Ẹta Usiuwoma na avọ Imuẹro Egaga

¹ Evaọ emuhọ ikpe-udhusoi ọsosuọ na, Jesu Kristi o vi ilele riẹ re a ta usiuwoma Uvie na je ‘ru ilele ahwo erẹwho na kpobi.’ (Mat. 24:14; 28:19, 20) Isẹri Jihova a se uthubro nana gb’oja gaga, te epanọ evaọ ekuhọ ikpe-udhusoi avọ 20 na, okugbe-inievo Ileleikristi mai ọ rọ rro vrẹ ilele 5,900,000 no evaọ ekwotọ 234. Ẹvẹ onana o rọ ubo ulogbo oghọghọ te kẹ Ọsẹ obọ odhiwu mai!

² Enẹna ma rueva ikpe-udhusoi avọ 21 na no. Ọwegrẹ mai na ọ be rọ ẹghẹ daoma whaha oviede iruo ọ usiuwoma ota gbe ilele i ruo Uvie mai na. Ọ be rehọ ọyawọ no uyerakpọ onana ze daoma rọ kpọ iroro mai no iruo na, rehọ oke mai, jẹ rehọ awaọruọ gbe isiuru nọ i fioka ha tunyẹ omai. Ukpenọ ma rẹ kẹ uyerakpọ nana uvẹ re u dhesẹ oware nọ o r’oja k’omai evaọ uzuazọ, ma re dhesẹ oware nọ o mai w’uzou rono Ẹme Ọghẹnẹ ze k’omobọ mai—eruo oreva Jihova. (Rom 12:2) Oyena u dhesẹ nọ ma rẹ kezọ kẹ uduotahawọ Ikereakere na re ma ‘vuẹ ẹme na evaọ ezi owoma gbe ọrọ ukpokpoma je ru odibọgba mai gbunu’ na.—2 Tim. 4:2, 5.

³ Bọ Imuẹro Egaga: U fo re Ileleikristi a “dikihẹ ga avọ imuẹro eva oreva Ọghẹnẹ.” (Kọl. 4:12) A fa ubiẹme na “imuẹro” wọhọ “ẹrọwọ ọgaga; uyero ọ udu ufihọ oware.” Wọhọ Ileleikristi, ma re wo imuẹro nnọ ẹme eruẹaruẹ Ọghẹnẹ o muẹro gbe nnọ ma rria kodo ruọ oke urere na no. Ma re wo orọwọ nọ o ga wọhọ orọ Pọl ukọ na, ọnọ ọ ta nọ usiuwoma na yọ “ogaga usiwo Ọghẹnẹ nọ u te enọ e rọwo.”—Rom 1:16.

⁴ Ẹdhọ ọ be rehọ ahwo oyoma gbe erọ ẹghẹ, enọ a su thọ no, ruiruo rọ bẹbẹ amọfa họ je su ai thọ. (2 Tim. 3:13) Nọ a si omai ozọ no na, kọ ma rẹ j’owọ re ma tua imuẹro mai inọ ma wo uzẹme na. Ukpenọ ma rẹ kuvẹ re awaọruọ uzuazọ o whrehe ọwhọ mai, ma re gbe fi isiuru Uvie na họ oria ọsosuọ. (Mat. 6:33, 34) Yọ ma gwọlọ nọ ovẹrẹ oke na o thọrọ omai ẹro ho, re ma roro nnọ urere uyerakpọ nana o gbẹ rọ ugbothabọ jọ. U bi si kẹle viere. (1 Pita 4:7) Dede nọ ma sai roro nnọ usiuwoma na u bi w’iruo tere he evaọ ekwotọ jọ fikiọ isẹri nọ a jarai se no, ma rẹ gbẹ ruabọhọ iruo unuovẹvẹ na.—Izik. 33:7-9.

⁵ Ugogo enọ nọ i w’uzou eva oke urere onana họ: ‘Kọ me se uwou eruo ilele nọ Jesu o vi na gb’oja? Okenọ mẹ tẹ be ta usiuwoma na, kọ me bi dhesẹ imuẹro egaga inọ Uvie na ghinọ uzẹme? Kọ mẹ gba riẹ mu no re me wo obọ vọvọ evaọ odibọgba ọ uzuazọ usiwo nana?’ Avọ ovuhumuo epanọ ma rria kodo ruọ evaọ oke urere na te no, ma re muẹroh’otọ kẹ omobọ mai gbe iruo usiuwoma ota avọ ewuhrẹ mai na. Enẹ oruo o ti siwi omobọ mai gbe enọ e kezọ k’omai. (1 Tim. 4:16) Ẹvẹ mai kpobi a rẹ rọ tua imuẹro mai wọhọ egbodibo?

⁶ Raro Kele Ahwo ọ Tẹsalonika: Pọl ukọ na, okenọ ọ jẹ kareghẹhọ iruo egaga inievo na evaọ obọ Tẹsalonika, ọ ta kẹ ae nọ: “Keme usiuwoma nọ oma vuẹ owhai, orọ ẹme unu ọvo ho; rekọ a vọ ogaga Ẹzi Ẹri re gbe [imuẹro egaga, NW]. Wha riẹ oghẹrẹ ahwo nọ ma jọ eva udevie rai fiki rai. Wha tẹ ze ghinẹ rọ [aro keke] omai jegbe o rọ Ọnowo na; keme wha rehọ ẹme na eva uye obẹbẹ, je kugbe oghọghọ nọ Ẹzi Ẹri na ọ kẹ owhai.” (1 Tẹs. 1:5, 6) Ẹhẹ, Pọl o jiri ukoko ahwo ọ Tẹsalonika na keme ghelọ ukpokpoma buobu a ta usiuwoma na avọ ọwhọ gbe imuẹro egaga. Eme o fiobọhọ kẹ ae ru onana? Orọ ọsosuọ, ọwhọ gbe imuẹro nọ a jọ oma Pọl ukọ na gbe ibe iruiruo riẹ ruẹ u kpomahọ ai wowoma. Evaọ oghẹrẹ vẹ?

⁷ Uzuazọ Pọl gbe egbẹnya erẹ riẹ o kẹ imuẹro inọ ẹzi Ọghẹnẹ ọ rrọ ae oma gbe nnọ a rọ udu rai kpobi rọwo usiuwoma nọ a be ta na. Taure ọ tẹ te ziọ obọ Tẹsalonika, a rehọ obọ ogaga lahiẹ Pọl avọ Saelas evaọ obọ Filipai. Ababọ ẹdhoguo, a fa rai, fi ai họ uwou-odi, je gbolo ai fihọ ekarọ. Rekọ ẹbẹbẹ nana o whrehe ọwhọ rai kẹ usiuwoma na ha. Ọghẹnẹ ọ rọ ogaga riẹ siobọno ai, onọ o lẹliẹ oriekarọ na avọ uviuwou riẹ kurẹriẹ, jẹ gbẹ edhere kẹ inievo na re a ruabọhọ odibọgba rai.—Iruẹru 16:19-34.

⁸ Evaọ ẹgba ẹzi Ọghẹnẹ, Pọl ọ tẹ ziọ obọ Tẹsalonika. Ọ jọ obei daoma ko unu riẹ jẹ dawo ẹgba riẹ kpobi vọvọ evaọ ahwo Tẹsalonika nọ o wuhrẹ uzẹme na. O sioma kpemu hu evaọ ewhowho usiuwoma na evaọ uvẹ kpobi nọ u rovie fihọ. (1 Tẹs. 2:9) Usiuwoma ota Pọl avọ imuẹro egaga u kpomahọ ahwo ẹwho na te epanọ ejọ a ro siobọno egagọ emedhọ rai a te zihe ruọ idibo Ọghẹnẹ uzẹme na, Jihova.— 1 Tẹs. 1:8-10.

⁹ Ukpokpoma o whaha ahwo ọkpokpọ nọ e rọwo na re a siọ owọ ba ẹjẹ kẹ usiuwoma na ha. Avọ ọwhọ ẹrọwọ ọkpokpọ rai na gbe imuẹro evọvọ inọ eghale ebẹdẹ bẹdẹ e te jọ ọrai, oma o wọ ahwo ọ Tẹsalonika na re a whowho uzẹme nọ a rọ ọwhọ kpobi dede rehọ no na. Ajọwha ukoko oyena o ga te epanọ usi ẹrọwọ gbe ọwhọ rai o rọ vaha ruọ abọ ọfa ọ Masidonia je tube kpohọ Akaya. Fikiere, okenọ Pọl o kere ileta ọsosuọ riẹ se ahwo ọ Tẹsalonika, yọ a riẹ iruo ezi rai gaga no. (1 Tẹs. 1:7) Ẹvẹ onana o rọ obọdẹ oriruo te!

¹⁰ Uyoyou kẹ Ọghẹnẹ gbe Ahwo O Wọ Rae: Ẹvẹ ma sai ro wo imuẹro egaga omobọ mai okenọ ma tẹ be ta usiuwoma na nẹnẹ, wọhọ epanọ ahwo ọ Tẹsalonika a ru na? Pọl o kere kpahe ae nọ: “Ma kareghẹhọ iruo orọwọ rai gbe omadawọ ogaga rai fiki uyoyou.” (1 Tẹs. 1:3, NW, oruvẹ obotọ) O jọ vevẹ inọ a wo uyoyou udidi kẹ Jihova Ọghẹnẹ jẹ rọkẹ ahwo nọ a jẹ ta usiuwoma kẹ na. Ọkpọ uyoyou onana o wọ Pọl avọ egbẹnyusu riẹ nọ a rọ kẹ ahwo ọ Tẹsalonika ‘orọnọ usiuwoma Ọghẹnẹ ọvo ho, rekọ te ewẹ rai.’—1 Tẹs. 2:8.

¹¹ Epọvo na re, uyoyou udidi mai kẹ Jihova jẹ rọkẹ erivẹ mai o rẹ wọ omai gwọlọ w’obọ vọvọ evaọ iruo usiuwoma ota na onọ Ọghẹnẹ ọ rọ k’omai nọ ma ru na. Avọ uyoyou utioye na, ma vuhumu nnọ o rrọ owha-iruo omomọvo, onọ Ọghẹnẹ ọ k’omai, re ma vaha usiuwoma na. Ẹkwoma eroro ziezi avọ ovuhumuo kpahe eware kpobi nọ Jihova o ru k’omai no re ọ kpọ omai riwi “uvi uzuazọ” na, oma o rẹ wọ omai re ma ta kẹ amọfa kpahe izẹme igbunu nọ ma rọ udu mai kpobi rọwo na.—1 Tim. 6:19.

¹² Nọ ma be ruabọhọ iruo usiuwoma ota na, uyoyou mai kẹ Jihova gbe ahwo o rẹ rro haro hrọ. U te ru ere, oma o rẹ wọ omai re ma ru ẹkẹ abọ mai viere evaọ odibọgba n’ẹthẹ ruẹthẹ na je le abọ isẹri-ise efa nọ i rovie fihọ k’omai. Ma rẹ rehọ uvẹ nọ u rovie fihọ ro se isẹri ọnyakuo kẹ imoni, erivẹ, gbe egbẹrioma. Dede nọ ahwo buobu a sae se usiuwoma nọ ma be ta na yọ ejọ a sae daoma whaha ewhowho kpahe Uvie na, ma wo oghọghọ obeva. Fikieme? Keme ma riẹ nọ ma dao ẹgba mai re ma se isẹri Uvie na je fiobọhọ kẹ ahwo wo esiwo no. Yọ Jihova ọ te ghale omodawọ mai nọ ma be rọ gwọlọ enọ i wo udu ezi na. Eware otunyẹ uzuazọ e tẹ maki ko omai họ yọ Setan ọ be gwọlọ raha oghọghọ mai, ma rẹ gbẹ yọrọ imuẹro egaga gbe ọwhọ mai evaọ isẹri-ise kẹ amọfa. Okenọ mai kpobi a te ru ẹkabọ mai, onana o rẹ wha ukoko ogaga orọ ọwhọ ze, wọhọ orọ obọ Tẹsalonika na.

¹³ Jọ O Bẹ Owhẹ Hẹ Evaọ Otọ Ẹdawọ: O gwọlọ imuẹro re evaọ okenọ ma tẹ nyaku edawọ sa-sa. (1 Pita 1:6, 7) Jesu o ru rie vevẹ kẹ ilele riẹ inọ a te lele iei, “erẹwho na kpobi i re ti mukpahe” ai. (Mat. 24:9) Pọl avọ Saelas a nyaku onana evaọ okenọ a jọ Filipai. Ikuigbe nọ e rọ Iruẹru uzou avọ 16 na e ta nnọ a gbolo Pọl avọ Saelas fihọ uwou-odi a te fi ai họ ekarọ. Uzedhe uwou-odi na yọ ubrukpẹ obeva onọ ibrikpẹ nọ i wo elo gbe ofou e wariẹ họ. Rekọ uwou-odi obeva na u wo elo ho yọ udugaga ofou ọ rẹ rọ rueva riẹ. Pọl avọ Saelas a thihakọ ebi, ẹroro, gbe orre oria otọtọ onana. Kọ whọ sai roro oja nọ a re nọ a jọ ekarọ na evaọ euwa buobu avọ uke rai nọ u bi kueri je bi hwẹ fiki eviaviẹ nọ a fa rae?

¹⁴ Ghelọ edawọ enana, Pọl avọ Saelas a kru ẹrọwọ rai gaga. A dhesẹ imuẹro udu kpobi, onọ o kẹ rai ẹgba nọ a rẹ rọ gọ Jihova ghelọ edawọ. A dhesẹ imuẹro rai evaọ owọ avọ 25 orọ uzou avọ 16 na, oria nọ o ta nọ Pọl avọ Saelas a jẹ “lẹ jẹ so ile kẹ Ọghẹnẹ.” Evaọ uzẹme, dede nọ a jọ uwou-odi obeva na, a wo imuẹro nnọ a wo ọjẹrehọ Ọghẹnẹ te epanọ a jẹ rọ so ile do nọ ahwo uwou-odi edekọ a je ro yo dede! O gwọlọ nọ ma re wo imuẹro itieye na nẹnẹ nọ ma tẹ rẹriẹ ovao ku edawọ ẹrọwọ mai.

¹⁵ Edawọ nọ Ẹdhọ o bi ro dhe omai e rrọ buobu. Rọkẹ otujọ, o sae jọ ukpokpoma no uviuwou ze. Inievo mai buobu a rẹriẹ ovao ku edhọ nọ a bi gu. Ma rẹ sae nyaku omukpahe no obọ ikọ-erue ze. Ma wo ebẹbẹ ugho gbe awaọruọ epanọ ma rẹ rọ ko unu mai. Emoha e be rẹriẹ ovao ku otunyẹ ọhwa eva obọ isukulu. Ẹvẹ ma sai ro thihakọ ebẹbẹ nana? Eme o gwọlọ re ma dhesẹ imuẹro?

¹⁶ Orọ ọsosuọ, u fo re ma yọrọ usu okpekpe omobọ ohwo kugbe Jihova. Okenọ Pọl avọ Saelas a jọ uwou-odi obeva na, a rehọ oke na bruenu idabolo uzuazọ rai hayo ru oma ọkọkora ha. A nwane rẹriẹ ovao bru Ọghẹnẹ evaọ olẹ jẹ rọ ole jiri iei. Fikieme? Keme a wo usu okpekpe kugbe Ọsẹ obọ odhiwu rai. A vuhumu nnọ a be ruẹ-uye fiki ẹrẹreokie jegbe nnọ esiwo rai ọ rrọ obọ Jihova.—Ol. 3:8.

¹⁷ Nọ ma tẹ rẹriẹ ovao ku edawọ nẹnẹ, Jihova ma rẹ rẹroso re. Pọl ọ tuduhọ omai awọ wọhọ Ileleikristi re ma ‘nẹ iyei epanọ ma gwọlọ kẹ Ọghẹnẹ, re udhedhẹ Ọghẹnẹ nọ u vi eriariẹ kpobi o te yọrọ eva gbe iroro mai eva Kristi Jesu.’ (Fil. 4:6, 7) Ẹvẹ o rọ omosasọ te re ma riẹ nnọ Jihova ọ te k’omai uvẹ nyaku edawọ ababọ obufihọ họ! (Aiz. 41:10) Ọ rẹ jọ kugbe omai ẹsikpobi thakpinọ ma be rọ uvi imuẹro rọ gọe.—Ol. 46:7.

¹⁸ Uvi obufihọ ofa jọ evaọ edhesẹ imuẹro họ iruo buobu nọ ma re wo evaọ egagọ Jihova. (1 Kọr. 15:58) A gbolo Pọl avọ Saelas fihọ uwou-odi fikinọ a jẹ ta usiuwoma. Kọ a siọ usiuwoma ba ẹta fiki edawọ rai? Ijo, a gbẹ jẹ ta usiuwoma makọ evaọ uwou-odi na, yọ okenọ a siobọno ai no, a te kpohọ obọ Tẹsalonika jẹ rueva uwou-egagọ ahwo Ju re a ‘lele ai jiroro no Ikereakere na ze.’ (Iruẹru 17:1-3) Ma te fieva mai kpobi họ Jihova je wo imuẹro nnọ ma wo uzẹme na, uvumọ oware o sae “hẹriẹ omai no uyoyou Ọghẹnẹ evaọ Kristi Jesu Ọnowo mai na” ha.—Rom 8:35-39.

¹⁹ Iriruo Ọgbọna erọ Imuẹro Egaga: Obọdẹ iriruo buobu e riẹ evaọ edẹ mai na erọ ahwo nọ, wọhọ Pọl avọ Saelas, a dhesẹ imuẹro egaga no. Oniọvo-ọmọtẹ jọ ọnọ ọ zọ no ega uye Auschwitz na ze ọ ta kpahe ẹrọwọ ọgaga gbe imuẹro nọ inievo na a jọ obei dhesẹ. Ọ ta nọ: “Ẹdẹjọ nọ a jẹ nọ omai enọ, oletu isoja jọ o te bru omẹ ze avọ ẹkuobọ nọ ọ fare. O te do nọ: ‘Eme ma te rọ owhai ru? Ma te mu owhai, wha rẹ dawo ezọ họ. Ma te vi owhai kpohọ uwo-odi, udu u re kpoho owhai hi. Ma te fi owhai họ ega uye, wha re brudu hu. Ma te bruoziẹ uwhu kpe owhai, wha re dikihẹ ababọ udu-ubro. Eme ma te rọ owhai ru?’ ” Ẹvẹ o rrọ ọbọga ẹrọwọ te re ma ruẹ ẹrọwọ nọ inievo mai a dhesẹ evaọ otọ iyero idabolo itieye na! A jẹ rẹro so Jihova kẹse kẹse kẹ obufihọ re a sai thihakọ.

²⁰ Evaọ uzẹme ma kareghẹhọ imuẹro inievo mai buobu evaọ aro omukpahe uyẹ nọ o roma via kẹle na. Dede nọ a ruẹ oma rai evaọ iyero enwoma, inievo nọ i te e daoma re a ruẹ nnọ inievo emetẹ gbe emezae rai a be re eva vọ evaọ abọ-ẹzi. Aikpobi a kru ẹrọwọ rai ga avọ imuẹro egaga inọ ‘ekwakwa ẹmo nọ a gali vi ai kpobi e te kparobọ họ.’—Aiz. 54:17.

²¹ Inievo emetẹ gbe emezae mai buobu nọ erivẹ-orọo rai i kurẹriẹ hẹ a bi je dhesẹ ẹrọwọ gbe ithihakọ egaga. Oniọvo-ọmọzae jọ evaọ obọ Guadeloupe ọ nyaku ọwọsuọ ọgaga no obọ aye riẹ nọ ọ rọwo ho ze. Re o fi oyẹlẹ họ iẹe oma jẹ whaha iẹe ekpohọ iwuhrẹ Ileleikristi, o re there emu hayo fọrọ, kpa, jẹ ruẹrẹ iwu riẹ hẹ. Edẹ buobu o re lele iei t’ẹme he. Rekọ ẹkwoma edhesẹ imuẹro nọ i n’udu ze evaọ ẹgọ Jihova jẹ be lẹ sei kẹ obufihọ, o thihakọ enana kpobi. Ẹvẹ o thihakọ krite? Ikpe 20 e vrẹ—kẹsena aye riẹ o te ti mu udu họ enwene. Uwhremu na, ọ tẹ ghinẹ ghọghọ keme aye na ọ jẹ ẹruore Uvie Ọghẹnẹ rehọ.

²² Orọ urere, imuẹro egaga emoha mai nọ i bi kpohọ isukulu kẹdẹ kẹdẹ je bi yeri kugbe otuyẹ ọhwa gbe ebẹbẹ efa e rẹ thọrọ omai ẹro ho. Kpahe otunyẹ re a raro kele amọfa evaọ isukulu, ọmọtẹ ọmoha Osẹri jọ ọ ta nọ: “Okenọ whọ tẹ rọ isukulu, ohwo kpobi ọ rẹ tuduhọ owhẹ awọ re whọ dina veghe uzou. Emọ na e rẹ kẹ owhẹ adhẹẹ otẹrọnọ whọ be dina veghe uzou.” Dai rri otunyẹ nọ emoha mai e be rẹriẹ ovao ku! A rẹ gbae mu hrọ evaọ iroro gbe udu re a mudhe kẹ edawọ.

²³ Emoha mai buobu a be riẹ ru evaọ ẹyọrọ ẹgbakiete rai ghelọ edawọ. Oriruo jọ họ ọmoha ọmọtẹ jọ nọ ọ be rria France. Ẹdẹjọ nọ a ku emuọriọ uvo họ no, emezae jọ e tẹ jẹ gbae họ re ọ viọlọ ai unu, rekọ ọ tẹ lẹ jẹ se thahethahe, emezae na i te vu ei wa. Uwhremu na, omọvo rai jọ o te zihe ze ọ tẹ ta kẹe nọ aruọwha ọmọtẹ na ọ were riẹ. O te se isẹri kẹe kpahe Uvie na, fodẹ itee ikpehru nọ Jihova ọ gwọlọ mi enọ e gwọlọ wo oghale riẹ kpobi. Evaọ etoke ukpe isukulu na, o te ru ẹrọwọ riẹ vevẹ kẹ eklase na soso.

²⁴ Ẹvẹ uvẹ-ọghọ riẹ o ghare te re a kele omai kugbe enọ Jihova ọ gwọlọ ro ruiruo re a ta kpahe oreva riẹ avọ imuẹro egaga! (Kọl 4:12) Ofariẹ, ma wo uvẹ ugbunu nọ ma re ro dhesẹ ẹgbakiete mai evaọ okenọ Setan Ẹdhọ na, ọwegrẹ nọ ọ wọhọ okpohrokpo na, ọ tẹ be họre omai. (1 Pita 5:8, 9) Jọ o thọrọ omai ẹro ho inọ Jihova ọ be rehọ ovuẹ Uvie na wha esiwo se omai enọ e be vuẹe gbe enọ e be kezọ riẹ. Jọ iroro nọ ma be jẹ gbe edhere uzuazọ mai u dhesẹ nọ ma bi fi Uvie na họ oria ọsosuọ. Joma ruabọhọ ẹta usiuwoma na avọ imuẹro egaga!