Enọ I bi Se Ebe Mai A Nọ Inọ

Fikieme Isẹri Jihova A Gbẹ Rọ Iwoho Hayo Emema Gọ Egagọ họ?

Wariẹ akpọ na họ, ahwo egagọ Hindu, Buddha, Kathọlik, gbe ichọche efa sa-sa a rehọ iwoho hayo emema wọhọ eware nọ i wuzou gaga evaọ egagọ rai. Evaọ abọjọ Africa, ahwo a re kiguẹ kẹ emema ire hayo itho nọ a kare, enọ a rehọ wọhọ eghẹnẹ rai.

Wo ohẹriẹ, Isẹri Jihova a rẹ rọ uwoho hayo ẹmema ọvuọvo gọ egagọ họ. Who te kpohọ Ọgwa Uvie rai nọ a rẹ jọ kuomagbe kẹ egagọ, whọ rẹ ruẹ iwoho hayo emema ahwo nọ a re se erezi hayo erọ Jesu hayo Meri hi.a Fikieme? Muẹrohọ oware nọ Ebaibol e ta kpahe ẹme nana.

Eme Ọghẹnẹ O Rẹro Riẹ mi Emọ Izrẹl?

Nọ Jihova Ọghẹnẹ o siwi emọ Izrẹl no Ijipti no, ọ kẹ rai ọkpọvio ovevẹ kpahe oghẹrẹ nọ ọ gwọlọ nọ a rẹ rọ gọe. Ujaje avivẹ evaọ usu Izi Ikpe na o ta nọ: “Whọ kare ẹdhọ ọvuọvo kẹ oma ra ha, hayo ithatho oware nọ o rọ obọ ehru, hayo oware nọ o rọ obọ otọ akpọ, hayo oware nọ o rọ obọ otọ ame eva otọ akpọ; who ruwẹ kẹ ae he, whọ gọ ae gbe he; keme mẹ họ ỌNOWO na Ọghẹnẹ ra mẹ Ọghẹnẹ ọre-ihri.”—Ọnyano 20:4, 5.

Nọ Ọghẹnẹ ọ jẹ rehọ izi nana kẹ Mosis evaọ obọ ehru ugbehru, yọ emọ Izrẹl a rrọ obotọ ru ẹmema ọmọ-eruẹ, ẹsejọhọ be gwọlọ rọ aro kele ahwo Ijipti nọ e rẹ gọ erao. A rọ odẹ ẹdhọ Ijipti se ẹmema na ha. Ukpoye, odẹ egagọ Jihova a se fihọ iẹe uzou. (Ọnyano 32:5, 6) Eme Ọghẹnẹ o ru kpahe onana? Eva e dha riẹ gaga kpahe ahwo nọ a ruwẹ kẹ ẹmema na, Mosis ọ tẹ raha iẹe no.—Ọnyano 32:9, 10, 19, 20.

Oke jọ o vrẹ no, Jihova ọ tẹ kẹ oruvẹ ọfa kpahe ujaje avivẹ na. Ọ rọ ẹkwoma Mosis kareghẹhọ emọ Izrẹl inọ a “ru oma [hayo, ẹmema] nọ a kare rọ kẹ oma rai [hi], nọ utho oware jọ, nọ o rẹ te wọhọ ọzae hayo aye, nọ u re ti tho arao jọ eva akpọ na, hayo ọvra nọ ọ rẹ ra eva ehru, nọ u re ti tho oware jọ nọ u re siẹ eva otọ, oware nọ u reti tho iyei jọ eva obọ ame otọ akpọ na.” (Iziewariẹ 4:15-18) U re vevẹ, emọ Izrẹl a rẹ rehọ oghẹrẹ ẹmema ọvuọvo gọ Ọghẹnẹ hẹ.

Ghele na, emọ Izrẹl a kieruọ edhọgọ uwhremu na. Re ọ ruẹse kpọ ae họ, Jihova o vi eruẹaro nyae vẹvẹ ae unu kpahe uye nọ u ti no edhọgọ nọ a duomahọ na ze. (Jerimaya 19:3-5; Emọs 2:8) Orẹwho Izrẹl o gaviezọ kẹ unuovẹvẹ Ọghẹnẹ hẹ. Fikiere Jihova ọ tẹ kẹ uvẹ nọ ahwo Babilọn a rọ raha Jerusalẹm je mu orẹwho na kpohọ igbo evaọ 607 B.C.E.—2 Iruẹru-Ivie 36:20, 21; Jerimaya 25:11, 12.

Eme Ileleikristi Ikpe-Udhusoi Ọsosuọ A Rọwo?

Nọ ahwo erẹwho efa nọ e jẹ gọ edhọ vẹre a zihe ruọ Ileleikristi evaọ ikpe-udhusoi ọsosuọ, a ruabọhọ eroruiruo emema ha. Muẹrohọ ẹme nọ Demetriọus, odhogu isiliva nọ ọ jẹ hai ru emema evaọ Ẹfẹsọs ọ ta kpahe usiuwoma ota Pọl ukọ na: “Ahwo mẹ, wha riẹ nọ fiki iruo enana ma je wo ọruẹriọ mai. Whaọ wha ruẹ je bi yo re, orọnọ evaọ Ẹfẹsọs ọvo gbehe rekọ tobọ komodẹ re onya Esia kpobi duwu no, Pọl ọnana ọ jẹ lẹliẹ ahwo buobu họ nọ a je kurẹriẹ, annọ eyena e rọ eghẹnẹ ọvuọvo ho enọ a rehọ abọ ru na.”—Iruẹru Ikọ Na 19:25, 26.

Eme nọ Pọl omariẹ ọ ta i dhesẹ inọ ẹme nọ Demetriọus ọ ta kpahe uwuhrẹ riẹ na ginọ uzẹme. Okenọ ọ jẹ ta ẹme kẹ ahwo Griki evaọ Athẹns, Pọl ọ ta nọ: “Ma gbẹ hẹ sai roro nọ ẹkoma Ọghẹnẹ ọ wọhọ oro, hayo idọlọ-efuafo, hayo utho ho, enọ ahwo arehọ fiki eriariẹ rai kare. Ọghẹnẹ o ri oke ogbori oyena vo no; fikiere enẹna o juzi kẹ ahwo evaọ koria koria nọ a kuevarẹriẹ.” (Iruẹru Ikọ Na 17:29, 30) Nọ Pọl o je kere se Ileleikristi obọ Tẹsalonika o jiri rai kpahe onana, inọ: “Wha . . . kurẹriẹ bru Ọghẹnẹ ze siọ edhọ ba.”—1 Ahwo Tẹsalonika 1:9.

U te no Pọl no, Jọn ukọ na ọ vẹvẹ Ileleikristi unu re kpahe eroruiruo emema evaọ egagọ. Evaọ ubrobọ ekuhọ ikpe-udhusoi ọsosuọ, Jọn ọ vẹvẹ rai unu nọ: “Wha si oma rai no edhọ-egọ.”—1 Jọn 5:21.

Isẹri Jihova a rri rie nọ u dhesẹ areghẹ hẹ re a rri uzi Ọghẹnẹ nọ o ta nọ a rọ ẹmema ọvuọvo gọe he na vo. A se ẹme Jihova na gboja nọ ọ ta nọ: “Mẹ họ [Jihova, NW], oyehọ odẹ mẹ; mẹ rẹ rehọ oro mẹ kẹ omọfa ha, hayo rehọ ejiro mẹ kẹ edhọ nọ a kare he.”—Aizaya 42:8.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 27]

“Mẹ họ [Jihova, NW], oyehọ odẹ mẹ; mẹ rẹ rehọ oro mẹ kẹ omọfa ha, hayo rehọ ejiro mẹ kẹ edhọ nọ a kare he.”—Aizaya 42:8