Uzou Avọ 60

Ọdaworiwo Oruaro Uvie Kristi

JESU ọ nyaze abọ Sisaria Filipai no, yọ o bi wuhrẹ ogbotu na kugbe ikọ riẹ. O te ru owhowhovia ogbunu ọnana kẹ ai: “Uzẹme mẹ ta kẹ owhai, ejọ e rọ nọ idikihẹ etenẹ nọ a re ti whuẹ hẹ, bẹsenọ a te ruẹ Ọmọ owho nọ ọ te tha evaọ uvie riẹ.”

O rẹ sai gbe ilele na unu nọ: ‘Eme họ otofa eme Jesu na?’ Wọhọ oka ovo nọ u lele i rie, Jesu ọ tẹ rehọ Pita, Jemis, gbe Jọn lele oma, a tẹ gadiẹ ugbehru okpehru jọ. O wọhọ nọ o jọ oke aso, keme owezẹ u je su ilele na. Nọ Jesu ọ be lẹ na, ọ tẹ jọ iraro rai rẹriẹ. Ova riẹ u te muhọ e lo wọhọ ọre, iwu riẹ e tẹ rọ nwranwranwra wọhọ elo.

Kẹsena, imava, enọ a ti vuhu wọhọ “Mosis avọ Elaeja,” a tẹ roma via a te bi lele Jesu t’ẹme kpahe ‘ọnyavrẹ riẹ nọ o te roma via eva Jerusalẹm.’ O wọhọ nọ ọnyavrẹ na u dhesẹ uwhu gbe ẹkparomatha Jesu. Fikiere, ẹmeọta ọnana u te dhesẹ nọ uwhu omovuọ riẹ na orọnikọ oware nọ a rẹ whaha ha, wọhọ epanọ Pita ọ jẹ gwọlọ ru na.

Avọ aro nọ a kpe fihọ no, ilele na a te bi rri jẹ gaviezọ avọ igbunu. Dede nọ o rọ eruẹaruẹ, o wọhọ oware aruakpọ te epanọ Pita ọ be rọ zọhọ ẹkẹ riẹ fihọ iẹe, ta nọ: “Olori, uwoma ma jọ etenẹ; o tẹ ruọ owhẹ, mẹ rẹ bọ iwou-idhu esa, ovo kẹ owhẹ, ovo kẹ Mosis, ovo kẹ Elaeja.”

Nọ Pita ọ gbẹ rọ ẹme na ẹta na, ẹgho elo ọnwranwra jọ o te ruru ai, urru jọ u te no udevie ẹgho na ze ta nọ: “[Ọnana] họ Ọmọ oyoyou mẹ, ọnọ ọ were omẹ hrọ; wha yo ẹme riẹ.” Nọ a yo urru na, ilele na a te kie vova tu otọ. Rekọ Jesu ọ tẹ ta nọ: “Kparoma, ozọ umu owhai hi.” Nọ a kparoma, a gbẹ ruẹ ohwo ọvo ho ajokpa Jesu.

Nọ a je ruotọ no ugbehru na ze okiokiọ riẹ, Jesu o te juzi nọ: “Wha ta eruaruẹ na kẹ ohwo ọvo ho, bẹsenọ Ọmọ ohwo ọ [rẹ] kpare oma no iwhuowhu no.” Elaeja nọ ọ roma via evaọ eruẹaruẹ na o wha avro họ iroro ilele na. A tẹ nọ nọ: “O tẹ rọ ere kẹvẹ otu ikere-obe a jẹ ta nọ Elaeja ọ rẹ kake tha?”

Jesu ọ tẹ ta nọ: ‘Elaeja ọ ze no, rekọ a riẹ riẹ hẹ.’ Rekọ, Jesu ọ be t’ẹme kpahe Jọn Ọhọahwo-Ame na, ọnọ o ru oghẹrẹ iruo Elaeja. Jọn ọ ruẹrẹ edhere họ kẹ Kristi, wọhọ epanọ Elaeja o ru kẹ Elaesha na.

Ẹvẹ eruẹaruẹ nana ọ rọ ọbọga te, rọ kẹ Jesu gbe ilele na! Eruẹaruẹ na e wọhọ oriruo oruaro Uvie Kristi. O tẹ wọhọ nọ ilele na a ruẹ “Ọmọ ohwo nọ ọ te tha evaọ uvie riẹ,” wọhọ epanọ Jesu ọ yeyaa kẹ ai oka n’ukpo na. Nọ Jesu o whu no, Pita o te kere kpahe oghẹrẹ nọ a rọ ‘ruẹ oruaro Kristi okenọ a jọ ugbehru ọrẹri na.’

Otu Farisi a jọ obọ Jesu gwọlọ oka nọ u re dhesẹ nọ ọye họ ọnọ a jọ Ikereakere na yeyaa kpahe nọ ọ te jọ Ovie nọ Ọghẹnẹ ọ salọ. A kẹ rai oka utioye na ha. Evaọ abọdekọ riẹ, a kẹ ilele ekpekpe Jesu uvẹ re a ruẹ ẹrẹriẹ Jesu wọhọ imuẹro eruẹaruẹ Uvie. Fikiere, Pita o te kere uwhremu na nọ: ‘Fikiere eme eruẹaruẹ na i te muẹro viere.’ Matiu 16:13, Matiu 16:28–17:13; Mak 9:1-13; Luk 9:27-37; 2 Pita 1:16-19.

▪ Taure o te ti whu, ẹvẹ ahwo jọ a rọ ruẹ Kristi nọ ọ be tha evaọ Uvie riẹ?

▪ Evaọ eruẹaruẹ na, eme Mosis avọ Elaeja a ta kugbe Jesu?

▪ Fikieme eruẹaruẹ nana ọ jẹ rọ ọbọga obufihọ kẹ ilele na?