Uzou Avọ 127

A Ki Rie Edisoi-Oka—Uki Ufofe Evaọ Ẹdoka

OWỌWỌ Edisoi-Oka u bi te no, yọ Ẹdijala ọ Nisan 15 o bi ti muhọ nọ ọre o te kiediwi no. Ugboma uwhowhu Jesu o rọ yọlọ eva ehru urre na, rekọ igbulegbu ivẹ nọ e rọ abotọ riẹ na a gbẹ rọ uzuazọ. A re se uvo Edisoi-Oka na Ọruẹrẹkpahe keme oke onana ahwo na a re there emu je ruiruo egaga efa kpobi nọ e sae te hẹrẹ ekuhọ Ẹdijala na ha.

Ẹdijala nọ o bi ti muhọ na orọnikọ Ẹdijala gheghe he (ẹdẹ avọ ihrẹ ẹkpoka na) rekọ o rọ Ẹdijala akuava, hayo “ologbo.” A se rie enẹ keme Nisan 15, onọ o rọ ẹdẹ ọsosuọ evaọ Ehaa Ebrẹdi nọ O Kare Ẹvi nọ a re ru edihrẹ na (onọ o rẹ jọ Ẹdijala ẹsikpobi, makọ ẹdẹ oka nọ u kiefihọ na), o kie fihọ ẹdẹ ọvo na kugbe Ẹdijala anwẹdẹ na.

Wọhọ epanọ Uzi Ọghẹnẹ o ta, a rẹ nyasiọ iri ba ehru ure hẹrioke he. Fikiere ahwo Ju a tẹ yare Pailet re a ru uwhu ahwo nọ a kare na kpata ẹkwoma awọ rai nọ a re wiri. Fikiere isoja na a te wiri awọ igbulegbu ivẹ na. Rekọ nọ o wọhọ nọ Jesu o whu no na, a gbe du wiri awọ riẹ hẹ. Onana u te ru ikereakere na gba: “A re ti wirẹ onwa riẹ ovo ho.”

Rekọ, re a riẹ sọ Jesu o ghine whu no, osoja jọ ọ tẹ tọlọ ozuẹ o te duwu abefẹ riẹ. Ozuẹ na o te duwu kpohọ udu riẹ, te azẹ gbe ame i te hwẹ ze. Jọn ukọ na, ọnọ ọ rọ ẹro rue riẹ, ọ tẹ niyẹrẹ nnọ onana u te ru ikereakere ọfa gba: “A re ti ri yei, ọnọ a duwu na.”

Josẹf ohwo okpẹwho Arimatia ọ jọ etẹe re, ohwo ologbo ọrọ Sanhẹdrin na. Ọ se nọ ọ rẹ whobọhọ ẹdhoguo nọ okọto ukpehru na o gu kpahe Jesu. Josẹf yọ olele Jesu, dede nọ ozọ u bi mu ei re o dhesẹ oma riẹ via wọhọ olele riẹ jọ. Rekọ enẹna o te wo udu ọ tẹ nya bru Pailet ọ tẹ yare ori Jesu. Pailet o te se olori isoja nọ o wuzou ikpakpe na, yọ nọ olori na o kuenu nọ Jesu o ghine whu no, Pailet o te siobọno ori na.

Josẹf ọ tẹ rehọ ori na ọ tẹ rehọ ohọ olọlọhọ ofuafo rọ variẹe evaọ omaruẹrẹhọ kẹ ukio. Nikodimọs, ohwo Sanhẹdrin ọfa o fiobọhọ kẹe. Fiki ozodhẹ ekufiẹ ọkwa riẹ, Nikodimọs ọ re sai dhesẹ ẹrọwọ riẹ fihọ Jesu via ha. Ọ tẹ rehọ ololo mur gbe udẹ oghaghae nọ o ghare te ẹsiso ahwo Rom ze. A tẹ rehọ ehọ efuafo avọ idẹ enana variẹ oma Jesu, oghẹrẹ nọ ahwo Ju a rẹ ruẹrẹ ori họ re a te ki ei na.

A tẹ wọ ori na fihọ uki okpokpọ Josẹf nọ a tọ fihọ utho nọ o rọ ọgbọ nọ ọ kẹle etẹe. Uwhremu na, a te ghelie utho ulogbo fihọ unu uki na. Re a sai ki ori na taure Ẹdijala o te ti te, ẹruẹrẹ ori na o jọ kpatakpata. Fikiere, Meri Magdalini gbe Meri oni Jemis Ọsese na, ẹsejọhọ ọnọ o bi fiobọhọ evaọ aruẹrẹ na, a te siawọ kpo re a ruẹrẹ idẹ gbe ewhri isialẹ efa họ. Nọ Ẹdijala na ọ vrẹ no, a m’oma nnọ a re ti ku ewhri nana họ oma Jesu re ọ kake seba egbo.

Okiokiọ riẹ, nọ ọ rọ Ẹdẹ-Ọmaha (Ẹdijala na), ilori izerẹ gbe otu Farisi na a tẹ nya bru Pailet a tẹ ta nọ: “[Ọga], ma roro epanọ ohwo ẹghẹ na, nọ ọ jọ akpọ, ọ ta nọ, ‘Edẹ esa egba mẹ rẹ kparoma.’ Fikiere ta re a tehe uki na di gaga bọwo edẹ esa, ogbẹrọ ere he, otiẹsejọ ilele riẹ a vẹ nyaze ti tho i vrẹ, a vẹ te ta kẹ ahwo nọ, ọ kparoma no iwhuowhu no: ẹghẹ uwhremu na o ve ti yoma vi ọ rọ ọsosuọ.”

Pailet ọ tẹ kuyo nọ: “Wha wo iroroke: wha nyawa wha tehe iẹ di gaga epanọ ogaga rai u tei.” Fikiere a tẹ nya e tehe itho na di a te fi isoja Rom họ etẹe wọhọ iroroke.

Irioke ohiohiẹ Ẹdoka Meri Magdalini avọ Meri oni Jemis, kugbe Salomi, Joana, gbe eyae efa, a tẹ rehọ idẹ ziọ uki na ti ku fihọ oma Jesu. Nọ a gbẹ rọ edhere a tẹ be ta kẹ ohwohwo nọ: “Ono o re ti ghelie utho na no unu uki kẹ omai?” Rekọ nọ a te etẹe, a tẹ ruẹ nnọ otọ u nuhu yọ enjẹle Jihova o ghelie utho na no. Iroroke na a kpo no, yọ uki na o rọ ufofe! Matiu 27:57–66; 28:2; Mak 15:42–16:4; Luk 23:50–24:3, 10; Jọn 19:14, Jọn 19:31–20:1; Jọn 19:12:42; Iruo-Izerẹ 23:5-7; Iziewariẹ 21:22, 23; Olezi 34:20; Zekaraya 12:10.

▪ Fikieme a je se Edisoi-Oka Ọruẹrẹkpahe, kọ eme họ Ẹdijala “ologbo” na?

▪ Ikereakere vẹ i rugba kpahe ugboma Jesu?

▪ Eme Josẹf avọ Nikodimọs a ru kpahe ukio Jesu, kọ didi usu a wo kugbe Jesu?

▪ Eme izerẹ na a yare Pailet, kọ didi uyo ọ kẹ?

▪ Eme ọ via evaọ irioke ohiohiẹ Ẹdoka?