Riẹ Odibọgba Ra ru Ziezi

¹ Ehru o bi bi, yọ edo ozọ jọ o bi vihọ te ezọ-idio. Ẹgho nọ ọ wọhọ iwiri ọ be ziotọ. Kọ oyena yọ eme? Ogbaẹmo orọ ima ọ ebaka nọ o be tha te raha ẹkwotọ na muotọ! Ughe onana nọ Joẹl ọruẹaro na o dhesẹ na u wo orugba nẹnẹ evaọ iruo usiuwoma ota ọ idibo Ọghẹnẹ nọ a ro mu na avọ egbẹnyusu rai, otu obuobu na.

² Uwou-Eroro Na ọrọ May 1, 1998, ẹwẹ-obe avọ 17, edhe-ẹme avọ 19, u muẹro họ nọ: “Ogbaẹmo ebaka Ọghẹnẹ oke onana a se isẹri ziezi no evaọ ‘ikpẹwho’ Kristẹndọm na. (Joẹl 2:9) . . . A gbẹ be gadiẹ ezadhe kpobi vrẹ, a be ruọ ima iwou buobu, a be nyabru ahwo evaọ iyẹrẹ, a be rehọ ifonu t’ẹme kẹ ahwo, be jẹ nyabru ahwo evaọ edhere nọ ọ lọhọ kpobi nọ a bi whowho ovuẹ Jihova na.” Kọ o gbẹ rrọ uvẹ-ọghọ ulogbo re a w’obọ evaọ iruo nana nọ Ọghẹnẹ o romu na?

³ Wo ohẹriẹ no ebaka gheghe, enọ ẹjiroro rai kpobi ọ rrọ ẹkuọ omobọ rai, mai wọhọ idibo Jihova ma wo ọdawẹ ologbo kẹ izuazọ ahwo nọ ma be ta usiuwoma kẹ. Ma gwọlọ fiobọhọ kẹ amọfa re a wuhrẹ uzẹme oruaro nọ o rrọ evaọ Ẹme Ọghẹnẹ re o jẹ wọ ae j’owọ nọ u re su kpohọ esiwo ebẹdẹ bẹdẹ. (Jọn 17:3; 1 Tim. 4:16) Fikiere, ma gwọlọ ru odibọgba mai ziezi. Edhere kpobi nọ ma ro ru ei, u fo re ma roro sọ ma bi ru ei evaọ oghẹrẹ gbe oke nọ o rẹ mae wha ewoma ze. Nọ ‘akpọ na o bi nwene’ na, ma rẹ kiẹ edhere nọ ma bi ro ru ei re ma ruẹ nọ ma be nya te use-abọ ẹvi nọ ọ mae rro.—1 Kọr. 7:31.

⁴ Nọ ma be daoma re ma nyate ahwo oma evaọ idhere buobu na, iruo n’uwou ruọ uwou na o gbẹ rọ oviede odibọgba mai. Kọ whọ ruẹ nọ ẹsibuobu nọ whọ tẹ nya ahwo a rẹ jọ uwou hu? Ẹvẹ o rẹ kẹ idhọvẹ te, nọ whọ be sae ghale ovuẹ emamọ usi kugbe ai hi na! Kọ ẹvẹ whọ sae rọ nyate use-abọ onana?

⁵ Hai Nwene je Dhesẹ Uvi Iroro: Evaọ Izrẹl ọrọ ikpe-udhusoi ọsosuọ, evaọ aso ikuori i re kpohọ iruo rai. Fikieme a jẹ nya evaọ aso? Dede nọ oke onana o mai kiehọ ae oma ha, oyehọ oke nọ o mai woma nọ a je kpe iyei buobu. Oye họ etoke nọ o rẹ mae k’ẹvi. Nọ o jẹ kpahe fihọ uruemu onana, Uwou-Eroro Na ọrọ June 15, 1992 (ọrọ Oyibo), o ta nọ: “Ma re je fiẹrohọ ẹkwotọ mai re ma nyai kpe iyei, wọhọ odẹme, evaọ okenọ ahwo buobu a rẹ jọ uwou je dede omai rehọ.” Ẹromuhotọ kẹ eyero ahwo u dhesẹ nnọ evaọ ewho nọ e dina rrọ ruaro gbe eria nọ ahwo a be rria buobu, ahwo a rẹ jọ uwou evaọ eria jọ họ nọ ma te weze nya evaọ oghẹrẹ oke jọ. Ẹsejọhọ aikpobi a kpohọ obọ eki no, obọ idhu rai, hayo eria efa jọ. Otẹrọnọ ere o rrọ evaọ oria ra, kọ whọ sai go oke usiuwoma ra haro kpohọ okiofa hayo obọ owọwọ? Onana yọ obọdẹ edhere nọ ma re ro ru ẹvi fihọ ọriẹruo odibọgba mai je dhesẹ ororokẹ rọkẹ erivẹ mai, nọ o rrọ imuẹro ọ uyoyou Oleleikristi.—Mat. 7:12.

⁶ Eva Ahwo Filipai 4:5, Pọl ukọ na ọ kareghẹhọ omai nnọ ‘ma ru re ahwo kpobi a ruẹ uvi-iroro mai.’ Rọwokugbe ọkpọvio ọnana nọ a kẹ ẹgba na, ma rẹ kpomamu je dhesẹ uvi iroro evaọ ona mai nọ ma be ta usiuwoma mai avọ ọwhọ na. Ma re ‘sioma kpemu no ahwo nọ ma re wuhrẹ evaọ ẹgbede gbe n’uwou ruọ uwou’ hu, rekọ ma gwọlọ ruẹ nọ ma wha odibọgba n’uwou ruọ uwou mai na haro evaọ okenọ u fo jẹ ruẹ ẹvi. (Iruẹru 20:20) Wọhọ ikuori ọ ikpe-udhusoi ọsosuọ Izrẹl eyena, o r’omai oja re ma kpohọ ‘iyei-ikpe’ evaọ okenọ ma jẹ mae ruẹ ẹvi, orọnikọ okenọ o rẹ mai kiehọ omai oma ha.

⁷ Didi inwene a rẹ sai ru? Ẹsibuobu, a re ru iwuhrẹ ọ usiuwoma ota evaọ 8:30 a.m. hayo 9:00 a.m. evaọ Ẹdẹ-Ọmaha gbe Ẹdoka, kẹsena utu na o vẹ nwani muọ iruo ọ n’ẹthẹ t’ẹthẹ na họ evaọ ẹkwotọ na. Dede na, igboma ekpako jọ a ru ọruẹrẹfihọ no re utu na u w’obọ evaọ okiofa evaọ ohiọhiẹ hayo uvo otẹrọnọ ma ruẹ nọ ahwo buobu a rẹ jọ uwou rri bọo oke uvo hayo owọwọ họ. Ikoko efa i fi oke iwuhrẹ ọ usiuwoma ota rai họ ubrobọ uvo—eva ighọjọ 10:00 a.m., 11:00 a.m, hayo 12:00. Kẹsena, utu na o vẹ nya ovavo kpohọ iruo n’ẹthẹ t’ẹthẹ na jẹ rria te udevie uvo. Evaọ ekwotọ jọ, oke uvo hayo owọwọ oware wọhọ 4:00 p.m., viukpọ ohiohiẹ, o sae jọ oke nọ o mai woma nọ a re ro ru ewuhrẹ ọ usiuwoma ota na. Inwene itieye jọ e rẹ sae wha ẹvi fihọ iruo n’ẹthẹ t’ẹthẹ na.

⁸ Dhesẹ Orimuo gbe Areghẹ: Nọ ma be nya bru ahwo n’ẹthẹ t’ẹthẹ na, ma rẹ nyaku iruemu sa-sa nọ a re dhesẹ kpahe ovuẹ mai. Ahwo jọ a re dede omai rehọ, efa i re dhesẹ ababọ-isiuru, ejọ e rẹ vro-avro hayo sikẹ. Avro ọ tẹ roma via, evaọ ẹwẹ-obe avọ 7 ọrọ Reasoning From the Scriptures na, a kareghẹhọ omai nọ orọnikọ ma be gwọlọ “ ‘riase avro’ kugbe ahwo ho enọ i bi dhesẹ adhẹẹ kẹ uzẹme na ha.” Otẹrọnọ ọnọ o wo uwou na o dede omai rehọ họ, o rẹ mai woma k’omai re ma nya vrẹ. Ma rẹ kpare ofu ahwo vievie he ẹkwoma ikẹ-isio inọ a lele omai t’ẹme hayo jẹ eriwo mai rehọ. Ma rẹ gba ovuẹ mai họ ahwo ho. Oyena u re dhesẹ uvi-iroro ho yọ o rẹ wha ebẹbẹ se Isẹri efa je ro se iruo na soso.

⁹ Taure ma te ti mu usiuwoma họ evaọ ẹkwotọ, o rọ oware areghẹ re a kiẹ ekade ẹkwotọ na riwi re ma riẹ eria iwou nọ ahwo rai a ta kẹ omai nọ ma nya ha. Otẹrọnọ eria itieye jọ e riẹ, a rẹ ta kẹ owhowho-uvie kpobi nọ o bi ru iyẹrẹ ọyena kpahe iwou nọ o re te he. Uvumọ ohwo ọ rẹ rehọ udu obọriẹ kpohọ iwou itieye na ababọ ọkpọvio ọsẹro iruo usiuwoma ota na ha.—Rri Odibọgba Uvie Mai ọrọ June 1994 (ọrọ Oyibo), Ẹkpẹti Onọ.

¹⁰ Ma rẹ sae nyaharo evaọ ọriẹruo mai ẹkwoma orimuo evaọ okenọ ma bi ruiruo n’uwou ruọ uwou na. Muẹrohotọ evaọ okenọ whọ be nya kẹle uwou na. Kọ a si ethẹ gbe inwido na kpobi họ? Kọ uvumọ edo iruo ọ riẹ? Onana o sai dhesẹ nọ oke iruo ohwo na u re nwene no uvo ruọ aso fikiere ọ be wezẹ. Ẹsejọhọ, ma rẹ sai wo emamọ ẹmeọta kugbe ọnọ o wo uwou na nọ ma te zihe evaọ okiofa. Ẹsejọhọ o rẹ mai woma re ma nya vrẹ uwou onana tao, ma ve kere inọmba uwou na. Whọ sae wariẹ nya te uwou na re who te ti no ẹkwotọ na hayo kere iei fih’otọ re whọ wariẹ zihe okiọfa.

¹¹ O rẹ sae jẹ via nọ ma rehọ ọthobọ rọwo ohwo jọ no owezẹ hayo kpokpo ei. O sae t’ubẹ jọ nọ eva e dha riẹ dede. Kọ ẹvẹ ma re ru? Itẹ 17:27 o k’ohrẹ nnọ: “Ohwo nọ o wo ẹzi udhedhẹ ọ rẹ riẹ otọ oware.” No ma re wounu fiki odibọgba mai hi na, ma rẹ sai ghine dhesẹ epanọ o k’omai uye te nọ ma ro weze ze evaọ okenọ u kiehọ iẹ oma ha. Ma sae rọ unu uwowolẹ nọe sọ okiofa jọ o te mai kiehọ iẹ oma ma vẹ ta kẹe nọ ma ti zihe ze. Ẹme ororokẹ nọ o n’evaze evaọ unu uwowolẹ u re hrẹ udu ohwo otiọye na kpotọ ẹsibuobu. (Itẹ 15:1) Otẹrọnọ ọnọ o wo uwou na ọ vuẹ omai nọ o re ruiruo aso, ma rẹ sai kere ei kugbe ekade ẹkwotọ na re a sai weze bru ei ẹruoke evaọ okiofa.

¹² Ovuhumuo o kiehọ re nọ ma be daoma re ma ru ẹkwotọ mai fuafo na. Nọ ahwo buobu a rẹ jọ uwou evaọ oke ọsosuọ nọ ma rọ nya ha na, ma re ru omodawọ ofa re ma ghale ovuẹ usiwo na kugbe ai. (Rom 10:13) Iyẹrẹ i dhesẹ nọ ẹsejọ iwhowho-uvie a re weze kpohọ uwou ovona ẹsibuobu evaọ okpẹdẹ be daoma re a di ahwo na họ uwou. Erivẹ na a re muẹrohọ onana. O rẹ wha ẹjiroro oyoma ze inọ Isẹri Jihova a rẹ nya ziọ iyẹrẹ rai ‘ẹsikpobi.’ Kọ ẹvẹ a sae rọ whaha onana?

¹³ Dhesẹ orimuo. Evaọ okenọ whọ tẹ be wariẹ zihe bru ohwo nọ ọ jọ uwou hu, kọ oware jọ o riẹ nọ u dhesẹ nọ ohwo jọ ọ rrọ uwou enẹna? Otẹrọnọ ileta e rọ unuẹthẹ riẹ, kiyọ ẹsejọhọ ohwo na ọ rrọ uwou ghele he yọ ẹnyate unuẹthẹ na o te wha erere ze evaọ oke onana ha. Otẹrọnọ a di ohwo na họ uwou hu yọ a daoma nya evaọ oghẹrẹ oke sa-sa evaọ okpẹdẹ na no, wọhọ epaọ owọwọ, a rẹ sae nyasiọ omobe-ovẹvẹ hayo obe-uzizie ba unuẹthẹ na avọ areghẹ, maero otẹrọnọ a be hai ru ẹkwotọ na re ziezi. A rẹ jẹ sae nya bru ohwo na evaọ okiofa nọ a te bi ru ẹkwotọ na.

¹⁴ Ma rẹ sae whaha eme ithethei eva unuẹthẹ evaọ okenọ ekpahe i te bi kpe ọnọ o wo uwou na. Nọ a te zizie omai ruọ uwou, ma rẹ yọrọ oma re ma siọ otọ uwou na ba egbeku. Nọ arakọ ọ tẹ be gbọ ku omai ma dhesẹ areghẹ. Nọ whọ tẹ be ta usiuwoma evaọ iwou ọ uhie-ibruwou, go uvo ra kpotọ re whọ whaha edo nọ ọ rẹ sae kẹ amọfa uye je dhesẹ nọ whọ rrọ etẹe.

¹⁵ Jọ Kpatiẹ avọ Adhẹẹ: Ẹkwoma ọ emamọ ọruẹrẹfihọ ma sae whaha ezurie ro ẹkwotọ na nọ ahwo a rẹ ruẹ. Ozọ u re mu ahwo jọ nọ utu iwhowho-uvie buobu e tẹ ziọ aro uwou rai. Ma gwọlọ re ahwo a roro nọ ma be “vẹ ruọ” eria nọ ahwo buobu a be rria ha. Eva obọ ewuhrẹ ọ usiuwoma ota na a jẹ mae riẹ ọruẹrẹfihotọ kpahe epanọ a re ro ru ẹkwotọ na ru ziezi. Itu esese erọ iwhowho-uvie, wọhọ uviuwou, a rẹ kaki fi ozọ họ enọ i wo iwou na oma ha yọ a rẹ ruoma gwọlọ enwene he evaọ okenọ a bi ru ẹkwotọ na.

¹⁶ Re a jọ kpatiẹ o gwọlọ nnọ eyewọ a rẹ roma totọ sẹro uruemu emọ rai evaọ okenọ a tẹ be ta usiuwoma evaọ ẹkwotọ na. U fo nọ emọ i dhesẹ emamọ uruemu nọ a te lele ọkpako kpohọ unuẹthẹ na. A rẹ kẹ emaha na uvẹ zaharo hayo dhẹ kpenẹ avọ enẹ hẹ, nọ ahwo nọ a rrọ iwou na hayo enọ e be nya edhere vrẹ a jẹ gale ovao rri rai.

¹⁷ O tẹ jẹ gwọlọ owowa evaọ ẹme ọ oke eriosehọ gbe emuọriọ. Dede nọ eriosehọ yọ ẹme omobọ ohwo, obe ọ Our Ministry, ẹwẹ-obe avọ 104, edhe-ẹme 1, o ta nọ: “Oke usiuwoma ota ra u re muhọ evaọ okenọ who te muọ iruo isẹri-ise ra họ no yọ u re kuhọ evaọ okenọ who kuọ iweze urere ra họ no evaọ etoke isẹri-ise kpobi. A re kele oke eriosehọ hayo emuọriọ evaọ etoke usiuwoma ota ha. Ekobaro ubroke, oke-kpobi gbe erọ obọdẹ, jegbe imishọnare, a wo ute euwa nọ a re le. A tudu họ iwhowho-uvie ukoko awọ epọvo na re a rehọ isiuru Uvie karo jẹ ya evaọ odibọgba na re a ru utho ẹgba rai kpobi evaọ usiuwoma ota wọhọ epanọ ẹgba omomọvo rai o te. Idibo omarọkẹ Jihova kpobi a rẹ daoma re a ru odibọgba rai no udu-kpobi ze. (Kọl. 3:23)”

¹⁸ Ibuobu e ruẹ obọdẹ iyẹrẹ no ẹkwoma ahwo nọ a rẹ nyabru evaọ oria kpobi nọ a jẹ sai duku ai—evaọ iyẹrẹ, evaọ egareji, gbe eria ẹgbede efa. Ma rẹ jẹ jọ etenẹ se emamọ isẹri, orọnikọ ẹkwoma ẹmeunu mai ọvo ho rekọ je kugbe uvi iroro nọ ma re dhesẹ. Iwhowho-uvie nọ e rọ ukoko kpobi a rẹ ruẹ nọ a rehọ adhẹẹ kẹ iwhru ẹkwotọ rai re a siọ ahwo nọ a be nya otọ ba ebrudhe evaọ eria ọ ekiọthuọ hayo iruiruo evaọ eria iruo, wọhọ oria nọ a jẹ zẹ epẹtro. Re ma ruẹ nọ ma bi ru odibọgba mai evaọ edhere ọkpakpatiẹ, evaọ edhere adhẹẹ, umuo ẹkwotọ mai ọvo ma rẹ jọ ta usiuwoma ajokpa nọ Ogbẹgwae Iruo Ukoko ofa u ru ugogo ọruẹrẹfihotọ jọ, re a kẹ ae uketha.—Wawo 2 Ahwo Kọrint 10:13-15.

¹⁹ Ikoko jọ nọ i wo eria buobu nọ isẹri-ise na o jọ lọhọ a ru eria enana fihọ ekwotọ usiuwoma ota no. A vẹ rehọ ekade ọ ẹkwotọ rọ kẹ owhowho-uvie ọvo hayo utu iwhowho-uvie. Onana u re fiobọhọ nọ a je ru ẹkwotọ na re vẹrẹ jẹ whaha iwhowhwo-uvie buobu nọ e rẹ jọ oria ovo ta usiuwoma evaọ okiovo na, rọ rọwokugbe ehri-uzi nọ o rrọ 1 Ahwo Kọrint 14:40, nọ o ta nọ: “U [fo re] a ru eware kpobi ziezi gba kiete.”

²⁰ U fo re ẹgọ mai ọ hai wo adhẹẹ je dhesẹ nnọ mai yọ egbodibo nọ e be wha odẹ Jihova. Epọvo na o rẹ jọ kpahe ekwakwa nọ ma bi ro ruiruo. Ekpa nọ e bẹ no gbe Ebaibol nọ i kpiri ubiozọ no hayo enọ a rehọ eware wholo no i re si adhẹẹ no ovuẹ Uvie na. A ta riẹ no inọ ẹgọ gbe osẹ “yọ idhere ovẹrẹ nọ a rẹ rọ t’ẹme nọ o rẹ vuẹ ẹgbede na kpahe oghẹrẹ nọ whọ rọ gbe utu ahwo nọ a rẹ sai dhesẹ owhẹ fihọ.” Fikiere, ẹgọ mai ọ rẹ jọ jevejeve he, yọ ọ rẹ thomawa gbe he, rekọ ẹsikpobi ‘u re fo usiuwoma na.’—Fil. 1:27; wawo 1 Timoti 2:9, 10.

²¹ Eva 1 Ahwo Kọrint 9:26, Pọl ukọ na ọ ta nọ: “Mẹ rẹ dhẹ gheghe he, mẹ be họre wọhọ ọnọ ọ be rehọ [abọ] tehe idedeghe he.” Evaọ aruorokele Pọl, ma gba riẹ mu no re ma wo obọdẹ odibọgba, nọ o re wo ẹvi. Nọ ma bi w’obọ avọ ọwhọ evaọ iruo isẹri-ise wọhọ abọ “ebaka” Jihova nẹnẹ na, joma rehọ uvi-iroro gbe orimuo Oleleikristi mai ruiruo evaọ ovuẹ esiwo na nọ ma rẹ wha se ahwo kpobi evaọ ẹkwotọ mai.