Jihova Ọ Rẹ Kẹ Enọ Oma O Rrọ No Ẹgba

“[Jihova] ọ rẹ rehọ eri kẹ enọ oma o rẹ rọ, ọ vẹ jẹ rehọ ogaga kẹ eyẹlẹ.”—AIZAYA 40:29.

 1. Dhesẹ ẹgba nọ ọ rọ evaọ eware nọ Ọghẹnẹ ọ ma.

JIHOVA o wo ogaga nọ u wo umuo ho. Yọ ẹvẹ ẹgba nọ ọ rọ eware nọ ọ ma ọ rro te! Ogẹgẹ-emama osese na—uzedhe okwakwa nọ a rọ ma eware kpobi na—o kawo te epanọ ogẹgẹ ame kpobi u ro wo ogẹgẹ-emama urii-udhusoi.a Uzuazọ kpobi evaọ akpọ mai na o roma hwa ẹroro nọ ogẹgẹ-emama u re wo no ọre ze. Rekọ bro ẹroro ọre o gwọlọ re uzuazọ otọakpọ o sae gbẹ nyaharo? Abọ ọvuọvo ọrọ ẹroro ima-odu nọ o bi no Ọre na ze họ onọ u bi te Otọakpọ na. Ghele na, “ẹroro ọsese nọ o bi kie no Ọre na ziọ Otọakpọ na . . . ọ rehọ asia 100,000 bu vi ẹroro kpobi nọ a be jọ iwou-eware-ikuo akpọ na ro ruiruo,” ere ọgba-ikelakele na, Sir Fred Hoyle, ọ ta evaọ obe riẹ, Astronomy.

 2. Whọ tẹ gwọlọ tae kpẹkpẹe, eme Aizaya 40:26 o ta kpahe ogaga Jihova?

² Makọ ma roro kpahe ogẹgẹ-emama na hayo ma rẹriẹ ovao ku ehrugbakpọ orerede na, ogaga ulogbo Jihova u re gb’omai unu. Agbẹta nọ ọ sae rọ ta nọ: “Wha kpare aro rai kpo ehru re wha ri: ono ọ ma enana kpobi? Ono ọ rehọ enana kpobi ọvuọvo ze, o je mu edẹ kẹ ai kpobi; fiki ẹgba ologbo riẹ, ọvuọvo o vo rie ei ẹro ho.” (Aizaya 40:26) Ẹhẹ, Jihova o wo ‘ogaga,’ yọ ọye họ Ehri “ẹgba ologbo” nọ a rọ ma ehrugbakpọ na soso.

O Gwọlọ Vi Ogaga Gheghe

 3, 4. (a) Eware jọ vẹ e rẹ sae lẹliẹ oma rọ omai? (b) Didi onọ o gwọlọ erorokpahe?

³ Ọghẹnẹ o wo umuo evaọ ogaga ha, rekọ oma o rẹ rọ ahwo-akpọ. Oria nọ ma nya kpobi, ma rẹ ruẹ ahwo nọ oma o be rọ. A rẹ rọwo ze avọ oma nọ o rọ rai no, a re kpohọ iruo hayo isukulu avọ oma nọ o rọ rai no, a re kpozi avọ oma nọ o rọ rai no, yọ a re kiẹzẹ orọnikọ avọ oma nọ o rọ rai no ọvo ho rekọ oma nọ u bruku no. Ahwo jọ a bi roro nọ orọnọ o sae lọhọ a hae dhẹ kpohọ oria jọ re a serihọ ziezi. Wọhọ idibo Jihova, oma o rẹ rọ omai re, keme uzuazọ omarọkẹ Ọghẹnẹ mai o gwọlọ omodawọ ogaga. (Mak 6:30, 31; Luk 13:24; 1 Timoti 4:8) Yọ eware efa buobu e riẹ nọ i bi mi omai ogaga.

⁴ Dede nọ ma rọ Ileleikristi, a ko omai dhere no ebẹbẹ nọ i bi te ahwo kpobi hi. (Job 14:1) Ẹyao, ẹbẹbẹ ugho, hayo idabolo efa nọ e vọ uzuazọ nẹnẹ na e rẹ sae lẹliẹ udu no omai awọ, avọ ewhrehe nọ o re noi ze. Edawọ nọ i re te enọ a bi kpokpo fiki ẹrẹreokie i fiba use-abọ enana. (2 Timoti 3:12; 1 Pita 3:14) Fiki otunyẹ ekẹdẹ kẹdẹ erọ akpọ na gbe ọwọsuọ nọ ọ rọ kẹ iruo usiuwoma ota Uvie mai, oma o sae rọ omai otujọ te epanọ ma jẹ gwọlọ sioma kpemu evaọ iruo Jihova. Ofariẹ, evaọ omodawọ re ọ raha ẹgbakiete mai kẹ Ọghẹnẹ, Setan Ẹdhọ na ọ be rehọ oware nọ u te rie obọ kpobi ruiruo. Kọ ẹvẹ ma sai ro wo ogaga abọ-ẹzi nọ ma gwọlọ re oma o se omai ba ẹrọ re ma siọ emu ba ekpohọ?

 5. Fikieme o jẹ gwọlọ vi ogaga ohwo-akpọ evaọ ẹwhaharo odibọgba Ileleikristi na?

⁵ Rọkẹ ogaga abọ-ẹzi, ma rẹ rẹro so Jihova, Ọnọma nọ o wo ogaga kpobi na. Pọl ukọ na o dhesẹ nọ odibọgba Ileleikristi na o te gwọlọ vi ogaga gheghe orọ ahwo-akpọ sebaẹgba na. O kere nọ: “Ma wo efe ọnana eva eware nọ a rehọ ẹkpẹ ma, yọ ogaga ulogbo nọ othesiwa nọ o riẹe kọ orọ Ọghẹnẹ, orọnikọ obọ mai u nọ ze he.” (2 Ahwo Kọrint 4:7) Ileleikristi nọ a wholo a be wha “iruo ahwo-ọruẹrẹhọ” haro avọ obufihọ egbẹnyusu rai enọ i wo ẹruore otọakpọ. (2 Ahwo Kọrint 5:18; Jọn 10:16; Eviavia 7:9) Nọ mai ahwo-akpọ sebaẹgba ma bi ru iruo Ọghẹnẹ evaọ otọ ukpokpoma na, ma rẹ sae rehọ ogaga mai ọvo ru ei hi. Jihova ọ be rọ ẹkwoma ẹzi ọfuafo riẹ fiobọhọ k’omai, fikiere oyẹlẹ mai u bi dhesẹ ogaga riẹ via. Yọ ẹvẹ omosasọ nọ ma wo o rro te evaọ imuẹro na nnọ “ỌNOWO ọ rẹ kpare okiẹrẹe dikihẹ”!—Olezi 37:17.

‘Ọghẹnẹ Họ Ẹgba Mai’

 6. Ẹvẹ Ikereakere na e rọ k’omai imuẹro nnọ Jihova họ Ehri ẹgba mai?

⁶ Ọsẹ obọ odhiwu mai o wo “ẹgba ologbo” yọ o rẹ lọlọhọ re ọ k’omai ẹgba. Evaọ uzẹme, a ta k’omai nọ: “[Jihova] ọ rẹ rehọ eri kẹ enọ oma o rẹ rọ, ọ vẹ jẹ rehọ ogaga kẹ eyẹlẹ. Makọ emoha na dede aro o reti bi ae, oma o vẹte rọ ae, eri o veti kpe ovrawha na; rekọ a te tua eri enọ e be hẹrẹ ỌNOWO na, a ti wo ibekpe wọhọ erọ ugo, a te dhẹ ohrẹ oma o rẹ rọ ae he, a te nyaonya aro o re bi ae he.” (Aizaya 40:29-31) Fiki otunyẹ nọ o bi vihọ, oma o rẹ sae jọ omai ẹsejọ wọhọ ọdhẹ-ohrẹ nọ oma o rọ no ọnọ o wọhọ nọ awọ riẹ ọ gbẹ te sae wọe he. Rekọ ma kẹle ekuhọ ohrẹ uzuazọ na gaga no, yọ ma re serihọ họ. (2 Iruẹru-Ivie 29:11) Ọwegrẹ mai, Ẹdhọ na, o bi ghoro wọhọ ‘okpohrokpo nọ o bi denu,’ yọ ọ gwọlọ d’omai ji. (1 Pita 5:8) Joma kareghẹhọ nnọ “ỌNOWO họ eri gbe ojese” mai, yọ o ru eruẹrẹfihotọ buobu no re ọ rọ “rehọ eri kẹ enọ oma o rẹ rọ.”—Olezi 28:7.

 7, 8. Didi imuẹro e riẹ inọ Jihova ọ kẹ Devidi, Habakuk, gbe Pọl ẹgba?

⁷ Jihova ọ kẹ Devidi ẹgba nọ ọ rẹ rọ nyaharo ghelọ ezadhe ilogbo. Avọ ẹrọwọ gbe evaifihọ kpobi, Devidi o te kere nọ: “Ọghẹnẹ ọ tẹ rọ kugbe omai, ma re ru ikpeware; ọye họ ọnọ o re ti thihi ewegrẹ mai họ otọ.” (Olezi 60:12) Jihova ọ tẹ jẹ rọ ẹgba kẹ Habakuk re ọ sai ru iruo riẹ gbunu wọhọ ọruẹaro. Enẹ Habakuk 3:19 o ta: “Ọghẹnẹ, ỌNOWO na, ọye họ eri mẹ; o ru awọ mẹ wọhọ awọ ugbosu-aye, o ru omẹ nya eria ikpehru mẹ.” Oriruo ọfa nọ a re muẹrohọ họ ọrọ Pọl, ọnọ o kere nọ: “Mẹ rẹ sai ru eware kpobi eva [Ọghẹnẹ nọ ọ be] kẹ omẹ eri.”—Ahwo Filipai 4:13.

⁸ Wọhọ Devidi, Habakuk, gbe Pọl, ma re fi ẹrọwọ họ ẹgba Ọghẹnẹ nọ ọ rẹ rọ k’omai ogaga je fi ẹrọwọ họ ogaga riẹ nọ o re ro siwi omai. Nọ ma riẹ nnọ Olori Osu na Jihova họ Ehri “ẹgba ologbo” mai na, joma t’ẹme kpahe idhere jọ nọ ma re ro wo ogaga abọ-ẹzi no eruẹrẹfihotọ nọ Ọghẹnẹ ọ rọ kẹ buobu na ze.

Eruẹrẹfihotọ Abọ-Ẹzi nọ E rẹ k’Omai Ẹgba

 9. Didi abọ ebe Ileleikristi i wo evaọ ẹkuọ mai?

⁹ Uwuhrẹ owhawha orọ Ikereakere na avọ obufihọ ebe Ileleikristi e rẹ sae k’omai ẹgba jẹ th’omai. Ọso-ilezi na ọ so nọ: “O ghale ohwo nọ . . . awere riẹ ọ rẹ jọ evaọ uzi ỌNOWO; evaọ uzi riẹ ọ jẹ ghọghọ t’aso t’uvo. Ọ rẹ te jọ wọhọ ure nọ a kọ họ akotọ ame, nọ o rẹ mọ ubi evaọ ezi riẹ, ebe riẹ i re lo gbe he. Koware koware nọ o ru, u re woyei obọ.” (Olezi 1:1-3) Wọhọ epanọ ma rẹ re emu re ma sai kru oma ga na, u fo re ma rehọ emu abọ-ẹzi nọ Ọghẹnẹ ọ be rọ kẹ ẹkwoma Ẹme riẹ gbe ebe Ileleikristi na re ma sẹro ẹgba abọ-ẹzi mai. Fikiere, emamọ uwuhrẹ gbe eroro e r’oja.

10. Okevẹ ma sai ro duku oke rọkẹ uwuhrẹ gbe eroro?

¹⁰ O rẹ ghinẹ kẹ erere re ma roro kpahe “eware ididi Ọghẹnẹ.” (1 Ahwo Kọrint 2:10) Rekọ okevẹ ma sai ro duku oke rọkẹ eroro? Aiziki ọmọ Abraham ọ “nya e lẹ eva udhude na oke owọwọ.” (Emuhọ 24:63-67) Devidi ọso-ilezi na ọ ‘jẹ hai roro kpahe Ọghẹnẹ eva aso.’ (Olezi 63:6) Ma rẹ sai wuhrẹ Ẹme Ọghẹnẹ je roro kpahe iẹe evaọ ohiohiẹ, evaọ owọwọ, eva aso—uzẹme, eva oke kpobi. Uwuhrẹ gbe eroro otiọye na i re su kpohọ ọruẹrẹfihotọ ọbọga abọ-ẹzi ọrọ Jihova ọfa—olẹ.

11. Fikieme ma je se olẹ ikẹse kẹse gboja gaga?

¹¹ Olẹ ikẹse kẹse se Ọghẹnẹ u re fiobọhọ kẹ omai ẹgba. Fikiere joma “hẹ lẹ kẹse kẹse.” (Ahwo Rom 12:12) Ẹsejọ, u re fo re ma ru ugogo ayare rọkẹ areghẹ gbe ẹgba nọ ma rẹ sai ro thihakọ odawọ. (Jemis 1:5-8) Joma yere je jiri Ọghẹnẹ re nọ ma te muẹrohọ orugba ẹjiroro riẹ hayo ruẹ nọ ọ k’omai ẹgba no nọ ma rẹ rọ nyaharo evaọ iruo riẹ. (Ahwo Filipai 4:6, 7) Ma te bigba Jihova evaọ olẹ, o re vu omai wa vievie he. Devidi ọ so nọ: “Ri, Ọghẹnẹ họ ofiobọhọ mẹ.”—Olezi 54:4.

12. Fikieme ma jẹ lẹ Ọghẹnẹ kẹ ẹzi ọfuafo riẹ?

¹² Ọsẹ obọ odhiwu mai ọ rẹ k’omai ẹgba je ru omai ga ẹkwoma ẹzi ọfuafo, hayo ogaga iruo riẹ. Pọl o kere nọ: “Mẹ kieiguẹ kẹ Ọsẹ na, . . . re ọ ruẹse ru owhai wo efe oruaro riẹ, re ọ jẹ kẹ owhai eri avọ ogaga fiki Ẹzi riẹ.” (Ahwo Ẹfẹsọs 3:14-16) Joma lẹ kẹ ẹzi ọfuafo, fievahọ nnọ Jihova ọ te rehọ iẹe ghale omai. Jesu ọ jiroro nọ: Otẹrọnọ ọmọ ọ yare emeri, kọ ọsẹ oyoyou ọ rẹ kẹe araomuomu? Vievie. Fikiere, o te ku ei họ nọ: “Whai enọ [e rọ erahaizi fikiere evaọ oghẹrẹ jọ a tẹ rọ] i yoma wha tẹ riẹ epanọ wha rẹ rọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ te re?” (Luk 11:11-13) Joma rehọ evaifihọ itieye na lẹ jẹ kareghẹhọ ẹsikpobi nọ a rẹ sai ru idibo ẹrọwọ Ọghẹnẹ wo “ogaga” ẹkwoma ẹzi riẹ.

Ukoko na Yọ Obufihọ Ẹgba

13. Ẹvẹ ma re rri iwuhrẹ Ileleikristi?

¹³ Jihova ọ be k’omai ẹgba ẹkwoma iwuhrẹ ukoko Ileleikristi na. Jesu ọ ta nọ: “Oria nọ imava hayo imasa a rehọ odẹ mẹ koko họ, mẹ rẹ jọ etẹe eva udevie rai.” (Matiu 18:20) Okenọ Jesu ọ yeyaa eyena, ọ jẹ t’ẹme kpahe eware nọ e gwọlọ ẹromuhọ enọ e be kobaro evaọ ukoko na. (Matiu 18:15-19) Ghele na, eme riẹ i kiekpahe iwuhrẹ mai kpobi, ikokohọ na, enọ a rẹ rọ olẹ muhọ je kuhọ evaọ odẹ riẹ. (Jọn 14:14) Fikiere o rọ uvẹ-ọghọ re ma kpohọ omakugbe Ileleikristi itieye na, o tẹ make rọnọ umutho ahwo jọ ọvo a riẹ hayo a bu te udhusoi-akuakpe ẹko buobu. Fikiere joma dhesẹ uyere kẹ omakugbe enana nọ a ruẹrẹhọ re e bọ omai ga evaọ abọ-ẹzi jẹ kpakpa omai kẹ uyoyou gbe iruo ezi na.—Ahwo Hibru 10:24, 25.

14. Didi erere ma bi wo no omodawọ ekpako Ileleikristi ze?

¹⁴ Ekpako Ileleikristi a rẹ kẹ obufihọ gbe uduotahawọ abọ-ẹzi. (1 Pita 5:2, 3) Pọl o fiobọhọ kẹ jẹ tuduhọ ikoko nọ o je weze kpohọ na awọ, wọhọ epanọ esẹro enyawariẹ a bi ru nẹnẹ na. Evaọ uzẹme, oma o jẹ kpakpa iẹe re ọ jọ kugbe ibe enọ e rọwo re a tuduhọ ohwohwo awọ. (Iruẹru 14:19-22; Ahwo Rom 1:11, 12) Joma dhesẹ ovuhumuo ẹsikpobi kẹ ekpako mai na gbe esẹro Ileleikristi efa, enọ i w’obọ ulogbo evaọ ẹgba abọ-ẹzi nọ a be k’omai.

15. Ẹvẹ ibe enọ e rọwo evaọ ukoko mai a rọ rrọ “omosasọ”?

¹⁵ Ibe enọ e rọwo nọ e rọ ukoko mai a sae jọ “omosasọ” k’omai. (Ahwo Kọlọsi 4:10, 11) Wọhọ ‘egbẹnyusu uzẹme’ a rẹ sai fiobọhọ k’omai evaọ oke uye. (Itẹ 17:17) Wọhọ oriruo, okenọ a siobọno idibo Ọghẹnẹ 220 jọ no ega-uye Sachsenhausen evaọ otọ iroiro Nazi evaọ 1945, a rẹriẹ ovao ku onya owotọ ikilomita 200. A jẹ nya usu, enọ i dina kru oma ga a jẹ rehọ umutho ekẹkẹ nọ e jariẹ ro ghelie enọ oma o rọ no. Eme o no rie ze? Evaọ onya uwhu nọ ahwo 10,000 nọ a gbẹ jọ ega-uye na a jo whu, makọ omọvo Isẹri Jihova o whu hu. Iku itieye na, enọ e rẹ roma via evaọ ebe Watch Tower na, nọ i kugbe Yearbook of Jehovah’s Witnesses avọ Jehovah’s Witnesses—Proclaimers of God’s Kingdom na, i dhesẹ nọ Ọghẹnẹ ọ rẹ kẹ ahwo riẹ ẹgba, re oma o se ae ba ẹrọ.—Ahwo Galesha 6:9.b

Ẹgba no Odibọgba Mai Ze

16. Ẹvẹ abọ-owo ẹsikpobi evaọ odibọgba na ọ sae rọ bọ edikihẹ abọ-ẹzi mai ga?

¹⁶ Abọ nọ ma re wo ẹsikpobi evaọ iruo usiuwoma ọta Uvie na o rẹ k’omai ẹgba abọ-ẹzi. Iruẹru itieye na i re fiobọhọ k’omai tẹrovi Uvie Ọghẹnẹ je fiẹrohọ obaro ebẹdẹ bẹdẹ avọ irẹro omawere riẹ. (Jud 20, 21) Eyaa Ikereakere na nọ ma rẹ t’ẹme kpahe evaọ odibọgba mai na e rẹ k’omai ẹruore je ru omai gbae mu wọhọ Maeka ọruẹaro na, ọnọ ọ ta nọ: “Odẹ [Jihova, NW ] Ọghẹnẹ mai ma rẹ rọ nya bẹdẹ bẹdẹ.”—Maeka 4:5.

17. Didi ẹjiroro a kẹ kpahe obe uwuhrẹ Ebaibol?

¹⁷ Usu mai kugbe Jihova o rẹ ga viere evaọ okenọ ma tẹ be rehọ Ikereakere na ruiruo ziezi evaọ ewuhrẹ amọfa. Wọhọ oriruo, okenọ whọ tẹ be rehọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na ru uwuhrẹ, o rẹ jọ oware areghẹ re a se jẹ t’ẹme kpahe ikereakere jọ nọ a fodẹ na. Onana u re fiobọhọ kẹ ọmọ-uwuhrẹ na je ru otoriẹ abọ-ẹzi mai ga viere. Otẹrọnọ ọmọ-uwuhrẹ o wo ẹbẹbẹ kpahe otoriẹ uzoẹme Ebaibol hayo ọtadhesẹ jọ, a rẹ sai wuhrẹ uzoẹme ovo evaọ obe Eriariẹ na te isiava hayo vrẹ ere. Ẹvẹ o rẹ were omai te re ma ruẹrẹ oma kpahe ziezi jẹ daoma viere ro fiobọhọ k’amọfa sikẹle Ọghẹnẹ!

18. Dhesẹ epanọ a be rọ rehọ obe Eriariẹ na ruiruo ziezi.

¹⁸ K’ukpe k’ukpe, a be rehọ obe Eriariẹ na ruiruo ziezi ro fiobọhọ kẹ ahwo udhusoi-akuakpe ẹko buobu zihe ro idibo Jihova nọ e roma kẹ no, yọ onana u kugbe ahwo nọ a wuhrẹ Ebaibol na n’otọ ze he. Wọhọ oriruo, okenọ ọ jọ ọmaha, ọzae Hindu jọ evaọ Sri Lanka o yo Osẹri jọ nọ ọ jẹ ta kpahe Aparadase. Ikpe jọ e vrẹ no ọzae na ọ tẹ nyabru aye na, ọzae aye na o te muọ uwuhrẹ Ebaibol họ kugbei. Evaọ uzẹme, ọmoha na ọ jẹ hae nyaze kẹ uwuhrẹ na kẹdẹ kẹdẹ, a te wuhrẹ obe Eriariẹ na reno evaọ etoke kpẹkpẹe. O te muọ iwuhrẹ na kpobi họ ẹnya, jẹ hẹrioma no usu kpobi kugbe egagọ riẹ vẹre, o te zihe ruọ owhowho Uvie. Okenọ ọ họ-ame, yọ o muọ Ebaibol họ ewuhrẹ kugbe ogbẹnyusu riẹ jọ no.

19. Nọ ma be kake gwọlọ Uvie na, eme o re mu omai ẹro?

¹⁹ Ẹkake gwọlọ Uvie na o rẹ wha oghọghọ nọ o rẹ k’ẹgba s’omai. (Matiu 6:33) Dede nọ ma be nyaku edawọ sa-sa, ma gbẹ be rọ evawere avọ ọwhọ whowho emamọ usi na. (Taitọs 2:14) Ibuobu mai e be nyate ute ọ iruo ọkobaro oke-kpobi na, yọ ejọ i bi ruiruo evaọ eria nọ a mae jọ gwọlọ etausiuwoma. Makọ ma be rọ oghọghọ wha isiuru Uvie na haro evaọ idhere nana hayo idhere efa, ma wo evaifihọ nnọ iruo mai gbe uyoyou nọ ma dhesẹ kẹ odẹ riẹ e te thọrọ Jihova ẹro ho.—Ahwo Hibru 6:10-12.

Nyaharo Evaọ Ẹgba Jihova

20. Ẹvẹ ma re ro dhesẹ nọ ma be rẹro so Jihova kẹ ẹgba?

²⁰ Evaọ edhere kpobi, joma dhesẹ nọ ma fiẹrohọ Jihova jẹ rẹro so iẹe kẹ ẹgba. Ma rẹ sai ru ere ẹkwoma eroruiruo eruẹrẹfihotọ abọ-ẹzi nọ ọ be k’omai ẹkwoma ‘ọrigbo ẹrọwọ na.’ (Matiu 24:45) Uwuhrẹ Ẹme Ọghẹnẹ orọ omobọ ohwo gbe evaọ ukoko na avọ obufihọ ebe Ileleikristi, olẹ nọ u re no udu ze, obufihọ abọ-ẹzi orọ ekpako na, emamọ iriruo erọ ibe enọ e rọwo, gbe abọ nọ a re wo ẹsikpobi evaọ odibọgba na e rọ usu eruẹrẹfihotọ nọ e rẹ bọ usu mai ga kugbe Jihova jẹ k’omai ẹgba nọ ma rẹ rọ nyaharo evaọ iruo efuafo riẹ.

21. Ẹvẹ Pita avọ Pọl ikọ na a ro dhesẹ ẹgwọlọ ọrọ ẹgba nọ Ọghẹnẹ ọ rẹ kẹ?

²¹ Ghelọ oma uwhrewhrehe ohwo-akpọ mai, Jihova ọ te k’omai ẹgba re ma ru oreva riẹ ma tẹ rẹro so obufihọ riẹ. Fikinọ ọ riẹ kpahe ẹgwọlọ obufihọ oyena, Pita ukọ na o te kere nọ: “Kohwo kohwo nọ o bi ru iruo, jọ ọ rehọ epaọ ogaga nọ Ọghẹnẹ o kẹ riẹ ru ei.” (1 Pita 4:11) Yọ Pọl o dhesẹ evaifihọ riẹ kpahe ẹgba nọ Ọghẹnẹ ọ rẹ kẹ nọ ọ ta nọ: ‘Mẹ rẹ ghọghọ fiki Kristi eva okuako mẹ, ẹpoviẹ, ẹbẹbẹ, ukpokpoma, jegbe eware-ọzadhe; keme nọ omẹ rẹ kuako, kpakiyọ ẹsiẹe mẹ gae.’ (2 Ahwo Kọrint 12:10) Joma dhesẹ imuẹro evona jẹ rehọ oruaro se Olori Osu na Jihova, ọnọ ọ rẹ kẹ enọ oma o rọ no ẹgba.—Aizaya 12:2.

[Footnotes]

Ẹvẹ Whọ te k’Uyo?

• Fikieme ahwo Jihova a jẹ gwọlọ vi ogaga gheghe?

• Didi imuẹro Ikereakere e riẹ inọ Ọghẹnẹ ọ rẹ kẹ idibo riẹ ẹgba?

• Eruẹrẹfihotọ abọ-ẹzi jọ vẹ Jihova o ru no re e k’omai ẹgba?

• Ẹvẹ ma sai ro dhesẹ nọ ma rẹro so Ọghẹnẹ kẹ ẹgba?

[Uwoho nọ o rrọ ẹwẹ-obe avọ 22]

Usu mai kugbe Jihova o rẹ ga viere nọ ma be rehọ Ebaibol na wuhrẹ amọfa na