Ẹvẹ Isẹri Jihova A be rọ Ruẹ Ugho Ru Iruo Usi Uwoma Ota Rai?

Okẹ unevaze ma be mai ro ru iruo usi uwoma ota mai, yọ ahwo nọ a rrọ Isẹri Jihova a be mai ru onana.a Ma wo itehe nọ ahwo a re fi okẹ unevaze họ evaọ eria egagọ mai. Ma tẹ jẹ jọ oria Unevaze evaọ jw.org na fodẹ idhere efa nọ a sae rọ kẹ okẹ unevaze. Whọ rẹ ruẹ idhere sa-sa nọ ohwo ọ sae salọ rọ kẹ okẹ unevaze fiki iruo usi uwoma ota akpọ-soso na, ugho nọ a rẹ raha ro ru eware evaọ ukoko nọ ọ rrọ hayo fiki ivẹ na.

Isẹri Jihova a rẹ hwa abọvo-abakpe he hayo zọhọ ugogo unuigho jọ fiki epanọ a wo ugho te he. (2 Ahwo Kọrint 9:7) Ma re ghoro umudo evaọ obọ iwuhrẹ mai hi hayo mi ohwo ugho re ọ tẹ ruọ eva ha. Ma rẹ hwa ahwo mai nọ i re ru iruẹru sa-sa wọhọ ame-ọhọ, ovuẹ nọ a rẹ kẹ evaọ uwhori, ehaa-orọo, hayo eware itieye evaọ egagọ mai osa gbe he. Ma re du ru eware wọhọ, eware nọ a re ru zẹ, ebaza, ehavẹste, ehaa, ikpahwo nọ a re zizie, hayo eware itieya na ha re ma ruẹsi wo ugho. Ma rẹ yare igho mi ahwo ho. Ma re woro odẹ ohwo nọ ọ kẹ okẹ hẹ hayo kere odẹ riẹ fihọ okẹ hẹ. (Matiu 6:2-4) Ma rẹ jọ oria Itanẹte mai gbe ebe mai whowho eware ro wo ugho ho.

Evaọ ukoko Isẹri Jihova kpobi, kamara kamara a re whowho unuigho nọ a wo, oware nọ a rọ ugho ru, gbe unuigho nọ u kiọkọ, yọ ohwo kpobi nọ ọ rrọ ewuhrẹ na o re yoi. Noke toke evaọ ukoko ovuovo a rẹ kiẹ epanọ a raha igho ukoko na riwi wọhọ epanọ a kere fihotọ re a ruẹ nọ a be raha igho na evaọ edhere nọ u fo.​—2 Ahwo Kọrint 8:20, 21.

• Etehe unevaze: Whọ sai fi ugho hayo echẹke họ etehe unevaze evaọ obọ Ọgwa Uvie, Ọgwa Okokohọ, hayo oria ofa kpobi nọ ma rẹ jọ ru iwuhrẹ.

• Okẹ unevaze nọ a rẹ jọ Itanẹte kẹ: Evaọ erẹwho buobu, whọ sae jọ oria “Ru Unevaze Rọkẹ Iruo Isẹri Jihova” rehọ credit cards, debit cards, bank transfers, gbe idhere efa itieye rọ kẹ okẹ unevaze.b Isẹri Jihova jọ a jiroro nọ a re “fi oware jọ họ akotọ” nọ a re ro ru unevaze kamara kamara, yọ a ru rie evaọ oghẹrẹ nọ a rẹ rọ rehọ ugho na no akanto rai nọ oke na u te te.​—1 Ahwo Kọrint 16:2.

  

• Okẹ nọ a ma omaa riẹ fihotọ: Idhere jọ nọ a sae rọ kẹ okẹ unevaze o rẹ gwọlọ nọ ohwo ọ ma omaa fihotọ oke krẹkri jẹ gwọlọ ohrẹ mi elọya. Oghẹrẹ omaa otiọye na o sai fiobọhọ kẹ owhẹ nọ a gbe ro mi owhẹ osa-uzou hu hayo mi owhẹ bu ga hrọ lele uzi orẹwho ra. Onana u fiobọhọ kẹ ahwo buobu riẹ kpahe oghẹrẹ nọ a sae rọ kẹ okẹ fiobọhọ kẹ amọfa no nọ a gbẹ rrọ uzuazọ na hayo nọ a rẹ kẹ ohwo nọ a salọ nọ a te whu no. Ivie se hayo kere se uwou ogha Isẹri Jihova orẹwho ra re a vuẹ owhẹ eware efa otẹrọnọ whọ gwọlọ rehọ edhere jọ evaọ usu idhere nana kẹ okẹ unevaze:

  • akanto evaọ ebanke

  • ishọranse gbe omaa okenọ ohwo o te nwrotọ no iruo no

  • etọ hayo iwou

  • stocks gbe bonds

  • obe uku-oghale gbe oware nọ a rọ kẹ ohwo kru

Re whọ ruẹ evuẹ efa kpahe oghẹrẹ nọ whọ sae rọ kẹ okẹ unevaze evaọ oborai, rri oria “Ru Unevaze Rọkẹ Iruo Isẹri Jihova.”