Kọ Oma O rẹ Jọ Owhẹ Goli Ẹsejọ avọ Ozọ nọ U bi Mu Owhẹ?

Rri ọmọ nọ ọ rrọ uwoho na. O wọhọ nọ ọ rrọ goli avọ ozọ nọ u bi mu ei, o gbẹ rrọ ere? Kọ o jọ ere kẹ owhẹ no ẹdẹjọ?— O rẹ via ere kẹ ohwo kpobi ẹsejọ. Ebaibol na ọ ta kpahe idibo Jihova jọ nọ oma o jọ goli avọ ozọ nọ u je mu ae. Ọjọ rai họ Elaeja. Joma wuhrẹ kpahe iẹe.

Elaeja ọ rria Izrẹl ikpe buobu nọ e vrẹ taure a te ti yẹ Jesu. Ehab nọ ọ jọ ovie Izrẹl ọ jẹ gọ Jihova, Ọghẹnẹ uzẹme na ha. Ehab avọ Jezibẹl aye riẹ a jẹ gọ ẹdhọ jọ nọ a re se Ebale. Fikiere ahwo Izrẹl buobu a te mu Ebale họ ẹgọ. Jezibẹl ovie-aye na ọ geva gaga. Yọ ọ jẹ gwọlọ nọ o re kpe idibo Jihova kpobi no, te Elaeja re. Kọ whọ riẹ oware nọ Elaeja o ru?—

Elaeja ọ tẹ dhẹ. Ọ dhẹ nyai dhere eva eghogho utho jọ evaọ obọ ẹwọ. Eme who roro nọ o lẹliẹ e riẹ dhẹ?— Ozọ u je mu ei. Rekọ u fo re ozọ u mu Elaeja ha. Fikieme ma rọ ta ere? Keme ọ riẹ nọ Jihova ọ sai fi obọ họ kẹe. Jihova o dhesẹ ogaga riẹ kẹ Elaeja no ẹdẹjọ. Ẹdẹjọ nọ Elaeja ọ lẹ, Jihova o vi erae no obọ odhiwu ze. Fikiere Jihova ọ sai fi obọ họ kẹ Elaeja evaọ onana re.

Nọ Elaeja ọ jọ eva eghogho utho na, Jihova ọ tẹ nọe nọ: ‘Eme who bi ru evaọ etenẹ?’ Elaeja o te yo nọ: ‘Mẹ ọvo họ ohwo nọ o kiọkọ nọ ọ be gọ owhẹ. Mẹ rrọ goli, yọ ozọ u bi mu omẹ nọ a ti kpe omẹ no.’ Elaeja o je roro nọ a kpe idibo Jihova kpobi no. Rekọ Jihova ọ tẹ ta kẹ Elaeja nọ: ‘Ijo, whọ ọvo o kiọkọ họ. Me gbe wo idibo nọ i bu te idu ihrẹ (7,000) nọ e gbẹ be gọ omẹ. Jọ ozọ u mu owhẹ hẹ. Iruo e gbẹ riẹ nọ who ti ru kẹ omẹ.’ Kọ who roro nọ eva e were Elaeja nọ o yo ẹme nana?—

Eme who wuhrẹ no oware nọ o via kẹ Elaeja na ze?— Whọ jọ ozọ umu owhẹ hẹ; who roro nọ whẹ ọvo whọ rrọ goli hi. Ahwo buobu a riẹ nọ a you Jihova je you owhẹ re. U te no ere no, Jihova o wo ogaga ulogbo, yọ o ti fi obọ họ kẹ owhẹ ẹsikpobi. Kọ eva e gbẹ be were owhẹ nọ whọ rọ riẹ nọ Jihova gbe amọfa a rrọ kugbe owhẹ?—