Enọ Ahwo nọ A s’Ebe

Jihova ọ kẹ emọ Izrẹl, idibo anwae riẹ uvẹ re a wo aye vrẹ ọvo, rekọ ọ kẹ uvẹ riẹ enẹna ha. Kọ ute riẹ u re nwene?

Jihova o ri nwene eriwo riẹ hẹ kpahe aye nọ a re wo vrẹ ọvo. (Olezi 19:7; Malakae 3:6) O jọ ọruẹrẹfihotọ riẹ kẹ ahwo-akpọ no emuhọ ze he, yọ o rrọ ere enẹna gbe he. Okenọ ọ ma Ivi wọhọ aye kẹ Adamu, Jihova o dhesẹ via inọ ute riẹ họ aye ọvo rọkẹ ọzae ọvo. “Fikiere ọzae ọ rẹ se ọsẹ gbe oni riẹ ba, ọ vẹ gbalọ aye riẹ, a vẹ jọ uwo ovo.”—Emuhọ 2:24.

Okenọ Jesu Kristi ọ jọ otọakpọ, ọ wariẹ ute nana evaọ uyo rọkẹ ahwo nọ a nọ onọ kpahe orọo-ofa gbe ọwariẹ-rọo. Ọ ta nọ: “Wha ri se nọ, ọnọ ọ ma rae eva emuhọ ọ mae ọzae gbe aye, ọ tẹ ta nọ, ‘Fiki onana ọzae ọ jẹ se ọsẹ gbe oni riẹ ba o ve [kuomagbe] aye riẹ, ai ivẹ na a vẹ te jọ uwo ovo’? Fikiere a gbẹrọ ivẹ hẹ rekọ ọvo.” Jesu o fibae nọ: “Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o [bruẹnwae].” (Matiu 19:4-6, 9) No eriwo nana ze u re vevẹ inọ re a rehọ aye ọfa hayo eyae ibuobu yọ ẹnwae-obro.

Nọ o rrọ ere na, kọ fikieme a rọ k’uvẹ re a rehọ vrẹ aye ọvo evaọ oke anwae? Muẹrohọ nnọ orọnikọ Jihova ọ to uruemu na họ họ. Ohwo ọsosuọ nọ a fodẹ evaọ Ebaibol na nnọ o wo vrẹ aye ọvo họ Lemẹk, ọmọ uyẹ Keni. (Emuhọ 4:19-24) Nọ Jihova ọ rehọ Ẹvo edẹ Noa ze, ọvuọ aye ọvuọvo Noa avọ emezae esa riẹ a wo. A raha ahwo nọ a wo vrẹ aye ọvo kpobi evaọ Ẹvo na.

Okenọ ikpe-udhusoi buobu e vrẹ no nọ Jihova ọ salọ emọ Izrẹl wọhọ ahwo riẹ, ejọ evaọ usu rai a wo eyae ibuobu, dede na aye ọvuọvo ibuobu rai a mai wo. Ọghẹnẹ ọ kẹ uzi re iviuwou nọ i wo vrẹ aye ọvo a hẹriẹ hẹ. Ikpoye, o fi izi họ nọ e rẹ kpọ uruemu na.—Ọnyano 21:10, 11; Iziewariẹ 21:15-17.

Imuẹro inọ uvẹ nọ Ọghẹnẹ ọ kẹ uruemu eyae buobu nọ a re wo na o jọ ubroke gheghe, u dhesẹ oma via orọnikọ ẹkwoma ẹme Jesu kpahe ute ọsosuọ nọ Jihova o fihọ kẹ orọo na ọvo ho, rekọ te eme nọ Pọl ukọ na ọ rehọ ẹgba ẹzi ọfuafo Ọghẹnẹ kere. Ọ ta nọ: “Ufo re kọzae kọzae o wo aye obọ riẹ gbe kaye kaye o wo ọzae obọ riẹ.” (1 Ahwo Kọrint 7:2) Pọl ọ rehọ ẹgba ẹzi kere re inọ ọzae kpobi nọ a ro mu wọhọ ọsẹro hayo odibo oruiruo evaọ ukoko Ileleikristi, o gbahọ nọ “aye ọvo o re wo.”—1 Timoti 3:2, 12; Taitọs 1:6.

Fikiere, uvẹ nọ Jihova ọ kẹ uruemu eyae buobu nọ a re wo na u kuhọ eva okenọ a to ukoko Ileleikristi na họ eva oware wọhọ ikpe 2,000 nọ i kpemu. Eva oke yena, ute orọo u zihe kpohọ epanọ o jọ eva emuhọ nọ Ọghẹnẹ ọ ma ọzae gbe aye ọsosuọ: ọzae ọvo, aye ọvo. Oye họ ute nọ o rrọ kẹ ahwo Ọghẹnẹ wariẹ akpọ na họ nẹnẹ.—Mak 10:11, 12; 1 Ahwo Kọrint 6:9, 10.