UDHEDHẸ Ẹvẹ Whọ Sai ro Woi?

FIKINỌ ma be rria akpọ nọ ebẹbẹ hayo ozighi ọ da fia, o rẹ gwọlọ omodawọ gaga re ma sai wo udhedhẹ. Nọ ma tẹ maki wo udhedhẹ jọ dede, o rẹ lọhọ tere he re udhedhẹ na o jariẹ ẹsikpobi. Eme Ebaibol na ọ ta nọ o rẹ sae fiobọhọ kẹ omai wo uvi udhedhẹ nọ o rẹ tọ? Kọ ẹvẹ ma sai ro fiobọhọ kẹ amọfa wo udhedhẹ utiona?

Re ma sai wo uvi udhedhẹ, o gwọlọ nọ oware ovo o rẹ jariẹ nọ o rẹ wha enwoma se omai hayo kpokpo iroro mai hi. O tẹ jẹ gwọlọ nọ ma re wo emamọ usu kugbe amọfa. Mai wuzou na, o gwọlọ nọ ma re wo usu ọkpekpe kugbe Ọghẹnẹ re ma sae reawere udhedhẹ nọ o rẹ tọ. Kọ ẹvẹ onana o sae rọ lọhọ?

Ma te bi koko izi Jihova, u re dhesẹ nọ ma fi eva họ iẹe gbe inọ ma gwọlọ wo emamọ usu kugbei. (Jeri. 17:​7, 8; Jem. 2:​22, 23) Onana ve ti ru nọ Jihova ti ro si kẹle omai je ru omai wo uvi udhedhẹ. Obe Aizaya 32:17 o ta nọ: “Ẹrẹrẹokie ọ [rẹ] rehọ udhedhẹ ze, erere ẹrẹrẹokie kọ omofọwẹ, gbe eva i fihọ bẹdẹ bẹdẹ.” Ma rẹ sai wo uvi udhedhẹ nọ ma te bi yoẹme kẹ Jihova no udu ze.​—Aiz. 48:​18, 19.

Obọdẹ okẹ ẹzi ọfuafo nọ Ọsẹ obọ odhiwu mai ọ kẹ omai yọ oware ofa jọ nọ u re fiobọhọ kẹ omai wo udhedhẹ nọ o rẹ tọ.​—Iruẹru 9:31.

Nọ Pọl o je kele eware nọ i ru “ubi ẹzi na” via, udhedhẹ họ orọ avesa nọ ọ fodẹ. (Gal. 5:​22, 23) Nọ o rọnọ ẹzi Ọghẹnẹ o re ru ohwo wo uvi udhedhẹ na, o gwọlọ nọ ma rẹ kẹ ẹzi ọfuafo na uvẹ re u ru omai wo udhedhẹ nana. Joma ta kpahe idhere ivẹ nọ ẹzi Ọghẹnẹ o sai ro fiobọhọ kẹ omai wo udhedhẹ.

Orọ ọsosuọ, nọ ma tẹ be hae se Ebaibol nọ a rọ ẹzi Ọghẹnẹ kere na ẹsikpobi u re fiobọhọ kẹ omai wo udhedhẹ. (Ol. 1:​2, 3) Ma tẹ be hai roro didi kpahe oware nọ ma jọ Ebaibol na se, ẹzi Ọghẹnẹ o re fiobọhọ kẹ omai riẹ iroro Jihova evaọ eware buobu. Wọhọ oriruo, ma rẹ riẹ epanọ Jihova o ro wo udhedhẹ ẹsikpobi, gbe oware nọ udhedhẹ u ro wuzou kẹe. Ma tẹ be hai fi eware itieye nọ ma jọ Ebaibol na se hiruo, ma re wo udhedhẹ evaọ uzuazọ.​—Itẹ 3:​1, 2.

Orọ avivẹ, ma rẹ lẹ nọ jọ Ọghẹnẹ ọ kẹ omai ẹzi ọfuafo riẹ. (Luk 11:13) Jihova ọ ya eyaa kẹ omai nọ ma tẹ yare iẹe kẹ obufihọ, “udhedhẹ Ọghẹnẹ nọ u vi otoriẹ kpobi o vẹ te kpọ udu [mai] gbe ẹgba iroro [mai] ẹkwoma Kristi Jesu.” (Fil. 4:​6, 7) Ma tẹ be hae lẹ se Jihova kẹ ẹzi riẹ ẹsikpobi, o ti ru omai wo uvi udhedhẹ nọ ahwo nọ a wo emamọ usu kugbei ọvo a rẹ sai wo.​—Rom 15:13.

Ẹvẹ ahwo jọ a ro fi ohrẹ Ebaibol nana hiruo jẹ daoma ru inwene nọ u fiobọhọ kẹ ai wo uvi udhedhẹ kugbe Jihova, erivẹ rai gbe omarai no?

Ma jọ ukoko Ileleikristi na wo ahwo nọ ‘ofu ọ jẹ hai kri emu hu,’ rekọ enẹna a wo odiri, rrọ wowou, jẹ be rria dhedhẹ kugbe amọfa.a (Itẹ 29:22) Joma ta kpahe iwhowho-uvie ivẹ jọ nọ e jẹ hai muofu gaga vẹre rekinọ a bi yerikugbe amọfa dhedhẹ enẹna.

David o wo ekpehre uruemu jọ, ọ riẹ epanọ a rẹ kpahe ẹme kẹ ohwo ho. Taure ọ tẹ te họ-ame, ọ jẹ hae rọ unu raha amọfa gaga jẹ kpahe eme egaga evaọ uviuwou riẹ. U kri hi, David ọ tẹ ruẹ nọ u fo nọ o re nwene je yerikugbe amọfa dhedhẹ. Ẹvẹ ọ sae rọ riẹ epanọ o re ro yerikugbe amọfa dhedhẹ? Ọ ta nọ, “Me je fi ehrẹ Ebaibol hiruo evaọ uzuazọ mẹ, onana u ru nọ mẹ avọ ahwo uviuwou mẹ ma jẹ rọ kẹ ohwohwo adhẹe vi epaọ anwẹdẹ.”

Rachel ọ jọ ohwo nọ ofu ọ jẹ hai mu gaga fiki oghẹrẹ uzuazọ nọ o yeri notọ ze. Ọ ta nọ, “Makọ enẹna, ofu o re gbe mu omẹ ẹsejọ keme ahwo uviuwou nọ me noze a jẹ hai muofu gaga.” Kọ eme o ru nọ ọ be sai ro yerikugbe amọfa dhedhẹ enẹna? Rachel ọ ta nọ, “Jihova nọ mẹ rẹ lẹ se ẹsikpobi.”

Oware nọ o via kẹ David avọ Rachel na yọ oriruo ivẹ jọ ọrọ epanọ ma sai ro wo udhedhẹ nọ ma te fi ehrẹ Ebaibol na hiruo jẹ lẹ se Ọghẹnẹ re ọ rọ ẹzi riẹ fiobọhọ kẹ omai. O rrọ vevẹ, dede nọ ma be rria akpọ nọ eva i bi jo mu ahwo dha, ma rẹ sai wo udhedhẹ nọ u re fiobọhọ kẹ omai wo emamọ usu kugbe ahwo uviuwou gbe ibe Ileleikristi mai. Jihova ọ tẹ jẹ tuduhọ omai awọ nọ ma “lele ahwo kpobi rria dhedhẹ.” (Rom 12:18) Kọ ma sai gine lele ahwo kpobi rria dhedhẹ? Irere vẹ ma re wo nọ ma tẹ be daoma ru onana?

Ma be rọ usiuwoma nọ ma be hae ta kpahe Uvie Ọghẹnẹ na whowho ovuẹ nọ u re fiobọhọ kẹ ahwo wo udhedhẹ. (Aiz. 9:​6, 7; Mat. 24:14) Yọ u woma gaga nọ ahwo buobu a be gaviezọ. Onana u ru nọ ọkora hayo ofu ọ gbẹ be kẹ ai uye tere he nọ a tẹ be make ruẹ ikpehre eware nọ e be via nẹnẹ. Ukpoye, a wo ẹruore inọ Uvie Ọghẹnẹ u ti ru eware woma, u te je ru nọ a be rọ “gwọlọ udhedhẹ, [jẹ] dhẹ lele iei.”​—Ol. 34:14.

Dede na, orọnikọ ahwo kpobi a rẹ jẹ ovuẹ mai rehọ họ maero kọ evaọ oke ọsosuọ. (Jọn 3:19) O make rrọ ere na, ẹzi Ọghẹnẹ o bi fiobọhọ kẹ omai rọ udhedhẹ gbe omaurokpotọ ta usiuwoma na kẹ ai ghele. Enẹ ma bi ro ru lele uthubro nọ Jesu ọ kẹ omai kpahe usiuwoma ota na, onọ o rrọ Matiu 10:​11-13 inọ: “Nọ wha tẹ ruọ uwou, wha yere enọ e rrọ uwou na. A te dede owhai rehọ, jọ udhedhẹ rai u te uwou na; rekọ a gbe dede owhai rehọ họ, jọ udhedhẹ rai u lele owhai zihe.” Ma te lele ohrẹ nana ziezi, u re fiobọhọ kẹ omai nyasiọ ohwo ba dhedhẹ nọ ọ gbẹ make gaviezọ kẹ omai hi, je ru uvẹ fihọ nọ ma sai ro lele iei ta ẹme ẹdẹfa nọ ma te zihe.

O rẹ jẹ wha udhedhẹ ze nọ ma tẹ be hae rọ adhẹẹ lele ahwo egọmeti ta ẹme, makọ enọ e be wọso iruo usiuwoma ota mai dede. Wọhọ oriruo, osu orẹwho Africa mai na jọ ọ kuvẹ hẹ re inievo na a jọ ẹkwotọ rai bọ Egwa Uvie fiki omagbẹre nọ a wo kẹ Isẹri Jihova. Re a sai ku ẹme na họ dhedhẹ, ukoko Isẹri Jihova u te vi oniọvo-ọmọzae nọ ọ jọ ẹkwotọ yena ru iruo imisiọnare no inọ ọ nyabru ohwo ologbo nọ o dikihẹ kẹ orẹwho Africa yena evaọ London, obọ England. Ọ te nyae vuẹ ohwo egọmeti nana kpahe iruo usiuwoma ota nọ e rẹ wha udhedhẹ ze nọ Isẹri Jihova a rrọ orẹwho riẹ ru na . Iyẹrẹ vẹ i no onya nana ze?

Oniọvo na ọ ta nọ, “Okenọ me te obei, osẹ ọmọtẹ nọ o re dede ahwo rehọ ziọ ọfisi ohwo ologbo egọmeti na o jọ orọ ahwo ẹvẹrẹ nọ mẹ riẹ ziezi, mẹ tẹ jọ eva mẹ ta nọ ọ be te jọ ohwo ẹvẹrẹ yena. Fikiere, mẹ tẹ rọ ẹvẹrẹ na yere iei. Onana u gbe ọmọtẹ na unu gaga, ọ tẹ nọ omẹ nọ, ‘fikieme whọ rọ nyaze?’ Mẹ tẹ rọ unu uwowolẹ ta kẹe nọ, mẹ gwọlọ ruẹ ohwo ologbo egọmeti na. Ọ tẹ nwani rrọ ifonu se ọga na, ọ tẹ nyaze jẹ rọ ẹvẹrẹ na yere omẹ. Kẹsena ọ tẹ jẹ romatotọ gaviezọ kẹ omẹ nọ mẹ be ta kẹe kpahe iruo usiuwoma ota Isẹri Jihova, gbe epanọ iruo nana e rẹ rọ wha udhedhẹ ze.”

Adhẹẹ nọ oniọvo na o ro lele ohwo ologbo egọmeti na ta ẹme u ru nọ omagbẹre gbe eriwo ọthọthọ nọ o wo kpahe iruẹru Isẹri Jihova vẹre u ro kpotọ. Nọ omoke jọ o vrẹ no, egọmeti orẹwho Africa yena u te si awhaha nọ a fihọ ebabọ Egwa Uvie na no. Onana o were inievo na gaga! Avro ọ riẹ hẹ, ma tẹ be rọ adhẹe lele amọfa yeri, o rẹ wha udhedhẹ gbe emamọ iyẹrẹ efa ze.

Uvi udhedhẹ o rrọ udevie Ileleikristi uzẹme nẹnẹ wọhọ ẹsenọ ma rrọ aparadase nọ Ọghẹnẹ ọ ya eyaa riẹ na no. Whọ te zọhọ fihọ udhedhẹ nana nọ whọ tẹ be daoma wo abọ nana ubi ẹzi na evaọ uzuazọ ra. Maero na, who ti wo ọjẹrehọ Jihova je wo udhedhẹ bẹdẹ bẹdẹ evaọ akpọ ọkpokpọ nọ Ọghẹnẹ ọ ya eyaa riẹ na.​—2 Pita 3:​13, 14.