Ijẹle I whowho Eyẹ Jesu

Osu ahwo Rom nọ a re se Siza Ọgọstọs, o juzi nọ ohwo Ju kpobi ọ nyai kere odẹ fihọ otọ evaọ obọ ẹwho riẹ. Fikiere Josẹf avọ Meri a te kpobọ Bẹtlẹhẹm re a kere odẹ fihọ otọ, keme obei Josẹf o no ze. Whaọ okenọ Meri o re ro yẹ o kẹle no.

Nọ a te obọ Bẹtlẹhẹm, oria ovo o jọ nọ a re wo họ họ, fikiere a te wo họ uwou nọ erao e rẹ jọ. Etẹe Meri o jo yẹ Jesu. Meri ọ tẹ rehọ ehọ elọlọhọ variẹ ọmọ na jẹ wọe kiẹzẹ oria nọ a re fi emu erao họ.

Whaọ ithuru-igodẹ jọ a jẹ rẹrote igodẹ rai evaọ aso ọyena kẹle Bẹtlẹhẹm. Idudhe na enjẹle jọ o te dikihẹ aro rai avọ elo oruaro Jihova nọ o lo wariẹ ae họ. Ozọ u te mu ithuru-igodẹ na gaga, rekọ enjẹle na ọ tẹ ta kẹ ae nọ: ‘Ozọ u mu owhai hi. Mẹ wha emamọ usi jọ se owhai. Nẹnẹ na a yẹ Mesaya na no evaọ Bẹtlẹhẹm.’ Idudhe na, ijẹle buobu a te kuomagbe enjẹle na, bi jiri Ọghẹnẹ inọ: ‘Oruaro u te Ọghẹnẹ evaọ obọ odhiwu, gbe udhedhẹ evaọ otọakpọ.’ Ẹsiẹvo na, a gbẹ ruẹ ijẹle na ha. Kọ eme ithuru-igodẹ na a ru?

Ithuru-igodẹ na a tẹ ta kẹ ohwohwo nọ: ‘Joma kpobọ Bẹtlẹhẹm obọnana.’ Aikpobi a te kpobọ Bẹtlẹhẹm ababọ okioraha. Nọ a te obei, a tẹ ruẹ Josẹf avọ Meri gbe ọmọ na evaọ uwou erae.

Akpọ o je gbe ahwo unu nọ a te yo kpahe ovuẹ nọ enjẹle na ọ vuẹ ithuru-igodẹ na. Meri o roro didi kpahe eme nọ enjẹle na ọ ta kẹ ithuru-igodẹ na, yọ e thọrọ e riẹ ẹro ho. Ithuru-igodẹ na a te zihe kpobọ ẹwọ nyae rẹrote igodẹ rai, yọ a bi jiri Jihova rọkẹ eware nana nọ a ruẹ je yo na.