Uzou Avọ 7

Jesu avọ Ebuẹva-Isi Na

AHWO jọ a no Ovatha-Ọre ze. Ebuẹva-isi a rọ—ahwo nọ a ta nọ a riẹ kpahe edikihẹ isi. Okenọ a jọ obọ uwou evaọ Ovatha-Ọre, a tẹ ruẹ esi ọkpokpọ jọ, a te lele iei emaele egba buobu te Jerusalẹm.

Nọ ebuẹva-isi na a te Jerusalẹm, a tẹ nọ nọ: “Bovẹ Ovie Ju nọ a yẹ na ọ rọ? Keme ma ruẹ esi riẹ no eva obọ ovatha-ọre, ma jẹ nyaze re ma gọ e.”

Nọ Herọd Ovie na eva Jerusalẹm o yo kpahe iẹe, udu u te kpoho iei gaga. Fikiere o te se izerẹ ikpehru na ọ tẹ nọ ai oria nọ a te jọ yẹ Kristi na. Nọ a kẹ uyo no Ikereakere na ze, a te yo nọ: “Eva Bẹtelẹhẹm.” Koyehọ, Herọd ọ tẹ ta nọ a rehọ ebuẹva-isi na bru ei ze ọ tẹ ta kẹ ae nọ: “Wha nya eguọlọ ọmọfofa na [ziezi], nọ wha rue riẹ no wha te ta kẹ omẹ, re mẹ nyaze te gọ e ire.” Rekọ, uzẹme riẹ họ, Herọd ọ gwọlọ nọ ọ rẹ ruẹ ọmọ na re o kpei!

Nọ a nyavrẹ no, oware igbunu jọ o tẹ via. Esi nọ a ruẹ okenọ a jọ obọ Ovatha-Ọre na ọ tẹ karo kẹ ai. U re vevẹ, ọnana ọ rọ esi igheghe he, rekọ a rehọ iẹe ze re ọ kpọ ai. Ebuẹva-isi na a te lele iei bẹsenọ ọ rọ daji uwou nọ Josẹf avọ Meri a rọ na.

Nọ ebuẹva-isi na a rueva uwou na, a tẹ ruẹ Meri avọ ọmọfofa riẹ, Jesu. Aikpobi a te ruwẹ kẹe. A tẹ rehọ ekẹ igoru, frankinsẹs, gbe mur no ekpa rai ze rọ kẹe. Uwhremu na, nọ a gwọlọ nọ a re zihe re a ta kẹ Herọd oria nọ ọmọfofa na ọ rọ, Ọghẹnẹ ọ tẹ jọ ewezẹ vẹvẹ ai unu nọ a ru erei hi. Fikiere a tẹ rehọ edhere ọfa zihe kpohọ orẹwho rai.

Ono who roro nọ ọ rehọ esi na nọ ọ jẹ nya evaọ ehru na jẹ kpọ ebuẹva-isi na ze? Kareghẹhọ, esi na o su rai ovavo bru Jesu evaọ Bẹtlẹhẹm ho. Ukpoye, o su rai kpohọ Jerusalẹm oria nọ a jọ ruẹ Herọd Ovie na, ọnọ ọ gwọlọ kpe Jesu. Yọ ọ hai ti ru ere o gbẹ rọnọ Ọghẹnẹ ọ j’owọ re ọ vẹvẹ ebuẹva-isi na unu hu inọ a ta kẹ Herọd oria nọ Jesu ọ rọ họ. Ohwo nọ ọ gwọlọ kpe Jesu na họ ọwegrẹ Ọghẹnẹ, Setan Ẹdhọ na, yọ ọ jẹ rehọ esi na gwọlọ ru ẹgwọlọ riẹ gba. Matiu 2:1-12; Maeka 5:2.

▪ Eme o dhesẹ nọ esi nọ ebuẹva-isi na a ruẹ na ọ jọ esi igheghe he?

▪ Diẹse Jesu ọ jọ okenọ ebuẹva-isi na a rue riẹ?

▪ Fikieme ma jẹ riẹ nọ Setan ọ rehọ esi na ze re ọ kpọ ebuẹva-isi na?