Emaha Na, Wha Jiri Jihova!

“Jiri Ọnowo no otọ akpọ ze, whai . . . emoha na gbe ighele emetẹ na!” —Olezi 148:7, 12.

 1, 2. (a) Eghẹrẹ awhaha vẹ emaha buobu na a riẹ ziezi nọ a fihọ kẹ ai? (b) Fikieme u gbe fo re emaha na a veghe uzou hu fiki awhaha nọ esẹgbini rai a fihọ kẹ ai?

ẸSIBUOBU emaha na a rẹ kareghẹhọ eware nọ a re kẹ ai uvẹ nọ a ru hu. Ibuobu rai a rẹ nwane vuẹ owhẹ unuikpe nọ a ta kẹ ae inọ a rẹ kpako te re ae ọvo a tẹ fa edhere vrẹ hayo re a tẹ kẹ ai uvẹ riaro krẹkri evaọ aso hayo re a te mu omoto họ ẹdhẹ. Ẹsejọ, uzoge ọ sai roro nọ uyo ovona wọhọ, “Hẹrẹ bẹsenọ whọ rẹ kpako te no” oye a be kpahe kẹ ayare riẹ buobu.

² Emaha na, wha riẹ nọ esẹgbini rai a ruẹ nọ u woma re a fi awhaha itieye na họ kẹ owhai, ẹsejọhọ rọkẹ ọthọwẹ rai. Wha ginẹ riẹ re inọ o rẹ were Jihova nọ wha te bi yo ẹme kẹ esẹgbini rai. (Ahwo Kọlọsi 3:20) Kọ o rrọ owhẹ iroro nọ awhaha nana u dhesẹ inọ uzuazọ ra u ri gine muhọ họ? Kọ a be whaha owhẹ eruo eware nọ i wuzou kpobi bẹsenọ whọ rẹ kpako te no? O rrọ ere vievie he! Iruo jọ e riẹ nọ e be nyaharo nẹnẹ nọ i wuzou gaga vi uvẹ oware jọ kpobi nọ whọ rẹ sae hẹrẹ. Kọ a kẹ owhai emaha na uvẹ re wha jọ iruo nana wobọ? Ẹme uvẹ-okẹ ma gbẹ be ta na ha—Ọghẹnẹ, Ọnọ Ọ Mae Rro na o zizie owhai nọ wha wobọ evaọ iruo nana!

 3. Uvẹ-iruo obọdẹ vẹ Jihova o zizie emaha na kẹ, kọ enọ vẹ ma be te ta ẹma kpahe na?

³ Iruo vẹ ma be ta ẹme kpahe na? Muẹrohọ eme ikere nọ a rehọ uzoẹme uwuhrẹ nana no ze na: “Jiri Ọnowo no otọ akpọ ze, whai . . . emoha na gbe ighele emetẹ na te ekpako na te emaha na!” (Olezi 148:7, 12) Uvẹ ulogbo u rovie fihọ kẹ owhẹ no na: Whọ sai jiri Jihova. Wọhọ ọmoha, kọ oma u gbe bi mu owhẹ re who wo abọ evaọ iruo yena? Oma u bi mu emoha buobu. Re ma ruẹ oware nọ o soriẹ nọ oma u je mu ohwo oghẹrẹ utioye, joma ta ẹme kpahe enọ esa jọ. Orọ ọsosuọ, fikieme u je fo nọ who jiri Jihova? Orọ avivẹ, ẹvẹ whọ sai ro jiri ei ziezi? Orọ avesa, oke vẹ u fo nọ a re ro mu Jihova họ ejiri?

Fikieme A je Jiri Jihova?

 4, 5. (a) Wọhọ epanọ o rrọ Olezi avọ 148 na, oghẹrẹ uyero igbunu vẹ ma rrọ? (b) Ẹvẹ emama nọ i wo iroro ho, nọ e rẹ sae ta ẹme gbe he a sai ro jiri Jihova?

⁴ Ẹjiroro obọdẹ nọ a re ro jiri Jihova họ fikinọ ọye họ Ọnọma. Olezi avọ 148 u fi obọ họ kẹ omai vuhu uzẹme nana mu. Dai roro iei: Otẹrọnọ whọ nya ku utu ahwo jọ nọ a be rehọ uru ọvo so emamọ ole isiuru jọ, ẹvẹ oma u re ru owhẹ? Kọ ẹvẹ otẹrọnọ eme ole na yọ eware nọ whọ riẹ inọ e ginẹ rrọ uzẹme, eware nọ i wuzou, nọ i re siuru jẹ kẹ ohwo evawere? Kọ whọ gbẹ te gwọlọ wuhrẹ ole na ziezi re who ku oma gbe so iẹe? Ibuobu mai a re ru ere. Whaọ Olezi avọ 148 o dhesẹ nọ whọ rrọ oghẹrẹ uyero nọ u thọ oyena rekinọ u woma vi ere thethabọ. Olezi na o dhesẹ ogbotu obuobu jọ nọ ọ be rehọ uru ovo jiri Jihova. Rekọ nọ who bi ti se olezi yena, whọ sai muẹrohọ oware aghẹruẹ jọ. Eme ọye?

⁵ Eware buobu nọ a dhesẹ evaọ Olezi avọ 148 nọ i bi jiri Jihova na a wo iroro ho yọ a rẹ sae ta ẹme gbe he. Wọhọ oriruo, ma se kpahe ọre, ọvẹre, isi, ekpalekpa-ame, ifou, igbehru itho, gbe igbehru kpobi inọ i bi jiri Jihova. Ẹvẹ eware nọ i wo uzuazọ họ e sai ro jiri Jihova? (Owọ avọ 3, 8, 9) Uzẹme, oghẹrẹ ovona nọ ire, emama nọ e rrọ abade, gbe erao a bi ro jiri ei na. (Owọ avọ 7, 9, 10) Kọ who rri ọre nọ o bi kie diwi no ẹdẹjọ avọ erru nọ ọ whẹ homa hayo ọvẹre nọ o ghelie họ no nọ ọ be dhẹ wariẹ evaọ idedeghe nọ isi e vọ na? Kọ erao ivẹ nọ e be zaharo a fou owhẹ h’ohwẹ no ẹdẹjọ, manikọ akpọ o gbowhẹ unu no ẹdẹjọ nọ whọ ruẹ oria jọ nọ u wo erru gaga? O tẹ rrọ ere kiyọ who “yo” edo ile emama no. Eware nọ Jihova ọ ma kpobi e rẹ kareghẹhọ omai inọ ọye họ Ọnọma oride na, gbe inọ ohwo ọvuọvo ọ rrọ ehrugbakpọ na ha nọ o wo ẹgba, je wo areghẹ, hayo uyoyou tei.—Ahwo Rom 1:20; Eviavia 4:11.

 6, 7. (a) Emama vẹ nọ i wo areghẹ Olezi avọ 148 o dhesẹ nọ i bi jiri Jihova? (b) Fikieme oma o jẹ sae wọ omai jiri Jihova? Kẹ iriruo.

⁶ Olezi avọ 148 na o te je dhesẹ inọ emama nọ i wo areghẹ i bi jiri Jihova. Ma jọ owọ avọ 2 ruẹ nọ “ogbaẹmo” ikọ odhiwu Jihova a bi jiri ei. Evaọ owọ avọ 11, a zizie ikpahwo akpọ na gbe ahwo nọ a riẹ odẹ wọhọ ivie gbe ibruoziẹ re a kuomagbe ujiro na. Otẹrọnọ o rrọ oware evawere kẹ ijẹle na re a jiri Jihova, kọ ohwo-akpọ gheghe vẹ jọ ọ rẹ ta nọ ọ rro vi ohwo nọ o re ru ere? A jọ owọ avọ 12 gbe 13 zizie owhai emaha na re wha kuomagbe ogbotu nana jiri Jihova. Kọ oma o be kpakpa owhẹ re who ru ere?

⁷ Joma kẹ oriruo jọ. Otẹrọnọ who wo ogbẹnyusu ọkpekpe jọ nọ o wo ona obọdẹ jọ—ma rehọ iẹe nọ evaọ arozaha-ọjaja jọ, ona erru ọwhẹhọ eware hayo nọ ọ tẹ rrọ ọgbaile—kọ whọ gbẹ te ta ẹme kpahe iẹe kẹ ahwo uviuwou ra hayo egbẹnyusu ra efa? Whọ te se ere ba eru hu. Epọvo na re, ewuhrẹ kpahe eware kpobi nọ Jihova o ru o rẹ sae lẹliẹ omai ta ẹme kpahe iẹe kẹ amọfa. Wọhọ oriruo, Olezi 19:1, 2 o ta nọ idedeghe nọ e vọ avọ isi na e “rọ ẹme ẹta.” Rọkẹ omai, nọ ma te roro kpahe eware igbunu nọ Jihova o ru no, ma rẹ sae gba oma mai hi nọ ma gbẹ rọ ta eware nana kẹ amọfa ha.

 8, 9. Fiki ẹjiroro vẹ Jihova ọ rọ gwọlọ nọ ma jiri ei?

⁸ Ẹjiroro obọdẹ ọfa nọ ma re ro jiri Jihova họ, ọ gwọlọ nọ ma ru ere. Emejabọ? Fikinọ ọ gwọlọ ujiro mi ahwo-akpọ re u te dhesẹ nọ o te Ọghẹnẹ? Ijo. Mai ahwo-akpọ ma rẹ sae gwọlọ ujiro ẹsejọ, rekọ ere o rrọ kẹ Jihova vievie he, o kpehru vi ahwo-akpọ thethabọ. (Aizaya 55:8) O wo avro kpahe oghẹrẹ ohwo nọ ọ rrọ họ. (Aizaya 45:5) Dede na, ọ gwọlọ nọ ma jiri ei yọ o rẹ were iẹe nọ ma te ru ere. Fikieme? Roro kpahe ẹjiroro ivẹ jọ. Orọ ọsosuọ, ọ riẹ nọ u fo inọ ma jiri ei. Ọ ma omai avọ ẹgwọlọ kẹ eware abọ-ẹzi, ẹgwọlọ rọkẹ egagọ. (Matiu 5:3, NW ) O rẹ were Jihova nọ ọ tẹ ruẹ omai nọ ma bi ru ẹgwọlọ yena gba, wọhọ epanọ o rẹ were ọsẹgboni ra na nọ a tẹ ruẹ nọ whọ be re emu nọ a riẹ nọ o kiehọ owhẹ oma na.—Jọn 4:34.

⁹ Orọ avivẹ, Jihova ọ riẹ nọ u fo inọ amọfa a yo edo ujiro nọ ma bi jiri ei. Pọl ukọ na o kere eme nana se upelẹ ọzae na, Timoti inọ: “Sẹro oma ra gbe uwuhrẹ ra; yọrọ oyena ga, keme fiki ere oruo who re ro siwi oma ra gbe ahwo nọ a be kezọ ẹme ra.” (1 Timoti 4:16) Ẹhẹ, nọ who te bi wuhrẹ amọfa kpahe Jihova Ọghẹnẹ, bi jiri ei, a rẹ sae te riẹ kpahe Jihova re. Eriariẹ itieye na e rẹ sai ru ai wo usiwo ebẹdẹ bẹdẹ!—Jọn 17:3.

10. Fikieme oma o jẹ wọ omai jiri Ọghẹnẹ mai?

¹⁰ Ẹjiroro ọfa ọ riẹ nọ ma re ro jiri Jihova. Kareghẹhọ ogbẹnyusu ra nọ o wo ona ziezi nọ ma jọ ọtadhesẹ ta ẹme kpahe na. Who te yo nọ amọfa a be ta erue kpahe iẹe, be raha odẹ riẹ, kọ o gbẹ te jọ ọtamuo ra re who jiri ei hayo ta ẹme owoma riẹ vi epaọ ọsosuọ? Whaọ a jọ akpọ na soso ta Jihova raha no. (Jọn 8:44; Eviavia 12:9) Fikiere oma o be wọ ahwo nọ a you rie re a ta uzẹme kpahe iẹe kẹ amọfa rọ kpọ ọtaraha na vi. Kọ whọ gwọlọ dhesẹ uyoyou gbe ovuhumuo ra kẹ Jihova, je dhesẹ nọ whọ gwọlọ inọ ọye ọ rẹ jọ Osu ra, ukpọ Setan, ọwegrẹ ologbo riẹ na? Whọ sai ru oyena kpobi ẹkwoma Jihova nọ who re jiri. Rekọ onọ nọ u lele i rie họ, ẹvẹ whọ te sai ro ru ere?

Oghẹrẹ nọ Emaha jọ A ro Jiri Jihova No

11. Iriruo Ebaibol vẹ i dhesẹ nọ emaha na a rẹ sai jiri Jihova ziezi?

¹¹ Ebaibol na i dhesẹ nọ ẹsibuobu emaha na a rẹ riẹ Jihova jiri ziezi. Wọhọ oriruo, u wo ọmọtẹ ọmaha Izrẹl jọ nọ ahwo Siria a mu kpohọ igbo. Ọ gbaudu se isẹri kẹ oni-uwou na kpahe Elaesha, ọruẹaro Jihova. Ẹme riẹ o su kpohọ iruo igbunu jọ nọ e jọ isẹri ruaro. (2 Ivie 5:1-17) Jesu ọ rehọ aruọwha se isẹri re evaọ okenọ ọ jọ ọmaha. Evaọ usu eware kpobi nọ o ru eva oke emaha, Jihova ọ salọ ọvuọvo jọ nọ a gbiku riẹ evaọ Ikereakere na. O jọ ọrọ okenọ ọ jọ ikpe 12 nọ ọ rọ gbaudu nọ isu egagọ na enọ evaọ etẹmpol obọ Jerusalẹm, onọ o lẹliẹ akpọ gbe ai unu fiki oghẹrẹ otoriẹ nọ o wo kpahe idhere Jihova.—Luk 2:46-49.

12, 13. (a) Omoke jọ u kiọkọ taure o te ti whu, eme Jesu o ru evaọ obọ etẹmpol na, kọ ẹvẹ onana u ro kpomahọ ahwo nọ a jọ etẹe? (b) Ẹvẹ Jesu o rri ubo ujiro nọ emaha na a je bo na?

¹² Nọ ọ kpako te ọzae no, Jesu o ru nọ emaha na a ro jiri Jihova re. Wọhọ oriruo, umutho edẹ jọ i kiọkọ re o te ti whu, Jesu ọ raha oke evaọ etẹmpol nọ e jọ obọ Jerusalẹm. Ebaibol na e ta nọ ọ jọ etẹe ru “eware urirẹ.” O le ahwo nọ a je zihe etẹmpol efuafo yena ruọ uwou iji ro otafe. O te je siwi emo gbe ahwo nọ a tuaro. Onana o hae te wọ ahwo kpobi nọ a jọ etẹe maero kọ isu egagọ na jiri Jihova gbe Ọmọ riẹ, Mesaya na. Rekọ u yoma gaga nnọ ahwo buobu nọ a jọ oke yena a kpare uru ajiri utioye vievie he. A riẹ nọ Ọghẹnẹ o vi Jesu ze rekọ a jẹ dhozọ isu egagọ na. Dede na, utu ahwo jọ a jariẹ nọ a ta ẹme avọ aruọwha. Kọ whọ riẹ ahwo yena? Ebaibol na e ta nọ: ‘Nọ ilori izerẹ gbe otu ikere-obe a ruẹ eware urirẹ nọ Jesu o ru, gbe emaha nọ i bi bo eva uwou egagọ-ode nọ, “Hosana kẹ Ọmọ Devidi!” Ofu o te mu ai; a tẹ ta kẹe Jesu nọ, “Who bi yo epanọ enana e rẹ ta na?” ’—Matiu 21:15, 16; Jọn 12:42.

¹³ Izerẹ yena a je roro nọ Jesu ọ te ta kẹ emaha nọ i je bo jiri ei na nọ a fibo. Kọ ere o ru? Vievie! Jesu ọ kpahe kẹ izerẹ na nọ: “E; wha ri se he, wha rẹ rehọ ejiro nọ o no unu emaha gbe emọ unuevie?” U re vevẹ, ubo ajiri emaha yena o were Jesu avọ Ọsẹ riẹ. Emaha yena a je ru oware nọ u fo nọ ekpako na a hai ru. Evaọ iroro ọmaha rai, a vuhumu inọ ere ekpako na a hai gine ru. A ruẹ ọzae nana nọ o ru iruo urirẹ buobu, ọ ta ẹme avọ udu gbe ẹrọwọ, o te je dhesẹ uyoyou ulogbo kẹ Ọghẹnẹ gbe ahwo riẹ. Ọ rrọ ohwo nọ ọ ta nọ ọ ginẹ rrọ—“Ọmọ Devidi” nọ a ya eyaa riẹ, Mesaya na. A wo oghale fiki ẹrọwọ rai, emọ na a tube wo uvẹ-ọghọ nọ a ro ru eruẹaruẹ gba.—Olezi 8:2.

14. Ẹvẹ okẹ nọ emaha a wo na o sai ro fi obọ họ kẹ ai jiri Ọghẹnẹ?

¹⁴ Eme ma rẹ sai wuhrẹ no oriruo yena ze? Emaha na a rẹ sai jiri Jihova ziezi. A wo okẹ nọ a rẹ rọ kaki vuhu uzẹme na mu, jẹ rehọ osegboja gbe ọwhọ whowho ẹrọwọ rai via. A te je wo okẹ nọ a fodẹ evaọ Itẹ 20:29 na: “Ogaga họ oruaro emoha.” Ẹhẹ, whai emaha na wha wo oghale orọ ẹgba—obọdẹ okwakwa nọ wha sai ro jiri Jihova. Ugogo edhere vẹ whọ sae rọ rehọ okẹ yena nọ who wo na ru iruo?

Ẹvẹ Whọ Sai ro Jiri Jihova?

15. Re a sai jiri Jihova ziezi, eme u fo nọ o rẹ wọ ohwo?

¹⁵ Re ohwo ọ ruẹsi jiri Jihova ziezi, udu u re no ze. Whọ sai jiri Jihova ziezi hi otẹrọnọ fikinọ amọfa a gwọlọ nọ who ru ere who bi ro ru ere. Kareghẹhọ ujaje nọ o mae rro evaọ usu izi na: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:37) Kọ who wuhrẹ Ebaibol na te epanọ whọ rọ riẹ Jihova ziezi no? Oware nọ u re no uwuhrẹ utioye na ze họ uyoyou udidi nọ who re wo kẹ Jihova. Ujiro nọ a rẹ rọ kẹe họ edhere nọ a re ro dhesẹ uyoyou utioye na. Nọ who te wo ugogo ẹjiroro gbe osegboja nọ whọ gwọlọ ro jiri Jihova, kiyọ whọ ruẹrẹ oma kpahe no nọ who ti ro ru ere avọ ọwhọ.

16, 17. Didi abọ uruemu u wo evaọ ejiri Jihova? Kẹ oriruo.

¹⁶ Taure who te tube roro kpahe ẹme nọ whọ te ta, kaki roro kpahe oghẹrẹ uruemu nọ who ti dhesẹ. Kọ o hae jọnọ ọmọtẹ ọmaha Izrẹl ọrọ edẹ Elaesha na ọ jọ ọmọ nọ o re veghe-uzou, nọ ọ kare adhẹẹ hayo oruọzewọ, who roro nọ ahwo Siria nọ a mu rie na a hae te rọwo yo eme nọ ọ jẹ ta kpahe ọruẹaro Jihova na? O wọhọ nọ a hae te gaviezọ họ. Epọvo na re, ahwo a te gwọlọ gaviezọ kẹ owhẹ nọ a tẹ ruẹ nọ whẹ yọ ọmọ nọ o wo emamọ uruemu avọ oruọzewọ gbe adhẹẹ. (Ahwo Rom 2:21) Roro kpahe oriruo jọ.

¹⁷ Ọmọtẹ ikpe 11 jọ evaọ Portugal ọ rẹriẹ ovao dhe otunyẹ re ọ ruẹsi koko edẹ-ehaa nọ e wọso obroziẹ-iroro riẹ nọ ọ rehọ Ebaibol wuhrẹ no. Ọ rehọ adhẹẹ ta kẹ iticha riẹ kpahe oware nọ ọ gbẹ te sai ro koko edẹ-ehaa na ha, rekọ iticha na o te je sei ẹkoko. Nọ oke o be nyaharo na, iticha na ọ tẹ jẹ daoma ru oma vo iẹe unuẹse buobu, je sei ẹkoko fikinọ ọ rrọ omọvo Isẹri Jihova. Dede na, ọmọtẹ ọmaha na ọ gbẹ yọrọ uruemu riẹ avọ adhẹẹ. Ikpe jọ nọ i lele i rie, ọmọtẹ ọmaha na ọ tẹ rehọ iruo ọkobaro, wọhọ ọgbodibo oke-kpobi. Eva ekokohọ jọ nọ a kpohọ, o je rri ahwo nọ a be họ-ame o te vuhu omọvo rai jọ. Kpakiyọ iticha riẹ ẹdẹ na! Nọ a gbalọ oma avọ irui oghọghọ no, aye na ọ tẹ ta kẹ ọmọtẹ na inọ uruemu adhẹẹ nọ o dhesẹ okenọ ọ jọ iticha riẹ o re thọrọ iẹe ẹro ho. Osẹri jọ ọ nyae ta usiuwoma kẹe, iticha na ọ tẹ ta kẹ osẹri na kpahe emamọ uruemu ọmọtẹ ọmaha nana okenọ ọye omariẹ ọ rọ jọ iticha riẹ. Onana o soriẹ ze nọ o ro mu uwuhrẹ Ebaibol họ, o te ti dede uzẹme Ebaibol na rehọ. Ẹhẹ, uruemu ra o rẹ sae jọ obọdẹ edhere nọ who re ro jiri Jihova!

18. Eme ọmaha ọ rẹ sai ru otẹrọnọ o re bẹbẹ kẹe re o mu ẹmeọta họ kugbe amọfa kpahe Ebaibol gbe Jihova Ọghẹnẹ?

¹⁸ Kọ o rẹ jọ bẹbẹ kẹ owhẹ ẹsejọ re who mu ẹmeọta họ evaọ obọ isukulu kpahe ẹrọwọ ra? Whẹ ọvo o rrọ ere kẹ hẹ. Dede na, whọ rẹ sai ru ei lọhọ nọ amọfa a rẹ rọ nọ owhẹ kpahe ẹrọwọ ra. Wọhọ oriruo, otẹrọnọ u mukpahe uzi hi yọ a rẹ kẹ ohwo uvẹ re o ru ere, kọ u gbe fo re whọ wha ebe nọ a kere no Ebaibol ze lele oma je se ai evaọ oke eriosehọ uvo hayo oke ofa nọ a rẹ sae kẹ ohwo uvẹ ru ere? Ibe emọ-isukulu ra a sae nọ owhẹ kpahe oware nọ who bi se. Ẹkwoma uyo nọ whọ rẹ kẹ ai gbe oware isiuru jọ nọ whọ ruẹ evaọ uzoẹme jọ hayo obe nọ who bi se na nọ whọ rẹ ta kẹ ae, whọ rẹ sae ruẹ nọ ẹmeọta-kugbe who muhọ no na. Kareghẹhọ nenọ re whọ riẹ oware nọ ibe-emọ isukulu ra a rọwo. Gaviezọ ziezi avọ adhẹẹ, jẹ vuẹ amọfa eware nọ who wuhrẹ no Ebaibol ze. Wọhọ epanọ eware nọ e via nọ a gbiku rai fihọ ẹwẹ-obe avọ 7 u dhesẹ na, emaha buobu a bi jiri Ọghẹnẹ evaọ obọ isukulu. Onana o be kẹ ai oghọghọ ulogbo, u te je bi fi obọ họ kẹ ahwo buobu riẹ Jihova.

19. Ẹvẹ emaha na a sae rọ riẹ ru ziezi evaọ iruo usiuwoma ota nuwou ruọ uwou na?

¹⁹ Usiuwoma ota nuwou ruọ uwou na yọ edhere nọ o woma gaga nọ a re ro jiri Jihova. Otẹrọnọ who ri mu obọ họ ewo evaọ edhere nana ha, kọ eme who gbe ru ei fihọ ute he? Otẹrọnọ who mu usiuwoma ota nuwou ruọ uwou họ no, kọ itee efa e gbẹ riẹ nọ whọ rẹ sai fihọ kẹ omara? Wọhọ oriruo, ukpenọ who re dhe ẹme ọvona ẹwẹwariẹ evaọ unuẹthẹ kpobi nọ who te, gwọlọ idhere nọ who re ro ru ẹnyaharo, nọ mi ọsẹgboni ra hayo amọfa nọ a wo ona ziezi re a kẹ owhẹ iroro-ejẹ nọ i re fi obọ họ kẹ owhẹ. Wuhrẹ epanọ whọ rẹ rọ rehọ Ebaibol na ru iruo ziezi, epanọ who re ro ru emamọ izihebro, gbe epanọ who re ro mu obe-uwuhrẹ Ebaibol họ. (1 Timoti 4:15) Epanọ whọ roma kẹ te re who jiri Jihova evaọ idhere yena, ere who ti wo ona te, yọ ere whọ te reawere odibọgba ra te.

Oke vẹ U Fo nọ Who re ro Mu Jihova họ Ejiri?

20. Fikieme emaha na a gbe ro roro nọ a maha hrọ họ re a jiri Jihova?

²⁰ Eva enọ esa nọ e rrọ uzoẹme nana, uyo onọ urere nana họ onọ o mae lọhọ. Muẹrohọ uyo nọ Ebaibol na e kẹ: “Kareghẹhọ ọnọ ọ ma owhẹ evaọ oke ọmoha ra.” (Ọtausiwoma Na 12:1) Ẹhẹ, enẹna nọ whọ gbẹ rrọ ọmaha na họ oke nọ who re ro mu Jihova họ ejiri. O re lọlọhọ re whọ ta nọ: “Mẹ re kpako te ohwo nọ o re jiri Jihova ha. Ọmọboba gheghe mẹ rrọ. Mẹ rẹ hẹrẹ bẹsenọ mẹ rẹ kpako.” Whẹ họ ohwo ọsosuọ nọ o wo iroro yena ha. Wọhọ oriruo, Jerimaya ọmaha na ọ ta kẹ Jihova nọ: “A, Ọnowo ỌGHẸNẸ! Ri, mẹ riẹ ẹme ẹta ha, keme mẹ ọmaha.” Jihova ọ ta udu họ iẹe awọ inọ ẹjiroro ọvo ọ riẹ nọ ọ rẹ rọ dhozọ họ. (Jerimaya 1:6, 7) Epọvo na re, ma rẹ dhozọ oware ovuovo ho nọ ma te bi jiri Jihova. Oware uyoma ovo o rẹ sai ru omai hi, nọ Jihova ọ rẹ sae kpọvi riẹriẹriẹ hẹ.—Olezi 118:6.

21, 22. Fikieme a rọ rehọ emaha nọ i bi jiri Jihova dhesẹ igrigri-irioke, kọ fikieme ọtadhesẹ yena ọ rọ rrọ oware nọ o rẹ kẹ uduotahawọ?

²¹ Fikiere ma be ta udu họ owhai emaha na awọ nọ: Wha raha oke he re wha te mu Jihova họ ejiri! Enẹna nọ wha rrọ emaha na họ oke nọ o mai woma nọ wha re ro kuomagbe iruo nọ e mai wuzou nọ a bi ru evaọ akpọ na nẹnẹ. Ere oruo wha te rọ jọ abọjọ uviuwou obọdẹ—uviuwou odhiwu gbe otọakpọ orọ ogbotu nọ a bi jiri Jihova. Eva e be were Jihova inọ whọ rrọ omọvo ahwo uviuwou nana. Muẹrohọ eme nana nọ a rehọ ẹgba ẹzi kere nọ ọso-ilezi na ọ ta kẹ Jihova na: ‘Eva edẹ isuẹsu ra ahwo ra a te kẹ owhẹ okẹ nọ u no eva rai ze eva ehru igbehru ọrẹri na. Usu emoha ra i re ti bru owhẹ tha wọhọ igrigri irioke.’—Olezi 110:3.

²² Nọ ọre ohiohiẹ o te bi lo mu igrigri-irioke i re siuru gaga, o gbẹ rrọ ere? I re lo jẹ sasa ohwo oma yọ a rẹ sai kele unu rai hi. Ere Jihova o bi rri owhai emaha na nọ wha be roma totọ jiri ei ziezi evaọ oke obẹbẹ nana. U re vevẹ, unevaze nọ wha rọ salọ nọ wha re jiri Jihova u bi ru eva were iẹe. (Itẹ 27:11) Fikiere, whai emaha na wha dao ẹgba rai kpobi jiri Jihova!

Ẹvẹ Whọ te k’Uyo?

• Obọdẹ ẹjiroro sa-sa vẹ a re ro jiri Jihova?

• Iriruo Ebaibol vẹ i dhesẹ nọ emaha a rẹ sai jiri Jihova ziezi?

• Ẹvẹ emaha a sai ro jiri Jihova nẹnẹ?

• Oke vẹ emaha a re ro mu Jihova họ ejiri, kọ fikieme?

[Iwoho nọ e rrọ ẹwẹ-obe avọ 15]

Otẹrọnọ ogbẹnyusu ra o wo obọdẹ ona jọ, kọ whọ gbẹ te ta ẹme kpahe iẹe kẹ amọfa?

[Uwoho nọ o rrọ ẹwẹ-obe avọ 17]

Ibe emọ-isukulu a sai wo isiuru kpahe orọwọ ra

[Uwoho nọ o rrọ ẹwẹ-obe avọ 18]

Whọ tẹ gwọlọ wo ẹnyaharo evaọ odibọgba ra, nọ mi Osẹri nọ o wo ona re ọ kẹ owhẹ iroro-ejẹ nọ i re fi obọ họ kẹ owhẹ