Uzou Avọ 14

Oware Nọ Ma Jẹ Rọ Vrẹ

KỌ OHWO jọ o ru owhẹ thọ no ẹdẹjọ?— Kọ o ru eva dha owhẹ hayo ta ekpehre ẹme jọ kẹ owhẹ?— Kọ whọ rẹ rọ oware uyoma nọ o ru owhẹ na ru ei kele?—

Ohwo o te ru ahwo buobu eva dha, a re ru ohwo na kele. Rekọ Jesu o wuhrẹ nnọ ma rẹ rọ vrẹ enọ i ru omai thọ. (Matiu 6:12) Rekọ ẹvẹ otẹrọnọ ohwo na o ru omai thọ ẹsibuobu? Bro ẹse ma rẹ rọ vrẹ riẹe?—

Oye họ oware nọ Pita ọ gwọlọ riẹ. Fikiere ẹdẹ jọ ọ tẹ nọ Jesu nnọ: ‘Kọ mẹ rẹ rọ vrẹ riẹ te isia ihrẹ soso?’ Isia ihrẹ o te he. Jesu ọ ta nọ: ‘Whọ rẹ rọ vrẹ isia udhosa gbe ikpegbihrẹ’ otẹrọnọ ohwo na o ru owhẹ thọ te ere.

Yọ unuẹse buobu! O sae jọ bẹbẹ dede re ma kareghẹhọ eyoma nọ ohwo o ru omai bu te ere, ogbẹrọ ere? Onana họ oware nọ Jesu ọ be ta kẹ omai na: Ma re du dao oma kareghẹhọ unu eyoma nọ amọfa a ru omai hi. A tẹ yare erọvrẹ, ma rẹ rọ vrẹ rae.

Jesu ọ gwọlọ dhesẹ kẹ ilele riẹ epanọ u wuzou te re ma rọ vrẹ amọfa. Fikiere nọ ọ za onọ Pita no, o te gbiku jọ kẹ ilele riẹ. Kọ whọ gwọlọ yo iku na?—

Emamọ ovie jọ ọ jariẹ. O wou gaga. O re tube momo igho kẹ erigbo riẹ evaọ okenọ a tẹ gwọlọ obufihọ. Rekọ ẹdẹ o te te nọ ovie na ọ rọ gwọlọ nọ erigbo riẹ a hwa igho nọ a momo na. A tẹ rọ ọrigbo jọ ze ọnọ ọ riosa igho nọ i bu te isele ima 60. Igho na i bu gaga!

Rekọ ọrigbo na ọ raha igho ovie na kpobi no fikiere ọ sae hwa ugho na zihe he. Ovie na ọ tẹ ta nọ a zẹ ọrigbo na. Ovie na ọ tẹ jẹ ta nọ a rẹ zẹ aye ọrigbo na gbe emọ riẹ gbe eware nọ o wo kpobi. A vẹ rọ ugho nọ a rọ zẹ ae na hwosa kẹ ovie na. Ẹvẹ who roro nọ oma o jọ ọrigbo na?—

O kie-igwẹ kẹ ovie na ọ tẹ lẹ e nọ: ‘Ivie, kẹ omẹ omoke jọ, mẹ te hwa ugho nọ me kru owhẹ kpobi kẹ owhẹ.’ Whọ hae jọ ovie na, eme whọ hai ru ọrigbo na?— Ohrọ ọrigbo riẹ o re ovie na. Fikiere ovie na ọ tẹ rọ vrẹ riẹ. Ọ ta kẹ ọrigbo na nọ ọ kpairoro vrẹ ugho na kpobi. Dai roro eva nọ e were ọrigbo na!

Rekọ eme ọrigbo na o ru? Nọ ọ ruọ otafe ọ tẹ ruẹ ọrigbo ọfa, ọnọ ọ riosa riẹ igho nọ i bu te isele udhusoi. O te kru ibe ọrigbo riẹ na uriohọ ghegheghe, ọrigbo na o te muhọ ẹyọghọ, be ta kẹe nọ: ‘Hwa isele udhusoi nọ who kru omẹ na kẹ omẹ!’ Kọ nọ didi ohwo o re yoma te enẹ, maero nọ ovie na ọ rehọ unuigho oyena kpobi vrẹ riẹ no na?—

Whaọ, ọrigbo nọ ọ riosa isele udhusoi na yọ oyegbere. O wo ugho nọ ọ rẹ rọ hwa oke oyena ha. Fikiere o te kie fihọ aro ibe ọrigbo riẹ ọ tẹ lẹ nọ: ‘Ivie, kẹ omẹ omoke jọ, mẹ te hwa ugho nọ me kru owhẹ na kẹ owhẹ.’ Kọ u fo re ọzae na ọ kẹ ibe ọrigbo riẹ omoke jọ?— Eme whọ hai ru?—

Ọzae nana ọ rrọ eva gaga, ọ wọhọ ovie na ha. Ọ gwọlọ ugho riẹ epanọ a be ta ẹme na. Yọ fikinọ ibe ọrigbo riẹ na o wo ugho ho, o te gbolo iei fihọ uwou-odi. Erigbo efa e ruẹ oware nọ o via na, eva e tẹ dha ae. Ohrọ ọrigbo nọ ọ rrọ uwou-odi na o re rae. A tẹ nyae ta kẹ ovie na.

Oware nọ o via na o dha ovie na eva re. Eva ọrigbo nọ o wo erọvrẹ hẹ na e dha riẹ gaga. O te se i ta kẹe nọ: ‘Whẹ ọrigbo oyoma, kọ mẹ rehọ igho nọ who kru omẹ vrẹ owhẹ? Kọ whọ gbẹ hae rọ vrẹ ibe ọrigbo ra?’

Ọrigbo ababọ erọvrẹ na ọ hai wuhrẹ mi emamọ ovie na. Rekọ o wuhrẹ hẹ. Fikiere ovie na o te gbolo ọrigbo na fihọ uwou-odi bẹsenọ ọ rẹ hwa igho nọ i bu te isele ima 60 na gba no. Yọ ma riẹ nọ ọ sae te jọ uwou-odi wo ugho nọ ọ rẹ rọ hwa zihe kẹ ovie na ha. Fikiere etẹe o ti whu ku.

Nọ Jesu o gbe iku nana re no, ọ tẹ ta kẹ ilele riẹ nọ: “Ere Ọsẹ mẹ nọ ọ rọ obọ odhiwu o re ru owhai omomọvo u re, wha gbẹ rọ vrẹ ọvuọ omoni riẹ no eva ha.”—Matiu 18:21-35.

Binọ mai kpobi ma riọ osa Ọghẹnẹ gaga. Whaọ, ọye ọ tubẹ kẹ omai uzuazọ dede! Fikiere ma te rri osa nọ ma re Ọghẹnẹ, osa nọ amọfa a kru omai u tulo ho. Osa nọ a re omai o wọhọ isele udhusoi nọ ọrigbo na jọ o kru ọdekọ na. Rekọ osa nọ ma re Ọghẹnẹ fiki eware iyoma nọ ma bi ru e wọhọ isele ima 60 nọ ọrigbo na o kru ovie na.

Ọghẹnẹ ọ rrọ wowou gaga. Dede nọ ma bi ru eware iyoma, ọ be rọ vrẹ omai. O kpe omai no bẹdẹ bẹdẹ re ma rọ ere hwosa na ha. Rekọ onana họ oware nọ u fo nọ ma rẹ kareghẹhọ: Okenọ ma tẹ rọ vrẹ ahwo nọ a ru omai thọ ọvo Ọghẹnẹ ọ jẹ rọ vrẹ omai. Kọ oyena o gbẹ rrọ oware nọ ma re roro kpahe?—

Fikiere ohwo jọ o te ru owhẹ thọ rekọ ọ jẹ lẹ, eme who ti ru? Kọ whọ te rọ vrẹ riẹ e?— Kọ ẹvẹ otẹrọnọ o ru owhẹ thọ unuẹse buobu? Kọ whọ te gbẹ rọ vrẹ riẹ e ghele?—

Otẹrọnọ mai họ enọ e be lẹ kẹ erọvrẹ na, kọ ma gbẹ te gwọlọ re ohwo ọdekọ na ọ rọ vrẹ omai?— Fikiere epọvo na ma re ru kẹe. Orọnikọ ma rẹ ta ọvo nọ ma rọ vrẹ riẹ hẹ, rekọ ma rẹ ghinẹ rọ vrẹ riẹ no udu ze. Ma te ru ere, yọ ma bi dhesẹ nọ ma ghinẹ gwọlọ jọ ilele Owuhrẹ Ologbo na.

Re ma riẹ epanọ u wuzou te re ma rọ vrẹ, joma se Itẹ 19:11; Matiu 6:14, 15; gbe Luk 17:3, 4.

[Uwoho nọ o rrọ ẹwẹ-obe avọ 77]

Eme Pita ọ gwọlọ riẹ kpahe erọvrẹ?

[Uwoho nọ o rrọ ẹwẹ-obe avọ 78]

Eme ọ via okenọ ọrigbo na ọ lẹ ovie na re ọ dina kẹe oke nọ ọ rẹ rọ hwa?

[Uwoho nọ o rrọ ẹwẹ-obe avọ 78]

Ẹvẹ ọrigbo na o ru ibe ọrigbo riẹ ọnọ ọ sae hwa ugho nọ o kru rie he?

[Uwoho nọ o rrọ ẹwẹ-obe avọ 80]

Eme ovie na o ru ọrigbo nọ ọ rọ vrẹ hẹ na?

[Uwoho nọ o rrọ ẹwẹ-obe avọ 81]

Eme who re ru otẹrọnọ ohwo jọ ọ ta kẹ owhẹ nọ whọ rọ vrẹ riẹe?