Jihova—Ọghẹnẹ Nọ Ọ Rẹ Fere Eware Idhere Via

‘Ọghẹnẹ jọ ọ rọ obọ odhiwu ọnọ ọ rẹ fere eware idhere via.’—DANIẸL 2:28.

 1, 2. (a) Ẹvẹ Jihova o ro wo ẹhẹriẹ no Ọwegrẹ ologbo riẹ? (b) Ẹvẹ ahwo-akpọ a bi ro dhesẹ ẹhẹriẹ ọnana via?

JIHOVA, Ọghẹnẹ erumeru gbe oyoyou ehrugbakpọ na, ọnọ ọye ọvo ọ rọ Ọnọma, ọ rọ Ọghẹnẹ areghẹ gbe ẹdhoguo-okiẹrẹe. U du fo kẹe re ọ ko oma riẹ, iruo riẹ, hayo ẹjiroro riẹ dhere he. Evaọ oke gbe areghẹ obọ riẹ, ọ rẹ fere omobọ riẹ via. Evaọ edhere ọnana o wo ẹhẹriẹ no Ọwegrẹ riẹ, Setan Ẹdhọ na, ọnọ ọ rẹ gwọlọ ko oghẹrẹ nọ ọ ghinẹ rọ gbe ẹjiroro riẹ dhere.

² Nwane wọhọ epanọ Jihova avọ Setan a rọ ọvuọ abọ riẹ na, ere egegagọ rai a rọ ọvuọvo abọ rai re. A rẹ rehọ iwhayo gbe eviẹhọ vuhu ahwo nọ i bi lele ọkpọvio Setan. A rẹ gwọlọ dhesẹ oma rai via wọhọ emamọ ahwo, yọ a bi ru iruo ebi. A ta kẹ Ileleikristi obọ Kọrint nọ uzẹme onana u gbe ai unu hu. “Keme ahwo otiọye na ikọ erue a rọ, iruiruo ọviẹwẹ, nọ ebe rẹriẹ oma rai ruọ ikọ Kristi. O sai gbunu [hu]; keme Setan oma riẹ ọ rẹ rehọ oma riẹ ru elo ukọ-odhiwu.” (2 Ahwo Kọrint 11:13, 14) Evaọ abọdekọ riẹ, Ileleikristi a re rri bru Kristi wọhọ Osu rai. Okenọ ọ jọ otọakpọ ọ raro kele uruemu Ọsẹ riẹ, Jihova Ọghẹnẹ, gbagba. (Ahwo Hibru 1:1-3) Fikiere, nọ a te bi lele Kristi, koyehọ Ileleikristi a be raro kele Jihova, Ọghẹnẹ uzẹme, ọnọ ọ rẹ t’eva, gbe ọrọ elo. U du fo nọ ae oma rai a ko oma rai dhere he, iruo rai, hayo ẹjiroro rai.—Ahwo Ẹfẹsọs 4:17-19; 5:1, 2.

 3. Ẹvẹ o gbẹ rọ rọ uzẹme he inọ ahwo nọ i bi zihe ruọ Isẹri Jihova a gba rae họ re a kuomagbe “ẹko ahwo nọ i dieva”?

³ Eva oke nọ ọ riẹ nọ o mai woma, oye Jihova ọ rọ fodẹ ẹjiroro riẹ via jẹ ta kpahe obaro nọ ahwo-akpọ a riẹ vẹre he. Evaọ edhere ọnana ọ jẹ rọ Ọghẹnẹ ọnọ ọ rẹ fere eware idhere via. Fikiere, a zizie ahwo nọ e gwọlọ gọe—ẹhẹ a kpakpa e rai—re a wuhrẹ ovuẹ otiọye na nọ a fere via na. Isẹri 145,000 orẹwho Europe jọ nọ a kiẹriwi evaọ 1994 u dhesẹ via nọ, evaọ oma rai kpobi, Omomọvo rai ọ rehọ udu obọriẹ kiẹ iwuhrẹ Isẹri Jihova riwi ikpe esa taure a tẹ salọ nọ a rẹ jọ Osẹri. A rehọ udu obọ rai salọ nọ a rẹ jọ osẹri, orọnikọ a gbae họ họ. Yọ a gbe wo ufuoma ẹjẹ iroro gbe owojẹ. Wọhọ oriruo, fikinọ ejọ rai a sae rọwo kugbe ute ukpehru ọrọ ẹfuọ Ileleikristi hi, enana e tẹ jiroro uwhremu na nọ a gbẹ gwọlọ jọ Isẹri hi. Rekọ o rọ oware isiuru inọ evaọ ikpe isoi nọ i kpemu na, Isẹri enana buobu a j’owọ no re a wariẹ mu usu gbe iruẹru họ wọhọ Isẹri.

 4. Eme u fo nọ u re kpokpo Ileleikristi ẹrọwọ họ, kọ fikieme?

⁴ Dede, orọnikọ Isẹri anwae kpobi i zihe ze he, yọ ejọ nọ i wo ọkwa iruo vẹre evaọ udevie ukoko Ileleikristi na e rọ usu na. Onana u re gbunu hu, keme makọ omọvo olele ọkpekpe Jesu jọ dede, Judas ukọ na, o kie. (Matiu 26:14-16, 20-25) Rekọ onana o wha avro fihọ ẹkpatiẹ Egagọ-Ahwo-Ikristi omariẹ? Kọ onana u fi avro họ obokparọ nọ Isẹri Jihova a be rọ wha iruẹru uwuhrẹ rai haro? Vievie, nwanọ epanọ iruẹru eviẹhọ Judas Iskariọt u bru ẹjiroro Ọghẹnẹ dhe he na.

Erumeru Rekọ Ọ rọ Yoyou

 5. Ẹvẹ ma rọ riẹ nọ Jihova avọ Jesu a you ahwo-akpọ, kọ ẹvẹ a ro dhesẹ uyoyou nana no?

⁵ Jihova yọ Ọghẹnẹ uyoyou. Ọ be sẹro ahwo. (1 Jọn 4:7-11) Makọ ọkwa okpehru riẹ, o rẹ were iẹe re o mu ahwo-akpọ ogbẹnyusu. Rọ kpahe odibo anwae riẹ jọ, ma se nọ: “ ‘Abraham ọ rọ ẹrosuọ Ọghẹnẹ jabọ nọ, a je kele iei gbe ẹrẹreokie kẹe’; fikiere a te sei ogbẹnyusu Ọghẹnẹ.” (Jemis 2:23; 2 Iruẹru-Ivie 20:7; Aizaya 41:8) Wọhọ epanọ imava nọ e rọ egbẹnyusu a rẹ t’eme idhere na, ere Jihova ọ rẹ ta eme idhere kugbe egbẹnyusu riẹ. Evaọ abọ nana Jesu ọ raro kele Ọsẹ riẹ, keme o mu ogbẹnyusu kugbe ilele riẹ ọ tẹ jẹ t’eme idhere kẹ ai. Ọ ta kẹ ai nọ: “Me gbe se owhai idibo ofa ha, keme na odibo ọ rẹ riẹ epanọ olori riẹ o re ruo ho; rekọ me se owhai ezọ, keme eware kpobi nọ mẹ jọ obọ Ọsẹ mẹ yo, eye mẹ jẹ owhai riẹ.” (Jọn 15:15) Ovuẹ idhere, hayo “edidi,” onọ Jihova, Ọmọ riẹ, gbe egbẹnyusu rai a wo u re ku ai gbe evaọ uyoyou gbe omarọkẹ ọgbakugbe.—Ahwo Kọlọsi 3:14.

 6. Fikieme u gbe fo nọ Jihova ọ rẹ ko ẹjiroro riẹ dhere he?

⁶ Otofa odẹ Jihova họ, “Ọye Ọ rẹ Suẹe Ze nọ E jẹ Jọ,” yọ u dhesẹ iruẹru riẹ nọ o re ro zihe ro oware nọ ọ gwọlọ zihe ro kpobi re ọ ruẹse ru ẹjiroro riẹ gba. Wo ohẹriẹ no ahwo-akpọ, u du fo re Jihova ọ ko iroro riẹ dhere he fikinọ ozọ u bi mu ei nọ amọfa a te jọ ọzadhe kẹ erugba rai. Oware ovo o sae vae abọ kie he, fikiere ọ jọ Ẹme riẹ, Ebaibol na, dhesẹ vevẹ oware nọ ẹjiroro riẹ o rọ. Ọ yaa nọ: “Ẹme [mẹ] . . . o re zihe bru omẹ tha ababọ họ, rekọ o re ru epanọ mẹ ta gba je ru oware nọ mẹ rehọ fiki riẹ vi ei na gba.”—Aizaya 55:11.

 7. (a) Eme Jihova ọ ruẹaro riẹ evaọ Idẹn, kọ ẹvẹ Setan o ro dhesẹ Ọghẹnẹ fihọ uzẹme? (b) Ẹvẹ uzi nọ o rọ 2 Ahwo Kọrint 13:8 o rọ rọ uzẹme ẹsikpobi?

⁷ Nọ ọkparesuọ na evaọ Idẹn o nwane via vrẹ no, Jihova o te dhesẹ vevẹ ẹwhọ nọ ọ rọ udevie riẹ avọ Ọwegrẹ riẹ, Setan, gbe oware nọ o te wha ze. Ubi eyaa Ọghẹnẹ a te nwae oma avọ edada, o te jọ ribri hi, rekọ Setan ọ te ruẹ uye uwhu. (Emuhọ 3:15) Evaọ 33 C.E., Ẹdhọ ọ tẹ ghinẹ nwa Ubi na oma, Kristi Jesu, ẹkwoma ekpe nọ o kpe rie. Evaọ edhere ọnana, Setan o te ru Ikereakere na gba ọ tẹ rọ enẹ dhesẹ Jihova fihọ Ọghẹnẹ uzẹme, dede nọ onana o rọ ẹjiroro Setan he. Omukpahe riẹ kẹ uzẹme gbe ẹrẹreokie, jegbe uruemu omoya riẹ, nọ o re kurẹriẹ hẹ, o tẹ lẹliẹe nwani ru oware nọ Ọghẹnẹ ọ ruẹaro nọ o re ti ru. Ẹhẹ, rọ kẹ enọ e be wọso uzẹme na kpobi, makọ rọ kẹ Setan omariẹ, ehri-uzi na o rọ uzẹme: “Ma sai ru oware ovo mukpahe uzẹme na ha, rekọ abọ uzẹme ọvo ma rọ.”—2 Ahwo Kọrint 13:8.

 8, 9. (a) Eme Setan ọ riẹ, kọ eriariẹ enana e sae whaha ẹwhaharo ẹjiroro Jihova? (b) Didi unuovẹvẹ uvevẹ ewegrẹ Jihova a be se, kọ fikieme?

⁸ Nọ a rehọ Uvie Ọghẹnẹ mu no onọ a rẹ ruẹ hẹ evaọ 1914, Eviavia 12:12 o te rugba: “Fikiere ghọghọ wha ihru gbe enọ e riẹ eva kpobi, rekọ [uye u te] owhai, o akpọ gbe abade, keme ukumuomu na ọ rehọ ofu ọgaga bru owhai ze [no], keme ọ riẹ nọ oke riẹ o re kpẹkpẹre.” Ghele, dede nọ ọ riẹ nọ oke riẹ o re kpẹkpẹre, kọ oyena o lẹliẹ Setan nwene edhere uzuazọ riẹ no? Ere oruo u re dhesẹ nọ Setan ọ rọwo inọ Jihova họ Ọghẹnẹ uzẹme na jegbe nọ wọhọ Osu Oride, ọye ọvo o fo nọ a rẹ gọ. Ghele, Ẹdhọ ọ be rọwo inọ o ruthọ họ, dede nọ ọ riẹ eware enana kpobi.

⁹ Jihova ọ fodẹ oware nọ o te via nọ Kristi ọ tẹ nyaze ti gu eyero-akpọ Setan ẹdhọ. (Matiu 24:29-31; 25:31-46) Kpahe onana, Ẹme riẹ o whowho kpahe isu akpọ nọ: “Keme okenọ ahwo a rẹ te ta nọ, ‘Oke onana oke udhedhẹ gbe omofọwẹ,’ idudhe na ọraha ọ vẹ nwane bru ae ze, nwane wọhọ epa nọ aye ọ rẹ thuẹ othuẹ eyẹ.” (1 Ahwo Tẹsalonika 5:3) Ahwo nọ i bi lele oriruo Setan a bi gbabọkẹ unuovẹvẹ uvevẹ nana. Idu iyoma rai i tu rai aro no, yọ onana o be kẹ ai uvẹ re a kurẹriẹ no edhere oyoma rai hi re a je nwene ẹjiroro gbe ẹghẹ rai nọ a be rọ gwọlọ bru ẹjiroro Jihova dhe.

10. (a) Ẹvẹ 1 Ahwo Tẹsalonika 5:3 o rugba te no, rekọ didi owọ ahwo Jihova a rẹ jẹ? (b) Fikieme ahwo nọ e kare ẹrọwọ a jẹ te wọso ahwo Ọghẹnẹ ga viere evaọ obaro?

¹⁰ Maero no 1986 ze, okenọ Okugbe Erẹwho na o ro whowho Ukpe Udhedhẹ Akpọ-Soso, eme ọ udhedhẹ gbe omofọwẹ e vọ akpọ na no. A j’owọ no evaọ omodawọ re a ruẹse wha udhedhẹ akpọ ze, yọ a ru ẹnyaharo jọ no. Kọ onana họ ekuhọ orugba eruẹaruẹ nana, hayo kọ ma re rẹro oghẹrẹ ewhowho igbunu jọ evaọ obaro? Jihova o ti ru ẹme na vevẹ evaọ ẹruoke riẹ. Bọo okioye, j’oma jaja aro vi evaọ ẹzi, “be hẹrẹ je bi rẹro ẹtha ẹdẹ Ọghẹnẹ.” (2 Pita 3:12) Nọ oke o be nyaharo na avọ eme udhedhẹ gbe omofọwẹ nọ a bi dhe ẹtẹta na, ahwo jọ nọ e riẹ kpahe unuovẹvẹ nana, rekọ nọ e salọ nọ a rẹ siẹe, a rẹ sai veghe uzou viere be ta nọ Jihova o ti ru ẹme riẹ gba ha, hayo o wo ogaga tere dede he. (Wawo Ọtausiuwoma Na 8:11-13; 2 Pita 3:3, 4.) Rekọ Ileleikristi uzẹme a riẹ nọ Jihova o ti ru ẹjiroro riẹ gba!

Emamọ Adhẹẹ Rọkẹ Edhere nọ Jihova O Bi ro Ruiruo

11. Eme Daniẹl gbe Josẹf a wuhrẹ kpahe Jihova?

¹¹ Okenọ Nebukadineza, osu Ogaga-Esuo Babilọn, ọ wezẹ ewezẹ uduama jọ nọ ọ sae jẹ kareghẹhọ họ, o te bo kẹ obufihọ. Izerẹ riẹ, ebo-ẹva, gbe eruẹaro riẹ a sae ta oware nọ ewezẹ riẹ o jọ họ hayo fa otọ riẹ kẹe he. Rekọ Daniẹl odibo Ọghẹnẹ o ru erei, dede nọ ọ ta vevẹ inọ ẹtavia ewezẹ na gbe otofa riẹ i no areghẹ obọ riẹ ze he. Daniẹl ọ ta nọ: ‘Ọghẹnẹ jọ ọ rọ obọ odhiwu ọnọ ọ rẹ fere eware idhere via, nọ o ru Nebukedineza ovie na riẹ eware nọ e be te via ẹdẹfa.’ (Daniẹl 2:1-30) Ikpe udhusoi buobu nọ i kpemu no, Josẹf, ọruẹaro Ọghẹnẹ ọfa, ọ kake ruẹ no nọ Jihova yọ Ọnọ Ọ rẹ Fere eware idhere via.—Emuhọ 40:8-22; Emọs 3:7, 8.

12, 13. (a) Ono họ ọruaro Ọghẹnẹ nọ ọ mae rro, kọ fikieme whọ jẹ kuyo na ere? (b) Amono nẹnẹ a rọ ‘esẹro eware ididi Ọghẹnẹ,’ kọ ẹvẹ ma re rri rai?

¹² Ọruaro Jihova nọ ọ mae jọ otọakpọ na rro kpobi họ Jesu. (Iruẹru 3:19-24) Pọl ọ ta nọ: “Eva eghẹrẹ idhere buobu Ọghẹnẹ ọ jẹ rehọ unu eruẹaro ta ẹme kẹ esẹ mai okenọ ukpemu: rekọ enẹna Ọmọ riẹ ọ be rọ ta ẹme kẹ omai, ọ nọ o romu ọreuku eware kpobi, ọ nọ ọ rọ ma akpọ na re.”—Ahwo Hibru 1:1, 2.

¹³ Jihova ọ rehọ ẹkwoma Ọmọ riẹ, Jesu, t’ẹme kẹ Ileleikristi ọsosuọ, ọnọ ọ fere eware idhere Ọghẹnẹ via kẹ ai. Jesu ọ ta kẹ ai nọ: “A kẹ owhai ẹriẹ eme ididi uvie Ọghẹnẹ.” (Luk 8:10) Pọl ọ tẹ ta kpahe Ileleikristi nọ a kẹ ẹzi uwhremu na wọhọ “idibo Kristi gbe irieyero eware ididi Ọghẹnẹ.” (1 Ahwo Kọrint 4:1) Nẹnẹ, Ileleikristi nọ a kẹ ẹzi na a gbe bi ruiruo yena, enọ e rọ utu ọrigbo nọ o wo ẹrọwọ gbe areghẹ na, enọ e be rehọ ẹkwoma Ugboma Esuo riẹ be rehọ emuore ẹzi rọ kẹ evaọ ẹruoke. (Matiu 24:45-47) Otẹrọnọ ma be rehọ adhẹẹ odidi kẹ eruẹaro anwae Ọghẹnẹ, jẹ maero Ọmọ Ọghẹnẹ, kọ ma gbẹ rọ adhẹẹ kẹ ahwo nọ Jihova o bi ro ruiruo nẹnẹ rọ fere evuẹ Ebaibol via enọ e r’oja kẹ ahwo riẹ evaọ oke obẹbẹ nana?—2 Timoti 3:1-5, 13.

Ọtavia Manikọ Ẹkodhere?

14. Okevẹ Ileleikristi a re ro ru eware dhere, be rọ ere lele oriruo ono?

¹⁴ Kọ ọtavia Jihova evaọ ẹfere via eware u dhesẹ nọ o rọ ọgbahọ nọ Ileleikristi a rẹ nwani rovie eware kpobi nọ a riẹ via? Whaọ, Ileleikristi a re lele ohrẹ Jesu kẹ ikọ riẹ inọ a “wo areghẹ wọhọ eriọvọ wowolẹ wọhọ irueruẹ.” (Matiu 10:16) Otẹrọnọ a ta kẹ ai nọ a gọ Ọghẹnẹ hẹ wọhọ epanọ o rọ iroro rai, Ileleikristi a re gbe “yo ẹme Ọghẹnẹ,” keme a riẹ nọ ukoko ohwo-akpọ ọvo nọ u re bru egagọ Jihova dhe o riẹ hẹ. (Iruẹru 5:29) Jesu omariẹ o dhesẹ ẹgbagba onana. Ma se nọ: “Nọ eware enana e ruọ emu no, Jesu ọ tẹ jẹ nya kpenẹ avọ enẹ evaọ Galili; keme ọ gbẹjẹ nya eva Judia ha, epanọ ahwo Ju a jẹ guọlọ nọ a re kpe i. Whaọ eha Uwou-idhu ahwo Ju ekẹle ino. Jesu ọ tẹ ta kẹ ae [inievo iwo riẹ nọ e rọwo ho] nọ: . . . ‘Whai ọvo wha kpobọ eha na; me bi kpo obọ eha na ha, keme oke mẹ u rite ziezi hi.’ Nọ ọ ta enẹ no, ọ tẹ daji Galili. Rekọ nọ imoni riẹ e nya kpobọ eha na no, ọye oma-riẹ ọ tẹ nya re, ọ rọ oma via ha rekọ ọ lẹlẹ nya.”—Jọn 7:1, 2, 6, 8-10.

Ma Ta Via Hayo Kọ Ma Ta Via Ha?

15. Ẹvẹ Josẹf o ro dhesẹ nọ o rẹ jọ oware uyoyou ẹsejọ re a ko oware dhere?

¹⁵ Ẹsejọ, re a ko ẹme dhere o rọ oware areghẹ ọvo ho rekọ oware uyoyou. Wọhọ oriruo, eme Josẹf, ọsẹ aruakpọ Jesu, o ru okenọ o yo nọ aye nọ ọ sa h’otọ no, Meri, “o dieva Ẹzi Ẹri họ”? Ma se nọ: “Josẹf ọzae riẹ, ohwo okiẹrẹe, ọ guọlọ nọ o ruẹ re o via ha, o tẹ rọ eva riẹ nọ ọ rẹ lẹlẹ siobọno i.” (Matiu 1:18, 19, ẹjẹlẹ ibieme na ọmai.) Ẹvẹ o hae kare ẹwo te re ọ wọ ẹme na ruọ ẹgbede!

16. Didi owha-iruo ekpako na a wo, jegbe amọfa ukoko na kpobi, kpahe eme ọ idhere?

¹⁶ Eme ọ idhere nọ e rẹ wha omovuọ gbe edada ze a rẹ tae via kẹ ahwo nọ i te he he. Ekpako Ileleikristi a re wo onana họ iroro nọ a tẹ be kẹ ohrẹ hayo a tẹ be sasa ibe Oleleikristi oma hayo nọ a tẹ be whọku ai fikinọ a thọ uzi Jihova. U fo re a nya lele edhere nọ Ikereakere na o gwọlọ; ẹfodẹ eme ọ idhere rọ kẹ enọ ẹme na u kpomahọ họ o thọ o tẹ jẹ kare uyoyou. Uzẹme, ahwo ukoko Ileleikristi na a rẹ daoma re a siọ ovuẹ idhere ba ẹkiẹ mi ekpako rekọ a rẹ rọ adhẹẹ kẹ owha-iruo ọkpako na nọ ọ rẹ rọ ko eware idhere dhere. Itẹ 25:9 u muẹrohọ nọ: “Lele ọrivẹ ra ọvo [ku ẹwhọ ra họ], who dhesẹ eware idhere amọfa ha.”

17. Fikieme Ileleikristi a jẹ ko eware idhere dhere ẹsejọ, rekọ fikieme a gbẹ sai ru ere ẹsikpobi hi?

¹⁷ A re lele uzi onana re evaọ uviuwou hayo evaọ udevie egbẹnyusu ekpekpe. U wuzou re a ko eme jọ dhere rọ whaha ẹwhọ gbe ozighi. “Ofou ẹkpẹlobọ-ọre ọ rẹ wha oso tha; gbe ẹrọo nọ o re gu ahwo, ọ rẹ wha ofu tha.” (Itẹ 25:23) Dede, omarokpotọ kẹ Jihova gbe izi ikiẹrẹe riẹ, gbe uyoyou kẹ ahwo nọ eware e thobọ, ẹsejọ o rẹ gwọlọ nọ a gu eme idhere kẹ ọsẹ gbe oni, ekpako Ileleikristi, hayo amọfa nọ i wuzou.a Rekọ ẹsebuobu, Ileleikristi a rẹ ko iruthọ amọfa dhere, wọhọ epanọ a be ko erai dhere re.

18. Didi ekwakwa esa Ileleikristi e rẹ sai fiobọhọ k’omai riẹ oware nọ ma rẹ ta gbe onọ ma rẹ ta ha?

¹⁸ Evaọ ekuhọ, Oleleikristi ọ rẹ raro kele Jihova ẹkwoma ẹkodhere eme nọ u te fo, ọ vẹ jẹ tae via nọ o tẹ r’oja. Re ọ jiroro oware nọ ọ rẹ ta via gbe onọ a rẹ ta via ha, ọ gwọlọ omarokpotọ, ẹrọwọ, gbe uyoyou. Omarokpotọ o rẹ lẹliẹe whaha omoya, be gwọlọ nọ ajiri ei ẹkwoma ẹta eware kpobi nọ ọ riẹ hayo erovie eware idhere re o ru ahwo hwehwẹ. Ẹrọwọ nọ o wo fihọ Ẹme Jihova gbe ukoko Ileleikristi na o rẹ wọe whowho ovuẹ nọ Ọghẹnẹ ọ jọ Ebaibol na kẹ yọ ọ be yọrọ oma kpahe ẹta eware nọ i re tu amọfa oma. Ẹhẹ, uyoyou o rẹ wọe re ọ ta eware nọ e rẹ wha orro se Ọghẹnẹ gbe onọ u fo nọ ahwo a rẹ riẹ re a ruẹse wo uzuazọ. Rekọ ọ rẹ ta eme idhere via ha, o re vuhumu nọ ẹsebuobu ẹtavia enana u re dhesẹ ababọ uyoyou.

19. Didi iruẹru i re fiobọhọ vuhu Ileleikristi uzẹme, kọ eme o rẹ whaze?

¹⁹ Ohrẹ owowa onana a re ro vuhu Ileleikristi uzẹme. A rẹ ko oghẹrẹ nọ Ọghẹnẹ ọ rọ dhere he evaọ ẹjiroro na nọ o wo odẹ hẹ hayo uwuhrẹ Esanerọvo igbunu, nọ a rẹ riẹ otọ riẹ hẹ. Egagọ erue a rẹ jọ ruẹ eghẹnẹ nọ a riẹ hẹ, orọnikọ egagọ uzẹme he. (Rri Iruẹru 17:22, 23.) Isẹri Jihova enọ a kẹ ẹzi na a ghine wo ovuhumuo uvẹ ọrọ ‘ẹruorote eware ididi Ọghẹnẹ.’ Ẹkwoma eware ididi enana nọ a re rovie via kẹ amọfa, a je fiobọhọ si ahwo udu-oruọzewọ re a gwọlọ usu Jihova.—1 Ahwo Kọrint 4:1; 14:22-25; Zekaraya 8:23; Malakae 3:18.

[Footnote]

Ẹvẹ Whọ te k’Uyo?

◻Fikieme u gbe fo re Jihova ọ ko ẹjiroro riẹ dhere he?

◻Amono Jihova ọ be fodẹ eware idhere riẹ kẹ?

◻Didi owha-iruo Ileleikristi a wo kpahe eme ọ idhere?

◻Didi ekwakwa esa i re fiobọhọ kẹ Oleleikristi riẹ oware nọ ọ rẹ ta gbe onọ ọ rẹ ta ha?

[Pictures on pages 20, 21]

Jihova ọ be rehọ ẹkwoma Ẹme riẹ dhesẹ eware ididi via