Epanọ A Ruẹrẹ Ugboma Esuo na Họ

EZAE jọ evaọ usu idibo Ọghẹnẹ nọ e roma mudhe nọ a rọ ẹzi wholo họ enọ e rrọ Ugboma Esuo Isẹri Jihova na. A dikihẹ kẹ utu ọrigbo nọ o wo ẹrọwọ avọ areghẹ na, nọ a kẹ owha-iruo emu abọ-ẹzi nọ a rẹ ruẹrẹ họ kẹ ahwo Ọghẹnẹ gbe ẹruorote iruo usiuwoma ota Uvie na nọ a be jọ akpọ-soso ru na.—Mat. 24:14, 45-47.

Ahwo Ugboma Esuo na a rẹ gbẹgwae koka koka, yọ Edesa-Oka o rẹ mae jọ. Onana u bi fi obọ họ kẹ inievo nana ru iruo kugbe. (Ol. 133:1) Inievo nọ e rrọ Ugboma Esuo na a rrọ egbẹgwae sa-sa re. Re a sae rẹrote iruo Uvie na, duọ ogbẹgwae duọ abọjọ iruo Uvie na nọ o be rẹrote wọhọ epanọ ma dhesẹ fihọ obotọ na.

◼ OGBẸGWAE OTU ẸRUỌSA: Enọ e rrọ esẹro egbẹgwae efa erọ Ugboma Esuo na họ ahwo nọ i ru ogbẹgwae nana via, yọ ogbẹgwae nana u te je wo okere-obe ọnọ ọ rrọ omọvo ahwo Ugboma Esuo na re. Ogbẹgwae nana u re muẹrohọ inọ iruo egbẹgwae nọ i kiọkọ kpobi e be riẹ nya ziezi. Iruo rai i te je w’obọ kpahe ebẹbẹ ilogbo nọ e rẹ roma via idudhe, ukpokpoma, okpẹtu, gbe eware efa nọ i re kpomahọ Isẹri Jihova evaọ akpọ na soso nọ e gwọlọ nọ a rẹ jowọ kpahe vẹrẹ.

◼ OGBẸGWAE ẸRUOROTE IRUO IWOU-OGHA: Inievo nọ e rrọ ogbẹgwae nana a wo owha-iruo ẹruọsa ọruẹrẹfihotọ kpobi nọ a ru kẹ ẹruorote ahwo uviuwou Ebẹtẹle nọ e rrọ akpọ na soso re a ruẹsi wo omakruga abọ-ẹzi. Ae họ enọ e rẹ rẹrote ẹsalọ inievo nọ e gwọlọ ziọ Ebẹtẹle je ku ẹme kpobi nọ ọ roma via kpahe iruo Ebẹtẹle rai họ.

◼ OGBẸGWAE EBE-IWHOWHO: Ogbẹgwae nana o be rẹrote eruo gbe ẹghale ebe ukoko na nya akpọ na soso duwu. O be sẹro ekwakwa nọ a bi ro ru ebe gbe eware efa nọ egbẹgwae sa-sa nọ a ro mu evaọ ukoko Isẹri Jihova a bi ro ru iruo. Ogbẹgwae nana oye o rẹ rehọ ekẹ unevaze nọ a ru kẹ iruo akpọ-soso erọ Uvie na ro ru iruo evaọ edhere nọ ọ mai woma.

◼ OGBẸGWAE IRUO UKOKO: Ahwo ogbẹgwae nana a be rẹrote iruo usiuwoma ota na gbe eme nọ i kpomahọ ikoko sa-sa, ekobaro, ekpako ukoko, gbe esẹro ọnyawariẹ. O be rẹrote eruo Odibọgba Uvie Mai na, je zizie ahwo ziọ Isukulu Giliad gbe Isukulu Ewuhrẹ Odibọgba na, kẹsena a ve vi ai kpohọ ekwotọ nọ a rẹ jọ ta usiuwoma nọ a te ku isukulu na họ no.

◼ OGBẸGWAE EWUHRẸ: Ogbẹgwae nana ọ rẹ rẹrote ẹruẹrẹkpahe eme nọ a re ru evaọ ikokohọ esese, ikokohọ ilogbo, gbe iwuhrẹ ukoko. A re je ru ọruẹrẹfihotọ kẹ ọbọga abọ-ẹzi orọ ahwo uviuwou Ebẹtẹle, rẹrote isukulu sa-sa wọhọ Isukulu Giliad gbe Isukulu Ekobaro Oke-Kpobi, ae họ enọ i re ru ebe gbe edrama fihọ ekasẹte gbe ividio.

◼ OGBẸGWAE EBE-IKERE: Owha-iruo ogbẹgwae nana họ re a ru emu abọ-ẹzi fihọ ebe ro s’omai enọ e rrọ ukoko na gbe amọfa evaọ obọ otafe. Ogbẹgwae nana o rẹ kiyo enọ nọ a nọ kpahe Ebaibol, jẹ whobọhọ ekere edrama, omaa ovuẹ ogbotu gbe omaa-ẹmeọta efa. A be jẹ rẹrote iruo efafa nọ a be jọ akpọ-soso ru.

Pọl ukọ na ọ rehọ ukoko enọ a wholo na ro dhesẹ ugboma ohwo-akpọ, o te je dhesẹ epanọ ahwo nọ a rrọ ukoko na kpobi a rọ gwọlọ uyoyou gbe obufihọ ohwohwo evaọ iruo nọ Ọghẹnẹ ọ kẹ rai. (Rom 12:4, 5; 1 Kọr. 12:12-31) Jesu Kristi, Ọnowuzou na, ọ be kẹ ahwo nọ a rrọ ukoko na oware nọ a gwọlọ re a wo okugbe, ẹruọsa, gbe emu abọ-ẹzi. (Ẹf. 4:15, 16; Kọl. 2:19) Enẹ a ruẹrẹ Ugboma Esuo na họ nọ o be rọ rẹrote iruẹru ukoko na nya lele oghẹrẹ nọ Jihova ọ be rehọ ẹzi ọfuafo riẹ kpọ ai.