Ọ Hai ti Wo Ọjẹrehọ Ọghẹnẹ

Solomọn ọ jọ ọsẹ Rehoboam, yọ ikpe udhuvẹ Solomọn o su evaọ Izrẹl. (1 Iv. 11:42) Solomọn o whu evaọ ukpe 997 taure ekele oke mai na o te ti te. Kẹsena Rehoboam o te no Jerusalẹm kpobọ Shẹkẹm re a jọ obei rehọ iẹe mu ovie. (2 Irv. 10:1) Kọ who roro nọ Rehoboam ọ jẹ ruawa inọ ẹsejọhọ ọ te sai lele ithihi ọsẹ riẹ hẹ, ọnọ ọ jọ ovie nọ o wo areghẹ thesiwa? Rehoboam ọ riẹ hẹ inọ uviemenẹ o ti dhesẹvia sọ o wo areghẹ te epanọ ọ te sai ro ku ebẹbẹ sa-sa họ, maero kọ enọ e gwọlọ orimuo gaga.

Rehoboam ọ ruẹ nọ ẹbẹbẹ ologbo jọ ọ rrọ otọ. U kri hi, a te vi ahwo jọ ze te vuẹe oware jọ nọ ahwo nọ a rrọ otọ esuo riẹ a be ruawa kpahe. Ahwo na a ta kẹe nọ: “Ọsẹ ra o ru owha mai gbẹdẹ hrọ. Fikiere ru iruo gbe owha ogbẹgbẹdẹ ọsẹ ra vovo kẹ omai, re ma gba odibo kẹ owhẹ.”​—2 Irv. 10:​3, 4.

O gwọlọ nọ Rehoboam ọ rẹ salọ oware nọ o re ru. O te ru ẹgwọlọ ahwo na, tei te uviuwou riẹ gbe ogbẹgwae riẹ a te reakpọ kuoma te epanọ a gwọlọ họ, keme a ti si no owha ahwo na hayo eware nọ a je mi ai vẹre. Evaọ abọdekọ riẹ, ọ tẹ siọ ayare ahwo na, a rẹ sae wọso esuo riẹ. Kọ eme Rehoboam o ti ru na? Ọ kake nyabru ekpako na, enọ e jẹ hai kẹ Solomọn ọsẹ riẹ ohrẹ. Rekọ ọ rọwo ru oware nọ ekpako na a ta ha, ukpoye ọ gaviezọ kẹ emoha ibe riẹ, ọ tẹ jẹ rọ obọ ogaga su ahwo na. Ọ vuẹ ahwo na nọ: “Ọsẹ mẹ o ru owha rai gbẹdẹ, rekọ me re ti fihọ iẹe vi ere; ọsẹ mẹ ọ jẹ rehọ eviaviẹ fa owhai, rekọ mẹ rẹ te rehọ eviaviẹ-obi fa owhai.”​—2 Irv. 10:​6-14.

Eme onana u wuhrẹ omai? O rrọ oware areghẹ re ma hae gaviezọ kẹ ekpako nọ i wo eriwo Jihova evaọ ukoko na. Fikinọ a rọ ẹro ruẹ eware buobu no evaọ uzuazọ, a rẹ sae riẹ ẹbẹbẹ nọ o re no owojẹ jọ ze jẹ kẹ omai ohrẹ nọ u re fiobọhọ.​—Job 12:12.

Rehoboam o te koko egbaẹmo riẹ họ re a họre uvie erua-ikpe na. Rekọ Jihova o te vi Shimaya ọruẹaro riẹ nyae ta kẹe nọ: “Wha rẹ sae nya e họre ahwo Izrẹl imoni rai hi. Zihe ahwo na kpobi kpohọ ọvuwou riẹ, keme onana, obọ mẹ u nọze.”​—1  Iv. 12:​21-24.a

Kọ a ti du nyae họre he? Onana o te ginẹ kẹ Rehoboam uye gaga! Kọ ubiẹro vẹ a ti ro rri ọyomariẹ nọ ọ ta nọ ọ te “rehọ eviaviẹ-obi fa” ahwo na, nọ o gbe kpohọ ẹmo na ha? (Je rri 2 Iruẹru-Ivie 13:7.) O make jọ ere na, ovie na avọ ogbaẹmo riẹ “a yo ẹme ỌNOWO na, a te zihe kpo wọhọ epanọ ỌNOWO na ọ tae.”

Eme ma wuhrẹ no onana ze? O rrọ oware areghẹ re ma yoẹme kẹ Ọghẹnẹ, o tẹ make rọnọ u ti ru nọ ahwo a re ro se omai ẹkoko. Ma te bi yoẹme kẹ Ọghẹnẹ, u re ru eva were iẹe, je ru nọ ọ rẹ rọ ghale omai.​—Izie. 28:2.

Eme u no onana ze? Nọ Rehoboam ọ gaviezọ kẹ Ọghẹnẹ je zihe kpo no, ọ tẹ jẹ bọ ikpewho fihọ eria sa-sa evaọ ekwotọ Juda avọ Bẹnjamin nọ o je su. Ọ tẹ jẹ ruẹrẹ ikpewho efa ziezi, “o te ru ai gaga.” (2 Irv. 11:​5-12) Mai wuzou na, o ru lele izi Jihova evaọ etoke jọ. Evaọ okenọ uvie erua-ikpe nọ Jeroboam o je su na a kie ruọ edhọgọ, ibuobu ahwo na a te je kpobọ Jerusalẹm nyae gọ Jihova, u te ru uvie “Rehoboam ọmọzae Sọlomọn dọmu.” (2 Irv. 11:​16, 17) Enẹ ẹmeoyo o ro fiobọhọ kẹ Rehoboam nọ esuo riẹ ọ rọ dowọ muotọ.

Nọ esuo Rehoboam ọ dowọ muotọ no, o te ru oware uyoma jọ. Ọ nyasiọ izi Ọghẹnẹ ba, o te mu ẹdhọ họ ẹgọ. Fikieme Rehoboam ọ rọ jẹ owọ nana? Kọ o sae jọnọ ọ jẹ gaviezọ kẹ oni riẹ nọ ọ jọ ohwo Ammọn? (1 Iv. 14:21) Oghẹrẹ kpobi nọ o jọ kẹhẹ, ahwo nọ a jọ otọ esuo riẹ a rọ aro kele iei. Fikiere, Jihova o te ru nọ ovie Ijipti nọ a re se Shishak ọ rọ vẹruọ Juda je fi ekwotọ riẹ buobu kparobọ dedenọ Rehoboam o ru ikpewho nana gaga!​—1 Iv. 14:22-24; 2 Irv. 12:1-4.

Eware i te ti yoma thesiwa nọ Shishak o te Jerusalẹm nọ Rehoboam o je su. Evaọ oke nana, Shimaya ọruẹaro na ọ tẹ vuẹ Rehoboam avọ ogba-esuo riẹ ẹme nọ o no obọ Ọghẹnẹ ze inọ: “Wha siọ omẹ, fikiere mẹ tẹ siọ owhai rọ kẹ Shishak.” Eme Rehoboam o ru kpahe ọwhọkuo nana? Ọ gaviezọ! Ebaibol na ọ ta nọ: “Kẹsena emezae-ivie gbe ovie Izrẹl a tẹ rehọ oma kpotọ a tẹ ta nọ, ‘ỌNOWO na o kiẹrẹe.’” Fikiere Jihova o te siwi Rehoboam gbe ahwo Jerusalẹm no araha nọ ọ hai ti tei.​—2 Irv. 12:5-7, 12.

Rehoboam ọ gbẹ jọ osu uvie obọze ovatha-ọre nọ oyena o vrẹ no. Taure o te ti whu, ọ ghale eware kẹ emezae riẹ buobu, re a gbẹ wọso Abaija ha, ọsọvo rai nọ ọ te rehọ ẹta ọsẹ na nọ o te whu no. (2 Irv. 11:21-23) Rehoboam ọ jọ onana dhesẹ oghẹrẹ orimuo nọ o dhesẹ vẹre he evaọ okenọ u kpemu.

Dede nọ Rehoboam o ru eware iwoma jọ, o wo ọjẹrehọ Ọghẹnẹ hẹ. Evaọ ekuhọ isuẹsu riẹ, Ebaibol na ọ ta kpahe iẹe nọ, o “ru umuomu.” Evaọ oghẹrẹ vẹ? “O fi eva riẹ họ gwọlọ ỌNOWO na ha.”​—2 Irv. 12:14.

Muẹrohọ oware nọ o via kẹ Rehoboam na. Ọ gaviezọ kẹ Ọghẹnẹ ẹsejọ. Yọ o tube ru eware iwoma jọ kẹ ahwo Ọghẹnẹ. Rekọ o mu usu okpekpe kugbe Jihova ha. Fikiere o te je ru eware iyoma, je mu edhọ họ ẹgọ. Ma sae nọ omamai nọ: ‘Okenọ Rehoboam ọ gaviezọ kẹ ọwhọkuo Jihova na, kọ o sae jọnọ fikinọ o gine kurẹriẹ jẹ gwọlọ ru oreva Ọghẹnẹ manikọ fikinọ amọfa a ta kẹe nọ o ru ere?’ (2 Irv. 11:​3, 4; 12:6) Evaọ ubrobọ ekuhọ uzuazọ riẹ, o te je ru eware nọ i yoma evaọ aro Ọghẹnẹ. Rehoboam o wo ohẹriẹ gaga no ọsẹ-ode riẹ, Devidi ovie Izrẹl oke anwae na. U wo okejọ nọ Devidi o ruthọ, rekọ evaọ uzuazọ riẹ kpobi o you Jihova, ọ roma kẹ egagọ uzẹme, jẹ rọ eva efuafo kurẹriẹ no izieraha riẹ.​—1 Iv. 14:8; Ol. 51:1, 17; 63:1.

Ma rẹ sai wuhrẹ eware jọ no iku Rehoboam na ze. U woma re ohwo ọ rẹrote uviuwou riẹ je ru eware sa-sa nọ i wuzou evaọ uzuazọ. Rekọ re Jihova ọ sae jẹ omai rehọ, o gwọlọ nọ ma rẹ rọ egagọ riẹ karo je wo usu okpekpe kugbei.

Ma rẹ sai ru onana nọ ma te wo uyoyou udidi kẹ Jihova. Wọhọ epanọ o gwọlọ nọ ma rẹ hai fi ire họ erae re e seba efu na, ere o gwọlọ nọ ma rẹ hai se Ebaibol na, roro didi kpahe eware nọ ma se, jẹ lẹ kẹse kẹse re uyoyou mai kẹ Jihova o ruẹsi dhe ẹgẹga. (Ol. 1:2; Rom 12:12) Uyoyou nana u ve ti ru nọ ma te rọ gwọlọ ru eva were iẹe evaọ oware kpobi nọ ma bi ru. O te jẹ wọ omai kurẹriẹ nevaze nọ ma te ruthọ. Ma te jọ wọhọ Rehoboam ho, ukpoye ma ti wo emamọ usu kugbe Jihova je kruga ziezi evaọ egagọ riẹ.​—Jud 20, 21.