A Ru Oreva Jihova

Eyo Eme Urere Jesu

EVAỌ owọwọ Nisan 14, 33 C.E., Jesu Kristi, avọ ikọ 11 ẹrọwọ riẹ a tẹ keria wariẹ emẹjẹ họ evaọ ubrukpẹ egediege evaọ Jerusalẹm. Nọ ọ riẹ nọ uwhu riẹ o kẹle no, ọ tẹ ta kẹ ae nọ: “Enẹna mẹ gbẹ rọ kugbe owhai.” (Jọn 13:33, NW) Eva uzẹme, Judas Iskariọt ọ ruọ edhere no re ọ gbẹguae kugbe ezae imuemu enọ e gwọlọ kpe Jesu.

Ohwo ọvo evaọ ubrukpẹ egediege na nọ ọ riẹ epanọ ẹme na ọkpata te vrẹ Jesu ọ rọ họ. Ọ riẹ ziezi nọ ọ be te ruẹ-uye. Jesu ọ tẹ jẹ riẹ nọ ikọ riẹ a te dhẹ siẹe ba evaọ aso ọyena. (Matiu 26:31; Zekaraya 13:7) Nọ onana o jọ uvẹ urere Jesu nọ ọ rẹ rọ t’ẹme kugbe ikọ riẹ taure o te bi ti whu na, o rẹ sai mu omai ẹro nọ eme urere riẹ na e tẹro vi eware nọ e rọ oja gaga.

“Wha Ru Onana Roro Omẹ”

Avọ ikọ ẹrọwọ riẹ, Jesu ọ tẹ rọ ehaa ọkpokpọ mu nọ u ti nwene ehaa Ọnyavrẹ ahwo Ju na. Pọl ukọ na o se rie ‘emu owọwọ Olori na.’ (1 Ahwo Kọrint 11:20) Nọ ọ rehọ ebrẹdi nọ e kare ẹvi, Jesu ọ tẹ lẹ. O te bru ebrẹdi na jẹ rehọ iẹe kẹ ikọ riẹ. Ọ tẹ ta nọ: “Wha rehọ, wha re; onana u dikihẹ kẹ oma mẹ.” Ọ tẹ jẹ rehọ egho udi, ọ tẹ kẹ olẹ uyere ọ tẹ rehọ iẹe kẹ ikọ riẹ, ta nọ: “Whai kpobi wha da e; keme onana u dikihẹ kẹ azẹ mẹ orọ ọvọ na, nọ o hwẹ kẹ ibuobu fiki erọvrẹ izieraha.”—Matiu 26:26-28, NW.

Eme họ otofa ehaa ọnana? Wọhọ epanọ Jesu o dhesẹ, ebrẹdi na u dikihẹ kẹ ugboma ọgbagba riẹ. (Ahwo Hibru 7:26; 1 Pita 2:22, 24) Udi na u dikihẹ kẹ azẹ Jesu nọ o hwẹ, onọ u ti ru erọvrẹ izieraha lọhọ. Azẹ idheidhe riẹ na o te je ru ọvọ ọkpokpọ na gba evaọ udevie Jihova Ọghẹnẹ gbe ahwo 144,000 na, enọ i re ti su kugbe Jesu evaọ obọ odhiwu uwhremu na. (Ahwo Hibru 9:14; 12:22-24; Eviavia 14:1) Ẹkwoma ikọ riẹ nọ o zizie re a wo abọ evaọ emu ọnana, Jesu o te dhesẹ nọ a ti wo abọ kugbei evaọ Uvie obọ odhiwu na.

Kpahe ehaa emu ekareghẹhọ ọnana, Jesu o te juzi nọ: “Wha ru onana roro omẹ.” (Luk 22:19) Ẹhẹ, Emu Owọwọ Olori na ọ rẹ te jọ ehaa ẹgbukpe, wọhọ epanọ ehaa Ọnyavrẹ na ọ jọ. Nọ a je ru ehaa Ọnyavrẹ na fiki esiwo emọ Izrẹl no igbo obọ Ijipti, Emu Owọwọ Olori na ọ te rẹriẹ ova ku esiwo nọ ọ mae rro—esiwo ahwo-akpọ no igbo izieraha gbe uwhu. (1 Ahwo Kọrint 5:7; Ahwo Ẹfẹsọs 1:7) Ofariẹ, ọ be kareghẹhọ ahwo nọ e be re ebrẹdi jẹ da udi oka na kpahe uvẹ obaro rai nọ a te rọ jọ ivie gbe izerẹ evaọ Uvie Ọghẹnẹ obọ odhiwu.—Eviavia 20:6.

Uwhu Jesu Kristi họ oware nọ ọ mae ghinẹ rro kpobi evaọ ikuigbe ohwo-akpọ. Ahwo nọ a wo ovuhumuo kẹ oware nọ Jesu o ru a bi y’ẹme kẹ ujaje riẹ kpahe Emu Owọwọ Olori na: “Wha ru onana roro omẹ.” Isẹri Jihova a re ru ehaa ekareghẹhọ uwhu Jesu kukpe kukpe evaọ ẹdẹ nọ u kie fihọ Nisan 14. Evaọ 1996 ẹdẹ ọnana o te kie fihọ April 2, nọ ọre o te kie diwi no. Ma rọ oma oruọruọ zizie owhẹ kpohọ Ọgwa Uvie nọ ọ rọ oria ra.

“Mẹ Kẹ Owhai Uzi Okpokpọ”

U te no Emu Owọwọ Olori na nọ o ro mu no, Jesu o wo ehrẹ urere jọ kẹ ikọ riẹ. Dede nọ a wuhrẹ i rai ziezi no, eware efa buobu e gbẹ riẹ nọ ezae enana a re wuhrẹ. A riẹ ẹjiroro Ọghẹnẹ kẹ Jesu, rọ kẹ ai, hayo rọ kẹ obaro na vọvọ ziezi hi. Rekọ Jesu ọ daoma ru eme enana kpobi vevẹ kẹ ai evaọ oke onana ha. (Jọn 14:26; 16:12, 13) Ukpoye, ọ t’ẹme kpahe oware nọ u wuzou gaga kẹ ai. Ọ ta nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo.” Jesu o te fibae nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:34, 35.

Evaọ edhere ọvẹ onana o jẹ rọ “uzi okpokpọ”? Whaọ, Uzi Mosis na o ta nọ: “Who re you ọrivẹ ra epanọ who you oma ra.” (Iruo-Izerẹ 19:18) Ghele na, Jesu o se ilele riẹ re a dhesẹ uyoyou omolahiẹ kẹ amọfa nọ o rẹ nyate oria nọ ohwo ọ jẹ rọ uzuazọ riẹ kẹ ibe Ileleikristi efa. Dede, ‘uzi uyoyou’ u re je wo iruo re evaọ eware esese. Evaọ eyero kpobi olele Jesu Kristi ọ rẹ rọ ẹwẹ obọ riẹ j’owọ na re o dhesẹ uyoyou ẹkwoma obufihọ kẹ amọfa evaọ ẹzi gbe oghẹrẹ ọfa.—Ahwo Galesha 6:10.

Evaọ aso urere uzuazọ otọakpọ Jesu ọnana, uyoyou o wọ Jesu re ọ lẹ se Jihova Ọghẹnẹ fiki ilele riẹ. Usu eware nọ ọ lẹ kẹ họ: “Enana erọ eva akpọ na, me bi bru owhẹ tha. Ọsẹ ọrẹri, rehọ odẹ ra sẹro enọ whọ kẹ omẹ na, re a tẹ jọ ọvo, wọhọ epanọ ma rọ ọvo na.” (Jọn 17:11) O rọ oware nọ a re muẹrohọ inọ evaọ olẹ riẹ se Ọsẹ riẹ, Jesu ọ lẹ kẹ okugbe uyoyou ilele riẹ. (Jọn 17:20-23) U fo re ‘a you ohwohwo wọhọ epanọ Jesu o you rai.’—Jọn 15:12.

Ikọ ẹrọwọ na a yoẹme urere Jesu. Ma rẹ gaviezọ kẹ ijaje riẹ na re. Evaọ “edẹ urere” obẹbẹ onana, uyoyou gbe okugbe evaọ udevie egegagọ uzẹme o mae rọ oja vi ofa. (2 Timoti 3:1) Uzẹme, Ileleikristi uzẹme a re yoẹme kẹ ijaje Jesu je dhesẹ uyoyou oniọvo. Onana u kugbe ujaje riẹ re a ru ehaa Emu Owọwọ Olori na.