Whai Esẹgbini, Wha Wuhrẹ Emọ Rai re A You Jihova

1-2. Nọ eware i te nwene kẹ omai, ẹvẹ o rẹ lẹliẹ omai rri ehrẹ Ebaibol jọ nọ ma riẹ vẹre?

EVAỌ ẹdẹ nọ a bi ro ru ehaa orọo, who re gbe vuhu ọmọzae avọ ọmọtẹ na ha. Aimava a rẹ nabe sẹ ziezi. Nọ oniọvo nọ ọ be rọ Ebaibol kẹ ovuẹ na ọ be ta ẹme kpahe orọo na, yọ aimava a keria ọvo be romatotọ gaviezọ. Ehrẹ nọ a be kẹ ae na yọ eware nọ a riẹ no vẹre. Rekọ no umuo ẹdẹ yena vrẹ, a bi ti se ae gboja vi epaọ ọsosuọ. Fikieme? Keme eware yena nọ a jẹ rọ ezọ ọvo yo vẹre na, u te oke nọ a ti ro ru ai no.

² Ere ọvona o rrọ re nọ ọzae-avọ-aye nọ a rrọ ukoko na a te yẹ ọmọ no. Anwẹdẹ na, a be hai yo evuẹ sa-sa nọ a rẹ kẹ kpahe epanọ a re ro wuhrẹ ọmọ fihọ edhere Ọghẹnẹ. Rekọ enẹna nọ a yẹ ọmọ no na a te mai ro se ẹme na gboja. Uzẹme riẹ họ, re a wuhrẹ ọmọ fihọ edhere Ọghẹnẹ, okolo iruo ho. Nọ eware i te nwene kẹ omai, oghẹrẹ nọ ma je rri ehrẹ Ebaibol jọ vẹre u re nwene. Oyejabọ u ro fo re odibo Jihova ọ hai se Ebaibol ziezi je roro didi kpahe eware nọ o se evaọ “edẹ uzuazọ riẹ kpobi” wọhọ epanọ Ọghẹnẹ ọ vuẹ ivie Izrẹl na.—Izie. 17:19.

 3. Eme ma te ta kpahe evaọ uzoẹme nana?

³ Whai esẹgbini, obọdẹ uvẹ ulogbo jọ u rovie fihọ kẹ owhai. Oye họ, re wha wuhrẹ emọ rai kpahe Jihova. Rekọ wha riẹ nọ wha te wuhrẹ emọ na kpahe Jihova no yọ u re no ho. Wha re je fiobọhọ kẹ ae re a you Jihova no eva rai kpobi ze. Kọ ẹvẹ wha sai ro ru ei? Ma te jọ uzoẹme nana ta kpahe eware ene jọ nọ Ebaibol ọ ta, nọ e rẹ sai fiobọhọ kẹ owhai. (2 Tim. 3:16) Ma te jẹ ta kpahe erere nọ o te esẹgbini jọ evaọ ukoko na nọ a lele ẹme nọ Ebaibol ọ ta kpahe epanọ a re ro wuhrẹ ọmọ.

 4. Eme ọ rẹ sai fiobọhọ kẹ esẹgbini wuhrẹ emọ rai re a you Jihova? (Jemis 1:5)

⁴ Oware ọsosuọ: Daoma riẹ oghẹrẹ nọ Jihova ọ gwọlọ nọ whọ rọ yọrọ emọ na. Lẹ se Jihova re ọ kẹ owhẹ areghẹ, whọ vẹ sae riẹ oghẹrẹ nọ who re ro wuhrẹ emọ ra re a you rie. (Se Jemis 1:5.) Ohrẹ Jihova o mai woma kpobi. Eware buobu e riẹ nọ ma rọ ta ere. Joma ta kpahe ivẹ jọ. Orọ ọsosuọ, Jihova ọ mae riẹ epanọ a re ro wuhrẹ ọmọ. (Ol. 36:9) Orọ avọ ivẹ, Jihova ọ tẹ hrẹ owhẹ, who je lele ohrẹ na, ewoma ọvo o re noi ze.—Aiz. 48:17.

 5. (a) Eware vẹ ukoko Jihova u ru fihọ nọ e rẹ sai fiobọhọ kẹ esẹgbini? (b) Evaọ ividio na, who te rri oghẹrẹ nọ Brọda Amorim avọ aye riẹ a rọ yọrọ emọ rai, eme whọ jariẹ wuhrẹ?

⁵ Jihova ọ be rọ Ebaibol na gbe ukoko na kẹ omai ehrẹ buobu nọ i re fiobọhọ kẹ esẹgbini wuhrẹ emọ rai re a you rie ziezi. (Mat. 24:45) Wọhọ oriruo, uzoẹme jọ nọ o ta nọ “Help for the Family” o jẹ hae jọ Awake! evaọ ikpe buobu, yọ ma wo izoẹme yena evaọ jw.org, ọrọ Isoko enẹna. Who te se eme nọ e riẹ, u ti fiobọhọ kẹ owhẹ gaga. U te no ere no, ividio buobu e rrọ jw.org nọ e rẹ sai fiobọhọ kẹ esẹgbini wuhrẹ emọ rai oghẹrẹ nọ Ọghẹnẹ ọ gwọlọ. Ividio nana jọ yọ idhesẹvia, efa kọ enọ a jọ kiẹ inievo jọ riwi.b—Itẹ 2:4-6.

 6. Eme oniọvo jọ nọ o yẹ emọ no ọ ta kpahe eware nọ ukoko na u ru fihọ kẹ esẹgbini?

⁶ Esẹgbini buobu evaọ ukoko na a ta nọ eware nọ Jihova ọ rọ ukoko riẹ ru fihọ kẹ esẹgbini na i bi fiobọhọ kẹ ae gaga. Oniọvo-ọmọzae jọ nọ a re se Joe nọ o yẹ emọ esa ọ ta nọ: “Re a yọrọ emọ esa fihọ ukoko na, okolo iruo ho. Mẹ avọ aye mẹ ma rẹ lẹ se Jihova ẹsikpobi inọ o fiobọhọ kẹ omai. Nọ ma bi wuhrẹ emọ na, ẹsejọ ma rẹ nyaku ebẹbẹ. Rekọ ukoko o vẹ nwani kere uzoẹme jọ hayo siobọno ividio jọ nọ o ta kpahe ẹbẹbẹ na. Ohrẹ Jihova nọ ma bi lele rọ yọrọ emọ mai na u bi fiobọhọ kẹ omai gaga.” Joe avọ aye riẹ a ruẹ nọ eware nọ ukoko na u bi ru ze e be lẹliẹ emọ rai kẹle Jihova ziezi.

 7. Fikieme o rọ roja re esẹgbini a fi emamọ oriruo hotọ kẹ emọ rai? (Ahwo Rom 2:21)

⁷ Oware avọ ivẹ: Fi emamọ oriruo hotọ kẹ emọ ra. Emọ i re muẹrohọ oware kpobi nọ esẹgbini rai a bi ru, yọ a rẹ gwọlọ rọ aro kele ai. Uzẹme riẹ họ, ọsẹ hayo oni ọvuọvo nọ o re ru thọ họ ọ riẹ hẹ. (Rom 3:23) O make rrọ ere na, u fo nọ esẹgbini a rẹ daoma gaga re a fi emamọ oriruo hotọ kẹ emọ rai. (Se Ahwo Rom 2:21.) Ọsẹ jọ ọ ta nọ: “Emọ a wọhọ ifomu nọ o re se ame rehọ.” Ọ ta re nọ: “A tẹ ruẹ nọ ma bi wuhrẹ ai oware jọ, yọ ma bi ru ọfa, a rẹ riẹ.” Fikiere, ma tẹ gwọlọ nọ emọ mai a re you Jihova, mai omamai ma re you Jihova ziezi re, a vẹ jẹ ruẹ e riẹ evaọ oma mai.

8-9. Eme whọ jọ ẹme Andrew avọ Emma na wuhrẹ?

⁸ Idhere buobu e riẹ nọ esẹgbini a sai ro wuhrẹ emọ rai re a you Jihova. Oniọvo-ọmọzae jọ nọ a re se Andrew nọ ọ rrọ ikpe ikpegbihrẹ ọ ta nọ: “Ọsẹgboni mẹ a wuhrẹ omẹ nọ olẹ u wuzou gaga. Taure me te ti kiẹzẹ, ọsẹ mẹ ọ rẹ lẹ kugbe omẹ o tẹ make rọnọ mẹ lẹ no vẹre. Ẹsikpobi ọsẹgboni mẹ a jẹ hae ta kẹ omai nọ: ‘Whọ rẹ sae lẹ se Jihova unuẹse buobu evaọ okpẹdoke.’ Olẹ nọ ọsẹgboni mẹ a jẹ hae ta ẹme kpahe ẹsikpobi na u fiobọhọ kẹ omẹ gaga. Enẹna mẹ tẹ be lẹ se Jihova, mẹ rẹ ta eva mẹ kpobi kẹe, yọ me rri rie wọhọ Ọsẹ nọ o you omẹ gaga.” Whai esẹgbini, wha hae kareghẹhọ nọ wha te you Jihova, o sae whae ze nọ emọ rai a re ro you rie re.

⁹ Joma ta kpahe oniọvo ọfa jọ nọ a re se Emma. Ọsẹ riẹ ọ dhẹ siọ ọyomariẹ, oni riẹ, gbe oniọvo riẹ ba. Yọ ọ dhẹ siọ esa buobu ba kẹ oni riẹ nọ ọ jẹ hwa. Emma ọ ta nọ: “Ẹsibuobu ugho o rẹ jọ oni mẹ obọ họ. Ghele na ọ rẹ rẹroso Jihova. Ọ rẹ ta nọ Jihova ọ rẹ rẹrote idibo riẹ. Oghẹrẹ nọ o bi yeri uzuazọ riẹ u dhesẹ nọ o gine fievahọ Jihova, nwane wọhọ epanọ ọ be hae ta kẹ omai nọ ma ru ẹsikpobi na.” Eme iku oniọvo nana i wuhrẹ omai? U fo nọ ọsẹgboni a rọ ẹmeunu gbe uruemu rai fi emamọ oriruo hotọ kẹ emọ rai, makọ evaọ oke nọ eware e rrọ gaga.—Gal. 6:9.

10. Ẹvẹ esẹgbini buobu evaọ Izrẹl a jẹ hae sai ro wo uvẹ nọ a re ro lele emọ rai ta ẹme? (Iziewariẹ 6:6, 7)

¹⁰ Oware avọ esa: Hai lele emọ ra gbiku ziezi. Jihova ọ ta kẹ ahwo Izrẹl nọ jọ a hae rọ ẹme riẹ wuhrẹ emọ rai kẹse kẹse. (Se Iziewariẹ 6:6, 7.) Evaọ oke yena, esẹgbini a jẹ hai lele emọ rai ru eware kugbe ziezi, yọ a jẹ hae rọ uvẹ yena wuhrẹ ai eware nọ i re fiobọhọ kẹ ai you Jihova. Wọhọ oriruo, ọsẹ ọ sae wha ọmọzae riẹ kpobọ ẹwọ re o lele iei kọ eware hayo wha eware nọ a vu kpozi. Evaọ oke yena yọ oni uwou na avọ ọrọ ọmọtẹ a rrọ obọ uwou, bi ko iwu hayo ru eware efa kugbe. Nọ emọ na a bi lele esẹgbini rai ru eware na, yọ a bi gbiku, yọ emamọ eware buobu e jariẹ nọ a jẹ hai ro gbiku. Wọhọ oriruo, a sae ta kpahe epanọ Jihova o woma te, gbe oghẹrẹ nọ o bi ro fiobọhọ kẹ ae evaọ uwou na.

11. Oke vẹ esẹgbini a sai ro lele emọ rai ta ẹme?

¹¹ Eware e gbẹ rrọ epanọ e jọ evaọ oke emọ Izrẹl he. Evaọ erẹwho buobu, o lọhọ họ re emọ a jọ kugbe esẹgbini rai no ohiohiẹ te owọwọ. Ẹsejọ ọsẹ ọ rẹ jọ obọ iruo, yọ emọ a rrọ obọ isukulu. Fikiere esẹgbini a rẹ gwọlọ oke ofa nọ a rẹ sai ro lele emọ rai gbiku ziezi. (Ẹf. 5:15, 16; Fil. 1:10) A rẹ sai lele ai ta ẹme nọ a te bi ru Egagọ Uviuwou. Oniọvo-ọmọzae jọ nọ a re se Alexander ọ ta nọ: “Ọsẹ mẹ ọ rẹ ruẹ nọ ma ru Egagọ Uviuwou koka koka. Ọ rẹ kuvẹ hẹ re oware jọ o whaha omai. Yọ nọ ma te kuhọ no, ma ve mu iku họ egbe.”

12. Eme ọsẹ hayo oni o re ru nọ avọ emọ riẹ a te bi ru Egagọ Uviuwou?

¹² Whẹ ọsẹ hayo oni, eme whọ rẹ sai ru re Egagọ Uviuwou ọ hae were emọ ra oma ẹsikpobi? Whọ sae rọ obe Reawere Uzuazọ Bẹdẹ Bẹdẹ! nọ a siobọno kẹle na wuhrẹ emọ na. Obe na o woma wo umuo ho. Whọ tẹ be rehọ iẹe wuhrẹ emọ ra, o te lẹliẹ owhẹ hai lele emọ ra gbiku ziezi. Egagọ Uviuwou yọ obọdẹ uvẹ jọ nọ emọ a sae rọ ta oware nọ o rrọ ae eva kẹ esẹgbini rai. Yọ oware nọ esẹgbini a gwọlọ oye. Fikiere, oke yena yọ oke nọ whọ rẹ rọ whọku ai hi. Ẹsejọ nọ ọmọ ra ọ tẹ ta ẹme jọ nọ ọ rọwokugbe ẹme Ebaibol ho, gba oma ra re who gbe mu ofu kẹe he. Ukpenọ eva e dha owhẹ, jọ eva e were owhẹ inọ ọ vuẹ owhẹ oware nọ o riẹe eva. Whọ vẹ vuẹe nọ jọ ọ hae ta eva riẹ. Whọ gbẹ riẹ oware nọ o rrọ ae eva ha, kọ whọ sai gine fiobọhọ kẹ ae?

13. Oke ofa vẹ esẹgbini a sai ro wuhrẹ emọ rai kpahe Jihova?

¹³ Whai esẹgbini, orọnikọ oke Egagọ Uviuwou ọvo wha re ro wuhrẹ emọ rai kpahe Jihova ha, rekọ te oke ofa kpobi nọ uvẹ na u te rovie. Oni jọ nọ a re se Lisa ọ ta nọ: “Ma rẹ rehọ eware nọ Jihova ọ ma wuhrẹ emọ mai kpahe oghẹrẹ ohwo nọ Jihova ọ rrọ. Wọhọ oriruo, nọ arakọ mai o te ru oware nọ u fou emọ na họ ehwẹ, ma rẹ rọ uvẹ yena dhesẹ kẹ ae nọ Jihova yọ Ọghẹnẹ nọ eva e rẹ were, yọ ọ gwọlọ nọ eva e were omai re. Oyejabọ nọ ọ rọ ma eware nọ i re fou omai họ ehwẹ na.”

14. Fikieme u ro wuzou gaga re esẹgbini a fiobọhọ kẹ emọ rai wo emamọ egbẹnyusu? (Itẹ 13:20)

¹⁴ Oware avọ ene: Fiobọhọ kẹ emọ ra wo emamọ egbẹnyusu. Ebaibol ọ ta nọ ma te bi lele emamọ ahwo nya usu, u re fiobọhọ kẹ omai. Rekọ ma te mu usu kugbe ikpehre ahwo, o rẹ wha uye ze. (Se Itẹ 13:20.) Whai esẹgbini, kọ wha riẹ ahwo nọ emọ rai a bi lele nya usu? Kọ who lele i rai ta ẹme no? Ẹvẹ whọ sai ro fiobọhọ kẹ emọ ra wo egbẹnyusu nọ i you Jihova? (1 Kọr. 15:33) Whọ tẹ be hae ta kẹ inievo nọ i kruga ziezi evaọ ukoko na re a nyaze obọ uwou rai, je lele owhai ru eware jọ, emọ ra a sae rọ ere wo emamọ egbẹnyusu.—Ol. 119:63.

15. Ẹvẹ esẹgbini a sai ro fiobọhọ kẹ emọ rai wo emamọ egbẹnyusu?

¹⁵ Joma ta kpahe oniọvo-ọmọzae jọ nọ a re se Tony. Ọ ta oware nọ avọ aye riẹ a ru re emọ rai a sai wo emamọ egbẹnyusu. Ọ ta nọ: “Mẹ avọ aye mẹ ma jẹ hae ta kẹ inievo sa-sa, te inievo-emezae gbe erọ emetẹ, te emaha te ekpako re a nyaze obọ uwou mai. Ẹsejọ ma rẹ vuẹ ae nọ a nyaze ti lele omai re emu je lele omai ru Egagọ Uviuwou. Nọ obọdẹ edhere jọ nọ whọ sae rọ riẹ inievo nọ i you Jihova jẹ be gọe avọ evawere. Esẹro okogho, imishọnare, gbe inievo efa nọ i kruga ziezi evaọ ukoko na a jẹ hai wohọ uwou mai. Iku nọ a jẹ hai gbe, gbe ajọwha nọ a wo u fiobọhọ kẹ emọ mai si kẹle Jihova.” Whai esẹgbini, wha daoma fiobọhọ kẹ emọ rai wo emamọ egbẹnyusu.

16. Eme ọ rẹ sai ru udu te owhẹ otọ otẹrọnọ ọmọ ra ọ ta nọ ọ gbẹ gwọlọ gọ Jihova ha?

¹⁶ Kọ otẹrọnọ whọ be daoma wuhrẹ emọ ra kpahe Ọghẹnẹ, yọ avọ ere ghele na, ọjọ ọ tẹ ta nọ ọ gwọlọ gọ Jihova ha, eme who re ru? Whọ nwani roro nọ oma nọ whọ be dawo kpobi anwẹdẹ na uvrẹvru hu. Jihova ọ kẹ omai kpobi uvẹ nọ ma sae rọ ta nọ ma gwọlọ gọe hayo ma gwọlọ gọe he. Ọ kẹ emọ ra uvẹ yena re. Nọ ọmọ ra ọ tẹ ta nọ ọ gbẹ gwọlọ gọ Jihova ha, hai rẹro nọ ẹdẹ jọ ọ te wariẹ mu Jihova họ ẹgọ. Kareghẹhọ ọtadhesẹ ọmọ nọ ọ kwa no uwou na. (Luk 15:11-19, 22-24) Nọ ọ kwa no uwou no, o ru eware iyoma buobu. Ghele na o zihe ze uwhremu na. Rekọ ahwo jọ a sae ta nọ, “Yọ ohare gheghe. Kọ oware utioye o sae ginẹ via?” Ee, o via kẹ ahwo jọ no dede! Nwanọ oware nọ o via kẹ ọmọzae jọ nọ a re se Elie oye.

17. Ẹvẹ oware nọ o via kẹ Elie o sai ro ru udu te owhẹ otọ nọ ọmọ ra o te no ukoko na?

¹⁷ Elie ọ ta nọ: “Ọsẹgboni mẹ a wuhrẹ omẹ kpahe Jihova, yọ onana u ru nọ me ro you Jihova. Ebaibol na ọ tẹ jẹ were omẹ gaga. Rekọ nọ mẹ rro ze no, me te je veghe uzou.” Dede nọ Elie ọ jọ ukoko na, owọ riẹ jọ o jọ obọ akpọ. Ọsẹgboni riẹ a jẹ hrẹ riẹ rekọ o yo ghele he. Uwhremu na ọ tẹ kwa no uwou je mu ekpehre uzuazọ họ eyeri. Ghele na, ọ jẹ hai lele ogbẹnyusu riẹ jọ ta ẹme kpahe Ebaibol. Ọ ta nọ: “Ẹme Ọghẹnẹ nọ mẹ jẹ hae ta kẹ ogbẹnyusu mẹ na ọ jẹ hae lẹliẹ omẹ roro kpahe Jihova gaga. Ẹmẹrera na, me te mu eware nọ ọsẹgboni mẹ a wuhrẹ omẹ evaọ oke emaha na họ ẹkareghẹhọ.” Uwhremu na o te zihe ziọ ukoko na.c Ma riẹ nọ eva e te were ọsẹgboni riẹ gaga inọ a rehọ ẹme Ọghẹnẹ wuhrẹ ọmọ rai na no otọ ze.—2 Tim. 3:14, 15.

18. Eme whọ ruẹ nọ esẹgbini buobu a be daoma ru evaọ ukoko na?

¹⁸ Whai esẹgbini, emọ rai nọ wha wuhrẹ fihọ ukoko na họ oge nọ ọ te gọ Jihova odẹnotha. Obọdẹ uvẹ wha wo na. (Ol. 78:4-6) Rekọ re wha wuhrẹ ai fihọ ukoko na o lọhọ tere he. Ma riẹ nọ wha be daoma gaga, whai esẹgbini. Jọ o bẹ owhai hi. Wha gbẹ hae rehọ ehrẹ Ebaibol wuhrẹ emọ rai jẹ kpọ ae họ edhere. Wha te ru ere, eva e te were Ọsẹ obọ odhiwu mai na gaga.—Ẹf. 6:4.