Wuhrẹ Mi Jesu Evaọ Oghẹrẹ nọ O ro Fi Edawọ Kparobọ

Nọ Jọn ọ nwane họ Jesu ame no, ẹzi Ọghẹnẹ o te su Jesu kpobọ udhude Judia. Eware buobu e riẹ nọ Jesu ọ gwọlọ roro kpahe. Evaọ etoke ame-ọhọ riẹ, ‘odhiwu o rovie.’ (Matiu 3:16) Onana u ru nọ ọ rọ kareghẹhọ eware nọ o wuhrẹ gbe enọ o ru evaọ obọ odhiwu. Evaọ uzẹme, eware buobu e riẹ nọ o re roro kpahe!

Jesu ọ jọ obọ udhude na edẹ 40 gbe aso 40. Etoke nana kpobi ọ re oware ovo ho. Nọ ohọo u kpe Jesu gaga no, Ẹdhọ ọ tẹ nyaze te dawo iẹe, ọ ta kẹe nọ: “Otẹrọnọ whẹ ọmọ Ọghẹnẹ, ta kẹ itho nana re i zihe ruọ ebrẹdi.” (Matiu 4:3) Rekọ fikinọ Jesu ọ riẹ nọ o thọ re ọ rehọ ogaga nọ Ọghẹnẹ ọ kẹ riẹ ru iruo-igbunu kẹ omobọ riẹ, ọ tẹ se.

Ẹdhọ ọ jọ etẹe serihọ họ. Ọ rehọ edhere ọfa dawo iẹe. Ọ ta kẹ Jesu nọ ọ la no obọ ehru etẹmpol na fihọ otọ inọ Ọghẹnẹ o ti siwi ei. Rekọ Jesu ọ rọwo nọ o re dhesẹ oma evaọ oghẹrẹ utiọye he. Ọ ta ẹme no Ikereakere na ze ro dhesẹ nọ o thọ re a fi Ọghẹnẹ họ odawọ evaọ edhere otiọna.

Kẹsena evaọ odawọ avesa, Ẹdhọ ọ tẹ rọ edhere jọ dhesẹ “ivie akpọ na kpobi gbe oruaro rai” kẹ Jesu jẹ ta kẹe nọ: “Mẹ te kẹ owhẹ enana kpobi nọ who te kigwẹ gọ omẹ.” Jesu ọ tẹ wariẹ se kẹe nọ: “Nyavrẹ, Setan!” (Matiu 4:8-10) Jesu o kie kẹ odawọ Ẹdhọ na ha keme ọ riẹ nọ Jihova ọvo họ ọnọ ma rẹ gọ. Ọ gba riẹ mu nọ o re kru ẹgbakiete riẹ.

Edawọ nana nọ i te Jesu na gbe oghẹrẹ nọ o ro fi ai kparobọ e rẹ sai wuhrẹ omai oware jọ. Iku nana yọ oware nọ o ginẹ via dẹẹ, onọ u dhesẹ nọ Ẹdhọ ọ ginẹ rrọ dede nọ ma sae ruẹ e riẹ hẹ. Orọnikọ emuemu jọ nọ ọ rrọ ohwo eva họ Ẹdhọ họ wọhọ epanọ ahwo jọ a rẹ ta. Oware ofa nọ ma wuhrẹ no onana ze họ, Ẹdhọ họ ọnọ o wo isuẹsu akpọ na, yọ ọye ọ be kpọ ae. O gbẹ rrọ ere he, ọ hae sae rehọ ae dawo Jesu hu.

U te no ere no, Ẹdhọ ọ ta nọ ọ rẹ kẹ Jesu ivie akpọ na kpobi nọ o te kigwẹ gọe ẹsiẹvo. Ẹdhọ ọ rẹ sae rọ edhere ọvona dawo omai re, ọ sai ru omai wo uvẹ nọ ma re ro fe, wo ogaga, hayo ọkwa. O rrọ oware areghẹ re ma sẹro ẹgbakiete mai ghelọ odawọ kpobi nọ u re te omai, wọhọ epanọ Jesu o ru. Rekọ kareghẹhọ nọ Ẹdhọ ọ nyasiọ Jesu ba “bẹsenọ uvẹ ofa u re rovie fihọ.” (Luk 4:13) Ọ rẹ sai ru omai epọvo na re, fikiere ma re fi oma họ otọ oke ovo ho.