Wuhrẹ No Ẹme Ọghẹnẹ ze

Ono Họ Jesu Kristi?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

 1. Ono họ Jesu Kristi?

Wo ohẹriẹ no ahwo-akpọ efa, Jesu ọ jọ obọ odhiwu wọhọ omama ẹzi taure a te ti yẹi evaọ otọakpọ. (Jọn 8:23) Ọye họ omama ọsosuọ nọ Ọghẹnẹ ọ ma, yọ o fi obọ họ evaọ ẹma eware efa kpobi. Ọye ọvo Jihova ọ rọ obọ riẹ ma, fikiere a se rie “ọmọ ọvo” Ọghẹnẹ. Jesu ọ jọ Ọtota kẹ Ọghẹnẹ, fikiere a re je sei “Ẹme na.”—Jọn 1:1-3, 14; se Itẹ 8:22, 23, 30; Ahwo Kọlọsi 1:15, 16.

 2. Fikieme Jesu ọ rọ ziọ otọakpọ?

Ọghẹnẹ o vi Ọmọ riẹ ziọ otọakpọ ẹkwoma uzuazọ riẹ nọ o kpeze fihọ edhede ọmọtẹ Ju jọ nọ ọ riẹ ọzae he nọ a re se Meri. Fikiere Jesu o no oma ọsẹ ohwo-akpọ ze he. (Luk 1:30-35) Jesu ọ ziọ otọakpọ (1) ti wuhrẹ ahwo uzẹme na kpahe Ọghẹnẹ, (2) te kẹ oriruo epanọ a re ro ru oreva Ọghẹnẹ, gbe (3) re o si obọ no uzuazọ ogbagba riẹ rọ “ta” ahwo-akpọ.—Se Matiu 20:28; Jọn 18:37.

 3. Fikieme ma rọ gwọlọ ẹtanigbo?

Ẹtanigbo yọ osa nọ a rẹ hwa ro si ohwo no igbo oware jọ. Uwhu gbe owho e jọ ẹjiroro Ọghẹnẹ kẹ ahwo-akpọ no emuhọ ze he. Ẹvẹ ma rọ riẹ? Ọghẹnẹ ọ vuẹ ọzae ọsosuọ na Adamu, inọ ọ tẹ raha uzi, o ti whu. Adamu ọ gbẹ raha uzi hi, ọ hai ti whu vievie he. Dede nọ Adamu ọ rria ikpe udhusoi buobu taure o te ti whu, uwhu riẹ u muhọ evaọ ẹdẹ nọ ọ rọ ghẹmeeyo kẹ Ọghẹnẹ. (Emuhọ 2:16, 17; 5:5) Adamu ọ nyasiọ ukuoriọ uzioraha gbe uwhu nọ u lele i rie ba kẹ emọ riẹ kpobi. Ere uwhu o rọ rehọ ẹkwoma Adamu “vaha” ruọ akpọ na. Oye o soriẹ nọ ma rọ gwọlọ ẹtanigbo.—Se Ahwo Rom 5:12; 6:23.

 4. Fikieme Jesu o ro whu?

Ono ọ rẹ sae hwosa ẹtanigbo nọ a re ro si omai no igbo uwhu? Ohwo o te whu, osa izieraha omobọriẹ ọvo uwhu riẹ o rẹ sae hwa. Ohwo-akpọ sebaẹgba ọvuọvo ọ rẹ sae hwosa izieraha amọfa ha.—Se Olezi 49:7-9.

Nọ orọnọ Jesu ọ reuku sebaẹgba no obọ ọsẹ otọakpọ ze he na, orọnọ fiki izieraha obọriẹ o ro whu hu, rekọ fiki izieraha amọfa. Ọghẹnẹ o vi Ọmọ riẹ ze ti whu kẹ omai fiki uyoyou ulogbo nọ o wo kẹ ahwo-akpọ. Jesu o dhesẹ uyoyou kẹ omai re ẹkwoma ẹme nọ o yo kẹ Ọsẹ riẹ gbe uzuazọ riẹ nọ o si obọ no fiki izieraha mai.—Se Jọn 3:16; Ahwo Rom 5:18, 19.

 5. Eme Jesu o bi ru enẹna?

Ẹkwoma enọ e jẹ mọ nọ o siwi, enọ i whu nọ ọ kpare, gbe enọ e jẹ rioja nọ o fi obọ họ kẹ, Jesu o dhesẹ oware nọ o ti ru kẹ ahwo-akpọ ẹmeoyo kpobi evaọ obaro. (Luk 18:35-42; Jọn 5:28, 29) Nọ Jesu o whu, Ọghẹnẹ ọ kpare riẹ ziọ uzuazọ wọhọ omama ẹzi. (1 Pita 3:18) Jesu ọ tẹ jẹ hẹrẹ evaọ obọze Ọghẹnẹ bẹsenọ Ọghẹnẹ ọ rọ kẹe udu nọ o re ro su otọakpọ na kpobi wọhọ Ovie. (Ahwo Hibru 10:12, 13) Obọnana Jesu o bi su wọhọ Ovie evaọ obọ odhiwu, yọ ilele riẹ evaọ otọakpọ a bi whowho usi uwoma na nya akpọ na soso wariẹ.—Se Daniẹl 7:13, 14; Matiu 24:14.

Kẹlena, Jesu ọ te rehọ ogaga riẹ wọhọ Ovie ro si emuemu kpobi gbe enọ e be whae ze n’otọ. Ima ahwo gbidi gbidi nọ i fi ẹrọwọ họ Jesu je bi yoẹme kẹe a te reawere uzuazọ evaọ aparadase evaọ otọakpọ na.—Se Olezi 37:9-11.

Rọkẹ evuẹ efa, rri uzou avọ 4 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 23]

Ima ahwo gbidi gbidi nọ i fi ẹrọwọ họ Jesu je bi yoẹme kẹe a te reawere uzuazọ evaọ aparadase evaọ otọakpọ na