Fiobọhọ K’amọfa Nya Evaọ Ẹjẹrehọ Jihova

“Ma ti seri olẹ olẹ kẹ owhai họ họ, jẹ be hẹ yare re wha . . . yeri uzuazọ, nọ u fo rọ kẹ Ọnowo na, onọ o rẹ weriẹe, re wha mọ ibi evaọ iruo iwoma kpobi.”—AHWO KỌLỌSI 1:9, 10.

 1, 2. Didi oware o rẹ mae kẹ oghọghọ gbe evevọwẹ?

“UWOU nọ u wo ẹtẹ ma jẹ rria evaọ udhu. Ẹkwoma erulọhọ uzuazọ mai, ma wo oke viere nọ ma rẹ rọ rehọ emamọ usi na nyate ahwo oma. A ghale omai gaga no avọ uvẹ-ọghọ obufihọ kẹ ibuobu re a rehọ izuazọ rai mudhe kẹ Jihova.”—Imava-orọo, egbodibo oke-kpobi evaọ South Africa.

² Kọ whọ gbẹ rọwo nọ obufihọ kẹ amọfa o rẹ wha oghọghọ ze? Ahwo jọ a rẹ daoma ẹsibuobu re a fiobọhọ kẹ enọ e be mọ, enọ ọbẹwẹ ọ rọ oma, hayo enọ e rọ goli—bi wo edẹro no ere oruo ze. U mu Ileleikristi uzẹme ẹro nnọ eriariẹ Jihova Ọghẹnẹ gbe erọ Jesu Kristi nọ a rẹ ghale kugbe amọfa họ obufihọ nọ o mae rro nọ a rẹ sae kẹ. Onana ọvo o rẹ sai su amọfa kpohọ ẹjẹrehọ ẹtanigbo Jesu, ewo emamọ usu kugbe Ọghẹnẹ, jẹ ruọ edhere uzuazọ ebẹdẹ bẹdẹ.—Iruẹru 3:19-21; 13:48.

 3. Oghẹrẹ obufihọ vẹ o gwọlọ ẹromuhọ mai?

³ Dede na, kọ ẹvẹ kpahe obufihọ kẹ enọ e be gọ Ọghẹnẹ enẹna, enọ i bi lele “Edhere na”? (Iruẹru 19:9) Ababọ avro isiuru nọ who wo kpahe ai e rẹ ruaro, rekọ ẹsejọhọ whọ riẹ epanọ who re ro fiobọhọ viere he. Hayo uyero ra o sai bru owhẹ obọ dhe evaọ obọ nọ who re fihọ kẹ ae, rọ ere ru evevọwẹ nọ who re wo kawo. (Iruẹru 20:35) Rọ kpahe abava nana, ma rẹ sai wuhrẹ no obe Ahwo Kọlọsi ze.

 4. (a) Evaọ otọ uyero vẹ Pọl o jo kere se ahwo Kọlọsi? (b) Didi abọ Epafras o wo?

⁴ Okenọ Pọl ukọ na o kere se Ileleikristi obọ Kọlọsi, yọ a mu rie fihọ uwou evaọ Rom, rekọ erara e rẹ sae kpahe iẹe. Wọhọ epanọ whọ rẹ sai rẹro, Pọl ọ rehọ umutho ufuoma nọ o wo rọ ta usiuwoma kpahe Uvie Ọghẹnẹ. (Iruẹru 28:16-31) Ibe Ileleikristi a sai weze bru Pọl, ẹsejọ a tubẹ kare ejọ kugbei dede. (Ahwo Kọlọsi 1:7, 8; 4:10) Ọvo jọ họ ọtausiuwoma ọwhọ na Epafras ọnọ o no okpẹwho Kọlọsi evaọ Frijia ze, orẹwho opraprara orọ ovatha-ọre Ẹfẹsọs evaọ Esia Minor (nọ ọ rọ Turkey inẹnẹ). Epafras o fiobọhọ gaga evaọ eromuo ukoko evaọ Kọlọsi, yọ ọ ruẹ uye kẹ ikoko nọ e jọ Laodisia gbe Hiẹrapọlis nọ e kẹle riẹ. (Ahwo Kọlọsi 4:12, 13) Fikieme Epafras ọ jẹ nyae ruẹ Pọl evaọ Rom, kọ eme ma rẹ sai wuhrẹ no owọ nọ Pọl ọ jẹ ze?

Uvi Obufihọ kẹ Ahwo Kọlọsi

 5. Fikieme Pọl o ro kere eme riẹ na se ahwo Kọlọsi?

⁵ Re ọ jẹ Pọl riẹ kpahe iyero nọ e rọ ukoko ahwo Kọlọsi, Epafras o te kperẹ ọbẹbẹ evaọ obọ Rom. Ọ niyẹrẹ kpahe ẹrọwọ, uyoyou, gbe omodawọ usiuwoma ota orọ Ileleikristi eyena. (Ahwo Kọlọsi 1:4-8) Ghele na, o sae jẹ lọhọ inọ ọ fodẹ ọdawẹ riẹ kpahe ikpomahọ iyoma nọ e rọ awa kẹ edikihẹ abọ-ẹzi ahwo Kọlọsi na. Pọl ọ rehọ ileta nọ a kẹ ẹgba kuyo rọ za eriwo iwuhrẹ erue nọ e be vaha na dhe. Ọ mae tẹrovi abọ ologbo nọ Jesu Kristi o wo.a Kọ obufihọ riẹ o nya mu edhesẹ izẹme Ebaibol ọvo? Edhere ọfa vẹ ọ sai ro fiobọhọ kẹ ahwo Kọlọsi na, kọ didi iwuhrẹ kpahe obufihọ kẹ amọfa ma rẹ sai wuhrẹ?

 6. Eme Pọl o fiẹgbahọ evaọ ileta riẹ se ahwo Kọlọsi na?

⁶ Evaọ emuhọ ileta riẹ, Pọl o fielo họ abọ obufihọ jọ nọ ma rẹ sai rri vo. O rọ edhere nọ a re ro fiobọhọ no ugbothabọ ze, keme Pọl avọ Epafras a thabọ no Kọlọsi gaga. Pọl o se isẹi nọ: “Ma be hẹ kẹ Ọghẹnẹ Ọsẹ Jesu Kristi Ọnowo mai uyere kẹse kẹse, evaọ oke nọ ma be lẹ kẹ owhai.” Ẹhẹ, enana e jọ elẹ nọ a lẹ kẹ Ileleikristi obọ Kọlọsi na dẹẹ. Pọl o fibae nọ: “Fikiere nọ umuo ẹdẹ nọ ma ro yoi, ma ti seri olẹ olẹ kẹ owhai họ họ, jẹ be hẹ yare re wha vọ avọ ẹriẹ oreva riẹ evaọ areghẹ ẹzi gbe otọ-oriẹ.”—Ahwo Kọlọsi 1:3, 9.

 7, 8. Didi eware elẹ omobọ mai gbe erọ ukoko i re duobọte?

⁷ Ma riẹ nọ Jihova họ “ọnọ o re yo elẹ,” fikiere ma rẹ sai fievahọ unevaze riẹ re o yo elẹ nọ e rọwo kugbe oreva riẹ. (Olezi 65:2; 86:6; Itẹ 15:8, 29; 1 Jọn 5:14) Rekọ okenọ ma tẹ be lẹ kẹ amọfa, ẹvẹ elẹ mai e rẹ jọ?

⁸ Ma rẹ sai roro kpahe jẹ lẹ kpahe ‘imoni mai nọ erọ akpọ na soso.’ (1 Pita 5:9) Hayo ma sae lẹ se Jihova kpahe Ileleikristi gbe amọfa evaọ eria nọ eware okpẹtu e jọ via. Okenọ ilele ikpe-udhusoi ọsosuọ na evaọ eria efa a yo kpahe ohọo nọ o jọ Judia, o sae jọ nọ a lẹ elẹ buobu kẹ inievo rai no taure a te ti tube vi azọhọ obufihọ nya. (Iruẹru 11:27-30) Evaọ edẹ mai, ma rẹ jọ iwuhrẹ Ileleikristi yo elẹ kpahe okugbe-inievo mai kpobi hayo kpahe itu inievo jọ, oria nọ ahwo buobu a rẹ jọ riẹ kpahe oware nọ o be via na a vẹ jẹ sae ta nọ “Ami.”—1 Ahwo Kọrint 14:16.

Fodẹ Eware nọ Whọ Gwọlọ Dẹẹ Evaọ Olẹ

 9, 10. (a) Didi iriruo i dhesẹ nọ olẹ kpahe uzedhe ahwo jọ u fo? (b) Ẹvẹ Pọl ọ rọ jọ ọnọ a rọ fiki riẹ lẹ olẹ?

⁹ Dede na, Ebaibol na ọ k’omai iriruo elẹ kẹ amọfa nọ a jọ fodẹ eware nọ a gwọlọ dẹẹ. Roro kpahe eme Jesu nọ a kere fihọ Luk 22:31, 32. Ikọ ẹrọwọ 11 e wariẹ e riẹ họ. Aikpobi a te gwọlọ uketha Ọghẹnẹ evaọ oke obẹbẹ nọ o rọ obaro na, Jesu ọ tẹ lẹ kae. (Jọn 17:9-14) Ghele na, Jesu o te se odẹ Pita, ọ tẹ lẹ olẹ obọdẹ kẹ olele ọyena. Iriruo efa: Elaesha ọ lẹ nọ Ọghẹnẹ o fiobọhọ kẹ ọzae jọ dẹẹ, odibo riẹ. (2 Ivie 6:15-17) Jọn ukọ na ọ lẹ nnọ oma o ga Gayọs evaọ ugboma gbe abọ-ẹzi. (3 Jọn 1, 2) Yọ elẹ efa e tẹrovi ẹko ahwo jọ.—Job 42:7, 8; Luk 6:28; Iruẹru 7:60; 1 Timoti 2:1, 2.

¹⁰ Ileta Pọl i fielo họ elẹ nọ a rẹ jọ fodẹ eware nọ a gwọlọ. Ọ yare nọ a lẹ kpahe iẹe hayo kpahe iẹe avọ egbẹrioma riẹ. Ahwo Kọlọsi 4:2, 3 u se nọ: “Wha ruẹrẹ abọ họ olẹ olẹ, wha ve je he roro avọ akpẹwẹ-okẹ; wha lẹ kẹ omai re Ọghẹnẹ o rovie ẹthẹ eme riẹ kẹ omai, re ma dhesẹ eware ididi Kristi na via onọ mẹ rọ fiki riẹ rọ ekarọ.” Je roro kpahe iriruo efa enana: Ahwo Rom 15:30; 1 Ahwo Tẹsalonika 5:25; 2 Ahwo Tẹsalonika 3:1; Ahwo Hibru 13:18.

11. Okenọ ọ jọ Rom, amono Epafras ọ jẹ lẹ kẹ?

¹¹ Epọvo na o jọ kẹ ogbẹrioma Pọl evaọ Rom. “Ẹpafras, ọ nọ ọ rọ omọvo otu rai jọ, . . . o yere owhai, ọ be hẹ [ya] kareghẹ họ owhai eva olẹ riẹ.” (Ahwo Kọlọsi 4:12) Ubiẹme na ‘ọ be hẹ ya’ o sai dhesẹ “omodawọ,” wọhọ ohwo nọ ọ be dhohrẹ evaọ aruọzaha oke anwae. Kọ Epafras ọ jẹ lẹ kpahe enọ e jọ akpọ na soso rọwo ọvo gheghe hayo tubẹ kpahe egegagọ uzẹme enọ e rọ Esia Minor kpobi? Pọl o dhesẹ nọ Epafras ọ jẹ lẹ dẹẹ kẹ ahwo Kọlọsi. Epafras ọ riẹ kpahe uyero rai. Ma riẹ edẹ omomọvo rai hi, yọ ma riẹ ebẹbẹ nọ a rẹriẹ ovao ku hu, rekọ dai roro iriruo jọ. Ẹsejọhọ Linọs ọmoha na o bi lele okpomahọ eriariẹ-ifofe nọ e dafia muabọ, yọ o sae jọ nọ Rufọs ọ gwọlọ ẹgba nọ ọ rẹ rọ whaha urusio ọ iruemu anwae riẹ evaọ egagọ ahwo Ju. Nọ o rọ nọ o wo ọzae nọ ọ rọwo ho na, kọ Pasis ọ gwọlọ ithihakọ gbe areghẹ re ọ yọrọ emọ riẹ evaọ Olori na, kọ Asinkritọs, ọnọ okpẹyao o kru, ọ gwọlọ omosasọ viere? Ẹhẹ, Epafras ọ riẹ enọ e rọ ukoko ẹwho riẹ, yọ ọ lẹ kpahe ae gaga keme tei te Pọl a gwọlọ re otu omarọkẹ itieye na a nya evaọ edhere nọ Jihova ọ rẹ jẹrehọ.

12. Ẹvẹ ma sae rọ kaunu te ẹgwọlọ jọ viere evaọ elẹ omobọ mai?

¹² Kọ whọ ruẹ oriruo nọ ọ rrọ k’omai na—edhere nọ ma re ro fiobọhọ kẹ amọfa? Wọhọ epanọ ma muẹrohọ no na, elẹ ogbotu evaọ iwuhrẹ Ileleikristi e rẹ dina kẹre viere, keme ahwo sa-sa a rọ ogbotu na. Rekọ ma rẹ sae rọ elẹ omobọ mai gbe erọ uviuwou mai fodẹ eware nọ ma gwọlọ dẹẹ. Nọ ma rẹ sae yare Ọghẹnẹ ẹsejọ re ọ sẹro jẹ ghale esẹro enyawariẹ hayo ithuru-igodẹ abọ-ẹzi na, kọ ma gbẹ sae fodẹ odẹ ejọ evaọ ẹsejọ? Wọhọ oriruo, eme jabọ who gbe se odẹ ọsẹro okogho nọ o weze ziọ ukoko ra ha hayo owuhrẹ Uwuhrẹ Obe Ukoko na? Ahwo Filipai 2:25-28 gbe 1 Timoti 5:23 i dhesẹ uzedhe ọdawẹ Pọl kpahe oma Timoti gbe Epafrodaitọs. Kọ ma sai dhesẹ isiuru itieye na kẹ enọ e be mọ nọ ma riẹ edẹ rai?

13. Oghẹrẹ iyero vẹ i fo nọ ma rẹ fodẹ evaọ elẹ omobọ mai?

¹³ Uzẹme, ma rẹ whaha omaduhọ eme idhere amọfa, rekọ u fo re elẹ mai i dhesẹ uvi isiuru kẹ enọ ma riẹ jẹ be daezọ rai. (1 Timoti 5:13; 1 Pita 4:15) Ẹsejọhọ a si oniọvo jọ no iruo no, yọ ma wo iruo nọ ma rẹ kẹe he. Ghele na, ma rẹ sai se odẹ riẹ jẹ fodẹ ẹbẹbẹ riẹ evaọ olẹ omobọ mai. (Olezi 37:25; Itẹ 10:3) Kọ ma riẹ kpahe oniọvo-ọmọtẹ jọ nọ ọ kpako no ababọ ọzae gbe emọ fikinọ ọ gba riẹ mu re ọ jọ “Ọnowo na” ọvo rọo? (1 Ahwo Kọrint 7:39) Evaọ elẹ omobọ ra, ẹvẹ whọ gbẹ yare Jihova re ọ ghale iẹe je fiobọhọ kẹe thihakọ evaọ iruo riẹ hẹ? Wọhọ oriruo ọfa, o sae via nọ ekpako ivẹ a kẹ oniọvo nọ o ruthọ ohrẹ. Eme jabọ aimava na a gbẹ jọ elẹ omobọ rai fodẹ iẹe n’oke ruoke he?

14. Ẹvẹ elẹ nọ a rẹ jọ fodẹ odẹ ahwo jọ u ro w’obọ kpahe obufihọ kẹ amọfa?

¹⁴ O lọhọ k’owhẹ gaga re whọ fodẹ ahwo nọ whọ riẹ nọ a gwọlọ obufihọ Jihova evaọ olẹ omobọ ra, enọ e gwọlọ omosasọ, areghẹ, gbe ẹzi ọfuafo riẹ, hayo ibi riẹ jọ. Fiki ugbo hayo iyero efa, whọ rẹ sae kẹ obufihọ ekwakwa iwo hayo erọ edhere ọfa ha. Rekọ kareghẹhọ lẹ kpahe inievo ra. Whọ riẹ nọ a gwọlọ ru Jihova eva were, ghele na o sae jọ nọ a ghinẹ gwọlọ obufihọ re a ru ere ribri. Uzedhe edhere nọ who re ro fiobọhọ họ elẹ ra.—Olezi 18:2; 20:1, 2; 34:15; 46:1; 121:1-3.

Ruiruo re Whọ Bọ Amọfa Ga

15. Fikieme ma je wo isiuru kpahe abọ urere obe Ahwo Kọlọsi na?

¹⁵ Rekọ orọnikọ olẹ nọ u nevaze, nọ a rẹ jọ fodẹ odẹ ahwo jọ ọvo họ edhere nọ a re ro fiobọhọ kẹ amọfa ha, maero enọ e kẹle jẹ rrọ ghaghae k’owhẹ. Obe Ahwo Kọlọsi u ru onana vẹ. Ewena-isukulu buobu a rehọ e riẹ nnọ okenọ Pọl ọ kẹ ọkpọvio iwuhrẹ gbe ohrẹ nọ i re ruiruo no, o te fi uyere obọ riẹ gheghe fihọ iẹe. (Ahwo Kọlọsi 4:7-18) Wo ohẹriẹ, ma ruẹ no nnọ abọ urere obe na u wo emamọ ohrẹ, yọ eware buobu e riẹ nọ ma re wuhrẹ no abọ nana ze.

16, 17. Eme ma rẹ sae ta kpahe inievo nọ a fodẹ eva Ahwo Kọlọsi 4:10, 11 na?

¹⁶ Pọl o kere nọ: “Aristakọs omọvo uwou-odi mẹ, o yere owhai, gbe Mak ọmọ oniọvo Banabas, ọnọ wha wo uwuhrẹ kpahe na-o te bru owhai ze, wha rehọ iẹe, gbe Jesu, ọ nọ a re se Jọstọs. Enana họ enọ eyawo eva udevie iruiruo mẹ rọkẹ uvie Ọghẹnẹ, e nọ erọ [ọbọga, NW ] rọ kẹ omẹ.”—Ahwo Kọlọsi 4:10, 11.

¹⁷ Pọl ọ jọ etẹe fodẹ inievo jọ nọ i fo ẹromuhọ obọdẹ. Ọ ta nọ a rọ udevie enọ e yawo na, erọ ahwo Ju. Ahwo Ju buobu nọ e yawo a jọ Rom, yọ ejọ i zihe ruọ Ileleikristi no. Ghele na, enọ Pọl ọ fodẹ na yọ enọ i fiobọhọ kẹe. Ẹsejọhọ, a raha oke he re a nyusu kugbe Ileleikristi nọ i no orẹwho Egedhọ ze, yọ ẹsejọhọ a kuomagbe Pọl ta usiuwoma kẹ ahwo orẹwho Egedhọ na avọ evawere.—Ahwo Rom 11:13; Ahwo Galesha 1:16; 2:11-14.

18. Ẹvẹ Pọl o ro jiri ejọ nọ e jọ kugbei?

¹⁸ Muẹrohọ eme Pọl na: ‘Enọ e rọ ọbọga rọ kẹ omẹ.’ Ọ rehọ ubiẹme Griki nọ o roma via ẹsiẹvo nana ọvo evaọ Ebaibol na ro ruiruo. Efefafa buobu a fa riẹ “omosasọ.” Rekọ, ubiẹme Griki ofa o riẹ (pa·ra·ka·le’o) onọ a rẹ mae fa “omosasọ.” Pọl ọ rehọ oyena ruiruo evaọ oria ofa jọ evaọ ileta nana rekọ orọnikọ eva Ahwo Kọlọsi 4:11 ho.—Matiu 5:4; Iruẹru 4:36; 9:31; 2 Ahwo Kọrint 1:4; Ahwo Kọlọsi 2:2; 4:8.

19, 20. (a) Eme họ otofa ẹme nọ Pọl o kere na kie kpahe inievo na nọ i je fiobọhọ kẹe evaọ obọ Rom? (b) Idhere vẹ o sae rọ jọnọ inievo eyena a ro fiobọhọ kẹ Pọl?

¹⁹ O sae jọnọ enọ Pọl o se edẹ rai na a ru vi uduotahawọ ẹmeunu gheghe. Ubiẹme Griki nọ a fa ‘ọbọga’ eva Ahwo Kọlọsi 4:11 na a rẹ rehọ iẹe ruiruo ẹsejọ evaọ ebe akpọ ro dhesẹ umu nọ u re furie edada. Ebaibol ọ New Life Version o se nọ: “Ẹvẹ obufihọ nọ a rọ kẹ omẹ o rro te!” Ebaibol ọ Today’s English Version o se nọ: “A rọ obufihọ ulogbo kẹ omẹ.” Eme inievo Ileleikristi eyena nọ e kẹle Pọl na a ru ro fiobọhọ kẹe?

²⁰ Pọl ọ sai wo erara, rekọ eware buobu e riẹ nọ ọ sai ru hu, wọhọ ẹdẹ ugogo eware nọ ọ gwọlọ—emuore gbe iwu kẹ oke uriri na. Ẹvẹ ọ sai ro wo iko-ebe nọ o re se hayo dẹ eware nọ o re ro kere? (2 Timoti 4:13) Kọ who gbe roro nọ inievo eyena a sae rọ eware itieye na fiobọhọ kẹ Pọl, eruo eware wọhọ eki ọnya hayo uwou nọ a rẹ nya rọkẹ ẹe? Ẹsejọhọ ọ gwọlọ nekpẹ ukoko jọ jẹ bọe ga. Nọ ọ rọ uwou-odi na, ọ sai ru ere he, fikiere o sa jọnọ inievo na a je weze kpohọ iweze rọkẹ Pọl be wha evuẹ riẹ vrẹ, jẹ wha iyẹrẹ zihe ze. Ẹvẹ o rọ ọbọga te!

21, 22. (a) Fikieme eme nọ e rọ Ahwo Kọlọsi 4:11 na e jẹ jọ isiuru k’omai? (b) Idhere jọ vẹ ma sai ro lele oriruo enọ e jọ kugbe Pọl na?

²¹ Oware nọ Pọl o kere kpahe ‘ọbọga’ na o k’omai orimuo kpahe epanọ ma sai ro fiobọhọ kẹ amọfa. A be nya evaọ ọjẹrehọ Jihova kpahe itee ẹfuọ, ekpohọ iwuhrẹ Ileleikristi, je w’obọ evaọ iruo usiuwoma ota na. A jọ enana te kẹ eme uyere mai. Kọ ma sai ru viere, jọ ‘ọbọga’ wọhọ enọ e jọ kugbe Pọl na?

²² Whọ tẹ riẹ kpahe oniọvo-ọmọtẹ nọ o bi ru lele eme ọ 1 Ahwo Kọrint 7:37 rekọ nọ o wo uviuwou nọ o kẹle riẹ hẹ, kọ whọ sai ku ei kugbe iruẹru uviuwou jọ, wọhọ uzizie nọ whọ rẹ kẹe re o ti lele uviuwou ra riemu, hayo re ọ ziọ omakugbe osese orọ egbẹnyusu hayo orọ imoni jọ? Kọ who te ziziei re o lele uviuwou ra kpohọ okokohọ hayo erẹ? Hayo re o kuomagbe owhai kpohọ eki okenọ wha tẹ be dẹ emuore. Onana o sai kie kpahe eyae-uku hayo ezae nọ eyae i whu seba, hayo enọ e gbẹ be sae dhẹ imoto ho. Whọ te ruẹ erere nọ ọ riẹ re who yo eware nọ a rọ ẹro ruẹ no hayo wo erere no eriariẹ rai ze evaọ eware esese wọhọ ẹsalọ emamọ ibi–ire hayo iwu emọ. (Iruo-Izerẹ 19:32; Itẹ 16:31) Erere jọ nọ ọ rẹ sai noi ze họ wha te kpekpe viere. Fikiere o vẹ te lọhọ ai obọ viere re a yare obufihọ ra a tẹ gwọlọ imu jọ no oria imu ze, hayo eware itieye na. Inievo nọ e jọ kugbe Pọl evaọ obọ Rom na a jọ uvi obufihọ, ọbọga, wọhọ epanọ whọ rẹ sae jọ re. Te oke oyena gbe enẹna, oghale ofa nọ o rẹ sae jariẹ họ ọgbakugbe uyoyou na o rẹ ga viere, yọ ma gba riẹ mu no re ma gọ Jihova kugbe avọ omarokpotọ.

23. Eme u re woma kẹ omai omomọvo re ma raha oke ru?

²³ Omomọvo mai ọ sai roro kpahe iyero nọ ma jọ uzoẹme nana fodẹ na. Enana e rọ iriruo gheghe, rekọ enana e sae kareghẹhọ omai uvi iyero nọ ma sae jọ jọ ‘ọbọga’ viere kẹ inievo mai. Orọnikọ ma be ta nọ ma rẹ raro kele uruemu enọ e rẹ dhogbo ahwo ho. Orọnikọ oyena o jọ ute inievo nọ a fodẹ eva Ahwo Kọlọsi 4:10, 11 na ha. A rọ ‘ibe iruiruo rọkẹ uvie Ọghẹnẹ’ no tao. Ọbọga nọ a kẹ na u w’obọ kpahe oyena dẹẹ. Jọ o jọ epọvo na re rọkẹ omai.

24. Eme họ uzedhe ẹjiroro mai evaọ amọfa nọ ma rẹ lẹ kẹ jẹ gwọlọ tuduhọ ai awọ?

²⁴ Ma rẹ fodẹ odẹ amọfa evaọ elẹ omobọ mai jẹ daoma re ma bọ ai ga fikinọ: Ma rọwo nnọ inievo mai a gwọlọ “yeri uzuazọ, nọ u fo rọkẹ Ọnowo na, onọ o rẹ weriẹe.” (Ahwo Kọlọsi 1:10) Uzẹme oyena u w’obọ kpahe oware ofa jọ nọ Pọl ọ fodẹ nọ o je kere kpahe elẹ Epafras kpahe ahwo Kọlọsi na, inọ re a “dikihẹ ga avọ imuẹro eva oreva Ọghẹnẹ.” (Ahwo Kọlọsi 4:12) Ẹvẹ mai omomọvo ọ sai ro ru oyena? Joma ruẹ.

[Oruvẹ-obotọ]

Kọ Who Muẹrohọ?

• Ẹvẹ ma sae rọ jọ obufihọ viere evaọ elẹ omobọ mai?

• Oghẹrẹ vẹ Ileleikristi jọ a rọ jọ ‘ọbọga’ kẹ Pọl?

• Evaọ otọ iyero vẹ ma sae rọ jọ ‘ọbọga’?

• Eme họ ute mai ọrọ ẹlẹ kẹ gbe ẹgwọlọ obufihọ kẹ inievo mai?

[Uwoho nọ o rrọ ẹwẹ-obe avọ 10]

Kọ whọ sai ku Oleleikristi ọfa kugbe etoke arozaha uviuwou ra?

[Ọnọ o wo uwoho]

Udu-ekere Green Chimney’s Farm