Joma Jọ “Ọrẹri Evaọ Ozodhẹ Ọghẹnẹ”

BE TA kpahe epanọ Jihova Ọghẹnẹ ọ rọ ọrẹri te, Ebaibol e ta inọ: “Ọrẹri, ọrẹri, ọrẹri ỌNOWO.” (Aiz. 6:3; Evia. 4:8) A rẹ rehọ ẹme na “ọrẹri” evaọ Hibru gbe Griki rọ ta kpahe ẹfuọ uruemu hayo ẹfuọ egagọ, onọ o kare ogbekuo. Ọrẹri nọ Ọghẹnẹ ọ rrọ na u dhesẹ nnọ Ọghẹnẹ ọ fo re evaọ kabọ kabọ.

Kọ Jihova Ọghẹnẹ ọrẹri na, o gbe rẹro mi enọ e be gọe kpobi nọ a rẹ jọ fuafo, evaọ ugboma, uruemu gbe evaọ abọ-ẹzi? Ebaibol na i ru rie vevẹ inọ Jihova ọ gwọlọ nọ ahwo riẹ a rẹ jọ fuafo. Ma jọ obe 1 Pita 1:16 se nọ: “Wha rẹte [jọ] ọrẹri, keme mẹ ọrẹri.” Kọ ahwo akpọ sebaẹgba a rẹ sae ginẹ rọ aro kele Jihova evaọ ẹfuọ? Ee, dede nọ a rẹ sae nwane rọ aro kele iei gbagba wọhọ epanọ ọ rrọ họ. A sai dhesẹ omai nọ ma rọ ọrẹri evaọ aro Ọghẹnẹ otẹrọnọ ma be gọe evaọ emamọ edhere je wo usu okpekpe kugbei.

Kọ ẹvẹ ma sae rọ jọ fuafo evaọ akpọ ogbekuo nana? Iruemu vẹ ma rẹ whaha? Kọ ẹvẹ u fo nọ ẹmeunu gbe uruemu mai o rẹ jọ? Joma ta kpahe oware nọ ma rẹ sai wuhrẹ no oware nọ Ọghẹnẹ ọ gwọlọ mi ahwo Ju ze okenọ a je zihe no Babilọn kpohọ orẹwho rai evaọ 537 B.C.E.

‘Edhere Ọrẹri Ọ Rẹte Jariẹ’

Jihova ọ ta nọ ahwo riẹ nọ a jọ igbo Babilọn a re ti zihe ziọ orẹwho rai. A jọ eruẹaruẹ kpahe ezihetha na kẹ imuẹro enana: “Uvi edhere ọ rẹte jariẹ, a reti se ei Edhere Ọrẹri.” (Aiz. 35:8a) Eme nana i dhesẹ nnọ orọnikọ Jihova o rovie edhere fihọ kẹ ahwo Ju re a kpo ọvo ho, rekọ ọ kẹ rai imuẹro re inọ ọ rẹ te thọ ae evaọ edhere na.

Rọkẹ idibo riẹ nọ e rrọ otọakpọ nẹnẹ, Jihova o rovie “edhere ọrẹri” fihọ onọ ahwo a sai ro no Babilọn Ologbo na, egagọ erue akpọ-soso. Evaọ 1919 o siwi Ileleikristi nọ a wholo na rono igbo egagọ erue, a te ru egagọ rai fo no iwuhrẹ erue. Mai Isẹri Jihova nẹnẹ, ma be reawere uyero udhedhẹ, ofuafo orọ abọ-ẹzi nọ ma sae jọ gọ Jihova je wo emamọ usu kugbei avọ erivẹ mai.

Otu “uthuru okakao” erọ Ileleikristi nọ a wholo na gbe “otu obuobu” ọrọ “igodẹ efa” a salọ no inọ a rẹ nya evaọ edhere ọrẹri a te je bi zizie amọfa re a kuomagbe ai. (Luk 12:32; Evia. 7:9; Jọn 10:16) “Edhere Ọrẹri” o rovie fihọ kẹ ahwo kpobi nọ u no eva ze inọ a re “ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ.”—Rom 12:1.

“Ohwo nọ Ọ Fo Ho Ọ rẹ Nyae Vrẹ Hẹ”

Evaọ 537 B.C.E. ahwo Ju nọ a bi no igbo kpo na a rẹ nyate utee jọ nọ u wuzou gaga. Rọ kpahe ahwo nọ a te enọ e rẹ nya “Edhere Ọrẹri” na, Aizaya 35:8b o ta nọ: “Ohwo nọ ọ fo ho ọ rẹ nyae vrẹ hẹ, igheghẹ e rẹ jariẹ ru ugberuo ho.” Nọ orọnọ ẹjiroro nọ ahwo Ju a bi ro zihe kpohọ Jerusalẹm họ re a wariẹ mu egagọ efuafo họ na, a rẹ te kẹ enọ i wo iroro iyoma uvẹ hẹ, enọ i wo adhẹẹ kẹ eware abọ-ẹzi hi, hayo enọ i bi ru eware etọtọ. O gwọlọ nọ enọ i zihe ze na a rẹ yọrọ utee uruemu nọ Jihova o fihọ. Ahwo nọ a be gwọlọ ọjẹrehọ Ọghẹnẹ nẹnẹ a rẹ nya te utee ovona. A rẹ jọ ‘ọrẹri eva ozodhẹ Ọghẹnẹ’ hrọ. (2 Kọr. 7:1) Kọ iruemu igbegbe vẹ ma rẹ whaha?

Pọl ukọ na o kere nọ: “Iruo uwo e rrọ vevẹ, eye họ ogberẹ-obro, egbegbe, uruemu odode.” (Gal. 5:19, NW) Ẹme Griki nọ a fa igberẹ-ibro na u dhesẹ edhere kpobi nọ a rọ rehọ oma ọzae hayo aye ru iruo evaọ otafe orọo na. Uruemu odode u kugbe “ogberẹ-obro, egbegbe, ẹnwae-obro, uruemu nọ u fo ho.” Ogberẹ-obro gbe uruemu odode e wọso ẹfuọ Jihova. Fikiere, a rẹ kẹ ahwo nọ a ruabọhọ bi ru eware itieye na uvẹ hẹ re a jọ ukoko Ileleikristi na, a re si ai no ukoko na. Ere ọvona o rrọ kẹ ahwo nọ a wo uruemu otọtọ, koyehọ, ‘eghẹrẹ eware igbegbe kpobi.’—Ẹf. 4:19.

‘Egbegbe’ yọ ẹme nọ u kie kpahe imuemu buobu. Ẹme Griki nọ a fa egbegbe na u kie kpahe oghẹrẹ egbegbe kpobi—evaọ uruemu, ẹmeọta, gbe egagọ. O kẹre te iruemu igbegbe nọ ẹsejọhọ a rẹ jọ rọ ohwo guẹdhọ họ.a Ghele na, kọ ahwo nọ a bi ru iruemu igbegbe itieye na a bi gine yeri uzuazọ ọrẹri?

Dae rehọ iẹe inọ Oleleikristi jọ o bi dhere rri ifoto ẹbẹba. Nọ isiuru igbegbe e be rro evaọ eva riẹ ẹmẹrera na, ọtamuo riẹ nọ ọ rọ gwọlọ jọ fuafo evaọ aro Jihova o ve ti muhọ ewhrehe. O sae jọ nọ uruemu riẹ na u ri te onọ a re se egbegbe ọtọtọ họ, rekọ o gbe bi roro kpahe ‘oware kpobi nọ u wo adhẹẹ, oware kpobi nọ u kiẹrẹe, oware kpobi nọ o rrọ ẹfuọ, gbe oware nọ u fo ajiri’ hi. (Fil. 4:8) Ifoto ẹbẹba yọ oware ugbegbe yọ o rẹ raha usu nọ ohwo o wo kugbe Ọghẹnẹ. U fo re a jọ udevie mai fodẹ oghẹrẹ egbegbe ọvo ho.—Ẹf. 5:3.

Joma ta ẹme kpahe oriruo ọfa jọ. Ma rehọ iẹe inọ Oleleikristi jọ o wo uruemu obọ o rọ whrawhra ẹba omobọ riẹ—bi keke aro fihọ kpare isiuru ẹnwa-obro—o make rọnọ o bi rri ifoto ẹbẹba hayo o bi riwi hi. Dede nọ a rẹ jọ Ebaibol na ruẹ ẹme na “obọ o rọ whrawhra ẹba omobọ ohwo” ho, avro ọ riẹ hẹ inọ onana yọ uruemu nọ u re gbe iroro ohwo ku. Kọ ohwo ọ tẹ ruabọhọ egbegbe otiọnana o gbẹ raha usu nọ o wo kugbe Jihova jẹ lẹliẹe jọ gbegbe evaọ aro Ọghẹnẹ? Joma se ohrẹ Pọl ukọ na gboja gaga inọ a jọ “oma ru oma mai fo uno eware nọ i re zue oma gbe ẹzi” je “kpe abọ akpọ nọ e ro oma [mai] no: igberedia, egbegbe, urusio nọ o rẹ vrẹ ẹta, eware iyoma eguọlọ, gbe eware amọfa eguọlo.”—2 Kọr. 7:1; Kọl. 3:5.

Akpọ nana nọ Setan o bi su na o kuvẹ kẹ uruemu ugbegbe, be tubẹ tudu riẹ họ ahwo awọ. Fikiere, re ma dadamu whaha uruemu ugbegbe o rẹ jọ bẹbẹ. Rekọ Ileleikristi uzẹme a rẹ “siọ epanọ ahwo Egedhọ a rẹ nya ba ẹnya, eva iroro diodi eva rai.” (Ẹf. 4:17) Nọ ma tẹ whaha uruemu ugbegbe evaọ idhere hayo evaọ ẹgbede ọvo, Jihova ọ jẹ kẹ omai uvẹ nya “Edhere Ọrẹri” na.

‘Okpohrokpo Ọvo Ọ te Jọ Etẹe He’

Re a wo ọjẹrehọ Jihova, Ọghẹnẹ ọrẹri na, o sae gwọlọ mi ahwo jọ nọ a nwene uruemu gbe ẹmeunu rai. Aizaya 35:9 o ta nọ: “Okpohrokpo ọvo ọ rẹ [jọ] etẹe he, hayo arao ojihẹ ọvo o rete etẹe he,” koyehọ, “Edhere Ọrẹri” na. A rehọ ahwo nọ a re ru ozighi, mu ekpehre ofu, je zue eme họ dhesẹ erao ijihẹ. Ahwo otiọye na a rẹ te jọ akpọ ọkpokpọ Ọghẹnẹ vievie he onọ ẹrẹreokie ọ rẹ te jọ. (Aiz. 11:6; 65:25) Fikiere, o r’oja re ahwo nọ a gwọlọ ọjẹrehọ Ọghẹnẹ a si obọ no oghẹrẹ uruemu erao ijihẹ yena re a yeri uzuazọ ẹfuọ.

Ikereakere na e hrẹ omai nọ: “Wha jọ eyayare kpobi, gbe ofu, gbe evaedha, gbe enuodo, gbe eme iyoma eta, i no owhai obọ, avọ iroro iyoma.” (Ẹf. 4:31) Ma jọ obe Ahwo Kọlọsi 3:8 se nọ: “Wha si eware nana kpobi no unu rai no: evaedha, ofu, egrọẹjẹ, ẹwhọ gbe eme igbegbe eta.” Ẹme na “eme iyoma” hayo “eme igbegbe eta” nọ a jọ eria Ebaibol enana fodẹ na i dhesẹ eme ogbekuo, eme ekela, hayo eme izuehọ.

Nẹnẹ, eme nọ e vọ avọ enwoma i bi wowẹ makọ evaọ iviuwou dede. Enọ e rọo no a rẹ ta eme edada, dhesẹ evegaga, hayo ta eme nọ i re kpomovuọ họ ohwo oma kẹ ohwohwo gbe emọ rai. U fo re a jọ uwou Ileleikristi ta eme iyoma itienana vievie he.—1 Kọr. 5:11.

Re A Jọ “Ọrẹri Evaọ Ozodhẹ Ọghẹnẹ”—Yọ Oghale!

Uvẹ ọghọ riẹ o rro kẹhẹ re ma gọ Jihova, Ọghẹnẹ ọrẹri na! (Jos. 24:19) Aparadase abọ-ẹzi nọ Jihova o se omai ze na o rẹ ghaghae gaga. Uruemu mai nọ ma rẹ yọrọ fuafo evaọ aro Jihova họ uzuazọ nọ o gine mae woma.

Aparadase otọakpọ nọ Ọghẹnẹ ọ ya eyaa riẹ na o rẹ te tha kẹle. (Aiz. 35:1, 2, 5-7) Ahwo nọ a bi rẹro riẹ, jẹ ruabọhọ be nya evaọ edhere Ọghẹnẹ a rẹ te jariẹ. (Aiz. 65:17, 21) Fikiere, joma ruabọhọ Ọghẹnẹ ọgọ avọ eva efuafo jẹ yọrọ usu okpekpe kugbei.

[Oruvẹ-obotọ]

[Uwoho nọ e rrọ ẹwẹ-obe avọ 26]

Eme o gwọlọ mi ahwo Ju re a ruẹsi nya evaọ “Edhere Ọrẹri”?

[Uwoho nọ e rrọ ẹwẹ-obe avọ 27]

Ifoto ẹbẹba iriwo o rẹ raha usu nọ ohwo o wo kugbe Jihova

[Uwoho nọ e rrọ ẹwẹ-obe avọ 28]

“Wha jọ . . . enuodo, gbe eme iyoma eta, i no owhai obọ”