 Jihova ọ tẹ ta kẹ Erọn nọ: “Oruthọ kpobi kpahe oria aruẹri na o te jọ owhẹ avọ emezae ra gbe unuwou abọ ọsẹ ra uzou,+ yọ oruthọ kpobi kpahe ọkwa-ozerẹ rai na o te jọ owhẹ avọ emezae ra uzou.+ 2 Whọ rẹ jẹ rehọ inievo ra ahwo orua Livae, ahwo orua ọsẹ ra ze re a kuomagbe owhẹ, a vẹ gbodibo kẹ owhẹ+ avọ emezae ra evaọ aro uwou-udhu Isẹri na.+ 3 A re ru iruo rai nọ u fo nọ a re ru kẹ owhẹ, enọ a re ru evaọ uwou-udhu na soso.+ Rekọ a rẹ nya kẹle ekwakwa oria ọrẹri na gbe agbada-idhe na vievie he, re ae omarai hayo owhẹ wha seba ewhu.+ 4 A ti kuomagbe owhẹ re a ru iruo rai nọ u fo nọ a re ru evaọ uwou-udhu omakugbe na gbe iruo uwou-udhu na kpobi, yọ ohwo nọ a kẹ udu hu* ọ rẹ nya kẹle owhẹ hẹ.+ 5 Wha re ru iruo rai nọ u fo nọ wha re ru evaọ oria ọrẹri na+ gbe agbada-idhe na hrọ,+ re mẹ gbẹ wariẹ dha eva+ kẹ ahwo Izrẹl he. 6 Mẹ omamẹ mẹ rehọ inievo ra ahwo Livae no udevie ahwo Izrẹl rọ kẹ owhẹ okẹ.+ A rehọ e rai kẹ Jihova re a ru iruo uwou-udhu omakugbe na.+ 7 Whẹ avọ emezae ra họ enọ i wo iruo ozerẹ nọ i wobọ kugbe agbada-idhe na gbe eware nọ e rrọ obeva ekọtini na,+ whai wha re ru iruo nana.+ Mẹ rehọ iruo ọkwa-ozerẹ na kẹ owhai okẹ, yọ ohwo kpobi nọ a kẹ udu hu* nọ ọ nya kẹle etẹe a re kpei no.”+

8 Jihova ọ tẹ gbẹ ta kẹ Erọn nọ: “Mẹ omamẹ me mu ekẹ nọ a kẹ omẹ họ owhẹ obọ.+ Mẹ kẹ owhẹ avọ emezae ra ẹkẹ jọ evaọ eware ọrẹri kpobi nọ ahwo Izrẹl a rọ kẹ okẹ re o jọ ẹkẹ rai ribri.+ 9 Enana e te jọ erai evaọ usu ekẹ nọ e mae rrọ ọrẹri nọ a rọ erae mahe: okẹ kpobi nọ a rọ ze, te idhe ibi ekakọ rai+ avọ idhe uzioraha rai+ gbe idhe abe-ọriọ rai+ nọ a ro se omẹ. Onana yọ oware nọ o mae rrọ ọrẹri kẹ owhẹ avọ emezae ra. 10 Evaọ oria nọ o mae rrọ ọrẹri wha rẹ jọ re iẹe.+ Ọzae kpobi ọ rẹ sae re iẹe. O rẹ jọ oware nọ o rrọ ọrẹri kẹ owhai.+ 11 Enana yọ erai re: ekẹ nọ a rọ ze+ kugbe ekẹ idhe iveghe+ ahwo Izrẹl kpobi. Mẹ rehọ e rai kẹ owhẹ gbe emezae ra gbe emetẹ ra nọ e rrọ kugbe owhẹ re e jọ ẹkẹ rai ribri.+ Ohwo kpobi nọ ọ fo evaọ uwou ra ọ rẹ sae re iẹe.+

12 “Ewhri kpobi nọ ọ mai woma gbe enwaene ọkpokpọ kpobi nọ ọ mai woma gbe ibi ekakọ, ibi ọsosuọ rai+ nọ a rọ kẹ Jihova,+ mẹ rehọ e rai kẹ owhai. 13 Ibi ọsosuọ nọ e ware orọ oware kpobi nọ u no otọ rai ze nọ a ro se Jihova o rẹ jọ orai.+ Ohwo kpobi nọ ọ fo evaọ uwou ra ọ rẹ sae re iẹe.

14 “Oware kpobi nọ a rọ kẹ no* evaọ Izrẹl u re zihe ruọ orai.+

15 “Ọmọ ọsosuọ omama kpobi nọ o rrọ uzuazọ*+ nọ a te rọ kẹ Jihova, te ọ rrọ ohwo hayo arao o re zihe ruọ ọrai. O make rrọ ere na, o gbahọ nọ wha rẹ ta ọmọ ọsosuọ ohwo-akpọ zihe ze,+ wha vẹ jẹ ta ọmọ ọsosuọ erao nọ e fo ho zihe ze.+ 16 Wha rẹ rehọ osa ẹdẹziheze na rọ dẹe zihe nọ o te te amara ọvo hayo vrẹ ere no, lele unuigho nọ a fihọ, shẹkẹl* isiliva isoi,+ lele epaọ shẹkẹl oria ọrẹri na.* Onana yọ gira* udhe. 17 Eruẹ ọzae nọ ọ rrọ ọmọ ọsosuọ hayo omogodẹ ọzae nọ ọ rrọ ọmọ ọsosuọ hayo ọmọ ọsosuọ ẹwe ọvo wha rẹ dẹ zihe he.+ Enana yọ eware nọ e rrọ ọrẹri. Wha rẹ frẹ azẹ rai fihọ agbada-idhe na,+ wha ve je ru iwhri rai kuye iwiri re o jọ okẹ nọ a rọ erae mahe nọ u re gbo ore awere* kẹ Jihova.+ 18 Rekọ uwo rai u re zihe ruọ orai. U re zihe ruọ orai wọhọ ẹkpudu idhe iveghe na jẹ wọhọ owọ obọze na.+ 19 Ekẹ ọrẹri kpobi nọ ahwo Izrẹl a te rọ ze kẹ Jihova,+ mẹ rehọ e rai kẹ owhẹ gbe emezae ra gbe emetẹ ra re e jọ ẹkẹ rai ribri.+ Onana yọ ọvọ uwhei* nọ o rẹ jọ ribri evaọ aro Jihova rọkẹ owhẹ gbe emọ ra.”

20 Jihova ọ tẹ gbẹ ta kẹ Erọn nọ: “Who re ti wo ukuoriọ evaọ otọ rai hi, yọ a te ghale ẹkẹ otọ ọvo te owhẹ evaọ udevie rai hi.+ Mẹ họ ẹkẹ ra gbe ukuoriọ ra evaọ udevie ahwo Izrẹl.+

21 “Whaọ, rri, mẹ rehọ abọvo abakpe kpobi+ evaọ Izrẹl kẹ emezae Livae no re o jọ ukuoriọ rai rọkẹ iruo nọ a bi ru, iruo uwou-udhu omakugbe na. 22 Ahwo Izrẹl a rẹ gbẹ nyaziọ uwou-udhu omakugbe na ofa ha, o gbẹ rrọ ere he, a te reabe uzioraha a ve ti whu. 23 Ahwo Livae na omarai họ enọ i re ru iruo uwou-udhu omakugbe na, yọ ae họ enọ e te ruẹ uye oruthọ rai.+ Onana yọ uzi nọ o rẹ jọ ribri evaọ ige rai kpobi inọ a re wo ukuoriọ ovuovo ho evaọ udevie ahwo Izrẹl.+ 24 Keme mẹ rehọ okẹ abọvo abakpe ahwo Izrẹl, onọ a te kẹ Jihova na rọ kẹ ahwo Livae no re o jọ ukuoriọ rai. Oyejabọ nọ mẹ rọ ta kẹ ae nọ, ‘A rẹ jọ udevie ahwo Izrẹl wo ukuoriọ họ.’”+

25 Kẹsena Jihova ọ tẹ ta kẹ Mosis nọ: 26 “Whọ rẹ vuẹ ahwo Livae nọ, ‘Ahwo Izrẹl a te kẹ owhai abọvo abakpe nọ mẹ rehọ mi ai rọ kẹ owhai no na re o jọ ukuoriọ rai,+ yọ wha rẹ jọ abọvo abakpe na rehọ abọvo abakpe ze re o jọ okẹ nọ wha rẹ kẹ Jihova.+ 27 A vẹ te rehọ iẹe wọhọ okẹ rai, wọhọ ẹsenọ o rrọ ibi ekakọ nọ i no oria nọ a rẹ jọ si ibi no igbe ekakọ ze+ hayo oware kpobi nọ u no oria udi-uruo hayo oria nọ a rẹ jọ ru ewhri ze. 28 Oghẹrẹ ovona wha rẹ rọ kẹ Jihova okẹ nọ u no abọvo abakpe nọ ahwo Izrẹl a rọ kẹ owhai na ze, yọ wha rẹ jarai rehọ okẹ nọ wha rẹ kẹ Jihova rọ kẹ Erọn ozerẹ na. 29 Wha rẹ rehọ oghẹrẹ ekẹ sa-sa kẹ Jihova rono eware nọ e mai woma kpaobọ evaọ ekẹ kpobi nọ a rọ kẹ owhai ze+ wọhọ eware nọ e rrọ ọrẹri.’

30 “Whọ vẹ jẹ ta kẹ ae nọ, ‘Okenọ wha tẹ rehọ eware nọ e mai woma evaọ usu rai kẹ okẹ, a vẹ te rehọ ae wọhọ eware ahwo Livae nọ i no oria nọ a rẹ jọ si ibi no igbe ekakọ ze, gbe eware nọ i no oria udi-uruo hayo oria nọ a rẹ jọ ru ewhri ze. 31 Whẹ avọ ahwo uwou ra wha rẹ sae re iẹe evaọ oria kpobi, keme onana yọ osohwa ra rọkẹ iruo nọ who bi ru evaọ uwou-udhu omakugbe na.+ 32 Wha te reabe uzioraha ha evaọ onana otẹrọnọ wha jarai rehọ eware nọ e mai woma kẹ okẹ, yọ wha re zue eware ọrẹri ahwo Izrẹl vievie he, o gbẹ rrọ ere he wha ti whu.’”+

19 Jihova ọ tẹ wariẹ ta kẹ Mosis avọ Erọn nọ: 2 “Onana yọ uzi nọ Jihova o jie, ‘Ta kẹ ahwo Izrẹl nọ a rehọ eruẹ ọwawae se owhẹ, ọnọ ọ rrọ omakọkọ nọ oware ovuovo o jọ oma riẹ thọ họ,+ nọ a ri fi owhowha họ ẹdẹvo ho. 3 Wha rẹ rehọ iẹe kẹ Ẹlieza ozerẹ na, o ve su ei kpobọ otafe evuẹ na, a ve kpei evaọ aro riẹ. 4 Kẹsena Ẹlieza ozerẹ na ọ vẹ rọ uziobọ riẹ rehọ azẹ riẹ jọ, ọ vẹ frẹ azẹ na isiahrẹ rri aro uwou-udhu omakugbe na.+ 5 A vẹ jọ iraro riẹ mahe eruẹ na. A rẹ mahe ohọrọ riẹ, gbe uwo riẹ, gbe azẹ riẹ, gbe isọ riẹ.+ 6 Ozerẹ na ọ vẹ rehọ ure sida, hisọp,+ gbe omohọ owawae ogbagba, o ve gbolo ai fihọ erae nọ a be jọ mahe eruẹ na. 7 Ozerẹ na ọ vẹ fọrọ iwu riẹ jẹ họ,* kẹsena ọ vẹ nyaziọ evuẹ na; rekọ ozerẹ na ọ rẹ jọ ọnọ ọ fo ho ri bọo owọwọ.

8 “‘Ohwo nọ ọ mahe eruẹ na ọ rẹ rọ ame fọrọ iwu riẹ jẹ họ,* ọ vẹ jọ ọnọ ọ fo ho ri bọo owọwọ.

9 “‘Ohwo nọ ọ fo o re koko enwo eruẹ na họ,+ ọ vẹ whẹe nyai ku fihọ oria ofuafo evaọ obọ otafe evuẹ na, yọ ogbotu ahwo Izrẹl a rẹ sẹro riẹ re a hai fi ei họ ame* nọ a re ro ru oma fo.+ Onana yọ idhe uzioraha. 10 Ohwo nọ o koko enwo eruẹ na họ na ọ rẹ fọrọ iwu riẹ ọ vẹ jọ ọnọ ọ fo ho ri bọo owọwọ.

“‘Onana o rẹ jọ kẹ ahwo Izrẹl gbe ohwo orẹwho ọfa nọ ọ be rria udevie rai, onana yọ uzi nọ o rẹ jọ ribri.+ 11 Ohwo kpobi nọ ọ rọ obọ te ohwo nọ o whu no* ọ rẹ jọ ọnọ ọ fo ho edẹ ihrẹ.+ 12 Ohwo ọyena ọ rẹ rehọ ame na* ru oma riẹ fo evaọ ẹdẹ avọ esa, kẹsena evaọ ẹdẹ avọ ihrẹ ọ vẹ jọ ohwo nọ ọ fo. Rekọ otẹrọnọ o ru oma riẹ fo evaọ ẹdẹ avọ esa na ha, ọ rẹ fo ho evaọ ẹdẹ avọ ihrẹ. 13 Ohwo kpobi nọ ọ rọ obọ te ori ohwo nọ o whu no* nọ o ru oma riẹ fo ho, yọ o zue uwou-udhu Jihova no,+ a re kpe ohwo* yena no Izrẹl hrọ.+ Fikinọ a re frẹ ame nọ a re ro ru ohwo fo+ ku ei hi, ọ gbẹ rrọ ọnọ ọ fo ho. Egbegbe riẹ ọ gbẹ riẹe oma.

14 “‘Onana họ uzi nọ a re lele nọ ohwo o te whu evaọ uwou-udhu: Ohwo kpobi nọ ọ ruọ eva uwou-udhu na gbe ohwo kpobi nọ ọ jọ eva uwou-udhu na vẹre ọ rẹ jọ ọnọ ọ fo ho edẹ ihrẹ. 15 Oware kpobi nọ u rovie fihọ nọ u wo ururu hu* yọ oware nọ o fo ho.+ 16 Ohwo kpobi nọ ọ rrọ obọ otafe nọ ọ rọ obọ te ohwo nọ a rọ ọgbọdọ kpe hayo ori hayo ugbonwa ohwo-akpọ hayo oria nọ a re ki ahwo fihọ ọ rẹ jọ ọnọ ọ fo ho edẹ ihrẹ.+ 17 A rẹ rehọ enwo idhe uzioraha nọ a mahe na, a ve ku ame nọ a vo no eyeri-ame* ze fihọ iẹe evaọ othẹ, rọkẹ erufuọ ọnọ ọ fo ho na. 18 Kẹsena ohwo nọ ọ fo+ ọ vẹ rehọ hisọp+ o ve duwu iei fihọ ame na, ọ vẹ frẹ riẹ fihọ uwou-udhu na gbe ithẹ na kpobi gbe ahwo* nọ a jọ etẹe, gbe ohwo nọ ọ rọ obọ te ugbonwa na hayo ohwo nọ a kpe hayo ori na hayo oria nọ a re ki ahwo họ na. 19 Ohwo nọ ọ fo na ọ rẹ frẹ riẹ ku ọnọ ọ fo ho na evaọ ẹdẹ avọ esa na gbe ẹdẹ avọ ihrẹ na; o ve ru ei fo no uzioraha evaọ ẹdẹ avọ ihrẹ na;+ ọ vẹ fọrọ iwu riẹ jẹ rọ ame họ,* kẹsena ọ vẹ te jọ ọnọ ọ fo evaọ owọwọ.

20 “‘Rekọ ohwo nọ ọ fo ho, yọ ọ rọwo ru oma riẹ fo ho, a re kpe ohwo* yena no udevie ogbotu* na no hrọ,+ keme o zue oria aruẹri Jihova. A frẹ ame nọ a re ro ru ohwo fo na ku ei hi, fikiere ọ fo ho.

21 “‘Onana yọ uzi nọ o rẹ jọ ribri kẹ ae: Ohwo nọ ọ frẹ ame nọ a re ro ru ohwo fo na+ ọ rẹ fọrọ iwu riẹ, yọ ọnọ ọ rọ obọ te ame nọ a bi ro ru ohwo fo na ọ rẹ jọ ọnọ ọ fo ho ri bọo owọwọ. 22 Oware kpobi nọ ọnọ ọ fo ho na ọ rọ obọ te o rẹ jọ oware nọ o fo ho, yọ ohwo* nọ ọ rọ obọ te oware yena ọ rẹ jọ ọnọ ọ fo ho ri bọo owọwọ.’”+

20 Evaọ amara ọsosuọ, ogbotu ahwo Izrẹl soso a tẹ nyaziọ udhude Zin, ahwo na a te mu Kedẹsh họ ẹria.+ Evaọ etẹe Miriam+ o jo whu, yọ etẹe a ki rie fihọ.

2 Whaọ ame ọvo ọ jariẹ rọkẹ ogbotu na ha,+ a te kokohọ kugbe wọ bru Mosis avọ Erọn. 3 Ahwo na a te je lele Mosis whọ,+ be ta nọ: “O hae te mai woma re ma whu okenọ inievo mai a ro whu evaọ aro Jihova! 4 Fikieme wha rọ rehọ ukoko Jihova ziọ udhude nana re mai gbe erao mai ma whu fihọ etenẹ?+ 5 Yọ fikieme who ro su omai no Ijipti ziọ oria uyoma onana?+ O rrọ oria nọ ibi avọ ifigi gbe evaene gbe pọmegranet e rrọ họ, yọ ame ọ riẹ nọ a rẹ da ha.”+ 6 Mosis avọ Erọn a te no aro ogbotu na ziọ unuẹthẹ uwou-udhu omakugbe na a te kie vovao tuotọ, oruaro Jihova o tẹ be romavia kẹ ae.+

7 Jihova ọ tẹ ta kẹ Mosis nọ: 8 “Rehọ ọkpọ na re who se ogbotu na kokohọ, whẹ avọ Erọn oniọvo ra, re wha ta ẹme kẹ ugbehru-utho na evaọ iraro rai re o ruẹse rehọ ame riẹ ze, wha vẹ rehọ ame no ugbehru-utho na ze rọ kẹ ae, re wha kẹ ogbotu na avọ erao rai ame nọ a rẹ da.”+

9 Fikiere Mosis ọ tẹ rehọ ọkpọ na no aro Jihova+ nwane wọhọ epanọ Ọ ta kẹe na. 10 Mosis avọ Erọn a te se ogbotu na kokohọ ziọ aro ugbehru-utho na, a tẹ ta kẹ ae nọ: “Wha gaviezọ, whai ahwo ọkparesuọ! Kọ wha be ginẹ gwọlọ nọ ma rehọ ame no ugbehru-utho nana ze kẹ owhai?”+ 11 Mosis ọ tẹ kpare obọ riẹ ọ jẹ rehọ ọkpọ riẹ fa ugbehru-utho na isiava, ame o te je hwẹ noi ze buobu, ogbotu na avọ erao rai a te muhọ ẹda.+

12 Uwhremu na Jihova ọ tẹ ta kẹ Mosis avọ Erọn nọ: “Fikinọ wha fi ẹrọwọ họ omẹ hẹ, yọ wha kẹ omẹ orro* evaọ aro ahwo Izrẹl he, whai wha te rehọ ogbotu nana ziọ ẹkwotọ nọ mẹ te rọ kẹ ae na ha.”+ 13 Onana họ ame Mẹriba,*+ oria nọ ahwo Izrẹl a jo lele Jihova whọ, fikiere o te ru omariẹ ọrẹri evaọ udevie rai.

14 Kẹsena Mosis o te vi ahwo* no Kedẹsh bru ovie Edọm inọ:+ “Enẹ oniọvo ra Izrẹl+ ọ ta, ‘Whọ riẹ vevẹ kpahe uye kpobi nọ u te omai no. 15 Esẹ mai a kpohọ obọ Ijipti,+ ma tẹ rria Ijipti ikpe* buobu,+ yọ ahwo Ijipti a gboja kẹ omai gbe esẹ mai.+ 16 Uwhremu na ma te bo se Jihova,+ o te yo kẹ omai o te vi ukọ-odhiwu+ ọ tẹ rehọ omai no Ijipti, yọ obọnana ma rrọ Kedẹsh, okpẹwho nọ ọ rrọ uwhru ẹkwotọ ra. 17 Ivie joma nya ẹkwotọ ra vrẹ. Ma te nya eva udhu ovuovo hayo ọgbọ evaene ọvuọvo vrẹ hẹ, yọ ma te da ame oza ọvuọvo ho. Edhere Ovie na ma te nya, ma te wẹriẹ obọze hayo ẹkpẹlobọ họ bẹsenọ ma rẹ nya ẹkwotọ ra vrẹ no.’”+

18 Rekọ Edọm ọ tẹ ta kẹe nọ: “Wha rẹ nya ẹkwotọ mai vrẹ hẹ. Wha tẹ dawo iẹe, mẹ te wọ bru owhai ze avọ ọgbọdọ.” 19 Ahwo Izrẹl a tẹ ta kẹe nọ: “Edhere ologbo na ma te nya, yọ otẹrọnọ mai avọ erao mai ma da ame ra, ma te hwosa fihọ iẹe.+ Oware nọ ma gwọlọ kpobi họ thakpinọ ma rọ owotọ nyavrẹ.”+ 20 Ghele na ọ ta nọ: “Wha rẹ nyae vrẹ hẹ.”+ Koyehọ Edọm ọ wọ bru ei ze avọ ahwo buobu gbe ogbaẹmo ọgaga.* 21 Ere Edọm ọ rọ se nọ Izrẹl ọ rẹ nya ẹkwotọ riẹ vrẹ hẹ; fikiere Izrẹl ọ tẹ nya oria ofa se iẹe ba.+

22 Ogbotu ahwo Izrẹl soso a tẹ wọ no Kedẹsh a tẹ ziọ Ugbehru Họr.+ 23 Kẹsena Jihova ọ tẹ ta kẹ Mosis avọ Erọn evaọ Ugbehru Họr evaọ akotọ uwhru ẹkwotọ Edọm inọ: 24 “A ti koko Erọn họ bru ahwo riẹ.*+ Ọ te ruọ eva ẹkwotọ nọ mẹ te rọ kẹ ahwo Izrẹl na ha, keme whai imava wha wọso ujaje mẹ kpahe ame Mẹriba.+ 25 Rehọ Erọn avọ Ẹlieza ọmọzae riẹ re whọ rehọ ae ziọ obọ ehru Ugbehru Họr. 26 Who ve si iwu Erọn noi oma+ who ve ku ai fihọ Ẹlieza+ ọmọzae riẹ, Erọn ọ vẹ te jọ etẹe whu.”*

27 Fikiere Mosis ọ tẹ nwani ru wọhọ epanọ Jihova ọ ta na, a tẹ gadiẹ Ugbehru Họr evaọ iraro ogbotu na soso. 28 Mosis o te si iwu Erọn noi oma o te ku ai họ Ẹlieza ọmọzae riẹ. Kẹsena Erọn o te whu evaọ etẹe evaọ ehru ugbehru na.+ Mosis avọ Ẹlieza a te nwrotọ no ugbehru na ze. 29 Nọ ogbotu na soso ọ ruẹ nọ Erọn o whu no, ahwo uwou Izrẹl soso a tẹ viẹ Erọn edẹ ọgba.+

21 Nọ ovie Kenan ọrọ Erad+ nọ ọ jẹ rria Negẹb* o yo nọ Izrẹl ọ nya edhere Atarim ze, ọ tẹ wọ ohọre bru Izrẹl je mu ahwo rai jọ kpohọ igbo. 2 Fikiere Izrẹl ọ tẹ ya eyaa kẹ Jihova nọ: “Whọ tẹ rehọ ahwo nana họ omẹ obọ, mẹ te ruẹ nọ mẹ raha ikpewho rai muotọ.” 3 Jihova ọ tẹ gaviezọ kẹ urru Izrẹl, ọ tẹ rehọ ahwo Kenan na họ obọ rai, a tẹ raha ae gbe ikpewho rai muotọ. Fikiere a te se odẹ oria na Họma.*+

4 Nọ a gbẹ rrọ onya rai bi no obọ Ugbehru Họr ze+ evaọ edhere Abade Ọwawae na re a nya akotọ ẹkwotọ Edọm vrẹ,+ oma o tẹ rrọ ahwo na no fiki onya na. 5 Ahwo na a tẹ jẹ ta eme iyoma kpahe Ọghẹnẹ avọ Mosis+ inọ: “Fikieme whọ rọ rehọ omai no Ijipti ze ti whu evaọ udhude na? Emu ọ riẹ hẹ, ame ọ riẹ hẹ,+ yọ ebrẹdi nana nọ o fioka ha na ọ be dha omai eva.”*+ 6 Fikiere Jihova o te vi eraomuomu nọ i wo obi* ruọ udevie ahwo na, e tẹ jẹ rowo ahwo na, nọ o soriẹ nọ ahwo Izrẹl buobu a ro whu.+

7 Fikiere ahwo na a tẹ nyabru Mosis ze a tẹ ta nọ: “Ma raha uzi nọ ma rọ ta eme iyoma kpahe Jihova jẹ kpahe owhẹ.+ Lẹ Jihova re o si eraomuomu na no kẹ omai.” Mosis ọ tẹ lẹ rọkẹ ahwo na.+ 8 Jihova ọ tẹ ta kẹ Mosis nọ: “Ru araomuomu nọ o tho araomuomu nọ o wo obi* re who fi ei họ ọkpọ. Nọ araomuomu ọ tẹ rowo ohwo, o ve rri rie re ọ ruẹse zọ.” 9 Mosis ọ tẹ nwani ru araomuomu ekọpa+ je fi ei họ ọkpọ,+ yọ oke kpobi nọ araomuomu ọ tẹ rowo ohwo, nọ ohwo na o je rri araomuomu ekọpa na, ọ vẹ zọ.+

10 Nọ oyena o vrẹ no, ahwo Izrẹl a tẹ wọ no etẹe a te wohọ Obọt.+ 11 Kẹsena a tẹ wọ no Obọt a te wohọ Aya-abarim,+ evaọ udhude nọ o rẹriẹ ovao ku Moab, evaọ ofẹ ovatha-ọre. 12 A tẹ wọ no etẹe a te wohọ akotọ Ukiekpotọ* Zirẹd.+ 13 A tẹ wọ no etẹe, a te wohọ ubrotọ Anọn,+ onọ o rrọ udhude nọ u no uwhru ahwo Amọ ze, keme Anọn họ uwhru Moab, nọ o rrọ udevie Moab avọ ahwo Amọ. 14 Oyejabọ nọ obe Emo Jihova o rọ ta kpahe “Vehẹb nọ o rrọ Sufa gbe ikiekpotọ* Anọn, 15 gbe eria nọ i kuwhrẹrẹ evaọ* ikiekpotọ* na nọ i te obọ ẹwho Ar jẹ kẹre te uwhru Moab.”

16 Kẹsena a te kpohọ Biẹ. Onana họ oza nọ Jihova ọ ta kpahe nọ ọ vuẹ Mosis nọ: “Koko ahwo na họ re mẹ kẹ ae ame.”

17 Evaọ oke yena Izrẹl ọ tẹ so ole nana:

“Rọ ame ze, O oza!—Za* kẹe!

Kẹsena a tẹ wọ no udhude na kpohọ Matana, 19 a te no Matana kpohọ Nahaliẹl, je no Nahaliẹl kpohọ Bamọt.+ 20 A tẹ wọ no Bamọt kpohọ ukiekpotọ nọ o rrọ ẹkwotọ* Moab,+ evaọ ehru Pisga,+ nọ o rẹriẹ ovao ku Jeshaemọn.*+

21 Izrẹl o te vi ahwo* bru Saehọn ovie ahwo Amọ inọ:+ 22 “Joma nya ẹkwotọ ra vrẹ. Ma te wẹriẹ ruọ udhu hayo ọgbọ evaene ọvuọvo ho. Ma te da ame oza ovuovo ho. Edhere Ovie na ma te nya bẹsenọ ma rẹ nya ẹkwotọ ra vrẹ.”+ 23 Rekọ Saehọn ọ rọwo nọ Izrẹl ọ nya ẹkwotọ riẹ vrẹ hẹ. Ukpoye Saehọn o te koko ahwo riẹ kpobi họ a tẹ wọ ohọre bru Izrẹl evaọ udhude na, a tẹ ziọ Jehaz a te mu Izrẹl họ elele họre.+ 24 Rekọ Izrẹl ọ rehọ ọgbọdọ fi ei kparobọ+ ọ tẹ rehọ ẹkwotọ riẹ+ no Anọn+ rite Jabọk,+ nọ o kẹle ahwo Ammọn, keme Jeza+ avọ ahwo Ammọn a gbẹ rrọ uwhru.+

25 Fikiere Izrẹl ọ tẹ rehọ ikpewho nana kpobi, a te mu ikpewho ahwo Amọ kpobi họ ẹria,+ evaọ Hẹshbọn gbe ewho esese riẹ* kpobi. 26 Keme Hẹshbọn ọ jọ okpẹwho Saehọn ovie ahwo Amọ, ọnọ o lele ovie Moab fi ẹmo ọ tẹ rehọ ẹkwotọ riẹ kpobi mi ei rite obọ Anọn. 27 Oye o wha ohare ẹkoko nana ze inọ:

“Nyaze obọ Hẹshbọn.

Jọ a bọ okpẹwho Saehọn je ru ei ga ziezi.

28 Keme erae i no Hẹshbọn ze, ebruerae i no ẹwho Saehọn ze.

E mahe Ar ọrọ Moab no, ilori eria ikpehru Anọn.

29 Uye u te owhẹ Moab! A te raha owhai, O ahwo Kimọsh!+

O ru emezae riẹ fihọ ahwo nọ a be dhẹ dhere, je ru emetẹ riẹ họ enọ Saehọn ovie ahwo Amọ o mu kpohọ igbo.

31 Fikiere Izrẹl o te mu ẹkwotọ ahwo Amọ họ ẹria. 32 Kẹsena Mosis o te vi ezae jọ nyae kiẹ otọ Jeza.+ A fi ewho esese riẹ* kparobọ je le ahwo Amọ nọ a jariẹ no. 33 Nọ oyena o vrẹ no, a tẹ wẹriẹ a tẹ nya Edhere Beshan vrẹ. Ọg+ ovie Beshan avọ ahwo riẹ kpobi a tẹ wọ ohọre bru ai evaọ Ẹdrae.+ 34 Jihova ọ tẹ ta kẹ Mosis nọ: “Jọ ozọ riẹ u mu owhẹ hẹ,+ keme mẹ te rehọ iẹe avọ ahwo riẹ kpobi gbe ẹkwotọ riẹ họ owhẹ obọ,+ yọ who ti ru ei nwane wọhọ epanọ who ru Saehọn ovie ahwo Amọ nọ ọ jẹ rria Hẹshbọn.”+ 35 Fikiere a te mu ai họ ekpe fihọ otọ, te emezae riẹ gbe ahwo riẹ kpobi, bẹsenọ ọvuọvo rai o ro kiọkọ họ,+ a tẹ rehọ ẹkwotọ riẹ.+

22 Kẹsena ahwo Izrẹl a tẹ wọ no etẹe je wohọ udhude opraprara Moab nọ o rrọ abọ nana Jọdan yọ Jẹriko ọ rrọ abọdekọ riẹ.+ 2 Whaọ Belak+ ọmọzae Zipọ ọ riẹ kpahe* eware kpobi nọ Izrẹl o ru ahwo Amọ, 3 ozọ ahwo na u te mu Moab gaga, keme a bu thesiwa; evaọ uzẹme, idudu e ruọ ahwo Moab oma fiki ahwo Izrẹl.+ 4 Fikiere Moab ọ tẹ ta kẹ ekpako Midian nọ:+ “Whaọ ogbotu nana a te re eware* ewho mai kpobi no, nwane wọhọ epanọ eruẹ ọzae ọ rẹ re ebe ẹwọ no na.”

Belak ọmọzae Zipọ họ ohwo nọ ọ jọ ovie Moab evaọ oke yena. 5 O te vi ahwo bru Belam ọmọzae Biọ nọ ọ rrọ obọ Pithọ,+ nọ o rrọ akotọ Ethẹ* evaọ ẹwho riẹ. O vi uwou sei nọ: “Rri! Ahwo jọ a no obọ Ijipti ze. Rri! A vọ otọakpọ na kpobi,*+ yọ aro mẹ a be rria. 6 Fikiere, ivie nyaze re whọ bọwo ahwo nana ehao kẹ omẹ,+ keme a ga* vi omẹ. Ẹsejọhọ mẹ sai ti fi ai kparobọ me ve le ai no otọ na, keme mẹ riẹ vevẹ nọ ọnọ whọ lẹ ẹro eghale kẹ eghale i re tei yọ ọnọ whọ bọwo ehao, uye u re tei.”*

7 Ekpako Moab gbe ekpako Midian a tẹ ruọ edhere avọ ugho ẹva-ọgba nọ o rrọ obọ rai, a tẹ nyabru Belam+ a tẹ vuẹe uwou nọ Belak o vi sei. 8 Ọ tẹ ta kẹ ae nọ: “Wha wezẹ etenẹ aso nana, mẹ te vuẹ owhai ẹme kpobi nọ Jihova ọ ta kẹ omẹ.” Fikiere ikpahwo-esuo* Moab na a tẹ jọ kugbe Belam.

9 Kẹsena Ọghẹnẹ ọ tẹ nyabru Belam ze ọ tẹ nọe nọ:+ “Kinọ ezae vẹ e rrọ kugbe owhẹ?” 10 Belam ọ tẹ ta kẹ Ọghẹnẹ uzẹme na nọ: “Belak ọmọzae Zipọ ovie Moab, o vi uwou se omẹ, inọ, 11 ‘Rri! Ahwo nọ a no obọ Ijipti ze na a vọ otọakpọ na kpobi.* Fikiere nyaze re whọ bọwo ae ehao kẹ omẹ.+ Ẹsejọhọ mẹ sae te họre ae me ve le ai no otọ na.’” 12 Rekọ Ọghẹnẹ ọ tẹ ta kẹ Belam nọ: “Who lele ai vievie he. Whọ rẹ bọwo ahwo na ehao vievie he, keme yọ enọ a ghale no.”+

13 Belam ọ tẹ kpama evaọ ohiohiẹ ọ tẹ ta kẹ ikpahwo-esuo Belak nọ: “Wha kpobọ orẹwho rai, keme Jihova ọ rọwo nọ me lele owhai hi.” 14 Fikiere ikpahwo-esuo Moab a tẹ ruọ edhere zihe bru Belak a tẹ ta kẹe nọ: “Belam ọ rọwo nọ o re lele omai nyaze he.”

15 Rekọ Belak ọ tẹ wariẹ vi ikpahwo-esuo nya, enọ i bu je wuzou vi erọ ọsosuọ na. 16 A tẹ nyabru Belam ze a tẹ ta kẹe nọ: “Enẹ Belak ọmọzae Zipọ ọ ta, ‘Ivie whọ jọ oware ovo o whaha owhẹ re whọ siọ omẹ ba ẹnyabru ze he, 17 keme me ti bru ọghọ ologbo họ owhẹ oma yọ me ti ru oware kpobi nọ whọ ta nọ me ru. Fikiere, ivie nyaze re whọ te bọwo ahwo nana ehao kẹ omẹ.’” 18 Rekọ Belam ọ tẹ ta kẹ idibo Belak nọ: “O tẹ make rọnọ Belak ọ kẹ omẹ uwou riẹ nọ isiliva avọ igoru e vọ, mẹ sai ru oware ovo nọ u wo ohẹriẹ no ẹme nọ Jihova Ọghẹnẹ mẹ ọ ta ha, te o kawo hayo o rro.+ 19 Rekọ ivie wha wezẹ etenẹ aso nana re, re mẹ ruẹse riẹ oware ofa nọ Jihova ọ te ta kẹ omẹ.”+

20 Ọghẹnẹ ọ tẹ nyabru Belam ze evaọ aso ọ tẹ ta kẹe nọ: “Otẹrọnọ ese ezae nana a nyaze ti se owhẹ, lele ai nya. Rekọ ẹme nọ mẹ vuẹ owhẹ ọvo whọ rẹ ta.”+ 21 Fikiere Belam ọ tẹ kpama evaọ ohiohiẹ ọ tẹ ruẹrẹ eketekete* riẹ họ o te lele ikpahwo-esuo Moab.+

22 Rekọ ofu o mu Ọghẹnẹ gaga fikinọ ọ be nya, ukọ-odhiwu Jihova o te dikihẹ edhere re ọ whaha iẹe. Whaọ Belam ọ jẹ dhẹ eketekete riẹ, yọ idibo ivẹ riẹ a jọ kugbei. 23 Nọ eketekete na ọ ruẹ ukọ-odhiwu Jihova nọ o dikihẹ edhere avọ ọgbọdọ nọ o wolo ze nọ o rrọ obọ riẹ, ọ tẹ be daoma dhẹ no edhere na ruọ ẹwọ. Rekọ Belam o te muọ eketekete na họ ẹfa re ọ ruẹsi zihe ziọ edhere na. 24 Kẹsena ukọ-odhiwu Jihova ọ tẹ nyai dikihẹ edhere ọhwahwa nọ ọ rrọ udevie egbọ evaene ivẹ, avọ igbẹhẹ itho nọ e rrọ tabọ tabọ riẹ. 25 Nọ eketekete na ọ ruẹ ukọ-odhiwu Jihova, ọ tẹ be keke oma nyawo ugbẹhẹ na ọ tẹ rọ owọ Belam nyawo ugbẹhẹ na, Belam ọ tẹ wariẹ mu ei họ ẹfa.

26 Ukọ-odhiwu Jihova ọ tẹ wariẹ no etẹe nyai dikihẹ oria owhawha nọ a rẹ sae jọ wẹriẹ kpohọ obọze hayo ẹkpẹlobọ họ. 27 Nọ eketekete na ọ ruẹ ukọ-odhiwu Jihova, o te rruẹ fihọ otọ yọ Belam ọ rrọ ehru riẹ, fikiere eva e tẹ dha Belam thesiwa ọ tẹ be rọ ọkpọ riẹ fa eketekete na ẹfẹfa. 28 Uwhremu na Jihova o te ru eketekete na ta ẹme,*+ ọ tẹ ta kẹ Belam nọ: “Eme me ru owhẹ nọ whọ be rọ fa omẹ anwọ isiasa soso na?”+ 29 Belam ọ tẹ ta kẹ eketekete na nọ: “Fikinọ whọ be rọ omẹ zaharo. O hae jọ nọ ọgbọdọ ọ rrọ omẹ obọ, mẹ hai kpe owhẹ no!” 30 Eketekete na ọ tẹ ta kẹ Belam nọ: “Kọ ogbẹrọnọ mẹ họ eketekete ra nọ whọ be dhẹ anwọ edẹ uzuazọ ra kpobi rite inẹnẹ na? Kọ me ru owhẹ enẹ no ẹdẹ jọ?” Ọ tẹ ta kẹe nọ: “Ijo!” 31 Kẹsena Jihova o te rovie aro Belam,+ ọ tẹ ruẹ ukọ-odhiwu Jihova nọ o dikihẹ edhere avọ ọgbọdọ nọ o wolo ze nọ o rrọ obọ riẹ. Belam ọ tẹ nwani guzou kpotọ je kiẹzẹ vovao tuotọ.

32 Ukọ-odhiwu Jihova ọ tẹ ta kẹe nọ: “Fikieme whọ rọ fa eketekete ra anwọ isiasa na? Rri! Mẹ omamẹ mẹ nyaze te za owhẹ dhe, keme iruẹru* ra e wọso oreva mẹ.+ 33 Eketekete na ọ ruẹ omẹ ọ tẹ jẹ daoma kẹnoma kẹ omẹ isiasa nana.+ O hae jọ nọ ọ kẹnoma kẹ omẹ hẹ, enẹ yọ me kpe owhẹ no yọ mẹ hae te siọ eketekete na ba uzuazọ.” 34 Belam ọ tẹ ta kẹ ukọ-odhiwu Jihova nọ: “Mẹ raha uzi no, keme mẹ riẹ nọ whẹ who dikihẹ edhere be hẹrẹ omẹ hẹ. Whaọ otẹrọnọ whọ gwọlọ nọ mẹ nya ha,* me re zihe.” 35 Ukọ-odhiwu Jihova ọ tẹ ta kẹ Belam nọ: “Lele ezae na nya, rekọ ẹme nọ mẹ vuẹ owhẹ ọvo whọ rẹ ta.” Fikiere Belam ọ tẹ ruabọhọ erẹ riẹ kugbe ikpahwo-esuo Belak.

36 Nọ Belak o yo nọ Belam ọ nyaze no, ọ tẹ nwane nyai zere iei evaọ okpẹwho Moab, onọ o rrọ akotọ Anọn nọ o rrọ uwhru ẹkwotọ na. 37 Belak ọ tẹ ta kẹ Belam nọ: “Kọ me vi ahwo ze ti se owhẹ? Fikieme whọ gbẹ rọ nyabru omẹ ze he? Kọ who roro nọ mẹ sai bru ọghọ ologbo họ owhẹ oma ha?”+ 38 Belam ọ tẹ ta kẹ Belak nọ: “Whaọ obọnana mẹ nyabru owhẹ ze no. Kọ mẹ te sae* ta ẹme jọ? Ẹme nọ Ọghẹnẹ o fihọ omẹ unu ọvo mẹ rẹ sae ta.”+

39 Fikiere Belam o te lele Belak a tẹ ziọ Kiriat-huzọt. 40 Belak ọ tẹ rọ iruẹ gbe igodẹ dhe idhe o te vi ejọ se Belam avọ ikpahwo-esuo nọ e rrọ kugbei. 41 Evaọ ohiohiẹ Belak ọ tẹ rehọ Belam gadiẹ kpohọ Bemọt-bale; kọ etẹe ọ sae jọ ruẹ ahwo na kpobi.+

23 Belam ọ tẹ ta kẹ Belak nọ: “Bọ egbada-idhe ihrẹ+ fihọ etenẹ, re whọ ruẹrẹ iruẹ ezae ihrẹ avọ igbo ihrẹ kpahe kẹ omẹ.” 2 Belak ọ tẹ nwani ru epanọ Belam ọ ta na. Belak avọ Belam a tẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.+ 3 Belam ọ tẹ ta kẹ Belak nọ: “Jọ etenẹ kugbe idhe emahọ ra, re mẹ nya. Ẹsejọhọ Jihova ọ te ta ẹme kẹ omẹ. Oware kpobi nọ ọ ta* kẹ omẹ, mẹ te vuẹ owhẹ.” Fikiere o te kpohọ ugbehru nọ oware ovo o rrọ họ.

4 Ọghẹnẹ ọ tẹ ta ẹme kẹ Belam,+ ọ tẹ kpahe kẹ Ọghẹnẹ nọ: “Mẹ bọ egbada-idhe ihrẹ fihọ ihie, yọ mẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.” 5 Jihova o te fi ẹme họ Belam unu,+ ọ ta kẹe nọ: “Zihe bru Belak, yọ enẹ whọ rẹ ta.” 6 Fikiere o te zihe ọ tẹ ruẹ nọ Belak avọ ikpahwo-esuo Moab kpobi a dikihẹ gba idhe emahọ riẹ. 7 Kẹsena ọ tẹ ta ẹme ohare nana:+

‘Nyaze te bọwo Jekọp ehao kẹ omẹ.

Ẹhẹ, nyaze ti brukpe* Izrẹl.’+

 8 Ẹvẹ mẹ rẹ rọ bọwo ahwo nọ Ọghẹnẹ ọ bọwo ehao ho ehao?

Ẹvẹ me re ro brukpe ahwo nọ Jihova o brukpe he?+

11 Belak ọ tẹ ta kẹ Belam nọ: “Nọ eme na who ru omẹ na? Mẹ rehọ owhẹ ze re whọ bọwo ewegrẹ mẹ ehao, rekọ who ru oware ovo ho ukpoye whọ tẹ ghale ae.”+ 12 Ọ tẹ kpahe kẹe nọ: “Kọ ogbẹrọnọ ẹme nọ Jihova o fihọ omẹ unu kpobi mẹ rẹ ta?”+

13 Belak ọ tẹ ta kẹe nọ: “Ivie nyaze ma kpohọ oria ofa nọ whọ sae jọ ruẹ e rai. Umutho rai jọ ọvo whọ te ruẹ; whọ te ruẹ e rai kpobi hi. Jọ etẹe bọwo ae ehao kẹ omẹ.”+ 14 Fikiere ọ tẹ rehọ iẹe kpohọ ẹwọ Zofim, kpohọ ehru Pisga,+ ọ tẹ bọ egbada-idhe ihrẹ, ọ tẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.+ 15 Belam ọ tẹ ta kẹ Belak nọ: “Jọ etenẹ kugbe idhe emahọ ra, re mẹ nyabru Ọghẹnẹ* evaọ obei.” 16 Jihova o te lele Belam ta ẹme, o te fi ẹme họ iẹe unu, ọ ta kẹe nọ:+ “Zihe bru Belak, yọ enẹ whọ rẹ ta.” 17 Fikiere ọ tẹ nyabru ei ze, ọ tẹ ruẹ nọ ọ rrọ akotọ idhe emahọ riẹ be hẹrẹ, yọ ikpahwo-esuo Moab a rrọ kugbei. Belak ọ tẹ nọe nọ: “Eme Jihova ọ ta?” 18 Kẹsena ọ tẹ ta ẹme ohare nana:+

“Kpama Belak re whọ gaviezọ.

Gaviezọ kẹ omẹ, O ọmọzae Zipọ.

Nọ ọ tẹ ta oware, kọ o gbe ru ei?

Nọ ọ tẹ ta ẹme, kọ o gbe ru ei gba?+

22 Ọghẹnẹ ọ be rehọ ai no obọ Ijipti ze.+

Ọ wọhọ izei ogholi kẹ ae.+

Evaọ obọnana a rẹ sae ta kpahe Jekọp avọ Izrẹl nọ:

‘Rri oware nọ Ọghẹnẹ o ru!’

25 Kẹsena Belak ọ tẹ ta kẹ Belam nọ: “Otẹrọnọ whọ sae bọwo ae ehao evuevo ho, who du ghale ae gbe he.” 26 Belam ọ tẹ kpahe kẹ Belak nọ: “Kọ mẹ gbẹ vuẹ owhẹ nọ, ‘Me ti ru oware kpobi nọ Jihova ọ ta’?”+

27 Belak ọ tẹ ta kẹ Belam nọ: “Ivie nyaze re mẹ jẹ rehọ owhẹ kpohọ oria ofa. Ẹsejọhọ u ti kiehọ evaọ aro Ọghẹnẹ uzẹme na re whọ jọ etẹe bọwo ae ehao kẹ omẹ.”+ 28 Fikiere Belak ọ tẹ rehọ Belam kpohọ ehru Piọ, onọ o rẹriẹ ovao ku Jeshaemọn.*+ 29 Kẹsena Belam ọ tẹ ta kẹ Belak nọ: “Bọ egbada-idhe ihrẹ fihọ etenẹ, re whọ ruẹrẹ iruẹ ezae ihrẹ avọ igbo ihrẹ kpahe kẹ omẹ.”+ 30 Fikiere Belak o te ru epanọ Belam ọ ta na dẹẹ, ọ tẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.

24 Nọ Belam ọ ruẹ inọ o were* Jihova re ọ ghale Izrẹl, ọ gbẹ wariẹ nyae gwọlọ oka okpẹtu hu,+ rekọ o te ku ovao rẹriẹ rri obọ udhude na. 2 Nọ Belam ọ kpare aro riẹ jẹ ruẹ Izrẹl nọ ọ fa evuẹ lele ọvuọ orua riẹ,+ ẹzi Ọghẹnẹ ọ tẹ ruọ ẹe oma.+ 3 Kẹsena ọ tẹ ta ẹme ohare nana inọ:+

10 Eva Belam e tẹ dha Belak gaga. Belak ọ tẹ tehe abọ ku Belam ọ tẹ ta kẹe nọ: “Me se owhẹ ze re whọ bọwo ewegrẹ mẹ ehao,+ rekọ whọ sai ru oware ovo ho, ukpoye whọ tẹ ghale ae isiasa soso. 11 Fikiere kpo ovẹrẹ. Mẹ gwọlọ bru ọghọ ologbo họ owhẹ oma vẹre,+ rekọ, rri! Jihova ọ whaha owhẹ ọghọ na no.”

12 Belam ọ tẹ kpahe kẹ Belak nọ: “Kọ mẹ vuẹ ahwo* nọ who vi ze nọ, 13 ‘O tẹ make rọnọ Belak ọ kẹ omẹ uwou riẹ nọ isiliva avọ igoru e vọ, mẹ sae rọ udu* obọmẹ ru oware ovo nọ u wo ohẹriẹ no ẹme nọ Jihova ọ ta ha, te uwoma hayo uyoma? Jegbe nọ ẹme nọ Jihova ọ te ta kẹ omẹ ọvo mẹ te ta’?+ 14 Whaọ obọnana mẹ be nyabru ahwo mẹ. Nyaze re mẹ vuẹ owhẹ oware nọ ahwo nana a ti ru ahwo ra evaọ obaro.”* 15 Fikiere ọ tẹ ta ẹme ohare nana inọ:+

20 Nọ ọ ruẹ Amalẹk, ọ tẹ ruabọhọ ẹme ohare riẹ inọ:

21 Nọ ọ ruẹ ahwo Kẹn,+ ọ tẹ ruabọhọ ẹme ohare riẹ inọ:

“Oria omofọwẹ whọ be rria, a bọ uwou ra fihọ ugbehru-utho.

22 Rekọ ohwo jọ ọ te mahe Keyẹn no.

Ẹvẹ u ti kri te re Asiria o te ti mu owhẹ kpohọ igbo?”

23 Ọ tẹ ruabọhọ ẹme ohare riẹ inọ:

“Uye! Ono ọ te zọ okenọ Ọghẹnẹ o ti ru onana?

Rekọ a te raha ọyomariẹ muotọ re.”

25 Kẹsena Belam+ ọ tẹ kpama o te zihe kpobọ ẹwho riẹ. Belak omariẹ ọ tẹ nyavrẹ re.

25 Okenọ Izrẹl ọ jẹ rria Shitim,+ ahwo na a te je lele emetẹ Moab gbe-ọfariẹ.+ 2 Eyae na a te zizie ahwo na kpohọ idhe nọ a bi dhe kẹ eghẹnẹ rai,+ ahwo na a te muhọ ẹre je bi guzou kpotọ kẹ eghẹnẹ rai.+ 3 Izrẹl o te kuomagbe egagọ* Bale ọrọ Piọ,+ eva e tẹ dha Jihova gaga kpahe Izrẹl. 4 Jihova ọ tẹ ta kẹ Mosis nọ: “Rehọ enọ i wuzou* ahwo nana kpobi re who kpe ai jẹ tehe ae fihọ ire evaọ aro Jihova evaọ uvo kekeke,* re ofu Jihova kpahe Izrẹl o ruẹsi hrẹ.” 5 Kẹsena Mosis ọ tẹ ta kẹ ibruoziẹ Izrẹl nọ:+ “Whai omomọvo o kpe ohwo riẹ nọ o kuomagbe egagọ* Bale ọrọ Piọ.”+

6 Nwanọ evaọ oke onana, omọvo ahwo Izrẹl jọ ọ tẹ nyaze avọ aye Midian nọ ọ be wha ziọ udevie inievo riẹ+ evaọ iraro Mosis gbe ogbotu ahwo Izrẹl soso, nọ a be viẹ evaọ unuẹthẹ uwou-udhu omakugbe na. 7 Nọ Finihas+ ọmọzae Ẹlieza ọmọzae Erọn ozerẹ na ọ ruẹ onana, ọ tẹ nwane kpama no udevie ogbotu na, ọ tẹ tọlọ ozuẹ. 8 Ọ tẹ rọ kpahe ọzae Izrẹl na ruọ eva uwou-udhu na o te duwu aimava lafi, ọzae Izrẹl na avọ aye na, lafi oma* aye na. Kẹsena uye nọ u te ahwo Izrẹl na u te kuhọ.+ 9 Enọ i whu fiki uye na a bu te ahwo idu udhegbene (24,000).+

10 Jihova ọ tẹ ta kẹ Mosis nọ: 11 “Finihas+ ọmọzae Ẹlieza ọmọzae Erọn ozerẹ na o ru nọ ofu mẹ kpahe ahwo Izrẹl o ro hrẹ keme ọ kuvẹ vievie he re ohwo jọ ọ wọso omẹ evaọ udevie rai.+ Oyejabọ nọ me gbe ro kpe ahwo Izrẹl kpobi muotọ họ, onọ me je ti ru fikinọ mẹ gwọlọ omarọkẹ riẹriẹriẹ.+ 12 Fikiere, ta kẹe nọ, ‘Mẹ be re ọvọ udhedhẹ mẹ kugbei. 13 Yọ o te jọ ọvọ ọkwa-ozerẹ nọ o rẹ jọ ribri rọ kẹe gbe emọ riẹ nọ i ti lele iei,+ keme ọ kuvẹ re ohwo ọvo ọ wọso Ọghẹnẹ riẹ hẹ,+ o te ru omavoro kẹ ahwo Izrẹl.’”

14 Whaọ odẹ ọzae Izrẹl nọ a kpe kugbe aye Midian na Zimrae ọmọzae Selu, ọnọ o wuzou unuwou abọ ọsẹ jọ evaọ orua Simiọn. 15 Odẹ aye Midian nọ a kpe na Kọzbae ọmọtẹ Zọr;+ ọsẹ riẹ ọ jọ osu unuwou abọ ọsẹ* jọ evaọ Midian.+

16 Uwhremu na, Jihova ọ tẹ ta kẹ Mosis nọ: 17 “Wha họre ahwo Midian na re wha kpe ai no,+ 18 keme a be rehọ edhere ẹghẹ rọ iruẹru rai họre owhai, erọ Piọ+ gbe erọ Kọzbae ọmọtẹ ohwo nọ o wuzou evaọ Midian, ọmọtẹ rai nọ a kpe+ evaọ ẹdẹ nọ uye u ro te ahwo na fiki iruẹru Piọ na.”+

26 Nọ uye na u kuhọ no,+ Jihova ọ tẹ ta kẹ Mosis avọ Ẹlieza ọmọzae Erọn ozerẹ na nọ: 2 “Kele ogbotu ahwo Izrẹl na kpobi no umuo ikpe udhe kpohọ ehru, evaọ inuwou abọ ọsẹ rai, who re kele ahwo kpobi nọ a rẹ sae jọ ogbaẹmo Izrẹl.”+ 3 Fikiere Mosis avọ Ẹlieza+ ozerẹ na a tẹ ta kẹ ahwo na evaọ udhude opraprara Moab+ nọ o rrọ abọ nana Jọdan nọ Jẹriko ọ rrọ abọdekọ riẹ,+ inọ: 4 “Wha kele unu ahwo na no umuo ikpe udhe kpohọ ehru, nwane wọhọ epanọ Jihova o jie uzi riẹ kẹ Mosis.”+

Whaọ emezae Izrẹl nọ i no ẹkwotọ Ijipti ze họ: 5 Rubẹn,+ ọmọ ọsosuọ Izrẹl; emezae Rubẹn+ ena: Henọk, etẹe unuwou Henọk u no ze; Palu, etẹe unuwou Palu u no ze; 6 Hẹzrọn, etẹe unuwou Hẹzrọn u no ze; Kamae, etẹe unuwou Kamae u no ze. 7 Enana họ inuwou orua Rubẹn, yọ unu ahwo nọ a kere edẹ rai fihotọ a bu te idu udhuvẹ-gbesa gbe egba ihrẹ gbe ọgba (43,730).+

8 Palu o yẹ ọmọzae nọ a re se Ẹlayab. 9 Yọ emezae Ẹlayab họ Nemuẹl, Detan gbe Abaeram. Detan avọ Abaeram nana a jọ usu ahwo nọ a salọ evaọ ogbotu na, enọ e họre wọso Mosis+ avọ Erọn, kugbe utu Kora+ okenọ a họre wọso Jihova.+

10 Otọ na u te rovie,* o tẹ lọ ai no. Rekọ Kora o whu kugbe enọ e jọ abọ riẹ okenọ erae e mahe ezae egba ivẹ gbe udhuvẹ-gbikpe (250).+ A te zihe ruọ oriruo unuovẹvẹ.+ 11 Rekọ, emezae Kora a whu hu.+

12 Emezae Simiọn+ avọ inuwou rai ena: Nemuẹl, etẹe unuwou Nemuẹl u no ze; Jemin, etẹe unuwou Jemin u no ze; Jekin, etẹe unuwou Jekin u no ze; 13 Zira, etẹe unuwou Zira u no ze; Sheọl, etẹe unuwou Sheọl u no ze. 14 Enana họ inuwou orua Simiọn: ahwo idu udhegbivẹ gbe egba ivẹ (22,200).+

15 Emezae Gad+ avọ inuwou rai ena: Zifọn, etẹe unuwou Zifọn u no ze; Hẹgae, etẹe unuwou Hẹgae u no ze; Shunae, etẹe unuwou Shunae u no ze; 16 Ọznae, etẹe unuwou Ọznae u no ze; Irae, etẹe unuwou Irae u no ze; 17 Arọd, etẹe unuwou Arọd u no ze; Arilae, etẹe unuwou Arilae u no ze. 18 Enana họ inuwou emezae Gad, yọ unu ahwo nọ a kere edẹ rai fihotọ a bu te idu udhuvẹ gbe egba isoi (40,500).+

19 Emezae Juda+ họ Ẹr avọ Onan.+ Rekọ Ẹr avọ Onan a whu evaọ obọ ẹkwotọ Kenan.+ 20 Emezae Juda avọ inuwou rai ena: Shila, etẹe unuwou Shila u no ze;+ Pirẹz,+ etẹe unuwou Pirẹz u no ze; Zira,+ etẹe unuwou Zira u no ze. 21 Emezae Pirẹz ena: Hẹzrọn,+ etẹe unuwou Hẹzrọn u no ze; Hemọl,+ etẹe unuwou Hemọl u no ze. 22 Enana họ inuwou orua Juda, yọ unu ahwo nọ a kere edẹ rai fihotọ a bu te idu udhosa gbe ikpegbezeza gbe egba isoi (76,500).+

23 Emezae Isaka+ avọ inuwou rai ena: Tola,+ etẹe unuwou Tola u no ze; Puva, etẹe unuwou Puva u no ze; 24 Jeshọb, etẹe unuwou Jeshọb u no ze; Shimrọn, etẹe unuwou Shimrọn u no ze. 25 Enana họ inuwou orua Isaka, yọ unu ahwo nọ a kere edẹ rai fihotọ a bu te idu udhosa-gbene gbe egba esa (64,300).+

26 Emezae Zẹbulọn+ avọ inuwou rai ena: Sirẹd, etẹe unuwou Sirẹd u no ze; Ilọn, etẹe unuwou Ilọn u no ze; Jaliẹl, etẹe unuwou Jaliẹl u no ze. 27 Enana họ inuwou orua Zẹbulọn, yọ unu ahwo nọ a kere edẹ rai fihotọ a bu te idu udhosa gbe egba isoi (60,500).+

28 Emezae Josẹf+ avọ inuwou rai ena: Manasẹ avọ Ifremu.+ 29 Emezae Manasẹ+ ena: Meka,+ etẹe unuwou Meka u no ze; Meka họ ọsẹ Giliad;+ yọ Giliad unuwou Giliad u no ze. 30 Enana họ emezae Giliad: Aiza, etẹe unuwou Aiza u no ze; Hilẹk, etẹe unuwou Hilẹk u no ze; 31 Azriẹl, etẹe unuwou Azriẹl u no ze, Shẹkẹm, etẹe unuwou Shẹkẹm u no ze; 32 Shimaeda, etẹe unuwou Shimaeda u no ze; Hifa, etẹe unuwou Hifa u no ze. 33 Whaọ Zẹlofẹhad ọmọzae Hifa o yẹ ọmọzae ọvuọvo ho, rekọ emetẹ ọvo,+ yọ edẹ emetẹ Zẹlofẹhad+ họ Mala, Noa, Họgla, Milka, gbe Tẹza. 34 Enana họ inuwou orua Manasẹ, yọ unu ahwo nọ a kere edẹ rai fihotọ a bu te idu udhuvẹ gbe ikpegbivẹ gbe egba ihrẹ (52,700).+

35 Enana họ emezae Ifremu+ avọ inuwou rai: Shutela,+ etẹe unuwou Shutela u no ze; Bika, etẹe unuwou Bika u no ze; Tehan, etẹe unuwou Tehan u no ze. 36 Shutela o wo ọmọzae nọ a re se Iran, etẹe unuwou Iran u no ze. 37 Enana họ inuwou emezae Ifremu, yọ unu ahwo nọ a kere edẹ rai fihotọ a bu te idu ọgbagbivẹ gbe egba isoi (32,500).+ Enana họ emezae Josẹf avọ inuwou rai.

38 Emezae Bẹnjamin+ avọ inuwou rai ena: Bila,+ etẹe unuwou Bila u no ze; Ashbẹl, etẹe unuwou Ashbẹl u no ze; Ahaeram, etẹe unuwou Ahaeram u no ze; 39 Shifufam, etẹe unuwou Shufam u no ze; Hufam, etẹe unuwou Hufam u no ze. 40 Emezae Bila họ Ard avọ Neaman:+ Ard, etẹe unuwou Ard u no ze; Neaman, etẹe unuwou Neaman u no ze. 41 Enana họ emezae Bẹnjamin avọ inuwou rai, yọ unu ahwo nọ a kere edẹ rai fihotọ a bu te idu udhuvẹ-gbisoi gbe egba ezeza (45,600).+

42 Enana họ emezae Dan avọ inuwou rai:+ Shuham, etẹe unuwou Shuham u no ze. Onana họ unuwou nọ u no orua Dan ze. 43 Ahwo unuwou Shuham kpobi nọ a kere edẹ rai fihotọ a bu te idu udhosa-gbene gbe egba ene (64,400).+

44 Emezae Asha+ avọ inuwou rai ena: Imnah, etẹe unuwou Imnah u no ze; Ishvae, etẹe unuwou Ishvae u no ze; Bẹraya, etẹe unuwou Bẹraya u no ze; 45 emezae Bẹraya ena: Hiba, etẹe unuwou Hiba u no ze; Malkiẹl, etẹe unuwou Malkiẹl u no ze. 46 Odẹ ọmọtẹ Asha họ Sira. 47 Enana họ inuwou emezae Asha, yọ unu ahwo nọ a kere edẹ rai fihotọ a bu te idu udhuvẹ gbe ikpegbesa gbe egba ene (53,400).+

48 Emezae Naftalae+ avọ inuwou rai ena: Jaziẹl, etẹe unuwou Jaziẹl u no ze; Gunae, etẹe unuwou Gunae u no ze; 49 Jiza, etẹe unuwou Jiza u no ze; Shilẹm, etẹe unuwou Shilẹm u no ze. 50 Enana họ inuwou nọ i no orua Naftalae ze, yọ unu ahwo nọ a kere edẹ rai fihotọ a bu te idu udhuvẹ-gbisoi gbe egba ene (45,400).+

51 Enana họ unu ahwo Izrẹl kpobi nọ a kere edẹ rai fihotọ: idu egba ezeza gbe ọvo gbe egba ihrẹ gbe ọgba (601,730).+

52 Nọ oyena o vrẹ no, Jihova ọ tẹ ta kẹ Mosis nọ: 53 “A rẹ ghale otọ na kẹ ahwo nana re o jọ ukuoriọ rai lele edẹ nọ a kere fihotọ na.*+ 54 Rọkẹ itu nọ e rrọ buobu, who re ru ukuoriọ rai rro, rọkẹ itu nọ i bu hu, who re ru ukuoriọ rai kawo.+ Unu ahwo nọ a kere edẹ rai fihotọ evaọ utu, who re rri rọ ghale ukuoriọ kẹ utu ovuovo. 55 Rekọ ẹta a rẹ ma rọ ghale otọ na.+ Onọ a ghale kẹ orua ọsẹ ohwo, etẹe o re jo wo ukuoriọ riẹ. 56 Ẹta a te ma rọ riẹ oria ukuoriọ kpobi, jẹ rọ ghale iẹe fihọ itu nọ e rrọ buobu gbe itu nọ e kawo.”

57 Whaọ enana họ edẹ emezae Livae nọ a kere fihotọ+ avọ inuwou rai: Gẹshọn, etẹe unuwou Gẹshọn u no ze; Kohat,+ etẹe unuwou Kohat u no ze; Mẹrarae, etẹe unuwou Mẹrarae u no ze. 58 Enana họ iviuwou nọ i no inuwou nọ e rrọ orua Livae ze: uviuwou Libnae,+ uviuwou Hebrọn,+ uviuwou Mahlae,+ uviuwou Mushae,+ uviuwou Kora.+

Kohat họ ọsẹ Amram.+ 59 Odẹ aye Amram họ Jokebẹd,+ ọmọtẹ Livae, ọnọ aye Livae o yẹ kẹe evaọ obọ Ijipti. O yẹ Erọn avọ Mosis gbe Miriam oniọvo-ọmọtẹ rai kẹ Amram.+ 60 Kẹsena a te yẹ Nedab, Abaihu, Ẹlieza, gbe Itama kẹ Erọn.+ 61 Rekọ Nedab avọ Abaihu a whu fikinọ a dhe idhe* nọ e rọwokugbe uzi hi evaọ aro Jihova.+

62 Unu ahwo kpobi nọ a kere edẹ rai fihotọ e jọ idu udhegbesa (23,000), ọzae kpobi nọ ọ rrọ umuo amara ọvo kpehru.+ Rekọ a kere edẹ rai kugbe ahwo Izrẹl he,+ keme a te kẹ ae ukuoriọ evaọ udevie ahwo Izrẹl he.+

63 Enana họ enọ Mosis avọ Ẹlieza ozerẹ na a kere edẹ rai fihotọ okenọ a kere edẹ ahwo Izrẹl fihotọ evaọ udhude opraprara Moab nọ o rrọ abọ nana Jọdan, nọ Jẹriko ọ rrọ abọdekọ riẹ. 64 Rekọ evaọ usu rai na, ohwo ọvuọvo ọ jọ usu ahwo nọ Mosis avọ Erọn ozerẹ na a kere edẹ rai fihotọ họ evaọ okenọ a kele ahwo Izrẹl evaọ udhude Saena.+ 65 Keme Jihova ọ ta kpahe ae nọ: “A ti whu evaọ udhude na hrọ.”+ Fikiere ohwo ọvo o whu kiọkọ evaọ usu rai hi ajokpaọ Kelẹb ọmọzae Jefunẹ gbe Joshua ọmọzae Nọn.+

27 Kẹsena emetẹ Zẹlofẹhad,+ ọmọzae Hifa, ọmọzae Giliad, ọmọzae Meka, ọmọzae Manasẹ nọ ọ rrọ ohwo unuwou Manasẹ ọmọzae Josẹf, a tẹ nyaze. Edẹ emetẹ riẹ na họ Mala, Noa, Họgla, Milka, gbe Tẹza. 2 A te dikihẹ aro Mosis, Ẹlieza ozerẹ na, enọ i wuzou na,+ gbe ogbotu na soso evaọ unuẹthẹ uwou-udhu omakugbe na, a tẹ ta nọ: 3 “Ọsẹ mai o whu evaọ obọ udhude na, rekọ ọ jọ usu utu ahwo nọ a kuomagbe wọso Jihova ha, ahwo nọ a jọ abọ Kora,+ rekọ o whu fiki uzioraha obọriẹ yọ o yẹ ọmọzae ọvuọvo ho. 4 Fikieme odẹ ọsẹ mai u re ro vru no uviuwou riẹ fikinọ o yẹ ọmọzae he? Kẹ omai ukuoriọ evaọ udevie inievo ọsẹ mai.” 5 Mosis ọ tẹ rọ ẹme rai na se Jihova.+

6 Jihova ọ tẹ ta kẹ Mosis nọ: 7 “Emetẹ Zẹlofẹhad na a ta gba. Whọ rẹ kẹ ae ukuoriọ na hrọ evaọ udevie inievo ọsẹ rai, whọ vẹ rọ ukuoriọ ọsẹ rai rọ kẹ ae.+ 8 Whọ vẹ ta kẹ ahwo Izrẹl nọ, ‘Otẹrọnọ ọzae o whu yọ o yẹ ọmọzae he, wha rẹ rọ ukuoriọ riẹ kẹ ọmọtẹ riẹ hrọ. 9 Yọ otẹrọnọ o yẹ ọmọtẹ hẹ, wha rẹ rọ ukuoriọ riẹ kẹ inievo-emezae riẹ. 10 Otẹrọnọ o wo inievo-emezae he, wha rẹ rọ ukuoriọ riẹ kẹ inievo-emezae ọsẹ riẹ. 11 Otẹrọnọ ọsẹ riẹ o wo inievo-emezae he, wha rẹ rọ ukuoriọ riẹ kẹ omoni riẹ nọ ọ mae kpekpe iẹe oma, re ọ rehọ ukuoriọ na. Onana o rẹ jọ uzi rọkẹ ahwo Izrẹl nọ a re ro bruoziẹ, nwane wọhọ epanọ Jihova o jie uzi kẹ Mosis.”

12 Kẹsena Jihova ọ tẹ ta kẹ Mosis nọ: “Gadiẹ ugbehru orọ Abarim nana,+ re who rri ẹkwotọ nọ mẹ te rọ kẹ ahwo Izrẹl na.+ 13 Whọ tẹ ruẹ e riẹ no, a ve ti koko owhẹ họ bru ahwo ra,*+ nwane wọhọ epanọ o via kẹ Erọn oniọvo ra na,+ 14 keme okenọ ogbotu na a je lele omẹ whọ evaọ udhude Zin, wha wọso ujaje mẹ re wha kẹ omẹ orro* evaọ aro rai kpahe ame na.+ Onana họ ame Mẹriba+ nọ ọ rrọ Kedẹsh+ evaọ udhude Zin.”+

15 Mosis ọ tẹ ta kẹ Jihova nọ: 16 “Jọ Jihova, Ọghẹnẹ nọ o wo ẹzi ahwo kpobi* na, ọ rehọ ohwo jọ mu nọ o re su ogbotu na, 17 nọ ọ rẹ karo kẹ ae jẹ kemu kẹ ae, ọnọ o re su ai vrẹ je su ai zihe ze, re ahwo Jihova a gbẹ jọ wọhọ igodẹ nọ i wo othuru-igodẹ hẹ hẹ.” 18 Fikiere Jihova ọ tẹ ta kẹ Mosis nọ: “Rehọ Joshua ọmọzae Nọn, ọzae nọ ẹzi ọ rrọ oma, re whọ rọ obọ kpahe iẹe.+ 19 Kẹsena whọ vẹ rehọ iẹe dikihẹ aro Ẹlieza ozerẹ na gbe aro ogbotu na soso, re whọ rehọ iẹe mu evaọ iraro rai.+ 20 Whọ rẹ rọ udu-esuo* ra jọ kẹe,+ re ogbotu ahwo Izrẹl na soso a ruẹse gaviezọ kẹe.+ 21 Ọ rẹ hae nyabru* Ẹlieza ozerẹ na, ọnọ ọ te rọ Yurim+ nekpẹ mi Jihova kẹe. Ọ tẹ ta nọ a wọ ruọ edhere a ve ru ere, ọ jẹ ta nọ a zihe ze a ve zihe ze, tei te ahwo Izrẹl kpobi nọ a rrọ kugbei, gbe ogbotu na soso.”

22 Fikiere Mosis o te ru epanọ Jihova ọ ta kẹe na dẹẹ. Ọ rehọ Joshua dikihẹ aro Ẹlieza ozerẹ na gbe aro ogbotu na soso, 23 ọ tẹ rọ abọ kpahe iẹe jẹ rehọ iẹe mu,+ nwane wọhọ epanọ Jihova ọ rọ ẹkwoma Mosis ta.+

28 Nọ oyena o vrẹ no, Jihova ọ tẹ ta kẹ Mosis nọ: 2 “Jie uzi kẹ ahwo Izrẹl nọ, ‘Wha rẹ daoma ruẹ nọ wha rehọ ekẹ mẹ, ebrẹdi mẹ, se omẹ. A re dhe idhe mẹ nọ a rẹ rọ erae mahe nọ i re gbo ore awere* se omẹ na evaọ oke nọ a fihọ kẹ ae.’+

3 “Whọ rẹ ta kẹ ae nọ, ‘Eware nana wha re ro dhe idhe nọ a rẹ rọ erae mahe nọ wha re dhe kẹ Jihova: imigodẹ ezae ivẹ nọ e rrọ ẹgbukpe nọ e rrọ omakọkọ nọ a re ro dhe idhe emahọ kẹdẹ kẹdẹ, ẹsikpobi.+ 4 Wha rẹ rehọ omogodẹ ọzae ọvo jọ dhe idhe evaọ ohiohiẹ, kẹsena wha vẹ rehọ omogodẹ ọzae ọdekọ dhe idhe nọ ọre o te kiediwi no,*+ 5 avọ okẹ idhe ibi ekakọ orọ emamọ eflawa iwuwuru nọ o rẹ jọ abọvo abakpe ifa* nọ a rehọ abọvo abane ihini* orọ ewhri nọ a duwu ze rọ gua.+ 6 Onana yọ idhe emahọ ikẹse kẹse,+ onọ a jie uzi riẹ evaọ obọ Ugbehru Saena nọ u re gbo ore awere,* idhe nọ a rẹ rọ erae mahe kẹ Jihova, 7 avọ idhe udi riẹ nọ o rẹ jọ abọvo abane ihini rọkẹ omogodẹ ọzae ọvuọvo.+ Wha re ku udi ogaga na fihọ oria ọrẹri na wọhọ idhe udi rọkẹ Jihova. 8 Yọ wha rẹ rehọ omogodẹ ọzae ọdekọ na dhe idhe nọ ọre o te kiediwi no.* Kugbe utiọ idhe ibi ekakọ nọ a ro dhe idhe evaọ ohiohiẹ na gbe utiọ idhe udi ovona, wha rẹ rehọ iẹe dhe idhe nọ a rẹ rọ erae mahe nọ u re gbo ore awere* se Jihova.+

9 “‘Rekọ evaọ ẹdẹ Ẹdijala,+ eware nọ a re ro dhe idhe họ imigodẹ ezae ivẹ nọ e rrọ ẹgbukpe nọ e rrọ omakọkọ, avọ idhe ibi ekakọ orọ abava abakpe owawọ ifa orọ emamọ eflawa iwuwuru nọ a rọ ewhri gua, kugbe idhe udi riẹ. 10 Onana họ idhe emahọ Ẹdijala na, gbe idhe emahọ ikẹse kẹse na kugbe idhe udi riẹ.+

11 “‘Evaọ emuhọ amara kpobi,* eware nọ wha re ro dhe idhe emahọ kẹ Jihova họ iruẹ ivẹ, egbo ọvo, gbe imigodẹ ezae ihrẹ nọ e rrọ omakọkọ, nọ ọvuọvo rai ọ rrọ ukpe ovo,+ 12 gbe owawọ abasa abakpe orọ emamọ eflawa iwuwuru nọ a rọ ewhri gua orọ idhe ibi ekakọ+ rọkẹ eruẹ ọzae ọvuọvo gbe owawọ abava abakpe orọ emamọ eflawa iwuwuru nọ a rọ ewhri gua nọ a re ro dhe idhe ibi ekakọ orọ egbo ọvo na,+ 13 gbe owawọ abọvo abakpe orọ emamọ eflawa iwuwuru nọ a rọ ewhri gua orọ idhe ibi ekakọ rọkẹ omogodẹ ọzae ọvuọvo, nọ a re ro dhe idhe emahọ, nọ u re gbo ore awere,*+ idhe nọ a rẹ rọ erae mahe kẹ Jihova. 14 Yọ idhe udi orọ eruẹ ọzae ọvo ọ rẹ jọ abọvo ihini ọrọ enwaene,+ yọ orọ egbo na o rẹ jọ abọvo abasa orọ ihini,+ orọ omogodẹ ọzae ọvo o rẹ jọ abọvo abane ihini.+ Onana họ idhe emahọ kamara kamara nọ a re dhe evaọ amara kpobi evaọ ukpe na soso. 15 U te no ere no, a rẹ rehọ ọmọ ẹwe ọvo dhe idhe uzioraha kẹ Jihova kugbe idhe emahọ ikẹse kẹse na avọ idhe udi riẹ.

16 “‘Ẹdẹ avọ ikpegbene amara ọsosuọ ọ rẹ jọ ẹdẹ Ọnyavrẹ Jihova.+ 17 Yọ evaọ ẹdẹ avọ ikpegbisoi amara nana, a re ru ehaa. Edẹ ihrẹ wha rẹ re ebrẹdi nọ ọ kare ẹvi.*+ 18 Evaọ ẹdẹ ọsosuọ na, a re ru okokohọ ọrẹri. Wha re ru iruo egaga evuevo vievie he. 19 Yọ eware nọ wha re ro dhe idhe emahọ nọ a rẹ rọ erae mahe kẹ Jihova họ, iruẹ ezae ivẹ, egbo ọvo, gbe imigodẹ ezae ihrẹ nọ ọvuọvo rai ọ rrọ ukpe ovo. Erao nọ e rrọ omakọkọ wha re ro dhe idhe.+ 20 Wha rẹ rehọ ai dhe idhe kugbe idhe ibi ekakọ rai erọ emamọ eflawa iwuwuru nọ a rọ ewhri gua,+ owawọ abasa abakpe rọkẹ eruẹ ọzae gbe owawọ abava abakpe rọkẹ egbo na. 21 Wha rẹ rọ owawọ abọvo abakpe dhe idhe kugbe omogodẹ ọzae ọvuọvo evaọ usu imigodẹ ezae ihrẹ na, 22 gbe ẹwe ọvo rọkẹ idhe uzioraha nọ a re ro ru omavoro kẹ owhai. 23 U te no idhe emahọ ohiohiẹ na nọ o rrọ idhe emahọ ikẹse kẹse na no, wha rẹ rọ enana dhe idhe re. 24 Wha rẹ rehọ ai dhe idhe evaọ oghẹrẹ ovona kẹdẹ kẹdẹ evaọ edẹ ihrẹ wọhọ emu,* idhe nọ a rẹ rọ erae mahe nọ i re gbo ore awere* se Jihova. Wha rẹ rehọ ai dhe idhe kugbe idhe emahọ ikẹse kẹse na avọ idhe udi riẹ. 25 Evaọ ẹdẹ avọ ihrẹ na, wha re ru okokohọ ọrẹri.+ Wha re ru iruo egaga evuevo vievie he.+

26 “‘Evaọ ẹdẹ nọ wha te rọ rehọ ibi ọsosuọ nọ e ware+ ro dhe idhe ibi ekakọ ekpokpọ kẹ Jihova na,+ wha re ru okokohọ ọrẹri evaọ ehaa ekpoka rai.+ Wha re ru iruo egaga evuevo vievie he.+ 27 Wha rẹ rọ eware nana dhe idhe emahọ nọ i re gbo ore awere* se Jihova, iruẹ ezae ivẹ, egbo ọvo, gbe imigodẹ ezae ihrẹ nọ ọvuọvo rai ọ rrọ ukpe ovo,+ 28 yọ idhe ibi ekakọ rai erọ emamọ eflawa iwuwuru nọ a rọ ewhri gua, owawọ abasa abakpe rọkẹ eruẹ ọzae ọvuọvo, owawọ abava abakpe rọkẹ egbo ọvo na, 29 owawọ abọvo abakpe rọkẹ omogodẹ ọzae ọvuọvo evaọ usu imigodẹ ezae ihrẹ na, 30 gbe ọmọ ẹwe ọvo nọ a re ro ru omavoro kẹ owhai.+ 31 Wha rẹ rehọ enana dhe idhe re kugbe idhe emahọ ikẹse kẹse na avọ idhe ibi ekakọ riẹ. E rẹ jọ erao nọ e rrọ omakọkọ,+ kugbe idhe udi rai.

29 “‘Evaọ amara avọ ihrẹ, evaọ ẹdẹ ọsosuọ amara na wha re ru okokohọ ọrẹri. Wha re ru iruo egaga evuevo vievie he.+ Ẹdẹ nana yọ ẹdẹ nọ wha re kporo ọgba.+ 2 Wha rẹ rehọ eware nana dhe idhe emahọ nọ i re gbo ore awere* se Jihova, eruẹ ọzae ọvo, egbo ọvo, gbe imigodẹ ezae ihrẹ nọ ọvuọvo rai ọ rrọ ukpe ovo, aikpobi a rẹ jọ omakọkọ, 3 yọ idhe ibi ekakọ rai orọ emamọ eflawa iwuwuru nọ a rọ ewhri gua o rẹ jọ owawọ abasa abakpe ifa rọkẹ eruẹ ọzae na, owawọ abava abakpe rọkẹ egbo na, 4 gbe owawọ abọvo abakpe rọkẹ omogodẹ ọzae ọvuọvo evaọ usu imigodẹ ezae ihrẹ na, 5 gbe omokri ọvo rọkẹ idhe uzioraha nọ a re ro ru omavoro kẹ owhai. 6 A re dhe idhe nana kugbe idhe emahọ kamara kamara na avọ idhe ibi ekakọ riẹ+ gbe idhe emahọ ikẹse kẹse na avọ idhe ibi ekakọ riẹ,+ kugbe idhe udi rai,+ lele oghẹrẹ nọ a dhesẹ nọ a rẹ hai ro ru ai na, re e jọ idhe nọ i re gbo ore awere,* idhe nọ a rẹ rọ erae mahe kẹ Jihova.

7 “‘Evaọ ẹdẹ avọ ikpe amara avọ ihrẹ nana, wha re ru okokohọ ọrẹri,+ yọ wha re gboja kẹ omarai* hrọ. Wha re ru iruo evuevo vievie he.+ 8 Yọ wha rẹ rehọ eware nana dhe idhe emahọ kẹ Jihova re i gbo ore awere* sei, eruẹ ọzae ọvo, egbo ọvo, gbe imigodẹ ezae ihrẹ nọ ọvuọvo rai ọ rrọ ukpe ovo, aikpobi a rẹ jọ omakọkọ.+ 9 Yọ idhe ibi ekakọ rai orọ emamọ eflawa iwuwuru nọ a rọ ewhri gua o rẹ jọ owawọ abasa abakpe rọkẹ eruẹ ọzae na, owawọ abava abakpe rọkẹ egbo ọvo na, 10 owawọ abọvo abakpe rọkẹ omogodẹ ọzae ọvuọvo evaọ usu imigodẹ ezae ihrẹ na, 11 gbe ọmọ ẹwe ọvo rọkẹ idhe uzioraha, u te no idhe uzioraha nọ a re ro ru omavoro na no+ avọ idhe emahọ ikẹse kẹse na gbe idhe ibi ekakọ riẹ, avọ idhe udi rai.

12 “‘Evaọ ẹdẹ avọ ikpegbisoi amara avọ ihrẹ na, wha re ru okokohọ ọrẹri. Wha re ru iruo egaga evuevo vievie he, yọ wha re ru ehaa kẹ Jihova edẹ ihrẹ.+ 13 Yọ wha rẹ rehọ eware nana dhe idhe emahọ,+ idhe nọ a rẹ rọ erae mahe nọ i re gbo ore awere* se Jihova, iruẹ ezae ikpegbesa, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ.+ 14 Yọ idhe ibi ekakọ rai orọ emamọ eflawa iwuwuru nọ a rọ ewhri gua o rẹ jọ owawọ abasa abakpe rọkẹ eruẹ ọzae ọvuọvo evaọ usu iruẹ ezae ikpegbesa na, owawọ abava abakpe rọkẹ egbo ọvuọvo evaọ usu igbo ivẹ na, 15 gbe owawọ abọvo abakpe rọkẹ omogodẹ ọzae ọvuọvo evaọ usu imigodẹ ezae ikpegbene na, 16 gbe ọmọ ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

17 “‘Evaọ ẹdẹ avọ ivẹ, iruẹ ezae ikpegbivẹ, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 18 avọ idhe ibi ekakọ rai gbe idhe udi rai rọkẹ iruẹ ezae na, igbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai na, 19 gbe ọmọ ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi rai.+

20 “‘Evaọ ẹdẹ avọ esa, iruẹ ezae ikpegbọvo, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 21 avọ idhe ibi ekakọ rai gbe idhe udi rai rọkẹ iruẹ ezae na, igbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai na, 22 gbe ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

23 “‘Evaọ ẹdẹ avọ ene, iruẹ ezae ikpe, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 24 avọ idhe ibi ekakọ rai gbe idhe udi rai rọkẹ iruẹ ezae na, igbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai na, 25 gbe ọmọ ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

26 “‘Evaọ ẹdẹ avọ isoi, iruẹ ezae izii, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 27 avọ idhe ibi ekakọ rai gbe idhe udi rai rọkẹ iruẹ ezae na, igbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai, 28 gbe ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

29 “‘Evaọ ẹdẹ avọ ezeza, iruẹ ezae eree, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 30 avọ idhe ibi ekakọ rai gbe idhe udi rai rọkẹ iruẹ ezae na, igbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai, 31 gbe ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

32 “‘Evaọ ẹdẹ avọ ihrẹ, iruẹ ezae ihrẹ, igbo ivẹ, gbe imigodẹ ezae ikpegbene nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 33 avọ idhe ibi ekakọ rai gbe idhe udi rai rọkẹ iruẹ ezae na, igbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai na, 34 gbe ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

35 “‘Evaọ ẹdẹ avọ eree, wha re ru okokohọ urirẹ. Wha re ru iruo egaga evuevo ho.+ 36 Wha rẹ rehọ eware nana dhe idhe emahọ, idhe nọ a rẹ rọ erae mahe nọ i re gbo ore awere* se Jihova, eruẹ ọzae ọvo, egbo ọvo, gbe imigodẹ ezae ihrẹ nọ ọvuọvo rai ọ rrọ ukpe ovo, aikpobi a rẹ jọ omakọkọ,+ 37 avọ idhe ibi ekakọ rai gbe idhe udi rai rọkẹ eruẹ ọzae na, egbo na, gbe imigodẹ ezae na lele epanọ unu rai o rrọ, lele oghẹrẹ nọ a dhesẹ nọ a rẹ hai ro ru ai, 38 gbe ẹwe ọvo nọ a re ro dhe idhe uzioraha, u te no idhe emahọ ikẹse kẹse na no, avọ idhe ibi ekakọ riẹ, gbe idhe udi riẹ.+

39 “‘Enana wha re ro dhe idhe kẹ Jihova evaọ ehaa ezi-ezi rai,+ kugbe eware nọ wha ya eyaa nọ wha te rọ kẹ okẹ+ gbe ekẹ unevaze rai,+ nọ wha re ro dhe idhe emahọ rai+ gbe idhe ibi ekakọ rai+ gbe idhe udi rai+ gbe idhe ọriẹyeri rai.’”+ 40 Mosis ọ tẹ vuẹ ahwo Izrẹl eware kpobi nọ Jihova o jie uzi riẹ kẹe.

30 Mosis ọ tẹ ta kẹ ahwo nọ a wuzou+ erua Izrẹl nọ: “Enẹ Jihova o jie uzi: 2 Otẹrọnọ ọzae ọ ya eyaa+ kẹ Jihova hayo o duwu iyei+ rọ ya eyaa inọ ọ rẹ gbọ omariẹ* oware jọ,* ọ rẹ siọ oware nọ ọ ta na ba eru hu.+ O re ru oware kpobi nọ ọ ya eyaa riẹ nọ o ti ru na.+

3 “Otẹrọnọ aye ọ ya eyaa kẹ Jihova hayo ọ ya eyaa nọ ọ rẹ gbọ omariẹ oware jọ okenọ ọ gbẹ rrọ ọmaha nọ ọ be rria uwou ọsẹ riẹ, 4 yọ ọsẹ riẹ o yo eyaa riẹ na hayo o yo eyaa oware nọ ọ ta nọ ọ te rọ gbọ omariẹ* na, rekọ ọsẹ riẹ ọ se he, eyaa riẹ kpobi e rẹ jọ epanọ ọ ta na, yọ eyaa kpobi nọ ọ ya inọ ọ rẹ gbọ omariẹ oware jọ o rẹ jọ epanọ ọ ta na. 5 Rekọ otẹrọnọ ọsẹ riẹ ọ rọwo kẹe he okenọ o yo nọ ọmọtẹ riẹ ọ ya eyaa jọ hayo ọ ya eyaa inọ ọ rẹ gbọ omariẹ oware jọ, eyaa riẹ na i re gbe wo iruo ho. Jihova ọ te rọvrẹ riẹ keme ọsẹ riẹ ọ rọwo kẹe he.+

6 “Rekọ otẹrọnọ o wo ọzae okenọ ọ gbẹ rrọ otọ eyaa riẹ hayo eyaa okpakpa nọ ọye ọvo o fi omariẹ họ, 7 yọ ọzae riẹ o yo kpahe iẹe rekọ ọ se kẹe he evaọ ẹdẹ nọ o ro yo kpahe iẹe na, eyaa riẹ hayo eyaa oware nọ ọ ya nọ ọ rẹ gbọ omariẹ na e rẹ jọ epanọ ọ ta na. 8 Rekọ otẹrọnọ ọzae riẹ ọ rọwo kẹe he evaọ ẹdẹ nọ o ro yo kpahe iẹe na, ọ rẹ sae raha eyaa na hayo eyaa okpakpa nọ ọye ọvo o fi omariẹ họ na,+ yọ Jihova ọ rẹ rọvrẹ aye na.

9 “Rekọ otẹrọnọ aye-uku hayo aye nọ orọo riẹ o fa ọ ya eyaa, oware kpobi nọ ọ ta kpahe omariẹ inọ o ti ru o rẹ jọ epanọ ọ ta na.

10 “Rekọ otẹrọnọ aye ọ ya eyaa jọ hayo ọ ya nọ ọ te rọ oware jọ gbọ omariẹ nọ ọ rrọ uwou ọzae riẹ na, 11 yọ ọzae na o yo rie rekọ ọ se he hayo ọ ta ha inọ o were riẹ hẹ, eyaa riẹ kpobi hayo oware nọ ọ ta nọ ọ te rọ gbọ omariẹ na o rẹ jọ epanọ ọ ta na. 12 Rekọ otẹrọnọ evaọ ẹdẹ nọ ọzae riẹ o ro yo eyaa na, ọ rọwo vievie he kpahe eyaa riẹ kpobi hayo oware kpobi nọ o duwu iyei nọ ọ te rọ gbọ omariẹ, eyaa riẹ na i re gbe wo iruo ho.+ Ọzae riẹ ọ rọwo fihọ ai hi, yọ Jihova ọ te rọvrẹ aye na. 13 Eyaa kpobi hayo iyei kpobi nọ o duwu inọ ọ te rọ oware jọ gbọ omariẹ,* ọzae riẹ ọ rẹ rọwo fihọ iẹe hayo raha iẹe no. 14 Rekọ otẹrọnọ no ẹdẹ te ẹdẹ ọzae riẹ ọ ta ẹme ọvo nọ u dhesẹ nọ ọ se he, kiyọ ọ rọwo fihọ eyaa aye na kpobi hayo eyaa riẹ inọ ọ te rọ eware jọ gbọ omariẹ. Ọ rọwo fihọ ae keme ọ ta nọ ọ se he evaọ ẹdẹ nọ o ro yo, nọ aye na ọ jẹ ya eyaa na. 15 Rekọ otẹrọnọ ọ ta uwhremu na inọ ọ rọwo fihọ ae he, nọ ẹdẹ nọ o ro yo eyaa na ọ vrẹ no, abe-ọriọ aye na ọ rẹ jọ uzou ọzae na.+

16 “Enana họ ijaje nọ Jihova ọ kẹ Mosis nọ i kiekpahe ọzae avọ aye riẹ gbe ọsẹ avọ ọmọtẹ riẹ nọ ọ be rria uwou riẹ.”

31 Jihova ọ tẹ ta kẹ Mosis nọ: 2 “Wha nyai ru ahwo Midian kele+ fiki oware nọ a ru ahwo Izrẹl na.+ Kẹsena a ve ti koko owhẹ họ bru ahwo ra.”*+

3 Fikiere Mosis ọ tẹ ta kẹ ahwo na nọ: “Wha rọ ezae no udevie rai ze re a wọ ẹmo bru* Midian re Jihova ọ rehọ ai ru Midian kele. 4 Wha rẹ jọ orua Izrẹl kpobi rehọ ahwo odu ọvo (1,000) ze nọ e rẹ jọ ogbaẹmo na.” 5 Fikiere a tẹ jọ evaọ ahwo Izrẹl nọ a rrọ idu buobu na+ rehọ ahwo odu ọvo (1,000) no orua kpobi ze, ahwo idu ikpegbivẹ (12,000) nọ e ruẹrẹ oma kpahe kẹ ẹmo.*

6 Mosis o te vi ae vrẹ, ahwo odu ọvo (1,000) nọ a rehọ no orua kpobi ze fihọ ogbaẹmo na, kugbe Finihas+ ọmọzae Ẹlieza ozerẹ na nọ ọ rrọ ogbaẹmo na re, ọnọ ekwakwa ọrẹri na gbe egba nọ a re kporo ro se ahwo na+ e rrọ obọ riẹ. 7 A lele Midian fi ẹmo, nwane wọhọ epanọ Jihova ọ ta kẹ Mosis, a te kpe ọzae kpobi. 8 U te no amọfa nọ a kpe no, a kpe ivie Midian nọ a re se Ivae, Rikẹm, Zọr, Họr, gbe Riba, ivie isoi Midian. A tẹ jẹ rọ ọgbọdọ kpe Belam+ ọmọzae Biọ. 9 Rekọ ahwo Izrẹl a mu eyae gbe emọ ahwo Midian kpo. A te je mu erao ẹwho rai kpobi rehọ, ithuru erao rai kpobi, gbe ekwakwa rai kpobi. 10 A tẹ rọ erae mahe ikpewho rai kpobi nọ a jẹ rria gbe ivuẹ rai kpobi.* 11 A tẹ kwa eware rai kpobi, te ahwo te erao. 12 Kẹsena a tẹ rehọ ahwo nọ a mu kpozi na, gbe erao na, avọ eware nọ a kwa rehọ na se Mosis avọ Ẹlieza ozerẹ na gbe ogbotu ahwo Izrẹl, evaọ evuẹ nọ a fa fihọ udhude opraprara Moab+ nọ o kẹle Jọdan jẹ rẹriẹ ovao ku Jẹriko.

13 Mosis avọ Ẹlieza ozerẹ na gbe enọ i wuzou kpobi evaọ ogbotu na a tẹ nyai zere ai evaọ obọ otafe evuẹ na. 14 Rekọ eva e dha Mosis gaga kpahe ahwo nọ a ro mu enọ i wuzou egbaẹmo na, iletu itu ahwo idu na gbe iletu itu ahwo udhusoi na nọ i bi no ẹmo kpozi na. 15 Mosis ọ tẹ ta kẹ ae nọ: “Wha nyasiọ eyae na kpobi ba uzuazọ? 16 Rri! Ae họ enọ i ru lele oware nọ Belam ọ ta, a tẹ lẹliẹ ahwo Izrẹl raha uzi+ Jihova evaọ iruẹru Piọ,+ onọ o soriẹ nọ uye u ro te ogbotu Jihova.+ 17 Obọnana wha re kpe ọmọzae kpobi nọ ọ rrọ udevie emọ na no, je kpe aye kpobi nọ o lele ọzae wezẹ no. 18 Rekọ wha sae siọ emetẹ eboba na kpobi ba, enọ i ri lele ọzae wezẹ hẹ.+ 19 Yọ wha rẹ jọ obọ otafe evuẹ na edẹ ihrẹ. Ohwo kpobi evaọ usu rai nọ o kpe ohwo* gbe ohwo kpobi evaọ usu rai nọ ọ rọ obọ te ohwo nọ a kpe+ o re ru oma riẹ fo+ evaọ ẹdẹ avọ esa gbe ẹdẹ avọ ihrẹ, te owhai te enọ wha mu kpozi na. 20 Wha re ru eware nana fo no uzioraha, ewu kpobi, oware kpobi nọ a rọ oviẹ-arao ru, oware kpobi nọ a rọ eto ẹwe ru, gbe okwakwa kpobi nọ a rọ ure ru.”

21 Ẹlieza ozerẹ na ọ tẹ ta kẹ ezae nọ e jọ ogbaẹmo na nọ i kpohọ ẹmo na nọ: “Onana họ uzi nọ Jihova o jie kẹ Mosis inọ, 22 ‘Igoru na, isiliva na, ekọpa na, ayọno na, itini* na, elẹdi na, 23 koyehọ oware kpobi nọ a rẹ rọ erae ru fo, eye ọvo wha re fihọ erae e vẹ fo. Rekọ, a rẹ jẹ rọ ame nọ a re ro ru oma fo na ro ru ai fo.+ Oware kpobi nọ a rẹ sae rọ erae ru fo ho, wha rẹ rọ ame na ro ru ei fo. 24 Yọ wha rẹ fọrọ iwu rai evaọ ẹdẹ avọ ihrẹ na, wha vẹ fo, kẹsena wha vẹ nyaziọ evuẹ na.’”+

25 Kẹsena Jihova ọ tẹ ta kẹ Mosis nọ: 26 “Kele eware nọ a kwa kpozi na, kele ahwo gbe erao nọ a mu kpozi na; whẹ avọ Ẹlieza ozerẹ na gbe enọ i wuzou inuwou abọ ọsẹ erọ ogbotu na wha re gbe ru onana. 27 Ghale eware nọ a kwa kpozi na kpohọ abava, re whọ rehọ abọvo kẹ egbaẹmo nọ i kpohọ ẹmo na* whọ vẹ rọ abọ ọdekọ kẹ ahwo nọ a kiọkọ kpobi evaọ ogbotu na.+ 28 Who re mi egbaẹmo nọ i kpohọ ẹmo na azọhọ* kẹ Jihova, a rẹ rehọ ọvo* no evaọ egba isoi (500) kpobi ze, evaọ usu ahwo na, evaọ owa erao, evaọ eketekete na, gbe evaọ uthuru erao na. 29 Whọ rẹ jọ abọvo nọ o te rai na rehọ iẹe ze whọ vẹ rehọ iẹe kẹ Ẹlieza ozerẹ na wọhọ azọhọ rọkẹ Jihova.+ 30 Whọ rẹ jọ abọvo nọ a rọ kẹ ahwo Izrẹl na rehọ ọvo no evaọ udevie udhuvẹ-gbikpe ze, evaọ usu ahwo na, evaọ owa erao, evaọ eketekete na, gbe evaọ uthuru erao na, gbe evaọ udevie oghẹrẹ erao ẹwho kpobi, whọ vẹ rehọ ae kẹ ahwo Livae na,+ enọ i bi ru iruo nọ i wobọ kugbe uwou-udhu Jihova.”+

31 Fikiere Mosis avọ Ẹlieza ozerẹ na a te ru epanọ Jihova o jie uzi riẹ kẹ Mosis na dẹẹ. 32 Eware nọ ahwo nọ a kpohọ ẹmo na a kwa kpozi nọ i kiọkọ i bu te uthuru erao idu egba ezeza gbe udhosa gbe ikpegbisoi (675,000), 33 owa erao idu udhosa gbe ikpegbivẹ (72,000), 34 gbe eketekete idu udhosa-gbọvo (61,000). 35 Eyae nọ i ri lele ezae wezẹ hẹ+ i bu te eyae* idu ọgbagbivẹ (32,000). 36 Abọvo nọ ọ jọ ẹkẹ nọ o te ahwo nọ a kpohọ ẹmo na o bu te uthuru erao idu egba esa gbe ọgbagbihrẹ gbe egba isoi (337,500). 37 Azọhọ nọ a rọ kẹ Jihova no uthuru erao na ze o bu te egba ezeza gbe udhosa gbe ikpegbisoi (675). 38 Owa erao na i bu te idu ọgbagbezeza (36,000), yọ a rehọ udhosa gbe ikpegbivẹ no ai ze re o jọ azọhọ rọ kẹ Jihova. 39 Eketekete na i bu te idu ọgba gbe egba isoi (30,500), yọ a rehọ udhosa-gbọvo no ai ze re o jọ azọhọ rọ kẹ Jihova. 40 Ahwo* na a bu te idu ikpegbezeza (16,000), yọ a rehọ ahwo* ọgbagbivẹ no ai ze re o jọ azọhọ rọ kẹ Jihova. 41 Kẹsena Mosis ọ tẹ rehọ azọhọ nọ o rrọ okẹ nọ a be kẹ Jihova na kẹ Ẹlieza ozerẹ na,+ nwane wọhọ epanọ Jihova o jie uzi riẹ kẹ Mosis na.

42 Abọvo nọ o te ahwo Izrẹl nọ Mosis ọ ghale no eware nọ ahwo nọ a kpohọ ẹmo-ofio na a wha ze, ena: 43 uthuru erao na u bu te idu egba esa gbe ọgbagbihrẹ gbe egba isoi (337,500), 44 owa erao na idu ọgbagbezeza (36,000), 45 eketekete na idu ọgba gbe egba isoi (30,500), 46 ahwo* na idu ikpegbezeza (16,000). 47 Kẹsena Mosis ọ tẹ jọ abọvo nọ a rọ kẹ ahwo Izrẹl na rehọ ọvo no evaọ udhuvẹ-gbikpe ze, evaọ usu ahwo na gbe erao na, ọ tẹ rehọ ae kẹ ahwo Livae,+ enọ i bi ru iruo evaọ uwou-udhu Jihova,+ nwane wọhọ epanọ Jihova o jie uzi riẹ kẹ Mosis.

48 Kẹsena ezae nọ a ro mu evaọ usu idu egbaẹmo na,+ iletu itu ahwo idu na gbe iletu itu ahwo udhusoi na a tẹ nyabru Mosis, 49 a tẹ ta kẹ Mosis nọ: “Idibo ra a kele unu ezae nọ i kpohọ ẹmo na nọ e rrọ otọ mai no, yọ makọ omọvo dede o no usu mai hi.+ 50 Fikiere jọ omai omomọvo ọ rehọ oware nọ u te rie obọ* ze rọ kẹ Jihova okẹ, ekwakwa igoru, ifiare awọ, ifiare, emero oka-ukpehọ,* emero-ezọ, gbe eware osẹ efa, re ma ru omavoro kẹ oma* mai evaọ aro Jihova.”

51 Fikiere Mosis avọ Ẹlieza ozerẹ na a tẹ rehọ igoru na mi ai, eware osẹ na kpobi. 52 Igoru kpobi nọ a rọ kẹ Jihova okẹ i bu te shẹkẹl* idu ikpegbezeza gbe egba ihrẹ gbe udhuvẹ-gbikpe (16,750), enọ iletu itu ahwo idu na gbe iletu itu ahwo udhusoi na a rehọ ze. 53 Omomọvo ezae nọ e jọ ogbaẹmo na ọ kwa eware rehọ kẹ omariẹ. 54 Mosis avọ Ẹlieza ozerẹ na a tẹ rehọ igoru na mi iletu itu ahwo idu na gbe iletu itu ahwo udhusoi na, a tẹ rehọ ae ziọ uwou-udhu omakugbe na re o jọ ekareghẹhọ rọkẹ ahwo Izrẹl evaọ aro Jihova.

32 Whaọ emezae Rubẹn+ gbe emezae Gad+ a wo erao buobu gaga, yọ a ruẹ nọ ẹkwotọ Jeza+ gbe Giliad yọ emamọ ẹkwotọ nọ a rẹ sai jo thuru erao. 2 Fikiere emezae Gad gbe emezae Rubẹn a tẹ nyabru Mosis avọ Ẹlieza ozerẹ na gbe enọ i wuzou ogbotu na a tẹ ta kẹ ae nọ: 3 “Atarọt, Daebọn, Jeza, Nimra, Hẹshbọn,+ Ẹliyela, Sibam, Nibo,+ gbe Biọn,+ 4 ẹkwotọ nọ Jihova o fi kparobọ rọkẹ ogbotu Izrẹl,+ yọ emamọ ẹkwotọ nọ a rẹ sai jo thuru erao yọ idibo ra a wo erao buobu.”+ 5 A tẹ gbẹ ta nọ: “Otẹrọnọ u kiehọ evaọ aro ra,* jọ a rọ ẹkwotọ nana kẹ idibo ra re e jọ ukuoriọ rai. Whọ jọ omai fa Jọdan vrẹ hẹ.”

6 Mosis ọ tẹ ta kẹ emezae Gad gbe emezae Rubẹn nọ: “Kọ inievo rai a re kpohọ ẹmo, wha vẹ keria etenẹ? 7 Fikieme wha je bi ru re udu u whrehe ahwo Izrẹl re a seba ẹfa vrẹ kpohọ ẹkwotọ nọ Jihova ọ ta nọ ọ te siọ ae ba ẹrọkẹ hẹ na? 8 Oware nana ovona esẹ rai a ru okenọ me vi ai no Kedẹsh-bania nyai rri ẹkwotọ na.+ 9 Nọ a te Ukiekpotọ* Ẹshkọl+ nọ a jẹ ruẹ ẹkwotọ na, a tẹ ta udu whrehe ahwo Izrẹl re a siọ ẹkwotọ nọ Jihova ọ gwọlọ kẹ ae ba ẹnya.+ 10 Ofu o mu Jihova gaga evaọ ẹdẹ yena nọ o soriẹ nọ o ro duwu iyei nọ:+ 11 ‘Ezae nọ i no Ijipti ze nọ e rrọ umuo ikpe udhe kpohọ ehru a te ruẹ ẹkwotọ na ha,+ onọ me duwu iyei nọ mẹ te rọ kẹ Abraham, Aiziki, gbe Jekọp,+ keme a rọ udu rai kpobi lele omẹ hẹ, 12 ajokpaọ Kelẹb+ ọmọzae Jefunẹ ohwo Kẹniz na gbe Joshua+ ọmọzae Nọn, keme a rọ udu rai kpobi lele Jihova.’+ 13 Fikiere ofu o te mu Jihova gaga kpahe Izrẹl, o te ru ai ghoro evaọ udhude na ikpe udhuvẹ,+ bẹsenọ oge nọ o je ru umuomu evaọ aro Jihova na kpobi o ro whu no.+ 14 Whaọ, wha jẹ wọ no, wha rehọ ẹta esẹ rai no wọhọ emọ imuomu, enọ e gwọlọ fiba ofu ọgaga Jihova kpahe Izrẹl. 15 Wha tẹ se iẹe ba elele, ọ te wariẹ nyasiọ ae ba udhude na hrọ, wha vẹ te wha ọraha se ahwo nana kpobi.”

16 A tẹ wariẹ nyabru ei ze, a tẹ ta kẹe nọ: “Joma bọ iwou-erao itho fihọ etenẹ kẹ erao mai gbe ikpewho kẹ emọ mai. 17 Ma te gbẹ hae ruẹrẹ oma kpahe kẹ ẹmo,+ je lele ahwo Izrẹl bẹsenọ ma re su ai te oria rai no, rekọ emọ mai a te rria ikpewho nọ a di ogba wariẹ họ na,* eria nọ oma o rẹ jọ fọ ae evaọ udevie ahwo nọ a be rria ẹkwotọ na. 18 Ma ti zihe kpobọ iwou mai hi bẹsenọ omomọvo ahwo Izrẹl na o re wo ẹkẹ otọ riẹ nọ ọ rẹ rọ reuku no.+ 19 Keme ma ti lele ai ghale ukuoriọ evaọ abọdekọ Jọdan gbe eria efa no etẹe vrẹ hẹ, fikinọ ma wo ukuoriọ mai no evaọ ofẹ ovatha-ọre Jọdan.”+

20 Mosis ọ tẹ ta kẹ ae nọ: “Otẹrọnọ wha rẹ rehọ ekwakwa ẹmo evaọ aro Jihova re wha kpohọ ẹmo na;+ 21 yọ otẹrọnọ omomọvo rai ọ rẹ rehọ ekwakwa ẹmo re ọ fa Jọdan vrẹ evaọ aro Jihova nọ o bi le ewegrẹ riẹ no aro riẹ na,+ 22 bẹsenọ Jihova ọ rẹ rehọ ẹkwotọ na kpobi no,+ kẹsena wha ve te zihe ze+ jẹ kare abe-ọriọ evaọ aro Jihova gbe Izrẹl. Kẹsena ẹkwotọ nana ọ vẹ jọ orai evaọ aro Jihova.+ 23 Rekọ otẹrọnọ wha gbe ru onana ha, yọ wha raha uzi Jihova no. Yọ o tẹ via ere, wha riẹ nọ wha te ruẹ uye uzioraha rai evaọ obaro. 24 Fikiere wha sae bọ ikpewho kẹ emọ rai jẹ bọ iwou-erao kẹ ithuru rai,+ rekọ wha rẹ ruẹ nọ wha ru oware nọ wha ya eyaa riẹ na.”

25 Emezae Gad gbe emezae Rubẹn a tẹ ta kẹ Mosis nọ: “Idibo ra a ti ru epanọ olori mẹ ọ ta na dẹẹ. 26 Emọ mai, eyae mai, erao mai, gbe erao ẹwho mai kpobi e te jọ obonẹ evaọ ikpewho Giliad,+ 27 rekọ idibo ra a te fa vrẹ, ọzae kpobi avọ ekwakwa ẹmo riẹ re o fi ẹmo evaọ aro Jihova,+ nwane wọhọ epanọ olori mẹ ọ be ta na.”

28 Fikiere Mosis o te jie uzi kpahe ae kẹ Ẹlieza ozerẹ na, Joshua ọmọzae Nọn, gbe enọ i wuzou inuwou abọ esẹ erọ erua Izrẹl. 29 Mosis ọ tẹ ta kẹ ae nọ: “Otẹrọnọ emezae Gad gbe emezae Rubẹn a lele owhai fa Jọdan na vrẹ, yọ ọzae kpobi ọ wọ ekwakwa ẹmo riẹ nọ o ti ro fi ẹmo evaọ aro Jihova, nọ wha jẹ rehọ ẹkwotọ na no, kẹsena wha vẹ rehọ ẹkwotọ Giliad kẹ ae re o jọ ukuoriọ rai.+ 30 Rekọ otẹrọnọ a gbẹ wọ ekwakwa ẹmo rai lele owhai fa vrẹ hẹ, kẹsena a ve lele owhai rria ẹkwotọ Kenan.”

31 Emezae Gad gbe emezae Rubẹn a tẹ ta nọ: “Oware nọ Jihova ọ ta kẹ idibo ra na, oye ma ti ru. 32 Ma te rehọ ekwakwa ẹmo mai ma vẹ fa vrẹ evaọ aro Jihova kpohọ ẹkwotọ Kenan,+ rekọ otọ nọ ma te rọ reuku o rẹ jọ abọ obonẹ Jọdan na.” 33 Fikiere Mosis ọ tẹ kẹ emezae Gad, emezae Rubẹn+ gbe abọvo orua Manasẹ+ ọmọzae Josẹf ẹkwotọ Saehọn+ ovie ahwo Amọ, gbe ẹkwotọ Ọg+ ovie Beshan, etọ ikpewho riẹ nọ e rrọ ẹkwotọ yena, gbe ikpewho nọ e rrọ ẹkwotọ nọ ọ wariẹ e riẹ họ.

34 Emezae Gad a tẹ bọ* Daebọn,+ Atarọt,+ Aroa,+ 35 Atrọt-shofan, Jeza,+ Jọg-baha,+ 36 Bẹt-nimra,+ gbe Bẹt-heran,+ ikpewho nọ a di ogba wariẹ họ,* a tẹ bọ iwou-erao itho kẹ ithuru na. 37 Emezae Rubẹn a tẹ bọ Hẹshbọn,+ Ẹliyela,+ Kiriateyẹm,+ 38 Nibo,+ gbe Bale-miọn,+ a nwene edẹ rai, avọ Sibma; a te mu edẹ efa kẹ ikpewho nọ a wariẹ bọ na.

39 Emezae Meka+ ọmọzae Manasẹ a tẹ wọ ẹmo bru Giliad, a te fi ei kparobọ je le ahwo Amọ nọ a jẹ rriae no eva riẹ no. 40 Fikiere Mosis ọ tẹ rọ Giliad kẹ unuwou Meka ọmọzae Manasẹ, a te mu ei họ ẹria.+ 41 Ahwo unuwou Jeya evaọ orua Manasẹ a tẹ wọ ẹmo bru rai, a te mi ai iwhre iwou-udhu rai, a te se odẹ rai Havọt-jeya.*+ 42 Noba ọ tẹ wọ ẹmo bru Kinat avọ ewho esese riẹ* o te fi ae kparobọ, ọ tẹ rọ odẹ riẹ Noba ro sei.

33 Enẹ onya erẹ ahwo Izrẹl no oria ruọ oria o jọ okenọ a wọ no ẹkwotọ Ijipti+ lele ọvuọ itu* rai,+ yọ Mosis avọ Erọn a bi su ae.+ 2 Mosis o je kere eria kpobi nọ a be wọ no ruọ edhere fihotọ evaọ erẹ rai no oria ruọ oria wọhọ epanọ Jihova ọ ta, yọ enẹ erẹ rai no oria ruọ oria o jọ, evaọ oria kpobi nọ a jẹ wọ no kpohọ oria ofa:+ 3 A wọ no Ramesis+ evaọ amara ọsosuọ, evaọ ẹdẹ avọ ikpegbisoi amara na.+ Evaọ ẹdẹ nọ o lele Ọnyavrẹ na,+ ahwo Izrẹl a ruọ edhere ududu* evaọ iraro ahwo Ijipti kpobi. 4 Oke yena yọ ahwo Ijipti a bi ki emọ ọsosuọ rai kpobi nọ Jihova o kpe,+ keme Jihova o bruoziẹ kpe* eghẹnẹ rai.+

5 Ahwo Izrẹl a tẹ wọ no Ramesis a te wohọ Sọkọt.+ 6 Kẹsena a tẹ wọ no Sọkọt a te wohọ Itham,+ nọ o rrọ akọ udhude na. 7 A tẹ wọ no Itham a te kuomarẹriẹ rri Paehaharọt, nọ o rrọ aro Bale-zifọn,+ a te wohọ aro Migdọl.+ 8 Kẹsena a tẹ wọ no Paehaharọt a tẹ nya udevie abade na vrẹ+ kpohọ udhude na+ jẹ ruabọhọ onya edẹ esa evaọ udhude Itham,+ a te wohọ Mara.+

9 A tẹ wọ no Mara a tẹ ziọ Ilim. Whaọ iyeri-ame ikpegbivẹ gbe iriẹ udhosa-gbikpe e jọ Ilim, fikiere a te wohọ etẹe.+ 10 Kẹsena a tẹ wọ no Ilim a te wohọ akotọ Abade Ọwawae na. 11 A tẹ wọ no Abade Ọwawae na a te wohọ udhude Sin.+ 12 Kẹsena a tẹ wọ no udhude Sin a te wohọ Dọfka. 13 Uwhremu na a tẹ wọ no Dọfka a te wohọ Elọsh. 14 Kẹsena a tẹ wọ no Elọsh a te wohọ Rẹfidim,+ oria nọ ame ọvo ọ jọ họ kẹ ahwo na nọ a rẹ da. 15 A tẹ wọ no Rẹfidim a te wohọ udhude Saena.+

16 A tẹ wọ no udhude Saena a te wohọ Kibrọt-hateava.+ 17 Kẹsena a tẹ wọ no Kibrọt-hateava a te wohọ Hazirọt.+ 18 A tẹ wọ no Hazirọt a te wohọ Ritma. 19 A tẹ wọ no Ritma a te wohọ Rimọn-pirẹz. 20 Kẹsena a tẹ wọ no Rimọn-pirẹz a te wohọ Libna. 21 A tẹ wọ no Libna a te wohọ Risah. 22 A tẹ wọ no Risah a te wohọ Kihẹleta. 23 Kẹsena a tẹ wọ no Kihẹleta a te wohọ Ugbehru Shifa.

24 A tẹ wọ no Ugbehru Shifa a te wohọ Hareda. 25 Kẹsena a tẹ wọ no Hareda a te wohọ Makhilọt. 26 A tẹ wọ+ no Makhilọt a te wohọ Tehat. 27 A tẹ wọ no Tehat a te wohọ Tera. 28 Kẹsena a tẹ wọ no Tera a te wohọ Mitka. 29 Uwhremu na a tẹ wọ no Mitka a te wohọ Hashmona. 30 A tẹ wọ no Hashmona a te wohọ Mosira. 31 Kẹsena a tẹ wọ no Mosira a te wohọ Bẹnẹ-jekan.+ 32 A tẹ wọ no Bẹnẹ-jekan a te wohọ Ho-hagidgad. 33 Kẹsena a tẹ wọ no Ho-hagidgad a te wohọ Jọtbata.+ 34 Uwhremu na a tẹ wọ no Jọtbata a te wohọ Abrona. 35 Kẹsena a tẹ wọ no Abrona a te wohọ Iziọn-giba.+ 36 A tẹ wọ no Iziọn-giba a te wohọ udhude Zin,+ koyehọ Kedẹsh.

37 Uwhremu na a tẹ wọ no Kedẹsh a te wohọ Ugbehru Họr,+ nọ o rrọ uwhru ẹkwotọ Edọm. 38 Erọn ozerẹ na ọ tẹ gadiẹ Ugbehru Họr wọhọ epanọ Jihova ọ ta nọ o ru, o te whu evaọ etẹe evaọ ukpe avọ udhuvẹ nọ ahwo Izrẹl a ro no ẹkwotọ Ijipti ze, evaọ amara avọ isoi, evaọ ẹdẹ ọsosuọ amara na.+ 39 Erọn ọ jọ ikpe udhozeza-gbesa (123) okenọ o whu evaọ Ugbehru Họr.

40 Whaọ ovie Erad,+ ohwo Kenan nọ ọ jẹ rria Negẹb* evaọ ẹkwotọ Kenan o te yo nọ ahwo Izrẹl a be nyaze.

41 A tẹ te wọ no Ugbehru Họr+ a te wohọ Zalmona. 42 Kẹsena a tẹ wọ no Zalmona a te wohọ Punọn. 43 A tẹ wọ no Punọn a te wohọ Obọt.+ 44 Kẹsena a tẹ wọ no Obọt a te wohọ Aya-abarim, nọ ọ rrọ uwhru Moab.+ 45 Uwhremu na a tẹ wọ no Ayẹm a te wohọ Daebọn-gad.+ 46 A tẹ wọ no Daebọn-gad a te wohọ Almọn-diblateyim. 47 Kẹsena a tẹ wọ no Almọn-diblateyim a te wohọ igbehru Abarim+ evaọ aro Nibo.+ 48 Uwhremu na a tẹ wọ no igbehru Abarim a te wohọ udhude opraprara Moab nọ o rrọ abọ nana Jọdan nọ Jẹriko ọ rrọ abọdekọ riẹ.+ 49 A wohọ abọ nana Jọdan na evaọ etoke jọ, rono Bẹt-jẹshimọt rite obọ Ebẹl-shitim,+ udhude opraprara Moab.

50 Jihova ọ tẹ ta kẹ Mosis evaọ udhude opraprara Moab nọ o rrọ abọ nana Jọdan nọ Jẹriko ọ rrọ abọdekọ riẹ inọ: 51 “Ta kẹ ahwo Izrẹl nọ, ‘Wha be te fa Jọdan vrẹ ruọ ẹkwotọ Kenan.+ 52 Wha re le ahwo kpobi nọ a be rria ẹkwotọ na no,* wha vẹ jẹ raha emema itho nọ a kare+ gbe emema ayọno rai kpobi,*+ yọ wha re kporo eria ikpehru erẹri rai kpobi no.+ 53 Wha vẹ rehọ otọ na re wha rriae, keme mẹ te ginẹ rehọ otọ na kẹ owhai re wha rehọ iẹe reuku.+ 54 Ẹta wha rẹ ma rọ ghale otọ na+ kẹ iviuwou rai kpobi re o jọ ukuoriọ rai. Rọkẹ itu nọ e rrọ buobu, wha re ru ukuoriọ rai rro, rọkẹ itu nọ i bu hu, wha re ru ukuoriọ rai kawo.+ Ukuoriọ ohwo kpobi o rẹ jọ oria nọ ẹta o kie fihọ kẹe. Otọ nọ a ghale kẹ orua ọsẹ ohwo, etẹe o re jo wo ukuoriọ riẹ.+

55 “‘Rekọ otẹrọnọ wha gbe le ahwo nọ a be rria ẹkwotọ na no ho,+ enọ wha kuvẹ inọ a lele owhai rria ẹkwotọ na a rẹ te jọ wọhọ erara nọ i kie fihọ ibiaro rai gbe idhigbo evaọ abotọ rai, a ti kpokpo owhai evaọ ẹkwotọ nọ wha be rria.+ 56 Me ve ti ru owhai oware nọ mẹ gwọlọ ru ai na.’”+

34 Jihova ọ tẹ gbẹ ta kẹ Mosis nọ: 2 “Vuẹ ahwo Izrẹl kpahe eware nana: ‘Okenọ wha tẹ ruọ eva ẹkwotọ Kenan no,+ onana họ ẹkwotọ nọ wha te rọ reuku, ẹkwotọ Kenan na avọ iwhru riẹ.+

3 “‘Uwhru rai evaọ ofẹ obọze ovatha-ọre o te nya akotọ udhude Zin vrẹ evaọ ofẹ Edọm, yọ ofẹ ovatha-ọre orọ uwhru obọze ovatha-ọre na u ti no obọ oka Abade Uwhei na* vrẹ.+ 4 Kẹsena uwhru na u ve je muhọ no abade na vrẹ kpobọ obọze ovatha-ọre nya edhere-ukpehru Akrabim+ vrẹ rite Zin, oka riẹ o vẹ te jọ obọze ovatha-ọre Kedẹsh-bania.+ Kẹsena o vẹ te nyate Heza-ada+ je rite Azmọn. 5 Uwhru na o vẹ jọ Azmọn gẹle kpohọ Uto* Ijipti, oka uwhru na o vẹ te jọ Abade na.*+

6 “‘Uwhru rai evaọ ofẹ ukiediwo-ọre o te jọ Abade Ologbo na,* evaọ akakọ riẹ. Oye o te jọ uwhru ukiediwo-ọre rai.+

7 “‘Uwhru rai evaọ ofẹ ẹkpẹlobọ ovatha-ọre ona: Uwhru rai u re no Abade Ologbo na rite Ugbehru Họr. 8 Uwhru na u ve no Ugbehru Họr rite Libo-hemat,*+ oka uwhru na o vẹ te jọ obọ Zidad.+ 9 Uwhru na u ve ti te Zifrọn, oka riẹ o vẹ te jọ Heza-inan.+ Oye o te jọ uwhru ẹkpẹlobọ ovatha-ọre rai.

10 “‘Uwhru rai evaọ ofẹ ovatha-ọre u re muhọ no Heza-inan vrẹ rite Shifam. 11 Uwhru na u ve no Shifam vrẹ rite Ribla nọ ọ rrọ ofẹ ovatha-ọre Eyin, uwhru na u ve kpobọ otọ nya ukiekpotọ nọ o rrọ ovatha-ọre Abade Kinẹrẹt* vrẹ.+ 12 Uwhru na o rẹ nyate Jọdan, yọ oka riẹ o rẹ jọ Abade Uwhei na.+ Onana o te jọ ẹkwotọ rai+ gbe iwhru riẹ wariẹe họ.’”

13 Fikiere Mosis ọ tẹ vuẹ ahwo Izrẹl nọ: “Onana họ otọ nọ wha te ma ẹta rọ ghale re o jọ ukuoriọ rai,+ nwane wọhọ epanọ Jihova o jie uzi nọ a rẹ kẹ erua izii gbe ubro na. 14 Keme inuwou abọ esẹ erọ orua Rubẹn, inuwou abọ esẹ erọ orua Gad, gbe inuwou abọ esẹ erọ abọvo orua Manasẹ a rehọ ukuoriọ rai no vẹre.+ 15 Erua ivẹ gbe ubro na a rehọ ukuoriọ rai no evaọ ẹkwotọ nọ ọ rrọ ofẹ ovatha-ọre Jọdan nọ Jẹriko ọ rrọ abọdekọ riẹ.”+

16 Jihova ọ tẹ gbẹ ta kẹ Mosis nọ: 17 “Enana họ edẹ ezae nọ e te ghale otọ na kẹ owhai re wha rehọ iẹe reuku: Ẹlieza+ ozerẹ na gbe Joshua+ ọmọzae Nọn. 18 Yọ wha rẹ jọ orua kpobi rehọ ọnọ o wuzou orua ze re a ghale otọ na kẹ owhai rọ reuku.+ 19 Edẹ ezae na ena: evaọ orua Juda,+ Kelẹb+ ọmọzae Jefunẹ; 20 evaọ orua Simiọn,+ Shimuẹl ọmọzae Amaehọd; 21 evaọ orua Bẹnjamin,+ Elaedad ọmọzae Kislọn; 22 evaọ orua Dan,+ ọnọ o wuzou, Bukai ọmọzae Jọglae; 23 erọ emezae Josẹf,+ evaọ orua Manasẹ,+ ọnọ o wuzou, Haniẹl ọmọzae Ẹfọd; 24 evaọ orua Ifremu,+ ọnọ o wuzou, Kẹmuẹl ọmọzae Shiftan; 25 evaọ orua Zẹbulọn,+ ọnọ o wuzou, Ẹlizefan ọmọzae Panak; 26 evaọ orua Isaka,+ ọnọ o wuzou, Pọltiẹl ọmọzae Azan; 27 evaọ orua Asha,+ ọnọ o wuzou, Ahaehọd ọmọzae Shilomae; 28 evaọ orua Naftalae,+ ọnọ o wuzou, Pẹdahẹl ọmọzae Amaehọd.” 29 Enana họ ahwo nọ Jihova ọ ta nọ a te ghale otọ na kẹ ahwo Izrẹl evaọ ẹkwotọ Kenan.+

35 Jihova ọ tẹ gbẹ jẹ ta kẹ Mosis evaọ udhude opraprara Moab nọ o rrọ abọ nana Jọdan+ nọ Jẹriko ọ rrọ abọdekọ riẹ, inọ: 2 “Vuẹ ahwo Izrẹl nọ a rẹ jọ ukuoriọ rai kẹ ahwo Livae ikpewho nọ a rẹ rria,+ yọ a rẹ kẹ ahwo Livae na etọ nọ erao e rẹ jọ re ẹbe nọ e wariẹ ikpewho na họ.+ 3 Ae a te rria ikpewho na, kẹsena ithuru erao rai, ekwakwa rai, gbe erao efa nọ a wo kpobi e vẹ jọ etọ nọ erao e rẹ jọ re ẹbe na. 4 Etọ nọ erao e rẹ jọ re ẹbe nọ e wariẹ ikpewho nọ wha te rọ kẹ ahwo Livae họ na e rẹ rehọ ikiubiti* odu ọvo (1,000) theri no ugbẹhẹ okpẹwho ọvuọvo wariẹ họ. 5 Wha rẹ jọ otafe okpẹwho na ma ikiubiti idu ivẹ (2,000) rri ofẹ ovatha-ọre, ikiubiti idu ivẹ (2,000) rri ofẹ obọze ovatha-ọre, ikiubiti idu ivẹ (2,000) rri ofẹ ukiediwo-ọre, gbe ikiubiti idu ivẹ (2,000) rri ofẹ ẹkpẹlobọ ovatha-ọre, okpẹwho na ọ vẹ jọ udevie. Enana họ etọ nọ erao e rẹ jọ re ẹbe nọ a rẹ kẹ ikpewho rai.

6 “Ikpewho nọ wha rẹ kẹ ahwo Livae e rẹ jọ ikpewho adhẹzọ ezeza,+ enọ ohwo nọ o kpe ohwo ọ rẹ dhẹ kpohọ,+ gbe ikpewho udhuvẹ-gbivẹ efa. 7 Ikpewho nọ wha rẹ kẹ ahwo Livae kpobi e rẹ jọ ikpewho udhuvẹ-gberee, te etọ rai nọ erao e rẹ jọ re ẹbe.+ 8 Evaọ ukuoriọ ahwo Izrẹl na wha rẹ jọ rehọ ikpewho kẹ ae.+ Wha rẹ jọ erọ itu nọ e rrọ buobu rehọ buobu, wha vẹ jọ erọ itu nọ i bu hu rehọ umutho.+ Utu kpobi o rẹ jọ ikpewho riẹ zọhọ ejọ kẹ ahwo Livae na wọhọ epanọ ukuoriọ nọ a kẹ utu na o rro te.”

9 Jihova ọ tẹ gbẹ ta kẹ Mosis nọ: 10 “Ta kẹ ahwo Izrẹl nọ, ‘Wha be te fa Jọdan vrẹ ruọ ẹkwotọ Kenan.+ 11 Wha salọ ikpewho nọ i kiehọ owhai oma kẹ omarai nọ e rẹ jọ ikpewho adhẹzọ rai, nọ ohwo nọ ọ rehọ ethobọ kpe* ohwo* ọ rẹ dhẹ kpohọ.+ 12 Ikpewho nana e rẹ jọ eria adhẹzọ kẹ owhai rono obọ ọnọ ọ be gwọlọ kioja azẹ na,+ re ohwo nọ o kpe ohwo na o gbe whu hu taure a tẹ te rehọ iẹe guẹdhọ evaọ aro ogbotu* na.+ 13 Ẹjiroro ikpewho adhẹzọ ezeza nọ wha rọ ze na oye. 14 Wha re wo ikpewho esa fihọ abọ nana Jọdan,+ je wo ikpewho esa fihọ ẹkwotọ Kenan,+ re e jọ ikpewho adhẹzọ. 15 Ikpewho ezeza nana e rẹ jọ eria adhẹzọ kẹ ahwo Izrẹl, ọrara nọ ọ be rria udevie rai,+ gbe ọnọ ọ rrọ ukane evaọ udevie rai, re ohwo kpobi nọ ọ rehọ ethobọ kpe ohwo* ọ dhẹ kpohọ ae.+

16 “‘Rekọ otẹrọnọ oware ayọno ọ rọ fae o je whu, yọ ojihẹ. A re kpe ojihẹ na hrọ.+ 17 Yọ otẹrọnọ utho nọ o rẹ sai kpe ohwo o ro fi ei o je whu, yọ ojihẹ. A re kpe ojihẹ na hrọ. 18 Hayo otẹrọnọ okwakwa nọ a rehọ ure ru nọ o rẹ sai kpe ohwo ọ rọ fae, o je whu, yọ ojihẹ. A re kpe ojihẹ na hrọ.

19 “‘Ọnọ ọ be gwọlọ kioja azẹ na họ ohwo nọ o re kpe ojihẹ na. Nọ ọ tẹ nyaku ei, ọye o re kpei. 20 Otẹrọnọ ohwo na o whu fikinọ omukpahọ o ro gele iei, hayo ọ rọ oware fi ei fiki eva iyoma,*+ 21 hayo fiki omukpahọ ọ rọ bọwo iẹe o te whu, a re kpe ọnọ ọ bọwo riẹ kpe na hrọ. Yọ ojihẹ. Ọnọ ọ be gwọlọ kioja azẹ na o re kpe ojihẹ na hrọ nọ ọ tẹ nyaku ei.

22 “‘Rekọ o tẹ rrọ oware nọ o rẹro riẹ hẹ, yọ orọnọ fiki omukpahọ o ro gele iei hi, hayo fiki eva iyoma nọ o wo kpahe iẹe* ọ rọ rehọ oware fi ei hi,+ 23 hayo fikinọ ọ ruẹ e riẹ hẹ o ro siobọno utho kie fihọ iẹe, yọ orọnikọ ọ jọ ọwegrẹ riẹ hẹ, hayo ọ be gwọlọ ru ei oware uyoma ha, ohwo na o te whu, 24 ogbotu na o re guẹdhọ ohwo nọ o kpe ohwo na avọ ọnọ ọ gwọlọ kioja azẹ na, yọ eware nana a re rri ro bruoziẹ na.+ 25 Ogbotu na o re siwi ọnọ o kpe ohwo na no obọ ọnọ ọ gwọlọ kioja azẹ na, a ve zihe iei kpohọ okpẹwho adhẹzọ riẹ nọ ọ dhẹ kpohọ na,* yọ ọ rẹ jọ obei hrọ bẹsenọ ozerẹ okpehru nọ a rọ ewhri ọrẹri wholo na o re whu.+

26 “‘Rekọ otẹrọnọ ọnọ o kpe ohwo na ọ nyavrẹ uwhru okpẹwho adhẹzọ riẹ nọ ọ dhẹ kpohọ na, 27 ọnọ ọ gwọlọ kioja azẹ na ọ jẹ ruẹ e riẹ evaọ otafe okpẹwho adhẹzọ riẹ o je kpe ọnọ o kpe ohwo na, ọ reabe azẹ hẹ. 28 Keme ọ rẹ rria okpẹwho adhẹzọ riẹ hrọ bẹsenọ ozerẹ okpehru na o re whu. Rekọ nọ ozerẹ okpehru na o te whu no, ọnọ o kpe ohwo na ọ sai zihe kpohọ otọ riẹ nọ o wo.+ 29 Eware nana họ uzi nọ wha re rri ro bruoziẹ evaọ ige rai kpobi evaọ oria kpobi nọ wha be rria.

30 “‘Ohwo kpobi nọ o kpe ohwo* a re kpei+ otẹrọnọ ahwo a se isẹri kpei*+ keme ojihẹ ọ rrọ, rekọ a re kpe ohwo* ọvo vievie he fiki isẹri omọvo. 31 Wha re mi ẹtanigbo ọvo fihọ uzuazọ* ojihẹ hẹ, ọnọ u fo nọ o re whu, keme a re kpei no hrọ.+ 32 Yọ wha re mi osa ẹtanigbo ọvo fihọ ohwo nọ ọ dhẹ kpohọ okpẹwho adhẹzọ họ, re a kẹe uvẹ nọ o zihe nyae rria ẹkwotọ riẹ yọ ozerẹ okpehru na o ri whu hu.

33 “‘Wha re zue otọ nọ wha be rria na vievie he, keme azẹ o re zue otọ na,+ yọ a rẹ sae rehọ oware ovo voro otọ nọ a kpe azẹ fihọ na ha ajokpaọ azẹ ohwo nọ o kpe ohwo na.+ 34 Wha re zue otọ nọ wha be rria na vievie he, onọ mẹ be rria na; keme, mẹ Jihova, mẹ be rria udevie ahwo Izrẹl.’”+

36 Enọ i wuzou unuwou evaọ uyẹ Giliad, ọmọzae Meka,+ ọrọ orua Manasẹ ọmọzae Josẹf a tẹ nyaze re a ta ẹme kẹ Mosis avọ enọ i wuzou na, enọ i wuzou inuwou ahwo Izrẹl na. 2 A ta nọ: “Jihova o jie uzi kẹ olori mẹ nọ ọ ma ẹta rọ ghale otọ na+ kẹ ahwo Izrẹl re o jọ ukuoriọ rai; yọ Jihova o jie uzi kẹ olori mẹ inọ ọ rehọ ukuoriọ Zẹlofẹhad oniọvo-ọmọzae mai kẹ emetẹ riẹ.+ 3 Otẹrọnọ a jọ orua ofa evaọ Izrẹl wo ezae, a vẹ te rehọ ukuoriọ eyae nana no ukuoriọ esẹ mai a ve ti fi ei ba ukuoriọ orua nọ a jọ kpohọ orọo na,* a ve ti si ei no ukuoriọ mai nọ a ma ẹta rọ ghale kẹ omai na. 4 Whaọ nọ Ukpe Obusino+ nọ ahwo Izrẹl a re ru na o te te, a ve ti fi ukuoriọ eyae nana ba ukuoriọ orua nọ a jọ kpohọ orọo na,* onọ o te whae ze nọ a ti ro si ukuoriọ rai no ukuoriọ orua esẹ mai.”

5 Fikiere Mosis ọ tẹ vuẹ ahwo Izrẹl oware nọ Jihova ọ ta inọ: “Oware nọ ahwo orua emezae Josẹf a be ta na o gba. 6 Enẹ Jihova ọ ta nọ emetẹ Zẹlofẹhad a re ru: ‘A rẹ sai wo ọzae kpobi nọ o je rai. Rekọ ohwo nọ ọ rrọ ohwo unuwou orua ọsẹ rai ọvo a rẹ rehọ. 7 Ukuoriọ ahwo Izrẹl ovuovo u re no orua ruọ orua ha, ahwo Izrẹl a re siobọno ukuoriọ orua esẹ-esẹ rai hi. 8 Yọ ọmọtẹ kpobi nọ o wo ukuoriọ jọ evaọ udevie erua Izrẹl o re wo ọzae nọ ọ rrọ ohwo unuwou orua ọsẹ riẹ,+ re ukuoriọ ahwo Izrẹl o daji orua esẹ-esẹ rai. 9 Ukuoriọ ovuovo u re no orua jọ ruọ orua ofa ha, erua Izrẹl a re siobọno ukuoriọ rai vievie he.’”

10 Emetẹ Zẹlofẹhad a ru epanọ Jihova ọ ta kẹ Mosis na dẹẹ.+ 11 Fikiere Mala, Tẹza, Họgla, Milka, gbe Noa emetẹ Zẹlofẹhad+ a te wo ezae nọ e rrọ emezae inievo ọsẹ rai. 12 A te wo ezae nọ e rrọ ahwo orua Manasẹ ọmọzae Josẹf, re ukuoriọ rai o ruẹse daji orua unuwou ọsẹ rai.

13 Enana họ ijaje gbe izi oziẹobro nọ Jihova ọ rehọ ẹkwoma Mosis kẹ ahwo Izrẹl evaọ udhude opraprara Moab nọ o rrọ abọ nana Jọdan nọ Jẹriko ọ rrọ abọdekọ riẹ.+