Uzou Avọ 33

Erugba Eruẹaruẹ Aizaya

NỌ JESU ọ riẹ no nọ otu Farisi gbe ogba ilele Herọd a be gwọlọ iẹe kpe, tei te ilele riẹ a te siuke kpemu kpohọ Abade Galili. Ogbotu ologbo no Palẹstain kpobi gbe otafe iwhru riẹ ze, a te su bru ei ze etenẹ. O te siwi ibuobu, fikiere ahwo nọ i wo eyao iyoma kpobi a te je tu haro re a robọ tei.

Fikinọ ogbotu na a bu hrọ, Jesu ọ tẹ ta kẹ ilele na nọ a wo okọ nọ ọ te hae ro ẹsikpobi. Nọ ọ tẹ dina lehọ no okpa no, o vẹ whaha ogbotu na nọ a gbe ro tunye hrọ họ. Ọ vẹ sai wuhrẹ ai no okọ na ze hayo rehọ iẹe bi kpohọ oria ofa nọ o rọ edhedhe unueri na re o fiobọhọ kẹ amọfa evaọ obei.

Matiu olele na o muẹrohọ nọ iruẹru Jesu i ru ‘ẹme nọ Aizaya ọruẹaro na ọ ta gba.’ Matiu ọ tẹ fodẹ eruẹaruẹ nọ Jesu o ru gba na:

“Ri, Odibo mẹ nọ mẹ sanọ, oyoyou mẹ, ọnọ ọ were ẹzi mẹ ziezi. Me re ti fi Ẹzi mẹ họ iẹ, o re ti whowho oziẹobro kẹ ahwo egedhọ. Ọ rẹ te họre oma ha, o ti bo via ha. Ohwo ọvo o re yo uru riẹ eva izore he, o re ti wirẹ ukpoko nọ u wiri rẹrẹ hẹ hayo furie oviohọ-ukpẹ nọ ubi kuye iwiri hi, ri te oke nọ ọ rẹ te rehọ ọtẹruo kparobọ; ahwo egedhọ a re ti wo ẹruore eva odẹ riẹ.”

Whaọ, Jesu họ odibo oyoyou nọ Ọghẹnẹ ọ jẹrehọ na. Yọ Jesu o dhesẹ oware nọ ẹdhoguo uzẹme o rọ via, onọ iruemu egagọ erue e be vẹ tu. Fiki uzi Ọghẹnẹ nọ a bi fihọ iruo thọthọ, otu Farisi a re tube fiobọhọ kẹ ohwo nọ ọ be mọ evaọ Ẹdijala ha! Nọ o je ru ẹdhoguo-okiẹrẹe Ọghẹnẹ vẹ, Jesu ọ tẹ kẹ ahwo ufuoma no owha-ogbẹgbẹdẹ iruemu nọ i fo ho, yọ fiki onana, isu egagọ na a tẹ be gwọlọ kpei.

Eme u dhesẹ inọ ‘ọ rẹ te họre oma ha, hayo inọ ohwo ọvo o re yo urru riẹ hẹ evaọ izore’? O te bi siwi ahwo, Jesu ọ rẹ ‘vẹvẹ ai unu nọ a whowho odẹ riẹ via ha.’ Ọ gwọlọ nọ a whowho odẹ riẹ evaọ izore he hayo re a rọ okpakpa wha iyẹrẹ ethọthọ no oria ruọ oria ha.

Ofariẹ, Jesu ọ wha ovuẹ omosasọ riẹ bru ahwo nọ e wọhọ ukpoko nọ u wiri rẹrẹ no, nọ u zulẹ no gbe onọ a bi gb’ithihi họ. A wọhọ oviohọ-ukpẹ nọ u bi kuye iwiri, onọ o kẹle efu no. Jesu o wiri ukpoko nọ u wiri rẹrẹ no ho hayo furie oviohọ-ukpẹ nọ o be mah’aro ho, onọ u bi kuye iwiri. Rekọ avọ uwowou gbe uyoyou, ọ rehọ ona kpare iruori na kpehru. Uzẹme, Jesu họ ọnọ erẹwho na a re fi ẹruore rai họ! Matiu 12:15-21; Mak 3:7-12; Aizaya 42:1-4.

Ẹvẹ Jesu o ro ru uvi ẹdhoguo vẹ, nọ ọ gbẹ rọ họre oma hayo bo evaọ izore he?

▪ Amono a wọhọ ikpoko nọ i wiri rẹrẹ no gbe oviohọ-ukpẹ nọ o kẹle efu no, kọ ẹvẹ Jesu o ro yeri kugbe ai?