Ọtadhesẹ Iruiruo nọ I Kpobọ Udhu

U ri kri hi nọ Jesu ọ rọ vuẹ ahwo nọ o je wuhrẹ evaọ Pẹria inọ “ibuobu nọ e rrọ erọ ọsosuọ e te jọ erọ urere, erọ urere e vẹ te jọ erọ ọsosuọ.” (Matiu 19:30) Ọ rehọ ọtadhesẹ ahwo nọ a kpohọ iruo evaọ obọ udhu ro ru ẹme na vẹ, inọ:

“Uvie odhiwu o wọhọ ohwo nọ o wo udhu nọ ọ kpama evaọ irioke nyae gwọlọ enọ i re ru iruo evaọ udhu riẹ. Nọ ọ rọwo kẹ iruiruo na no inọ ọ te hwa ae dinariọs ọvo evaọ okpẹdẹ, o te vi ai kpobọ udhu riẹ. Nọ ọ wariẹ nya evaọ auwa avọ esa, ọ tẹ ruẹ amọfa nọ a dikihẹ oria eki nọ a rehọ iruo ho; ọ tẹ ta kẹ ae nọ, ‘Wha kpobọ udhu mẹ re, mẹ te kẹ owhai oware kpobi nọ u fo.’ Fikiere a tẹ nya. Ọ tẹ wariẹ nya evaọ auwa avọ ezeza gbe auwa avọ izii, o te ru epọvo na. Ukuhọ riẹ, evaọ oware wọhọ auwa avọ ikpegbọvo, ọ tẹ nya jẹ ruẹ amọfa nọ i dikihẹ, ọ tẹ ta kẹ ae nọ, ‘Fikieme wha ro dikihẹ etenẹ anwọ ohiohiẹ ababọ iruo?’ A tẹ ta nọ, ‘Fikinọ ohwo ọvo ọ rehọ omai iruo ho.’ Ọ tẹ ta kẹ ae nọ, ‘Wha kpobọ udhu mẹ re.’”—Matiu 20:1-7.

U muẹro nọ ahwo nọ Jesu o je wuhrẹ na a riẹ nọ Jihova họ ọnọ ọ be ta kpahe okenọ ọ fodẹ “Uvie odhiwu” gbe “ohwo nọ o wo udhu” na. Ikereakere na i dhesẹ nọ Jihova họ ọnọ o wo udhu na, yọ udhu na u dikihẹ kẹ orẹwho Izrẹl. (Olezi 80:8, 9; Aizaya 5:3, 4) A rehọ enọ e jọ otọ Uzi Mosis na dhesẹ iruiruo nọ i kpohọ ọgbọ evaene nyai ru iruo. Rekọ, orọnọ oware nọ o via vrẹ no Jesu ọ be rọ ọtadhesẹ nana wuhrẹ na ha, oware nọ o be via evaọ oke riẹ na ọ be ta kpahe na.

Nọ ahwo a tẹ ruẹ isu egagọ na, wọhọ otu Farisi nọ e jẹ gwọlọ rọ ẹme orọo-ofa dawo Jesu kẹle na, a re roro nọ a be daoma gaga evaọ egagọ Ọghẹnẹ. Isu egagọ na a wọhọ iruiruo nọ i ru iruo okikpo nọ a ta kẹ nọ a te hwa ae dinariọs ọvo evaọ okpẹdẹ.

Izerẹ na gbe isu egagọ efa a rri ahwo Ju edekọ na wọhọ enọ e be daoma tere he evaọ egagọ Ọghẹnẹ, koyehọ enọ i ru iruo ubroke evaọ udhu na. Evaọ ọtadhesẹ Jesu na, ahwo nana họ enọ a rehọ iruo evaọ “auwa avọ esa” (koyehọ ighọjọ izii ohiohiẹ) hayo nọ oke o vrẹ ere no evaọ auwa avọ ezeza, auwa avọ izii, gbe auwa avọ ikpegbọvo (koyehọ ighọjọ isoi owọwọ).

A rri ezae gbe eyae nọ i bi lele Jesu na wọhọ “ahwo nọ a duwu iyei.” (Jọn 7:49) Ahwo nana iruo iyei-ikpe a ru n’otọ ze hayo iruo itiena efa. Kẹsena evaọ ubrobọ ekuhọ ukpe 29 C.E., “ohwo nọ o wo udhu” na o te vi Jesu nyai se iruori nana re a nyaze ti ru iruo evaọ udhu Ọghẹnẹ, koyehọ re a zihe ruọ ilele Jesu. Ahwo nana họ “erọ urere” nọ Jesu ọ ta kpahe na nọ a zizie kẹ iruo evaọ ọgbọ evaene evaọ auwa avọ ikpegbọvo na.

Nọ Jesu o je ku ọtadhesẹ na họ, ọ tẹ fodẹ oware nọ o via nọ a ku iruo okpẹdoke na họ no, inọ: “Nọ owọwọ u te, ọnọ o wo udhu na ọ tẹ ta kẹ ọnọ ọ be rẹrote eyero riẹ nọ, ‘Se iruiruo na ze re whọ hwa ae osa rai, rehọ erọ urere na muhọ whọ vẹ rehọ erọ ọsosuọ na kuhọ.’ Nọ ahwo nọ a rehọ iruo evaọ auwa avọ ikpegbọvo na a nyaze, a tẹ kẹ ae omomọvo dinariọs ọvo. Fikiere nọ erọ ọsosuọ na a nyaze, a te roro nọ a te kẹ ae bu viere, rekọ dinariọs ọvo a hwa kẹ ae omomọvo re. Nọ a kẹ ae ugho na, a te muhọ ẹgo kpahe ọnọ o wo udhu na a tẹ ta nọ, ‘Auwa ọvo ahwo urere na a ru iruo; ghele na unuigho ovona whọ hwa kẹ ae gbe omai nọ i ru iruo okikpo evaọ uvo ogaga na!’ Rekọ ọ tẹ kpahe kẹ omọvo rai jọ nọ, ‘Oko, me ru owhẹ thọ họ. Kọ ogbẹrọnọ dinariọs ọvo whọ rọwo kugbe omẹ? Rehọ osa ra re who kpo. Mẹ gwọlọ kẹ ahwo urere na unu ovona nọ mẹ kẹ owhẹ na. Kọ me gbe wo udu nọ mẹ rẹ rọ rehọ eware obọmẹ ru onọ u je omẹ? Manikọ ubiẹro ra o be re ihri fiki ewoma mẹ?’ Enẹ erọ urere e te rọ jọ erọ ọsosuọ, erọ ọsosuọ e vẹ te jọ erọ urere.”—Matiu 20:8-16.

Ẹsejọhọ abọ urere ọtadhesẹ Jesu na o je gbe ilele na unu. Ẹvẹ isu egagọ ahwo Ju nọ a rri omarai fihọ “erọ ọsosuọ” na a ti ro zihe ruọ “erọ urere”? Kọ ẹvẹ ilele Jesu a ti ro zihe ruọ “erọ ọsosuọ”?

Ilele Jesu nọ otu Farisi gbe amọfa a bi rri wọhọ “erọ urere” na, ae a te jọ “erọ ọsosuọ” nọ a te hwosa okpẹdoke kẹ na. Nọ Jesu o te whu no, Ọghẹnẹ ọ te siọ Jerusalẹm, ọ vẹ te salọ orẹwho okpokpọ, “Izrẹl Ọghẹnẹ.” (Ahwo Galesha 6:16; Matiu 23:38) Ahwo nana họ enọ Jọn Ọhọahwo-Ame na ọ jẹ ta kpahe nọ ọ fodẹ enọ a te rọ ẹzi ọfuafo họ-ame. Enọ e jọ “erọ urere” vẹre na họ enọ e te jọ erọ ọsosuọ nọ a te rọ ẹzi ọfuafo họ-ame na, yọ a ti je wo uvẹ-ọghọ nọ a ti ro se isẹri kẹ Jesu evaọ “oria nọ o mai thabọ evaọ otọakpọ na.” (Iruẹru Ikọ 1:5, 8; Matiu 3:11) Nọ ilele Jesu a te wo otoriẹ enwene nọ Jesu ọ be ta nọ o te romavia na, ẹsejọhọ a ti vuhumu nọ isu egagọ nọ i zihe ruọ “erọ urere” na a ti mukpahe ae gaga.