Uzou Avọ 101

Obọ Bẹtani, Evaọ Uwou ọ Saimọn

OKENỌ Jesu o no Jeriko no, ọ tẹ rọ ova rri Bẹtani. Erẹ na o rehọ unwenọ ẹdẹ na kpobi, keme o rọ onya ẹgadiẹ ugbehru nọ u thabọ te ikilomita 19. Jeriko o rehọ ole imita 250 ro kpotọ vrẹ usi abade, yọ Bẹtani o rehọ ole imita 760 ro kpehru vrẹ usi abade. Whọ tẹ kareghẹhọ, Bẹtani họ ẹwho Lazarọs gbe inievo-emetẹ riẹ. Iwhre ọsese na o rehọ ole ikilomita esa ro thabọ no Jerusalẹm, keme o rọ abọ ovatha-ọre ukiekpotọ Ugbehru Olivi.

Ahwo buobu a te Jerusalẹm no kẹ Ọnyavrẹ na. A kake nya ze re a voro oma rai. Ẹsejọhọ a kaobọ te ori hayo a ru oware jọ nọ o lẹliẹ e rai rọ gbegbe. Fikiere a te lele ọruẹrẹfihotọ nọ a re ro ru oma rai fo re a ruẹsi ru Ọnyavrẹ na ziezi. Nọ ahwo nana a kokohọ etẹmpol na, ibuobu a te muhọ eroro sọ Jesu ọ te nyaze Ọnyavrẹ na.

Avro ologbo ọ rọ Jerusalẹm kpahe Jesu. A jọ oria kpobi riẹ nọ isu egagọ na a be gwọlọ mu ei re a kpei. Evaọ uzẹme, a juzi no dede inọ otẹrọnọ ohwo jọ ọ riẹ oria nọ ọ rọ, a vuẹ ai. Isiasa evaọ emerae jọ nọ e vrẹ na—eva Ehaa Uwou-Udhu na, Ehaa Eromudhe na, gbe okenọ ọ kpare Lazarọs—isu enana a daoma no re a kpei. Fikiere, u te je gbe ahwo na unu nọ, kọ Jesu ọ te wariẹ roma via evaọ ẹgbede? A tẹ jẹ nọ ohwohwo nọ: ‘Ẹvẹ wha rri ẹme na?’

Whaọ Jesu o te Bẹtani no edẹ ezeza taure oke Ọnyavrẹ na o te ti te, onọ u kie fihọ Nisan 14 evaọ ukeledẹ ahwo Ju. Owọwọ Edisoi-Oka Jesu o ro te Bẹtani, onọ o rọ emuhọ Nisan 8. Ọ hẹ sai kperẹ otiọye na kpohọ Bẹtani evaọ Ẹdẹ-Ọmaha ha keme erẹ evaọ Ẹdijala—no owọwọ Edisoi-Oka rite owọwọ Ẹdẹ-Ọmaha—yọ oware aghọ kẹ uzi ahwo Ju. Ẹsejọhọ Jesu o kpohọ uwou Lazarọs, epanọ o ru no vẹre, kọ obei ọ wezẹ evaọ aso Edisoi-Oka na.

Rekọ, ohwo Bẹtani ọfa jọ o te zizie Jesu gbe egbẹnyusu riẹ kẹ emuọriọ eva owọwọ Ẹdẹ-Ọmaha. Ọzae na họ Saimọn, ọnọ ọ jọ ọmoti vẹre, ẹsejọhọ ọnọ Jesu ọ kaki siwi no vẹre. Fiki ẹzẹ iruo egaga nọ o wo, Mata ọ tẹ be gbodibo kẹ erara na. Rekọ, wọhọ epanọ ma riẹ, Meri ọ t’ẹrovi Jesu, oke nana evaọ edhere nọ o wha avro ze.

Meri o te rovie ukoko udẹ, hayo eflaske ọsese jọ, nọ udẹ nọ owawọ riẹ ogbẹdẹ te ikilogram 0.5 o rọ eva, ‘obọdẹ nad.’ Onana o ghare gaga. Evaọ uzẹme, unuigho riẹ u te okọ ẹgbukpe soso! Okenọ Meri o ku udẹ na họ uzou gbe awọ Jesu ọ jẹ rehọ eto riẹ ririe ei, uwou na o tẹ vọ avọ ore-awere udẹ na.

Eva e tẹ dha ilele na a tẹ nọ nọ: “Ẹraha nana ọrọ eme?” Judas Iskariọt ọ tẹ ta nọ: “Fikieme a gbẹ zẹ udẹ onana epaọ kpegbisoi re a rehọ igho na kẹ iyogbere he?” Orọnikọ Judas o ghine wo ọdawẹ kẹ iyogbere na ha, keme ọ jẹ hai tho igho nọ ilele na a fihọ obei.

Jesu ọ tẹ thọ Meri. O j’uzi nọ: “Wha vu ei wa; eme wha jẹ be lahiẹe? O ru iruo iwoma kẹ omẹ. Keme whai avọ iyogbere wha rẹ jọ ẹsekpobi, ẹsenọ oruọ owhai, wha re ru uwoma kẹ ae; rekọ mẹ avọ owhai kẹse kẹse he. O ru onọ ọ sai ruẹ; o wholo oma mẹ vẹrino fiki ukio. Uzẹme mẹ ta kẹ owhai, koria koria nọ a jẹ te ta usiuwoma na eva akpọ na ososo, onọ aye ọnana o ru na a rẹ tae re a rorie.”

Jesu ọ rọ Bẹtani vrẹ euwa 24 no, yọ ẹme ẹnyaze riẹ o vaha no. Fikiere, ahwo buobu a tẹ ze uwou Saimọn re a ruẹ Jesu, rekọ a nyaze te ruẹ Lazarọs re, ọnọ ọ jọ etẹe re. Fikiere ilori izerẹ na a tẹ gbẹguae orọnikọ re a kpe Jesu ọvo ho rekọ te Lazarọs. Oware nọ o so onana ze họ ahwo buobu a bi fi ẹrọwọ họ Jesu nọ a be ruẹ ọnọ ọ kpare no iwhuowhu ze na! Uzẹme, ẹvẹ isu egagọ enana e geva te! Jọn 11:55–12:11; Matiu 26:6-13; Mak 14:3-9; Iruẹru 1:12.

▪ Didi eme a be ta eva etẹmpol evaọ Jerusalẹm, kọ fikieme?

▪ Eme ọ soriẹ nọ Jesu o ro te Bẹtani evaọ Edisoi-Oka viukpọ Ẹdẹ-Ọmaha?

▪ Okenọ Jesu o te Bẹtani, diẹse ọ jọ evaọ Ẹdijala na?

▪ Didi iruẹru Meri o wha avro ze, kọ ẹvẹ Jesu ọ rọ thọe?

▪ Eme o dhesẹ emuemu ilori izerẹ na via?