Jọ Eva Ẹzi Nya Re Who Wo Udhedhẹ Gbe Uzuazọ

‘Jọ eva ẹzi nya orọnikọ uwo ho.’—ROM 8:4.

1, 2. (a) Enwoma vẹ i no rie ze no nọ ohwo ọ tẹ be dhẹ omoto yọ o bi ru eware efa? (b) Enwoma vẹ e rẹ sai noi ze nọ ohwo ọ gbẹ tẹrovi eware abọ-ẹzi hi?

“IRORO edraiva buobu nẹnẹ e be jọ imoto nọ a be dhẹ hẹ, yọ o wọhọ nọ onana u bi dhe eyeyoma kukpe kukpe.” Ere ohwo jọ nọ o bi ru iruo evaọ oria nọ a be jọ rẹrote enọ e rẹ dhẹ ofa evaọ obọ America ọ ta. Ifonu yọ ovo jọ evaọ usu eware nọ e rẹ sae rehọ iroro ohwo no omoto nọ ọ be dhẹ. Evaọ imasa kpobi nọ a kiẹ riwi, omọvo evaọ usu rai ọ ta nọ edraiva nọ ọ be rọ ifonu t’ẹme ọ rọ omoto jamu riẹ no hayo omojọ o kiọkọ re ọ rọ omoto jamu riẹ. Ohwo ọ rẹ sai roro nọ re o ru eware efa yọ ọ be dhẹ omoto o rẹ kẹ erere rekọ o vọ avọ enwoma.

² Ere usu mai kugbe Jihova o rrọ. Wọhọ epanọ edraiva nọ ọ be dhẹ omoto yọ o bi ru eware efa ọ rẹ kaki muẹrohọ enwoma ha na, ere ohwo nọ ọ tẹrovi eware abọ-ẹzi hi o re kie ruọ edawọ lọlọhọ. Ma te reghe no ele eware abọ-ẹzi, ma rẹ sai kie no ukoko. (1 Tim. 1:18, 19) Pọl ukọ na ọ vẹvẹ unu kpahe enwoma nana nọ ọ ta kẹ ibe Ileleikristi riẹ obọ Rom inọ: “Iroro erọ kpahọ eware iwo oye họ uwhu, rekọ iroro eware nọ erọ erọ Ẹzi họ uzuazọ gbe udhedhẹ.” (Rom 8:6) Eme họ otofa eme Pọl na? Ẹvẹ ma sae rọ whaha “iroro erọ kpahọ eware iwo” je le “eware nọ erọ erọ Ẹzi”?

A Wo “Obrukpe Ọvo” Ho

3, 4. (a) Omodawọ vẹ Pọl o kere kpahe? (b) Fikieme ẹbẹbẹ nọ Pọl ọ rẹriẹ ovao ku na ọ rọ rrọ omai oja?

³ Evaọ ileta nọ Pọl o kere se ahwo Rom, ọ ta nọ uwo gbe iroro riẹ i bi muabọ. (Se Ahwo Rom 7:21-23.) Orọnikọ Pọl o bi gu ẹme na no uzou hayo bruenu hu, wọhọ ẹsenọ izieraha riẹ i bu te epanọ ọ gbẹ sai ro ru uvumọ oware kpahe ae he. Ma sae ta ere keme Pọl yọ Oleleikristi nọ a rọ ẹzi wholo, ọnọ a salọ re ọ jọ “ukọ rọ kẹ otu Egedhọ.” (Rom 1:1; 11:13) Kọ fikieme Pọl o ro kere kpahe oma nọ ọ jẹ dawo re ọ sai ru oware ezi?

⁴ Pọl ọ be ta nọ ọ rẹ sae rọ ẹgba obọ riẹ ru oreva Ọghẹnẹ hẹ, wọhọ epanọ ọ gwọlọ ru. Fikieme? Ọ ta nọ: “Ahwo na kpobi a raha uzi re no a gbe te obọ oruaro Ọghẹnẹ hẹ.” (Rom 3:23) Fikinọ Pọl yọ ọmọ Adamu, ọ reuku sebaẹgba. Ma wo otoriẹ oware nọ Pọl ọ ta kpahe na keme mai kpobi ma gba ha yọ wọhọ Pọl, ma be daoma kẹdẹ kẹdẹ re ma ru oware nọ u woma. Ofariẹ, eware buobu e rrọ akpọ na nẹnẹ nọ e rẹ sai gele omai no ‘edhere ọhwahwa nọ o bi su kpohọ uzuazọ’ na. (Mat. 7:14) Rekọ Pọl ọ riẹ nọ ẹbẹbẹ na o wo ifue, wọhọ epanọ o rrọ k’omai nẹnẹ re.

 5. Diẹse Pọl ọ jọ wo obufihọ gbe ufuoma?

⁵ Pọl o kere nọ: “Ono ọ rẹ sai ti si omẹ . . . ? Me yere Ọghẹnẹ fiki Jesu Kristi Ọnowo mai!” (Rom 7:24, 25) Kẹsena ọ tẹ jọ ileta na ta ẹme kẹ Ileleikristi nọ a rọ ẹzi wholo na, “enọ erọ eva Kristi Jesu.” (Se Ahwo Rom 8:1, 2.) Jihova ọ rọ ẹkwoma ẹzi ọfuafo dẹ ae rehọ wọhọ emọ riẹ, re a jọ “ereuku kugbe Kristi.” (Rom 8:14-17) Ẹzi Ọghẹnẹ gbe ẹrọwọ nọ a fihọ idhe ẹtanigbo Kristi i ru rai kparobọ evaọ ohọre nọ Pọl ọ fodẹ na, fikiere a gbe wo “obrukpe ọvo” ho. A thọ rai no otọ “uzi umuomu gbe uwhu.”

 6. Fikieme u ro fo re idibo Ọghẹnẹ kpobi a muẹrohọ eme ọ Pọl na?

⁶ Dede nọ Ileleikristi nọ a rọ ẹzi wholo Pọl o kere ileta riẹ se, ẹme nọ ọ ta kpahe ẹzi Ọghẹnẹ gbe idhe ẹtanigbo Kristi e rẹ sae kẹ idibo Jihova kpobi erere makọ enọ i wo ẹruore otọakpọ na. Dede nọ Ileleikristi nọ a rọ ẹzi wholo na họ enọ Pọl ọ kẹ ohrẹ yena, o r’oja re idibo Ọghẹnẹ kpobi a wo otoriẹ ẹme nọ o kere na jẹ daoma wo erere noi ze.

Epanọ Ọghẹnẹ Ọ rọ “Tahọ Uzioraha Obọ Eva Uwo”

7, 8. (a) Oghẹrẹ vẹ Uzi na u ro wo “oyẹlẹ fiki uwo”? (b) Eme Ọghẹnẹ ọ rọ ẹkwoma ẹzi riẹ gbe idhe ẹtanigbo na ru lọhọ no?

⁷ Evaọ uzou avọ 7 orọ obe Ahwo Rom, Pọl ọ fodẹ epanọ uzioraha u wo ẹgba tẹ. Evaọ uzou avọ 8 ọ ta kpahe epanọ ẹzi ọfuafo na o wo ẹgba te. Ọ ta kpahe epanọ ẹzi Ọghẹnẹ ọ sai ro fi obọ họ kẹ Ileleikristi fi uzioraha kparobọ re a sai ru oreva Jihova je wo ọjẹrehọ riẹ. Pọl ọ ta nọ Ọghẹnẹ ọ rọ ẹkwoma ẹzi riẹ gbe idhe ẹtanigbo Ọmọ riẹ ru oware nọ Uzi Mosis na o sai ru hu.

⁸ Uzi Mosis na, avọ ijaje buobu nọ e jariẹ eva, u brukpe erahaizi. Ofariẹ, izerẹ ikpehru Izrẹl nọ e jọ otọ Uzi na a gba ha, fikiere idhe rai e jẹ sai si izieraha no ho. Oye jabọ nọ ma sae rọ ta nọ Uzi na u wo “oyẹlẹ fiki uwo.” Rekọ nọ Ọghẹnẹ o “vi Ọmọ ọvo riẹ eva oghẹrẹ oma uzioraha” ze re ọ hwosa ẹtanigbo na, Ọghẹnẹ ọ tẹ “tahọ uzioraha obọ eva uwo,” re o ru “oware nọ uzi osai ru hu” gba. Fiki onana, Ọghẹnẹ o rri Ileleikristi nọ a rọ ẹzi wholo na kiẹrẹe fiki ẹrọwọ nọ a fihọ idhe ẹtanigbo Jesu. A tuduhọ ae awọ re a ‘jọ eva ẹzi nya orọnikọ uwo ho.’ (Se Ahwo Rom 8:3, 4.) Evaọ uzẹme, a re ru ere bọwo ẹdẹ uwhu rai re a ruẹsi wo “etu uvie uzuazọ” na.—Evia. 2:10.

 9. Eme họ otofa ẹme Griki nọ a fa “uzi,” nọ o rrọ Ahwo Rom 8:2 na?

⁹ U te no “uzi” na nọ Pọl ọ fodẹ no, ọ ta kpahe “uzi Ẹzi na” gbe “uzi umuomu gbe uwhu.” (Rom 8:2) Izi vẹ Pọl ọ ta kpahe na? Orọnikọ ijaje jọ nọ a kere fihọ otọ họ wọhọ enọ e jọ evaọ Uzi Mosis na. Obe jọ o ta nọ: “Ẹme Griki nọ a jọ etenẹ fa uzi na u dhesẹ ọwhọ nọ ọ rẹ wọ ohwo ru oware—te uwoma hayo uyoma. Ẹme Griki na ọ sai je dhesẹ itee nọ ohwo ọ rẹ nyate evaọ uzuazọ.”

10. Oghẹrẹ vẹ mai kpobi ma rọ rrọ otọ uzi umuomu gbe uwhu?

¹⁰ Pọl ukọ na o kere nọ: “Umuomu orọ fiki omọvo vaha ruọ akpọ na, gbe uwhu fiki izieraha, fikiere uwhu u te zite ahwo kpobi: . . . keme ahwo kpobi a raha uzi.” (Rom 5:12) Mai emọ Adamu kpobi ma rrọ otọ uzi umuomu gbe uwhu. Fikinọ ma gba ha, ma rẹ gwọlọ ru eware nọ e rẹ dha Ọghẹnẹ eva, onana u ve su kpohọ uwhu. Pọl ọ jọ ileta nọ o kere se ahwo Galesha se iruemu itieye na “iruo uwo.” O te fibae nọ: “Enọ ibi ru eware nana a rẹ sai reuku uvie Ọghẹnẹ hẹ.” (Gal. 5:19-21) Oghẹrẹ ahwo nọ Pọl ọ jọ etenẹ dhesẹ na yọ enọ e be nya evaọ uwo. (Rom 8:4) ‘Ọwhọ nọ ọ be wọ ae’ gbe ‘itee rai evaọ uzuazọ’ erọ uwo. Kọ enọ i bi gbe ọfariẹ, gọ edhọ, dhomahọ iruẹru imizi, hayo ru eware iyoma efa ọvo họ enọ e be nya evaọ uwo? Ijo, keme iruo uwo i kugbe iruemu wọhọ ihri-eriọ, ofu ọkpoo, gbe egrẹọjẹ. Ono ọ rẹ sae ta nọ o siomano eware itienana kpobi riẹriẹriẹ?

11, 12. Ọruẹrẹfihotọ vẹ Jihova o ru no re ma sai fi uzi umuomu gbe uwhu kparobọ, kọ eme ma re ru re ma sai wo ọjẹrehọ Ọghẹnẹ?

¹¹ Eva e rẹ were omai inọ Jihova o ru rie lọhọ k’omai re ma sai fi uzi umuomu gbe uwhu kparobọ. Jesu ọ ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” Otẹrọnọ ma jẹ uyoyou Ọghẹnẹ rehọ je fi ẹrọwọ họ idhe ẹtanigbo Jesu Kristi, ma rẹ sai wo ufuoma no uzioraha nọ ma reuku riẹ na. (Jọn 3:16-18) Fikiere, oma o rẹ sae wọ omai omomọvo tehe enu wọhọ Pọl inọ: “Me yere Ọghẹnẹ fiki Jesu Kristi Ọnowo mai!”

¹² Uyero mai o wọhọ ohwo nọ o wo ekpehre ẹyao jọ nọ a siwi no. Ma tẹ gwọlọ nọ ẹyao na o re kpo riẹriẹriẹ, ma re ru oware nọ edọkita na ọ ta nọ ma ru. Dede nọ ẹrọwọ nọ ma re fihọ idhe ẹtanigbo na ọ rẹ sae thọ omai no uzi umuomu gbe uwhu, sebaẹgba o gbẹ rrọ omai oma. Re ma sai wo ọjẹrehọ Ọghẹnẹ gbe eghale riẹ, o gwọlọ eware efa mi omai. Pọl ọ tẹ jẹ ta nọ re ma sai “ru ẹrẹreokie uzi na gba,” ma rẹ nya evaọ ẹzi.

Ẹvẹ Ma Sae rọ Nya Evaọ Ẹzi?

13. Eme u dhesẹ re ohwo ọ jọ eva ẹzi nya?

¹³ Nọ ma tẹ be nya onya yọ ma be kẹle oria nọ ma bi kpohọ. Fikiere, re ohwo ọ nya evaọ ẹzi u dhesẹ nọ o bi ru ẹnyaharo abọ-ẹzi orọnikọ ohwo na ọ gba no ho. (1 Tim. 4:15) Kẹdẹ kẹdẹ ma rẹ daoma yeri uzuazọ nọ o rọwo kugbe ekpakpọ ẹzi na. Ma tẹ be “jọ eva Ẹzi nya” ma re wo ọjẹrehọ Ọghẹnẹ.—Gal. 5:16.

14. Ẹvẹ whọ rẹ sai dhesẹ ahwo nọ a bi “lele uwo”?

¹⁴ Evaọ ileta nọ Pọl o kere se ahwo Rom na, ọ ta kpahe ẹko ahwo ivẹ. (Se Ahwo Rom 8:5.) Uwo nọ Pọl ọ jọ etenẹ fodẹ na orọnikọ nwanọ ugboma na ha. Evaọ Ebaibol na, ẹsejọ a rẹ rehọ “uwo” ro dhesẹ sebaẹgba. Sebaẹgba nana o be whae ze nọ uwo gbe iroro na i bi ro muabọ, wọhọ epanọ Pọl ọ kake fodẹ na. Rekọ, wo ohẹriẹ no Pọl, enọ i bi “lele uwo” a rẹ tubẹ họre re a fi isiuru uwo kparobọ họ. Ukpenọ a re roro kpahe oware nọ Ọghẹnẹ ọ gwọlọ mi ai re a jẹ jẹ obufihọ Ọghẹnẹ rehọ kọ “eware iwo” a be roma kẹ. Epanọ a re ro le isiuru ugboma rai t’obọ ọvo a rẹ tẹrovi. Wo ohẹriẹ, enọ i bi “lele Ẹzi” a rẹ “kezọ eware Ẹzi,” koyehọ a rẹ tẹrovi eware abọ-ẹzi.

15, 16. (a) Ẹvẹ eroro kpahe oware u re kpomahọ uruemu ohwo? (b) Eghẹrẹ eware vẹ e be were ahwo buobu nẹnẹ?

¹⁵ Se Ahwo Rom 8:6. Re ohwo o te ti ru oware jọ—te oware uwoma hayo uyoma—o re roro kpahe iẹe tao. Nọ ohwo o te bi roro kpahe eware iwo ẹsikpobi, ẹmẹrera na u ve ti zihe ruọ uruemu riẹ. Kọ eware iwo ọvo o re wo isiuru kpahe.

¹⁶ Eware vẹ ahwo a be mai roro kpahe nẹnẹ? Jọn ukọ na o kere nọ: “Eware kpobi nọ e rọ eva akpọ na, urusio uwo, gbe urusio ibiaro gbe eyeri uzuazọ, o rọ orọ Ọsẹ na ha rekọ yọ o rọ akpọ na.” (1 Jọn 2:16) Isiuru nana i kugbe ọfariẹ-ogbe, okpodẹ, gbe ekwakwa efe. Eware itienana e vọ ebe, emagazini, ebe-usi, ifimu, etẹlivisiọno, gbe Itanẹte keme eware itieye na ahwo buobu a gwọlọ je bi roro kpahe. Rekọ “iroro erọ kpahọ eware iwo oye họ uwhu” keme o rẹ raha usu ohwo kugbe Ọghẹnẹ enẹna, i ve je su kpohọ uwhu evaọ obaro kẹle na. Fikieme? “Keme iroro nọ erọ kpahe iwo e rọ suọ Ọghẹnẹ; keme e be rọ omakpotọ kẹ uzi Ọghẹnẹ hẹ, dazigbe o sai ruẹ hẹ. Fikiere na enọ erọ eva uwo e rẹ sae were Ọghẹnẹ hẹ.”—Rom 8:7, 8.

17, 18. Ẹvẹ ma sai ro le eware abọ-ẹzi, kọ irere vẹ i ti no onana ze?

¹⁷ Evaọ abọdekọ riẹ, “iroro eware nọ erọ erọ Ẹzi họ uzuazọ gbe udhedhẹ,” koyehọ uzuazọ ebẹdẹ bẹdẹ evaọ obaro gbe udhedhẹ iroro avọ udhedhẹ kugbe Ọghẹnẹ evaọ enẹna. Ẹvẹ ma sai ro le “eware nọ erọ erọ Ẹzi”? Ẹkwoma eroro kpahe eware abọ-ẹzi ma ve je ru re eware abọ-ẹzi e kpọ uzuazọ mai. Nọ ma te bi ru ere, ma ti wo iroro nọ e be “rọ omakpotọ kẹ uzi Ọghẹnẹ” e vẹ jẹ “were Ọghẹnẹ.” Nọ ma tẹ rẹriẹ ovao ku odawọ, iroro e rẹ gbẹ bẹ omai ẹjẹ hẹ. Ma vẹ te jẹ iroro nọ e rọwo kugbe ẹzi Ọghẹnẹ.

¹⁸ Fikiere, o r’oja re ma hai roro kpahe eware abọ-ẹzi. Ma re kru oma mai ga kẹ iruẹru abọ-ẹzi wọhọ olẹ, isase Ebaibol, iwuhrẹ enya, gbe usiuwoma ota. (1 Pita 1:13) Ma rẹ kuvẹ re eware iwo e rehọ iroro mai hi, ukpoye kọ ma rẹ tẹrovi eware abọ-ẹzi. Ma vẹ te rọ ere jọ evaọ ẹzi nya. Ere oruo o te wha eghale buobu se omai, keme iroro nọ ma rẹ rọ kpahe eware abọ-ẹzi e rẹ kẹ uzuazọ gbe udhedhẹ.—Gal. 6:7, 8.

Kọ Whọ Sae k’Iyo Enọ Nana Vevẹ?

• Eme họ “oware nọ uzi osai ru hu” na, kọ eme Ọghẹnẹ o ru kpahe onana?

• Eme họ “uzi umuomu gbe uwhu,” kọ ẹvẹ ma sai ro wo ufuoma no uzi nana?

• Eme ma re ru hrọ re ma sae rọ iroro kpahe “eware nọ erọ erọ Ẹzi”?

[Iwoho nọ e rrọ ẹwẹ-obe avọ 12]

Kọ whọ be jọ evaọ uwo nya manikọ evaọ ẹzi?