Kọ Whọ be Hai Lele Ọghẹnẹ Ta Ẹme?

Egbẹnyusu ekpekpe ivẹ a rẹ ta ẹme kugbe ohwohwo ẹsikpobi nọ a tẹ ruẹ ohwohwo, hayo evaọ ifonu, ividio, Itanẹte nọ a re ro vi uwou se ohwohwo hayo ileta nọ a re kere se ohwohwo. Fikiere, re ma sai si kẹle Ọghẹnẹ, o gwọlọ nọ ma rẹ ta ẹme kugbei ẹsikpobi. Ẹvẹ ma sai ro ru onana?

Ma rẹ sae ta ẹme kugbe Jihova ẹkwoma olẹ. Orọnikọ oghẹrẹ nọ ma re ro lele ọhwa mai ta ẹme ma rẹ rọ lẹ se Ọghẹnẹ hẹ. Rekọ u fo re ma kareghẹhọ inọ, nọ ma tẹ be lẹ yọ ma bi lele Ọnọ ọ ma omai ta ẹme, koyehọ Ọnọ ọ mai kpehru evaọ ehrugbakpọ na. Onana u re ru nọ ma rẹ rọ lẹ se Ọghẹnẹ avọ omaurokpotọ gbe adhẹẹ. Re Ọghẹnẹ ọ sai yo elẹ mai, o gwọlọ nọ ma rẹ nya lele itee jọ nọ o fihọ. Joma ta kpahe esa jọ.

Orọ ọsosuọ, Jihova Ọghẹnẹ ọvo họ ohwo nọ ma rẹ lẹ se orọnikọ Jesu hu, erezi hi, hayo emema ha. (Ọnyano 20:4, 5) Ebaibol na ọ ta vevẹ nọ: “Evaọ oware kpobi wha rọ olẹ avọ olẹ-ayare kugbe uyere-okẹ ta ayare rai via kẹ Ọghẹnẹ.” (Ahwo Filipai 4:6) Orọ avọ ivẹ, odẹ Jesu Kristi nọ ọ rrọ Ọmọ Ọghẹnẹ na ọvo ma rẹ rọ lẹ. Jesu omariẹ ọ ta nọ: “Ohwo ọvo ọ rẹ nya bru Ọsẹ na ze he ajokpaọ ẹkwoma mẹ.” (Jọn 14:6) Orọ avọ esa, elẹ mai e rẹ rọwokugbe oreva Ọghẹnẹ hrọ. Ebaibol na ọ ta nọ: “Ọ rẹ gaviezọ kẹ omai evaọ oware kpobi nọ ma be yare nọ o rọwokugbe oreva riẹ.”a—1 Jọn 5:14.

Uzẹme riẹ họ, usu imava o rẹ sae tọ họ otẹrọnọ omọvo ọvo ọ be hae ta ẹme. Wọhọ epanọ egbẹnyusu ivẹ i re lele ohwohwo ta ẹme ẹsikpobi na, ere ọvona o gwọlọ nọ ma rẹ kuvẹ re Ọghẹnẹ ọ ta ẹme kẹ omai, yọ ma rẹ gaviezọ kẹe nọ ọ tẹ be ta ẹme. Kọ whọ riẹ oghẹrẹ nọ Ọghẹnẹ ọ rẹ rọ ta ẹme kẹ omai?

Ebaibol na, Jihova Ọghẹnẹ ọ be rọ “ta ẹme” kẹ omai nẹnẹ. (2 Timoti 3:16, 17) Fikieme ma rọ ta ere? Wọhọ oriruo: Ma rehọ iẹe nọ ogbẹnyusu ọkpekpe ra jọ o kere ileta se owhẹ. Nọ who te se ileta na no oma u re mu owhẹ ta kẹ amọfa nọ, “Mẹ nwani yo mi ogbẹnyusu mẹ obọ!” Yọ orọnọ unu ọ rọ ta ẹme na kẹ owhẹ hẹ, ileta o kere se owhẹ. Epọvo na re, nọ who te bi se Ebaibol na yọ whọ be kẹ Jihova uvẹ re ọ ta ẹme kẹ owhẹ. Oyejabọ nọ Gina nọ ma fodẹ evaọ uzoẹme ọsosuọ na ọ rọ ta nọ, “Otẹrọnọ mẹ gwọlọ nọ Ọghẹnẹ o rri omẹ wọhọ ogbẹnyusu riẹ, me re se ileta nọ o kere se omai, koyehọ Ebaibol na. Isase Ebaibol ikẹdẹ kẹdẹ i gine si omẹ kẹle Ọghẹnẹ gaga no.” Kọ whọ be kuvẹ re Jihova ọ ta ẹme kẹ owhẹ kẹdẹ kẹdẹ ẹkwoma Ebaibol na nọ who re se kẹdẹ kẹdẹ? Who te bi ru ere, u ti fiobọhọ kẹ owhẹ si kẹle Ọghẹnẹ viere.