Ono ọ ma Ọghẹnẹ?

Ma rehọ iẹe nọ ọsẹ jọ o bi lele ọmọzae riẹ nọ ọ rrọ ikpe ihrẹ ta ẹme. Ọsẹ na ọ tẹ ta nọ, “U kri gaga no anwẹnọ Ọghẹnẹ ọ rọ ma otọakpọ na gbe eware kpobi nọ e rrọ eva riẹ, yọ ọye ọ ma ọre, ọvẹre gbe isi na kpobi re.” Ọmọ na ọ tẹ dina roro kpahe oware nọ ọsẹ riẹ ọ ta kẹe na, kẹsena ọ tẹ nọ ọsẹ riẹ nọ, “Sẹmẹ, kọ ono ọ ma Ọghẹnẹ?”

Ọsẹ na ọ tẹ kpahe kẹe nọ, “Ohwo ọvo ọ ma Ọghẹnẹ hẹ, Ọghẹnẹ ọ rrọ no anwọ anwae ze.” Uyo nọ ọsẹ na ọ kẹ ọmọ na, o sae vọ ọmọ na eva evaọ oke yena, rekọ nọ ọmọ na ọ be kpako na, onọ na u ti gbe kpokpo iei udu. Ọmọ na o ti gbe roro evaọ udu riẹ inọ, ẹvẹ ohwo jọ ọ rẹ jọ uzuazọ ababọ emuhọ? Keme makọ ehrugbakpọ na dede o wo emuhọ. U re gbe gbei unu nọ, ‘Diẹse Ọghẹnẹ o no ze?’

Didi uyo Ebaibol na ọ kẹ kpahe onọ yena? Oghẹrẹ uyo ovona nọ ọsẹ nọ ma jọ oriruo na fodẹ na ọ kẹ na, oye Ebaibol na ọ kẹ re. Mosis o kere nọ: “ỌNOWO, . . . Nọ igbehru e te dhẹvia ha, hayo nọ a te ma [otọ] gbe akpọ họ, rite bẹdẹ bẹdẹ yọ owhẹ rọ Ọghẹnẹ.” (Olezi 90:1, 2) Aizaya ọruẹaro na ọ tẹ jẹ ta nọ: “Kọ wha te riẹ? Kọ wha ti yo? ỌNOWO na họ Ọghẹnẹ bẹdẹ bẹdẹ, ọnọ ọ ma akpọ na no oka rite oka.”(Aizaya 40:28) Epọvo na re, Jud olele na ọ jọ ileta riẹ kere kpahe Ọghẹnẹ inọ ọ be rria “ẹsikpobi . . . rite bẹdẹ bẹdẹ.”—Jud 25.

Wọhọ epanọ Pọl ukọ na ọ ta, eria Ebaibol yena i dhesẹ nọ Ọghẹnẹ yọ “ovie nọ ọrọ anwọ ọgbọ ze.” (1 Timoti 1:17) Onana u dhesẹ nọ Ọghẹnẹ ọ rrọ no anwọ anwae ze. Yọ ọ rẹ rria bẹdẹ bẹdẹ. (Eviavia 1:8) Fikinọ ọye họ Ọghẹnẹ erumeru na, ọ rẹ rria no ebẹdẹ rite ebẹdẹ.

Fikieme onana u re ro gbe omai unu ẹsejọ? O rrọ ere keme oghẹrẹ nọ ma re kele oke mai u wo ohẹriẹ no oghẹrẹ nọ Jihova o re kele oke riẹ. Fikinọ Jihova ọ rẹ rria bẹdẹ bẹdẹ, odu ikpe ọ wọhọ ẹdọvo evaọ aro riẹ. (2 Pita 3:8) Wọhọ oriruo: Abaka nọ ọ rẹ rria edẹ 50 ọvo o ve whu no, ọ rẹ sai wo otoriẹ ikpe ohwo akpọ nọ i re te 70 hayo 80 vievie he. Ebaibol na ọ ta nọ mai ahwo-akpọ ma wọhọ ebaka evaọ aro Jihova. Makọ ẹgba iroro mai dede o tulo ho nọ a tẹ rehọ iẹe wawọ orọ Ọghẹnẹ. (Aizaya 40:22; 55:8, 9) Fiki oyejabọ nọ ma gbẹ sai ro wo otoriẹ oghẹrẹ nọ Jihova ọ rrọ gbagba ha na.

Dede nọ o rrọ bẹbẹ re ma wo otoriẹ oghẹrẹ ohwo nọ Jihova ọ rrọ, ma riẹ nọ ọ rrọ uzuazọ. Otẹrọnọ ohwo jọ ọ ma Ọghẹnẹ, kiyọ ohwo yena họ ọmemama na. Rekọ Ebaibol na ọ ta nọ, Jihova họ ọnọ “ọ ma eware na kpobi.” (Eviavia 4:11) Ofariẹ, ma riẹ nọ ehrugbakpọ na ọ jọ oria ovo vẹre he. (Emuhọ 1:1, 2) Kọ bovẹ ehrugbakpọ na o no ze? Ohwo nọ ọ ma ehrugbakpọ na ọ rẹ jọ uzuazọ taure ọ tẹ te mae. Ọghẹnẹ ọ rrọ uzuazọ no taure ọ tẹ te ma omọfa kpobi, wọhọ Ọmọ ọsosuọ riẹ, Jesu, gbe ikọ-odhiwu na. (Job 38:4, 7; Ahwo Kọlọsi 1:15) Koyehọ, Ọghẹnẹ ọvọ ọ kake jọ. Ohwo ọvo ọ ma riẹ hẹ; ohwo ọvuọvo ọ jọ uzuazọ evaọ oke yena nọ ọ ma Ọghẹnẹ hẹ.

Ehrugbakpọ na gbe eware nọ e riẹe eva kpobi e rrọ uzuazọ fikinọ Ọghẹnẹ ọ ma rai. Ọnọ ọ ma ehrugbakpọ na je fi izi họ nọ e be kpọe na, ọ rrọ uzuazọ no anwọ anwae ze. Oyejabọ nọ ọ sae rọ kẹ eware efa kpobi nọ ọ ma uzuazọ na.—Job 33:4.