ENỌ NỌ EBAIBOL Ọ KẸ IYO RAI

Ebaibol na yọ Ẹme Ọghẹnẹ. O wọhọ ileta nọ ọsẹ oyoyou o vi se ọmọ riẹ. (2 Timoti 3:16) Ọghẹnẹ ọ jọ Ebaibol na dhesẹ oghẹrẹ nọ ma sai ro ru ei eva were, oware nọ ọ rọ kuvẹ kẹ uye-oruẹ gbe oware nọ o ti ru kẹ ahwo-akpọ evaọ obaro. Rekọ isu egagọ buobu a be vẹ iwuhrẹ Ebaibol tu; o tẹ suẹe ze nọ ahwo buobu a bi ro roro nọ a rẹ sai wo otoriẹ Ebaibol na ha.—Iruẹru Ikọ Na 20:29, 30.

Jihova Ọghẹnẹ ọ gwọlọ nọ ma riẹ uzẹme na kpahe ọyomariẹ. Fikiere, ọ tẹ kẹ omai obe nọ ma rẹ sai wo otoriẹ riẹ lọlọhọ.—Se 1 Timoti 2:3, 4.

U te no Ebaibol na nọ Jihova ọ kẹ omai no, ọ gbẹ edhere nọ ma sai ro wo otoriẹ riẹ. O vi Jesu ze ti wuhrẹ omai. (Luk 4:16-21) Jesu o fi obọ họ kẹ ahwo nọ a jẹ gaviezọ kẹe wo otoriẹ Ikerakere na, o ru eria buobu vẹ kẹ ae.—Se Luk 24:27, 32, 45.

Jesu ọ to ukoko Ileleikristi na họ re u ru iruo nọ ọyomariẹ o muhọ na. (Matiu 28:19, 20) Nẹnẹ, uvi Ileleikristi a bi fi obọ họ kẹ ahwo wo otoriẹ oware nọ Ebaibol na o wuhrẹ kpahe Ọghẹnẹ. Otẹrọnọ whọ gwọlọ wo otoriẹ Ebaibol na, o te were Isẹri Jihova re a fi obọ họ kẹ owhẹ.—Se Iruẹru Ikọ Na 8:30, 31.