UWUHRẸ AVỌ 19

Kọ Isẹri Jihova Yọ Ileleikristi Uzẹme?

Onọ A Printi

U mu omai Isẹri Jihova ẹro nọ mai yọ Ileleikristi uzẹme. Fikieme ma rọ ta ere? Roro kpahe oria nọ eware nọ ma rọwo i no ze, odẹ mai, gbe uyoyou nọ ma wo kẹ ohwohwo.

1. Diẹse Isẹri Jihova a be rehọ eware nọ a rọwo no ze?

Jesu ọ ta nọ: “Ẹme [Ọghẹnẹ] uzẹme.” (Jọn 17:17) Wọhọ Jesu, Ẹme Ọghẹnẹ Isẹri Jihova a be rehọ eware nọ a rọwo no ze. Dai roro kpahe ikuigbe mai evaọ oke mai nana. Evaọ etoke ikpe 1870, utu ahwo jọ a te mu Ebaibol na họ ẹkiẹriwi kẹ omarai. Yọ eware nọ a jariẹ kiẹ via eye a rọwo dede nọ i wo ohẹriẹ no iwuhrẹ ichọche. A te je mu amọfa họ ẹvuẹ kpahe eware nọ a jọ Ebaibol wuhrẹ na.a

2. Kọ fikieme ma bi ro se omamai Isẹri Jihova?

Jihova o se ahwo nọ a be gọe isẹri riẹ keme a be vuẹ amọfa uzẹme na kpahe ọyomariẹ. (Ahwo Hibru 11:4–12:1) Wọhọ oriruo, Ọghẹnẹ ọ ta kẹ ahwo riẹ evaọ oke anwae nọ: “Whai họ isẹri mẹ.” (Se Aizaya 43:10.) A se Jesu “Osẹri nọ A re Fievahọ na.” (Eviavia 1:5) Fikiere evaọ ukpe 1931, ma tẹ rehọ odẹ na Isẹri Jihova. Eva e be were omai nọ a bi ro se omai odẹ nana.

3. Ẹvẹ Isẹri Jihova a be rọ rehọ aro kele Jesu dhesẹ uyoyou?

Jesu o you ilele riẹ ga te epanọ aikpobi a rọ jọ wọhọ ahwo uviuwou ọvona. (Se Mak 3:35.) Ere ọvona Isẹri Jihova nọ e rrọ akpọ na soso a rrọ uviuwou ovona. Oyejabọ nọ ma re ro se ohwohwo brọda gbe sista na. (Filimọn 1, 2) Ma te je bi koko ujaje nana: “Wha you inievo na kpobi.” (1 Pita 2:17) Mai Isẹri Jihova ma bi dhesẹ uyoyou nana evaọ idhere buobu, ma re fiobọhọ kẹ ibe eg’Ọghẹnẹ mai nọ eware e rrọ gaga kẹ evaọ akpọ na soso.

GBE WUHRẸ EWARE EFA

Wuhrẹ ziezi kpahe iku Isẹri Jihova re whọ gbẹ ruẹ eware efa nọ i dhesẹ nọ mai ginọ Ileleikristi uzẹme.

Iwoho: Isẹri Jihova nọ e be ta usi uwoma. 1. Oniọvo-ọmọtẹ jọ nọ o se oria Ebaibol jọ kẹ aye jọ jẹ be ta ẹme kpahe iẹe kẹe. 2. Oniọvo-ọmọzae jọ nọ ọ be ta ẹme no Ebaibol ze kẹ ọmọzae jọ kẹle oware nọ a re fi ebe họ ghelie. — Ebaibol na Ileleikristi uzẹme a rẹ rọ eware nọ a rọwo no ze, yọ a rẹ vuẹ amọfa eware nana

4. Ebaibol na ma rehọ eware nọ ma rọwo no ze

Jihova ọ ta fihotọ nọ otoriẹ uzẹme Ebaibol u ti dhe evevẹ. Se Daniẹl 12:4 avọ ẹme obotọ riẹ, kẹsena wha vẹ ta ẹme kpahe onọ nana:

Eme ọ “te dafia” evaọ udevie ahwo Ọghẹnẹ fikinọ a be romatotọ kiẹ Ebaibol na?

Rri epanọ utu Emọ-Uwuhrẹ Ebaibol jọ nọ Charles Russell ọ jọ usu rai a je ro wuhrẹ Ẹme Ọghẹnẹ. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

IVIDIO: Epanọ A rọ Wariẹ Duku Uzẹme Ebaibol Na (7:45)

Evaọ ividio na, ẹvẹ Charles Russell avọ amọfa nọ a gbe je wuhrẹ Ebaibol na a je ro wuhrẹ iẹe?

Kọ whọ riẹ?

Evaọ ẹsejọ, ma nwene eware jọ nọ ma rọwo no. Fikieme? Wọhọ epanọ oria kpobi u re dhe evevẹ nọ ọre ọ tẹ be va ze na, ere Ọghẹnẹ o bi fiobọhọ kẹ omai nọ otoriẹ Ẹme riẹ nọ ma bi wo u bi ro dhe evevẹ re. (Se Itẹ 4:18.) Fikiere dede nọ Ebaibol na o re nwene he, ma re nwene eware nọ ma rọwo nọ otoriẹ mai u bi vẹ na.

5. Ma bi ru odẹ mai na gba

Fikieme ma ro se omamai Isẹri Jihova? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

IVIDIO: Odẹ nọ U Dhesẹ Ahwo nọ Ma Rrọ (2:40)

Fikieme odẹ na, Isẹri Jihova o ro fo omai?

Fikieme Jihova ọ rọ salọ ahwo re a jọ Isẹri riẹ? Re a vuẹ amọfa nọ Ọye họ Ọghẹnẹ uzẹme na, keme ahwo a ta erue buobu kpahe iẹe no. Joma ta ẹme kpahe erue ivẹ itieye na jọ.

Egagọ jọ a re wuhrẹ ahwo rai nọ Ọghẹnẹ ọ gwọlọ nọ a rọ emema rọ gọe. Rekọ, se Iruo-Izerẹ 26:1, kẹsena wha vẹ ta ẹme kpahe enọ nana:

Eme Ebaibol ọ ta kpahe onana? Ẹvẹ Jihova o rri emedhọ?

Isu egagọ jọ a re wuhrẹ ahwo rai nọ Jesu họ Ọghẹnẹ. Rekọ, se Jọn 20:17, kẹsena wha vẹ ta ẹme kpahe enọ nana:

Eme Ebaibol ọ ta kpahe onana? Kọ Ọghẹnẹ avọ Jesu yọ omọvo na?
Kọ o were owhẹ nọ Jihova o vi Isẹri riẹ re a vuẹ ahwo uzẹme na kpahe ọyomariẹ gbe Ọmọ riẹ? Fikieme whọ rọ ta ere?

6. Ma you ohwohwo

Ebaibol na ọ rehọ Ileleikristi rọ wawo abọ sa-sa ugboma ohwo-akpọ. Se 1 Ahwo Kọrint 12:25, 26, kẹsena wha vẹ ta ẹme kpahe enọ nana:

Eme Ileleikristi uzẹme a re ru nọ ibe Ileleikristi rai a tẹ be ruẹ uye?
Ẹvẹ whọ rẹ sai dhesẹ uyoyou nọ o rrọ udevie Isẹri Jihova?

Isẹri Jihova nọ e rrọ akpọ na soso a rẹ daoma fiobọhọ nọ Isẹri Jihova nọ e rrọ abọ jọ akpọ na a tẹ be ruẹ uye. Re whọ ruẹ oriruo jọ, kporo IVIDIO na. Kẹsena wha vẹ ta ẹme kpahe onọ nọ ọ rrọ obotọ na.

IVIDIO: Ofou Ọwhibo nọ A Se Matthew Ọ Tehe Haiti (5:29)

Ẹvẹ ogbo nọ Isẹri Jihova a be hae dhẹ u ro dhesẹ nọ a wo uyoyou?

Isẹri Jihova ivẹ nọ i bi fiobọhọ kẹ aye jọ avọ ọmọzae riẹ nọ okpẹtu o te oma. A be rọ eblankete ro wowo ai jẹ kẹ ae emamọ ame da. — Ileleikristi uzẹme a re dhesẹ uyoyou kẹ ahwo nọ eware e rrọ gaga kẹ

AHWO JỌ A RẸ TA NỌ: “Isẹri Jihova yọ egagọ ekpokpọ.”

Anwọ oke vẹ Jihova o bi ro se ahwo nọ a be gọe isẹri?

EME WHO WUHRẸ NO?

Isẹri Jihova yọ Ileleikristi uzẹme. Mai yọ uviuwou ovo nọ o rrọ akpọ na soso be gọ Ọghẹnẹ. Ebaibol na eware nọ ma rọwo i no ze yọ ma rẹ vuẹ amọfa ohwo nọ Jihova ọ rrọ dẹẹ.