Me Vuhu Epanọ Uzuazọ O Ghare Te

O JỌ OHIOHIẸ APRIL 16, 2007. Nọ me siku họ ubiozọ ọfisi jọ evaọ uwou-ehru idhe-esa jọ evaọ isukulu Virginia Polytechnic Institute and State University, hayo Virginia Tech, mẹ tẹ wariẹ kareghẹhọ epanọ u fo te re ma hai yere Ọghẹnẹ kẹdẹ kẹdẹ nọ ma rrọ uzuazọ.

Mẹ jẹ gwọlọ no ọfisi mẹ kpobọ edhe-avivẹ uwou na nyae rehọ eware nọ a vi se omẹ. Rekọ eprọfẹsọ isukulu na jọ o te bru omẹ ze inọ mẹ nyai fi obọ họ kẹe ruẹrẹ oware jọ evaọ ekọmputa riẹ. Nọ ma be te nwane ruọ ọfisi riẹ na, ma te yo edo igbeke nọ a be sa evaọ edhe-avivẹ uwou na. Epanọ ma riẹ oware nọ o be via ha, ma tẹ họrọ ruọ ọfisi na, kare ẹthẹ, bi nuhu avọ igwegwe hẹrẹ oware nọ u ti lele iei. Me te siku ubiozọ jọ, jẹ lẹ se Jihova Ọghẹnẹ inọ o fi obọ họ kẹ omẹ wo areghẹ nọ mẹ rọ rẹriẹ ovao dhe oware nọ u ti lele iei kpobi.

Nọ ma rrọ etẹe be hẹrẹ na, mẹ tẹ kareghẹhọ oware nọ o via ikpe 15 nọ i kpemu. Mẹ jẹ hae ruẹrẹ imoto evaọ oke yena. Evaọ ẹdẹjọ, ukolo epẹtiro nọ ọrivẹ iruo mẹ o kru họ obọ u te fru erae. Fiki iguegue, o te gbolo ukolo erae na họ omẹ ovao! Me se iwiri na họ eva, erae na e tẹ jẹ mahe umuo eva mẹ rite uzou te epanọ e rọ yẹ iwo oma mẹ via. A tẹ rehọ arupre wọ omẹ kpohọ ẹsipito nọ a rẹ jọ rẹrote ahwo nọ erae e mahe, mẹ jọ etẹe emerae esa gbe ubro, sọ mẹ te zọ hayo whu, mẹ riẹ hẹ. Nọ mẹ rehọ imu gbe eghẹrẹ usiwo sa-sa te emerae isoi no, me te zihe ziọ uwou avọ evawere inọ mẹ zọ. Oware yena nọ o via kẹ omẹ na u wuhrẹ omẹ inọ u fo re mẹ hae rri ẹdẹ kpobi nọ mẹ rrọ uzuazọ ghaghae. U te je ru ọtamuo mẹ ga inọ mẹ rẹ rehọ uzuazọ mẹ ru iruo ọnọ ọ kẹ omẹ uzuazọ na, Jihova Ọghẹnẹ—wọhọ omọvo Isẹri riẹ.—Olezi 90:12; Aizaya 43:10.

Fiki omonwa nana, mẹ gbẹ jẹ sai ru iruo imoto-eruẹrẹ hẹ, fikiere me te wuhrẹ kpahe ekọmputa, a tẹ rehọ omẹ iruo evaọ isukulu Virginia Tech. Oye mẹ rọ jọ isukulu na ohiohiẹ ẹdẹ yena.

Nọ igbeke na i bi kie na, kpakọ ikpakpe otu nọ a re ruẹ obọ riẹ evaọ America ha, nọ ọzae jọ ọvo ọ be rọ sa ahwo kpe o jẹ via evaọ obotọ uwou nọ ma rrọ na. Nọ ọzae na o kpe ahwo 32 nọ a riẹ onahona ha no, ọ tẹ sa omariẹ kpe. Nọ edo igbeke na o te iminiti 20 no, ma te yo urru iporisi evaọ edhe ọsosuọ uwou na. Ma bo se ai, a tẹ nya ze ti su omai kpohọ oria nọ o fọ oma.

Oware iguegue nana o lẹliẹ omẹ vuhu epanọ uzuazọ o kpẹre te, gbe inọ ohwo ọvo ọ ginẹ riẹ odẹ hẹ. (Jemis 4:14) U gine wuzou gaga re ma fi eva họ Ọnọ ọ kẹ omai uzuazọ, Jihova Ọghẹnẹ, je rri ẹdẹ kpobi evaọ uzuazọ mai wọhọ okẹ oghaghae nọ u no obọ riẹ ze!—Olezi 23:4; 91:2.

[Ọnọ o wo uwoho nọ o rrọ ẹwẹ-obe avọ 31]

AP Photo/The Roanoke Times, Alan Kim