Oware nọ O Lẹliẹ Jesu Wo Evawere Evaọ Uzuazọ

KỌ JESU o gine wo evawere evaọ uzuazọ? A yọrọ e riẹ evaọ uviuwou nọ u fe he, fikiere o wo eware buobu nọ ahwo oke yena a wo ho. O tube wo “oria nọ ọ rẹ rọ uzou riẹ kpaha ha.” (Luk 9:57, 58) U te no ere no, a mukpahe iẹe, a raha odẹ riẹ, uwhremu na ewegrẹ a te kpei.

Whọ rẹ sae ta nọ, ‘Me roro nọ uzuazọ utioye na o rẹ kẹ evawere he.’ Rekọ eware efa e riẹ nọ o gwọlọ nọ ma rẹ riẹ kpahe uzuazọ nọ Jesu o yeri. Joma ta kpahe ene jọ evaọ usu rai.

“Emu mẹ họ oreva Ọnọ O vi omẹ ze.”—Jọn 4:34.

Jesu ọ rọ ẹkwoma ẹme gbe uruemu riẹ dhesẹ via nọ oreva Jihova ọ nyaze ti ru.a Oreva Ọghẹnẹ uruo o jẹ kẹ Jesu evawere. Wọhọ epanọ ikere nọ ma se no obọnana i dhesẹ na, Jesu ọ ta nọ oreva Ọghẹnẹ uruo o wọhọ emu kẹe. Joma ta kpahe oware nọ o lẹliẹ Jesu ta ẹme yena.

Oware wọhọ ighọjọ ikpegbivẹ evaọ uvo Jesu ọ rọ ta ẹme yena. (Jọn 4:6) Ọ nya Sameria nọ o vọ avọ igbehru na no ohiohiẹ rite uvo, fikiere ohọo u kpe rie gaga no. Ilele riẹ dede a ta kẹe nọ: “Rabae, re emu.” (Jọn 4:31) Rekọ Jesu ọ rọ uyo nọ ọ kẹ dhesẹ nọ oreva Ọghẹnẹ uruo o mae r’oja vi emu. Kọ oyena u gbe dhesẹ nọ ọ jẹ were eva evaọ uzuazọ?

“Me you Ọsẹ na.”—Jọn 14:31.

Jesu o wo usu okpekpe kugbe Ọsẹ obọ odhiwu riẹ. Uyoyou udidi nọ Jesu o wo kẹ Ọghẹnẹ, oye o jẹ wọe ta kẹ amọfa kpahe odẹ Ọghẹnẹ, ẹjiroro riẹ gbe oghẹrẹ ohwo nọ Ọghẹnẹ ọ rrọ. Jesu ọ rọ ẹkwoma ẹme gbe uruemu riẹ rọ aro kele Ọsẹ riẹ gbagba, fikiere nọ ma tẹ be jọ Ebaibol na se kpahe Jesu, o rẹ wọhọ ẹsenọ ma bi se kpahe Ọsẹ na dẹẹ. Nọ Filip ọ ta kẹ Jesu nọ: “Olori, dhesẹ Ọsẹ na kẹ omao,” Jesu ọ tẹ kpahe kẹe nọ: “Ọ nọ ọ ruẹ omẹ ọ ruẹ Ọsẹ na.”—Jọn 14:8, 9.

Jesu o you Ọsẹ riẹ te epanọ ọ rọ rọwo nọ o re whu. (Ahwo Filipai 2:7, 8; 1 Jọn 5:3) Uyoyou ogaga nọ Jesu o wo kẹ Ọghẹnẹ o lẹliẹ e riẹ jẹ were eva.

“Ohwo ọvo o wo uyoyou nọ o ro vi ona ha, re ohwo o siobọno uzuazọ riẹ fihọ otọ fiki ezọ riẹ.”—Jọn 15:13.

Fiki sebaẹgba, emamọ uzuazọ nọ ma hai ti yeri o tahaku. Ebaibol ọ ta nọ: “Umuomu orọ fiki omọvo [Adamu] vaha ruọ akpọ na, gbe uwhu fiki izieraha, fikiere uwhu u te zite ahwo kpobi . . . keme ahwo kpobi a raha uzi.” (Ahwo Rom 5:12) Ababọ obufihọ Ọghẹnẹ, ma rẹ sae dhẹ va uwhu abọ họ, keme oye họ osa uzioraha.—Ahwo Rom 6:23.

Fikiere, ma re yere Jihova fikinọ ọ gbẹ edhere no re onana o ruẹsi n’otọ. Ọ kuvẹ re Jesu, Ọmọ ọgbagba riẹ nọ ọ kare uzioraha na ọ ruẹ uye je whu, re ọ sae ta ahwo-akpọ no igbo uzioraha gbe uwhu. Fiki uyoyou nọ Jesu o wo kẹ Ọghẹnẹ gbe ahwo-akpọ, ọ rọwo nọ ọ rẹ rọ uzuazọ ogbagba riẹ dheidhe fiki mai. (Ahwo Rom 5:6-8) Uyoyou nana nọ o dhesẹ na o lẹliẹ e riẹ were eva re.b

“Ọnana họ Ọmọ oyoyou mẹ, ọnọ ọ were omẹ hrọ.”—Matiu 3:17.

Jihova ọ ta eme nana no obọ odhiwu ze evaọ okenọ Jesu ọ rọ họ-ame. Jihova ọ rọ enẹ dhesẹ nọ o you Jesu jẹ be were eva kugbei. Agbẹta nọ Jesu ọ rọ ta gbiae nọ: ‘Ọsẹ na o you omẹ.’ (Jọn 10:17) Fikinọ ọ riẹ nọ Ọsẹ riẹ o you rie gbe nọ eva riẹ e be were Ọsẹ na, Jesu ọ rọ ovao dhe ọwọsuọ kpobi ududu. Onana u tube fi obọ họ kẹe rọ ovao dhe uwhu dede ababọ ozọ. (Jọn 10:18) Fikiere, ma rẹ sae ta nọ ẹriẹ inọ Ọsẹ riẹ o you rie jẹ be were eva kugbei o lẹliẹ Jesu wo evawere.

Uzẹme o rrọ inọ Jesu o gine yeri uzuazọ evawere. Fikiere ma rẹ sai wuhrẹ eware buobu mi ei kpahe oghẹrẹ nọ ma sai ro wo evawere evaọ uzuazọ. Uzoẹme nọ o rrọ aro na o te ta kpahe ehrẹ jọ nọ Jesu ọ kẹ ilele riẹ kpahe oghẹrẹ nọ a sai ro wo evawere evaọ uzuazọ.