Si Kẹle Ọghẹnẹ

‘Iruo Abọ Ra I Ti Si Owhẹ Urru’

O RẸ da gaga nọ ohwo ọ tẹ ruẹ ohwo nọ o you nọ ọ rrọ edada, be riakọ bẹsenọ o re whu. Ọvabọvro otiọye na o rẹ kẹ uweri. Rekọ o rrọ oware omosasọ inọ Ọnọ ọ ma omai, Jihova Ọghẹnẹ, ọ riẹ epanọ onana o rẹ kẹ uweri te. Tubẹ mai woma na, o rrọ isiuru riẹ re ọ rọ ogaga riẹ kpare ahwo nọ a whu no ze. Muẹrohọ ẹruore nọ o dhesẹ oma via evaọ eme ọ Job nọ e rrọ obe Job 14:13-15.

Roro kpahe oware nọ o wọ riẹ ta ẹme yena. Job, ọzae nọ o wo ẹrọwọ gaga na ọ rẹriẹ ovao dhe edawọ egaga—ekwakwa efe riẹ kpobi i vru, emọ riẹ kpobi i whu, o te je kie ẹyao ọgaga. Nọ ebẹbẹ e gae oma raha no, o te bo se Ọghẹnẹ nọ: “O, eme who gbe si omẹ no obọ Ẹriwi hi!” (Owọ avọ 13) Job o rri uki fihọ oria nọ o re jo wo ufuoma no uye-oruẹ. Job ọ riẹ inọ o ti wo ufuoma no ebẹbẹ gbe edada evaọ obei, wọhọ okwakwa oghaghae nọ Ọghẹnẹ o si no hayo ko dhere họ oria.a

Kọ Job ọ te jọ uki bẹdẹ bẹdẹ? Job ọ riẹ nọ ere o te jọ họ. Ọ ta haro evaọ olẹ riẹ inọ: “Re who fi oke họ kẹ omẹ, re whọ kareghẹhọ omẹ!” Job o wo imuẹro inọ ọ te jọ uki ribri hi, inọ ọ te thọrọ Jihova ẹro ho. Job ọ rehọ oke nọ ọ te jọ uki na wọhọ “edẹ odibo-ọgba”—oke nọ o gbahọ nọ ọ rẹ jọ evaọ uki hẹrẹ. Ẹvẹ ohẹrẹ nana u ti kri te? Ọ ta nọ: “Bẹsenọ who re siobọno omẹ.” (Owọ avọ 14) Ẹkparomatha no uwhu ze họ obusino yena!

Fikieme u ro mu Job ẹro inọ ọ te sai no uki ze? Keme ọ riẹ isiuru nọ Ọnọ ọ ma omai o wo kpahe idibo riẹ nọ i wo ẹrọwọ nọ i whu no. Job ọ ta nọ: “Oke kpobi nọ who he se, mẹ hai yo kẹ owhẹ; iruo abọ ra i veti si owhẹ uru.” (Owọ avọ 15) Job o vuhumu inọ ọyomariẹ yọ iruo abọ Ọghẹnẹ. Ọnọ ọ kẹ Job uzuazọ na ọ rẹ sae kpare iẹe ziọ uzuazọ nọ o te whu.—Job 10:8, 9; 31:15.

Eme ọ Job i wuhrẹ omai inọ Jihova o wo uyoyou gaga: O wo uyoyou udidi kẹ ahwo nọ, wọhọ Job, a rehọ omarai kẹe re o wuhrẹ ae fihọ oghẹrẹ ahwo nọ ọ gwọlọ nọ a jọ, wọhọ epanọ ọmebẹ ọ rẹ ma ẹbẹ fihọ oghẹrẹ nọ ọ gwọlọ na. (Aizaya 64:8) Jihova o rri idibo riẹ nọ i wo ẹrọwọ ghaghae. O wo ‘isiuru’ kpahe ẹkpare ze idibo riẹ nọ e dadamu usu rai kugbei nọ i whu no. Ọgba-uwuhrẹ jọ ọ ta nọ ẹme Hibru nọ a fa nọ “si owhẹ uru” na, “yọ ovojọ evaọ usu eme nọ e mai wo ẹgba nọ a re ro dhesẹ isiuru nọ ohwo o wo kẹ oware.” Ẹhẹ, orọnọ Jihova ọ rẹ kareghẹhọ idibo riẹ ọvo ho, rekọ o wo isiuru nọ ọ rẹ rọ kpare ai no uwhu ze.

O rrọ oware evawere inọ evaọ obe Job—ovo jọ evaọ usu ebe Ebaibol na nọ a kaki kere—Jihova ọ fere ẹjiroro riẹ nọ ọ te rọ kpare enọ i whu no via.b Ọ gwọlọ nọ whọ rẹ wariẹ ruẹ jẹ reawere uzuazọ kugbe iyoyou ra nọ i whu no. Ẹruore yena ọ rẹ sai ru edada ọvabọvro na kpotọ omojọ. Kọ u gbe fo re who wuhrẹ kpahe Ọghẹnẹ oyoyou nana gbe epanọ whọ sae rọ rehọ omara kẹe re o fi obọ họ kẹ owhẹ jọ oghẹrẹ ohwo nọ ọ te rọ ẹro ruẹ orugba ẹjiroro riẹ?

[Oruvẹ-obotọ]