Usiuwoma Ota Nuwou Ruọ Uwou

¹ “Ahwo nọ a wabọ no evaọ idhere sa-sa nọ a re ro whowho Uzẹme na, a sae rọwo inọ usiuwoma nuwou ruọ uwou na avọ obe ọ MILLENNIAL DAWN nọ a rẹ wha lele oma, oyehọ edhere nọ ọ mai woma nọ a re ro whowho Uzẹme na.” Ẹme yena nọ a ro no uvitha July 1, 1893, orọ Zion’s Watch Tower (epanọ a je se Uwou-Eroro Na vẹre na) u fielo họ aghare usiuwoma ota nuwou ruọ uwou na. Wariẹ akpọ na họ, ahwo a rehọ onana wọhọ oware nọ a re ro vuhu Isẹri Jihova. Kọ edhere usiuwoma ota nana o gbe wiruo enẹna, nọ o rọnọ o be jọ bẹbẹ gaga enẹna re a di ahwo họ uwou eva erẹwho jọ na?

² U no Ikere na Ze je Wuzou: Usiuwoma ota nuwou ruọ uwou na u wo otọhotọ no Ikereakere na ze. Jesu ọ ta kẹ ilele 70 re a nya imimava kpohọ iwou ahwo. (Luk 10:5-7) Omoke kpẹkpẹe nọ Jesu o whu no, Ebaibol e niyẹrẹ kpahe ilele riẹ nọ: “Kẹdẹ kẹdẹ a jẹ jọ eva uwou egagọ-ode gbe obọ uwou seri uwuhrẹ Jesu Kristi họ họ.” (Iruẹru 5:42) Pọl ukọ na ọ ta usiuwoma nuwou ruọ uwou re.—Iruẹru 20:20.

³ Usiuwoma ota nuwou ruọ uwou na o gbẹ rrọ edhere nọ o wuzou nọ ma re ro whowho emamọ usi na nẹnẹ. U re fiobọhọ k’omai rọ onaa gwọlọ ahwo udu oruọzewọ via evaọ edhere nọ ọ rrọ kpatiẹ. (Mat. 10:11) Ahwo a rẹ mae romatotọ kezọ evaọ okenọ a tẹ rrọ obọ uwou. Ẹme nọ ma re lele ahwo ta ovao-dhe-ovao—gaviezọ kẹ ẹme nọ a be za k’omai, ruẹ oghẹrẹ nọ a bi ru ovao, jẹ ruẹ oghẹrẹ nọ okegbe rai ọ rrọ—u re fiobọhọ k’omai vuhu eware nọ e rrọ isiuru gbe ọdawẹ rai. Evaọ ẹsibuobu, u re rovie obọdẹ uvẹ fihọ nọ ma re ro lele ai tẹme oke thethei.

⁴ Ru Inwene: U no Pọl ukọ na eva ze re o ru inwene “fiki usiuwoma na.” (1 Kọr. 9:23) Ẹsejọhọ ma sae jọ omaa mai ru inwene re ma ta usiuwoma evaọ okenọ ahwo a rẹ mae rọ jọ uwou, wọhọ akọ owọwọ, urere-oka, hayo etoke-eriosehọ no iruo hayo isukulu. Muẹrohọ hayo kere inọmba iwou nọ who jo di ahwo họ họ fihọ obe, re whọ daoma zihe evaọ ẹdẹ-ọfa ẹkpoka na hayo oke nọ u wo ohẹriẹ no orọ ẹdẹ ọsosuọ na.

⁵ Makọ ahwo nọ a wo omokpokpọ tere he a rẹ sai wobọ evaọ usiuwoma ota nuwou ruọ uwou na. Ma rẹ sae ma omaa re ahwo otiọye na a lele omai kpohọ iwou nọ i thabọ họ, onana u re fiobọhọ kẹ ai ruiruo ẹmẹrera. Uwou ovuọvo oniọvo-ọmọtẹ jọ nọ o wo ẹyao nọ ọ rẹ lẹliẹ erri kpei vẹrẹ ọ rẹ sae nyate evaọ iminiti 30. Ghele na, eva e were riẹ inọ ọ sai lele inievo na kpohọ usiuwoma ota.

⁶ Ma gbẹ be jọ usiuwoma ota nuwou ruọ uwou na ruẹ enọ e wọhọ igodẹ. Wọhọ oriruo, nọ owhowho-uvie jọ o kporo ẹthẹ jọ, a tẹ ta kẹe nọ: “Rueva. Mẹ riẹ oghẹrẹ ohwo nọ whọ rrọ. Mẹ jẹ lẹ se Ọghẹnẹ re o vi ohwo jọ ze ti fiobọhọ kẹ omẹ, idudhe na, me te yo edo ẹthẹ nọ who kporo. Ọghẹnẹ o yo olẹ mẹ o te vi owhẹ ze.” Oware nọ o via na o kẹ imuẹro inọ Jihova ọ be tha edhere usiuwoma ota nana uke. (Mat. 11:19) Gbaemu re who ru usiuwoma ota nuwou ruọ uwou na fihọ oware ikẹse kẹse.

[Study Questions]

 1. Onọ vẹ o roma via kpahe usiuwoma ota nuwou ruọ uwou na, kọ fikieme?

 2. Eme u dhesẹ inọ re a ta usiuwoma nuwou ruọ uwou u no Ikereakere na ze?

 3. Irere jọ vẹ e rrọ usiuwoma nọ ma rẹ ta nuwou ruọ uwou?

 4. Ẹvẹ ma sai ro ru iruo usiuwoma ota nuwou ruọ uwou na re emamọ iyẹrẹ e sai noi ze?

 5. Ẹvẹ ma sai ro ku ahwo nọ a wo ẹbẹbẹ ẹyao gboma evaọ usiuwoma ota nuwou ruọ uwou na?

 6. Fikieme ma je ru usiuwoma ota nuwou ruọ uwou na fihọ oware ikẹse kẹse?