Wuhrẹ No Ithihakọ Jihova Avọ Jesu Ze

“Wha kele akothiho Ọnowo mai gbe usiwo.”​—2 PITA 3:15.

ẸVẸ WHỌ TE K’UYO ENỌ NANA?

Ẹvẹ Jihova o bi ro dhesẹ nọ o wo ithihakọ?

Fikieme o rọ gwọlọ nọ Jesu o re thihakọ oke lelehie?

Eme ma rẹ sai ru nọ ma je wo ọkpọ akothiho Ọghẹnẹ?

 1. Onọ vẹ inievo jọ nọ e gọ Jihova kri no a nọ omarai no?

ONIỌVO-ỌMỌTẸ jọ nọ o wo ẹrọwọ ziezi nọ o thihakọ ebẹbẹ ikpe buobu no ọ nọ avọ omaurokpotọ inọ, “Kọ mẹ te sae rọ ẹro ruẹ urere na taure me te whu?” Inievo jọ nọ e gọ Jihova kri no a nọ onọ ovona no. Ma bi rẹro ẹdẹ nọ Ọghẹnẹ o ti ru eware kpobi zihe ruọ ekpokpọ, nọ o ti si ebẹbẹ kpobi nọ ma be rẹriẹ ovao dhe nẹnẹ na n’otọ. (Evia. 21:5) Dede nọ ma wo imuẹro inọ akpọ Setan nana o ti kuhọ kẹle, re ohwo o thihakọ hẹrẹ ẹdẹ nọ o ti kuhọ o rẹ sae jọ bẹbẹ.

 2. Enọ vẹ kpahe akothiho Ọghẹnẹ ma be te ta ẹme kpahe?

² Ebaibol ọ ta nọ ma re wo akothiho hrọ. Wọhọ idibo Ọghẹnẹ erọ oke anwae, ma te reawere eware nọ Ọghẹnẹ ọ ya eyaa rai nọ ma te wo ẹrọwọ ọgaga je thihakọ hẹrẹ oke nọ o ti ru eyaa riẹ gba. (Se Ahwo Hibru 6:11, 12.) Jihova omariẹ o bi thihakọ anwẹdẹ. Ọ hae te raha ahwo omuomu no anwẹdẹ rekọ ọ be hẹrẹ ẹruoke nọ o ti ro ru ere. (Rom 9:20-24) Fikieme o bi ro thihakọ ga tere? Ẹvẹ Jesu ọ rọ rehọ aro kele akothiho Ọghẹnẹ jẹ rọ ere fi oriruo h’otọ k’omai? Irere vẹ i re te omai nọ ma te wo ọkpọ akothiho Ọghẹnẹ? Iyo enọ nana e rẹ sai fi obọ họ kẹ omai wo ithihakọ gbe ẹrọwọ ọgaga, o tẹ make rọnọ ẹsejọhọ ma re roro nọ Jihova ọ be raha oke kpahe erugba eyaa riẹ.

FIKIEME JIHOVA O BI RO THIHAKỌ?

3, 4. (a) Fikieme Jihova o bi ro thihakọ kpahe erugba ẹjiroro riẹ kẹ otọakpọ na? (b) Eme Jihova o ru kpahe ọwọsuọ nọ ọ romavia evaọ ọgbọ Idẹn?

³ U wo emamọ ẹjiroro nọ Jihova o bi ro thihakọ. Ginọ uzẹme inọ no ebẹdẹ rite ebẹdẹ ọye họ Ọghẹnẹ Erumeru na, ghele na ọkparesuọ nọ ọ romavia evaọ Idẹn na u fi enọ jọ h’otọ nọ i kpomahọ emama Jihova kpobi evaọ ehrugbakpọ na. Jihova o bi thihakọ keme ọ riẹ inọ re a kẹ iyo enọ nana gbagba o gwọlọ oke. Fikinọ ọ riẹ oghẹrẹ nọ ijẹle gbe ahwo-akpọ a rrọ totọ, akothiho riẹ na o rrọ rọkẹ ewoma mai.—Hib. 4:13.

⁴ O jọ ẹjiroro Jihova inọ emọ Adamu avọ Ivi a vọ otọakpọ na. Nọ Setan ọ viẹ Adamu avọ Ivi họ ghẹmeeyo kẹ Ọghẹnẹ no, onana u ru nọ Ọghẹnẹ ọ rọ kpairoro vrẹ ẹjiroro ọsosuọ riẹ hẹ. O brudu hu, o bru okpakpa ku ẹbẹbẹ na họ hayo kpairoro vrẹ ẹjiroro riẹ kpahe ahwo-akpọ họ. Ukpoye, ọ gbẹ edhere ọfa nọ o ti ro ru ẹjiroro riẹ gba kpahe ahwo-akpọ gbe otọakpọ na. (Aiz. 55:11) Re ọ ruẹsi ru ẹjiroro riẹ gba je dhesẹ kẹ ikọ-odhiwu gbe ahwo-akpọ inọ esuo riẹ ọ mai woma, Jihova o thihakọ gaga avọ oma-oriẹsuo, ọ tubẹ hẹrẹ ikpe idu buobu re abọjọ ẹjiroro riẹ ọ ruẹsi rugba.

 5. Erere vẹ akothiho Jihova ọ te wha ze?

⁵ Ẹjiroro ọfa nọ Jihova o bi ro thihakọ họ, re ahwo buobu a sai wo uzuazọ ebẹdẹ bẹdẹ. Obọnana, o bi ru ọruẹrẹfihotọ nọ o ti ro siwi “otu obuobu” na. (Evia. 7:9, 14; 14:6) Jihova ọ be rọ ẹkwoma iruo usiuwoma ota na zizie ahwo re a wuhrẹ kpahe Uvie riẹ gbe izi ikiẹrẹe riẹ. Ovuẹ Uvie na họ usi nọ o mai woma kpaobọ kẹ ahwo-akpọ, “usiuwoma” o ginẹ rrọ. (Mat. 24:14) Ohwo kpobi nọ Jihova o si o re zihe ruọ omọvo idibo riẹ nọ e rrọ otọakpọ nọ a you ẹrẹreokie. (Jọn 6:44-47) Ọghẹnẹ oyoyou mai o re fi obọ họ kẹ ahwo otiọye na re a wo ọjẹrehọ riẹ. Ọ be jẹ jọ udevie ahwo-akpọ salọ enọ i ti lele Ọmọ riẹ su evaọ obọ odhiwu. Nọ a te kpohọ odhiwu no, a ve ti fi obọ họ kẹ ahwo-akpọ nọ a yoẹme kẹ Ọghẹnẹ nyate ẹgbagba je wo uzuazọ ebẹdẹ. O rrọ vevẹ inọ Jihova o bi thihakọ yọ evaọ oke ovona o bi ru ọruẹrẹfihotọ re eyaa riẹ kpobi e ruẹsi rugba rọkẹ ewoma mai.

 6. (a) Oghẹrẹ vẹ Jihova o ro thihakọ evaọ edẹ Noa? (b) Kọ ẹvẹ o bi ro thihakọ evaọ edẹ mai na?

⁶ Jihova o gbe bi thihakọ dede nọ a bi ru eva dhae gaga, wọhọ epanọ ma rẹ sae ruẹ vuhumu evaọ oghẹrẹ nọ o thihakọ emuemu taure Owhe oke Noa na o te ti ku. Oke yena, ọfariẹ-ogbe gbe ozighi ọ da otọakpọ na fia, onana u ru ‘eva dha Ọghẹnẹ gaga’ fiki epanọ ahwo-akpọ a yoma te. (Emu. 6:2-8) Ọghẹnẹ ọ rẹ kuvẹ kẹ oyena ribri hi, fikiere ọ tẹ jiroro inọ ọ rẹ rehọ ame raha ahwo omuomu. Nọ Ọghẹnẹ o je “thihakọ hẹrẹ eva edẹ Noa” o ru ọruẹrẹfihotọ nọ o re ro siwi Noa avọ uviuwou riẹ. (1 Pita 3:20) Evaọ ẹruoke, Jihova ọ vuẹ Noa kpahe ẹjiroro nana jẹ ta kẹe nọ o ku okọ. (Emu. 6:14-22) Ofariẹ, Noa ọ jọ “ọvuẹovuẹ ẹrẹreokie,” ọ jẹ ta kẹ ahwo kpahe ọraha nana. (2 Pita 2:5) Jesu ọ rehọ oke mai na dhesẹ edẹ Noa. Jihova o fi ẹdẹ họ no nọ ọ te rọ raha eyero omuomu nana. Ohwo-akpọ ọvuọvo ọ riẹ “ẹdẹ ọyena gbe oke oyena” ha. (Mat. 24:36) Enẹna, Ọghẹnẹ ọ k’omai iruo inọ ma vẹvẹ ahwo unu jẹ vuẹ ae kpahe epanọ a sae rọ zọ.

 7. Kọ Jihova ọ be kpẹlẹ obọ kẹ erugba eyaa riẹ? Ru ẹme na vẹ.

⁷ O rrọ vevẹ, akothiho Jihova orọnikọ u dhesẹ nọ ọ rehọ abọ muoma be hẹrẹ bẹsenọ oke nọ o fihọ u re te he. Orọnikọ u dhesẹ nọ ọ kare ọdawẹ hẹ. Dede na, fiki uye gbe owho nọ o be lahiẹ ahwo evaọ akpọ omuomu nana a rẹ sai roro ere. Oma o rẹ gwọlọ lọhọ omai yọ ẹsejọ ma re roro nọ Ọghẹnẹ ọ be kpẹlẹ obọ hrọ kẹ eyaa riẹ. (Hib. 10:36) Ajọ o thọrọ owhẹ ẹro ho inọ u wo emamọ ẹjiroro nọ Ọghẹnẹ o bi ro thihakọ gbe inọ ọ be rọ oke nana nọ ọ kẹ uvẹ riẹ na ru oware nọ o rẹ kẹ idibo riẹ kpobi erere. (2 Pita 2:3; 3:9) Obọnana joma ta kpahe epanọ Jesu ọ rọ rehọ aro kele Ọghẹnẹ thihakọ.

ẸVẸ JESU O RO FI EMAMỌ ORIRUO AKOTHIHO H’OTỌ?

 8. Oghẹrẹ vẹ Jesu o ro thihakọ no?

⁸ Jesu o bi ru oreva Ọghẹnẹ yọ ọ be rọ evawere ru ere anwọ ikpe nọ i wo unu hu ze. Nọ Setan ọ wọso ọruẹrẹfihotọ Jihova, Jihova ọ tẹ jiroro inọ o re vi Ọmọ ọvo riẹ ziọ otọakpọ re o ti siwi ahwo-akpọ. Roro kpahe oware nọ oyena o gwọlọ mi Jesu, o thihakọ hẹrẹ ikpe idu buobu bẹsenọ oke yena u ro te. (Se Ahwo Galesha 4:4.) Oke yena soso orọnikọ ọ keria rọ abọ muoma be hẹrẹ hẹ, ukpoye, o je ru iruo nọ Ọghẹnẹ ọ kẹ riẹ oke yena. Nọ ọ ziọ otọakpọ no, ọ riẹ nọ o ti whu evaọ obọ Setan wọhọ epanọ a ruẹaro riẹ. (Emu. 3:15; Mat. 16:21) O ru lele oreva Ọghẹnẹ dede nọ oyena o wha riẹ ze nọ ọ rọ rioja. Jesu o fi oriruo ọgbagba h’otọ orọ ẹmeoyo kẹ Ọghẹnẹ. Ọ tẹrovi ewoma hayo ọkwa obọriẹ hẹ, yọ ma rẹ sae rọ aro kele uruemu yena.—Hib. 5:8, 9.

9, 10. (a) Eme Jesu o bi ru nọ ọ be hẹrẹ oke nọ Jihova o fihọ na? (b) Eriwo vẹ u fo nọ ma re wo kpahe oke nọ Jihova o fihọ?

⁹ Nọ Jesu ọ kparoma kpohọ odhiwu no, Ọghẹnẹ ọ tẹ kẹe ogaga evaọ odhiwu gbe otọakpọ. (Mat. 28:18) Ọ be rọ ogaga yena ru ẹjiroro Ọghẹnẹ gba lele etoke nọ Ọghẹnẹ o fihọ. Jesu ọ rọ odiri hẹrẹ evaọ obọze Ọghẹnẹ bẹsenọ ukpe 1914 u ro te, nọ a ro fi ewegrẹ riẹ họ otọ awọ riẹ wọhọ uthihi awọ. (Ol. 110:1, 2; Hib. 10:12, 13) Kẹle na ọ te raha uyerakpọ omuomu Setan nana. Rekọ taure oke yena u te ti te, Jesu o bi fi obọ họ kẹ ahwo wo ọjẹrehọ Ọghẹnẹ je su ai kpohọ “oria eyeri ame uzuazọ.”—Evia. 7:17.

¹⁰ Kọ whọ gbẹ jọ oriruo nọ Jesu o fihotọ na muẹrohọ oghẹrẹ eriwo nọ u fo nọ ma re wo kpahe oke Ọghẹnẹ? Ababọ avro, Jesu ọ gwọlọ ru oware nọ Ọsẹ riẹ ọ ta kẹe vẹrẹ, ghele na ọ hẹrẹ oke nọ Ọghẹnẹ o fihọ kẹe. Nọ ma be hẹrẹ oke nọ akpọ omuomu Setan o ti kuhọ na, mai kpobi ma gwọlọ ọkpọ akothiho Ọghẹnẹ, orọnikọ ma rẹ kpakpa oma ha yọ ma rẹ kuvẹ re oma o rrọ omai hi. Eme ma re ru re ma sai wo ọkpọ akothiho Ọghẹnẹ?

ẸVẸ MẸ SAI RO WO ỌKPỌ AKOTHIHO ỌGHẸNẸ?

11. (a) Edhere vẹ ẹrọwọ o ro w’obọ kugbe akothiho? (b) Fikieme ma ro wo uvi ẹjiroro nọ ẹrọwọ mai ọ rẹ rọ ga?

¹¹ Taure Jesu ọ tẹ te ziọ otọakpọ, eruẹaro na gbe idibo Ọghẹnẹ efa nọ i wo ẹrọwọ a wo akothiho, onọ u dhesẹ nọ makọ ahwo-akpọ nọ a gba ha a rẹ sai thihakọ. Ẹrọwọ nọ a wo o wha ithihakọ rai ze. (Se Jemis 5:10, 11.) A gbẹ hai fievahọ oware nọ Jihova ọ ta kẹ ae he, koyehọ o hae jọnọ a kare ẹrọwọ, kọ ma roro nọ a hai thihakọ hẹrẹ orugba eyaa Ọghẹnẹ? N’oke t’oke, a jẹ hae rẹriẹ ovao dhe edawọ ilogbo avọ evaifihọ inọ o maki kri kẹhẹ Ọghẹnẹ o ti ru eyaa riẹ gba. (Hib. 11:13, 35-40) Ma wo emamọ ẹjiroro nọ o tube vi oyena nọ ma re ro wo ẹrọwọ ọgaga keme enẹna Jesu họ “emuhọ gbe ekuhọ orọwọ mai,” onọ u ru ẹrọwọ mai gbunu. (Hib. 12:2) O ru eruẹaruẹ gba je dhesẹ ẹjiroro Ọghẹnẹ via kẹ omai evaọ edhere nọ e rẹ rọ bọ ẹrọwọ mai ga.

12. Eme ma rẹ sai ru rọ bọ ẹrọwọ mai ga?

¹² Eme ma rẹ sai ru nọ ẹrọwọ mai ọ rẹ rọ ga ziezi nọ u re fi obọ họ kẹ omai thihakọ? Ehrẹ Ọghẹnẹ nọ ma re fihọ iruo yọ ugogo oware jọ. Wọhọ oriruo, roro kpahe oware nọ u ro fo re whọ rehọ Uvie Ọghẹnẹ karo evaọ uzuazọ ra. Kọ whọ gbẹ daoma fi uthubro nọ o rrọ obe Matiu 6:33 na h’iruo vi epaọ anwẹdẹ? Ẹsejọhọ oyena u dhesẹ nọ who re fiba oke usiuwoma ota ra hayo ru inwene jọ evaọ uzuazọ uyero ra. Whọ jọ oghẹrẹ nọ Jihova ọ be rọ ghale omadawọ ra rite enẹna o thọrọ owhẹ ẹro ho. O sae jọnọ o fi obọ họ kẹ owhẹ wo ọmọ-uwuhrẹ Ebaibol ọkpokpọ nọ who bi wuhrẹ obe kugbe hayo o fi obọ họ kẹ owhẹ wo “udhedhẹ Ọghẹnẹ nọ uvi eriariẹ kpobi.” (Se Ahwo Filipai 4:7.) Nọ whọ tẹ be hae tẹrovi irere nọ who wo no fiki ithubro Jihova nọ who bi ru lele, who ti vuhumu inọ u fo re who he thihakọ.—Ol. 34:8.

13. Kẹ oriruo ọrọ epanọ ma sae rọ bọ ẹrọwọ mai ga je wo akothiho.

¹³ Oriruo ọwhẹrẹ o rẹ sai fi obọ họ kẹ omai ruẹ epanọ ẹrọwọ o re ro ru omai wo ithihakọ. Ọwhẹrẹ ọ rẹ kọ, gbẹ ẹbe fihọ eware nọ ọ kọ, kẹsena o ve vu ai evaọ oke ivuẹvu. Nọ o te vu ziezi, o re wo imuẹro inọ ọ tẹ wariẹ kọ o ti vu ziezi re evaọ ezi ọfa. Ẹsibuobu o re thihakọ hẹrẹ bẹsenọ eware nọ ọ kọ na e rẹ rro te oke ivuẹvu, rekọ ohẹrẹ yena o rẹ whaha iẹe he nọ ọ gbẹ rọ kọ ibi efa ha. Ẹsejọ ọ rẹ tube kọ ewẹ-etọ vi epanọ ọ kọ te evaọ ezi nọ o kpemu. O wo evaifihọ inọ o ti vu. Epọvo na, nọ ma bi wuhrẹ kpahe ithubro Jihova n’oke t’oke, ru lele ai je bi wo irere na, evaifihọ nọ ma wo kpahe Jihova e te hai dhe ẹruẹro. Ẹrọwọ mai o ve ti dhe ẹgaga, onana u ti ru ei lọhọ kẹ omai hẹrẹ eghale nọ ma riẹ nọ ma ti wo evaọ obaro.—Se Jemis 5:7, 8.

14, 15. Eriwo vẹ u fo nọ ma re wo kpahe uye-oruẹ?

¹⁴ Edhere ọfa nọ ma re ro wo akothiho họ, nọ ma te bi wo oghẹrẹ eriwo nọ u fo kpahe akpọ na gbe uzuazọ mai. Daoma rri eware wọhọ epanọ Jihova o bi rri rai. Wọhọ oriruo, roro kpahe oghẹrẹ nọ Jihova o rri uye-oruẹ ohwo-akpọ. U kri no nọ uye-oruẹ ahwo-akpọ o be kẹe uye; ghele na ọ r’abọ muoma fiki idhọvẹ nana ha re ọ siọ eware ezi ba eruo. O vi Ọmọ ọvo riẹ ze “te raha iruo ukumuomu na,” re o si uye-oruẹ nọ Setan ọ wha se ahwo-akpọ kpobi n’otọ. (1 Jọn 3:8) Evaọ uzẹme, uye-oruẹ na o te jọ ubroke keme Ọghẹnẹ o ti si uye-oruẹ na no bẹdẹ bẹdẹ. Epọvo na re, ukpenọ ma rẹ kuvẹ re emuemu nọ ọ rrọ akpọ Setan ọ k’omai ọkora hayo re ma ruawa inọ Uvie Ọghẹnẹ o be kake ze he, joma fi ẹrọwọ họ eware nọ ma re ruẹ hẹ nọ e te jọ bẹdẹ bẹdẹ. Jihova o fi ugogo oke họ nọ o ti ro si emuemu n’otọ, yọ o ti ru ere nọ oke na u te te.—Aiz. 46:13; Nah. 1:9.

¹⁵ Evaọ oke obẹbẹ orọ edẹ urere nana, edawọ sa-sa e rẹ sai te omai. Otẹrọnọ ozighi amọfa ọ wha ẹbẹbẹ se omai hayo ahwo nọ ma you, ma re ru kele he, ukpoye o rẹ jọ ọtamuo mai re ma fievahọ Jihova. Fikinọ ma gba ha, o rẹ jọ bẹbẹ re ma ru ere. Rekọ kareghẹhọ oware nọ Jesu o ru nọ o rrọ obe Matiu 26:39.—Sei.

16. Eme u fo nọ ma rẹ whaha evaọ umutho oke nana nọ u kiọkọ na?

¹⁶ Oware jọ nọ o rẹ whaha ohwo akothiho họ, nọ o te bi wo iroro ivẹ. Eme onana u dhesẹ? Ohwo nọ ọ be jọ udu riẹ vro inọ urere na o te ze kẹle he ọ rẹ sae jabọ họ eware efa, avọ iroro inọ urere na o gbẹ ze wọhọ epanọ Jihova ọ ta ha ọyomariẹ ọ gbẹ jọ ababọ họ. Koyehọ ọ be jọ udu riẹ ta nọ, ‘Mẹ rẹ hẹrẹ mẹ ruẹ sọ Jihova o ti ru ẹme riẹ na gba.’ Kẹsena ọ vẹ te daoma epanọ ọ rẹ rọ gwọlọ okpodẹ evaọ akpọ na, o ve bi koko efe họ kẹ omariẹ viukpenọ ọ rẹ rehọ Uvie Ọghẹnẹ karo, hayo o ve kpohọ isukulu ikpehru re ọ sai yeri emamọ uzuazọ evaọ akpọ inẹnẹ. Kọ whọ tẹ ginẹ roma totọ roro iei, oyena u gbe dhesẹ nọ ohwo yena ọ kare ẹrọwọ? Kareghẹhọ inọ Pọl ọ tuduhọ omai awọ nọ ma rọ aro kele idibo Ọghẹnẹ nọ i wo ẹrọwọ evaọ oke anwae, enọ e ruẹ orugba eyaa Jihova “fiki odiri gbe orọwọ” rai. (Hib. 6:12) Jihova ọ te kuvẹ hẹ re uyerakpọ omuomu nana u lehie vrẹ oke nọ o fihọ nọ o re ro ru ẹjiroro riẹ gba. (Hab. 2:3) Taure oke yena u te ti te, o gwọlọ nọ ma rẹ whaha oma evere nọ ma rẹ rọ gọ Jihova. Ukpoye, u fo nọ ma rẹ jaja aro vi, jẹ daoma kpobi evaọ iruo usiuwoma ota na, onọ o rẹ wha evawere ilogbo se omai enẹna.—Luk 21:36.

EGHALE VẸ AKOTHIHO Ọ RẸ WHA ZE?

17, 18. (a) Uvẹ vẹ akothiho Ọghẹnẹ u rovie fihọ k’omai nẹnẹ? (b) Irere vẹ ma re wo nọ ma bi thihakọ enẹna?

¹⁷ O tẹ make rọnọ ma kurẹriẹ ziọ ukoko na obọ hayo ma kurẹriẹ kri no, o gwọlọ nọ ma rẹ gọ Ọghẹnẹ bẹdẹ bẹdẹ. Odiri o re fi obọ họ k’omai thihakọ bẹsenọ ma re wo esiwo mai ghelọ epanọ urere na u re kri te kẹhẹ. Enẹna, Jihova ọ be kẹ omai uvẹ nọ ma re ro dhesẹ evaifihọ nọ ma wo kpahe iẹe, tubẹ ruẹ uye dede fiki odẹ riẹ. (1 Pita 4:13, 14) Ọghẹnẹ o bi je wuhrẹ omai epanọ ma sai ro thihakọ re ma sai wo esiwo.—1 Pita 5:10.

¹⁸ Jesu o wo ogaga kpobi evaọ obọ odhiwu gbe otọakpọ, yọ oware ovuovo nọ o rẹ sai si owhẹ no otọ ẹruọsa riẹ o rrọ họ, ajokpanọ whẹ ọvo who si oma noi. (Jọn 10:28, 29) Udu fo ho re whọ dhozọ uwhu hayo oware nọ o te via evaọ obaro. Enọ i thihakọ te urere a ti siwi. Fikiere ma rẹ kuvẹ hẹ re akpọ na o su omai thọ, re ma siọ eva ba efihọ Jihova. Ukpoye, ma rẹ gbaemu re ma tua ẹrọwọ mai jẹ rọ oke nana nọ Ọghẹnẹ o bi ro thihakọ na ruiruo ziezi.—Mat. 24:13; se 2 Pita 3:17, 18.

[Iwoho nọ e rrọ ẹwẹ-obe avọ 21]

Ọkpọ akothiho Ọghẹnẹ u ti fi obọ họ kẹ owhẹ tẹrovi iruo Uvie na je wo eghale!