Inievo nọ I Wo Okugbe

EVAỌ oware ikpe odu ọvo gbe egba isoi (1,500), Jihova Ọghẹnẹ ọ rehọ orẹwho Izrẹl fihọ ahwo riẹ nọ a jẹ rọ odẹ riẹ se. Kẹsena Jihova ọ tẹ “rẹriẹ ovao rri erẹwho na re ọ jọ udevie rai rehọ ahwo kẹ odẹ riẹ.” (Iruẹru 15:14) Ahwo nọ a rrọ kẹ odẹ Jihova na a rẹ te jọ isẹri riẹ, a rẹ jọ ọvo evaọ iroro gbe oghẹrẹ nọ a re ru eware ghelọ oria nọ a rrọ kẹhẹ evaọ otọakpọ na. Ẹkwoma iruo nọ Jesu ọ kẹ ilele riẹ na a ti ro koko ahwo họ kẹ odẹ Ọghẹnẹ, Jesu ọ ta kẹ ae nọ: “Fikiere wha nya, re wha ru ahwo zihe ruọ ilele evaọ udevie ahwo erẹwho na kpobi, wha họ ae ame evaọ odẹ Ọsẹ na gbe Ọmọ na gbe ẹzi ọfuafo na, wha wuhrẹ ae re a ru eware kpobi nọ me jie uzi rai kẹ owhai.”​—Mat. 28:19, 20.

² Nọ whọ roma mudhe kẹ Jihova jẹ họ-ame no na, who zihe ruọ olele Jesu Kristi no. Whọ rrọ usu inievo akpọ-soso nọ i wo okugbe, enọ e rẹ kuvẹ re orẹwho hayo uyẹ nọ ohwo o no ze, hayo epanọ ohwo o fe te hayo yogbe te o wha ohẹriẹ fihọ udevie rai hi. (Ol. 133:1) Fiki oyena, who you jẹ be rọ adhẹẹ kẹ inievo Ileleikristi ra evaọ ukoko na. O sae jọ nọ ejọ rai a rrọ ahwo ovioma hayo orẹwho ofa, a kpohọ isukulu vi owhẹ hayo a kpohọ isukulu te owhẹ hẹ, yọ o sae jọ nọ a jọ ahwo nọ whọ jẹ hae rọwo nya kẹle vẹre he fiki ohẹriẹ utionana. Whọ rrọ usu inievo nọ i wo uyoyou nọ o ga vi orọ usu ofa kpobi, u vi onọ o rẹ jọ udevie egbẹnyusu, ahwo egagọ efa, hayo uviuwou.​—Mak 10:29, 30; Kọl. 3:14; 1 Pita 1:22.

³ Otẹrọnọ o rrọ bẹbẹ kẹ ahwo jọ re a siobọno uruemu omagbẹre nọ a wo fiki ovioma rai, orẹwho rai, epanọ a nyaharo te evaọ akpọ na hayo eware efa nọ e rẹ wha omagbẹre ze nọ e reria oma no, u fo re a roro kpahe Ileleikristi ahwo Ju ikpe-udhusoi ọsosuọ na, enọ i siobọno uruemu omagbẹre nọ egagọ ahwo Ju a wo kpahe ahwo erẹwho efa kpobi. Okenọ Jihova ọ ta kẹ Pita nọ o kpobọ uwou Kọniliọs, oletu ogbaẹmo ahwo Rom nọ o wuzou isoja udhusoi, ọ ruẹrẹ Pita họ kẹ iruo na.​—Iruẹru Ikọ, uzou avọ 10.

⁴ A ta kẹ Pita evaọ eruẹaruẹ inọ o kpe jẹ re oghẹrẹ erao jọ nọ e jọ eware nọ e fo ho kẹ ahwo Ju. Nọ Pita ọ se, urru jọ nọ u no obọ odhiwu ze o tẹ ta kẹe nọ: “Who gbe se eware nọ Ọghẹnẹ o ru fo no eware etọtọ họ.” (Iruẹru 10:15) Oware nana nọ Ọghẹnẹ o ru na oye o ruẹrẹ udu Pita kpahe kẹ iruo nọ a be te kẹe na, koyehọ, re o kpobọ uwou ohwo erẹwho na. Nọ Pita o kpobọ uwou Kọniliọs wọhọ epanọ Jihova o vi rie, Pita ọ ta kẹ enọ i kokohọ na nọ: “Wha riẹ vevẹ epanọ o thọ te re ohwo Ju o kuomagbe hayo nyabru ohwo uyẹ ofa, rekọ Ọghẹnẹ o dhesẹ kẹ omẹ no inọ me du se ohwo ọvo ọtọtọ hayo ọnọ ọ fo ho ho. Fikiere nọ a nyaze ti se omẹ, mẹ tẹ nyaze, mẹ se he.” (Iruẹru 10:28, 29) Kẹsena, Pita ọ tẹ rọ ẹro ruẹ epanọ Jihova o ro dhesẹ nọ ọ jẹ Kọniliọs avọ ahwo uwou riẹ rehọ no.

⁵ Sọl ohwo Tasọs, nọ ọ jọ ohwo Farisi nọ o wuhrẹ thabọ gaga, o hrẹ omariẹ kpotọ o te je kuomagbe ahwo nọ ọ jẹ hae nya usu kugbe vẹre vievie he. Ahwo nana a jẹ tubẹ ta oware nọ o re ru kẹe dede. (Iruẹru 4:13; Gal. 1:13-20; Fil. 3:4-11) U mu omai ẹro inọ ahwo wọhọ Sẹjiọs Pọlọs, Diọnisiọs, Damaris, Filimọn, Onẹsimọs, gbe amọfa nọ a jẹ usi uwoma na rehọ je zihe ruọ ilele Jesu Kristi a nwene iroro rai gaga.​—Iruẹru 13:6-12; 17:22, 33, 34; Filim. 8-20.

⁶ Ababọ avro, uyoyou-inievo nọ o rrọ ukoko na u fiobọhọ kẹ owhẹ si kẹle Jihova gbe ukoko riẹ. Who muẹrohọ uvi uyoyou nọ o rrọ udevie ilele uzẹme Jesu Kristi, wọhọ epanọ ọ ta riẹ inọ: “Mẹ be kẹ owhai ujaje okpokpọ inọ wha you ohwohwo; nwane wọhọ epanọ me you owhai na, wha you ohwohwo re. Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.” (Jọn 13:34, 35) Who tube you Jihova avọ ukoko riẹ viere nọ whọ ruẹ vuhumu inọ uyoyou nọ o rrọ ukoko nọ whọ rrọ na yọ amabọ jọ gheghe ọrọ uyoyou nọ o rrọ udevie inievo na evaọ akpọ-soso. Whọ be ruẹ orugba eruẹaruẹ Ebaibol nọ o ta kpahe ahwo nọ a ti kokohọ evaọ edẹ urere na re a gọ Jihova evaọ udhedhẹ gbe okugbe.​—Mae. 4:1-5.

⁷ Ma te roro kpahe eware buobu nọ e be wha ohẹriẹ ze nẹnẹ, ono ọ rẹ sai roro nọ o rẹ lọhọ re a koko ahwo họ “no erẹwho, erua, itu ahwo gbe erọunu kpobi ze” fihọ ọvo? (Evia. 7:9) Dai rri omohẹriẹ nọ o rrọ udevie enọ i rovie aro gaga avọ enọ e gbẹ talamu iruemu oke anwae. Roro kpahe ahwo ovioma gbe orẹwho ovona nọ e be họre omoma rai fiki egagọ. Ẹzi orẹwho-mẹ-oja nọ o da oria kpobi fia nẹnẹ u bi ru ahwo hẹriẹ omarai fihọ eko isuẹsu sa-sa vi epaọ anwẹdẹ. Yọ who te roro kpahe ohẹriẹ nọ o rrọ udevie edafe gbe iyogbe gbe eware efa buobu nọ e be wha ohẹriẹ ze, re a ru ahwo nọ a no erẹwho, evẹrẹ, itu ahwo gbe oghoghẹrẹ ahwo kpobi ze wo okugbe gbe uyoyou ogaga nọ oware ovo o sae raha ha gbe udhedhẹ yọ oware igbunu nọ Ọghẹnẹ Erumeru na ọvo ọ rẹ sai ru.​—Zẹk. 4:6.

⁸ Rekọ okugbe yena ọ rrọ ukoko na, yọ okenọ who zihe ruọ Osẹri Jihova nọ ọ roma mudhe jẹ họ-ame no, who ro kuomagbe okugbe-inievo nana. Nọ who bi wo erere no okugbe yena ze na, o gwọlọ nọ who re ru epanọ okugbe na o rẹ gbẹ rọ jariẹ. Re who ru ere o gwọlọ nọ who re ru epanọ Pọl ukọ na ọ ta evaọ obe Ahwo Galesha 6:10 inọ: “Nọ ma gbe wo uvẹ na, joma ru oware uwoma kẹ ahwo kpobi, rekọ maero rọkẹ enọ ma gbẹ rrọ ẹrọwọ na.” Ma re je ru lele ohrẹ nana: “Wha rehọ ẹwhọ hayo omorro ru oware ovo ho, rekọ avọ omaurokpotọ wha rri amọfa inọ a rro vi owhai, wha gwọlọ ewoma obọrai ọvo ho, rekọ ewoma amọfa re.” (Fil. 2:3, 4) Nọ ma bi wuhrẹ omamai re ma rri inievo-emezae gbe inievo-emetẹ mai epanọ Jihova o bi rri rai, orọnikọ wọhọ epanọ a rrọ evaọ okafe he na, ma ti gbe wo udhedhẹ gbe evawere evaọ udevie mai.​—Ẹf. 4:23, 24.

⁹ Wọhọ epanọ Pọl ukọ na o dhesẹ kẹ omai, ohẹriẹ o rrọ udevie ukoko na ha, ukpoye, ahwo kpobi nọ a rrọ eva riẹ a wo ọdawẹ kẹ ohwohwo. (1 Kọr. 12:14-26) Dede nọ ma thabọ gaga no otujọ evaọ okugbe-inievo akpọ-soso mai na, oyena o wha riẹ ze nọ ma gbe bi ro roro kpahe ae he he. Otẹrọnọ a bi kpokpo inievo mai jọ, o rẹ kẹ omai enọ i kiọkọ idhọvẹ gaga. Otẹrọnọ ọbẹwẹ ọ rrọ ejọ oma, eware okpẹtu e via kẹ ae, ẹmo hayo ozighi o fi rai họ ababọ, oma o rẹ wọ ahwo ọdekọ re a gwọlọ idhere nọ a rẹ rọ bọ ẹrọwọ rai ga, jẹ kẹ ae eware nọ a rẹ rọ rẹrote omarai.​—2 Kọr. 1:8-11.

¹⁰ U fo re mai kpobi ma hae lẹ roro inievo mai kẹdẹ kẹdẹ. Ejọ e be rẹriẹ ovao ku odawọ nọ a re ro ru oware uyoma. Uye nọ ejọ e be ruẹ o sae jọ oware nọ ahwo buobu a riẹ kpahe. Efa jọ e be rẹriẹ ovao dhe ebẹbẹ nọ umutho ahwo a riẹ kpahe, wọhọ oriruo, ibe-iruiruo rai gbe ahwo uwou rai nọ a rrọ egagọ efa nọ e be wọso ae. (Mat. 10:35, 36; 1 Tẹs. 2:14) Onana o be kẹ omai uye keme mai kpobi yọ inievo akpọ-soso. (1 Pita 5:9) Ahwo jọ a rrọ udevie mai na nọ a bi ru iruo gaga evaọ egagọ Jihova, be kobaro evaọ iruo usi uwoma ota na jẹ be rẹrote ikoko na. Ejọ e tẹ jẹ riẹ nọ a ro mu nọ e be rẹrote iruo akpọ-soso mai na. O gwọlọ nọ ma rẹ lẹ roro ahwo nana kpobi, keme ere ma re ro dhesẹ uyoyou mai gbe uvi isiuru nọ ma wo kpahe ae, o tẹ make wọhọ nọ oware ofa o riẹ nọ ma sai ru ro fiobọhọ kẹ ae he.​—Ẹf. 1:16; 1 Tẹs. 1:2, 3; 5:25.

¹¹ Fiki ebẹbẹ nọ e rrọ otọakpọ na evaọ edẹ urere nana, ahwo Jihova a rẹ ruẹrẹ oma kpahe re a fiobọhọ kẹ ohwohwo. Evaọ ẹsejọ, o sae gwọlọ nọ a re ru ọruẹrẹfihotọ ogbodhẹ je koko eware buobu họ ro fiobọhọ fiki eware okpẹtu nọ e be via, wọhọ etọ nọ i bi nuhu gbe owhe nọ o bi ku eware raha. Ileleikristi ikpe-udhusoi ọsosuọ a fi emamọ oriruo hotọ evaọ abọ nana. Fikinọ a kareghẹhọ ohrẹ Jesu, ilele nọ e jọ Antiọk a rehọ evawere vi eware se inievo obọ Judia evaọ okenọ ohọo u je mu. (Iruẹru 11:27-30; 20:35) Uwhremu na, Pọl ukọ na ọ tuduhọ inievo obọ Kọrint awọ inọ a fiobọhọ evaọ eware nọ a jẹ zọhọ rọ dhogbo, onọ a je ru kpatiẹ. (2 Kọr. 9:1-15) Evaọ oke mai na, nọ okpẹtu o te te inievo mai yọ a gwọlọ obufihọ, ukoko na gbe Oleleikristi ọvuọvo a re fiobọhọ vẹrẹ vẹrẹ jẹ rehọ eware nọ a gwọlọ kẹ ae.

¹² A koko inievo akpọ-soso mai nọ i wo okugbe na họ re ma ru oreva Jihova. Obọnana, oreva riẹ họ a rẹ ta usi uwoma Uvie na evaọ akpọ na soso re o jọ isẹri kẹ erẹwho na kpobi. (Mat. 24:14) Nọ ma bi ru iruo nana, Jihova ọ gwọlọ nọ ma wo uruemu nọ o rọwokugbe izi ikiẹrẹe riẹ. (1 Pita 1:14-16) U re no omai eva ze re ma romakpotọ kẹ ohwohwo je ru epanọ iruo usi uwoma ota na e rẹ rọ nyaharo. (Ẹf. 5:21) O roja enẹna vi epaọ anwẹdẹ re ma rọ Uvie Ọghẹnẹ karo evaọ uzuazọ mai orọnikọ eware obọmai ma rẹ rọ karo ho. (Mat. 6:33) Ma tẹ be hae kareghẹhọ onana nọ ma bi ruiruo kugbe evaọ iruo usi uwoma ota na o rẹ wha oghọghọ ze enẹna, o vẹ te jẹ wha eghale ebẹdẹ bẹdẹ ze.

¹³ Mai Isẹri Jihova yọ ahwo oghẹrẹsa, a salọ omai no udevie ahwo-akpọ kpobi ze re ma jọ ahwo ọfuafo nọ i wo ọwhọ kẹ iruo Ọghẹnẹ mai. (Tait. 2:14) Jihova nọ ma be gọ o lẹliẹ omai wo ohẹriẹ. Orọnikọ ma be rehọ eva evo ruiruo kugbe inievo mai nọ e rrọ otọakpọ na soso ọvo ho rekọ ma be jẹ ẹvẹrẹ ọvo, koyehọ uzẹme na, ma te je bi yeri uzuazọ mai lele uzẹme na. A ruẹaro onana okenọ Jihova ọ rehọ Zẹfanaya ọruẹaro riẹ whowho nọ: “Me ti nwene ẹvẹrẹ ahwo na kpohọ ẹvẹrẹ ọgbagba, re aikpobi a ruẹsi se odẹ Jihova, re a gọe no ẹkoko te ẹkoko.”​—Zẹf. 3:9.

¹⁴ Kẹsena Jihova ọ tẹ rehọ ẹzi riẹ wọ Zẹfanaya dhesẹ okugbe-inievo akpọ-soso mai nọ ma be ruẹ nẹnẹ na, inọ: “Ahwo Izrẹl nọ a kiọkọ a ti ru umuomu hu; a te ta ọrue he, yọ a te jọ unu rai ruẹ ẹrọo eviẹhọ họ; a te re emu je kiẹzẹ, yọ ohwo ọvo o ti ru ozọ mu ai hi.” (Zẹf. 3:13) Fikinọ ma wo otoriẹ Ẹme Jihova nọ ọ rrọ uzẹme na je nwene iroro mai gbe edhere uzuazọ mai rọwokugbe izi Jihova no, ma be sai ru eware evaọ okugbe. Ma bi ru oware nọ o wọhọ nọ a rẹ sai ru hu evaọ eriwo ahwo-akpọ. Ẹhẹ, mai yọ ahwo nọ a gine wo ohẹriẹ, ahwo Ọghẹnẹ, nọ e be wha orro sei evaọ otọakpọ na soso.​—Mae. 2:12.