Uzou Avọ 95

Iwuhrẹ Kpahe Orọo-Ofa gbe Uyoyou kẹ Emaha

JESU avọ ilele riẹ a rọ edhere bi kpohọ Jerusalẹm kẹ ehaa Ọnyavrẹ ọ 33 C.E. na. A fa Ethẹ Jọdan vrẹ a tẹ nya orọ ẹkwotọ Pẹrea. Jesu ọ jọ eva Pẹrea evaọ eka jọ nọ e vrẹ, rekọ oke oyena a zizi rie ziọ Judia fikinọ ogbẹnyusu riẹ Lazarọs ọ jẹ mọ. Okenọ ọ jọ Pẹrea, Jesu o te lele otu Farisi na t’ẹme kpahe orọo-ofa, yọ obọnana a tẹ wariẹ rehọ ẹme na ze.

Otu Farisi na a wo iwuhrẹ sa-sa kpahe orọo-ofa. Mosis ọ ta nnọ a rẹ sae se aye otẹrọnọ a jọ oma riẹ ruẹ ‘oware jọ nọ o thọ.’ Ahwo jọ a rehe riẹ nnọ onana u dhesẹ ọfariẹ-ogbe ọvo. Rekọ amọfa a rri ‘oware nọ o thọ’ wọhọ nọ u kugbe iruthọ esese. Fikiere, re a dawo Jesu, otu Farisi na a tẹ nọ nọ: “Ufore ohwo o siobọno aye riẹ fiki oware jọ?” A wo imuẹro nnọ ẹme nọ Jesu ọ ta kpobi u ti fiei họ ẹbẹbẹ kugbe otu Farisi nọ i wo eriwo sa-sa na.

Jesu ọ tẹ rehọ areghẹ kuyo onọ na, ababọ ekie kẹ iroro ohwo-akpọ, rekọ ọ riobọ kpemu kpohọ ọruẹrẹfihotọ ọsosuọ ọrọ orọo. Ọ nọ nọ: “Wha ri se nọ, ọnọ ọ ma rae eva emuhọ ọ mae ọzae gbe aye, ọ tẹ ta nọ, ‘Fiki onana ọzae ọ jẹ se ọsẹ gbe oni riẹ ba o ve [kuomagbe] aye riẹ, ai ivẹ na a vẹ te jọ uwo ọvo’? Fikiere a gbẹrọ ivẹ hẹ rekọ ọvo. Fikiere onọ Ọghẹnẹ o kugbe no, a jọ ohwo ọvo ọ hẹriẹ e he.”

Jesu o dhesẹ nnọ ẹjiroro ọsosuọ Ọghẹnẹ họ imava-orọo a rẹ jọ kugbe, inọ a fa orọo ho. Otu Farisi na a tẹ kuyo nnọ, otẹrọnọ ere o rọ, “kẹvẹ Mosis o je juzi re a si obe obọ-usino, a siobọnoi?”

Jesu ọ tẹ kuyo nọ: “Fiki udu ogaga rai Mosis ọ jẹ rọwo kẹ owhai re wha siobọnọ eyae rai, rekọ nọ emuhọ ze o rọ ere he.” Ẹhẹ, okenọ Ọghẹnẹ ọ rehọ uvi ute orọo mu evaọ ọgbọ Idẹn, ọruẹrẹfihotọ orọo-ofa o jariẹ hẹ.

Jesu ọ tẹ nyaharo ta kẹ otu Farisi na nọ: “Whaọ mẹ ta kẹ owhai, Kohwo kohwo nọ o siobọno aye riẹ o gbẹrọ fiki ẹnwae-obro ho [no Griki ze, por·neiʹa], ọ jẹ rehọ ọfa, o bruẹnwae.” Fikiere o te dhesẹ nnọ por·neiʹa, onọ o rọ ọfariẹ-ogbe ọgaga, ọvo họ ehri nọ Ọghẹnẹ ọ kuvẹ riẹ nọ a rẹ rọ fa-orọo.

Nọ a vuhumu nnọ u fo re orọo o jọ okuomagbe okrẹkri avọ ehri ọnana ọvo nọ a rẹ rọ fa-orọo, oma o tẹ wọ ilele na ta nọ: “Ẹme ọzae avọ aye o tẹrọ ere u gbe fo re a rọwo ho.” Avro ọ riẹ hẹ inọ ohwo nọ ọ be jiroro orọo o re roro gaga kpahe ẹrria ribri ọrọ orọo na!

Jesu ọ tẹ gbẹ ta haro kpahe uzuazọ seba-ẹrọo. Ọ ta nnọ a yẹ emezae jọ ewharọ, enọ e rẹ sae rọo ho keme a sai lele aye wezẹ hẹ. Ahwo-akpọ a ru ahwo jọ fihọ ewharọ, a rehọ evega raha oma owezẹ rai no. Ukuhọ riẹ, ahwo jọ a rehọ obọ nyẹ isiuru orọo onọ a rẹ jọ reawere okuomagbe owezẹ re a ruẹse rehọ oma rai kpobi kẹ iruẹru Uvie obọ odhiwu. Jesu o te ku ei họ nọ: ‘Ọnọ ọ rẹ sae ru uvẹ kẹ seba-ẹrọo, o ru uvẹ na.’

Ahwo a tẹ rehọ emọ rai bru Jesu ze. Rekọ ilele na a tẹ whọku emọ na a te je le ai vrẹ, ababọ avro a jẹ gwọlọ thọ Jesu no ukpokpoma. Rekọ Jesu ọ tẹ ta nọ: “Jọ emaha esese na i bru omẹ ze; wha whaha ae he; keme itieye i wo uvie Ọghẹnẹ. Uzẹme mẹ [ta] kẹ owhai, ọnọ ọ rẹ rehọ uvie Ọghẹnẹ wọhọ ọmaha ọsese he, ọ sae ruẹ e vievie he.”

Ẹvẹ uwuhrẹ nọ Jesu ọ jọ etenẹ wuhrẹ u woma te! Re ohwo o wo Uvie Ọghẹnẹ, ọ rẹ raro kele omarokpotọ gbe uzou-urokpotọ emaha. Rekọ oriruo Jesu u te je dhesẹ epanọ u wuzou te, maero rọ kẹ esẹ gbe ini, re a raha oke kugbe emaha na. Jesu o dhesẹ uyoyou riẹ kẹ emaha na nọ ọ rọ wọ ai họ oma ọ tẹ ghale ai. Matiu 19:1-15; Iziewariẹ 24:1; Luk 16:18; Mak 10:1-16; Luk 18:15-17.

▪ Didi eriwo sa-sa otu Farisi na a wo kpahe orọo-ofa, kọ ẹvẹ a rọ dawo Jesu?

▪ Ẹvẹ Jesu o ro yeri kugbe omodawọ otu Farisi nọ a jẹ dawo iẹe, kọ eme ọ kẹ wọhọ ehri ọvo nọ a rẹ rọ fa-orọo?

▪ Fikieme ilele Jesu a jẹ ta nọ u fo re a rọo ho, kọ didi ohrẹ Jesu ọ kẹ?

▪ Eme Jesu o wuhrẹ ẹkwoma edhere nọ o ro yeri kugbe emaha na?