Jọ Akpọ Ọ Bẹ Owhẹ No Ho

Nọ aye ọzae jọ nọ a re se Faizal o whu vrẹ ukpe ọvo no, o tẹ gwọlọ nọ a re ru obẹrọ udu kẹ Faizal. Ọ ta nọ: “Nọ me se obe Job, mẹ tẹ riẹ nọ u wo ẹjiroro nọ Jihova o ro ru re a kere obe na. Ma tẹ jọ Ebaibol na se kpahe ohwo jọ nọ ọ rẹriẹ ovao dhe ọkpọ uyero mai, o rẹ kẹ omosasọ wo umuo ho.” Faizal ọ tẹ jẹ ta nọ: “Akpọ ọ re bẹ omẹ no ho.”

Tarsha ọ gbẹ maha evaọ okenọ oni riẹ o ro whu. Ọ ta nọ: “Ma re yeri emamọ uzuazọ nọ ma tẹ riẹ Ọnọma na. Onana o rẹ kẹ omai ẹruore gbe evawere ghelọ ebẹbẹ nọ ma be rẹriẹ ovao dhe. Jihova ọ rẹ sae bọ omai ga je fiobọhọ kẹ omai thihakọ kẹdẹ kẹdẹ.”

IZOẸME nọ e vrẹ na i dhesẹ epanọ oghẹrẹ ebẹbẹ sa-sa e sai ro ru akpọ bẹ omai. Nọ who bi thihakọ ẹbẹbẹ ra na, whọ sai roro nọ ohwo ọvo ọ be daezọ ra ha, hayo inọ o mai woma re who whu. Jọ u mu owhẹ ẹro nọ Ọghẹnẹ ọ be daezọ ra. Whọ rrọ ghaghae kẹe.

Ohwo nọ o kere Olezi 86 na o dhesẹ nọ o fievahọ Ọghẹnẹ nọ ọ ta nọ: “Me re bo se owhẹ evaọ oke idhọvẹ mẹ, keme who ti yo kẹ omẹ.” (Olezi 86:7) Rekọ whọ sai roro nọ, ‘Ẹvẹ Ọghẹnẹ o ti ro yo kẹ omẹ “evaọ oke idhọvẹ mẹ”?’

Dede nọ Ọghẹnẹ ọ te nwani ku ebẹbẹ mai họ idudhe he, Ebaibol na ọ kẹ omai imuẹro nọ Ọghẹnẹ ọ rẹ sai ru udu kie omai vi re ma sai thihakọ ẹbẹbẹ na. Ebaibol na ọ ta nọ: “Wha ruawa kpahe oware ovo ho, rekọ evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu rai gbe eware nọ wha bi roro.” (Ahwo Filipai 4:6, 7, ẹme-oruvẹ) Joma ta kpahe epanọ eria ikere nọ e rrọ obotọ na e rọ kẹ omai imuẹro inọ Ọghẹnẹ ọ be ginẹ daezọ mai.

Ọghẹnẹ Ọ be Ginẹ Daezọ Ra

“Ọghẹnẹ o re gbolaro kẹ [omuedi] ọvuọvo [ho]. . . Wha ghare vi imuedi buobu.”—Luk 12:6, 7, ẹme-oruvẹ.

RORO KPAHE ONANA: Ọghẹnẹ ọ be daezọ evra esese gheghe nọ ahwo a re rri vo. Ọghẹnẹ o bi muẹrohọ omuedi ọsese kpobi; omuedi kpobi yọ omama nọ o rrọ ghaghae kẹe. Ahwo-akpọ a rrọ ghaghae kẹ Ọghẹnẹ vi imuedi kpekufiẹ. Ahwo-akpọ a mai wuzou evaọ emama Ọghẹnẹ nọ e rrọ otọakpọ. Ọghẹnẹ ọ ma ahwo-akpọ evaọ “uwoho” riẹ, yọ a rẹ sai wo je dhesẹ ọkpọ obọdẹ iruemu nọ ọyomariẹ o wo.—Emuhọ 1:26, 27.

“O Jihova, whọ kiẹ omẹ riwi ziezi no, yọ whọ riẹ omẹ. . . . [Who] vuhu iroro mẹ mu . . . Kiẹ omẹ riwi ziezi re whọ riẹ iroro nọ e be kẹ omẹ uye.”—Olezi 139:1, 2, 23.

RORO KPAHE ONANA: Ọghẹnẹ ọ riẹ owhẹ ziezi. Ọ riẹ iroro nọ e rrọ owhẹ eva gbe eware nọ e be kẹ owhẹ uye. Dede nọ amọfa a sai wo otoriẹ idhọvẹ gbe awaọruọ ra ha, Ọghẹnẹ ọ be daezọ ra yọ ọ gwọlọ fiobọhọ kẹ owhẹ. Fikiere, jọ akpọ ọ bẹ owhẹ no ho.

Uzuazọ Ra Ọ Rrọ Ghaghae

“O Jihova, yo olẹ mẹ; jọ ubo mẹ kẹ obufihọ u te owhẹ oma. . . . Fi ezọ ra hotọ kẹ omẹ; yo kẹ omẹ ovẹrẹ nọ me te bo se owhẹ. . . . Ọ te kezọ kẹ olẹ enọ ọbẹwẹ ọ rrọ oma.”—Olezi 102:1, 2, 17.

RORO KPAHE ONANA: O wọhọ nọ anwẹnọ ahwo-akpọ a be rọ ruẹ uye no emuhọ ze, Jihova o bi muẹrohọ je kere irui-oviẹ kpobi nọ ahwo-akpọ a viẹ no fiki uye-oruẹ fihotọ. (Olezi 56:8) Onana u kugbe irui-oviẹ ra re. Jihova ọ kareghẹhọ ebẹbẹ gbe irui-oviẹ ra kpobi keme whọ rrọ ghaghae kẹe.

“Whọ ruawa ha, keme mẹ họ Ọghẹnẹ ra. Me ti ru owhẹ ga, ẹhẹ, me ti fiobọhọ kẹ owhẹ . . . Mẹ Jihova Ọghẹnẹ ra, [mẹ] be ta kẹ owhẹ nọ, ‘Jọ ozọ u mu owhẹ hẹ. Me ti fiobọhọ kẹ owhẹ.’”—Aizaya 41:10, 13.

RORO KPAHE ONANA: Ọghẹnẹ ọ gwọlọ fiobọhọ kẹ owhẹ. Who te kie, ọ te kpare owhẹ kpama.

Eware I Ti Woma Evaọ Obaro

“Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”—Jọn 3:16.

RORO KPAHE ONANA: Whọ rrọ ghaghae kẹ Ọghẹnẹ gaga, te epanọ o ro siobọno Ọmọ riẹ re o whu fiki ra. Uwhu Ọmọ riẹ na u rovie uvẹ fihọ kẹ owhẹ nọ whọ sae rọ rria otọakpọ na bẹdẹ bẹdẹ avọ evawere.a

O tẹ make rọnọ whọ be ruawa gaga obọnana yọ who bi roro nọ whọ sai gbe thihakọ ebẹbẹ ra ha, romatotọ wuhrẹ Ebaibol na je fi ẹrọwọ ọgaga họ eyaa nọ Ọghẹnẹ ọ ya kpahe obaro. Who te ru ere, who ti wo evawere yọ akpọ ọ gbẹ te bẹ owhẹ no ho.

a Whọ tẹ gwọlọ wuhrẹ kpahe epanọ whọ sai ro wo erere no uwhu Jesu ze, rri ividio na, Ru Ekareghẹhọ Uwhu Jesu evaọ www.jw.org/iso. Rri oria EBE GBE EWARE EFA> IVIDIO> IWUHRẸ GBE USIUWOMA OTA MAI.