Uzou Avọ 131

Omarọvia Urere, gbe Pẹntikọst 33 C.E.

EVA okejọ Jesu ọ tẹ ruẹrẹhọ nnọ ikọ 11 na kpobi a nyabru ei kpohọ ugbehru jọ evaọ Galili. O wọhọ nọ a ta kẹ ilele efa kpahe ẹguae na, yọ bu vi ahwo 500 ae a kokohọ. Ẹvẹ okokohọ ọnana ọ were te nọ Jesu ọ roma via o te mu ai họ ewuhrẹ!

Evaọ usu eware efa, Jesu ọ tẹ ta kẹ ogbotu obuobu na nnọ Ọghẹnẹ ọ kẹ riẹ udu kpobi no evaọ odhiwu gbe otọakpọ. Ọ tẹ tudu họ ai awọ nọ: “Fikiere wha nya i ru ilele ahwo erẹwho na kpobi, wha họ ae ame evaọ odẹ Ọsẹ gbe Ọmọ gbe ẹzi ọfuafo na, wha wuhrẹ ai re a koko eware nọ me je k’owhai kpobi.”—NW.

Roro kpahe iẹe! A rehọ uwou onana vi ezae, eyae, gbe emaha re a w’abọ evaọ iruo aru-ilele nana. Otu ewọsuọ a te daoma whaha iruo usiuwoma ota gbe ewuhrẹ rai, rekọ Jesu ọ sasa e rai oma nọ: “Ri, mẹ avọ owhai a gbẹ [rọ] kẹse kẹse, makọ te urere akpọ na.” Jesu ọ rọ kugbe ilele riẹ ẹkwoma ẹzi ọfuafo na, re u fiobọhọ kẹ ai ru odibọgba rai gba.

A te kele ai, Jesu ọ roma via kẹ ilele riẹ edẹ 40 nọ ọ kparoma ze no. Evaọ omarọvia enana o wuhrẹ i rai kpahe Uvie Ọghẹnẹ, yọ o fiẹgba họ oware nọ owha-iruo rai o rọ wọhọ ilele riẹ. Ọ tubẹ roma via kẹ omoni riẹ Jemis okejọ o te dhesẹ kẹ ọnana nọ ọ rọwo vẹre he na nnọ ghinọ Ọye họ Kristi na.

Nọ ikọ na a gbẹ rọ Galili, o wọhọ nọ Jesu ọ ta kẹ ai re a zihe kpohọ Jerusalẹm. Nọ ọ jọ obei roma via kẹ ai, ọ tẹ ta kẹ ai nọ: “Wha fou oma no Jerusalẹm ho, rekọ wha hẹrẹ oware nọ Ọsẹ na ọ yeyaa riẹ, onọ wha jọ unu mẹ yo na; keme Jọn ọ rehọ ame họ-ame, rekọ a te rehọ ẹzi ọfuafo họ owhai ame kẹle na.”—NW.

Uwhremu na Jesu ọ tẹ wariẹ ruẹ ikọ riẹ o te su ai vrẹ no okpẹwho na kpohọ ugbobọ Bẹtani, onọ o rọ ukiekpotọ ovatha-ọre ọ Ugbehru Olivi. Avọ igbunu, makọ eware kpobi nọ ọ ta no kpahe odhiwu nọ ọ be te nya kẹle na, a gbe bi roro nọ ọ te rehọ Uvie riẹ mu otọakpọ. Fikiere a tẹ nọ nọ: “Ọnowo, kọ whọ te jọ oke nana zihe uvie na se Izrẹl?”

Ukpenọ ọ wariẹ daoma kpọ iroro ethọthọ rai vi, Jesu o te yo ọvo nọ: “O rọ nọ wha rẹ riẹ oke hayo ezi hi, o nọ Ọsẹ na ọ rọ ogaga obọ riẹ fihọ.” Kẹsena, be wariẹ fiẹgba họ iruo nọ a re ru hrọ, ọ tẹ ta nọ: “Rekọ nọ Ẹzi Ẹri ọ ruọ owhai oma no wha re ti wo ogaga nọ wha ti ro se isẹri mẹ eva Jerusalem gbe Judia kpobi te Sameria je rite ọnyaba akpọ na.”

Nọ a gbe bi rri na, Jesu o te muọ obọ odhiwu họ ẹnya, ẹgho o te ruru ei no ude rai. Nọ o nwene oma ohwo riẹ no, o te muvrẹ kpohọ odhiwu wọhọ ohwo ẹzi. Nọ ikọ 11 na a gbe bi rri ehru na, ezae 2 jọ nọ i fi iwu efuafo họ a tẹ roma via dikihẹ gbae. Enjẹle enana nọ i ku ovioma ohwo họ na a tẹ nọ nọ: “Whai ahwo Galili, eme wha je dikihẹ bi riwẹ kpohọ evaọ obọ ehru? Jesu ọvo nana nọ a jọ abọ rai rehọ vrẹ kpo eva ehru na, jẹ ruọ oghẹrẹ nọ wha ruẹ nọ o bi ro kpohọ ehru na o je ti ro zihe tha.”

Oghẹrẹ nọ Jesu o ro no otọakpọ họ ababọ oma-udhesẹ kẹ ẹgbede avọ ikọ ẹrọwọ riẹ ọvo nọ e rue riẹ. Fikiere oghẹrẹ ovo na o ti ro zihe ze—ababọ oma-udhesẹ kẹ ẹgbede avọ ikọ ẹrọwọ riẹ ọvo nọ e te riẹ nnọ o zihe ze no gbe nnọ ọ zino evaọ ogaga Uvie riẹ.

Ikọ na a tẹ ruotọ no Ugbehru Olivi na, fa Ukiekpotọ Kidrọn vrẹ, a tẹ wariẹ rueva Jerusalẹm. A tẹ jọ obei evaọ ẹmeoyo kẹ ujaje Jesu. Edẹ ikpe e ruemu no, evaọ Ehaa Pẹntikọst 33 C.E. ọrọ ahwo Ju, nọ enwenọ ilele 120 a kokohọ ubrukpẹ ehru evaọ Jerusalẹm, edo wọhọ ofou ọgaga ọ tẹ vọ uwou na. Ikulu erae nọ e wọhọ ẹrọo e tẹ roma via, ọvo o te kiemu uzou omomọvo nọ e jọ etẹe, ilele na kpobi a te mu evẹrẹ sa-sa họ ẹjẹ. Onana họ ekukuo ẹzi ọfuafo nọ Jesu ọ yeyaa riẹ na! Matiu 28:16-20; Luk 24:49-52; 1 Ahwo Kọrint 15:5-7; Iruẹru 1:3-15; 2:1-4.

▪ Amono Jesu ọ rehọ ehrẹ akodẹ kẹ eva ugbehru evaọ Galili, kọ didi ehrẹ ọ kẹ rai?

▪ Didi omosasọ Jesu ọ kẹ ilele riẹ, kọ ẹvẹ ọ te rọ jọ kugbe ai?

▪ Nọ Jesu ọ kparoma ze no, ẹvẹ ọ jọ kugbe ilele riẹ kri te, kọ eme o wuhrẹ i rai?

▪ Ono nọ ọ jọ olele he taure Jesu o te ti whu Jesu ọ roma via kẹ?

▪ Omakugbe ivẹ vẹ Jesu o wo kugbe ikọ riẹ, kọ eme o jọ enana via?

▪ Ẹvẹ Jesu o ti ro zihe ze eva oghẹrẹ ovo nọ ọ rọ nyavrẹ na?

▪ Eme ọ via eva Pẹntikọst 33 C.E.?