Whọ Kẹ Uvẹ re A Viẹ Owhẹ Họ Họ

EVIẸHỌ i no enwenọ anwọ emuhọ ohwo-akpọ ze. Oware ọsosuọ jọ nọ o via nọ a kere fihọ otọ o jọ eviẹhọ. Oye họ okenọ Setan ọ rọ viẹ Ivi họ evaọ ọgbọ Idẹn.—Emuhọ 3:13; 1 Timoti 2:14.

Dede nọ anwọ oke oyena ze eviẹhọ i ri no akpọ na uvumọ oke he, enẹna o jẹ mai bu. Bi rri kpohọ oke ọgbọna, Ebaibol na ọ vẹvẹ unu nọ: “Ahwo omuomu gbe otu eviẹhọ a re ti no eyoma ruọ onọ o mai yoma, eviẹwẹ gbe enọ a viẹhọ.”—2 Timoti 3:13.

A be rọ oghẹrẹ ẹjiroro kpobi viẹ ahwo họ. Ifiwhayo gbe otu ewhariọ a bi fi ahwo mi igho. Enọ i re hrowo esuo a be viẹ enọ i votu kẹ ae họ, a gba riẹ mu nnọ a rẹ jọ esuo makọ oware nọ o rẹ via kpobi. Ahwo a be tubẹ viẹ oma obọ rai họ dede. Ukpenọ a rẹ rọwo uzẹme ọ iyẹrẹ iyoma nọ i re noi ze, a rẹ ta kẹ oma rai inọ uvumọ enwoma e rrọ elele iruemu iyoma ha, wọhọ ivovavovo, ẹlọ imu egaga, hayo ọfariẹ-ogbe.

Eviẹhọ e tẹ jẹ rrọ abọ egagọ re. Isu egagọ erọ edẹ Jesu a jẹ viẹ ahwo na họ. Kpahe otu eviẹhọ eyena, Jesu ọ ta nọ: “Ae isu nọ ituaro. Re otuaro o te su otuaro, ai ivẹ na a re kie fihọ ọgọdọ.” (Matiu 15:14) Ofariẹ, ahwo a rẹ rọ eme egagọ viẹ oma rai họ re. Itẹ 14:12 o ta nọ: “Edhere jọ ọ rọ nọ ọ wọhọ nọ o kiehọ kẹ ohwo, rekọ urere riẹ kọ edhere uwhu.”

Wọhọ epanọ o jọ evaọ edẹ Jesu na, a be viẹ ahwo buobu họ evaọ abọ egagọ, yọ onana u re gbunu hu! Pọl ukọ na ọ ta nnọ Setan “o wuhu iroro enọ e rọwo ho di no, re a siọ elo oruaro usiuwoma Kristi ba ẹruẹ, ọnọ avọ Ọghẹnẹ a rọ ẹruọvo.”—2 Ahwo Kọrint 4:4.

Ofiwhayo ọ tẹ viẹ omai họ, ma re ku ugho mai fiẹ. Ọnọ o bi hrowo esuo ọ tẹ viẹ omai họ, ma rẹ sai ku ufuoma mai jọ fiẹ. Rekọ otẹrọnọ Setan ọ viẹ omai họ re ma siọ uzẹme kpahe Jesu Kristi, ma re ku uzuazọ ebẹdẹ bẹdẹ fiẹ! Fikiere whọ jọ a viẹ owhẹ họ họ. Rovie iroro gbe udu ra kẹ ehri ọ uzẹme egagọ nọ a rẹ vro avro riẹ hẹ na, Ebaibol na. Ma gbe ru ere he, okpoware u ti vru mi omai.—Jọn 17:3.