Ekuhọ Emuemu U Muẹro!

ỌGHẸNẸ ọ kẹ omai Ẹme riẹ nọ a rọ ẹgba ẹzi riẹ kere, onọ o ta kpahe oware nọ o soriẹ nọ ahwo a bi ro ru eware iyoma. Ọ tẹ jẹ kẹ omai ufuoma iroro-ejẹ gbe ẹgba nọ ma sai ro dhesẹ oma-oriẹsuo, onọ u re ru ei lọhọ kẹ omai si oma no oware uyoma uruo. (Iziewariẹ 30:15, 16, 19) Fikiere, ma rẹ sai vuhu ekpehre iroro kpobi nọ e rẹ sae ziọ omai udu, jẹ jowọ nọ u fo nọ ma rẹ rọ whaha oware uyoma uruo. Evaọ ukuhọ riẹ, oma nọ ma sino oware uyoma uruo o vẹ te wha evawere se omai gbe erivẹ mai.—Olezi 1:1.

Dede na, ghelọ omodawọ nọ mai omomọvo ma bi ru re ma si oma no oware uyoma, emuemu ọ gbẹ da akpọ na fia fiki eware iyoma nọ ahwo ethube a bi ru. Ebaibol e vẹvẹ unu nọ: “Riẹ onana, nọ eva edẹ urere oke ẹbẹbẹ te tha.” Re ma riẹ oware nọ u ti ru edẹ urere na jọ “oke ẹbẹbẹ,” Ebaibol na e ta haro inọ: “Ahwo a re ti you oma-obọrai, je you igho, a ve ti heri-oheri avọ oma-ovia gbe ekaela, a re ti yo ẹme e nọ i yẹ rai hi, a rẹ te jọ ababọ uyere-ọghọ gbe ababọ ẹfuọ, a wo eva egaga, a re koko eya ha, a rẹ raha odẹ ahwo, a wo oma-onyẹ hẹ, avọ ofu-ọkpoo, a re mukpahe ahwo ezi, otu ovivie, avọ uzou-uveghe, otu okpiro, enọ i yowọ enu-awere siọ Ọghẹnẹ ba, a rẹ yọrọ oghẹrẹ egagọ a vẹ vro ogaga nọ o rọ eva riẹ. Si oma no oghẹrẹ ahwo otiọye.”—2 Timoti 3:1-5.

Ẹsejọhọ who muẹrohọ ẹme na “edẹ urere” evaọ eruẹaruẹ Ebaibol nana. Ẹvẹ who wo otoriẹ ẹme yena? Wọhọ epanọ ahwo buobu a riẹ, nọ a tẹ ta nọ “edẹ urere,” u dhesẹ nọ oware jọ u bi te ekuhọ. Eme o rẹ sae jọnọ u bi te ekuhọ na? Muẹrohọ eyaa nọ Ọghẹnẹ ọ ya evaọ Ebaibol na.

A te raha irumuomu no riẹriẹriẹ.

“Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—OLEZI 37:10, 11.

“ỌNOWO na ọ rẹ yọrọ enọ i you rie kpobi; rekọ iru-umuomu na kpobi ọ rẹ raha ae.” —OLEZI 145:20.

Okienyẹ ọ gbẹ te jariẹ ofa ha.

“Okenọ oruori o se rie, o re si yei, ere re, o re siwi oyogbere gbe ọnọ o wo ọthuke he. O [ti] siwi uzuazọ rai no okienyẹ avọ ozighi.” —OLEZI 72:12, 14.

“Ukpuzou enama na a reti si ei no igbo egbogbo eruọ eva uvẹ oruaro emọ Ọghẹnẹ.”—AHWO ROM 8:21.

A ti ru ẹgwọlọ abọ-iwo ahwo-akpọ gba kẹ ae.

“Ohwo kpobi ọ rẹ te keria otọ ekakọ gbe otọ ure fig riẹ, ozọ ohwo ọvo u gbe ti mu ai hi.”—MAEKA 4:4.

“A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ. A gbẹ te bọ iwou no re omọfa ọ ria e he, a gbẹ te kọ no re omọfa ọ re he. Epanọ ire e rẹ tọ te na ere ahwo mẹ a rẹ te tọ te, jegbe esanọ mẹ na a rẹ te re erere iruo abọ rai krẹkri.”—AIZAYA 65:21, 22.

Oziẹ-okiẹrẹe ọ te da oria kpobi fia.

“Kọ Ọghẹnẹ o gbe bruoziẹ esanọ riẹ e nọ i bi bo kẹ e te uvo te aso . . . ? Mẹ ta kẹ owhai, o re ti bruoziẹ rai vẹrẹ.”—LUK 18:7, 8.

“ỌNOWO o you oziẹokiẹrẹe; ọ rẹ se erezi riẹ hẹ. Ọ rẹ sẹro okiẹrẹe na bẹdẹ.”—OLEZI 37:28.

Ẹrẹreokie ọ te rehọ ẹta ẹzi oriobọ.

“Ahwo nọ e rọ akpọ na a ve [ti] wuhrẹ ẹrẹreokie.”—AIZAYA 26:9.

“Wọhọ epaọ eya riẹ, ma rẹ hẹrẹ ihru ekpokpọ avọ akpọ ọkpokpọ enọ ẹrẹreokie ọ be ria.”—2 PITA 3:13.

Ahwo A bi Nwene Uzuazọ Rai—Makọ Enẹna

Ababọ avro, eyaa yena e rẹ were omai kpobi oma. Rekọ eme ọ kẹ imuẹro inọ eyaa nana i ti rugba? Ẹhẹ, makọ enẹna ma wo imuẹro nọ i dhesẹ inọ eyaa Ọghẹnẹ i ti rugba. Imuẹro vẹ ye? Enwene nọ ima ahwo buobu wariẹ akpọ na họ nẹnẹ a ru no, nọ a ro si obọ no uzuazọ uvo-uthei, ọfariẹ-ogbe, hayo uzuazọ ugbarugba nọ a je yeri vẹre, je zihe ruọ ahwo oruọzewọ, enọ i re ru udhedhẹ, je dhesẹ ẹwo. Isẹri Jihova nọ i bu vrẹ ima ihrẹ wariẹ akpọ na họ nẹnẹ yọ inievo akpọ-soso nọ e nyasiọ egrẹ uyẹ, omohẹriẹ orẹwho, isuẹsu gbe eware itieye na efa ba no, eware nọ e wha ohẹriẹ, ozighi, gbe azẹ-okpe ze no evaọ ikuigbe ohwo-akpọ.a Nọ o rọnọ inwene itieye na e be rehọ oma via nẹnẹ na, ma wo imuẹro egaga inọ eyaa Ọghẹnẹ i ti rugba evaọ edhere nọ o vi oyena.

Rekọ eme ọ be wha inwene itieye na ze? Ma rẹ ruẹ uyo na evaọ eyaa efa jọ nọ e rrọ Ebaibol na, onọ Aizaya ọruẹaro na o kere fihotọ. O kere nọ:

“Arao-ojihẹ o ti lele omogodẹ ria, ẹkpẹ avọ ọmọẹwe a ti ruẹ oria ovo, ọmọ-eruẹ gbe okpohrokpo a te jọ kugbe ọmaha o veti su ai. . . . Okpohrokpo ọ te re ẹbe wọhọ eruẹ-ọzae. Ọmọ-unuevie ọ te jọ eghogho araomuomu nọ a re se ọrẹwọkpẹwọ zaharo, ọmọ nọ ọ whẹro uno o ti dhe obọ họ unu obi. Eva ugbehru ẹri mẹ na a te [jariẹ] nwaoma hayo ekpe he, keme akpọ na ọ te vọ avọ eriariẹ ỌNOWO na wọhọ epanọ ame ọ vọ abade.”—Aizaya 11:6-9.

Kọ oke nọ erao e te rọ rria kugbe ahwo-akpọ dhedhẹ evaọ obaro ọvo eruẹaruẹ nana e be ta kpahe? Ijo, u vi ere. Muẹrohọ inọ abọ urere eruẹaruẹ na u dhesẹ oware nọ o te wha inwene na ze: “Akpọ na ọ te vọ avọ eriariẹ ỌNOWO na.” Kọ eriariẹ Ọghẹnẹ i re nwene uruemu erao? Ijo. Rekọ eriariẹ yena e rẹ sai nwene ahwo, yọ i bi gine nwene ahwo nẹnẹ! Eruẹaruẹ nana i dhesẹ nọ ahwo jọ nọ i wo uruemu erao vẹre a ti fi oyena họ akotọ, a ve fi uruemu Kristi họ oma fikinọ a bi fi eware nọ a jọ Ebaibol wuhrẹ họ iruo evaọ uzuazọ rai.

Wọhọ oriruo, roro kpahe Pedro.b O je roro nọ ọ be họre kẹ uvioziẹ okenọ o kuomagbe ukoko ozighi ọkparesuọ. Nọ ahwo utu ọkparesuọ na a wuhrẹ iẹe no, a tẹ ta kẹe nọ ọ nyae sa ogba iporisi jọ kuotọ. Nọ ọ be ruẹrẹ oma kpahe re o ti ru ere na, a te mu ei. Pedro ọ jọ uwou-odi emerae ikpegberee, rekọ ọ gbẹ jọ etẹe jẹ gwọlọ epanọ ọ rẹ rọ wha iruẹru ọkparesuọ na haro. Evaọ oke oyena, Isẹri Jihova a te mu Ebaibol họ ewuhrẹ kugbe aye Pedro. Nọ Pedro o no uwou-odi ze no, o te mu Ebaibol na họ ewuhrẹ re; eware nọ o wuhrẹ kpahe Jihova Ọghẹnẹ e tẹ wọe ru inwene ilogbo evaọ uruemu gbe eriwo riẹ kpahe uzuazọ. Ọ ta nọ: “Me yere Jihova inọ mẹ rọ obọmẹ kpe ohwo ọvo ho evaọ etoke nọ mẹ rọ jọ omọvo utu ọkparesuọ na.” Ọ ta re inọ: “Enẹna, mẹ be rehọ ọgbọdọ ẹzi Ọghẹnẹ, Ebaibol na, rọ vuẹ ahwo ovuẹ orọ uvi udhedhẹ gbe uvioziẹ—emamọ usi Uvie Ọghẹnẹ.” Pedro o tube kpohọ ogba iporisi nọ o je ti kporo kuotọ na nyai whowho ovuẹ udhedhẹ gbe orọ akpọ nọ ozighi ọ te jọ họ.

Oghẹrẹ nọ Ẹme Ọghẹnẹ ọ be sai ro nwene ahwo u bi ru evaifihọ mai ga inọ eyaa Ọghẹnẹ kpahe ekuhọ emuemu u muẹro. Ẹhẹ, ahwo a te ruabọhọ eyoma oruo ribri hi, a ti nwene kpohọ onọ u woma. Kẹle na, Jihova o ti si Setan Ẹdhọ n’otọ, ọnọ ọ tuọ emuemu họ je bi su akpọ gale uzou vi na. Ebaibol e ta nọ: “Akpọ na ọsoso ọ rọ obọ ogaga oyoma na.” (1 Jọn 5:19) Rekọ a te raha iẹe no kẹle. A te jẹ raha ahwo nọ a se thahethahe inọ a re si obọ no edhere omuomu rai hi. Ẹvẹ o te jọ oware evawere te re a rria etoke otioye na!

Eme ohwo o re ru re ọ sai wo imuẹro inọ ọ te rria akpọ yena? Kareghẹhọ inọ “eriariẹ ỌNOWO na” họ oware nọ o be wọ ahwo nwene edhere omuomu rai nẹnẹ gbe inọ oye ovona o te wha enwene otọakpọ soso ze evaọ obaro kẹle na. Ẹkwoma eriariẹ egbagba Ebaibol na nọ who re wo je fihọ iruo evaọ uzuazọ—wọhọ epanọ Pedro o ru na—whọ sai rẹro ẹria akpọ nọ “ẹrẹreokie ọ be ria.” (2 Pita 3:13) Fikiere, ma ta udu họ owhẹ awọ inọ whọ rọ uvẹ nọ u gbe rovie fihọ na ro wuhrẹ eriariẹ Ọghẹnẹ gbe Jesu Kristi, keme oyena o rẹ sai ru owhẹ wo uzuazọ ebẹdẹ bẹdẹ.—Jọn 17:3.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 9]

Whọ sai rẹro ẹria akpọ nọ “ẹrẹreokie ọ be ria.”—2 PITA 3:13