Uzou Avọ 66

Eva Ehaa Iwou-Udhu Na

A RIẸ Jesu gaga no eva enwenọ etoke ikpe esa na nọ ọ họ-ame no. Idu ahwo buobu a riẹ iruo igbunu riẹ no, yọ usi kpahe iruẹru riẹ enana i do thabọ no evaọ orẹwho na. Enẹna, nọ ahwo na a kokohọ kẹ Ehaa Uwou-Udhu na evaọ Jerusalẹm, a tẹ be jọ obei gwọlọ iẹe. “Bovẹ ọ rọ?” a gwọlọ riẹ.

Jesu ọ wha avro buobu ze no. Ahwo jọ a be ta nọ: “Emamọ ohwo ọ rọ.” Amọfa a vẹ ta nọ: “Ijo, o bi su ahwo thọ.” Eme ọ ototọ itiena e jariẹ evaọ edẹ emuhọ ehaa na. Ghele na ohwo ọvo ọ wharo ta epanọ ọ rẹ rọ jọ ẹgbede ta ewoma Jesu hu. Oware nọ o soriẹ ze họ ahwo na a be dhozọ uye nọ u re no obọ isu ahwo Ju na ze.

Nọ a ru ehaa na te ubro no, Jesu ọ tẹ nyaze. Ọ tẹ nya ruọ etẹmpol na, oria nọ ẹgba uwuhrẹ riẹ u je gbe ahwo na unu. Nọ Jesu o kpohọ isukulu iwuhrẹ na ha na, u te je gbe ahwo Ju na unu: “Ẹvẹ ohwo ọnana ọ rọ riẹ obe, yọ o ti wuhrẹ obe ẹdẹ ọvo ho?”

Jesu ọ tẹ ta nọ: “Ewuhrẹ mẹ ọ rọ ọrobọ mẹ hẹ, rekọ ọrọ ọnọ o vi omẹ; ohwo nọ ọ guọlọ nọ o re ru orọ eva riẹ ọ rẹ te riẹ epa ewuhrẹ na jọ ọ rọ Ọghẹnẹ hayo orobọ mẹ.” Ewuhrẹ Jesu o be nya lele uzi Ọghẹnẹ kpekpekpe. Fikiere, o rẹ jọ vevẹ inọ ọ be gwọlọ oruaro Ọghẹnẹ, orọnikọ orọ obọ riẹ hẹ. Jesu ọ tẹ nọ nọ: “Kọ Mosis ọ kẹ owhai uzi?” Evaọ edhere ọwhọkuo, ọ tẹ ta nọ: “Dede whai ọvo o koko uzi na ha.”

Kẹsena Jesu ọ tẹ nọ nọ: “Fikieme wha jẹ be guọlọ omẹ kpe?”

Ahwo nọ e rọ ogbotu na, ẹsejọhọ erara nọ e ziọ ehaa na, a riẹ nọ a be gwọlọ iẹe kpe he. A rri rie fihọ oware nọ o rẹ via ha inọ ohwo jọ ọ rẹ gwọlọ kpe owuhrẹ ogbunu otiọye na. Fikiere a tẹ rọwo inọ oware jọ o jọ uzou Jesu thọ nọ o bi ro roro ere. A ta nọ: “Whọ be moruẹ! Ono ọ be guọlọ owhẹ kpe?”

Isu ahwo Ju na a gwọlọ kpe Jesu, dede nọ ogbotu na a riẹ kpahe iẹe he. Okenọ Jesu o siwi ọzae jọ evaọ Ẹdijala ukpe ọvo gbe ubro nọ u kpemu no, isu na a tẹ gwọlọ kpei. Fikiere Jesu ọ tẹ riobọhọ ugheghẹ rai nọ ae nọ: “Otẹrọnọ a rẹ yao ọzae ẹdijala, re a siọ uzi Mosis ba ẹraha, kọ wha ve muofu kẹ omẹ fiki epanọ me ru ohwo oma ga eva [ẹdijala]? Wha bruoziẹ afe he rekọ wha bruoziẹ nọ [u] kiẹrẹe.”

Ahwo nọ e be rria Jerusalẹm, enọ e riẹ kpahe ẹme na, a tẹ ta nọ: “Ọnana họ ohwo nọ a be guọlọ kpe na ha? Ọna ọ be wharo ta ẹme na yọ a ta ẹme ọvo kẹ e he! Kọ ikpahwo na a sae riẹ nọ ọnana họ Kristi na?” Ahwo Jerusalẹm enana a tẹ fodẹ oware nọ o soriẹ nọ a gbẹ rọ rọwo inọ Jesu họ Kristi na ha: “Ma riẹ obo nọ ohwo ọnana o nọze; rekọ nọ Kristi ọ te tha ohwo ọvo ọ te riẹ obo nọ o nọze he.”

Jesu ọ tẹ kuyo nọ: “Wha riẹ omẹ, gbe obonọ me nọze. Rekọ [ẹjiroro obọ] mẹ mẹ rọ ze he; ọ nọ o vi omẹ ze o kiẹrẹe; ọnọ wha riẹ hẹ. Mẹ riẹ riẹ, keme obọ riẹ me nọze, ọ ye o vi omẹ.” Nọ ọ ta enẹ no a tẹ gwọlọ mu ei, ẹsejọhọ re a fiei họ uwou-odi hayo re a kpei. Rekọ a sai mu ei hi keme oke Jesu nọ o ti ro whu u ti te he.

Ghele na, ahwo buobu a te fi ẹrọwọ họ Jesu, wọhọ epanọ u ghine fo. Whaọ, ọ nya ehru ame vrẹ no, o ru ofou serihọ no, o ru abade fọ no, ọ rehọ ebrẹdi gbe imiyei evaọ edhere igbunu ko idu ahwo no, o siwi enọ e be mọ no, o ru emo nya no, o rovie aro enọ i tuaro no, o siwi emoti no, jẹ tubẹ kpare iwhuowhu ze no dede. Fikiere a tẹ nọ nọ: “Kinọ Kristi ọ rẹ te tha, ọ sai ru eka vi enọ ohwo ọnana o ru?”

Nọ otu Farisi a yo ogbotu na nọ a be lẹlẹ ta eme enana, te ae te ilori izerẹ na a te vi iletu re a nya i mu Jesu. Jọn 7:11-32.

▪ Okevẹ Jesu o ro te ehaa na, kọ eme ahwo a be ta kpahe iẹe?

▪ Eme ọ soriẹ ze nọ ahwo jọ a jẹ ta inọ Jesu ọ be moruẹ?

▪ Didi eriwo kpahe Jesu ahwo Jerusalẹm a wo?

▪ Fikieme a je fi ẹrọwọ họ Jesu?