“Ono O Fi Areghẹ Họ Ẹgho Obọ Ehru Na”?

“NỌ WHA ruẹ ẹgho nọ ọ vaze obọ ukiediwo ọre, wha vẹ nwane ta nọ, ‘Oso ọ be tha’; u ve ghine ru ere. Nọ wha ruẹ ofou nọ ono obọze akpọ ze, wha vẹ ta nọ, ‘Uvo o rẹ te rowa gaga’; o vẹ ghinẹ jọ ere.” Eme ọ Jesu enana, enọ Luk okere Usiuwoma na o kere, e rọ oriruo ahwo nọ a jẹ hae ruẹaro ehru evaọ Palẹstain anwae. (Luk 12:54, 55) Evaọ iyero jọ, ahwo anwae a rẹ sai rri ehru na a vẹ fodẹ oware nọ o be te via gbagba.

Nẹnẹ, ahwo nọ a wuhrẹ kpahe ehru na a be rehọ ekwakwa ona ruiruo, wọhọ satellite nọ a re ro rri eghelie akpọ na, Doppler radar, gbe kọmputa ona, re a rri epanọ ehru na ọ te jọ evaọ oke krẹkri. Rekọ irẹro rai e rẹ thọ ẹsebuobu. Fikieme?

Eware buobu i re ru ẹgbagba eruẹaruẹ ehru na bẹbẹ. Wọhọ oriruo, ehru nọ o re nwene idudhe, ẹroro, ẹgba ofou, gbe edhadhẹ ofou gbe ofẹ nọ o be dhẹ riwi e rẹ wha idhọvẹ họ ẹme na. Fiba enana họ ẹnyonya ona ọre, ẹgho, gbe abade, nọ ekiotọ-eriariẹ a re riẹ vọvọ họ. Fikiere, eruẹaruẹ ehru o gbẹ rọ otọkiẹ-eriariẹ nọ o gbunu hu.

Eriariẹ ekakao ohwo kpahe ehru na o kareghẹhọ omai onọ nọ Job ọ nọ: “Ono o yẹ ewhrọwhrọ na? Edhede ono ekpalekpa-ame na i nọze? . . . Kọ whọ sae kpare uvo ra te obọ igho, re ame owhe o ti le owhẹ no? . . . Ono o dhesẹ areghẹ kẹ igho obọ ehru, hayo kọ ono ọ kẹ igrigri na eriẹariẹ? Ono ọ rẹ sai kele igho obọ ehru fiki areghẹ nọ o wo? Hayo kọ ono ọ rẹ sai jẹlẹ eviẹ-ame obọ ihru?”—Job 38:28-37.

Uyo enọ enana kpobi họ, Orọnikọ ohwo ho rekọ Jihova Ọghẹnẹ. Ẹhẹ, epanọ ahwo-akpọ a roro nọ a w’areghẹ te kẹhẹ, areghẹ Ọnọma omai o mae rro. O ghinẹ rọ uyoyou kẹe inọ o ru areghẹ otiọye na via k’omai evaọ ewẹre Ebaibol na, re ma sai wo obokparọ.—Itẹ 5:1, 2.