Uzou Avọ 16

Ọwhọ kẹ Egagọ Jihova

EMỌ oni Jesu—emezae edekọ nọ Meri o yẹ—họ Jemis, Josẹf, Saimọn, gbe Judas. Taure enana kpobi a te ti lele Jesu avọ ilele riẹ kpohọ Kapaniọm, okpẹwho nọ o kẹle Abade Galili, ẹsejọhọ a wẹriẹ uwou rai evaọ Nazarẹt re uviuwou na o ruẹse kwa eware nọ a te gwọlọ.

Rekọ fikieme Jesu o je kpohọ Kapaniọm ukpenọ ọ ruabọhọ odibọgba riẹ evaọ Kena, evaọ Nazarẹt, hayo evaọ oria ofa evaọ igbehru Galili? Oware jọ họ, Kapaniọm ọ rọ udevie yọ okpẹwho ologbo o rọ. Ofariẹ, ilele ekpokpọ nọ Jesu o wo kẹle na a be rria Kapaniọm hayo ekẹloma riẹ, fikiere a re du no iwou rai re a te wuhrẹ ai hi.

Evaọ etoke ẹria Kapaniọm riẹ, Jesu o te ru eware igbunu, wọhọ epanọ ọy’omariẹ ọvo ọ ta emerae nọ i lele i rie. Rekọ u kri hi Jesu avọ egbẹnyusu riẹ a tẹ wariẹ ruọ edhere. U te oke okpakpọ no, yọ a bi kpohọ Jerusalẹm re a kpohọ ehaa Ọnyavrẹ ọ 30 C.E. na. Okenọ a jọ obei, ilele riẹ a tẹ jọ oma Jesu ruẹ oware jọ nọ a te ruẹ ẹdẹvo ho.

Wọhọ epanọ Uzi Ọghẹnẹ o ta, a gwọlọ nọ emọ Izrẹl a re dheidhe erao. Fikiere, re o lọhọ kẹ ae, ehreki evaọ Jerusalẹm a rẹ zẹ erao hayo evra fiki ẹjiroro ọnana. Rekọ uzedhe evaọ etẹmpol na a be jọ zẹ, yọ a be wha ahwo na re fiki unuigho buobu nọ a be rọ zẹ kẹ ae.

Avọ ofu, Jesu ọ tẹ rehọ ufi ru oviaviẹ o te le ehreki na ruọ otafe. Ọ tẹ gale igho rai uzou vi jẹ vẹ emẹjẹ rai tu. O te do ku ahwo nọ a be zẹ irueruẹ na nọ: “Wha rehọ eware enana no etenẹ; wha ru uwou Ọsẹ mẹ họ uwou eki hi.”

Nọ ilele Jesu a ruẹ onana, a tẹ kareghẹhọ eruẹaruẹ kpahe Ọmọ Ọghẹnẹ: ‘Ọwhọ uwou ra o d’omẹ oma fia.’ Rekọ ahwo Ju na a tẹ nọ nọ: “Didi oka who dhesẹ, no who ro ru eware nana?” Jesu ọ tẹ kuyo nọ: “Wha raha uwou egagọ-ode ọnana, edẹ esa e gba e, mẹ rẹ kpare iẹe.”

Ahwo Ju na a te roro nọ Jesu ọ be t’ẹme kpahe uzedhe etẹmpol na, fikiere a tẹ nọ nọ: “Udhe-ukpe uvẹ gbe ikpe ezeza a rọ bọ uwou egagọ-ode ọnana, whọ rẹ kpare iẹe evaọ edẹ esa?” Rekọ Jesu ọ be t’ẹme kpahe etẹmpol ugboma riẹ. Yọ ikpe esa uwhremu na, ilele riẹ a tẹ kareghẹhọ eme riẹ enana nọ ọ kparoma no iwhuowhu ze no. Jọn 2:12-22; Matiu 13:55; Luk 4:23.

▪ Nọ eha-orọo Kena na o vrẹ no, eria vẹ Jesu o kpohọ?

▪ Fikieme eva e jẹ dha Jesu, kọ eme o ru?

▪ Eme ilele Jesu a kareghẹhọ nọ a ruẹ owojẹ riẹ?

▪ Eme Jesu ọ ta kpahe ‘etẹmpol nana,’ kọ eme họ otofa ẹme riẹ?