Jọ Abọ Esuo Jihova!

1, 2. Eme o gwọlọ nọ mai omomọvo o re wo imuẹro riẹ? (Rri uwoho nọ o rrọ emuhọ uzoẹme na.)

WỌHỌ epanọ ma ta evaọ uzoẹme no o vrẹ na, Setan ọ ta nọ esuo Jihova o woma ha, gbe nọ o te mai woma kẹ ahwo-akpọ nọ a te bi su omobọ rai. Kọ uzẹme Setan ọ ta na? O hae jọnọ ahwo-akpọ nọ a salọ nọ a re su omarai a rẹ sae rria bẹdẹ bẹdẹ, kọ esuo rai ọ hai ti woma vi ọrọ Ọghẹnẹ? Kọ o hae jọnọ whọ rẹ sae rria bẹdẹ bẹdẹ ababọ Ọghẹnẹ nọ ọ rẹ kpọ owhẹ, ẹsiẹe whọ hae te mae wereva?

² Uvumọ ohwo ọ rẹ sae kuyo enọ yena kẹ owhẹ hẹ. O gwọlọ nọ mai omomọvo ma re roro didi kpahe ẹme nana. Ma te ru ere, u ti vẹ kẹ omai ziezi inọ esuo Ọghẹnẹ ọ mai woma. A rẹ ruẹ obọ esuo Ọghẹnẹ hẹ, yọ o gwọlọ nọ ma rẹ rọ udu kpobi thae uke. Ebaibol na o dhesẹ oware nọ u ru omai wo imuẹro nana. Wọhọ oriruo, joma ta kpahe oware nọ Ebaibol na ọ ta nọ u dhesẹ nọ Jihova u gine fo nọ o re su ehrugbakpọ na.

 3. Fikieme o rọ rọnọ Jihova ọvo họ ọnọ u fo nọ o re su ehrugbakpọ na?

³ Jihova họ Ọnọ u fo nọ o re su ehrugbakpọ na keme ọye họ Ọghẹnẹ Erumeru gbe Ọmemama na. (1 Irv. 29:11; Iruẹru 4:24) A jọ eruẹaruẹ nọ e rrọ Eviavia 4:11 dhesẹ ahwo idu udhuhrẹ gbe ene (144,000) nọ i ti lele Jesu su na, nọ e be ta nọ: “Who te, Jihova Ọghẹnẹ mai, re a jiri owhẹ fiki oruaro gbe ọghọ gbe ogaga ra, keme whẹ ọ ma eware kpobi, yọ fiki oreva ra a rọ ziọ uzuazọ, oye whọ rọ ma ae.” Ẹhẹ, fikinọ Jihova ọ ma eware kpobi, o wo udu nọ o re ro su ahwo-akpọ gbe ikọ-odhiwu kpobi.

 4. Fikieme u re ro dhesẹ nọ ma be rọ ufuoma iroro-ejẹ mai ruiruo thọ nọ ma tẹ wọso Jihova?

⁴ Setan ọ ma oware ovo ho. Fikiere, o wo udu ovo nọ o re ro su ehrugbakpọ na ha. Omovia o wọ Setan gbe ọzae-avọ-aye ọsosuọ na wọso udu esuo Jihova na. (Jeri. 10:23) Uzẹme, nọ o rọnọ a wo ufuoma iroro-ejẹ na, a rẹ sae salọ nọ a gwọlọ jọ otọ esuo Ọghẹnẹ hẹ. Dede na, kọ onana o kẹ rai udu nọ a re ro ru ere? Vievie. Ufuoma iroro-ejẹ u re fiobọhọ kẹ ahwo salọ oware nọ u fo kẹdẹ kẹdẹ. Dede na, onana o kẹ rai udu nọ a rẹ rọ wọso Ọmemama nọ ọ kẹ rai uzuazọ na ha. Uzẹme riẹ họ, u re dhesẹ nọ ma be rọ ufuoma iroro-ejẹ mai ruiruo thọ nọ ma tẹ wọso Jihova. Otọ esuo Jihova u fo nọ ahwo-akpọ a rẹ jọ.

 5. Fikieme o sai ro mu omai ẹro nọ izi Jihova kpobi i kiẹrẹe?

⁵ U wo ẹjiroro ọfa nọ Jihova o ro fo Osu ehrugbakpọ na. Uvi-oziẹ o da esuo riẹ fia. Jihova omariẹ ọ ta nọ: “Mẹ họ ỌNOWO na nọ o re dhesẹ uyoyou, je ruiruo nọ i kiete avọ ẹrẹreokie eva akpọ na; keme eware enana e rẹ were omẹ.” (Jeri. 9:24) Orọnikọ izi nọ ahwo-akpọ a fihọ o re rri rọ riẹ oware nọ o gba hayo nọ u kiete he. Ọye họ Ọnọ o fi utee uvi-oziẹ họ, yọ onana o rri ro fi izi họ kẹ ahwo-akpọ. Ebaibol na ọ ta nọ: “Ẹrẹreokie gbe oziẹ-uzẹme obro erọ otọhotọ uvie ra,” fikiere o rẹ sai mu omai ẹro nọ izi riẹ kpobi i kiẹrẹe. (Ol. 89:14; 119:128) Wo ohẹriẹ, ghelọ ẹme nọ Setan ọ ta rọ raha esuo Jihova, Setan ọ re sai ru ahwo-akpọ wo uvi-oziẹ nẹnẹ hẹ.

 6. Oware jọ vẹ o soriẹ nọ Jihova o ro wo udu nọ o re ro su ehrugbakpọ na?

⁶ Ofariẹ, Jihova u fo nọ o re su keme o wo eriariẹ gbe areghẹ nọ ọ sae rọ rẹrote ehrugbakpọ na. Wọhọ oriruo, kareghẹhọ nọ Ọghẹnẹ ọ kẹ Jesu ogaga nọ o ro siwi eyao nọ edọkita sa-sa e sai siwi hi. (Mat. 4:23, 24; Mak 5:25-29) Rọkẹ Jihova, onana o jọ oware igbunu hu. Ọ riẹ epanọ oma mai o rrọ totọ, yọ o wo ogaga nọ ọ sae rọ ruẹrẹ oware kpobi nọ o jariẹ thọ họ. Epọvo na ọ rẹ sai ru kpahe ahwo nọ a whu no gbe okpẹtu nọ ohwo ọ robọ so ho.

 7. Ẹvẹ eriariẹ Jihova i ro kpehru vi erọ akpọ nọ ọ rrọ otọ isuẹsu Setan?

⁷ Akpọ nọ ọ rrọ otọ esuo Setan ọ gbẹ be gwọlọ edhere nọ ọ sai ro ku ebẹbẹ erẹwho sa-sa họ. Ababọ avro, Jihova ọvo họ Ọnọ o wo areghẹ nọ ọ sae rọ wha udhedhẹ akpọ soso ze. (Aiz. 2:​3, 4; 54:13) Nọ ma bi wuhrẹ kpahe eriariẹ gbe areghẹ Jihova na, o rrọ omai oma wọhọ Pọl ukọ na, ọnọ ọ rọ ẹgba ẹzi Ọghẹnẹ kere nọ: “Efe Ọghẹnẹ o bu kẹhẹ, yọ areghẹ gbe eriariẹ riẹ i kodo kẹhẹ! A rẹ sae kiẹ otọ oziẹobro riẹ via ha, yọ a rẹ sae gwọlọ idhere riẹ via ha.”​—Rom 11:33.

 8. Eme o duobọte owhẹ evaọ oghẹrẹ nọ Jihova o re ro su?

⁸ Orọnikọ Ebaibol na o dhesẹ nọ Jihova o wo udu nọ o re ro su ọvo ho. U dhesẹ oware nọ o soriẹ nọ esuo riẹ o ro woma vi efa kpobi kpekufiẹ. Ojọ họ, Jihova o re su avọ uyoyou. U re duobọte omai udu nọ ma te roro kpahe oghẹrẹ nọ ọ salọ nọ o re ro su omai. Jihova ọ vọ avọ “ohrọ gbe aruoriwo, ọ rẹ kaki muofu hu, o wo uyoyou nọ o rẹ rẹriẹ hẹ gbe ọtẹruo.” (Ọny. 34:6) Jihova o re bru ọghọ họ idibo riẹ oma je yerikugbe ae avọ adhẹẹ. Ọ rẹ rẹrote omai vi epanọ ma rẹ sae rẹrote omamai. Wo ohẹriẹ no ẹme nọ Setan ọ ta, Jihova o re si oware uwoma ọvo no idibo riẹ hẹ. O tube siobọno Ọmọvo riẹ kẹ omai re ma sai wo ẹruore uzuazọ ebẹdẹ bẹdẹ.​—Se Olezi 84:11; Ahwo Rom 8:32.

 9. Ẹvẹ ma rọ riẹ nọ Jihova o wo ọdawẹ kẹ idibo riẹ omomọvo re?

⁹ Orọnikọ ukoko idibo riẹ ọvo Jihova o wo ọdawẹ kẹ hẹ. O wo ọdawẹ kẹ ae omomọvo ziezi re. Wọhọ oriruo, roro kpahe etoke ikpe egba esa nọ Jihova ọ jẹ rọ rehọ ibruoziẹ mu re a su je siwi orẹwho Izrẹl no obọ ewegrẹ rai. Evaọ etoke obẹbẹ yena, Jihova o muẹrohọ aye jọ nọ a re se Rut nọ ọ jọ ohwo Izrẹl he. O siobọno eware buobu je zihe ruọ odibo riẹ. Jihova ọ rọ ọzae gbe ọmọ ghale Rut. Yọ orọnọ ere ọvo ho, okenọ a tẹ kpare Rut no uwhu ze no, ọ te riẹ nọ uyẹ ọmọ riẹ na Mesaya na o no ze. Dai roro epanọ eva e te were iẹe te nọ ọ tẹ riẹ nọ a kere iku uzuazọ riẹ fihọ obe Ebaibol nọ a rọ odẹ riẹ se!​—Rut 4:13; Mat. 1:5, 16.

10. Ẹvẹ ma sae rọ ta nọ okienyẹ ọ rrọ esuo Ọghẹnẹ hẹ, gbe inọ ọ rẹ rọ obọ ogaga su hu?

¹⁰ Jihova o re kienyẹ ahwo nọ a rrọ otọ esuo riẹ hẹ, yọ ọ rẹ rọ obọ ogaga su ai gbe he. Esuo riẹ ọ rẹ kẹ ufuoma je ru ahwo wo evawere. (2 Kọr. 3:17) Devidi ọso-ilezi na ọ ta nọ: “Adhẹẹ gbe oruaro kpobi e riẹ, ogaga avọ oghọghọ obọ riẹ e rọ.” (1 Irv. 16:​7, 27) Etan ọso-ilezi na o kere re nọ: “Oghale u te ahwo nọ a riẹ edo oghọghọ, enọ e be hẹ nya evaọ elo ovao ra, Eyo ỌNOWO, enọ e rẹ jọ evaọ odẹ ra ghọghọ okeukpo, ave jiri ẹrẹreokie ra.”​—Ol. 89:​15, 16.

11. Ẹvẹ ma sae rọ bọ imuẹro mai ga inọ esuo Jihova ọ ginẹ mai woma?

¹¹ Ma tẹ be hai roro kpahe idhere sa-sa nọ Jihova o bi ro ru ewoma kẹ omai ẹsikpobi, u ti ru imuẹro nọ ma wo ga inọ esuo riẹ ọ ginẹ mai woma. Kẹsena o vẹ te jọ omai oma wọhọ ọso-ilezi na, ọnọ ọ so nọ: “Ẹdẹ ọvo eva ọgua ra o woma vi eno ivẹ gbe abọ eva oria ofa.” (Ol. 84:10) Ere o ginẹ rrọ! Nọ orọnọ Jihova họ Ọnọ ọ ma omai na, ọ riẹ eware nọ i re ru omai wereva, yọ ọ rẹ kẹ omai eware yena ẹsikpobi. Oware kpobi nọ Jihova ọ vuẹ omai nọ ma ru o rrọ rọkẹ ewoma gbe evawere mai. Ere o rrọ, o tẹ make rọnọ ma re siobọno eware jọ re ma sai ru oreva riẹ.​—Se Aizaya 48:17.

12. Fikieme ma rọ rrọ abọ esuo Jihova?

¹² Ebaibol na o dhesẹ nọ okenọ Esuo Odu-Ikpe Kristi na o te kuhọ no, ahwo jọ a te wọso esuo Jihova. (Evia. 20:7, 8) Eme o rẹ sae jọnọ o te wọ ae ru oware utioye? Ababọ avro, wọhọ epaọ uruemu riẹ, a te siobọno Setan no uwou-odi ze no evaọ oke yena, ọ te gwọlọ ru ahwo tẹrovi ẹgwọlọ obọrai. Ere Setan ọ rrọ. Ọ te gwọlọ viẹ ahwo họ nọ a rẹ sae rria bẹdẹ bẹdẹ nọ a gbẹ maki yoẹme kẹ Jihova ha. Ma riẹ nọ oyena yọ ọrue koi koi. Rekọ onọ na họ: Kọ ma te rọwo ọrue otiọye? Ma te gine you Jihova jẹ be gọe fikinọ ọ rrọ wowoma, gbe inọ ọye ọvo u fo nọ o re su ehrugbakpọ na, ma te tubẹ kezọ kẹ ẹme otiọye dede he. Ma te gwọlọ yeri uzuazọ evaọ otọ esuo ọfa ha, ajokpaọ otọ esuo okiẹrẹe Jihova.

13. Ma te bi ru eware lele edhere Jihova, ẹvẹ u re ro dhesẹ nọ ma rrọ abọ esuo riẹ?

¹³ Uzẹme na họ, esuo Jihova ọvo u fo nọ ma rẹ tha uke. Wọhọ epanọ ma ruẹ no na, ọyọvo o wo udu nọ o re ro su ehrugbakpọ na, yọ isuẹsu riẹ e mai woma. Ma rẹ sai dhesẹ nọ ma rrọ abọ esuo Jihova nọ ma te kru ẹrọwọ mai jẹ be rọ eva kpobi gọe. Edhere ọfa vẹ ma sai ro dhesẹ nọ ma be tha esuo na uke? Nọ ma te bi ru eware oghẹrẹ nọ Jihova ọ gwọlọ. Ma te ru lele edhere nọ Jihova o re ro ru eware, u re dhesẹ nọ ma you i rie gbe nọ oghẹrẹ nọ o bi ro su o were omai.​—Se Ahwo Ẹfisọs 5:​1, 2. 

14. Ẹvẹ ekpako ukoko gbe ahwo nọ a wuzou iviuwou a sae rọ rehọ aro kele Jihova nẹnẹ?

¹⁴ Ma jọ Ebaibol na wuhrẹ nọ edhere oyoyou Jihova o re ro su. Epọvo na re, o gwọlọ nọ ahwo nọ a wuzou iviuwou gbe ekpako ukoko nọ i you esuo Jihova a re dhuaro kẹ ahwo nọ a rrọ otọ rai hi, wọhọ ẹsenọ ae omarai a rrọ isu jọ re. Ukpoye, a rẹ raro kele Jihova. Pọl ukọ na ọ raro kele Jihova gbe Jesu Kristi evaọ ẹme nana. (1 Kọr. 11:1) Pọl o kpomovuọ họ inievo ukoko na oma ha, hayo gba ae họ ru oware he. Ukpoye, ọ jẹ tẹzẹ ae. (Rom 12:1; Ẹf. 4:1; Filim. 8-10) Nwanọ ere Jihova o re ru. Fikiere, epọvo na u fo nọ ahwo kpobi nọ a rrọ abọ esuo Jihova jẹ be thae uke nẹnẹ a re ru re.

15. Ẹvẹ ekpako ukoko nọ ma re yoẹme kẹ u re ro dhesẹ nọ ma you oghẹrẹ nọ Jihova o re ro su?

¹⁵ Ẹvẹ ma be hai yerikugbe ahwo nọ Ọghẹnẹ ọ kẹ udu evaọ ukoko na hayo enọ i wuzou uviuwou? Ma tẹ be hae romakpotọ je yoẹme kẹ ae, u re dhesẹ nọ ma rrọ abọ esuo Jihova. Ma gbẹ maki wo otoriẹ iroro jọ nọ ekpako ukoko a jẹ hẹ hayo nọ e gbẹ make were omai hi, o gwọlọ nọ ma ru lele uthubro nọ a be kẹ omai ghele. Onana u wo ohẹriẹ gaga no uruemu nọ ahwo obọ akpọ a re dhesẹ, rekọ enẹ o gwọlọ nọ ahwo nọ a rrọ abọ esuo Jihova a re ru. (Ẹf. 5:22, 23; 6:1-3; Hib. 13:17) Ere oruo o rẹ wha erere se omai, keme ewoma mai ọvo Jihova ọ gwọlọ.

16. Ma tẹ rrọ abọ esuo Jihova, ẹvẹ ma te hai jiroro omobọ mai?

¹⁶ Ma rẹ sai je dhesẹ nọ ma rrọ abọ esuo Jihova evaọ oghẹrẹ nọ ma rẹ jiroro omobọ mai. Orọnikọ uyero kpobi Jihova ọ rẹ jọ juzi kẹ omai nọ ma re lele he. Ukpoye, o re ru omai riẹ eriwo riẹ kpahe eware. Wọhọ oriruo, ọ rẹ vuẹ omai oghẹrẹ iwu sa-sa nọ Ileleikristi a rẹ wha dẹẹ hẹ. Ukpoye, o je omai riẹ nọ eva e rẹ were iẹe nọ ma tẹ salọ oghẹrẹ osẹ nọ o rrọ kpatiẹ, nọ u fo Ileleikristi. (1 Tim. 2:​9, 10) Yọ ọ gwọlọ nọ ma jiroro nọ i re ru amọfa zoruẹ hayo nọ o rẹ kẹ ae uye he. (1 Kọr. 10:31-33) Ma tẹ be hai jiroro nọ e rọwokugbe eriwo Jihova orọnikọ enọ e rẹ were omai ọvo ho, u re dhesẹ nọ oghẹrẹ nọ Jihova o bi ro su o were omai.

17, 18. Idhere jọ vẹ ezae-avọ-eyae a sai ro dhesẹ nọ abọ esuo Jihova a rrọ?

¹⁷ Roro kpahe edhere jọ nọ ezae-avọ-eyae Ileleikristi a sai ro dhesẹ nọ oghẹrẹ nọ Jihova o bi ro su o were rai gbe inọ a rrọ abọ riẹ. Eme a re ru otẹrọnọ ebẹbẹ nọ a rẹro rai hi e romavia evaọ orọo rai, tube te epanọ a be rọ vioja dede? U ti woma gaga re a roro didi kpahe oghẹrẹ nọ Jihova o ro yerikugbe ahwo Izrẹl. Jihova o se omariẹ ọzae rọkẹ orẹwho yena. (Aiz. 54:5; 62:4) Ababọ avro, usu Jihova kugbe orẹwho yena nọ o jọ wọhọ aye kẹe na o jọ bẹbẹ gaga. Ghele na, Jihova ọ nwane kpairoro vrẹ ae ẹsiẹsiẹe he. Ọ jẹ hae re ae ohrọ noke toke je koko ọvọ nọ ọ re kugbe ai. (Se Olezi 106:43-45.) Kọ uyoyou Jihova nọ o rẹ hiẹ hẹ na u gbe bi si owhẹ kẹle iẹe?

¹⁸ Epọvo na re, o gwọlọ nọ ezae-avọ-eyae nọ i you oghẹrẹ nọ Jihova o re ro ru eware a rọ aro kele iei. A rẹ rọ edhere nọ ọ rọwokugbe Ikereakere na ha fa orọo rai hi nọ ebẹbẹ e tẹ romavia. A rẹ kareghẹhọ nọ Jihova o ku rai gbe yọ ọ gwọlọ nọ a rẹ “talamu” ohwohwo. Ẹnwae-obro ọvo Ebaibol na ọ ta nọ o rẹ sae lẹliẹ orọo imava fa nọ ọjọ ọ sae rọ wariẹ rọo omọfa. (Mat. 19:5, 6, 9) Nọ a tẹ be daoma riẹ yerikugbe ghelọ ebẹbẹ rai, jẹ tubẹ gwọlọ epanọ a re ro ku ai họ, u re dhesẹ nọ oghẹrẹ nọ Jihova o re ro su o were rai.

19. Nọ oware jọ o tẹ thọ omai obọ, eme u fo nọ ma re ru?

¹⁹ Fikinọ ma gba ha, u re wo ẹsejọ nọ ma re ru oware nọ o rẹ dha Jihova eva. Jihova ọ riẹ onana, fikiere o te ru ọruẹrẹfihotọ nọ o ro siobọno Ọmọvo riẹ ze re o whu kẹ omai. Fikiere nọ oware o tẹ thọ omai obọ, u fo nọ ma rẹ yare Jihova kẹ erọvrẹ. (1 Jọn 2:1, 2) Ukpenọ ma rẹ vioja noke toke fiki oware jọ nọ ma ruthọ, u fo nọ ma re wuhrẹ no ethobọ mai na ze. Ma te si kẹle Jihova, ọ te rọvrẹ omai je fiobọhọ kẹ omai wariẹ wo evawere, ma vẹ te jẹ riẹ oware no u fo nọ ma re ru nọ ma tẹ rẹriẹ ovao dhe oghẹrẹ ẹbẹbẹ otiọye evaọ obaro.​—Ol. 103:3.

20. Fikieme o rọ gwọlọ nọ ma tha esuo Jihova uke enẹna?

²⁰ Evaọ akpọ ọkpokpọ na, ahwo kpobi nọ a rrọ otọ esuo Jihova a ti wuhrẹ idhere ikiẹrẹe riẹ. (Aiz. 11:9) Dede na, ma bi wuhrẹ eware itieye buobu enẹna. Yọ kẹlena, ẹme avro kpahe ọnọ u fo nọ o re su ehrugbakpọ na o ti kuhọ. Fikiere, ajọ ma kru ẹgbakiete mai enẹna, wobọ ziezi evaọ iruẹru ukoko na, jẹ rọ aro kele Jihova evaọ uzuazọ uyero mai. Enẹ ma ti ro dhesẹvia nọ abọ esuo Jihova ma rrọ.