Ẹme-Ofiba

Whẹ ọsẹ hayo oni, o rrọ owhẹ oja re who fiobọhọ kẹ emọ eghaghae ra you Jihova, re a jẹ rọ omarai mudhe kẹe. Eme whọ rẹ sai ru ro fiobọhọ kẹ ae te kẹ ame-ọhọ? Eme o re dhesẹ nọ a ruẹrẹ oma kpahe no kẹ oware nana nọ u wuzou na?

Jesu ọ ta kẹ ilele riẹ nọ: “Wha ru ahwo zihe ruọ ilele evaọ udevie ahwo erẹwho na kpobi, wha họ ae ame.” (Mat. 28:19) Wọhọ epanọ etenẹ o dhesẹ na, oware ọsosuọ nọ u re ru ohwo te kẹ ame-ọhọ họ, ọ rẹ jọ olele, koyehọ o re wo otoriẹ iwuhrẹ Kristi jẹ rọwo ai, o ve je bi ru lele ai ẹsikpobi. Onana yọ oware nọ ahwo nọ a gbẹ dina maha dede a rẹ sai ru.

Fi emamọ oriruo hotọ kẹ emọ ra je fi iwuhrẹ Jihova họ udu rai. (Izie. 6:6-9) Onana o gwọlọ nọ whọ rẹ rehọ obe na, Reawere Uzuazọ Bẹdẹ Bẹdẹ! ro wuhrẹ ai igogo iwuhrẹ ọsosuọ Ebaibol gbe epanọ a rẹ rọ rehọ ehri-izi Ebaibol jiroro je yeri uzuazọ. Wuhrẹ emọ ra epanọ a sae rọ rehọ eme obọrai ta eware nọ a rọwo. (1 Pita 3:15) Eriariẹ gbe uduotahawọ nọ a bi wo mi owhẹ gbe onọ a bi wo evaọ uwuhrẹ omobọ rai, egagọ uviuwou, iwuhrẹ ukoko, gbe onọ a bi wo mi inievo nọ i kruga evaọ ukoko na, u ti fiobọhọ kẹ ai te kẹ ame-ọhọ je wo ẹnyaharo nọ a tẹ họ-ame no. Hae ta kẹ ae kpahe itee nọ a rẹ sai le evaọ ukoko na.

Itẹ 20:11 o ta nọ: “Makọ ọmaha dede, a rẹ rọ eware nọ o bi ru rọ riẹe, sọ uruemu riẹ o rrọ ziezi je kiehọ.” Uruemu hayo eware jọ vẹ i re dhesẹ nọ ọmọ, ọmọzae hayo ọmọtẹ, o zihe ruọ olele Jesu no jẹ ruẹrẹ oma kpahe kẹ ame-ọhọ no?

Ọmọ nọ ọ be daoma re o te kẹ ame-ọhọ o re yoẹme kẹ ọsẹgboni riẹ. (Iruẹru 5:29; Kọl. 3:20) Ebaibol na ọ ta kpahe Jesu evaọ okenọ ọ jọ ikpe 12 inọ: “Ọ ruabọhọ jẹ romakpotọ kẹ [ọsẹgboni riẹ].” (Luk 2:51) Orọnikọ who re rẹro nọ ọmọ ra o re ru eware kpobi gbagba ha. Rekọ ọmọ nọ ọ gwọlọ họ-ame ọ rẹ daoma lele oriruo Jesu, jẹ jọ ohwo nọ a riẹ inọ ọ be romakpotọ kẹ ọsẹgboni riẹ.

O re je dhesẹ via nọ o rẹ were iẹe re o wuhrẹ ẹme Ọghẹnẹ. (Luk 2:46) Kọ o rẹ were ọmọ ra re o kpohọ ewuhrẹ, je wobọ evaọ ewuhrẹ na? (Ol. 122:1) Kọ isase Ebaibol ikẹse kẹse gbe uwuhrẹ omobọ ohwo e rẹ were iẹe?—Mat. 4:4.

Ọmọ nọ ọ be daoma re o te kẹ ame-ọhọ ọ rẹ daoma fi iruo Uvie na họ oware ọsosuọ. (Mat. 6:33) O re vuhumu nọ o wo owha-iruo nọ ọ rẹ rọ ta oware nọ ọ rọwo kẹ amọfa. O re wobọ evaọ abọ sa-sa iruo usi uwoma ota na, yọ oma o rẹ vo ẹe he re ọ ta kẹ iticha gbe ibe emọ-isukulu riẹ inọ omọvo Isẹri Jihova ọ rrọ. O re se ẹme nọ a kẹ riẹ nọ o ru evaọ Ewuhrẹ Uzuazọ gbe Usi Uwoma Ota na gboja ziezi.

Ọ rẹ jẹ daoma jọ fuafo evaọ uruemu riẹ ẹsikpobi ẹkwoma ekpehre usu nọ ọ rẹ whaha. (Itẹ 13:20; 1 Kọr. 15:33) Onana u re dhesẹ oma via evaọ oghẹrẹ ile nọ ọ rẹ gaviezọ kẹ hayo kporo, ifimu gbe ighe etẹlẹvisiọno nọ o re riwi, oghẹrẹ igemu ividio nọ ọ rẹ fa, gbe oghẹrẹ nọ ọ rẹ rọ Itanẹte ruiruo.

Emọ buobu a jẹ ewuhrẹ gbe uduotahawọ esẹgbini rai rehọ evaọ oke uzoge rai, a te ru uzẹme na họ orai, je te kẹ ame-ọhọ. Ajọ Jihova ọ ghale omodawọ ra nọ who bi fiobọhọ kẹ emọ ra re a te kẹ ame-ọhọ je wo emamọ usu kugbe Jihova na.

Uvẹ-ọghọ o rrọ nọ whọ rọ rrọ owhowho-uvie nọ ọ re họ-ame he evaọ ukoko na. Ma bi jiri owhẹ kẹ ẹnyaharo nọ who wo no na. Whọ riẹ Ọghẹnẹ no ẹkwoma ewuhrẹ Ẹme riẹ, who te je fi ẹrọwọ họ eyaa riẹ.—Jọn 17:3; Hib. 11:6.

Taure who te ti mu Ebaibol na họ ewuhrẹ kugbe Isẹri Jihova, o sae jọ nọ whọ jọ egagọ jọ vẹre hayo whọ jọ ọvuọvo ho. O sae jọ nọ who je ru eware jọ nọ e rọwokugbe izi Ebaibol ho. Rekọ enẹna who kurẹriẹ no fiki ẹrọwọ ra, onọ u dhesẹ nọ eware iyoma nọ who ru evaọ okenọ u kpemu e da owhẹ gaga, who te siobọno ai jẹ gbaemu nọ who re ru oware nọ u woma evaọ aro Ọghẹnẹ.—Iruẹru 3:19.

Evaọ abọdekọ riẹ, ẹsejọhọ “no oke ọmọfofa ze” whọ rọ riẹ ikereakere efuafo na. Fikiere onana o thọ owhẹ nọ who gbe ro dhomahọ ikpehre eware hayo kie ruọ uzioraha ulogbo ho. (2 Tim. 3:15) Who wuhrẹ epanọ whọ rẹ rọ whaha ahwo gbe eware efa, enọ e rẹ gwọlọ ru owhẹ ru oware uyoma evaọ aro Jihova. Who dhesẹ ẹrọwọ no ẹkwoma egagọ uzẹme nọ who kruga gbe eware nọ whọ rọwo nọ whọ be ta kẹ amọfa. A wuhrẹ owhẹ epanọ a rẹ ta usi uwoma no. Enẹna whọ jiroro no nọ whọ rẹ gọ Jihova re whọ jọ owhowho-uvie nọ ọ re họ-ame he.

Epanọ o rrọ kpobi kẹhẹ, te whọ riẹ Jihova nọ whọ rro te ohwo no hayo a wuhrẹ owhẹ idhere Jihova no emaha ze, ẹsejọhọ enẹna who bi roro kpahe epanọ who re ro ru eware ivẹ efa jọ nọ i ti ru usu ra kugbe Jihova ga viere, eye họ omauromudhe gbe ame-ọhọ. Whọ rẹ roma mudhe kẹ Jihova ẹkwoma eyaa nọ whọ rẹ ya kẹe evaọ olẹ inọ ọye ọvo whọ rẹ gọ bẹdẹ bẹdẹ. (Mat. 16:24) Kẹsena whọ vẹ rọ ame-ọhọ dhesẹ omauromudhe yena via. (Mat. 28:19, 20) Whọ tẹ roma mudhe jẹ họ-ame no, yọ who zihe ruọ ọgbodibo Jihova Ọghẹnẹ nọ a ro mu no. Uvẹ-ọghọ riẹ o rro kẹhẹ!

Rekọ wọhọ epanọ whọ jọ Ebaibol na wuhrẹ no na, edawọ sa-sa e sai te owhẹ. Kareghẹhọ inọ, nọ Jesu ọ nwane họ-ame no, “ẹzi na ọ tẹ kpọ Jesu kpobọ udhude re Ẹdhọ ọ dawo iẹe.” (Mat. 4:1) Nọ whọ tẹ họ-ame wọhọ olele Kristi no, whọ rẹ sai rẹro edawọ efa. (Jọn 15:20) E te rọ oghẹrẹ sa-sa nyaze. Ahwo uviuwou ra a sae wọso owhẹ. (Mat. 10:36) Ibe emọ-isukulu ra, ahwo nọ wha gbe bi ruiruo gbe egbẹnyusu ra vẹre a sai se owhẹ ẹkoko. Evaọ ẹsikpobi, hae kareghẹhọ eme Jesu nọ e rrọ obe Mak 10:29, 30: “Uzẹme mẹ be ta kẹ owhai, ohwo ọvo nọ ọ nyasiọ uwou hayo inievo-emezae hayo inievo-emetẹ hayo oni hayo ọsẹ hayo emọ hayo etọ ba fiki mẹ gbe fiki usi uwoma na nọ o ti wo ai isia udhusoi (100) evaọ oke nana ha ọ rrọ họ—iwou, inievo-emezae, inievo-emetẹ, ini, emọ, gbe etọ, avọ ikpokpoma—yọ evaọ uyero-akpọ nọ o be tha na o ti wo uzuazọ ebẹdẹ bẹdẹ.” Fikiere, gbẹ hae talamu Jihova ẹsikpobi je yeri uzuazọ ra lele izi ikiẹrẹe riẹ.

Nọ whọ tẹ gwọlọ họ-ame, vuẹ ọnọ o re koko iruẹru ugboma ekpako na họ. Ekpako na a te rehọ enọ nọ i lele ovuẹ nana kiẹ owhẹ riwi sọ who te kẹ ame-ọhọ. Bẹsenọ a te kiẹ owhẹ riwi, whẹ ọvo ọ sae rehọ enọ nana ru uwuhrẹ omobọ ra.

Nọ whọ be ruẹrẹ oma kpahe na, nabe romatotọ se je roro kpahe eria Ikereakere nọ a kere via na. Whọ sai kere eware jọ nọ e were owhẹ hayo nọ whọ kiẹ ku fihọ obe nana hayo oria ofa. Okenọ ekpako na a te kiẹ owhẹ riwi na, whọ sai rri obe na jẹ rehọ eware nọ who kere na kugbe rọ kuyo. Otẹrọnọ whọ be sai wo otoriẹ onọ jọ họ, whọ sae nọ ohwo nọ o bi wuhrẹ owhẹ obe hayo ekpako na re a fiobọhọ kẹ owhẹ.

Okenọ ekpako na a te kiẹ owhẹ riwi na, u du gwọlọ nọ whọ rẹ kiyo ithethei hi. Iyo nọ whọ rẹ rehọ eme obọra kẹ lọlọhọ eye e mai woma. Evaọ enọ na jọ, u re woma re whọ fodẹ oria Ebaibol ovo jọ hayo ivẹ nọ whọ be rehọ uyo ra no ze.

Otẹrọnọ ekpako na a rri nọ whọ re riẹ igogo iwuhrẹ ọsosuọ Ebaibol na te he, a ti ru ọruẹrẹfihotọ nọ a ti ro fiobọhọ kẹ owhẹ wo eriariẹ Ebaibol ziezi jẹ sae rọ eme obọra ta eware nọ who wuhrẹ re whọ sai te kẹ ame-ọhọ evaọ obaro.

[Ọjọriẹ kẹ ekpako ukoko: Ithubro kpahe epanọ a re ro lele ahwo nọ a gwọlọ họ-ame ta ẹme e rrọ ẹwẹ-obe avọ 208-212.]