Fievahọ Jihova Nọ Urere Na O Kẹle No na

‘Wha fievahọ ỌNOWO na bẹdẹ bẹdẹ.’—AIZ. 26:4.

 1. Ẹvẹ idibo Jihova a ro wo ohẹriẹ no ahwo akpọ na?

IMA ahwo buobu nẹnẹ a riẹ ohwo hayo oware nọ a re fievahọ họ, ẹsejọhọ fikinọ ohwo hayo oware jọ nọ a fievahọ okejọ u kpe rai fihọ akpọ. Rekọ idibo Jihova a wo ohẹriẹ. Fikinọ a wo areghẹ nọ o no obọ Ọghẹnẹ ze, a riẹ inọ a re fievahọ akpọ na hayo “emọ ivie” akpọ na ha. (Ol. 146:3) Ukpoye, a fi ẹruore rai kpobi họ Jihova, keme a riẹ nọ o you rai gbe nnọ o re ru eyaa riẹ gba ẹsikpobi.—Rom 3:4; 8:38, 39.

 2. Eme Joshua ọ ta kpahe eva nọ a re fihọ Ọghẹnẹ?

² Joshua o dhesẹ inọ Ọghẹnẹ o te ọnọ a re fievahọ. Nọ ọ kpako gaga no ọ ta kẹ emọ Izrẹl nọ: “Whai kpobi a rehọ udu gbe iroro rai riẹ re, inọ eware iwoma kpobi nọ ỌNOWO na Ọghẹnẹ rai ọ yeya kẹ owhai na o ru rai gba re, ovo u fi rie abọ kie he.”—Jos. 23:14.

 3. Eme odẹ Ọghẹnẹ u dhesẹ via kpahe iẹe?

³ Jihova o re ru eyaa riẹ gba, orọnikọ fiki uyoyou nọ o wo kẹ idibo riẹ ọvo ho rekọ maero fiki odẹ riẹ. (Ọny. 3:14; 1 Sam. 12:22) Rọ kpahe odẹ Ọghẹnẹ, J. B. Rotherham o kere fihọ ewẹ-obe ọsosuọ erọ The Emphasized Bible, inọ: “[Odẹ na] yọ eyaa nọ e mai woma kpobi; Ọghẹnẹ ọ rẹ sai nwene kpohọ oghẹrẹ kpobi nọ ọ gwọlọ evaọ otọ uyero kpobi. . . [Odẹ na] u dhesẹ kẹ omai oghẹrẹ ohwo nọ Ọghẹnẹ ọ rrọ, yọ u re fi obọ họ k’omai kareghẹhọ iẹe. Ọghẹnẹ o re ru odẹ riẹ na gba ẹsikpobi; yọ ọ rẹ vuoma odẹ riẹ na vievie he.”

 4. (a) Eme Aizaya 26:4 o tuduhọ omai awọ inọ ma ru? (b) Eme ma be te ta kpahe evaọ uzoẹme nana?

⁴ Nọ oma ra nọ: ‘Kọ mẹ riẹ Jihova te epanọ me re ro fi eva mẹ kpobi họ iẹe? Kọ me bi rri kpohọ obaro avọ ẹruore inọ Ọghẹnẹ ọ te rẹrote omẹ?’ Aizaya 26:4 o ta nọ: “Fievahọ ỌNOWO na bẹdẹ, keme Ọghẹnẹ ỌNOWO na họ utho ebẹdẹ.” Evaọ uzẹme, orọnikọ Ọghẹnẹ ọ be rọ edhere igbunu fi obọ họ kẹ ahwo nẹnẹ wọhọ epanọ o jọ evaọ oke anwae he. Ghele na, fikinọ ọye họ “utho ebẹdẹ,” ma rẹ sai fievahọ iẹe ‘bẹdẹ bẹdẹ.’ Kọ ẹvẹ Ọghẹnẹ mai nọ o re ru eyaa riẹ gba na o bi ro fi obọ họ kẹ idibo ẹrọwọ riẹ nẹnẹ? Joma ta kpahe idhere esa jọ: Ọ rẹ k’omai ẹgba nọ ma tẹ lẹ sei re o fi obọ họ kẹ omai fi edawọ kparobọ, o re fi obọ họ kẹ omai nọ ma tẹ rẹriẹ ovao dhe ukpokpoma hayo nọ a gbẹ be kezọ usiuwoma ota mai hi, yọ ọ rẹ sasa omai oma nọ ma tẹ rrọ ọkora fiki awaọruọ. Nọ ma be te kiẹ eme nana riwi na, roro kpahe idhere nọ whọ sai ro ru eva nọ who fihọ Jihova ga ziezi.

Fievahọ Ọghẹnẹ nọ Whọ tẹ Rrọ Otọ Odawọ

 5. Oke vẹ o rẹ mae jọ bẹbẹ re ohwo o koko izi Ọghẹnẹ?

⁵ O rẹ sae jọ lọlọhọ re ohwo o fievahọ eyaa Aparadase hayo ẹkparomatha nọ Jihova ọ ya kẹ omai na keme nọ eware nọ ma bi rẹro rai. Rekọ o sae jọ bẹbẹ re ohwo o koko izi riẹ nọ i kie kpahe emamọ uruemu, re o fievahọ inọ izi riẹ e rrọ kẹ ewoma mai gbe nnọ e rẹ wha uvi evawere se omai. Solomọn Ovie na ọ kẹ ohrẹ nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” (Itẹ 3:5, 6) Muẹrohọ inọ a jọ Ikereakere nana fodẹ “idhere” mai. Koyehọ, ma rẹ rọ uzuazọ mai kpobi dhesẹ inọ ma fievahọ Ọghẹnẹ. Ẹvẹ ma sai ro dhesẹ evaifihọ nana nọ ma tẹ rrọ otọ odawọ?

 6. Eme ọ rẹ sai fi obọ họ kẹ omai whaha ekpehre iroro?

⁶ Re ohwo ọ kẹnoma no eyoma, iroro na o rẹ jọ muhọ. (Se Ahwo Rom 8:5; Ahwo Ẹfẹsọs 2:3.) Eme ọ rẹ sai fi obọ họ kẹ owhẹ whaha ekpehre iroro? Roro kpahe idhere isoi nana: 1. Yare obufihọ Ọghẹnẹ evaọ olẹ. (Mat. 6:9, 13) 2. Roro kpahe iriruo Ebaibol erọ ahwo nọ i yoẹme kẹ Jihova gbe enọ i yoẹme kẹe he. Kẹsena, who ve muẹrohọ eware nọ i te rai.a (1 Kọr. 10:8-11) 3. Roro kpahe ọkora nọ uzioraha o te wha se owhẹ gbe enọ who you. 4. Roro kpahe epanọ o rẹ kẹ Ọghẹnẹ uye te nọ odibo riẹ jọ ọ tẹ raha uzi ulogbo. (Se Olezi 78:40, 41.) 5. Roro epanọ eva e rẹ were Jihova te nọ ọ tẹ ruẹ odibo riẹ jọ nọ o bi ru oware nọ u woma, makọ evaọ ẹgbede hayo idhereno. (Ol. 15:1, 2; Itẹ 27:11) Whọ rẹ sai dhesẹ inọ who fievahọ Jihova.

Fievahọ Ọghẹnẹ nọ Whọ tẹ Rẹriẹ Ovao Dhe Ukpokpoma

 7. Didi ebẹbẹ Jerimaya ọ rẹriẹ ovao ku, kọ ẹvẹ oma o jariẹ ẹsejọ?

⁷ Inievo mai buobu a rrọ ekwotọ nọ a rẹ jọ gaviezọ kẹ usiuwoma ota na ha. Jerimaya ọruẹaro na ọ jẹ rria ẹkwotọ otiọye na—ẹkwotọ Juda nọ ozighi ọ dafia taure a tẹ te raha iẹe. Ọ jẹ rẹriẹ ovao ku edawọ kẹdẹ kẹdẹ keme o je whowho ovuẹ ẹdhoguo Ọghẹnẹ. Okejọ o tubẹ jariẹ nọ Barọk, okere-obe riẹ o je gu unoma inọ oma o rrọ riẹ no. (Jeri. 45:2, 3) Kọ Jerimaya ọ siọ iruo na ba fiki elọhoma? Uzẹme riẹ họ, oma o lọhọ e riẹ evaọ okejọ. Ọ ta nọ: “Ekela i te ẹdẹ nọ a yẹ omẹ! . . . Kọ fikieme me je no uvueyẹ na ze te ruẹ ọyawa gbe uweri, jẹ ria akpọ na avọ omovuọ?”—Jeri. 20:14, 15, 18.

8, 9. Re ma gbẹ mọ emamọ ibi, eme ma re ru hrọ wọhọ epanọ Jerimaya 17:7, 8 gbe Olezi 1:1-3 e ta?

⁸ Rekọ Jerimaya ọ siọ iruo na ba ha. O gbe je fievahọ Jihova. Fiki onana, uvi ọruẹaro nana ọ tẹ ruẹ orugba eme ọ Jihova nọ e rrọ Jerimaya 17:7, 8 na, inọ: “Oghale u te ohwo nọ ọ rehọ ẹroso ỌNOWO na ọnọ o fievahọ ỌNOWO na. Ọ wọhọ ure nọ a kọ họ akotọ ame, nọ u fi awọ họ ame; nọ ozọ uvo u re muẹ hẹ, keme ọ rẹ jọ rọrọ ẹsikpobi; ọ rẹ ruawa ukpe nọ ohọo u re muẹ hẹ, keme o re seri ibi emọ họ họ.”

⁹ Wọhọ ure nọ ọ rẹ mọ ibi nọ “a kọ họ akotọ ame,” Jerimaya ọ jẹ mọ ibi ẹsikpobi. Ọ kuvẹ hẹ re isẹkoko i ru ei siọ iruo na ba. Ukpoye, ọ talamu ọnọ ọ rẹ kẹ “ame” uzuazọ na, o te je ru epanọ Jihova ọ ta kẹe kpobi. (Se Olezi 1:1-3; Jeri. 20:9) Jerimaya ọ rrọ obọdẹ oriruo kẹ omai, maero kọ enọ e be ta usiuwoma evaọ ekwotọ nọ a rẹ jọ gaviezọ họ. Otẹrọnọ ere ẹkwotọ ra ọ rrọ, fi eva ra kpobi họ Jihova re o fi obọ họ kẹ owhẹ thihakọ nọ who bi “jiri odẹ riẹ” na.—Hib. 13:15.

10. Eghale vẹ ma wo, kọ didi onọ ma rẹ nọ oma mai?

¹⁰ Jihova ọ kẹ omai eware buobu re i fi obọ họ kẹ omai thihakọ ebẹbẹ evaọ edẹ urere nana. Usu eware nana họ Ebaibol na, onọ a fa gbagba fihọ evẹrẹ buobu no nẹnẹ. Ọ rọ ẹkwoma utu ọrigbo nọ o wo ẹrọwọ avọ areghẹ na kẹ omai emuore abọ-ẹzi buobu no. Ọ be jẹ rọ ibe Ileleikristi mai bọ omai ga evaọ obọ iwuhrẹ gbe ikokohọ. Kọ whọ be daoma wo erere vọvọ no eruẹrẹfihotọ nana ze? Enọ i ru ere kpobi a te “so ile ghọghọ evaọ eva rai.” Rekọ enọ e gaviezọ kẹ Ọghẹnẹ hẹ a ti “bo via fiki edada, [jẹ] viẹ fiki oyawọ ẹzi.”—Aiz. 65:13, 14.

Fievahọ Ọghẹnẹ Evaọ Oke Awaọruọ

11, 12. Fiki ebẹbẹ nọ e rrọ akpọ na, eme họ oware areghẹ nọ ma re ru?

¹¹ Wọhọ epanọ Ebaibol ọ ta, ebẹbẹ e da akpọ fia nẹnẹ. (Mat. 24:6-8; Evia. 12:12) Nọ ẹvo ologbo o te ku, ahwo a rẹ gwọlọ oria nọ u kpehru nọ a rẹ gadiẹ hayo kwa kpohọ. Epọvo na re, nọ ebẹbẹ akpọ na i bi dhe ebuebu na, ima ahwo buobu a be rẹroso igho, egọmeti, egagọ, gbe eriariẹ eware-ikuo. Rekọ enana ọvuọvo e be wha uvi ufuoma ze he. (Jeri. 17:5, 6) Evaọ abọdekọ riẹ, ahwo Jihova a wo uvi adhẹzọ—“utho ebẹdẹ.” (Aiz. 26:4) Ọso-ilezi na o kere nọ: “[Jihova] họ utho mẹ gbe usiwo mẹ, . . . ọzadhe mẹ.” (Se Olezi 62:6-9.) Ẹvẹ ma re ro ru Utho nana họ oria adhẹzọ mai?

¹² Ma rẹ dhẹ gbalọ Jihova nọ ma te bi koko izi riẹ, enọ e wọso ereghẹ ahwo-akpọ. (Ol. 73:23, 24) Wọhọ oriruo, enọ ereghẹ ahwo-akpọ e be kpọ a rẹ sae ta nọ: ‘Uzuazọ ovo who wo, fikiere riakpọ kuoma.’ ‘Kpohọ isukulu ziezi.’ ‘Le igho re who fe.’ ‘Dẹ oware nọ u si owhẹ urru kpobi.’ ‘Nya akpọ na duwu, reawere akpọ na.’ Rekọ ohrẹ nọ Ọghẹnẹ ọ rẹ kẹ họ: Jọ enọ e be rọ akpọ na ru iruo a rehọ iẹe ru iruo vọvọ họ keme akpọ na o bi nwene. (1 Kọr. 7:31) Epọvo na re, Jesu ọ tuduhọ omai awọ inọ ma rọ iruo Uvie na karo re ma rọ ere ‘koko efe họ obọ odhiwu,’ oria nọ oware ovo o rẹ jọ raha ae he.—Mat. 6:19, 20.

13. Ma te roro kpahe eme nọ e rrọ 1 Jọn 2:15-17, enọ vẹ ma rẹ nọ oma mai?

¹³ Kọ uruemu ra kpahe “akpọ” na gbe “eware kpobi nọ e rọ eva akpọ na” i bi dhesẹ inọ who fi eva ra kpobi họ Ọghẹnẹ? (1 Jọn 2:15-17) Kọ eghale nọ Jihova ọ rẹ k’owhẹ gbe obọ nọ who re wo evaọ iruo Uvie na i si owhẹ urru jẹ rrọ owhẹ oja vi ilale akpọ na? (Fil. 3:8) Kọ whọ be daoma wo ẹro ọlọlọhọ? (Mat. 6:22) Orọnikọ Ọghẹnẹ ọ be ta nnọ whọ rẹ keria r’abọ muoma ha, maero otẹrọnọ who wo uviuwou nọ whọ be ko. (1 Tim. 5:8) Rekọ ọ gwọlọ re idibo riẹ a fi eva kpobi họ iẹe—orọnikọ akpọ Setan nọ o whu rẹrẹ no na ha.—Hib. 13:5.

14-16. Erere vẹ o te otujọ no fikinọ a wo ‘ẹro ọlọlọhọ’ jẹ rọ iruo Uvie na karo?

¹⁴ Roro kpahe oriruo Richard avọ Ruth, enọ i wo emọ esa. Richard ọ ta nọ: “Udu mẹ o jẹ ta kẹ omẹ inọ iruo nọ me bi ru kẹ Jihova i te he. Eware e lọhọ kẹ omẹ, rekọ o wọhọ nnọ me fi Ọghẹnẹ họ oria avivẹ evaọ uzuazọ mẹ. Nọ ma lẹ kpahe ẹme na je roro iei ziezi no, mẹ avọ aye mẹ ma tẹ rọwo inọ mẹ ta kẹ ọga iruo mẹ re mẹ hai ru iruo edẹ ene ọvo evaọ ẹkpoka, dede nọ eware e rrọ gaga evaọ orẹwho na. Ọga iruo mẹ ọ rọwo, me te mu iruo họ eru edẹ ene evaọ ẹkpoka.” Eme Richard ọ ta uwhremu na?

¹⁵ Ọ ta nọ: “Nọ a ghale ugho nọ a jẹ hwa omẹ vẹre kpohọ abasoi, a te si abọvo no osa mẹ no, rekọ onana o lẹliẹ omẹ wo edẹ 50 efa nọ mẹ rẹ raha kugbe uviuwou mẹ evaọ ẹgbukpe. O lẹliẹ omẹ bi wo oke ziezi evaọ usiuwoma ota, emọ-iwuhrẹ Ebaibol nọ me wo enẹna e rọ akuasa bu vi enọ me wo vẹre, yọ mẹ be raha oke ziezi kugbe ukoko na. Yọ fikinọ me wo uvẹ nọ mẹ be rọ jọ uwou kugbe emọ na, aye mẹ ọ be hai ru ọkobaro obufihọ n’oke ruoke. Mẹ gba riẹ mu inọ edẹ ene na ọvo me re ru iruo evaọ ẹkpoka.”

¹⁶ Roy avọ Petina, enọ ọmọtẹ rai jọ ọ gbẹ be rria kugbe, a bru oke nọ a je ro ru iruo kpẹre re a sai ru iruo ọkobaro. Roy ọ ta nọ: “Edẹ esa me bi ru iruo ẹkpoka, yọ Petina o bi ru iruo edẹ ivẹ evaọ ẹkpoka. Ma tẹ jẹ kwa no uwou ulogbo nọ ma jẹ rria kpohọ uwou osese, onọ ma rẹ sae rẹrote lọlọhọ. Ma ru iruo ọkobaro re ma te ti yẹ ọmọzae gbe ọmọtẹ mai, yọ isiuru nọ ma wo kẹ iruo ọkobaro i no omai oma ha. Fikiere nọ emọ mai a rro no, ma tẹ wariẹ mu iruo ọkobaro họ. Ma rẹ sae rọ uvumọ ugho wawo eghale nọ ma wo no ho.”

Jọ “Udhedhẹ Ọghẹnẹ” O Jọ Udu Ra

17. Nọ ma riẹ epanọ odẹnotha ọ te jọ họ na, ẹvẹ eme Ebaibol e rọ wha omosasọ se owhẹ no?

¹⁷ Ma riẹ epanọ odẹnotha ọ te jọ họ yọ eware idudhe e sae via kẹ omai kpobi. (Ọtausi. 9:11) Rekọ ma rẹ kuvẹ hẹ re awaọruọ kpahe odẹnotha ọ raha udhedhẹ nọ o rrọ udu mai, wọhọ epanọ o rrọ kẹ enọ i wo usu kugbe Ọghẹnẹ hẹ na. (Mat. 6:34) Pọl ukọ na o kere nọ: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ. Re udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai.”—Fil. 4:6, 7.

18, 19. Idhere vẹ Ọghẹnẹ ọ be rọ k’omai omosasọ? Kẹ oriruo.

¹⁸ Inievo mai buobu nọ e rẹriẹ ovao dhe ebẹbẹ no a wo udhedhẹ iroro no obọ Jihova ze no. Oniọvo-ọmọtẹ jọ ọ ta nọ: “Nọ me kpohọ obẹrọ, edọkita na ọ jẹ tẹzẹ omẹ re mẹ ruẹse rọwo inọ a se azẹ fihọ omẹ oma. Ẹme ọsosuọ nọ ọ jẹ hai noi unu ze k’omẹ họ, ‘Kiyọ ẹme ogheghẹ vẹ inọ whọ rẹ rehọ azẹ hẹ?’ Onana u je ru omẹ lẹ se Jihova ẹsikpobi, yọ olẹ na o lẹliẹ udu dh’omẹ. Ozọ u gbe je mu omẹ hẹ. Dede nọ azẹ ọ jọ omẹ oma tere he, mẹ sae rọ Ebaibol dhesẹ kẹ edọkita na oware nọ o be lẹliẹ omẹ siọ azẹ.”

¹⁹ Ẹsejọ Ọghẹnẹ ọ rẹ sae rọ ẹkwoma inievo na hayo obe ukoko na jọ fi obọ họ k’omai. O sae jọnọ who yo no ẹdẹjọ nọ oniọvo jọ ọ ta nọ: “Nwanọ eme nọ mẹ gwọlọ ena. Fiki mẹ a ro kere ai.” Ẹhẹ, eware e tẹ make ga, Jihova o ti dhesẹ nọ o you omai otẹrọnọ ma fievahọ iẹe. Mai yọ “igodẹ” riẹ, yọ ọ rehọ odẹ riẹ se omai.—Ol. 100:3; Jọn 10:16; Iruẹru 15:14, 17.

20. Ẹvẹ idibo Jihova a te rọ rria evaọ omofọwẹ nọ a tẹ raha akpọ Setan no?

²⁰ “Evaọ ẹdẹ ofu ỌNOWO na” nọ ọ be tha vẹrẹ vẹrẹ na, eware kpobi nọ ahwo akpọ Setan a fievahọ e te raha no riẹriẹriẹ. Te igoru, isiliva, gbe eware eghaghae efa kpobi e te thọ ae he. (Zef. 1:18; Itẹ 11:4) Jihova nọ ọ rrọ “utho ebẹdẹ” na ọvo ọ te jọ oria adhẹzọ. (Aiz. 26:4) Fikiere joma fi eva mai kpobi họ Jihova enẹna ẹkwoma izi riẹ kpobi nọ ma re koko, usiuwoma Uvie na nọ ma rẹ ta ghelọ ukpokpoma hayo nọ a gbẹ be kezọ usiuwoma ota mai hi, gbe ebẹbẹ mai kpobi nọ ma re vuwa kẹe. Ma te bi ru ere, ma te ‘rria evaọ omofọwẹ gbe udhedhẹ, ababọ ozọ eyoma.’—Itẹ 1:33.

[Oruvẹ-obotọ]

Kọ Whọ Sae k’Iyo Enọ Nana Vevẹ?

Ẹvẹ ma sai ro fievahọ Ọghẹnẹ

• nọ ma tẹ rrọ otọ odawọ?

• nọ ma tẹ rẹriẹ ovao dhe ukpokpoma hayo nọ a gbẹ be kezọ usiuwoma ota mai hi?

• evaọ oke awaọruọ?

[Uwoho nọ o rrọ ẹwẹ-obe avọ 13]

Ekoko izi Ọghẹnẹ o rẹ wha evawere ze

[Uwoho nọ o rrọ ẹwẹ-obe avọ 15]

“ỌNOWO na họ utho ebẹdẹ”