“Ofu Ọgaga Mẹ Ọ te Wọ Ze”

1-3. (a) Eme ọ te via nọ Jihova o ti mu “ofu ọgaga” riẹ na? (Rri uwoho nọ o rrọ emuhọ uzou nana.) (b) Eme ma te ta kpahe obọnana?

TE EZAE te eyae, gbe emaha a dikihẹ oria ovo be so ile ukoko na. Kẹsena ọkpako ukoko jọ ọ tẹ lẹ, be yare Jihova inọ ọ thọ ae. Ahwo ukoko na kpobi a rẹroso Jihova inọ ọ te rẹrote ai, ghele na a gwọlọ omosasọ gbe uduotahawọ. Evaọ oke nana, yọ obọ otafe o duwuku avọ edo ahwo nọ a be họre. Ẹmo Amagidọn o muhọ no!​—Evia. 16:14, 16.

² Evaọ ẹmo Amagidọn na, Jihova ọ te raha ahwo avọ “ofu ọgaga.” (Se Izikiẹl 38:18.) Orọnikọ ogbaẹmo ọvo jọ hayo orẹwho ọvo jọ Jihova ọ te rọ ofu raha ha, rekọ ahwo buobu nọ a rẹ sai kele mu hu evaọ otọakpọ na soso. Evaọ ẹdẹ yena, ahwo nọ Jihova o ti kpe “a te jọ no oka jọ evaọ otọakpọ na rite oka odekọ evaọ otọakpọ na.”​—Jeri. 25:29, 33.

³ Eme ọ te lẹliẹ Jihova, Ọghẹnẹ oyoyou na, ọnọ a dhesẹ nọ “o wo ohrọ-oriọ gbe ọdawẹ, nọ ọ rẹ kaki mu ofu hu” na mu “ofu ọgaga” otioye? (Ọny. 34:6; 1 Jọn 4:16) Joma ruẹ oghẹrẹ nọ uyo onọ yena o sae rọ kẹ omai omosasọ ulogbo, jẹ kẹ omai udu, gbe ajọwha nọ ma rẹ rọ ta usi uwoma na nẹnẹ.

4, 5. Oghẹrẹ vẹ ofu Ọghẹnẹ o ro wo ohẹriẹ no ọrọ ahwo-akpọ nọ a gba ha?

⁴ Orọ ọsosuọ, u fo nọ ma kareghẹhọ nọ ofu Jihova ọ wọhọ ọrọ ahwo-akpọ nọ a gba ha ha. Nọ ohwo-akpọ ọ tẹ rọ ofu ọgaga ru oware jọ, oware nọ u re noi ze ẹsibuobu u re woma ha. Wọhọ oriruo, fikinọ Jihova ọ jẹ idhe Keni rehọ họ, yọ ọ jẹ erọ Ebẹle rehọ, “eva e . . . dha Keni gaga,” ọmọ ọsosuọ Adamu na. Kọ eme o no rie ze? Keni o te kpe oniọvo riẹ nọ ọ rrọ ohwo okiẹrẹe. (Emu. 4:3-8; Hib. 11:4) Ofariẹ, roro kpahe Devidi, ọnọ a jọ Ebaibol na dhesẹ nọ ọ jọ ọzae nọ o kiehọ udu Jihova. (Iruẹru 13:22) Ghele epanọ ọzae nana o woma te na, o je ti ru oware uyoma jọ okenọ o yo nọ Nebale ọdafe na ọ la ọyomariẹ avọ ahwo riẹ eka. Ofu o mu Devidi avọ isoja riẹ te epanọ a rọ wọ, “gba egbọdọ rai fihọ oma,” re a nyai kpe Nebale gbe ọzae kpobi nọ ọ rrọ uwou riẹ no. Rekọ aye Nebale nọ a re se Abigẹle, o kie ofu Devidi avọ ahwo riẹ, onọ o soriẹ nọ a ro zihe. (1 Sam. 25:9-14, 32, 33) Oyejabọ nọ Jihova ọ rọ rehọ ẹzi riẹ wọ Jemis kere nọ: “Ofu ohwo-akpọ u re ru ei ru oware nọ u kiẹrẹe evaọ aro Ọghẹnẹ hẹ.”​—Jem. 1:20.

⁵ Wo ohẹriẹ no ohwo-akpọ nọ ọ rẹ sae kpọ ofu riẹ hẹ, Jihova ọ rẹ kpọ ofu riẹ ẹsikpobi, o re mu ofu mu hu. O tẹ make rọnọ Jihova o mu ofu ọgaga dede, o re ru oware nọ u kiẹrẹe. Nọ ọ tẹ be họre ọwegrẹ, o re kpe “ikiẹrẹe na kugbe irumuomu na” vievie he. (Emu. 18:22-25) U te no ere no, fiki ẹjiroro nọ o kiẹrẹe ọvo Jihova o re ro mu ofu. Joma ta kpahe ẹjiroro ivẹ jọ gbe oware nọ ma rẹ sai wuhrẹ no ai ze.

 6. Eme Jihova o re ru nọ a te gbe odẹ riẹ ku?

⁶ Ẹjiroro ọsosuọ: Nọ a te gbe odẹ Jihova ku. Ahwo kpobi nọ a bi dhesẹ omarai wọhọ ahwo Jihova rekọ nọ a bi ru eware iyoma, a be raha odẹ Ọghẹnẹ yọ onana o rẹ kpare ofu Ọghẹnẹ. (Izik. 36:23) Wọhọ epanọ ma jọ obe nana wuhrẹ vrẹ no na, orẹwho Izrẹl u gbe odẹ Jihova ku gaga. Uruemu orẹwho na gbe eware nọ a je ru e lẹliẹ eva dha Jihova. Rekọ Jihova ọ kpọ ofu riẹ, ọ kẹ rai uye te epanọ u fo ọvo, o ru vrẹ ere he. (Jeri. 30:11) Nọ ofu Jihova o te ru ẹjiroro riẹ gba no, o re gbe fi ẹgo họ eva ha.​—Ol. 103:9.

7, 8. Eme ma wuhrẹ no oghẹrẹ nọ Jihova o ro yerikugbe ahwo Izrẹl ze?

⁷ Eware nọ ma wuhrẹ noi ze: Oghẹrẹ nọ Jihova o ro yerikugbe ahwo Izrẹl na yọ unuovẹvẹ kẹ omai gaga. Wọhọ ahwo Izrẹl oke anwae, ma wo uvẹ-ọghọ nọ a be rọ rehọ odẹ Jihova se omai. Mai yọ Isẹri Jihova. (Aiz. 43:10) Fikiere, ẹmeunu gbe uruemu mai u re dhesẹ oghẹrẹ ohwo nọ Ọghẹnẹ ọ rrọ. U fo vievie he re ma keke aro fihọ raha uzi, keme oyena u re gbe odẹ Jihova ku. Oghẹrẹ uruemu eviẹhọ utioye na o rẹ kpare ofu Jihova, yọ o rẹ raha oke he, Jihova o ve ru oware jọ re o ru odẹ riẹ fo.​—Hib. 3:13, 15; 2 Pita 2:1, 2.

⁸ Kọ fikinọ a ta nọ Jihova o re mu “ofu ọgaga,” o rẹ whae ze nọ ma gbe ro si kẹle iẹe he? Vievie. Ma riẹ nọ Jihova o wo odiri, yọ ọ rẹ rọvrẹ. (Aiz. 55:7; Rom 2:4) Ma tẹ jẹ riẹ nọ Jihova o re rri ovao ho nọ ohwo o te ru oware nọ o gwọlọ nọ a rẹ jọ kẹe ọwhọkuo. Evaọ uzẹme, onana u re ru omai wo adhẹẹ odidi kẹe, keme ma riẹ nọ o re mu ofu kẹ ohwo kpobi nọ ọ ruabọhọ edhere uzioraha, yọ ọ rẹ kẹ oghẹrẹ ahwo otiọye uvẹ re a jọ udevie ahwo riẹ hẹ. (1 Kọr. 5:11-13) Jihova ọ vuẹ omai vevẹ no kpahe oware nọ o rẹ lẹliẹe mu ofu. Fikiere, obọ mai o rrọ re ma whaha iruemu hayo oware kpobi nọ o rẹ kpare ofu riẹ.​—Jọn 3:36; Rom 1:26-32; Jem. 4:8.

9, 10. Eme Jihova o ru nọ a jẹ gwọlọ kpe idibo riẹ no? Kẹ oriruo.

⁹ Ẹjiroro avivẹ: Nọ a tẹ be gwọlọ epanọ a re ro kpe idibo Jihova. Jihova o re mu ofu nọ ewegrẹ e tẹ be họre idibo riẹ nọ e rẹroso iẹe je bi yoẹme kẹe. Wọhọ oriruo, nọ ahwo Izrẹl a no Ijipti no, Fẹro avọ egbaẹmo egaga riẹ a tẹ wọ bru ai nọ a kokohọ unueri Abade Ọwawae na, keme a rri rai wọhọ ahwo nọ a wo ohwo ọvo nọ o bi fiobọhọ kẹ ai hi. Rekọ nọ ogbaẹmo ogaga ahwo Ijipti yena a le ahwo Izrẹl na ruọ otọ abade na nọ o jọ yaya na, Jihova o te si etẹ ekẹkẹ rai no, o te nuhu ahwo Ijipti na fihọ abade na. “A kẹ makọ ọvo evaọ usu rai uvẹ re ọ zọ họ.” (Ọny. 14:25-28) Jihova o mu ofu kẹ ahwo Ijipti na keme o wo “uyoyou . . . nọ o rẹ hiẹ hẹ” kẹ ahwo riẹ.​—Se Ọnyano 15:9-13.

¹⁰ Epọvo na re, uyoyou nọ Jihova o wo kẹ ahwo riẹ oye o lẹliẹ e riẹ jowọ evaọ oke Hẹzikaya ovie na. Ahwo Asiria, ogbaẹmo nọ o mae ga jẹ mae geva kpaobọ evaọ oke yena a wọ ẹmo ziọ okpẹwho Jerusalẹm re a raha iẹe no. Fikinọ a gwọlọ kpe idibo Jihova no, a tẹ ta nọ a ti ko okpẹwho na họ, onọ u ti ru ahwo na whu uwhu oja keme a te sai no okpẹwho na ze ti ru oware ovo ho. (2 Iv. 18:27) Onana o tẹ whae ze nọ Jihova o ro vi ukọ-odhiwu ọvuọvo; ukọ-odhiwu na o te kpe egbaẹmo idu udhuzii-gbisoi (185,000) erọ ahwo Asiria na evaọ aso ọvo! (2 Iv. 19:34, 35) Dai roro epanọ evuẹ ahwo Asiria na ọ jọ evaọ ohiohiẹ okiokiọ riẹ. Izuẹ, ejese, gbe egbọdọ e rrọ otọ. Edo ọgba ọvuọvo ọ rọwo ezae na ze he. Ubo ovuovo u se egbaẹmo na kokohọ họ. Evuẹ na soso ọ jọ fọfọ rirẹ, yọ iri ahwo e vọ otọ.

11. Oghẹrẹ vẹ iriruo Ebaibol nọ e ta kpahe oware nọ Jihova o ru okenọ a jẹ gwọlọ kpe ahwo riẹ no e rẹ rọ kẹ omai omosasọ gbe udu?

¹¹ Eware nọ ma wuhrẹ noi ze: Iriruo yena nọ i dhesẹ oware nọ Jihova o ru evaọ okenọ a jẹ gwọlọ kpe ahwo riẹ no na yọ unuovẹvẹ ogaga kẹ ewegrẹ mai: “O rrọ oware imuozọ re ohwo o kie fihọ abọ Ọghẹnẹ nọ ọ rrọ uzuazọ na” nọ o te mu ofu. (Hib. 10:31) Rọkẹ omai, iriruo yena e rẹ kẹ omai omosasọ je ru omai wo udu vi epaọ ọsosuọ. Ma riẹ nọ ọwegrẹ ologbo mai, Setan, ọ te kparobọ họ, yọ onana o be kẹ omai omosasọ. Kẹle na, “omoke kakao” nọ o wo nọ o bi ro su na u ti kuhọ! (Evia. 12:12) Bọwo oke yena, ma rẹ sae gọ Jihova avọ udu, inọ ohwo ọvo, hayo ukoko ovuovo, hayo egọmeti ọvuọvo ọ rẹ sae whaha omai oreva Ọghẹnẹ uruo ho. (Se Olezi 118:6-9.) Pọl ukọ na ọ nwane ta ẹme nọ ọ kẹ omai imuẹro yena, inọ: “Ọghẹnẹ ọ tẹ rrọ abọ mai, ono ọ rẹ sae rọsuọ omai?”​—Rom 8:31.

12. Evaọ etoke uye ulogbo na, eme ọ te lẹliẹ Jihova mu ofu ọgaga?

¹² Evaọ etoke uye ulogbo nọ o be tha na, Jihova ọ te thọ omai, nwane wọhọ epanọ o ru kẹ ahwo Izrẹl nọ ahwo Ijipti a je le na gbe ahwo Ju nọ ahwo Asiria a ko họ evaọ Jerusalẹm na. Nọ ewegrẹ mai e tẹ be gwọlọ epanọ a rẹ rọ raha omai no, uyoyou udidi nọ Jihova o wo kẹ omai o te lẹliẹe mu ofu ọgaga. Nọ a tẹ zaharo riẹ họre omai, o te wọhọ ẹsenọ a bi dhobọte ọmọ-ẹro Jihova. Yọ Jihova ọ te jowọ kpata kpata, ọ te raha oke he. (Zẹk. 2:8, 9) Ahwo nọ a ti kpe a ti bu wo umuo ho. Rekọ u fo nọ u re gbe ewegrẹ Jihova unu vievie he inọ Ọghẹnẹ o mu ofu ọgaga otiọye kẹ ae. Fikieme ma rọ ta ere?

13. Unuovẹvẹ sa-sa vẹ Jihova ọ kẹ no?

¹³ Jihova “ọ rẹ kaki mu ofu hu,” yọ ọ kẹ unuovẹvẹ sa-sa no inọ ọ te raha ahwo nọ a wọso iẹe jẹ be gwọlọ epanọ a re ro kpe ahwo riẹ no. (Ọny. 34:6, 7) Jihova ọ rehọ eruẹaro wọhọ Jerimaya, Izikiẹl, Daniẹl, Kristi Jesu, gbe ikọ wọhọ Pita, Pọl, gbe Jọn rọ vẹvẹ ahwo unu kpahe ẹmo ologbo jọ nọ ọ be tha.​—Rri ẹkpẹti na, “Jihova Ọ be Vẹvẹ Ahwo Unu Kpahe Ẹmo Ologbo nọ Ọ be Tha Na.”

14, 15. Eme Jihova o ru no, kọ fikieme?

¹⁴ Jihova o ru nọ a ro kere unuovẹvẹ sa-sa nana kpobi fihọ Ebaibol na. Ọ tẹ jẹ ruẹ nọ Ebaibol na ọ rẹ jọ obe nọ a mae fa jẹ mae ghale no evaọ ikuigbe ohwo-akpọ. Evaọ akpọ na soso, Jihova o ru nọ ogbaẹmo ahwo buobu a rọ fialoma via re a fiobọhọ kẹ ahwo wo emamọ usu kugbei, a tẹ jẹ be vẹvẹ ahwo unu kpahe “ẹdẹ ologbo Jihova” nọ ọ be tha na. (Zẹf. 1:14; Ol. 2:10-12; 110:3) Jihova o fiobọhọ kẹ ahwo riẹ fa ebe sa-sa nọ a re ro wuhrẹ Ebaibol na fihọ evẹrẹ udhusoi buobu no, yọ kukpe kukpe a be rehọ euwa ima buobu rọ vuẹ amọfa kpahe eyaa gbe unuovẹvẹ sa-sa nọ e rrọ Ẹme riẹ, Ebaibol na.

¹⁵ Jihova o ru nọ a bi ro ru iruo nana kpobi “keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9) A rẹ ruẹ obọ uvẹ-ọghọ riẹ hẹ nọ ma bi ro dikihẹ kẹ Ọghẹnẹ mai nọ ọ rrọ yoyou nọ o wo odiri na, je bi wo amabọjọ evaọ ewhowho ovuẹ riẹ! Kẹle na, oke o gbẹ te jariẹ hẹ nọ ahwo nọ a kezọ kẹ unuovẹvẹ na ha a ti ro kurẹriẹ.

16, 17. Kọ Jihova o fi ẹdẹ ẹmo urere na họ no? Ru ei vẹ.

¹⁶ Jihova o fi ẹdẹ ẹmo urere na họ no. Ọ riẹ okenọ ewegrẹ a te rọ gwọlọ raha ahwo riẹ no. (Mat. 24:36) Ẹvẹ Jihova ọ rọ riẹ okenọ ewegrẹ riẹ a te rọ họre ahwo riẹ?

¹⁷ Wọhọ epanọ ma ruẹ evaọ uzou nọ o vrẹ na, Jihova ọ ta kẹ Gọg nọ: “Mẹ [te] jẹ eghọlọ họ agba ra.” Jihova o ti ru re erẹwho na a họre ohọre na. (Izik. 38:4) Orọnikọ onana u dhesẹ nọ Jihova họ ọnọ o ti mu ohọre nana họ họ; yọ ọ te gba ahwo nọ a be wọso iẹe na họ gbe he. Ukpoye, onana u dhesẹ nọ Jihova ọ te kpọ eware re erẹwho na a ru ere, keme ọ rẹ sae riẹ oware nọ o rrọ udu ohwo, yọ ọ riẹ oware nọ ewegrẹ riẹ a rẹ sai ru nọ oghẹrẹ uvẹ jọ u te rovie fihọ kẹ ae.​—Ol. 94:11; Aiz. 46:9, 10; Jeri. 17:10.

18. Fikieme ahwo-akpọ a te rọ họre Ọghẹnẹ Erumeru na?

¹⁸ Kọ otẹrọnọ Jihova họ ọnọ o ti mu ohọre na họ họ, yọ ọ te gba ewegrẹ riẹ họ mu ohọre na họ gbe he, fikieme ahwo-akpọ gheghe a te rọ gwọlọ họre Ọghẹnẹ Erumeru na? Oware jọ nọ o soriẹ ze họ, o sae jọ nọ evaọ etoke nana evaọ ikuigbe ohwo-akpọ, a ti roro nọ Ọghẹnẹ ọ rrọ họ hayo inọ o ti dhomahọ iruẹru ahwo-akpọ họ. Ẹsejọhọ a ti wo iroro nana keme evaọ oke nana yọ a voro egagọ erue kpobi no otọakpọ na no. Fikiere, a ve ti roro nọ, otẹrọnọ Ọghẹnẹ ọ ginẹ rrọ, ọ hae te thọ ahwo egagọ nọ e ta nọ a be gọe na. A te riẹ hẹ inọ Ọghẹnẹ họ ọnọ o fi iroro na họ udu rai re a raha egagọ erue no, enọ i gbe odẹ Ọghẹnẹ ku gaga no na.​—Evia. 17:16, 17.

19. Ẹsejọhọ, eme ọ te via nọ a tẹ raha egagọ erue no?

¹⁹ Evaọ oke jọ nọ a tẹ raha egagọ erue no, o sae jọ nọ Jihova o ti ru re ahwo riẹ a whowho ovuẹ ogaga jọ, onọ obe Eviavia u dhesẹ wọhọ oso-itho nọ utho ovuovo o gbẹdẹ te enwenọ ubro ẹkpa isimeti. (Evia. 16:21, ẹme-obotọ.) Ẹsejọhọ a ti whowho ovuẹ nọ o te ta nọ egọmeti gbe ekiọthuọ akpọ nana i bi ti kuhọ. Ovuẹ nana o te rrorro ahwo na oma te epanọ a te rọ ta eme-aghọ kpahe Ọghẹnẹ. O sae jọ nọ ovuẹ nana o te kpare ofu erẹwho na nọ a te rọ wọ re a nwane raha ahwo Ọghẹnẹ kpobi no riẹriẹriẹ. A ti roro nọ a wo ohwo ọvo nọ ọ rẹ thọ ae he, inọ oware olọlọhọ gheghe o rrọ re a raha ai no. A ti roro thọ gaga!

20, 21. Ono họ Gọg, kọ eme ọ te via kẹe?

²⁰ Wọhọ epanọ ma ruẹ evaọ Uzou avọ 17 obe nana, Izikiẹl ọ jọ eruẹaruẹ se erẹwho sa-sa nọ i ti kuomagbe họre omai na, “Gọg ọrọ ẹkwotọ Magọg.” (Izik. 38:2) Rekọ erẹwho sa-sa nọ i ti kuomagbe na a ti wo emamọ okugbe ọvuọvo ho, usu rai o te jọ wọhọ oware nọ a rọ ufi gheghe thuru kugbe nọ o ga ha. O te jọ ere keme, ẹzi oma-uhrowo, omorro, gbe orẹwho mẹ o mai woma e te gbẹ jariẹ. O te bẹ Jihova ha re o ru ai rehọ ọgbọdọ rai omomọvo “họre omoni obọriẹ.” (Izik. 38:21) Rekọ orọnikọ ohwo-akpọ jọ ọ te raha erẹwho na ha.

²¹ Taure a tẹ te raha ewegrẹ mai na, a te ruẹ oka Ọmọ ohwo, ẹsejọhọ oware nọ u ti dhesẹ ogaga ulogbo Jihova avọ Jesu via. Ewegrẹ na a te ruẹ eware nọ e te lẹliẹ ozọ mu ai gaga. Wọhọ epanọ Jesu ọ ta, “ahwo a ti kie ewawa fiki ozọ gbe irẹro eware nọ e te via evaọ otọakpọ na.” (Luk 21:25-27) Ozọ nọ o te jarai oma u ti ru ai vuhumu nọ kpakọ a roro thọ nọ a be rọ họre ahwo Jihova. A vẹ te riẹ nọ Ọmemama na họ ọnọ o wuzou ogbaẹmo na, Jihova olori egbaẹmo. (Ol. 46:6-11; Izik. 38:23) Ababọ avro, Jihova o ti siobọno egbaẹmo obọ odhiwu na gbe emama efa re ọ rehọ ae thọ idibo riẹ, ọ vẹ raha ewegrẹ riẹ.​—Se 2 Pita 2:9.

22, 23. Amono a te thọ ahwo Ọghẹnẹ, kọ oghẹrẹ vẹ o wọhọ nọ iruo yena o te jarai oma?

²² Dai roro epanọ oma o be kpakpa Jesu te re ọ kobaro kẹ ahwo nọ a te raha ewegrẹ Ọghẹnẹ, re ọ jẹ thọ enọ i you Ọsẹ riẹ jẹ be gọe. Epọvo na oma o be kpakpa enọ a rọ ẹzi wholo na. Evaọ oke jọ taure ẹmo Amagidọn o te ti muhọ, a te kpare enọ i kiọkọ evaọ usu ahwo idu udhuhrẹ-gbene (144,000) na kpobọ odhiwu re aikpobi a kuomagbe Jesu fi ẹmo na. (Evia. 17:12-14) Ababọ avro, ibuobu enọ a rọ ẹzi wholo na avọ igodẹ efa na a wo usu okpekpe gaga no fiki iruo nọ a je ru kugbe evaọ oke urere na. Yọ evaọ oke nana, enọ a rọ ẹzi wholo na a ti wo udu gbe ogaga nọ a rẹ rọ thọ enọ i je fiobọhọ kẹ ae evaọ etoke edawọ sa-sa nọ i je te ai.​—Mat. 25:31-40.

²³ Ikọ-odhiwu e te jọ usu egbaẹmo obọ odhiwu Jesu re. (2 Tẹs. 1:7; Evia. 19:14) A fiobọhọ kẹ Jesu no vẹre okenọ a le Setan avọ idhivẹri riẹ no obọ odhiwu. (Evia. 12:7-9) Yọ a je fiobọhọ koko ahwo nọ a gwọlọ gọ Jihova họ evaọ otọakpọ na re. (Evia. 14:6, 7) Fikiere u woma gaga inọ Jihova ọ te kẹ ikọ-odhiwu na uvẹ re a thọ idibo riẹ nana! Oware nọ o mae rrọ ogbaẹmo Jihova oja họ, odẹ Jihova nọ a re ru fo jẹ kpare kpehru ẹkwoma ewegrẹ riẹ nọ a rẹ raha no, yọ a rri rie nọ onana yọ uvẹ-ọghọ ulogbo.​—Mat. 6:9, 10.

24. Eme ogbotu obuobu ọrọ igodẹ efa na a ti ru?

²⁴ U wo oware ovuovo nọ o rẹ lẹliẹ ozọ mu ogbotu obuobu igodẹ efa na ha keme a wo ogbaẹmo nọ o rrọ gaga nọ o ruẹrẹ oma kpahe no re o thọ ae. A ti “dikihẹ kpomavi jẹ kpare uzou rai rri ehru keme esiwo rai ọ be kẹle no.” (Luk 21:28) Fikiere, o roja re ma fiobọhọ kẹ ahwo buobu riẹ Jihova je you Ọsẹ mai nọ ọ vọ avọ ohrọ-oriọ nọ ọ be thọ omai na, taure ẹdẹ Jihova ọ tẹ te ze!​—Se Zẹfanaya 2:2, 3.

25. Eme ma te ta kpahe evaọ uzou nọ u lele onana?

²⁵ Nọ ahwo-akpọ a te fi ẹmo kuhọ no, uye o rẹ bẹ ahwo yọ eware kpobi e rẹ jọ fariẹ fariẹ. Rekọ, nọ ẹmo Amagidọn o te fi kuhọ no, evawere e te jariẹ yọ eware kpobi e te jọ kpatiẹ. Kọ ẹvẹ eware e te jọ nọ ofu Jihova o te hrẹ no, nọ egbaẹmo Jihova i te dhe egbọdọ rai fihọ owa no, nọ edo ẹmo ologbo na o je do serihọ no? Ma te jọ uzou nọ u lele onana ta kpahe epanọ obaro na ọ te jọ nọ eware nana e tẹ vrẹ no.